مەكتەبا رێكخستنا پارتی ل بەهدینان ب هەلكەفتا هاتنا جەژنا «چلێ هاڤینێ» یا ئێزدییان برۆسكەكا پیرۆزباهیێ‌ بەلاڤكریە و تێدا هاتیە: گەرمترین پیرۆزباهییان ل تەڤایا ئێزدیخانێ، جەنابێ میرێ ئێزدییان، بابا شێخ و هەموو چلەگران دكەین، ئۆمێدەوارین ئەڤ جەژنە یا تەبایی، ئێكڕێزی و پێكڤەژیانێ بیت.
ئاشكرا ژی كریە كو ب درێژاهییا دیرۆكێ كورد ئاشتیخوازن، فەرهەنگا پێكڤەژیانێ و هەڤدوقەبوولكرنێ ئافراندییە، هەر وەكو د سەبەقەكا ئێزدیاتییێ دا هاتی: «چی دنیایەكە رەنگینە، یە تژیە ژ ئۆل و مەزهەب و دینە، هەر كەسەك ب زارێ خۆ خودێیێ خۆ دحەبینە»
دیسا برۆسكەیا مەكتەبا رێكخستنێ‌ دا هاتیە: «جەژنا چلێ هاڤینێ، كو هەڤدەمە ل گەل سالڤەگەڕا دوازدێ یا جینۆسایدا ئێزدییان، لەوما دوعا ژ یەزدانێ مەزن دكەین، تەڤاهی گرتیێن دەستێ تیرۆرا رەش ئازادببن، هەروەسا خەلكێ مە یێ ئاوارە و پەریشان دوبارە ب سەربلندی ڤەگەڕنە وارێ خۆ، ل ڤێرە ژی جارەكا دی دوپات دكەین، بجهئینانا رێككەفتنا شنگالێ، تاكە چارەیە ژ بۆ ئاسایبوونا رەوشا شەنگالێ و ڤەگەڕاندنا روومەتا خەلكێ مە، دوبارە جەژنا وە پیرۆز بیت».

دهۆك، دلۆڤان ئاكرەیی:

رێڤەبەرێ گشتی یێ باژێرڤانیان ل پارێزگەها دهۆكێ دیاركر، بەرهەڤی دهێنە كرن ل ناڤەراستا ڤێ‌ مەهێ‌ نێزیكی هەشت هزار پارچەیێن ئەردی ل سەر فەرمانبەران ل سنۆرێ پارێزگەها دهۆكێ نەخاسمە ل دەڤەرداریا سێمێلێ‌ و ناوچەداریا مسێریكێ بهێنە بەلاڤكرن.
دیار بەحری، رێڤەبەرێ گشتی یێ باژێرڤانیان ل پارێزگەها دهۆكێ بۆ رۆژنامەیا ئەڤرۆ گۆت: «د نوكە دا بەرهەڤیێن تمام دهێنە كرن، بۆ بەلاڤكرنا وان پارچەیێن ئەردی، ئەو پارچەیێن ئەردی ل دەڤەرا زاوا، كو دبیتە سنۆرێ دهۆكێ و سێمێلێ و مسێریكێ و رۆڤیا دێ‌ هێنە بەلاڤكرن».
گۆت ژی: «ئەڤ پارچەیێن ئەردی زووتر داهێنە بەلاڤكرن، بەلێ ئاڕێشەیەكا تەكنیكی هەبوو و مە بڕیار دا، ئەو ئاڕێشەیە بهێتە چارەسەركرن و ل ناڤەراستا ڤێ‌ مەهێ‌ بهێنە بەلاڤكرن».

ئامێدیێ، مەحمود نهێلی:

ژ بۆ پتر گرنگیدان ب كەرتێ گەشتیاری و راكێشانا گەشتیاران بۆ دەڤەرا ئامێدیێ، كاركرن د چێكرنا پرا شیشەیی دا ل سیلاڤێ بەردەوامە و نوكە گەهشتیە قووناغێن كۆنكریتكرنێ.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیاركر، هەر ژ دەستپێكا دەست ب كاربوونا كابینەیا نەهێ یا حوكمەتا هەرێما كوردستانێ، گرنگیەكا تابیەت دایە كەرتێ گەشتیاری ل سەرانسەری كوردستانێ و دەڤەرا ئامێدیێ ژی بێ بەهر نەبوویە ژ وان پڕۆژیان و گۆت: «ل سەر بودجا تابیەتا پارێزگەها دهوكێ 16 پڕۆژەیێن گەشتیاری ل دەڤەرا ئامێدیێ هاتینە بجهئینان، هندەك ژ وان پرشۆژەیان ب دووماهی هاتینە و كەفتینە د خزمەتا گەشتیاران دا».
گۆت ژی: «پڕۆژەیێ چێكرنا پرا شیشەی ئێك ژ وان پڕۆژەیانە، نوكە كارتێدا دهێتە كرن و گەهشتیە قووناغێن كۆنكریتكرنێ، بلنداهیا پرێ‌ 54 مەترن و درێژاهیا وێ‌ 93 مەترن و فرەهیا وێ‌ ژی چار مەترن، كو دكەڤیتە سیلاڤێ ل هنداڤی رووبارێ ئامێدیێ و دێ یا پیادە بیت، پڕۆژە ب گوژمێ ئێك ملیار و 740 ملیۆن دیناران دهێتە بجهئینان».

هەولێر، قائید میرۆ:

بەرپرسێ نڤیسینگەها رزگاركرنا رەڤاندیان ئاشكراكر، هێشتا دو هزار و 500 رەڤاندی ماینە و نەهاتینە رزگاركرن و دبێژیت: ئەم پێشبینی دكەین پڕانیا وان ل وەلاتێ سووریێ بن، ب تایبەتی د ناڤا خێزانێن چەكدارێن داعشێ‌ دا.
حسێن قائیدی، بەرپرسێ نڤیسینگەها رزگاركرنا رەڤاندیان بۆ رۆژناما ئەڤرۆ دیاركر، هەر ژ دەستپیكا جینۆسایدكرنا كوردێن ئێزدی، لسەر فەرمانا نێچیرڤان بارزانی، سەرۆكێ هەرێما كوردستانێ نڤیسینگەها رزگاركرنا رەڤاندیان ل سالا 2014ێ هاتە ڤەكرن و گۆت: «ل دەستپێكێ ئەم شیاین ئامارەكێ كۆم بكەین و بۆ مە دەركەفت شەش هزار 417 وەلاتی هاتینە رەڤاندن و چارەنڤیسێ وان دیار نینە، هەتا نوكە ئەم شیاینە سێ هزار و 595 كەسان رزگار بكەین و هێشتا دو هزار و 500 كەس ژی ماینە و نەهاتینە رزگاركرن».
گۆت ژی: «ل گورەی دووڤچوونا هاتیە كرن، پڕانیا كەسێن هەتا نوكە نەهاتینە ئازادكرن ل وەلاتێ سووریێ ماینە، ب تایبەتی د ناڤا خێزانێن چەكدارێن داعشێ‌ یێن ل كەمپا هۆلێ، نوكە ئەو كەمپ هاتیە گرتن و بۆ كەمپەكا دی ل نێزیك سنۆرێ لبنان هاتیە ڤەگوهاستن، هەروەسا دهێتە چاڤەڕێكرن هندەك ژ وان رەڤاندیێن كوردێن ئیزدی بۆ وەلاتێن دی ژی هاتبنە ڤەگوهاستن، چونكی ل چەند رۆژێن بۆری مە كچەكا ئێزدی ل وەلاتێ فەلەستینێ دیت و هاتە رزگاكرن».

رەمەزان زەكەریا:

سەرۆكاتیا باژێرڤانیا ئاكرێ دەست ب بەرهەڤیان كریە بۆ گەهاندنا خزمەتگوزارییان بۆ وان سێ هزار و 500 پارچەیێن ئەردی، ئەوێن ل سێ قووناغێن جودا دا لسەر فەرمانبەرێن دەڤەرێ هاتینە بەلاڤكرن.
بلند ڕەزا، سەرۆكێ باژێرڤانیا ئاكرێ بۆ ئەڤرۆ گۆت: «سەرۆكاتیا باژێرڤانیا ئاكرێ پلانەك دانایە، كو د دەمێ سێ مەهان دا، رێكێن هەموو وان پارچەیێن ئەردی بهێتە ڕاكێشان یێن هاتینە بەلاڤكرن، ڤێ چەندێ ژی وەكریە، خودانێن ئەردان جهێ خۆ بزانن و فەرمانگەهێن ئاڤ و كارەبێ ژی بشێن هێلێن خۆ ب سەناهی ڕابكێشن».
گۆت ژی: «ئەڤ پرۆسێسا خزمەتگوزاریێ ب تنێ پارچەیێن ئەردی یێن نوو ڤەناگریت، بۆ وان پارچەیێن ئەردی ژی دێ چیت، ئەوێن ل سالێن 2009 و 2010 لسەر فەرمانبەران هاتینە بەلاڤكرن، چونكی ئەو ژی د كەڤنە هەمان سنۆری دا و ڕێك بۆ وان ژی دهێتە ڕاكێشان».

دهۆك، لەزگین جۆقی:

بەری 12 سالان و د رۆژەكا وەكی ئەڤرۆ دا، تیرۆرستێن داعشێ‌ هیرشی شنگالێ‌ كرن، ب سەدان كەس ئاوارەبوون و گەلەك كچ و ژن و زارۆك هاتنە گرتن و بێ سەروشوون كرن.
پیر دەیان جەعفەر، رێڤەبەرێ كۆچ و كۆچبەران ل دهۆكێ بۆ رۆژناما ئەڤرۆ خویا كر، ئاوارەیێن شنگالێ باوەری ب ئیراقێ نەمایە، هەر كابینەكا بهێت سۆزێ ددەتە ئاوارەیان، كو رەوشا شنگالێ‌ ئاسایی بكەت، لێ سۆزێن خۆ بجه نائینن و گۆت: «هەتا نكە 270 هزار كەسێن ئاوارە ل دهۆكێ و زاخۆ ماینە، ژ بەر نەبوونا تەناهی و خزمەتگوزارییان، نەشیاینە ڤەگەڕنە جهێن خۆ، مخابن حوكمەتا ئیراقێ نەیا رژدە د كەیسا شنگالێ دا».
گۆت ژی: «هەتا نوكە چارەنڤیسێ پتر ژ دو هزار رەڤاندیێن ئێزدی دیارنینە، ب هەڤكاری و پشتەڤانیا حوكمەتا هەرێما كوردستانێ پتر ژ سی هزار و 500 كەسان هاتینە رزگاركرن».