مەتین وەرمێلی
دراما پایز ئەوا کەنالێ وارتیڤی بەرهەمئینایی، و پەخشکری، کو ژ «٢٥» خەلەکان پێکدهات.
«پایز» ب واتەیا ب دوماهیک هاتنا وەرزەکێ تمامە ژ زڤستان و بهار و هاڤینێ، درامایێ ژی دوماهی ب ژیانا چەند کەسەکان ئینا، کو هندەک ب دلسوزیا خوە ب دوماهیک هاتن، و هندەک ب خوە فروشیێ، و دیار بوو، چ شانازیە مرۆڤ بو وەلاتێ خۆ ب دوماهیک بهێت، و شەهید ببیت، و چ سەرشوریە مرۆڤ ببیتە بازرگان، و وەلات و خاک و شەرەفا خۆ بدەتە ب پارە.
ڤێ درامایێ ئاستێ ئازادیێ دیارکر، کو بەلێ ئەم دێ رەخنا خۆ ب هونەرێ خۆ کەین، کێماسیێن خۆ دیارکەین، ئەگەر چەند ب ئێش ژی بن.
ئەگەر ژ دەستپێکا درامایێ دەستپێبکەین، خێزانەکە خودانا هەر تشتی یە، بتنێ بەختەوەری نەبیت، ئەڤە دیاردەک و کلتورەکێ کرێتە لدەف هندەک کەسێن هزردکەن پارە هەر تشتە و دشێت هەر تشتی پێ بکەن.
ژنەک یا بوویە قوربانا کلتورەکێ سەقەت، و خێزانەکێ بۆ بدەستڤەئینانا کوژمەکێ پارەیی کچا خوە یا دایە زەلامەکی، کو د مێشکێ خوە دا ئیمپراتوریەتەکێ برێڤە دبەت، و نابیت چ بوچون ژ یا وی زێدەتر هەبن، و چ گوتن سەر یا ویڕابن، و کومڤەکرن و زێدەکرنا هەژمارا پارەیان گرنگترین کارێ وی یێ روژانەیە، و لسەر ڤێ هوڤاتیێ را یێ بویە یاری د دەستێن کچەکا بەڕەلا دا، و نزانیت بەزێ گوهێ وێ ژ کیڤەیە، و چ د دلێ خوە دا هەلگرتیە.
«پێشمەرگە» سومبولا نەتەوەیی، بەرچاڤکرنا رول و مەزنیا وان کارەکێ زۆر باش بوو، دگەل هندێ تێکەلکرنا هندەک دوکیومێنێن راستی، و دیارکرنا کێماسی و خالێن لاوازێن بوینە ئەگەرێ شەهیدبوونا چەندین پێشمەرگێن قاڕەمان، و جارەکا دی دیارکرنا رویێ ڕەشێ تیرورستێن»داعش»، کو دراما یا تایبەتە ب هاتنا وان ڤە، و ئەو لایەن و کارتێکرنێن ژیانێ یێن د دویف خوڕا ئینایین، وەکو پەنابەربونا خەلکێ میسل و بازرگانیکرن دگەل تیرورستا، و کارتێکرنێن ئابوری لسەر خەلکێ کوردستانێ و هزرا گەنجا ژ بو هێلانا وەلاتی ژ بەر نەبونا دەلیڤێن کاری.
لایەکێ دیێ دڕامایێ زانکو ب خۆ ڤە د گرت، براستی زانکو کاریگەرترین جهێن تێگەهێن فکرینە، و گرنگیدان ب زانکویان دشێن روئیا کومەلگەهی ب ئاقارێن باش ڤە ببەن، بو نمونە دانەنیاسینا تیرورستێن داعش ب هێزەکا ژ رێ دەرکەفتی و دژی جیهانا ئازاد، کو هێزەکا وەکو وێ شیا کارتێکرنێ لسەر هزرا گەنجێن هەمی جیهانێ بکەت.
لایەکێ دیێ درامایێ کو دهێتە گوتن چاڤلێکرنا درامایێن بیانی ب تایبەت ترکی، من دڤێت ل ڤێرێ بیژم، ئەرێ مە کومەلگەهێ سەدێ سەد کوردی مایە؟، ب بوچونا من نەخێر ژبەر کو کومەلگەها مە د نوکەدا تێکەلەکە ژ کورد و عەرەب و تورک و بگرە زور ئەجانبا ژی تێدا دژین، کارتێکرنا راگەهاندنێ و سوشیالێ ب تمامی دیار بوویە، ژبەر ڤێ ژی دەما قوتابیەک د دلێ خودا حەش ماموستایێ خۆ بکەت، یان ژنەکا مێرێ وێ روژەکا خوشیێ نەکریە د ژیانا وێ دا، د دلێ خودا خوزیا ب کەسەکی بخازیت، یان ڤیانا کەسەکێ باش بچیتە د دلی دا، نە تشتەکێ هندێ مەزن و مەحالە، و دبیت نمونێن هوسا تژی کومەلگەهی بن.
لایەکێ دی، دیارکرنا گرنگیا خێزانێ، ژنەک زیز دبیت و دچیتە مالبابا خۆ و برا و دەیک و باب بو د بنە پشت و پەنا، و کچەکا دی ئاوارە بویە و ب تنێ دژیت، معاناتێن وێ د تنێ بونێ دا دیاردبن، و گرنگیا خێزانێ بو بینەری باش ڕون دبیت.
«وەفاداری»، ئەو سیفەتێ جوانێ ل دەف هەمی کەسا نەیی، کو سوزێن پشتی مرنێ ژی ب وێ وەفاداریێ ب جهـ دئینیت.
دایک و باب و هەڤژین، ئەو کەسێن پارچەیەک ژ مروڤی و هەردەم دلێ وان د سوژیت و مەزنترین فشارا دەرونی لسەر، ب تایبەت یێن پێشمەرگەیان، دەما شەرەک دروست د بوو، یان چ ژ چارەنڤێسێ وان نەدزانی و هەتا جواب ب ساخی یان شەهید بوونێ د گەهشتێ ئەو د چ بارەکێ توندێ دەرونی دا دەرباز دبوون.
ب گشتی دڕاما خودیکەکا راستگویا جڤاکێ مە بوو، و دڤێت ب سینگەکێ مەزن قەبویل بکەین، بەلێ ئەڤ درامایا هاتیە چێکرن، ئەگەر ئیمکانیات لبەر دەست بان، دشیان بکەنە درامایەکا درێژ و هەتا سالەکێ و پتر ژی بهێتە پەخشکرن، و ئەز باوەرم دشیان گەلەک لایەنێن دی یێن جڤاکی نیشان بدەن، زێدەباری هەر کێماسیەکێ، دەستخوشیێ ل ستافێ درامایێ دکەم، ب هیڤیا کارێن باشتر و مەزنتر، کو براستی مروڤ دشێت بێژیت ئەز شانازیێ ب درامایا کوردی دکەم.
نيشاندان