سەرۆك بارزانی د سالڤەگەڕا ژ دایكبوونا محەمەد پێغەمبەری (س.خ) دا پەیامەكا پیرۆزباهییێ بەلاڤكر.
سەرۆك بارزانی دبێژیت «ب هەلكەفتا سالڤەگەڕا ژدایكبوونا پێغەمبەرێ مەزن حەزرەتێ محەمەد (سلاڤێن خودێ ل سەر بن) و جەژنا مەولودێ، گەرمترین پیرۆزباهیێ ل هەموو موسلمانێن كوردستانێ و ئیراقێ و هەموو جیهانێ دكەم».
سەرۆك بارزانی گۆت ژی «ژ خودایێ مەزن دخوازم د ڤێ هەلكەفتا پیرۆز دا دەرگەهێ ڕەحمەت و بەرەكەتا خوە بۆ خەلكێ كوردستانێ و ئیراقێ و هەموو مرۆڤایەتیێ ڤەكەت».
د دووماهییا پەیاما خوە دا سەرۆك بارزانی دبێژیت: «هیڤیدارم ئەڤ هەلكەفتا پیرۆز ئاشتی و ئارامی و خێر و خۆشی و دادیێ بۆ دەڤەرا مە و هەموو جیهانێ ب دەست بینیت».

نێچیرڤان بارزانی، سەرۆكێ هەرێما كوردستانێ ڕاگەهاند: «د بیرەوەرییا پیرۆزا ژدایكبوونا پێشەوا و پێغەمبەرێ مەزنێ ئیسلامێ حەزرەتێ محەمەدی دا (سلاڤێن خودێ ل سەر بن)، گەرمترین پیرۆزباهیێ ئاراستەی هەموو موسلمانێن كوردستانێ، ئیراقێ و جیهانێ دكەم».
د پەیامەكێ دا ل ڕۆژا سێشەمبی 25/8/2026، سەرۆكێ هەرێما كوردستانێ دبێژیت «هیڤیخوازم ئەڤ بیرەوەرییا پیرۆز، خێرێ، خوەشیێ، تەناهیێ و ئاسوودەییێ بۆ هەموویان ل گەل خۆ بینیت و ببیتە هێڤێنێ ب هێزكرنا گیانێ برایەتیێ، لێبۆرینێ و پێكڤەژیانا ئاشتییانە د ناڤبەرا هەموو پێكهاتەیان دا».
هەروەسا دبێژیت «بلا ئەڤ بیرەوەرییا پیرۆز ببیتە دەلیڤەیەك بۆ نووژەنكرنا پێگیریبوونێ ب پەیام و ڕێنمایی و بهایێن بلندێن پێغەمبەری (س.خ) د بەلاڤكرنا چاكیێ، دادیێ، ئاشتیخوازیێ و مرۆڤدۆستیێ دا، دا كو پێكڤە بەرەڤ پاشەڕۆژەكا ئارام و تەناتر گاڤان بهاڤێژین».

سەرۆكێ حوكمەتا هەرێما كوردستانێ، ب هەلكەفتا بیرەوەرییا ژدایكبوونا پێغەمبەرێ ئیسلامێ (س.خ)، پەیامەكا پیرۆزباهیێ ئاراستەی هەموو موسلمانێن كوردستانێ و جیهانێ كر.
ل ڕۆژا سێشەمبی 25/8/2026، مەسرور بارزانی، سەرۆكێ حوكمەتا هەرێما كوردستانێ ب هەلكەفتا بیرەوەرییا ژدایكبوونا حەزرەتێ محەمەد، پێغەمبەرێ ئیسلامێ (س.خ) گەرمترین پیرۆزباهیێن خوە ئاراستەی هەمی موسلمانێن كوردستانێ و جیهانێ كرن.
سەرۆكێ حوكمەتا هەرێما كوردستانێ د پەیاما خوە دا هیڤی خواست ئەڤ بیرەوەرییە ببیتە ئەگەرێ كوورتربوونا فەرهەنگا پێكڤەژیانا ئاشتییانە د ناڤبەرا پێكهاتەیێن جودا یێن كوردستانێ دا.
هەروەسا، مەسرور بارزانی هیڤی ژی خواست ئاشتی و برایەتی و تەبایی د ناڤبەرا هەموو گەلێن جیهانێ دا پتر بهێتە چەسپاندن و گەشەیێ بكەت.

سەرۆك مەسعود بارزانی ل سالڤەگەڕا 38 یا ئەنفالا بەهدینان پەیامەك بەلاڤكر و تێدا هاتییە: د بەردەوامییا زنجیرە تاوانێن ڕژێما بەرێ یا ئیراقێ دا د چەرخێ بیستێ دا، ل 25ێ ئابا 1988ێ هەتا 6ێ ئیلۆنا 1988ێ، ڕژێما ئیراقێ هەوەكا نەمرۆڤانە ل پشكەكا مەزن ژ دەڤەر و گوندێن دەڤەرا سەربلندا بەهدینان ئەنجامدا.
دەقێ پەیاما سەرۆك بارزانی:
د بەردەوامییا زنجیرە تاوانێن ڕژێما بەرێ یا ئیراقێ دا د چەرخێ بیستێ دا ل 25ێ ئابا 1988ێ هەتا 6ێ ئیلۆنا 1988ێ ، ڕژێما ئیراقێ هەوەكا نەمرۆڤانە ل پشكەكا مەزن ژ دەڤەر و گوندێن دەڤەرا سەربلندا بەهدینان ب ئەنجامدا.
د وێ پیلانێ دا تاوانا كیمیابارانكرن، گرتن، كوشتن، دەربەدەركرنا ب زۆری و ئەنفالكرنا وەلاتییێن بێتاوان ژ ئالیێ هێزێن ڕژێما وی سەردەمی یا ئیراقێ ڤە هاتە ب جهئینان. د ئەنجامێ وێ تاوانا نەمرۆڤانە دا، ب هزاران وەلاتییێن كوردستانێ كۆمكوژ و بێسەروشوون و ئاوارە بوون، هەروەسا سەدان گوند ژی وێران بوون.
مەرەما سەرەكی یا ڕژێمێ ژ وێ تاوانا مەزن، گوهۆڕینا دیموگرافییا كوردستانێ و ب جهئینانا سیاسەتا ئەردێ سۆتی و شكاندنا ئیرادەیا گەلێ كوردستانێ بوو. لێ ئیرادەیا پیلایی یا گەلێ كوردستانێ بۆ مانێ و ئازادیخوازیێ سەركەفت، و ئەو دوژمن و تاوانبار بوون یێن كو ژناڤچووین و بووینە پەندا ڕۆژگارێ.
د سالڤەگەڕا 38 یا تاوانا ئەنفالا بەهدینان دا، هزاران سلاڤان بۆ گیانێ پاقژێ شەهیدێن ئەنفالا بەهدینان، گەرمیان، بارزان و تەڤایا شەهیدێن ڕێكا ئازادییا كوردستانێ دهنێرین. د ڤێ بیرەوەرییا دلتەزین دا ڕادگەهینین كو ئەركێ سەر ملێ دەولەتا ئیراقێیە قەرەبوویا هەموو وان تاوان و بنپێكرنان بكەت یێن دژی گەلێ كوردستانێ هاتینە ئەنجامدان.

نێچیرڤان بارزانی، سەرۆكێ هەرێما كوردستانێ د سالڤەگەڕا 38 تاوانا ئەنفالا بەهدینان دا، دوپاتی ل سەر ب هێزكرنا تەبایی، ئێكڕیزی و پێكڤەژیانا ئاشتییانە د ناڤبەرا هەموو ئالییێن سیاسی دا كر، دا كو پاشەڕۆژەكا ئارام بۆ گەلێ مە بهێتە دابینكرن.
ل ڕۆژا 25/8/2026، سەرۆكێ هەرێما كوردستانێ د پەیامەكێ دا ئاماژە ب وێ چەندێ دا كو ئەڤرۆ بیرەوەرییا ب ئێش و ئازار یا تاوانا ئەنفالا بەهدینانە، كو ل 25ێ ئابا 1988ێ دەستپێكری و تێدا ڕژێما وی سەردەمی یا ئیراقێ خەلكێ سڤیل، ئاڤ، ئاخ و ژینگەها دەڤەرا بەهدینان ب چەكێن قەدەغەكری كربوونە ئارمانج.
نێچیرڤان بارزانی ب ڕێز و شكۆڤە بیرئینانا هەموو شەهیدان و قوربانییێن ئەنفالا بەهدینان و تەڤایا ئەنفالكرییێن كوردستانێ كرەڤە و سەرێ ڕێزێ بۆ گیانێ وان یێ پاقژ چەماند.
سەرۆكێ هەرێمێ دیار كر كو ئەنفال تاوانەكا مەزنە دژی مرۆڤایەتیێ و ژ ئالیێ دادگەها بلند یا تاوانان ل ئیراقێ وەك جینۆساید، تاوانا شەڕی و تاوانا دژی مرۆڤایەتیێ هاتییە ناساندن. ژبەر هندێ، داخوازا خوە بۆ حوكمەتا فیدرالا ئیراقێ دووپات كر بۆ قەرەبووكرنا ماددی و مەعنەوی یا كەسوكارێن قوربانییێن ئەنفالێ و هەموو زیانپێكەفتییێن دەستێ ڕژێما بەرێ، هەروەسا دوپاتی ل سەر بەردەوامبوونا بزاڤان بۆ ناساندنا ئەنفالێ وەك جینۆساید ل سەر ئاستێ نێڤدەولەتی كر.
نێچیرڤان بارزانی دبێژیت ژی كو دڤێت دیرۆكا پڕ ژ تاوان و مالوێرانی ببیتە پەند و وانەیەكا بەردەوام بۆ ئیراقێ دا كو ڕێگری ل دووبارەبوونا هەر جۆرە ستەمكارییەكێ بهێتە كرن و مافێن دەستووری یێن گەلێ كوردستانێ و هەموو پێكهاتەیان پاراستی بن.
د دووماهییا پەیاما خوە دا، سەرۆكێ هەرێما كوردستانێ سلاڤ بۆ گیانێ پاقژێ شەهیدێن ئەنفالا بەهدینان و هەموو شەهیدێن كوردستانێ هنارتن، هەروەسا ب پێزانین و ڕێزڤە هەلوەستێ نیشتمانی و مرۆڤدۆستانە یێ خەلكێ هەولێرێ و دەوروبەران ب بیر ئیناڤە، كو د ڕۆژێن تەنگاڤ یێن كەمپا جێژنیكان دا ب هاوارا لێقەومایێن بەهدینان چووبوون.

ل بیرەوەرییا سالڤەگەڕا 38 هەوێن ڕەش یێن ئەنفالا بەهدینان، مەسرور بارزانی، سەرۆكێ حوكمەتا هەرێما كوردستانێ پەیامەك بەلاڤكر و تێدا ب ڕێز و شكۆڤە بیرئینانا قوربانییێن وێ تاوانا دڕندانە كر.
سەرۆكێ حوكمەتا هەرێمێ د پەیاما خوە دا دوپاتی ل سەر وێ چەندێ كر كو پێدڤییە حوكمەتا فیدرالا ئیراقێ، ئەركێ خوە یێ یاسایی و ئەخلاقی ب جهبینیت و قەرەبوویا هەموو كەسوكارێن قوربانییێن جینۆسایدا ئەنفال، كیمیاباران و زیانپێكەفتییێن دەستێ ڕژێما بەرێ بكەت.
مەسرور بارزانی د پەیاما خوە دا ئاماژە ب وێ چەندێ دا كو د قووناغا دووماهیێ یا ڤان هەوێن جینۆسایدێ دا، ڕژێما بەرێ یا ئیراقێ ب هزاران مرۆڤێن بێتاوان ژ پێكهاتەیێن جودا یێن دەڤەرا بەهدینان شەهید و بێسەروشوون كرن، هەروەسا سەدان گوند وێران كرن و بوو ئەگەرێ ئاوارەبوونا دەهان هزار كەسان.
د دووماهییا پەیامێ دا، سەرۆكێ حوكمەتا هەرێما كوردستانێ دوپات كر كو حوكمەتا هەرێما كوردستانێ وەك هەردەم، یا پێگیرە ب خزمەتكرنا زێدەتر و باشتر بۆ كەسوكارێن سەربلندێن شەهید و ئەنفالكرییان.

پەیڤدارێ سەرۆكاتییا هەرێما كوردستانێ دبێژیت، كۆنترۆلكرنا چەكی ژ ئالیێ حوكمەتا ئیراقێ ڤە ئاستەنگەكە ل بەرامبەر كابینەیا سەرۆك وەزیران و هەرێما كوردستانێ پشتەڤانیێ لێ دكەت. هەروەسا ئاماژە ب وێ چەندێ دكەت كو بۆ پرسا هنارتنا پەترۆلێ هەماهەنگی د ناڤبەرا حوكمەتێن ئیراقێ و هەرێما كوردستانێ دا هەیە.
دلشاد شەهاب، پەیڤدارێ سەرۆكاتییا هەرێما كوردستانێ، د كۆنفرانسەكێ ڕۆژنامەڤانی دا ڕاگەهاند: «پەیوەندییێن باش د ناڤبەرا هەرێما كوردستانێ و ئیراقێ دا هەنە، د دەمێ بۆری دا چەندین كۆمبوون و سەرەدان هەبوون، ب تایبەت سەرۆكێ هەرێما كوردستانێ كو د كۆمبوونێن ئیدارەیا دەولەتێ دا ل تەنشت سەرۆكاتییێن ئیراقێ پشكدار بوو، هەروەسا پەیوەندییێن بەردەوام ل گەل دەزگەهێن حوكمەتا فیدرالی دا هەنە».
پەیڤدارێ سەرۆكاتییا هەرێما كوردستانێ گۆت ژی»ئیراق د قووناغەكا گەلەك هەستیار و تژی كێشە و ئالۆزی دا دەرباز دبیت و شیانێن وێ نینن كو كێشەیێن دی د ناڤخوە دا هەبن، چونكی كۆمەكا پرسێن مەزن نوكە بەرۆكا ئیراقێ گرتینە».
دەربارەی كێشەیێن ناڤخوە یێن ئیراقێ، دلشاد شەهاب دبێژیت «پرسا ئابۆری، كو ژ ئەنجامێ ڤی شەڕێ دروست بوویە و ب وێ ئەگەرێ هنارتنا پەترۆلێ ڕاوەستایە، ئەڤە ژی پێدڤی ب هەماهەنگیێ هەیە، هەرێما كوردستانێ بەرهەڤییا خوە دیار كرییە و نوكە هەماهەنگییەكا گەلەك باش هەیە».
ئێك ژ وان پرسێن دی یێن كو پەیڤدارێ سەرۆكاتییا هەرێما كوردستانێ وەك ئاستەنگ بۆ حوكمەتا ئیراقێ باس دكەت، دانانا چەكێ گرووپێن چەكدارە. دلشاد شەهاب ئاماژە ب وێ كر «ئەم هەموو هەڤڕاین بۆ كۆنترۆلكرنا چەكی، ئەڤە ژی ئاستەنگەكا گەلەك مەزنە بەرۆكا دەسهەلاتدارێن ئیراقێ گرتییە و ئەركەكێ گرانە ل بەرامبەر سەرۆك وەزیران عەلی زەیدی، د ڤێ چەندێ دا ژی هەرێما كوردستانێ هەموو پشتەڤانییا خوە بۆ سەرئێخستنا پرۆسەیێ دیار كرییە».
پەیڤدارێ سەرۆكاتییا هەرێما كوردستانێ پەیوەندییێن بەغدایێ و هەولێرێ ب باش دزانیت و دبێژیت «ئەوا نوكە ل ئیراقێ هەی هەرێما كوردستانێ ب بەرپرسایەتی ڤە سەرەدەری دگەل دا كرییە و ئەڤە ژی ژئالیێ حوكمەتا زەیدی ڤە وەك پێنگاڤەكا گەلەك ئەرێنی هاتییە وەرگرتن».
دلشاد شەهاب گۆت «باوەر ناكەم ئەو كێشەیێن هەردەم د ناڤبەرا ئیراقێ و هەرێما كوردستانێ دا دووبارە دبنەڤە، جارەكا دی بهێنە سەر مێزا دانوستاندنێ. باوەرییا من وەسا یە كو نوكە كێشەیا مەزن ئەوە كا دێ چەوا كێشەیێن ئیراقێ چارەسەر كەین، ل دووڤ وان پەیوەندییێن هەی، چاڤەڕێی پێنگاڤێن ئەرێنی دهێتە كرن د پاشەڕۆژێ دا د ناڤبەرا هەرێما كوردستانێ و دەسهەلاتێن فیدرالی دا».