جۆتیار عەلی: ل سەر مافێ خوە بێ دەنگ نابین و شەڕێ مە بۆ ناسناڤی یە
قەیس وەیس:
بۆ ماوەیەكە دناڤا فدراسیۆنا باسكێت بۆلا ئیراقێ دا ناكۆكی دناڤبەرا كۆمەكا ئەندامێن فدراسیۆنێ پەیدابوویە، پشكەكا ئەندامان مافی ددەتە یانەیا زاخۆ دو یاریێن خوە یێن فینالێ ل یاریگەها خوە بكەت و پشكەكا وان بووینە ڕێگر ژ وانا محەمەد رەحیم، حەسەن ئەكرەم، عەلا جەبار و سەعید ئەحمەد كو دخوازن یاریێن فینالا خولێ هەموو ل بەغدا بهێنە كرن، ئەڤچەندە ناكۆكی پەیدا كرییە، لدۆر هەلوەستێ یانەیا زاخۆ جوتیار عەلی ڕاهێنەرێ تیمێ ب توندی ئەڤان بزاڤان ڕەدكەت.
ل دەستپێكێ ناڤهاتی گۆت: بەری دەستپێكرنا وەرزێ ئەڤ سالە لدووڤ ڕێنمایان هەر یانەیەكێ مافێ هەیی یاریێ دناڤ ئەردێ خوە ژی دا بكەت د هەموو قووناغێن یاریێ دا هەتا فینالێ ژی، لێ ب مخابنی ڤە پشتی تیما مە دەربازبوویە یارییا دووماهییا خولێ بەرانبەر یانەیا دیفاع ئەلجەوی كو ئەو ژی یا باژێرێ بەغدایە، كۆمەكا ئەندامێن فدراسیۆنێ بزاڤێ دكەن كو جەماوەرێ مە هیچ یارییەكا فینالێ دناڤ ئەردێ خوە دا نە بنیت، ئەڤە ژی سەرپێچییەكە و زولمەكە ل مە دهێتە كرن، لەوما ژی د ڕازی نینن و ل سەر مافێ خوە بێ دەنگ نابین.
ژلایەكێ دووڤە جوتیار عەلی گۆت: جهێ سەرنجراكێشیێ یە ل شوونا ئەندامێن فدراسیۆنێ پشتەڤانێن هەموو یانەیان بن لێ یێ فەرق و جوداهیێ دكەن و ئالیگێرییا خوە بۆ دیفاع ئەلجەوی ب شێوەیەكێ نهێنی دیار دكەن، ئەڤە ژی زولمە و دیار دكەت ئەوان دڤێت ناسناڤ بۆ یانەیەكا بەغدایی بیت و مە بێ بەهر بكەن لێ ئەم دێ ل سەر بجهئینانا مافێ خوە بەردەوامبین و شەڕی بۆ دەستڤە ئینانا ناسناڤی كەین.
بۆ زانین د سیستەمێ یارییا دووماهیێ فینالا خولا ئیراقێ دا دناڤبەرا زاخۆ و دیفاع ئەلجەوی هەتا پێنچ یارییان ژی دێ هێنە كرن ژبۆ دیاركرنا خودانێ سێ سەركەڤتییان و ببیتە قارەمانێ وەرزێ ئەڤ سالە، ئانكو هەر یانەیەك دێ ب شێوەیێ خول دو گەر یاریێ دناڤ ئەرد و جەماوەرێ خوە دا كەت، هەكە هەر تیمەكێ دو سەركەڤتن ئینان یارییا پێنجێ دێ بیتە یا ڤەبر ل یاریگەهەكا بێ لایەن هێتە كرن.
تیما باسكێت بۆلا یانەیا زاخۆ پلێتا دەربازبوون بۆ فینالا خولا ئیراقێ یا پیشەكاران ب دەستڤە ئینا پشتی شیایی د دیارییا دویێ ژ چارچووڤەیێ قووناغا چارگۆشەیا زێرین سەركەڤتنێ ل سەر هەڤڕكا خوە نەفت میسان بینیت ب ئەنجامێ 81 خالان بەرانبەر 51 خالان، د یارییا واندا ئەوا ل هۆلا گرتییا بنگەهێ وەرزش و لاوێن زاخۆ هاتیە كرن.
هەژی گۆتنێ یە بۆ جارا ئێكێ یە د دیرۆكا خوە یانەیا زاخۆ ب گەهیتە فیالێ پشتی شیایی د یاریێن خوە یێن چارگۆشەیا زێرین سەركەڤتنێ ل سەر هەڤڕكا خوە نەفت میسان بینیت
بۆ زانین د دیرۆكا خولا باسكێت بۆلا ئیراقێ یانەیا دهۆك پێنج جاران ناسناڤ ب دەستڤە ئینایە، پترترین یانە ناسناڤ دەستڤە ئینایی یانەیا كەرخ بوویە، هەروەسان هەر ئێك ژ یانەیێن نەفت حەفت جاران، ئەلرەشید پێنج جاران، دیفاع ئەلجەوی جار جاران، حللە و شورتە هەر ئێك سێ جاران، جەیش و كارەبا هەر ئێك دو جاران و یانەیا جەوییە جارەكێ.
