سەرۆك بارزانی د هەڤپەیڤینەكێدا ل گەل كەنالێ (شەمس) كو ب زمانێ عەرەبی ل هەولێرێ پەخش دكەت، راگەهاند، دژی بكارئینانا زاراڤێ (كەمینە) یە، بەری چەند سالان ژی سەرەدانا پەرلەمانێ كوردستانێ كریە و داخواز ژێ كر ل شوونا بكارئینانا ڤی زاراڤی، زاراڤێ (پێكهاتەیان) بهێتە بكارئینان.
سەرۆك بارزانی سەبارەت رەوش و پێشهاتێن نوو یێ سووریێ گۆت، ئاماژەیێن ژناڤچوونا رژێما بەشار ئەسەدی دەركەفتبوون، بەلێ ب ڤی شێوەیێ ب لەز، چو جاران یا چاڤەڕێكری نەبوو. هەروەسا دیاركر دا ئەو رژێم ل سالا 2011 ژناڤچیت، بەلێ وی دەمێ ئیرانێ و رووسیا و حزبوللا یا لوبنانی رێك ل ژناڤچوونا وێ گرت.
سەرۆك بارزانی باسێ وێ چەندێ ژی كر، ئەوا ل سووریێ روودای و رژێما بەشار ئەسەدی كەفتی، دوبارەبوونا هەمان سیناریوویا كەفتنا مووسلێ بوو ل سالا 2014 .
سەبارەت سەركردایەتییا نوو یا سووریێ، سەرۆك بارزانی دیاركر، ئەوا هەتا نوكە ژ دەستهەلاتدارێن نوو یێن سووریێ گۆهلێ دبن، گەلەك باشە، بەلێ هیڤیدارن وەكو خوە بهێنە بجهئینان و دیاركر ژی كو ب مافێ خوە دزانین د هشیار و ئاگەهدار بین، چونكە ئاخڤتن ب تنێ بەس نینە و پێدڤی ب كریاران یا هەی و كێشە بهێنە چارەسەركرن و مفا ژ پەند ووانێن بۆری بهێتە وەرگرتن.
سەرۆك بارزانی دوپاتكر ژی، پێدڤی دكەت چاڤەڕێی كریاران بن، ب تایبەتی چەندین سالە كورد ل وی وەلاتی ب تایبەتی ژ سالا 1963 و وێڤە تووشی دژواری و ئازاران دهێنە كرن و هەتا نوكە ژی ئەڤ رەوشە یا بەردەوامە. هەروەسا ب پێدڤی ژی زانی دەستهەلاتا نوو یا سووریێ د واقعێ كوردان ل سووریێ بگەهیت، هەڤدەم كورد ژی ل وی وەلاتی دڤێت رێكێن ئاشتییانە و دانوستاندنێ بۆ چارەسەركرنا پرس و مافێن خوە بكاربینیت.
سەرۆك بارزانی دوپاتكر ژی، دڤێت كورد ب خوە ل سووریێ سیستەمێ خوە هەلبژێرن، بەلكو ل دەستپێكێ دڤێت د ناڤخوەدا دنگێن خوە ئێكبێخن وپاشێ پێكڤە بچنە دیمەشقێ و داخوازیێن خوە پێشكێش بكەن و ب خوە بڕیارێ بدەن.
ل دۆر كۆمبوونا وی ل گەل مەزلۆم عەبدی، فەرماندەیێ هێزێن سووریا دیموكرات (هەسەدە)، سەرۆك بارزانی گۆت، رەوشا نەتەوەیی پێدڤی ب دیدار و چاڤپێكەفتنەكا ب وێ شێوەی هەبوو و ب گەرمی من پێشوازی لێكر و د بەرانبەر ژی دا مەزلۆم عەبدی هووردەكاریێن دیدارا خوە ل گەل ئەحمەد شەرعی بۆ من باسكر، كو د ئێك دەمدا خالێن هەڤپشك و ناكۆك ژی د ناڤبەرا عەبدی و شەرعی دا هەبوون.

من داخواز ژ مەزلۆم عەبدی كر چو جاران بێ ئومێد نەبیت

سەرۆك بارزانی گۆت ژی، من شیرەت ل مەزلۆم عەبدی كر كو چو جاران بێ ئومێد نەبیت، بەلكو پەنایێ ببەتە دانوستاندنێ و دەستبەردارێ هەر جۆرە كاریگەری و هەژموونەكا دەرەكی بیت و پێنگاڤان ب ئاراستەیا ئێكخستنا گۆتارا كوردی ل سووریێ ب هاڤێژیت. رۆناهی ژی ئێخستە سەر وێ چەندێ كورد ل سووریێ، سەرەرای وێ چەندێ ژ پاشەڕۆژا خوە د گەشبینن، بەلێ ترس و هەستیاری ژی یا ل دەف وان هەی، ب تایبەتی كو پاشەڕۆژا سووریێ ب گشتی یا رۆهن نینە.
سەرۆك بارزانی ئاماژە بۆ وێ چەندێ ژی كر، د دیدارا مەزلۆم عەبدی هەست ب وێ چەندێ نەكریە عەبدی ئاراستەیەكا جوداخوازیێ هەبیت، بەلكو بۆ رۆهن بوو كورد دخوازن پشكەك بن ژ سووریێ و بگەهنە مافێن خوە. سەرۆك بارزانی دیاركر ژی كو گۆتە مەزلۆم عەبدی پەیوەندیێن خوە ل گەل پەكەكێ نە بڕن و بلا ب رێككەفتن نەبیت، بەلكو د ڤی رەوشێدا هوون ب خوە بڕیارێ ل چارەنڤیسێ خوە بدەن و رێكێ نەدەن هیچ كەس دەستێوەردانێ د داخوازی و مافێن هەوە دا بكەت. دوپاتی ل وێ چەندێ ژی كر، دەمێ وێ چەندێ یێ هاتی پەكەكە دەستێوەردانێ د كوردێن سووریێ دا نەكەت.

هەبوونا پەكەكێ ل سووریێ كێشەیەكا مەزنە و بەهانەیەكە بۆ دەستێوەردانا توركیا

سەرۆك بارزانی دوپاتكر ژی، هەبوونا پەكەكێ ل سووریێ كێشەیەكا مەزنە و بەهانەیەكە بۆ دەستێوەردانا توركیا. گۆت ژی: هەرێما كوردستانێ شیانێن هەین رۆلەكێ گرنگ د پرسا كوردی دا ل سووریێ بگێریت ب تایبەت د ئێكخستنا گۆتار و هەلویستێ كوردان و هاندانا وان بۆ دانوستاندنێ ل گەل دەستهەلاتدارێن نوو یێن سووریێ و هاریكارییا وان بۆ مفا وەرگرتنێ ژ ئەزموونا هەرێما كوردستانێ، بەلێ ل گەل وێ چەندێ مەرجە هەمان وێ ئەزموونێ وەكو خوە دوبارە بكەن، ب گۆڕەی وێ چەندێ هەر پارچەیەكا كوردستانێ تایبەتمەندییا خوە یا هەی، گۆت ژی: هەرێما كوردستانێ دشێت هاریكارییا وان بەت ژ روویێ ئابووریڤە.
سەرۆك بارزانی سەرنج بۆ وێ چەندێ راكێشا، نەكو هەر كورد ل سووریێ تووشی مەترسیێ و ستەمێ و چەوساندنێ ببیت یێ بەرهەڤە بەرگریێ ژێ بكەت، بەلكو هەر مرۆڤەك هەمان چارەنڤیس روو ب روویێ وی ببیت، یێ بەرهەڤە بێی هیچ دو دلییەك هاریكارییا وی بكەت. هەروەسا رۆهنكر ژی، ترسەك ل سووریێ سەبارەت كوردان یا هەی، بەلێ هیڤیدارم ئەڤ ترسە نەبیتە واقع و دخوازم ب كریار نەهێتە كرن.
سەرۆك بارزانی ل دۆر سیستەمێ فیدرالیێ گۆت: پێناسەیا راستەقینەیا ڤی سیستەمی پێكدهێت ژ دابەشكرنەكا دادپەروەرانەیا دەستهەلاتێ و سامانان، ئەڤ سیستەمە ژی ژ سەركەفتیترین سیستەمایە ل وان وەلاتێن كو فرە ئالی ژ روویێ پێكهاتەیێن نەتەوەیی و ئایینی و مەزهەبی، كو ئەڤە بۆ سووریێ ژی دروستە و هەمان رووخسارێن فیدرالییەتێ یا هەی و پێكهاتەیێن جۆرا و جۆر ب خوەڤە دگریت.

تێكگەهشتنەكا شاش ل دۆر فیدرالیێ یا هەی كو ب دیتنا وان پارچەكرنا وەلاتییە

سەرۆك بارزانی گۆت ژی: چو جاران نابیت ئەلتەرناتیڤێ فیدرالیێ سەركوتكرن و چەوساندن و ماندەلكرنا مافێن یێن دی بیت، هەروەسا باس ل وێ چەندێ ژی كر، تێكگەهشتنەكا شاش ل دۆر فیدرالیێ یا هەی كو ب دیتنا وان پارچەكرنا وەلاتییە بۆ سەر چەند وەلاتێن بچووك، كو هەر ئەڤ تێكگەهشتنا شاش وەكریە رۆژانە كێشە زێدە ببن.
سەرۆك بارزانی ل دۆر رەفتارا ئیراقێ ل گەل هەرێما كوردستانێ دوپاتكر، ب شێوەیەكێ عەقلانی و بێی هیچ دودلی رەفتارێ ل گەل بەغدایێ دكەن، هەتاكو ل گەل رەوشەكێ نینن كو ئەنجامێ وێ یێ دیار نینە. گۆت ژی: راستە پێشهاتێن نوو یێن هەین، بەلێ بكارئینانا زاراڤێ (جوداخوازی) د راستیدا زاراڤەكێ وەكو شەڕفرۆشی دهێتە بكارئینان، مافێ چارەنڤیس مافێ گەلایە و خودایێ مەزن ئەو مافە یێ پێ دای و كوردان ژی ئەو ماف یێ هەی، بەلێ دڤێت ب تێكگەهشتن و هەماهەنگی ل گەل گەلێن دی یێن دەڤەرێ ب دەستڤە بهێت. دوپاتكر ژی، ماندەلكرنا ڤی مافی ستەمەكا مەزنە و چو جاران ناهێتە قەبوولكرن، زێدەتر ژ سەد سالیە ئەڤ ستەمە ل گەل كوردان دهێتە كرن، بەلێ نە هاتیە ژناڤبرن و نە دوماهی پێ دهێت و كێشە ژی د بەردەوامن، لەوما پێدڤییە ئەڤە بهێتە چارەسەركرن و چارەسەرییەك بهێتە دیتن. نابیت هیچ وەلاتەك ب هێزێ پشتەڤانیێ بۆ حوكمەتێ ب دەستڤەبینیت، پشەڤانی ب هێزێ ب دەستڤە ناهێت.
دۆزا كوردی هەردەم یا دادپەروەرانە و ب هێزە، بەلێ رەفتارا كوردان ب خوە، هندەك جاران وێ دۆزێ ب هێز یان لاواز دكەت، چونكە حەق یێ ب هێزە.

هەكە كورد د ئێكگرتی بن دێ ب هێز بن، كورد پێدڤی دوژمن و نەیاران نینن

سەرۆك بارزانی د وێ هەڤپەیڤینێدا گۆت ژی: هەكە كورد د ئێكگرتی بن دێ ب هێز بن، كوردان پێدڤی ب دوژمن و نەیاران نینە، بەلێ گەلەك جاران رەفتار گەلەك دەلیڤەیان ژ مە دبەن، ئەوژی مە گەلەك یا دیتی. كوردێن سووریێ د ئێكگرتی نینن، كاری بۆ ئێكخستنا وان دكەین و هاندانا وان دكەین، ل سەر ئارمانجەكا شەرەفمەندانە ئارمانجەكێ بۆ ب دەستڤەئینانا مافێن خوە بێی دەست برن بۆ توندوتیژیێ و خوینرێژیێ، ئەز یێ گەشبینم ب هشیاریڤە، نابیت گەشبینی بێی هشیاری بیت، چونكە مە گەلەك یا دیتی.
سەرۆك بارزانی ل دۆر قامشلۆ گۆت: یا د دلێ من دا و هیڤیدارم د نێزیكترین دەلیڤەدا سەرەدانا وێ بكەم، من هزرا قامشلۆ و خەلكێ وێ و هەموو برایێن كوردێن سووریێ یا كری و شەرەفەكا مەزنە گەنجێن كورد ل سووریێ حەز ژ من بكەن، من هەمان خوەشتڤی بۆ وان یا هەی.
هیچ كێشەیەك بێی چارەسەری نینە، بەلێ هەكە نیازپاكی نەبیت، هزار دستوور ژی د بێ مفانە

سەرۆك بارزانی رۆهنكر ژی، كێش د نیازێ دا یا هەی، هەكە نیازباشی هەبیت، هیچ كێشەیەك بێی چارەسەری نینە، بەلێ هەكە نیازپاكی نەبیت، هزار دستوور ژی د بێ مفانە.
سەرۆك بارزانی ل دۆر هەلبژارتنێن پەرلەمانێ كوردستانێ كو پارتی دیموكراتی كوردستان سەركەفتییا ئێكێ بوو ب زێدەتر ژ 40 كورسیێن پەرلەمانی، گۆت: سەركەفتن د هەلبژارتنان د پێشبینیێن مە دا بوو، مە باوەری ب سەركەفتنێ هەبوو، بەلێ نە ب ڤی قەبارەی، سوپاسییت گەلێ كوردستانێ دكەم بۆ ڤێ باوەرییا گەلەك گرنگ.
گۆت ژی: هەلبژارتن ب گەلەك قانوونێن دادگەها بلند یا فیدرالی ب رێڤەچوون، ئۆپۆزسیۆنێ هەموو بزاڤێن خوە كرن بۆ وێ چەندێ ب رێكا وێ چەندێ كاریگەریێ ل سەر پارتی دروست بكەن، بۆ وێ چەندێ لاواز بكەن و تووشی شكەستنێ بكەن. ئەڤە ئارمانجا وان بوو، بەلێ گەلێ كورد هەموو ئەو گومان ژناڤبرن و هەموو بزاڤێن وان شكاندان، سەرەرای هەموو پیلانگێرییان، پارتی سەركەفتنەكا مەزن ب دەستڤەئینا، هەكە هەلبژارتن ئێك بازنەژی بان دا هەژمارا كورسیێن پارتی زێدەتر ژ 45 كورسییان بن، هەكە ل سەر ئاستێ ئیراقێ بیت و دەنگێن كەركووكێ و نەینەوا بێخینە سەر، دەنگێن پارتی دێ ژ ئێك ملیۆن دەنگان دەرباز بن و دێ بیتە یا ئێكێ ل سەر ئاستێ ئیراقێ.

پشكەك ژ دەزگەهێن بەغدا وئۆپۆزسیۆنا هەرێما كوردستانێ پێلانگیریێ دژی پارتی دكەن

سەرۆك بارزانی باس ل وێ چەندێ ژی كر، پشكەك ژ دەزگەهێن بەغدا و ئۆپۆزسیۆنا هەرێما كوردستانێ پیلانگێریێ دژی پارتی دیموكراتی كوردستان دكەن، ئەم ئۆپۆزسیۆنا دیموكراتی د دانینە سەر سەرێ خوە، بەلێ راستی ئەوە پیلانگێری هەبوو، ب هەڤپشكی، دخوازت پارتی بشكێنن و پارچە بكەن و بچووك بكەن. من چاڤەڕێ نەدكر هەلبژارتن ب وی شێوەیێ باش و بێ كێشە بهێنە ئەنجامدان ب سەرپەرشتییا كۆمسیۆنا ئیراقێ و چاڤدێرێن نێڤدەولەتی و نەتەوەیێن ئێكگرتی.
سەرۆك بارزانی ئاماژە كر ژی، پارتی نەبوو هەلبژارتن دو سالان پاشئێخستین، بەلكو ئەوێن ناڤ ل خوە كریە ئۆپۆزسیۆن و پشكەك ژ ئەوێن د ناڤ حوكمەتێدا، پێیەك د ناڤ حوكمەتێ و پێیەك دناڤ ئۆپۆزسیۆنێدا ئەوان هەلبژارتن پاشئێخستن، تاكو دادگەها فیدرالی ئینای و دەستێوەردان كر و گەلەك قانوون گوهۆڕین.
دڤێت حوكمەتا هەرێما كوردستانێ د دەمێ دو مەهێن داهاتیدا بهێتە پێكئینان
سەرۆك بارزانی گۆت ژی: سەبارەت ئالیێن سەركەفتی د هەلبژارتناندا، هەر ل دەستپێكێ مە راگەهاندبوو كو مە ڤیتۆ ل سەر كەسێ نینە، بۆ وێ چەندێ ب گۆڕەی شایستەییا هەلبژارتنان پشكداریێ د حوكمەتێدا بكەن، ئەڤە بنەمایەكێ حەقە، ئەگەر نە هەلبژارتن بۆ چنە، ل گەل ڤێ چەندێ ژی دا دشیان دایە د هندەك حالەتاندا ژ پێخەمەت بەرژەوەندییا نەتەوەیی نەرمیێ نیشان بدەین، نوكە شاندەكێ پارتی بۆ گەنگەشێ و دانوستاندنێ ل گەل ئالییان یێ هاتیە راسپاردن، ل دوماهی كۆمبوونا من ل گەل وی شاندی ب من راگەهاند كو قۆناغەكا باش ل گەل ئێكەتیێ یا دەربازكری، هیڤیدارم د زووترین دەمدا حوكمەت بهێتە پێكئینان و هیڤیدارم هەموو حزب پشكداریێ د حوكمەتێدا بكەن، كوردستان یا مەزنە و هەموو ئالییەكی ماف یێ هەی. بەرێ هەلبژارتنان هەموو ئالییان بەرهەڤی بۆ دەست ب سەرداگرتنا دەستهەلاتێ و هەموو تشتەكی كربوو، نزانم ب نیاز بوون مافێ پەنابەریێ ب پارتی بدەن یان نە؟.
هەروەسا دوپاتكر كو ئەستەمە و نابیت پێكئینانا حوكمەتا نوو یا هەرێما كوردستانێ تاكو دەمێ هەلبژارتنێن ئیراقێ بهێتە پاشئێخستن وەكو هندەك ئالی دبێژت، دڤێت ب كێمی هەتا دو مەهێن دی چاڤەڕێ بهێتە كرن.
د بەرسڤا وێ پرسیارێ دا كینە ئەو ئالیێن ناخوازن كێشەیێن هەرێما كوردستانێ و ئیراقێ چارەسەر ببن، سەرۆك بارزانی گۆت: ئەو حزبن یێن نەشیاین جادەیەكێ دروست بكەن و چاڤێ وان ب پێشكەفتنا هەرێما كوردستانێ نارابیت.

ل بەغدا مە داخوازا پۆست و كورسییان نەكریە، بەلكو مە داخوازا مافێ گەلێ خوە یا كری

سەرۆك بارزانی ل دۆر نەئومێدییا چارەسەربوونا كێشەیێن كوردان ل بەغدا دیاركر، مە گەلەك جاران هزر كریە خوە ژ بەغدا ڤەكێشین، چونكە مە ل وێرێ داخوازا پۆست و كورسییان نەكریە، مە داخوازا مافێ گەلێ خوە یا كری، هەكە وەلێهات خوە ڤەكێشین، دێ ب تمامی خوە ڤەكێشین.
سەبارەت مەترسییا ئیسرائیلێ ل سەر ئیراقێ گۆت: نوكە مەترسی یا كێم بووی، بەلێ هێشتا یا مای، ب تایبەتی هەكە میلیشیا بەرهەڤ نەبن چەكێن خوە رادەستی حوكمەتێ بكەن و هێرشێن ئەسمانی ژ ئیراقێ نەراوەستن، هەتا هێزەك ژی ل ئیراقێ هەبیت كو ل دەرڤەی فەرماندەیا گشتییا هێزێن ئیراقێ بلڤیت، مەترسییا ئیسرائیلێ دێ ل سەر مینیت.
ل دۆر غەزە، سەرۆك بارزانی گۆت: هیڤیدارم ئەو كارەساتا ل وێرێ روودای ب دوماهی بهێت و ئەڤ راگرتنا شەڕی یا بەردەوام بیت، بەلێ ئەم وەكو هەرێما كوردستانێ د دوورین ژ ڤی بابەتی و نە پشكەكین ژ كێشێ.
سەبارەت هاتنا دۆنالد ترەمپی بۆ پۆستێ سەرۆكایەتییا ئەمریكا و كاریگەرییا وێ چەندێ ل سەر ئیرانێ، سەرۆك بارزانی دیاركر، ئیرانی د زیرەكن و هیڤیدارم چارەسەرییەكا ناڤەند د ناڤبەرا وان دا دروست ببیت و ب راستی چارەسەری ژی بهێتە دیتن نەكو وەكو بەرێ بیت د ڤێ رەوشێ دا یا هەلاویستی بیت.
سەرۆك بارزانی باسێ سەرەدانا سەرۆكێ ئیرانێ بۆ هەرێما كوردستانێ كر و گۆت: ئەم هەردو ژ دایكبوویێن باژێرێ مهابادین و مە هەمان ناڤ یێ هەی، ب كوردییەكا جوان د ئاخڤیت و كەسەكێ نەرم بوو، سەرەدانا وی یا هیڤی بەخش بوو. ب دیتنا من هاتنا وی دەلیڤەیەكا باشە بۆ باشكرنا پەیوەندیێن كوردێن رۆژهەلات ل گەل ئیرانێ.
سەرۆك بارزانی ئاماژە كر ژی كو ل پاشەڕۆژێ گەلێ كورد هەر دێ گەهیتە سەربخوەییێ، بەلێ هیڤیدارم د هیچ دەمەكیدا بۆ ڤی مافی پەنایێ بۆ توندوتیژیێ نەبەین.
سەرۆك بارزانی ل دۆر پەیوەندییان ل گەل توركیا دیاركر: پەیوەندییا مە ل گەل توركیا یا باشە و هیڤیدارم ببیتە ئەگەرێ وێ چەندێ ئاشتیێ ل دەڤەرێ بەرهەم بینیت. ئەم د هەڤدیتنێن فەرمیدا هەردەم ل سەر برایەتییا كورد و توركان د رژد بووین، ئەڤە ژی زمانەكێ نوو ل توركیا و پێشتر چو جاران زمانەكێ ژ وی جۆری نە د هاتە قبوولكرن.
سەبارەت وێ چەندێ چاوان هەقلییەتا توركیا بەرامبەر كوردان هاتە گوهۆڕین، سەرۆك بارزانی گۆت: بۆ جارا ئێكێ من ل سالا 2009 ژ رەجب تەیب ئەردۆگان گوهلێبوو كو ئەو دخوازن كێشەیا كوردی ل توركیا چارەسەر بكەن.
سەرۆك بارزانی ل دۆر هەڤرەگەزخوازیێ گۆت: ئەز مرۆڤەكێ باوەردارم و خودای یا گۆتی من مرۆڤ ل سەر دو رەگەزان یێ دروستكری كو نێر و مێیە، لەوما بڕیارا ترەمپی ل دۆر وێ چەندێ، بڕیارەكا شەرەفمەندانەیە و زڤرینا بۆ خواستا خودایێ مەزن.
سەرۆك بارزانی ل دۆر هاتنا داعشێ دبێژیت، هەكە بهێت، پێشمەرگە ژ جارا بۆری زێدەتر یێ بەرهەڤە بۆ بەرهنگارییا وان. ئەز ب خوە ژی هندی د شیانێن من دا بیت ل سەر پیێن خوە بچم، پێشمەرگێ كوردستانێ مە.
سەرۆك بارزانی پەیامەكا گشتی بۆ كوردێن هەر چار پارچێن كوردستانێ هنرات و گۆت: دڤێت ل بیرا هەوە بیت هوون خودان دۆزەكا پیرۆزن و ل سەر بەردەوام بن، بەلێ رێكا توندوتیژیێ ب كارنەئینن بۆ وێ رێكا خوە. ل دوماهیێ كورد ل نێزیك یان دوور دێ ئێكگرن و سەرەرای گرێیان، من باوەرییا تمام یا هەی كو ئەو رۆژە دێ هێت و هەموو هێزا خوە بۆ ئێكگرتنا هەموو كوردان دێ تەرخان كەم.

نێچیرڤان بارزانی، سەرۆكێ هەرێما كوردستانێ پێشوازی ل د. تۆبیاس لیندنەر، وەزیرێ دەولەتێ ل وەزارەتا دەرڤەیا ئەلمانیا و رێكخەرێ تایبەتێ وەزارەتا دەرڤەیا ئەلمانیا بۆ كاروبارێن سووریێ و شاندەكێ د گەلدا كر.
د كۆمبوونەكێدا پێشڤەبرنا پەیوەندیێن ئەلمانیا ل گەل ئیراقێ و هەرێما كوردستانێ، پەیوەندیێن هەولێرێ و بەغدایێ، هەلبژارتنێن پەرلەمانی و رەوشا ئیراقێ و هەرێما كوردستانێ، گوهۆڕینێن سووریێ دوماهی پێشهاتێن رۆژهەلاتا ناڤین، هاتنە گەنگەشەكرن.
نێچیرڤان بارزانی، سوپاسییا هاریكاری و پشتەڤانییا بەردەوام یا ئەلمانیا د وارێن لەشكری و سیاسی و مرۆڤیدا بۆ ئیراقێ و هەرێما كوردستانێ كر، هەروەسا دوپاتی ل خواستا هەرێما كوردستانێ بۆ بەرفرەهكرنا هاریكارییا هەڤپشك ل گەل ئەلمانیا د هەموو واراندا كر.
ژ ئالیێ خوەڤە، لیندنەر، حێبەتییا خوە ب پڕۆسەیا دەنگدانێ بۆ هەلبژارتنێن پەرلەمانێ كوردستانێ و رێژەیا بلند یال پشكدارییا هەڤوەلاتییان د هەلبژارتناندا دیاركر، هەروەسا ل دۆر بزاڤێن پێكئینانا كابینەیا نوو یا حوكمەتا هەرێما كوردستانێ ل گەل نێچیرڤان بارزانی، بیر و بۆچوون لێكگۆهارتن.
سەبارەت رەوشا دەڤەرێ ژی، هەردو ئالییان داكۆكی ل گرنگییا پاراستنا ئارامی و سەقامگیری و هاریكارییا هەموو ئالییەكی بۆ دوورئێخستنا دەڤەرێ ژ ئالۆزیێن زێدەتر كر.