رەمەزان زەكەریا:

گۆرەكێ ب كۆم ل سنوورێ دەڤەرداریا حەویجە یا سەر ب پارێزگەها كەركووكێ ڤە هاتیە دیتن و روفاتێن 17 پێشمەرگەیان تێدانە.
یاسەمین مونزر، ڕێڤەبەرێ پشكا گۆڕێن ب كۆم ل نۆشدارییا داد یا ئیراقێ، د كۆنگرەكێ‌ ڕۆژنامەڤانی دا ڕاگەهاند: د گۆڕەكێ ب كۆم دا ل سنوورێ دەڤەرداریا حەویجە یا سەر ب پارێزگەها كەركووكێ ڤە، گۆڕەكێ ب كۆم هاتیە دیتن، روفاتێن 17 پێشمەرگەیان تێدانە.
ئاشكراكریە: نموونە ژ هژمارەكا كەسوكارێن وان ل هەولێرێ هاتیە وەرگرتن ب مەرەما پشكنینێ و ئاشكراكرنا ناسنامەیا روفاتان.
دهێتە پێشبینیكرن كو ئەو پێشمەرگە ژ لایێ ڕێكخراوا تیرۆریستی یا داعشێ ڤە پشتی داگیركرنا دەڤەرێ، هاتبنە شەهیدكرن.

دهۆك، لەزگین جوقی:

كچەكا دی یا ئێزدی ب رۆناهیا ژیانێ شاد بوو و ژ دەستێن تێرۆرستێن داعشێ‌ هاتە رزگاركرن، نوكە ژییێ‌ وێ‌ 34 سالن.
حسێن قائیدی، بەرپرسێ نڤیسینگەها رزگاركرنا رەڤاندیێن ئێزدی بۆ رۆژناما ئەڤرۆ ئاشكرا كر، پشتی 11 سالان د بن زۆلم و ستەما جلكێن رەشێن تیرۆرستێن داعشێ‌ دا مای، ب كەد و خەباتا نڤیسینگەها رزگاركرنا رەڤاندییان، كچەكا دی یا ئێزدی ب رۆناهیا ژیانێ شاد بوو و هاتە رزگاركرن.
ل سالا 2014 ل شنگالێ شەش هزار و 417 كەسێن ئێزدی ژ هەردو رەگەزان ژ لایێ تێرۆرستێن داعشێ‌ ڤە هاتبوونە گرتن و رەڤاندن و بێ سەروشینكرن، هەتا نوكە پتر ژ سێ هزار و 500 كەسان ژ هەردو رەگەزان رزگاربووینە و هێشتا چارنڤیسێ گەلەك كەسان یێ‌ دیارنینە.

دهۆك، لەزگین جوقی:

ناسنامەیێن 32 قوربانیێن جینۆسایدا شنگالێ هاتینە ئاشكراكرن، كو ل سالا 2014ێ ل سەر دەستێن تێرۆرستێن داعشێ‌ هاتبوونە كوشتن و د ناڤ گۆڕێن ب كۆم دا هاتبوونە ڤەشارتن.
شاكر میرانی، ئەفسەرێ دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ بۆ رۆژناما ئەڤرۆ خویا كر، ل شنگالێ 129 گۆڕێن ب كۆم و تاكە كەسی ل دەستەیا ڤەكۆلین و كۆمكرنا بەلگەنامەیان هاتینە تۆماركرن و گۆت: «هەتا نوكە 30 گۆڕێن ب كۆم ماینە و هێشتا نەهاتینە ڤەكرن، نوكە دەست ب ڤەكرنا گۆڕێن ب كۆم هاتیە كرن و هەمی ڕوفاتێن د ناڤ دا بۆ نۆشداریا داد ل بەغدا دهێنە هنارتن، داكو ناسنامەیێن وان بهێنە ئاشكرا كر».

ئامێدیێ، مەحمود نهێلی:

ژ بۆ پتر خزمەتكرنا وەلاتیان و گەهاندنا پڕۆژەیێن خزمەتگوزاری، ب تایبەتی د وارێ رێك و جاددەیێن ناڤخوەیی دا و گەهاندنا جاددەیان بۆ گوندان، ب گوژمێ 400 ملیۆن دیناران هەژمارەكا جاددەیێن ناڤخوەیی ل سنوورێ باژێرڤانیا ئامێدیێ دێ هێنە چێكرن.
ئەندازیار ئەڤراز حەسەن، سەرۆكێ باژێرڤانیا ئامێدیێ بۆ رۆژناما ئەڤرۆ دیار كر، پشتی رازیبوون ل سەرئەنجامدانا هەژمارەكا پڕۆژەیان ل سنوورێ باژێزاڤانیا وان هاتیە كرن، ل ڤێ دایێ ئەڤ پڕۆژە هاتینە رەوانكرن بو بەلێندەری و ل دەمەكێ نێزیك دێ دەست ب چێكرنا وان هێتە كرن.
ناڤهاتی گۆت: «هەر دەمەكێ رەوشا سەقا بەر ب باشبوونێ ڤە چوو، دەست بجهئینانا ڤان پڕۆژەیان دێ‌ هێتە كرن، دیسا حكومەتا هەرێما كوردستانێ دێ یا بەردەوام بیت ل سەر گەهاندنا پڕۆژەیێن خزمەتگوزاری بۆ دەڤەرێ‌«.

سندس سالح سێڤانەیی:

رێڤەبەرێ‌ باخداری ل دهۆكێ راگەهاند،، وان بۆ ئەڤ سالە پتری (30) هزار شتلێن داران ئامادەكرینە، لێ خواستا جۆتیاران ل سەر كڕینا وان یا كێمە و رێڤەبەرێ باخداری ژی دبێژیت: ژبەر رەوشا سەقای و نەهاتنا بارانان ئەڤ سالە كێم هاتینە فرۆتن، هەروەسا رەوشا دارایی ژی كارتێكرنا خوە هەبوویە.

د. ئەمجەد عوبەید، رێڤەبەرێ باخداری ل پارێزگەها دهۆكێ دبێژیت: رێڤەبەریا مە بۆ ئەڤ سالە پتری (30) هزار شتلێن داران ئامادەكرینە و ئەم ئەرزانتر ژ بهایێن بازاڕی د دەینە جۆتیاران و هندەك شتل هەنە ب رێژەیا 50 هەتا 75% بهایێ وان ژ بازاڕی كێمترە و هەتا سالا بۆری ژی جۆتیار دهاتن و دكڕین، لێ بۆ ئەڤ سالە وەكو پار نینە و كێمتر دهێنە فرۆتن، هەر چەندە ل ناڤەڕاستا هەیڤا بۆری مە دەست ب فرۆتنا وان كریە و دشێم بێژم نیڤا وێ هژمارێ مە فرۆتینە، لێ مە دەمێ مای و ئەم دگەشبینین پتر بهێنە فرۆتن.
هەروەسا گۆت: شتلێن مە د جۆرا و جۆرن، ئانكو یێن هژمارەكا جۆرێن فیقی و گولێن باغچەیێن مالانە و هەموو ژی ل ژێر سەرپەرشتیا ئەندازیارێن چاندنێ هاتینە ئامادەكرن، لێ سەبارەت كێم فرۆتنا وان ژی ئەگەرێ سەرەكی رەوشا سەقایە، ئانكو كێم هاتنا بارانان بوویە ئەگەر كو جۆتیار ناهێن زوو ب زوو بكڕن، هەروەسا هێشتا كارتێكرنا قەیرانا دارایی و گیرۆبوونا مۆچان ژی مایە و هەكە هاتوو هندەك شتل مان هەكە د باش بوون دێ بۆ سالا بهێت راكەین و یێن نەباش ژی دێ ژناڤ بەین.
زێدەتر گۆت: هیڤیا من ئەوە د ڤێ هەیڤێ دا رێژەیەكا باش یا بەفر و باران ل هەرێما كوردستانێ ب گشتی و پارێزگەها دهۆكێ ب تایبەتی بباریت دا جۆتیارێن مە ژی بشێن ب كار و ئەركێ خوە راببن و ب پشتەڤانیا حكومەتا هەرێمێ كوردستانێ بشێن رۆژ بۆ رۆژێ كەرتێ چاندنێ بەر پێشڤە ببەین و ئەم وەكو رێڤەبەریا باخداری ل پارێزگەها دهۆكێ ل دووڤ شیانێن ل بەر دەست بۆ هەر جۆرە هاریكاری و ئاسانكاریەكێ دبەرهەڤین.

دلۆڤان ئاكرەیی

رێڤەبەرێ وەرزش و لاوان ل پارێزگەها دهۆكێ دیار كر، ل سالا ٢٠٠٥ وان ب تنێ ٥ ناڤەندێن وەرزش و لاوان ل سنورێ پارێزگەهێ هەبوون، بەلێ دنوكەدا بووینە ١١ ناڤەندێن وەرزشی و گۆت: چەند سالن كار ل سەر چەند بارەگایێن وان ل قەزا ئامێدیێ و ناحیا دینارتێ و ئێتیتێ هاتیە راگرتن، ژبەر كو بۆ چێكرنا هەر ئێك ژ وان پێتڤی ب ملیارەك و ٣٠٠ ملیون دیناران هەیە.

هەكار مەحەمەد ئەمین رێڤەبەرێ وەرزش و لاوان ل پارێزگەها دهۆكێ بۆ ئەڤرۆ دیار كر،
هەر كەسێ تەمەنێ وی ژێ ١٣ سالان بۆ ٤٠ سالاندا بیت ئەو وەك گەنج رەفتارێ ل گەل دكەن و ب بەردەوامی ب رێیێن جودا مینا كارێن هەڤپشك ل گەل رێكخراوان ئەو شیاینە د ڤان سێ سالێن بوری زێدەتری ٢٣٠٠ چالاكییان بۆ خزمەتا تەخا گەنج و لاوان ئەنجام بدەن.
خویا كر، ئەو گرنگییێ ب وان چالاكییان ددەن كۆ مفادار بن بۆ گەنجان وە كۆ دامەزراندنا تاقیگەهێن زانستی ل ناڤەندێن سەر ب رێڤەبەریا وانڤە بۆ مەبەستا ڤەكرنا خولان بۆ تەخا گەنجان دا كۆ پشتبەستنێ ب خۆ بكەن، مینا خولێن چێكرنا موبایلان كۆ د هەر خولەكێدا ل هەر ناڤەندەكا كۆ ژورا تاقیگەها زانستی هەبیت زێدەتری ٢٠ گەنج پشكداریێ‌ تێدا دكەن.
زێدەتر گۆت: ژبلی ڤەكڕنا خولێن زانستی بۆ گەنجان ئەو خولێن وەرزشی مینا یاریێن جەنگی و توپێن پێ و دەستی و سەبەتێ و سەر مێزێ و گەلەك یارییێن دی یێن وەرزشی ساز دكەن و زێدەباری وان وەرزشان ئەو گرنگییێ ب خولێن فێربوونا زمانان و یاریێن ئەلكترونی و گەشەپێدانا هزری ددەن كۆ گەنج سەڕهەلی دانانا چەوانییا پلانان بۆ پاشەروژا خۆببن و ب رێكا ڤەكرنا خولێن چاوانییا رەفتاركرنێ ل گەل شینوار و پاراستنا ژینگەهی و زانیاری وەرگرتن لسەر دیروكا كورد و كوردستانێ و بەرهەمێن كارگەهێن ناڤخۆ و گەشتێن چیاڤانی و ئەڤینیا وەلاتی و پاراستنا ئاخا كوردستانێ و رێز گرتن ل پێكڤەژیان و هەڤ قەبوولكرنێ.