ئەندامەکێ شاندێ ئیمرالیێ راگەهاند کو بەرسڤا پەکەکێ گەلەک باش بوو و پشتی بەرسڤا پەکەکێ ئەو دێ ل گەل بەرپرسێن دەولەتێ و هندەک کەسێن کاریگەر ل تورکیا کۆمبن و هەکە چو ئاریشە روو نەدەن ڤێ حەفتیێ دێ گەلەک تشت دیار بن.

سڕی سورەیا ئۆندەر ئەندامێ شاندێ ئیمرالیێ د داخۆیانیەکێ دا بۆ ئاژانسا ANKA یا تورکیا دیار کر، داخۆیانیا پەکەکێ گەلەک باش بوو، هەلوەستێ بەرپرسێن پەکەکێ د جهێ خوە دایە، ئاگربەستا کو ژ ئالیێ پەکەکێ ڤە هاتە راگەهاندن گەلەک گرنگ بوو، نها دەست ب قۆناغەکا نوو هاتیە کرن و هندەک تشت ئێدی بەحسێ وان ناهێتە کرن و گۆت: (د چەند رۆژێن بهێت دا دێ ب پشکداریا بەرپرسێن دەولەتێ و هندەک کەسێن کاریگەر ل تورکیا چەندین کۆمبوونێن گرنگ هێنە کرن، بێگومان د وان کۆمبوونان دا دێ بەحسێ ڤێ یەکێ هێتە کرن کا دڤێت د رۆژێن پێشیا مە دا چ بهێتە کرن، چونکی پێدڤیە د بیاڤێن سیاسی و قانوونی دا هندەک پێنگاڤ بهێنە ئاڤێتن).
سەبارەت ب چاوانیا دەست بەردانا چەکی ژ ئالیێ پەکەکێ ڤە ناڤهاتی دیار کر، جارێ یا گرنگ پەکەکێ دیار کریە ئەو بەرهەڤن کارەک وەسا بکەن و وان ژی هندەک داخوازی هەنە، بێگومان د دەمەکێ وەسا دا دڤێت ژ ئالیێ دەولەتێ ڤە هندەک پێنگاڤ بهێنە ئاڤێتن و ژ بۆ ڤێ یەکێ ژی د رۆژێن پێشیا مە دا دێ کۆمبوونێن گرنگ هێنە کرن و گۆت: (ئالیێ پراکتیکی یێ چاوانیا دەست بەردانا ژ چەکی دێ چاوا بیت ئەز ڤێ نزانم، چونکی ئەو یەک گرێدایی بەرپرسێن پەکەکێ یە، هەروەسا دڤێت دەولەت ژی هندەک تشتان بکەت دا زەمینە بۆ دەست بەردانا ژ چەکی گونجای بیت، لێ یا گرنگ نها ئیرادەیەکا مەزن بۆ چارەسەریێ هەیە، ئەو یەک گەلەک گرنگە، دەولەتا تورکیا ژی ڤێجارێ دڤێت ژ بۆ ئاشتیێ و چارەسەرکرنا پرسا کوردی هندەک تشتان بکەت).
سەبارەت ب هەلوەستێ دەولەتا تورکیا پشتی پەیاما ئۆجەلانی ژی ئۆندەری دیار کر، جارێ گەلەک زوو یە بەحسێ هەلوەستێ دەولەتێ بکەین، لێ داخۆیانیا سەرۆک کۆماری یا باش بوو، قۆناغەکا نوو دەستپێکریە هەم دەولەتا تورکیا و هەم ژی بەرپرسێن پەکەکێ ناخوازن لەزێ د هندەک تشتان دا بکەن، ژ بەر ڤێ یەکێ ژی دڤێت ئەم چاڤەرێ بین دا بزانین د دەمێن بهێت دا دێ چ روو دەت.
ئەندامێ شاندێ ئیمرالیێ ئەو یەک ژی دیار کر، هەکە چو ئاریشە روو نەدەن د ناڤ ڤێ حەفتیێ دا گەلەک تشت دێ دیار بن، هەر چاوا بیت ب ئاشتیێ دێ تورکیا بهێز بیت و کورد ژی دێ گەهنە گەلەک مافێن خوە، ژ بەر ڤێ یەکێ ژی دڤێت هەموو کەس بۆ ئاشتیێ یا پێدڤی بکەت.

پەیڤدارێ وەزارەتا دەرڤە یا ئیرانێ راگەهاند، داخۆیانیا ڤێ دووماهیێ یا وەزیرێ دەرڤە یێ تورکیا هاکان فیدانی سەبارەت ب ئیرانێ گەفن و ب چو رەنگەکێ ژی ئەو یەک ناهێتە قەبوول کرن، ئیران هەردەم ل دژی زۆلم و زۆرداریا ئەمریکا و ئسرائیلێ راوەستیایە و پشتەڤانی ل مافێن رەوا یێن خەلکێ فەلەستینێ، لوبنانێ و گەلەک وەلاتێن دی کریە.
ئیسماعیل بەقایی ئەو یەک ژی دیار کر، کو داخۆیانیا وەزیرێ دەرڤە یێ تورکیا سەبارەت ب ئیرانێ وەکو گەفەکێ یە و دڤێت تورکیا ب هەلوەستێ خوە نەبیتە ئەگەرێ ئالۆزیێن نوو ل دەڤەرێ.
هەژی ئاماژەپێدانێ یە کو بەری چەند رۆژان وەزیرێ دەرڤە یێ تورکیا دیار کربوو دڤێت ئیران دەست ژ سیاسەتا خوە یا ئالۆزکرنا رەوشا دەڤەرێ بەردەت، هەکە وەلاتەکێ بڤێت ئالۆزیان ل جهەکێ دروست بکەت بێگومان دێ هندەک هێز و ئالی ژی هەبن کو ئالۆزیان بۆ وی دروست بکەن، ڤێجا باشترە ئیران ئالۆزیان ل سووریێ و هندەک جهێن دی دروست نەکەت.

وەزیرێ دەرڤە یێ ئسرائیلێ د داخۆیانیەکێ دا راگەهاند، هەکە دەستهەلاتا نوو یا سووریێ ئاریشەیان بۆ دروزیان دروست بکەت یان ژی ئێرشی دەڤەرێن وان بکەت وەکو ئسرائیل ئەو دێ ئێرشی شامێ کەن و ل هەمبەر گەفێن شامێ ژی بێدەنگ نامینن.
گیدۆن سار وەزیرێ دەرڤ یێ ئسرائیلێ دیار کر، دڤێت شام رێزێ ل دروزیان بگریت و خوە نێزیکی دەڤەرێن وان ژی نەکەت، خەلکێ دروزی ل سووریێ هەر بریارەکێ ژی بدەن دڤێت شام رێزێ لێ بگریت، هەکە دەستهەلاتا نها یا شامێ بڤێت ئێرشی دروزیان بکەت وەکو ئسرائیل ئەو دێ ب توندی بەرسڤا شامێ دەن.
ئەو یەک د دەمەکێ دایە کو بەری نها ئسرائیلێ سەبارەت ب کوردێن سووریێ ژی هۆشداری دابوو شامێ و دیار کربوو دڤێت شام چو ئاریشەیان بۆ کوردان دروست نەکەت و دڤێت کورد ل سووریێ بگەهنە مافێن خوە.