قەیس وەیس:

چاڤەڕێ‌ دهێتە كرن ئەڤرۆ پێنچ یاریێن مایی ژ هەڤڕكیێن خولا ستێرێن ئیراقێ‌ یا فوتبۆلێ‌ بهێنە كرن، یانەیێن دهۆك و زاخۆ دیدارێن ئاگرین هەنە و نەورۆز بەرانبەر دەلیڤەیەكا زێرین یا دەستڤەئینانا سێ‌ خالانە.
كلاسیكۆ ب تاما كوردستانی
بڕیارە سوبەهی چارشەمبی یاریگەها یانەیا دهۆك یا وەرزشی ل دەمژمێر 11:15 شەڤ ببیتە جهێ‌ روودانەكا دی یا یاریێن گەڕا 23ێ‌ ژ خولا ستێرێن ئیراقێ‌ ئەوا دێ‌ یانەیا دهۆك مێڤاندارییا یانەیا هەولێرێ‌ كەت ئێك ژ گرنگترین هەڤڕكیێن ڤێ‌ گەڕێ‌ و كلاسیكۆ چاڤەڕێ‌ كری یا كوردستانی بهێتە كرن و دهێتە پێشبینیكرن ئەڤ یارییە دێ‌ ب بەرهەڤبوونا جەماوەرەكێ‌ ئێكچار زوور هێتە كرن.
ڕێزبەندی و دیدارێن پێشتر
تیما یانەیا دهۆك د نوكە دا ل ڕێزا نەهێ‌ دهێت ب كۆمكرنا 33 خالان ژ نەهـ سەركەڤتن، شەش وەكهەڤیان و حەفت خوسارەتی هەنە، یاریزانێن وێ‌ 26 گۆل تۆماركرینە د بەرانبەر 21 گۆل ل سەر هاتینە تۆماركرن، ژلایێ‌ خوەڤە یانەیا هەولێر 43 خال كۆمكرینە ژ دەرئەنجامێن 13 سەركەڤتنان، چار وەكهەڤی و چار خوسارەتیان، یاریزانێن وێ‌ 30 گۆل تۆماركرینە و 20 گۆل ل سەر هاتینە تۆماركرن، دیدارێن پێشتر یێن دیرۆكی دناڤبەرا واندا ل دووڤ ئامارێن نە فەرمی دگەهنە 35 یاریان، هەر یانەیەكێ‌ 12 سەركەڤتن ئیناینە و د 11 یارییان دا ئەنجامێ‌ وەكهەڤی هاتیە.
پیتەر و شیرزۆد سەركێشن
هەردو یانەیێن كوردستانی دێ‌ هێنە دناڤ یاریگەهێ‌ دا ب سەركێشا گۆلكەرێن خوە یێن خولێ‌، ستێرێ‌ دهۆكێ‌ پیتەر گۆرگیس خودانێ‌ 11 گۆلانە ل ڕێزا پێنجێ‌ د ڕێزبەندییا گۆلكەران دهێت، ژلایێ‌ خوەڤە هێرشبەرێ‌ هەولێرێ‌ یێ‌ ئۆزپاكستانی شیرزۆد تیمیرۆڤ سەركێشێ‌ گۆلكەرێن خولێ‌ یە ب تۆماركرنا 19 گۆلان، ژبلی هەردو یاریزانان، هەردو یانەیان كۆمەكا باش یا ستێرێن خودان شیان هەنە كو پشتبەستنێ‌ ل سەر بكەن.
عەبدولغەنی یاریێ‌ ب هێز دهژمێریت
د كۆنگرەیێ‌ رۆژنامەڤانی یێ‌ بەری یاریێ دا عەبدولغەنی شەهەد ڕاهێنەرێ‌ یانەیا دهۆكێ‌ گۆت: ئێك ژ یاریێن گرنگ بۆ تیما مە یا ئەڤرۆ یە بەرانبەر یانەیا هەولێرێ‌ كو دهێتە هژمارتن كلاسیكۆیا كوردستانی، ل دووڤ ئاستێ‌ تیما هەولێرێ‌ خودان شیانە و هەڤڕكا ڕێزێن پێشیێ‌ یە، لەوما ژی یاری یا بهێزە، بۆ مە هەموو یاری ب زەحمەتن، ژبەركو پرانییا یانەیان وەكو ئاست نێزیكی ئێكن، لێ‌ بۆ هەر یارییەكێ‌ چاڤێ‌ مە ل سەركەڤتنێ‌ یە و ئەڤە پلانێن مەنە، یارییا ڤێ‌ حەفتیێ‌ دناڤ یاریگەهـ و جەماوەرێ‌ مە دایە لەوما ژی دێ‌ هەموو بزاڤان كەین مفایی ژێ‌ وەربگرین.
زاخۆ ب هیڤییە دیارییا جەژنێ‌ پێشكێش بكەت
ژلایێ‌ خوەڤە هەر ژ یاریێن سوبەهی یێن رۆژا چارشەمبی، تیما یانەیا زاخۆ دێ‌ دناڤ ئەرد و جەماوەرێ‌ خوە دا ل یاریگەها خوە یانەیا ئەلگەرمە یا باژێرێ‌ رۆمادی مێڤان كەت كو دبیتە ئێك ژ ب هێزترین یاریێن ڤێ‌ حەفتیێ‌ و یا گرنگ بۆ كوڕێن خابۆری ئەوا دهێتە پێشبینیكرن پشتەڤانێن زاخۆ بەری دەستپێكرنا یاریێ ب چار دەمژمێران بەرهەڤبن كو بڕیارە یاری ل دەمژمێر 11:15 شەڤ بهێتە كرن.
هەڤڕكن د ڕێزبەندیێ‌ دا
تیما یانەیا زاخۆ ل ڕێزا شەشێ‌ دهێت ب كۆمكرنا 39 خالان ژ 11 سەركەڤتنان، شەش وەكهەڤی هەنە و تووشی چار خوسارەتیان بووینە، یاریزانێن وێ‌ 29 گۆل تۆماركرینە و دبەرانبەردا 15 گۆل ل سەر هاتینە تۆماركرن، ژلایێ‌ خوەڤە یانەیا ئەلگەرمە ڕێزا پێنجێ‌ دهێت ب جووداهییا دو خالان ب تنێ‌ كو 41 خال كۆمكرینە، ئانكو سێ‌ خالێن ڤێ‌ یاریێ‌ بۆ هەردو یانەیان گەلەك د گرنگن تایبەت بۆ پاشتر بەر ب پێشڤە یێن ڕێزێن پێشیێ‌.
ئەمجەد و ئەیمەن هێزا هەردو تیمانە
ل دووڤ ئاستێ‌ هەردو یانەیان تیما یانەیا زاخۆ پشتبەستنەكا گەلەك ل سەر كاپتنێ‌ تیما خوە و هەلبژارتیێ‌ ئیراقێ‌ ئەمجەد عتوان دكەت خودانێ‌ شەش گۆلان، لێ‌ گۆلكەرێ‌ وێ‌ ئیچیتا دیبۆتی خودانێ‌ حەفت گۆلانە دگەل هەڤكارییا شێركۆ كەریم، ئاسۆ كەریم، ئالیۆ ئادەم، دبەرانبەر دا ستێرێ‌ هەلبژارتیێ‌ ئیراقێ‌ ئەیمەن حسێن خالا هێزێ‌ یا ئەلگەرمەیە.
ڕاهێنەر ڕژدە بۆ هیڤیێن خوە
د كۆنگرەیێ‌ رۆژنامەڤانی یێ‌ بەری یاریێ‌ ئەیوب ئۆدیشۆ ڕاهێنەرێ‌ یانەیا زاخۆ ئەڤ یارییە ب ئێك ژ یاریێن ب هێز دانا و گۆت: دێ‌ بەرانبەر تیمەكێ‌ بین خودان شیانن و یاریزانێن ئاست بلند هەنە، لەوما ژی یاری دێ‌ بۆ نۆت خولەكان هەڤڕكی بیت، دێ‌ پشت گەرمی ب جەماوەرێ‌ خوە كەین كو هەردەم ئێكەمن دناڤ یاریگەهێ‌ دا بۆ پشتەڤانییا تیما خوە، هەروەسان شیانێن یاریزانێن خوە دناڤا یاریگەهێ‌ دا و ئارمانجا مە شەڕێ‌ دەستڤە ئینانا سێ‌ خالانە، پێنەڤێت تیما ئەلگەرمە ژی كەسایەتییا خوە هەیە و دێ‌ هێتە دناڤ یاریێ‌ دا بۆ هەمان ئارمانج، لێ‌ گەشبینم ب گەهینە یا مە بڤێت.
نەورۆز بەرانبەر دەلیڤەیەكا باشە
ژلایێ‌ خوەڤە یانەیا نەورۆز دێ‌ ل یاریگەها سلێمانیێ‌ مێڤاندارییا یانەیا ئەلقاسم كەت د یارییەكا دەلیڤەیا زێرین دا بۆ دەستڤە ئینانا سێ‌ خالان، نەورۆز ل ڕێزا 11ێ‌ دهێت ب كۆمكرنا 28 خالان، د بەرانبەر دا یانەیا ئەلقاسم ل ڕێزا 20ێ‌ و دووماهیێ‌ دهێت بتنێ‌ دو خال كۆمكرینە، ئەڤ یارییە ئەوا دێ‌ ل دەمژمێر نەهی شەڤ هێتە كرن بۆ نەورۆز دەلیڤەیە ڕێزبەندییا خوە باشتر لێبكەت.
ژ یاریێن دی یێن ئەڤرۆ
یانەیا كەرخ دێ‌ ل یاریگەها خوە یانەیا نەفت میسان ل دەمژمێر نەهی شەڤ مێڤان كەت، ژلایێ‌ خوەڤە یانەیا دیالا ل باژێرێ‌ بەسرا دێ‌ بیتە مێڤانا یانەیا مینا ل هەمان دەمژمێر.
هێشتا هێرشبەرێ‌ هەولێرێ‌ سەركێشە، نووترین دەهـ گۆلكەرێن پێشیێ‌ د خولێ‌ دا.
1- شیرزۆد تیمیرۆڤ 19 گۆل، یانەیا هەولێر.
2- فیدیلیس كۆكۆ 13 گۆل، یانەیا ئەلغراف.
3- لیۆنێل ئتیبا 13 گۆل، یانەیا شورتە.
4- عەلا ئەلدالی 12 گۆل، یانەیا مووسل.
5- پیتەر گۆرگیس 11 گۆل، یانەیا دهۆك.
6- یونس حەمود 11 گۆل، یانەیا كەرخ.
7- محەمەد جواد هەشت گۆل، یانەیا جەوییە.
8- حەسەن عەبدولكەریم هەشت گۆل، یانەیا زەورا.
9- ئیچیتا دیبۆتی حەفت گۆل ژ یانەیا زاخۆ.
10- مەحمود ئەلمواس حەفت گۆل ژ یانەیا شورتە.
حەفتییا بهێت یاریێن گەڕا 24ێ‌ دێ‌ هێنە كرن
دهێتە چاڤەڕێ‌ كرن ل پێنچ شەمبییا بهێت دەست ب هەڤڕكیێن گەڕا 24ێ‌ یا خولێ‌ بڤی شێوەیی بهێنە كرن.
مینا- دهۆك ل یاریگەها مینا.
زاخۆ- شورتە، یاریگەها یانەیا زاخۆ.
نەفت میسان- هەولێر، یاریگەها ناسریە.
نەورۆز- ئەلغراف، یاریگەها سلێمانیێ.
تەلەبە- ئەمانەتبەغدا، یاریگەها كەرخ.
جەوییە- كەرخ، یاریگەها ئەلمدەینە.
نەفت- ئەلقاسم، یاریگەها كاپتن شرار حەیدەر.
دیالا- نەجەف ، ل یاریگەها دیالا.
زەورا- كارەبا، یاریگەها ئەلمەدینە.
ئەلگەرمە- مووسل، یاریگەها رومادی.
زاخۆ و هەولێر دێ‌ یاریێن پاشئێخستی ئەنجامدەن
بڕیارە ل دەستپێكا حەفتییا بهێت چار یاریێن مایی یێن پاشئێخستی ژ چارچووڤەیێ‌ خولا ستێرێن ئیراقێ‌ بڤی شێوەیی بهێنە ئەنجامدان.
رۆژا شەمبی 21-3-2026
نەفت- شورتە ژ گەڕأ 18ێ‌، دەمژمێر 7:30 شەڤ.
زەورا- ئەمانەت بەغدا ژ گەڕا 18ێ‌، دەمژمێر 7:30 شەڤ.
رۆژا ئێكشەمبی 22-3-2026
مووسل- زاخۆ، ژ گەڕا 21ێ‌ دەمژمێر 7:30 شەڤ دبیت یاری ل نەجەف بهێتە كرن.
هەولێر- دیالا، ژ گەڕا 20ێ‌ دەمژمێر 7:30 شەڤ.

چاڤەڕێ‌ دهێتە كرن ئەڤرۆ ل دانێ‌ شەڤێ‌ چار یاریێن مایی ژ هەڤڕكیێن گەڕا دویێ‌ و ئێكلاكەر ژ قووناغا 16ێ‌ دەربازبوون بەر ب قووناغا هەشتێ‌ یا قارەمانییا یانەیێن ئۆرۆپا قارەمانێن خولا چامپیۆنز لیگ ب دیدارێن ئاگرین هێنە كرن.
شەڕێ‌ مان و نەمانێ‌
بڕیارە ئێكەم یارییا ئەڤرۆ ل دەمژمێر 8:45 شەڤ تیما یانەیا بەرشەلۆنا هەلگرا پێنچ ناسناڤێن چامپیۆنزێ‌ ل یاریگەها خوە كامب نوو یانەیا نیۆكاسل یا ئنگلتەرایێ‌ مێڤان بكەت، د یارییا ئێكێ‌ یا ڤێ‌ قووناغێ‌ دا هەردو یانە ب گۆلەكێ‌ وەكهەڤ بوون، لەوما ژی یارییا ئەڤرۆ بۆ هەردو یانەیان بەردەستە و بوو ئێك ژ زلهێزێن ئۆرۆپا بەرشەلۆنا دێ‌ بیتە شەڕێ‌ مان و نەمانێ‌.
لەشكەرێ‌ هانز فلیكی باش دزانن ژ دەستدانا ڤێ‌ پلێتێ‌ دێ‌ باچەكا گران دەن تایبەت دناڤ ئەردێ‌ خوە دایە و خوسارەتی دێ‌ خەونێن وێ‌ یێن ناسناڤێ‌ چامپیۆنزێ‌ بۆ سالا 10ێ‌ هەلوەشینیت ئەوا دووماهی سالا ل 2015ێ‌ بوو.
تاقیكرنەكا دیرۆكی یە
ژلایەكێ‌ دووڤە بڕیارە ل دەمژمێر 11 شەڤ تیما یانەیا لیڤەرپۆل یا ئنگلتەرایێ‌ دناڤ ئەردو جەماوەرێ‌ خوە دا دێ‌ یانەیا گالاتا سارایی یا توركی مێڤانكەت كو دبیتە تاقیكرنەكا دیرۆكی بۆ یانەیا ئنگلتەرایی ئەوا د یارییا ئێكێ‌ یا ڤێ‌ قووناغێ‌ دا ل توركیایێ‌ تووشی خوسارەتیێ‌ بوو ب گۆلەكێ‌، لیڤەرپۆل هەلگرا شەش ناسناڤایە و ئێك ژ هێزێن چامپیۆنزێ‌ یە، لێ‌ د دەمەكێ‌ هەستیار دا دەرباز دكەت و نەشیایە خوە نێزیكی زوونا ئێكسەر یا چامپیۆنزا سالا بهێت بكەت.
گالاتا سارایی ئەوا بوویە تیمەكا بهێز شیابوو سەرجەمێ‌ هەردو یاریێن خوە یێن قووناغا پاشگۆی بەری یا قووناغا 16ێ‌ ل سەر كیستێ‌ یۆڤانتۆسێ‌ بهێتە ڤێ‌ قووناغێ‌، تۆمارەكا باش بەرانبەر لیڤەرپۆلێ‌ هەیە د سێ‌ دیدارێن خوە یێن پێشتر دا هەرسێ‌ یاری ب سەركەڤتن ل سەر ئیناینە، لەوما ژی دیرۆك دبەرژوەندییا وێ‌ دا هاتیە نڤێسین.
شەڕ و خۆڕاگری
هەر ژ یاریێن ئەڤرۆ چاڤەڕێ یە یانەیا تۆتنهام یا ئنگلتەرایێ‌ دێ‌ ل دەمژمێر 11ی شەڤ یانەیا ئەتلەتیكۆ مەدرید یا ئسپانی مێڤانكەت ب دروشمێ‌ شەڕ هەتا دووماهی چركە ژبۆ ڤەگەڕیان و تۆماركرنا ڕیمۆنتادا پێخەمەت وەرگرتنا پلێتا دەربازبوونێ‌، د یارییا ئێكێ‌ یا ڤێ‌ قووناغێ‌ دا یانەیا ئسپانی ب ئەنجامێ‌ 5-2 گۆلان سەركەڤتنەكا مەزن ل سەر یانەیا ئنگلتەرایێ‌ ئینایە، ئەڤ یارییە بۆ تۆتنهامێ‌ دێ‌ یا شەڕی بیت هەتا بگەهیتە هیڤیێن خوە د بەرانبەر دا یانەیا ئەتلەتیكۆ مەدرید دگەل یارییا ب سەركەڤتن دێ‌ بزاڤێن خۆڕاگریێ‌ كەت پێخەمەت پاراستنا ئەنجامی و دەربازبوون بۆ قووناغا هەشتێ‌.
بێ‌ گڤاشتنە لێ‌ هوشداری فەرە
یارییا چارێ‌ یا زنجیرەیێن قووناغا 16 ژ خولا چامپیۆنزێ‌ دێ‌ یانەیا بایرن میۆنخ یا ئەلمانی د ناڤ ئەرد و جەماوەرێ‌ خوە دا یانەیا ئەتلانتا یا ئیتالی ل دەمژمێر 11 شەڤ مێڤان كەت كو دبیتە یارییەكا دبیت بێ‌ گڤاشتن ل سەر یاریزانێن بایرنێ‌، ژبەركو د یارییا ئێكێ‌ یا ڤێ‌ قووناغێ‌ دا شیابوون ب 6-1 گۆلان سەركەڤتنەكا مەزن ل سەر یانەیا ئیتالی بنیت.
لەوما ژی یارییا ئەڤ شەڤە دبیت ئەو گڤاشتنا دەرۆنی و ئاستی ل سەر یاریزانان نەبیت سەرباری ڕاهێنەرێ‌ وێ‌ كۆمپانی هوژداری دایە یاریزانان كو یاریێ‌ ب سڤكاتی نە وەرگرن بەرانبەر یانەیەكێ‌ كو شیانێن ڕیمۆنتادا ژی دێ‌ هەبن، یانەیا بایرن میۆنخ هەلگرا شەش ناسناڤایە و ئارمانجا وێ‌ د ئەڤسالە دا بكەتە حەفت لێ‌ ڕێیا وێ‌ بیت ب سانەهی نەبیت لێ‌ ئاست وئەنجامێن وێ‌ بەلگەیەكا دی نە كو شیانێن هەین بۆ گەهشتنا ئارمانجا خوە.

ب فەرمی یێ‌ ئوسترالی گێرهام ئارنۆلد ڕاهێنەرێ‌ هەلبژارتیێ‌ فوتبۆلا ئیراقێ‌ لیستا دووماهیێ‌ بۆ پێكهاتیێ‌ تیما خوە دەستنیشانكرن ژبۆ پشكداریێ‌ د یارییا پاشكۆ ژ ڤاڤارتنێن مۆندیالا جیهانی 2026ێ‌ ئەوا بڕیارە یارییا خوە ل ئێكی نیسانا بهێت دگەل سەركەڤتیێ‌ یارییا بۆلیڤیا و سۆرینام ژبۆ وەرگرتنا پلێتا دەربازبوونێ‌.
پێكهاتیێ‌ هەلبژارتیێ‌ ئیراقێ‌ پێنج یاریزانێن كوردستانی د ناڤ دانە ئەو ژی هەر ئێك ژ مێرخاس غازی دوسكی، ئاكام هاشم، یوسف ئەمین، پیتەر گۆرگیس و ماركۆ فەرەج، هەروەسان هەر ئێك ژ یێن گۆلپارێز كەمیل سەعدی، ئەحمەد باسل و فەهەد تالب، دیسان، رێبین سۆلاقا، مەناف یونس، زەید تەحسین، فرانس بوترس، حسێن عەلی، ئەمیر ئەلعماری، ئەحمەد مكنزی، حەسەن عەبدلكەریم، ئیمار شیر، زەید ئیسماعیل، ئەمیر ئەلعماری، زیدان ئیقبال، یەعقوب كێڤن، ئیبراهیم بایش، عەلی جاسم، عەلی ئەلحمادی، ئەیمەن حسێن، عەلی یوسف و موهەنەد عەلی.