عەلی حاجی:

د دیدارەکێ دا شڤان جەمیل یاریزانێ تیما فوتبۆلا یانه‌یا زاخۆ یا پشکدار د خولا ستێرێن ئیراقێ دا بۆ رۆژنامەیا ئەڤرۆ دیار کر وی دڤێت هێشتا دەلیڤەیا وەربگریت و یا گرنگ ل دەف وی سه‌ركه‌فتن و ئەنجامێن باش یێن تیمێ نە.
زێدەتر شڤان جەمیل گۆت: ئەز گەلەک یێ ئارامم دگەل تیما زاخۆ و ئه‌وا ئه‌م ل سه‌ر پلان و ڕێیەکا راست و دروست دچیت و هەستەکێ تایبەت ل دەف من دروست دبیت دەمێ دبینم هەموو یاریزانێن مە شەڕی بۆ لۆگۆ و ناڤێ زاخۆ دکەن، هەر چەندە من دڤێت زێدەتر دەلیڤە بۆ من پەیدا بیت لێ یا گرنگ ل دەف من ئەنجامێن باش یێن تیمێ نە، د وەرزێ ئەڤ سالە دا تیما مە دێ شێت کارەکێ باش ئەنجام دەت و هەموو پیڤەرێن ب دەستڤەئینانا خولێ لدەف تیما مە هەنە و باوەرییەکا مەزن دناڤبەرا یاریزانێن مە دا هەنە.
هه‌روه‌سان ناڤهاتی گۆت ژی: وەرزێ ئەڤ سالە یێ ب زەحمەتە لێ ئەم بۆ تاقیکرنێن زەحمەتە د ئامادەنە و پێدڤییە ژی ئەم بۆ هەموو یاریان ب شێوەیەکێ باش ئامادە بین، هه‌رچه‌نده‌ كاروانێ درێژه‌ و چه‌ند یانه‌ هه‌ڤڕكێن مه‌ نه‌ بۆ سه‌ڕێ لیستا خولێ، لێ ره‌م ڕژدین به‌رده‌وامیێ بده‌ینه‌ ئه‌نجامێن خوه‌ یێن باش و دلێ جه‌ماوه‌رێ خوه‌ خوه‌شبكه‌ین.
بۆ زانین تیما یانه‌یا زاخۆ ل سه‌رێ لیستا خولا پلا ستێرێن ئیراقێ دهێت ب كۆمكرنا 49 خالان، بڕیاره‌ ئه‌ڤرۆ هه‌تا سوبه‌هی كه‌مپه‌كێ ڕاهێنانێ ل كوردستانا باكۆر باژێرێ ئامه‌دێ بدانیت، مفایی ژ ڕاوه‌ستیانا خولێ وه‌ربگریت، ئه‌وا دهێته‌ چاڤه‌ڕێكرن دو یاریێن هه‌ڤالینی بكه‌ت و كه‌مپه‌ بۆ ماوه‌یێ حه‌فت رۆژان به‌رده‌وامبیت.

رەمەزان زەكەریا

د داخویانیەكێ دا ئەندامێ‌ كارگێرییا یانەیا و شێلادزێ دیار كر یارییا ئێكێ‌ بۆ هەر یانەكێ‌ بزەحمەتە لێ‌ ئەو ب هیڤی نە د وەرزێ‌ ئەڤ سالە دا دەربازبنە پلا ئێكا كوردستانێ‌، ئەڤچەندە هات پشتی دیارییا دەستپێكا خولێ‌ دا تیما وان شیایی سەركەفتنێ‌ ل سەر یانەیا خەلاتی پێنجۆین بینت ب گۆلەكێ‌ بێ‌ بەرانبەر.
زێدەتر بێوار ئیبراهیم بۆ رۆژنامەیا ئەڤرۆ گۆت: تیما مە ب ڕێژەیا 85% یاریزانێن باژێرێ‌ شێلادزێ‌ ە دەڤەرێ‌ نە، ب تنێ‌ مە پشت بەستن ل سەر دو یاریزانێن دەرڤە كرینە هەرچەندە ئەو ژی كوردن و خەلكێ‌ كوردستانا رۆژهەلاتن، لەوما ژی بۆ ئەف سالە رەنگەكێ باش بەرهەڤی مە یێن كرین و مە هیڤییەكا مەزن هەیە سەر كەڤینە خولا پلە ئێك، ژبەركو ل دووف خاندنا مە بۆ پێكهاتیێ شێلادزێ ئەم یانەیەكا ب ڕێكخستی نە و باشترین بەرهەڤی مە كرینە.
ناڤهاتی ئاشكراكر: هەرچەندە یانەیا مە چو داهات نینە لێ بۆ ئەف سالە پشكەكا ژ مەزاختیێن یانەیا شێلادزێ ژلایێ بەرێز كاوە عبدالله جونەید ب ستویێ خوەڤە گرتیە سوپاسیێن خوە ئاراستەی وی دكەین بۆ ڤی هەلویستێ وی یێ جوامێرانە، ژبلی ڤێ یەكێ تاكە سەروەت و سامانێ یانەیا شێلادزێ یێ بەردەوام بتنێ پشتەڤانن ئەڤە بۆ مە مەزنترین داهاتە، بۆ زانین كەشفا خوە یا سالانە مە دروستكریە و مەزاختیێن خوە مە هەموو تێدا دیاركرینە بۆ جهێن پەیوەندیدار مە فرێكریە و ئەم چاڤەرێ نە و برێكا هەوە ژی داخوازێ ژ جهێن پەیوەندیدار دكەین دگەل مە و گەنج ولاوێن دەڤەرێ د هاریكاربـن دا بگەهنە ئارمانجێن خـوە.

ب فەرمی ستیڤن كۆری ستێرا یانەیا گۆلدن ستایت ووریۆرز یا ئەمریكی ڕیكۆردەكا نوو د تۆماركرنا خالێن سێیانی دا ئینا، پشتی تیما خوە بەر ب سەركەفتنا مەزن ل سەر هەڤڕكا خوە سكرامێنتۆ كێنگێز د چارچووڤەیێ‌ خولا پێشەكارێن ئەمریكی NBA یا باسكێت بۆلێ‌ د هەڤڕكیێن واندا ئەوا ل شەڤا ئێكشەمبییا بۆری هاتیە كرن.
ل دووڤ لژنەیا ئاماران ا فدراسیۆنا باسكێت بۆلا ئەمریكا ستێرێ‌ گۆلدن ستایت ووربۆرز ڕیكۆردەكا نوو ل سەر ناڤێ‌ خوە تۆماركر ب دەستڤە ئینانا 4000 خالێن سییانی د ماوەیێ‌ كاروانی وی یێ‌ خولێ‌ دا و ڕیكۆردا هەڤڕكێ‌ خوە یێ‌ لۆس ئەنجلۆس كلیبەرز بشكێنیت ئەوێ‌ 3127 خالێن سێیانێ‌ تۆماركربوون.
د داخویانیەكا رۆژنامەڤانی دا كۆری ئەوچەندە دیار كر هێشتا ئەوی شیانێن هەین بەردەوامیێ‌ بدەتە تۆماركرنا خالێن سێیانی و دۆپاتكر بۆ وی یا گرنگ ئەوە تیما وی ب سەركەڤیت.

قەیس وەیس:

شەمەندەفرا خولا ستێرێن ئیراقێ‌ یا فوتبۆلێ‌ گەهشتییە گەڕا 24ێ‌ ژ قۆناغا ئێكێ‌، هەڤڕكی بۆ رێزبەندییا پێشیێ‌ و خوە قۆرتالكرن ژ رێزێن داكەفتنێ‌ یاری بۆ یاری ئاگرین دبیت، یانەیا زاخۆ سەرێ‌ لیستێ‌ بەرنادەت دگەل هەڤڕكییا زەورا و شورتە بۆ رێزبەندیێ‌ و یانەیا دهۆك دوورە ژ سەقایێ‌ خولێ‌ ژبەر پشكداریێن وێ‌ د كۆپا كەنداڤی دا، ئەنجامێ‌ هەردو یانەیێن هەولێر و نەورۆز د جێگیر نینن.
ئەلهۆیێن چیا مژویلی كۆپا كەنداڤی یە
ژلایێ‌ خوەڤە تیما یانەیا دهۆك ئەوا پێنج یاریێن وێ‌ د خولا ستێرێن ئیراقێ‌ دا هاتینە پاشئێخستن ژبەر مژویلییا ئەلهۆیێن چیا ب هەڤڕكیێن كۆپا كەنداڤی یا یانەیێن قارەمان ل دەڤەرا كەنداڤی، دهۆك وەكو نوونەرا ئێكانە یا ئیراقێ‌ و كوردستانێ‌ شیاییە بۆ جارا ئێكێ‌ د دیرۆكا فوتبۆلا ئیراقێ‌ دا بگەهیتە یارییا دووماهییا كۆپا كەنداڤی، پشتی د یارییا پێش دووماهیێ‌ دا دو سەركەفتنێن هاتن و چوونێ‌ ل سەر یانەیا ئیتفاق یا سعۆدیێ‌ بینت ب گۆلەكێ‌ بێ‌ بەرانبەر و بگەهیتە یارییا دووماهیێ‌ ئەوا بڕیارە بەرانبەر یانەیا ئەلقادسیە یا كۆێتی بكەت.
هەلوەست و یاریێن دهۆكێ‌ یێن پاشئێخستی د خولێ‌ دا
تیما فوتبۆلا یانەیا دهۆك ژ سەرجەمێ‌ 19 یارییان 10 سەركەفتن ئیناینە، چار وەكهەڤی هەنە و پێنج خوسارەتی ل رێزا حەفتێ‌ دهێت ب كۆمكرنا 34 خالان، ئەویاریێن هاتینە پاشئێخستن ژبەر كۆپا كەنداڤی دگەل هەر ئێك ژ یانەیا، تەلەبە ل بەغدا، دگەل شورتە ل دهۆكێ‌، دگەل هەولێرێ‌ ل هەولێرا پایتەخت، دگەل نەفت میسان ل دهۆكێ‌ و دگەل دیالا ل باژێرێ‌ دیالا، ڕێڤەبەرێ‌ تیما دهۆكێ‌ جاسم محەمەد حاجی بۆ رۆژنامەیا ئەڤرۆ دیاركربوو ئەوان ژ فدراسیۆنا فوتبۆلا ئیراقێ‌ خواست بوو د ماوەیێ‌ بهێت دا چو ژڤان بۆ یاریێن پاشئێخستی نە هێتە دانان ژبەر چوونا سێ‌ یاریزانێن وان بۆ ناڤ رێزێن هەلبژارتیێن خوە دا، هارۆن ئەحمەد و پیتەر گۆرگیس بۆ هەلبژارتیێ‌ ئیراقێ‌ و كەریم عەبد دەرویش بۆ هەلبژارتی لوبنانێ‌.
دهۆكییان 26 گۆل تۆماركرینە
تیما دهۆكێ‌ خوانا دەهـ یاریزانێن پشكداری د تۆماركرنا 26 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس شەش گۆل، كەریم دەرویش سێ‌ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید، ئیبراهیم غازی و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
حەفت گەڕن زاخۆ سەرێ‌ لیستێ‌ یە
پشتی بۆرینا حەفت گەڕان ژهەڤڕكیێن خولێ‌ تیما فوتبۆلا یانەیا زاخۆ كوڕێن خابووری شیایە سەرێ‌ لیستا خولێ‌ بگریت دەربەنجامێ‌ ئاست و ئەنجامێن خوە یێن سەركەفتی، دبیت پاشئێخستنا یاریێن شورتە و دهۆكێ‌ ژی كارتیكرنا خوە ل سەر رێزبەندیێ‌ هەبیت ئەوێن ژبەر پشكداریێن خوە یێن دەرڤە یاریێن وان هاتینە پاشئێخستن، یانەیا زاخۆ وەكو ئێكانە یانەیا كوردستانی شیاییە د وەرزێ‌ ئەڤ سالە دا سەرێ‌ لیستێ‌ بهێت و پارێزیت ب كۆمكرنا 49 خالان ژ 14 سەركەفتن، حەفت وەكهەڤی و سێ‌ خوسارەتی هەنە، یاریزانێن وێ‌ 42 گۆل تۆماركرینە و 20 گۆل ل سەر هاتینە كرن.
یاریزانێن زاخۆییان 42 گۆل تۆماركرینە
پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك ل سەرێ‌ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ‌ وی و یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا 12 گۆلان رێزا دویێ‌ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ‌ گۆلێن زاخۆ بووینە 42 گۆل د خولێ‌ دا.
ئاست و ئەنجامێن هەولێر و نەورۆز نە د جیگیرن
د حەفت گەڕێن بۆری دا ئاست و ئەنجامێن هەردو یانەیێن كوردستانی هەولێر و نەورۆز د جیگیر نین، هەولێرێ‌ بتنێ‌ ئێك سەركەفتن و وەكهەڤییەك هەبوویە، دووماهی یاریی دگەل زەورا ب چار گۆلان تووشی خوسارەتیێ‌ بوو، نەورۆز سێ‌ سەركەفتن و ئێك وەكهەڤی هەبوویە، دووماهی یاری ب سێ‌ گۆلان بەرانبەر گۆلەكێ‌ دگەل تەلەبە خوسارەت بوو.
هەلوەستێ‌ گشتی یێ‌ رێزبەندییا خولێ‌ پشتی بۆرینا 24 گەڕان بڤی رەنگی یە.
1- زاخۆ 49 خال.
2- زەورا 49 خال.
3- شورتە 47 خال، دو یاری ماینە.
4- جەوییە 41 خال.
5- تەلەبە 40 خال، یارییەك مایە.
6- ئەلقاسم 35 خال، ژ یارییەك مایە.
7- دهۆك 34 خال، پێنج یاری ماینە.
8- ئەلگەرمە 34 خال.
9- هەولێر 32 خال، یارییەك مایە..
10- نەفت میسان 32 خال، یارییەك مایە.
11- ئەلكەرخ 32 خال.
12- نەورۆز 30 خال.
13- نەفت 30 خال، یارییەك مایە.
14- نەجەف 30 خال.
15- كارەبا 28 خال.
16- مینا 25 خال.
17- نەفت بەسرا 23 خال، یارییەك مایە.
18- كەربەلا 17 خال.
19- دیالا 23 خال، یارییەك مایە.
20- حدود 13 خال.
گۆستاڤۆی سەرێ‌ لیستا گۆلكەران چۆلكریە
ژلایەكێ‌ دووڤە هەڤڕكییەكا دی هەیە ل سەر ئاستێ‌ گۆلكەرێن خولێ‌ دناڤبەرا یاریزانێن یانەیێن پشكدار، هەرچەندە هێرشبەرێ‌ زاخۆ یێ‌ بەرازیلی گۆستاڤۆ هێنریك بۆ ماوەیێ‌ چار حەفتییان سەرێ‌ لیستێ‌ دهات لێ‌ بۆ هێرشبەرێ‌ شورتە موهەنەد عەلی هێلا ئەوێ 19 گۆل هەنە و گۆستاڤویی 16 گۆل هەنە، مەروان حسێن هێرشبەرێ‌ نەورۆز 13 گۆل رێزا سێیێ‌ دهێت، هەر ئێك ژ ئەمجەد عتۆان ژ زاخۆ 12 گۆل، سەیف رەشید ژ ئەلقاسم 11، عەلا عەباس ژ جەوییە 10، یوسف بن سودە ژ هەولێرێ‌ 10 گۆل، ئەلحارس حاتم ژ ئەلقاسم نەهـ گۆل و محەمەد قاسم ژ نەجەف هەشت گۆل رێزێن چارێ‌ هەتا دەهێ‌ ل دووڤ ئێك دهێن.
یاریێن گەڕا 25ێ‌ دێ‌ هێنە پاشئێخستن
ل دووڤ ڕاگەهاندنا فدراسیۆنا فوتبۆلا ئیراقێ‌ بڕیار هاتیە دان یاریێن گەڕا 25ێ‌ بهێنە پاشئێخستن بۆ دەمەكێ‌ دی ژبەر پشكدارییا هەلبژارتیێ‌ ئیراقێ‌ د ڤاڤارتنێن دەربازبوونێ‌ بۆ مۆندیالا جیهانی 2026ێ‌ ئەوا دهێتە چاڤەڕێ‌ كرن ل 20 و 24ێ‌ ڤێ‌ مەهێ‌ یاریێن خوە بەرانبەر كوەیت و فلەستینێ‌ بكەت، لێ‌ دبیت د ماوەیێ‌ راوەستیانا خولێ‌ چەند یاریێن پاشئێخستی بهێنە ئەنجامدان.