پەیڤدارا دەم پارتیێ دیار دکەت، قووناغا ئاشتیێ ئەو یەک سەلماند کو پێدڤیە رێککەفتنەکا نوو د ناڤبەرا کوردان و تورکان دا بهێتە کرن، دڤێت کورد ژی وەکو تورکان ل تورکیا بگەهنە هەموو مافێن خوە و جهێ دلخوەشیێ یە نها هەموو هێزێن سیاسی پشتەڤانیێ ل مافێن کوردان دکەن.

ئایشەگۆل دۆغان پەیڤدارا دەم پارتیێ سەبارەت ب قووناغا ئاشتیێ دیار کر، هەتا نها کارێن گەلەک باش هاتینە کرن، قووناغا ئاشتیێ ئەو یەک سەلماند کو دڤێت ل تورکیا کورد و تورک وەکو برا بژین، کا تورکان ل تورکیا چ ماف هەنە دڤێت کوردان ژی هەمان ماف هەبیت و گۆت: (دڤێت رێککەفتنەکا نوو بهێتە کرن، ژ بۆ ڤێ یەکێ ژی بێگومان پێدڤیا تورکیا ب دستوورەکێ نوو هەیە، ب سالانە کورد دبێژن وان مافێن خوە دڤێت، کورد کار بۆ پارچەکرنا تورکیا ناکەن، لێ کورد دخوازن ل سەر ئاخا خوە بژین و دڤێت رێز ل کوردان و داخوازیێن وان بهێتە گرتن، ب دەستپێکرنا قووناغا ئاشتیێ و کارێن هەتا نها هاتینە کرن دیار بوو، ل تورکیا هەموو هێزێن سیاسی هەست ب ڤێ یەکێ کرینە، کو دڤێت کورد بگەهنە مافێن خوە و ئەو یەک ژی بێگومان گەلەک گرنگە).
پەیڤدارا دەم پارتیێ ئەو یەک ژی دیار کر، هەموو هێزێن سیاسی یێن ئەڤرۆکە د کۆمسیۆنا ئاشتیێ دا جه گرتینە ئەو یەک قەبوول کرینە، کو ب شەڕی چو پرسەک ل تورکیا ناهێتە چارەسەرکرن و ژ بۆ چارەسەرکرنا پرسا کوردی ژی دڤێت هەموو ئالیێن سیاسی هاریکار بن، ب ئینکارکرنا کوردان ل تورکیا گەلەک ئالۆزی دروست بوون و زیانێن گەلەک مەزن گەهشتنە تورکیا، نها سەردەمەک نوو دەستپێکریە و ئەو یەک ژی سەردەمێ برایەتیا کوردان و تورکانە، بێگومان ژ بۆ ڤێ یەکێ ژی گرنگە چاکسازیێن سیاسی و قانوونی ل تورکیا بهێنە کرن، ئێدی سەردەمێ ئینکارکرنا کوردان ل تورکیا ب دووماهی هات و نها سەردەمێ قەبوولکرنا کوردانە، دڤێت ئەو یەک ژی ب فەرمی بهێتە کرن.
ناڤهاتیێ ئەو یەک ژی دیار کر، هەموو هێزێن سیاسی ل تورکیا بەحسێ دستوورەکێ نوو دکەن، بێگومان کوردان ژی دڤێت دستوورێ نها نەمینیت و ب دستوورەکێ نوو گەلەک تشت بهێنە چارەسەرکرن، گرنگە بەری هەر تشتەکێ د دستوورێ نوو دا هەبوونا گەلێ کورد ل تورکیا بهێتە قەبوول کرن، چونکی ل تورکیا تنێ تورک ناژین و گەلەک خەلکێن دی ژی ل تورکیا دژین و دڤێت ب فەرمی مافێن وان ژی بهێتە گەرەنتیکرن، هەکە دستوورەک نوو و دیموکراتی ل تورکیا هەبیت بێگومان دێ گەلەک پرسێن هەی هێنە چارەسەرکرن و گۆت: (براتی تشتەک وەسایە، دڤێت برایێ تە ژی وەکو تە هەمان ماف هەبیت، هەکە تشتەک وەسا ل تورکیا بهێتە کرن بێگومان نە تنێ پرسا کوردی بەلکو دێ گەلەک پرسێن دی ژی هێنە چارەسەرکرن و ب سالانە ئەم دبێژین هەکە تورکیا پرسا کوردی چارەسەر بکەت دێ بیتە وەلاتێ هەری بهێز ل دەڤەرێ و ژ بەر ڤێ یەکێ ژی نها کار بۆ چارەسەرکرنا پرسا کوردی و گەلەک پرسێن دی دهێنە کرن).
سەبارەت ب کۆمسیۆنا ئاشتیێ ژی ناڤهاتیێ دیار کر، پێکئینانا کۆمسیۆنا ئاشتیێ ژ بۆ راگرتنا شەڕی و پێشڤەبرنا قووناغا ئاشتیێ گەلەک یا گرنگ بوو، بێگومان نها کۆمبوونێن کۆمسیۆنێ دهێنە کرن و ژ بۆ کو چو ئاریشە ژی دروست نەبن ناڤەرۆکا کۆمبوونان بۆ رایا گشتی و دەزگەهێن راگەهاندنێ جارێ بلاڤ نابیت، هەموو بزاڤ بۆ ڤێ یەکێ نە هەتا دووماهیا ئەڤسالە کارێ کۆمسیۆنێ ب دووماهی بهێت و وەسا ژی قووناغا ئاشتیێ بگەهیتە ئارمانجا خوە و گۆت: (بەری دو رۆژان بەرێز دەولەت باخچەلی ژی بەحسێ ڤێ یەکێ کر، کو وان دڤێت هەتا دووماهیا ئەڤسالە قووناغا ئاشتیێ ب دووماهی بهێت و بێگومان هەکە چو ئالۆزی دروست نەبن دێ گەلەک گوهۆڕینێن مەزن و گرنگ ل تورکیا روو دەن و ئەو یەک د بەرژەوەندیا هەموو خەلکێ تورکیا دایە).
ئەو یەک د دەمەکێ دایە کو بەری دو رۆژان پەروین بولدان هاریکارا سەرۆکێ پەرلەمانێ تورکیا و ئەنداما شاندێ ئیمرالیێ ژی دیار کر، هەکە قووناغا ئاشتیێ بگەهیتە ئارمانجا خوە دێ هەموو چەکدارێن پەکەکێ ڤەگەرنە ڤە تورکیا و ژ بۆ ڤێ یەکێ ژی کۆمسیۆنا ئاشتیێ یا ل پەرلەمانێ تورکیا دێ پرۆژەیاسەکا تایبەت بەرهەڤ کەت و دەمێ ل پەرلەمانی هاتە پەسەند کرن بێگومان دێ قووناغەکا گرنگ ل تورکیا دەستپێکەت، ئێدی سەردەمێ شەڕی و ئالۆزیان نەمایە و دڤێت پرسا کوردی و هەموو پرسێن دی یێن تورکیا ب دانوستاندنان بهێنە چارەسەرکرن، پێدڤیا تورکیا ب ئاشتیێ و برایەتیێ و پێکڤەژیانێ هەیە و ژ بۆ ڤێ یەکێ ژی هەتا نها کارێن گەلەک باش هاتینە کرن.

شیرەتکارێ رێبەرێ ئیرانێ دیار کر، رێککەفتنا کو ب ناڤبژیڤانیا ئەمریکا ل واشنتۆنێ و د ناڤبەرا ئەرمەنستانێ و ئازەربایجانێ دا هاتە ئیمزا کرن پشکەکە ژ پیلانا ئەمریکا و ئسرائیلێ بۆ لاواکرنا ئیرانێ و ئەمریکا دڤێت وەسا ئیرانێ دۆرپێچ بکەت و ئەو یەک ژی ب چو رەنگەکێ ژ ئالیێ ئیرانێ ڤە ناهێتە قەبوول کرن و ئیران رێ نادەت ئازەربایجان و ئەرمەنستان ببنە پشکەک ژ پیلانا ئەمریکا و ئسرائیلێ و ئەو رێککەفتنا کو هاتیە کرن دێ ل سەر کاغەزێ مینیت و ب چو رەنگەکێ ژی ب کریاری ناهێتە بجهئینان.
عەلی ئەکبەر ویلایەتی ئەو یەک ژی دیار کر، ئەمریکا دڤێت ب رێیا رێککەفتنەکا وەسا خوە بگەهینتە سنۆرێن ئیرانێ و ئالۆزیان بۆ بازرگانیا ئیرانێ ل گەل وەلاتێن جیهانێ دروست بکەت، ئارمانجا ئەمریکا و ئسرائیلێ دۆرپێچکرن و لاوازکرنا ئیرانێ یە، مخابن ئەرمەنستان و ئازەربایجان ژی بووینە پشکەک ژ پیلانا ئەمریکا و ئسرائیلێ، لێ ئەو یەک ب چو رەنگەکێ ناهێتە بجهئینان و دێ ل سەر کاغەزێ مینیت.
چاڤدێرێن سیاسی ل ئیرانێ ژی دیار دکەن، هەکە رێککەفتن بهێتە بجئینان دێ ئەمریکا و ناتۆ بنە جیرانێن ئیرانێ و دبیت چەندین بنگەهێن سەربازی ل سەر سنۆرێن ئیرانێ بهێنە دروست کرن و د بیاڤێ بازرگانیێ دا ئیران دێ پێگەهێ خوە یێ جاران ژ دەست دەت و دێ نەچار بیت ب رازیبوونا ئەمریکا بازرگانیێ بکەت و ئەو یەک ژی دێ بیتە ئەگەرێ لاوازبوونا ئیرانێ.