سەربەست لەزگین، ئەندامێ مەكتەبا سیاسی یا پارتی و بەرپرسێ مەكتەبا رێكخستنا پارێزگەها دهـۆكێ ل گەل بەرپرسێن لقێن ئیكەتیا زانایێن ئایینێ ئیسلامێ یێن سنۆرێ مەكتەبا ڕێكخستنا پارێزگەها دهـۆكێ كۆمبوو.
سەربەست لەزگین د كۆمبوونێ دا پەسنا رۆلێ مامۆستایێن ئایینی ژ لایێ هەستێ نەتەوی و هشیاركرنا جڤاكی كر و پێگەهـ و خۆراگری و شیرەتێن وان د هەر كاودانەكی دا بلند هەلسەنگاندن، دیسا تەكەز ل سەر ڤێ چەندێ كر، كو دڤێت مامۆستایێن‌ ئایینی ل سەر بجهگەهاندنا ئەركێ خۆ یێ پیرۆز بەردەوام بن، ب تایبەت د گەهاندنا پەیاما ئاشتیێ و برایەتیێ و تەباهـیێ و پێكڤە ژیانێ دا.
مامۆستایێن ئایینی ژی سوپاسیا بەرپرسێ مەكتەبا رێكخستنا پارێزگەها دهـۆكێ كر ژ بۆ وێ پشتەڤانیا بەردەوام.

دهۆك، دلۆڤان ئاكرەیی:

ڤیان دەخیل، پەرلەمانتار و پەیڤدارا فراكسیۆنا پارتی ل جڤاتا نوونەرێن ئیراقێ ل دۆر وەرگرتنا رازیبوونێ‌ بۆ داخوازیێن وەلاتیێن دەڤەرێن مادەیێ‌ 140 بۆ رۆژنامەیا ئەڤرۆ دیار كر، ئەو ل گەل وەزیرێ كار و كاروبارێن جڤاكی ل حكومەتا ئیراقێ ئەحمەد ئەسەدی، كۆمبوویە و دبێژیت: مە هەمی ئەو داخوازی و گازندەیێن گەهشتینە نڤیسینگەها مە گەهاندینە وەزیرێ كار و كاروبارێن جڤاكی، كو تایبەت بووینە ب وەرگرتنا وەلاتیان د مووچەیێ چاڤدێرییا جڤاكی دا.
ناڤهاتیێ‌ گۆت: «رازیبوونا فەرمی ل سەر هەمی داخوازیێن پێشكێش كری هاتیە وەرگرتن، و دێ ل سەر هنارتنا رازیبوونا و پەیوەندیكرن ب خودانێن وان ب شێوەیەكێ راستەوخۆ د رۆژێن بهێن دا دێ بەردەوام بین».
هەروەسا گۆت: «من رازیبوونەكا تایبەت ژ وەزیری وەرگرتیە، كو وەلاتیێن ئێزدی یێن ئاوارە و ڤەگەڕیای و یێن دی، د ناڤا گروپێ ئێكێ دا بهێنە وەرگرتن، كو دێ وەزارەت د نێزیك دا راگەهینیت، تێدا ئەو كەسێن شایستە دێ مووچەیێ پاراستنا جڤاكی وەرگرن».

دهۆك، لەزگین جۆقی:

رێڤەبەرێ كۆچ و كۆچبەرێن پارێزگەها دهۆكێ بۆ رۆژناما ئەڤرۆ ئاشكرا كر، هەر ژ سالا 2014ێ هەتا نوكە ل كەمپان و ژ دەرڤەی كەمپان ل سنۆرێ‌ پارێزگەها دهۆكێ هەتا 100 هزار زارۆكێن ئاوارەیان ژ دایكبووینە.
پیر دەیان جەعفەر، ڕێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ دیار كر، هەر ژ دەمێ ئاوارەبوونا خەلكێ شنگالێ ل سالا 2014ێ هەتا نوكە، ئانكو د 11 سالێن ئاوارەبوونا خەلكێ شنگالێ‌ دا و مانا وان ل كەمپان و ژ دەرڤەی كەمپان ل پارێزگەها دهۆكێ، هەتا نوكە هەتا 100هزار زارۆكان ژ دایكبووینە.
پیر دەیان گۆت: «گەلەك زارۆكێن ل كەمپان ژ دایكبووین، دەمێ پرسیار ژ وان دهێتە كرن، هوون خەلكێ كیڤەنە؟ دێ بێژن خەلكێ شاریا یان خانكێ یان باعەدرێ، ئانكو ناڤێن كەمپان و گوند و كۆمەلگەهێن سەر ب دهۆكێ و زاخۆ ڤە دئینن».

ئامێدیێ، مەحمود نهێلی:

بڕیارە گۆڕێ حەفت شەهیدێن گوندێ مێرگەتی ل سنۆرێ ناوچەدارییا سەرسنكێ بۆ گۆڕستانەكا نوو بهێنە ڤەگۆهاستن و نوكە پرۆسێسا ڤەگوهستنا گۆڕێن وان بەر ب قووناغێن دوماهیێ‌ یە.
ئاراس نوری، رێڤەبەرێ گۆڕێن ب كۆم ل وەزارەتا شەهیدان بۆ رۆژناما ئەڤرۆ دیار كر، وان پاردە ل سەر ئێك ژ تاوانێن رژێما بەرێ یا ئیراقێ لادا و ئەڤ گۆڕێن ڤان حەفت شەهیدان دهێنە درئێخستن و بۆ گۆڕستانەكا نوو دێ هێنە ڤەگۆهاستن و گۆت: «ئەڤ حەفت كەسە ل سالا 1988 ل سەردەمێ ئەنفالێن بەهدینان كەفتینە دەستێ رژێما بەعس یا ئیراقێ و ب رەنگەكێ دڕاندانە هەر ل وی جهی ژ لایێ چەكدارێن رژێما ئیراقێ ڤە هاتینە گوللە بارانكرن و هاتینە شەهید كرن».
گۆتژی: «پشتی چەندین رۆژان ئەڤ شەهیدە ماینە بەر حەتاڤێ ژ لایێ گوندیان ڤە ب جلكێن وان یێن كوردی ڤە، تەرمێن وان ل نێزیك گوندێ دهیكا بەرێ گارێ دهێنە ڤەشارتن، نوكە بڕیار وەسایە تەرمێن ڤان شەهیدان د رێورەسمەكی دا ل وی جهی بۆ گۆڕستانەكا نوو بهێنە ڤەگوهاستن، پشتی ل نۆشداریا داد و تاقیكرنێن دی ئێن ئەی بۆ دهێنە كرن، د دووڤ دا مۆنۆمێنتەك دێ بۆ هێتە چێكرن».

سندس سالح سلێڤانەی:

بەرپرسێ هۆبا راگەهاندنێ ل سەرۆكاتیا باژێرڤانیا دهۆكێ بۆ رۆژناما ئەڤرۆ دیاركر، كار د چێكرنا پڕۆژەیێ پاركا سەرهلدان دا گەهشتیە قووناغێن دووماهیێ و دبێژیت: ل دەمێ پارك دهێتە ڤەكرن، چوونا ژۆر بۆ وەلاتیان دێ یا بێ بەرانبەر بیت و چو پارە ژ كەسێ ناهێنە وەرگرتن.
شێروان حەسەن، بەرپرسێ هۆبا راگەهاندنێ ل سەرۆكاتیا باژێرڤانیا دهۆكێ گۆت: «چو راستی بۆ وەرگرتنا گۆژمەكێ پارەی بەرانبەر چوونا خەلكی بۆ ناڤ پاركێ نینن و ئەڤال ل هندەك كەنال و پەیجان هاتیە بەلاڤكرن، دوورە ژ راستیێ».
ناڤهاتی گۆتژی: «دەمێ دەست ب ڕاكرنا پیشەسازیا ترۆمبێلان هاتیە كرن، هەر وان پەیجان پرۆپاگندەیێن بێ بنەما دكرن و دگۆتن: ئەڤ جهە یێ دایە وەبەرهێنەرەكی و دێ بیتە شوقە، ئەڤە پارك ب دووماهی هات و ژڤانێ ڤەكرنا وێ یێ نێزیكە و ئەڤ پاركە دیاریا حكومەتا هەرێما كوردستانێ یە بۆ هەموو خەلكێ پارێزگەها دهۆكێ، دیسا نوكە كار ل سەر چەندین پڕۆژەیێن دی بۆ جوانكرنا باژێڕی و زێدەكرنا رێژەیا كەسكاتیێ و پاقژراگرتنا ژینگەهێ دهێتە كرن و دێ بەردەوام ژی بین».

رەمەزان زەكەریا:

ل سەر پێشینەیا مەهانە یا باژێرڤانیێ هەژمارەكا پڕۆژەیێن خزمەتگوزاری ل ئاكرێ دێ هێنە ئەنجامدان.
زێرەڤان تەمۆ، پەیڤدارێ باژێرڤانیا ئاكرێ بۆ ئەڤرۆ گۆت: «د ڤێ مەهێ‌ دا هەژمارەكا پڕۆژەیان دێ هێنە ئەنجامدان، وەكو: ڤەكرن و كۆنكریتكرنا جادەیێن ناڤخۆ و چێكرن و سەخبێركرنا ئاڤڕێژان و سەخبێركرن و قێركرن و بەرفرەهكرنا جادەیێن ناڤخۆیی».
ناڤبری گۆتژی: «كابینەیا نەهێ یا حكومەتا هەرێما كوردستانێ گەلەك گرنگی ب كەرتێ رێك و پران دایە و چەندین جادەیێن سەرەكی ل ئاكرێ هاتینە چێكرن و نووژەنكرن».