شاهۆ فەرید:

پشتی ب دووماهی هاتنا هەڤڕكیێن قارەمانییا یارییا سنوكەرێ‌ ل سەر ئاستێ‌ كوردستانێ‌ ئەوا ل باژێرێ‌ دهۆكێ‌ هاتییە كرن، ئەوا هەر ئێك ژ یاریزان بەختیار محەمەد رێزا ئێكێ ب دەستڤە ئینا و عومەر جومعە رێزا دویێ هات.
ل دۆر ڤێ‌ یەكێ‌ محەمەد حسێن سەرۆكێ فدراسیونا كوردستانێ بۆ رۆژنامەیا ئەڤرۆ گۆت: پشتی ڤەقەتیانەكا درێژ باژێرێ دهۆكێ دووبارە مێڤانداریكر و قارەمانی ڤەگەریا، مە پێنگاڤێن باش هاڤێتینە بۆ دەمەكێ دیتر دگەل پێكئینانا كابینا نوو یا حكومەتا هەرێما كوردستانێ دێ چەندین جورە چالاكیێن دی هەبن، دهوك خودانا چەندین هولێن باشە لسەر ئاستێ كوردستانێ بۆ یاریا بلیاردێ، ژبلی دانا كوپایێ كوژمەكێ پارەیی بۆ یاریزانێن سەركەفتی هاتەدان، پێنگاڤێن داهاتی دا كوژمێ پارەیی زێدەبكەین دا هەڤركی پتر بكەڤیتە دناڤبەرا یاریزانا دا، ئەم دگەل لژنەیا ئۆلمپی بزاڤان دكەین قارەمانیەكێ مێهڤان بكەین یا چواریانی دەمێ بهێت دا، پلان مە دانایە رێگریێ ل وان كەسان بكەین یێن خولان سەرا پارەیی ڤەدكەن دەمەكێ نێزیك مە نڤیسارەكا فەرمی داخازا قەردەغەكرنا وان جورە خولا كریە.
ژلایەكێ دووڤە ئەحمەد سەلاح جێگرێ سەروكێ فێدراسیونا دهۆكێ گۆت: كێشا سەرەكی بۆ هەر قارەمانیەكێ ماددەیە بی پالپشتی نە ژلایێ یانەیان ڤە تایبەت و فدراسیون ژی ل دووڤ پێچێبوونا خوە هاریكاریێ دكەت، یاریزان ژی گازندا وێ چەندێ دكەن چ پالپشتی بۆ وان ناهێتەكرن، سپونسەریا ئەڤێ قارەمانیێ كاك دارا سەلاحی هەموو ستویێ خوەڤە گرێدا، ئەم دشێن سالانە قارەمانێن باش بینە دهۆكێ لێ ژبەر نەبوونا هاریكاریێ ژلایێ كومپانیا ڤە كارتێكرن مە كریە.
هەروەسان ناڤهاتی گۆت: ئەڤێ قارەمانیێ ئاستێ یاریزانێن مە دیاركر كا چ رەوشێ دانە دێ بزاڤان كەین بۆ قارەمانیێن بهێت پتر هەڤركیێ بكەین، ئەڤ سالە یاریزانێن دهۆكێ زاخۆ پێكڤە یاریی بۆ ناڤێ پارێزگەهیێ دكرن، ئەم شیایین سەركەفتیانە قارەمانیا سنوكەرێ رێكبێخین.

عەلی حاجی:

چاڤەڕێ دهێتە کرن ئەڤرۆ چار یاری ژ هەڤڕکیێن گەڕا ٣٨ێ و دووماهییا وەرزێ ٢٠٢٤-٢٠٢٥ێ یا خولا ستێرێن ئیراقێ یا فوتبۆلێ بهێنە کرن، ئەوا یانەیا شورتە بەری سێ گەڕان ناسناڤێ خولێ مسۆگەر کری، یانەیا زاخۆ دێ یارییا خوە ئەڤرۆ ل باژێرێ رۆمادی کەت و بیتە مێڤانا یانەیا ئەلگەرمە ئەوا دێ ل دەمژمێر حەفتی شەڤ هێتە کرن.
لدورڤێ یاریێ ساید سوێدان هاریکارێ ڕاهێنەرێ زاخۆ بۆ رۆژنامەیا ئەڤرۆ گۆت: ڕاستە تیما مە رێزا سیێ د خولێ دا ئێکلا کریە لێ مە دڤێت دیرۆکێ زێدەتر تومار بکەین و بۆ ئێکەمجار د دیروکا یانەیا زاخۆ دا خالێن وێ بگەهینە ٧٣ خالان و هەر دیسان مە دڤێت ئەڤ یارییە ببیتە ئەگەرەکێ باش بۆ زێدەتر خوە بەرهەڤکرن بۆ یاریا کوپا ئیراقێ بەرامبەر تیما نەوروز، بۆ ڤێ یاریێ چاڤێ مە ل سێ خالێن یاریێ یە، تیما ئەلگەرمە ئێک ژ تیمێن ب هێزە دناڤ یاریگەها خوە دا و دێ ئەڤ یارییە ژ یاریێن ب زەحمەت بیت بۆ هەر دو تیما لێ مە تیمەک هەیە د قوناغەکا باش دا دەرباز بیت و یاری بۆ یاری ژی ئاستێ تیما مە باشتر لێ دهێت، سەرکەڤتنا ل سەر ئەلگەرمە دێ تیما مە هەر مینتە دناڤ کەش و هەوایێ سەرکەڤتنان دا و ئەم حەسناکەین د ڤان یاریان دا کەش و هەوایێ یاریزانێن خوە بێخینە د خوسارەتیان دا.
ژلایێ خوە ڤە سیداد حاجی گۆت: یاریا ل بەرامبەر ئەلگەرمە دێ ئێک ژ یاریێن خوەش بیت ژبەرکو هەر دوو تیم یارییەکا جوان دکەن و دێ شێن یارییەکا باش بکەن نەخاسمە تیما مە ژبەرکو مە رێزا سیێ مسوگەر کریە و چو گڤاشتن ل سەر تیما مە نینن و ژ هەمی روویەکێ ڤە تیما مە د سەقایەکێ باش دا دەرباز دبیت،وەکو یاریزان ژی دێ لدویف پلانا ڕاهێنەرێ خوە کارێ خوە ئەنجام دەین و دێ هەولدەین باشترین ئاست پێشکێش کەین.
ژ یاریێن دی یێن ئەڤرۆ، ئەلقاسم- شورتە ل دەمژمێر حەفتی شەڤ، مینا-یالا ل دەمژمێر ٩:٣٠ شەڤ، نەفت- زەورا ل دەمژمێر ٩:٣٠ شەڤ هێنە کرن.

عەلی حاجی:

د داخویانیەکێ دا ئەندامەکێ دەستەیا کارگێریا یانەیا زاخۆ یا وەرزشی بۆ رۆژنامەیا ئەڤرۆ دیار کر دو یاریزانێن تیمێن وان هاتنە داخاز کرن بۆ هەلبژارتیێ ئولومپیێ ئیراقێ یێ فوتبۆلێ.
زێدەتر نەعمان کوچەر گۆت: ژبەر شیانێن وان یێ بلند د وەرزێ ئەڤ سالە دا یێ هەر دوو یاریزانێن تیما مە یا پشکدار د خولا ستێرێن ئیراقێ دا عومران زەکی و سیداد حاجی،ب شێوەیەکێ فەرمی هاتنە داخاز کرن بۆ هەلبژارتیێ ئیراقێ یێ ئۆلمپی و بۆ کەمپێ ناڤخوە بەرهەڤبن، پێشتر ڤان دو یاریزانان سەربورەکا باش دگەل ڕاهێنەر عیماد محەمەدی هەبوینە و وی ڕاهێنەری باوەرییەکا تمام ب شیانێن وان دوو یاریزانان هەیە ژبەر هندێ داخاز کرینە،و وەکو کارگێریا یانەیا زاخۆ ژی مە باوەرییەکا مەزن ب شیانێن وان هەنە و دێ بەردەوام پشتەڤانێن وان ژی بین.
ل دووماهیێ گۆت ژی: ئەم د خزمەتا هەلبژارتیێن جودایێن ئیراقێ دانە کو یاریزانێن داخاز بکەن و یاریزانێن مە دێ شێن خزمەتەکا باش بۆ هەمی هەلبژارتیێن ئیراقێ بکەن.

یێ‌ ئەرجەنتینی لاوتارۆ مارتینێز ستێرا یانەیا ئینتەر میلان یا ئیتالی خوسارەتییا تیما وان بەرانبەر فلۆمینێنسی د كۆپا یانەیێن جیهانی دا پالدەركێ‌ بهێز دایە مە بۆ وەرزێ‌ نوو یا خولا ئیتالیا و ئەو یاریزانێ‌ بڤێت بچیت دەرگەهێ‌ ڤەكرییە.
هەروەسان لاوتارۆیی بۆ رۆژنامەیا كالیچۆ مێركاتۆ گۆت: پشكدارییا مە د كۆپا یانەیێن جیهانی دا مۆرالەكا بلند دا مە ژلایێ‌ هونەری و تەكتیكی ڤە، سەرباری دەركەڤتنا من ژ قارەمانیێ‌ بۆ مە یا گرنگ هندەك خال بوون، ئەو یاریزانێ‌ دل ل سەر یانەیێ‌ نەبیت دەرگەهێ‌ ڤەكرییە بلا بچیت، هەر هێچەتەكا هەبیت بۆ مە ئاریشە نینە و ئەم یاریێ‌ بۆ درێس و لۆگۆیێ‌ ڤێ‌ یانەیێ‌ دكەین و بۆ وەرزێ‌ بهێت دێ‌ بهێز و باشتر بەرهەڤبین.

عەلی حاجی:

د داخویانیەکێ دا ئەندامەکێ دەستەیا کارگێریا یانەیا زاخۆ یا وەرزشی بۆ رۆژنامەیا ئەڤرۆ دیار کر پێشتری مەهەکێ بوو سەرۆکێ یانەیا مە نامەیا دەست ژ کارکێشانێ پێشکێشی لایەنێن پەیوەندیدار کربوو لێ هاتبوو رەتکرن.
زێدەتر دلژار عەدنان گۆت: د بڕیارەکا نە چاڤەڕێکری دا پێشتری مەهەکێ بوویە سەرۆکێ یانەیا زاخۆ عەمار فەرهاد نامەیا دەست ژ کارکێشانا خوە پێشکێشی جهێن پەیوەندیدار کربوو لێ دەست ژکارکێشانا وی نەهات بوو قەبویل کرن و دێ ل سەر ئەرکێ خوە بەردەوام بیت، یانەیا زاخۆ د رەوشەکا نازک دا دەرباز دبیت ژبەر کو د نوکە دا ل قۆناغا هەشتێ یا کۆپا ئیراقێ دا دێ یاریێ بەرانبەر نەورۆز کەت و باشترین دەلیڤە ژی بۆ یانەیا مە هاتیە پێش کو خوە بگەهینیتە یاریا دوماهیێ ژ کوپا ئیراقێ.
ناڤبری گۆت ژی: بۆ ڤێ قوناغێ زاخۆ پێدڤی ب ئارامیێ هەیە دا کو ئەو دەلیڤەیە ژ دەست مە نەچیت و بشێن ناسناڤێ کوپا ئیراقێ ب دەست خوەڤە بینن و ئەم ژ هەژیترین تیمن بشێن وی ناسناڤی ب دەستڤە بینن.

پشتی بۆ جارا دویێ‌ ل دووڤ ئێك دانۆستاندنێن دناڤبەرا ستێرێ‌ یانەیا ئەتلەتیكۆ مەدرید نیكۆ وێلیامز و بەرپرسێن یانەیا بەرشەلۆنا شكەستن ئیناین و نە گەهشتینە چو ڕێكەڤتنان، یانەیا كاتەلۆنی دیار كر ئەو دەست ژ نێجیرا خوە بەرنادەن.
ل دووڤ ڕاپۆرتا رۆژنامەیا مۆندۆ دیپۆرتیڤۆ هاتییە كو دڤێ‌ حەفتیێ‌ دا كۆمبوونەك دناڤبەرا بریكارێ‌ یاریزان نیكۆ وێلیامز و شاندنەكێ‌ یانەیا بەرشەلۆنا هاتییە كرن، ناكۆكی ل سەر دو بەندێن گرێبەستێ‌ هەبوون دیسان بریكارێ‌ یاریزانی بزاڤێ‌ دكەن گرێبەست نە هێتە ئیمزاكرن، لێ‌ كوژمەیێ‌ گرێبەستێ‌ دبیت هزرا وی ب گوهۆڕیت، ژلایێ‌ خوەڤە بەرپرسێن یانەیا كاتەلۆنی ڕژدن ب هەر شێوەیەكێ‌ نیكۆ وێلیامزی بینە دناڤ ڕێزێن خوە دا و دیاركرییە ئەو ل سەر نێچرا خوە بێ‌ هیڤی نەبووینە.

پشتی بەلاڤبوونا ڕاپۆرتەكا رۆژنامەڤانە ل سەر بزاڤێن یاریزانێ‌ یانەیا برینفۆرد یا ئنگلتەرایی بڕیان ئمبیوتۆی بۆ ئیمزاكرنا گرێبەستەكێ‌ دگەل یانەیا مانچستەر یۆنایتدێ‌ بێ‌ ئاگەهدارییا یانەیا خوە، دەنگڤەدان ل پشتخوە هێلایە و بەرپرسێن یانەیا برینفۆردێ‌ هوشداری دایە یاریزانێ‌ خوە.
ل دووڤ داخویانییاقێل جایلز ڕێڤەبەرێ‌ تیما یانەیا برینفۆرد بۆ the sun یا بریتانی گۆت: هەرچەندە گرێبەستا بریان ئمبیومۆی وەرزەكێ‌ دی مایە، لێ‌ دووڤ بەندێن گرێبەستێ‌ ئەو دشێت بۆ هەر یانەكێ‌ یاریێ‌ بكەت هێشتا سالەك یا مایی، زێدەباری بەندەكێ‌ دی یێ‌ یاسایی هاتییە ئیمزاكرن نابیت یاریزان بێ‌ ئاگەهدارییا یانەیا خوە چو دانۆستاندنان دگەل هیچ یانەیەكێ‌ بكەت، لەوما ژی هەكە بەردەوامبیت دێ‌ سكالا ل سەر هێتە تۆماركرن، هەكە بڤێت بچیت بلا دگەل مە دانۆستاندنێ‌ بكەت و مە 65 ملیۆن پاۆن دگەل 15 ملیۆن پاۆنێن پاداشتان بۆ دانایە.