دیدار: سالار محەمەد دۆسكی

3 – 7

جارەكێ‌ دو پۆلیسێن ئەمنێ‌، د دەستێن من یێن كەلامچە كری ڕا گرتن و ل دووڤ خوە ڕاخشاندم. ئەز هاڤێتمە د كونجەكا گەلەك تەنگ ڤە كو، جهێ‌‌ كەلەخێ‌ من یێ‌ لاواز و تژی ئازار و ئێشان تێڤەنەبوو. قەتەكێ‌‌ مۆكێتی یێ‌‌ هەتكی تێڤە بوو و بلۆكەكێ‌ ڕەق كو سەرێ‌‌ خوە دانمە سەر. دیوارێن وێ‌‌ كونجا تەنگ گەلەك بترس بوون. تەماشەكرنا وان بێزاری د من دا دچاند. دەمێ‌ من چاڤێن خوە ب خورتی ل سەرئێك ڕادكرن، پنیێن خوینێ‌ من پێڤە ددیتن. ئێكجار ترس ل نك من مەزن دبوو. من د دل دا دگۆت، كا بەری من چەند كەس سەر ڤی مۆكێتێ‌ ڕەق ب ئازار و ئێشانێن خوە ڤە ڕازاینە. یان مرینە و ژیان ژدەستداینە.
پشتی ساتەكی‌، پۆلیسەكی پێنەك ل دەرگەهی دا و ترارەكێ‌ هندەك برنج تێدا و هندەك ئاڤكا سۆر ب سەر وەركری، هاڤێتە بەر من. من ب دەنگێ‌‌ خوە یێ‌‌ كز گۆتێ‌:(بۆ من ئاڤێ‌). بێهنەكێ‌ غەوارە بوو و هات دیسا كلیل ئێخستنە دەرگەهی و دەرگەه ڤەكر. قودیكەكا تەماتی‌ یا ژەنگاری و تژی پێڤە تەڤنێ‌ تەڤنپیركا و ئاخ، هندەك ئاڤا شێلی كربوویێ‌ دفنا خوە یا پەتشی كو دێمێ‌ وی یێ‌ ڕەش تەعلە داپۆشی بوو، نێزیك من كر و لوولیا تڤەنگێ‌ ل سەمتا دلێ‌ من گرت و گۆتە من:(ڤەخۆ، ئەڤە ماعۆنێ‌ سەیانە، لێ‌ سە ژ تە پاقژترن، هەما ڤەخۆ). ئەڤ گۆتنێن زڤر و نەخۆش تنێ‌ بۆ شكاندنا كەسایەتیا مرۆڤێ‌ گرتی بكار دئینان.
لەشێ‌‌ من هەمی دئێشا، سەر و چاڤێن من د وەرمتی بوون، جهێ‌ كولم و بۆكسا ڕەش و شین ببوو. یێ‌‌ ژ دوورڤە ئەز دیتبام، دا بێژت ڤی بەرچاڤكەكا ڕەشا مەزن یا كریێ‌‌. د سەر هندێ‌‌ ڕا كو ئەز گەلەك دئێشام، لێ‌ من های ژ قێڕیێن هەڤالێ‌‌ خوە (سەدیق)ی هەبوو كو، قێڕیێن وی گەلەك د بلند بوون، ئەو گەلەك حێل دقوتان.
د وێ‌‌ كونجا تەنگ و تاری ڤە، ئەز پتر دهاتمە ئێشاندن. هەر جارەكا ئەز ژ هش چۆبام، ئەو پۆلیسێ‌‌ دەرگەهڤان هەر بێهنەكێ‌ دا پێنەكێ‌ ل دەرگەهی دەت و زڕێن دئێخستە مەژیێ‌ من و ئەز ب وان ئێشانان ڤە ڤەدگەڕاندمە وی ژیوارێ‌‌ پیس وكرێت و پر ئێش.
دەمێ‌ دبوو سات (12)، یان ژی (1)ی شەڤێ‌‌، ب دورستی مە دەم ژ بیركربوو، لێ‌ دەنگێ‌ ڕووباری و بەقا و سیسڕكا خۆش دهات و هۆسا من هەست ب هەبوونا شەڤێ‌ دكر. وەكی دی د وێ‌ جیهانا كەڕ دا، دا مە ژ وان ژوور و كونجێن تەنگ و تاری دەرێخن و جلك ژ بەر مە دكرن و ڕادكێشاینە مەیدانەكێ‌ كو تژی بەرەخشكێن بەرتڕ و سەرتیژ لێ‌ بوون، ب وان پێن وەرمی ڤە دا ب سوندەی ئاڤا تەزی ل مە ڕەشینن و هندەكا ژی ب زنجیرا ئەم ڕادكێشاین، هندەكا ژی ب قامچی و كێبلا ددانامە. سەرێن مە نقۆیی دۆلكێن ئاڤێ‌‌ دكرن و هەناسە ل مە چك دبوو. ئەم تووشی خەندقینێ‌‌ دبووین. لێ‌‌ وا نەدڤیا تنێ‌‌ جارەكێ‌ بمرین، وان خۆشی ژ وێ‌‌ چەندێ‌ دبر كو هەڕۆ سەد جاران بمرین.
ل ئیستیخباراتا عەسكەری یا زاحۆ ئەم پتری (15) ڕۆژان ل بن ڤی جۆرێ‌‌ ئەشكەنجەیا دژوار ماین سحارێ‌‌، نیڤرۆ و ئێڤاری و درەنگێن شەڤان، قامچی و كارەب و كێبڵ و هلاویستن و قەماندنا پیستی و ڤەمراندنا جگارێ‌‌ ب لەشێ‌ مەڤە، خەبەر و كرێتی دهاتنە مە. ئەم گەلەك بێهێز كربوون.
پشتی بۆرینا وان رۆژێن ئەشكەنجەیێ‌، دەرگەهێ‌ وێ‌ كونجا تەنگ ڤەبوو و پۆلیسەكی ئەز ڕاكرمە ڤە و ڕاخشاندمە بەر مێزا وی ئەفسەرێ‌‌ دگۆتنێ‌‌(ئەبۆ سالم). ل بەر مێزا وی كورسیكەك دانان و ئاماژەكر كو ڕوونمە خوار. و گۆتە من:(هەڤالێن تە دانپێدان یێن كرین، تو یێ‌‌ مایی، ڤێجا ڕەحمێ‌ ب خوە ببە، سەحكە خوە، تو وەكو داركێ‌ لەڤەنێی، تو نەشێی خوە ل سەر پێن خوە بگری، تو نابیە (45) كیلۆ، تە چ سەر خوە هەیە خوە ل بەر ڤێ‌‌ هەمی نەخۆشی و ئێشانێ‌ بگری؟ هەمی تشتێ‌ خوە ببێژە بۆ تە باشترە. پشتراستبە ژی هندی نەئاخڤی، تو ژ ڤێرە دەرناكەڤی. ڤێجا بێژە من كا تو بۆ كێ‌ كار دكەی؟ ئەز سویند دخوم وی های ژ تە نینە. كا ئەوێن تو پێ‌ دخوڕی ل كیڤەنە؟ عەسات؟ مەسعوود بارزانی؟ كانێنە ئەو؟ ئەوێن تو بۆ كار دكەی نوكە ل كیڤەنە؟ دێ‌ تە دەنە كوشتن دا ئەو بژین). خەبەر و كرێتی گۆتنە سەركردەیێن كورد. وێ‌ كێلیكێ‌ من دڤیا گوهێن خوە بگرم، تووشی شكەستنێ‌ دبووم. هەر ژ بێ‌ هێزیا خوە، من گۆتێ‌:(گەورەم، هەر تشتێ‌‌ تە بڤێت بنڤیسە و دێ‌‌ ئیمزا كەم).
مڕیتا وی تێكچۆ، ژ پشت مێزێ‌‌ ڕابووڤە، مرۆڤەكێ‌ گەود مەزن بوو، كلۆخەكێ‌ مەزن ل سەر ستۆیی بوو، عوورێ‌ وی وەكو همبانەكا مەزن ب بەژنێ‌ ڤە دهەژیا، لەپێن وی د ستوور و پان بوون. ئەو رەش ئەسمەرێ‌ سمبێل ستوور، ل هنداڤ سەرێ‌‌ من ڕاوەستیا و دەستێ‌‌ خوە كرە گلۆمچك و ل ناڤ قولنجێن من دا، من هەست كر دلێ‌ من ژ سینگێ‌ من هاتە دەر. خوە چەماند و گۆتە من:( نە، هۆسا چێنابت، ڤێت تو ب دەڤێ‌ خوە بۆ من بێژی كا هوون چەندن؟ چ دكەن؟ ل كیڤە كۆمبوونان دكەن؟ (عەسات) ل كیڤە هەوە دبینن؟ و بۆ من بێژە كو تو عەمیلێ‌‌ شانەكا پارتی دیمۆكراتی كوردستان یا تێكدەری و ئابۆنان كی ژ تە وەردگریت؟). ژ ئێش و ئازارێن خوە دا، من دانپێدان كر. ل سەر گۆتنێن خوە ئیمزاكر. وی دڤیا ناڤێ‌ هندەك كەسا بدەمێ‌‌ و بێژمێ‌ ئەڤە ژی دڕێكخستینە ل گەل مە. لێ‌‌ من ناڤێ‌ چ كەسەكی نە ئینا زمان و من بۆ تەكەز كر كو كەسێ‌‌ نانیاسم.
ڕۆژا دادوەرەكێ‌ كورد ژی ئیناین كو باوەریێ‌ ل سەر گۆتنێن مە بدەت، من دڤیا بێژمە دادوەری ئەو گۆتن هەمی نەیێن منن. لێ‌‌ (ئەبۆ سالم) قورنجیكەك ل زەندكا من دا كو خوین تێزا، من هەست كر دبن هچكێ‌ من ڤە بازنەیەكێ‌ خوینێ‌‌ چێبۆ. لەوا و ژ ترسێن دوبارە ئەشكەنجەیێ‌‌ من گۆتە دادوەری:( بەلێ‌ ئەو گۆتنێن منن).
پشتی دادوەری باوەری ل سەر گۆتنێن مە دای كو ئەڤ كەسە دانپێدانێ‌‌ ب كریارێن خوە دكەن و ئەو بەرپرسیارن ژ كریارێن خوە. پشتی هینگێ‌ ب سێ‌ ڕۆژان، ئەم ل ترۆمبێلەكێ‌ سواركرین. جامێن وێ‌‌ هەمی ب پەڕێن ڕۆژنامە و كاغەزان تاری كرن. هەر چەندە چاڤێن مە دگرێدای بوون، لێ‌‌ من هەست ب خشخشا پەڕان دكر، چونكو دەمێ‌ ترۆمبێل ب لەز دچۆ، بای پەڕ دلڤاندن و فڕفڕ ژێ‌‌ دهات. هەر چەندە مە د ناخا خوە دا تژی پەیڤ و گۆتن و هزر و خەیال و هیڤی و ئۆمێد هەبوون، د ناخا مە دا یاخیبوون هەبوو، لێ‌ بێدەنگیەكا كوژەك خوە ب سەر سەقایێ‌ ترۆمبێلێ‌ دادابوو و تنێ‌ دەنگێ‌ تایران دەمێ‌ جاددە دبڕی و تژی گوهێن مە خڕخڕ دكر، ئەم ژ هەر بزاڤەك و لڤینەكێ‌ ڕێنجی كربوون.