خالد عەلی سلێڤانەیی

بیرهاتنا ڤەنەكۆلە
مە چ نەما بێژین بۆ ئێك
دلێ‌ م ژ خەما تە كولە
ئەڤرۆكە ئەم بوونە دو رێك
::: ::: :::
نەما ئەو ئەڤینا كەڤن
كەتە ناڤبەرا توخیبا
چاڤێن مە ب ئێك و دو دكەڤن
ئەم هەر وەكی دو غەریبا
::: ::: :::
شەمالا ڤینێ‌ نەما هل
دلێن مە تژی برینن
زوی لمە چرمسین هەمی گول
بەلگ ژ خەما خوە دوەرینن
نە ئێدی وەك بەرێ‌ بلبل
ئاوازا ڤینا مە دخوینن
::: ::: :::
من نەدڤییا ئەڤینا مە
خواتر خوازتن دوماهی با
چاڤێن مە ب ئێك و دو دكەڤن
ئەڤرۆ وەكی دو غەریبا
::: ::: :::
من ڤینا تە ژبیر نە كرە
من سۆزێن تە نە فرۆتن
تە بخوە هلكر ئەڤ ئاگرە
و هەر تو بخوە پێ‌ هاتی سۆتن
من گۆری تەكر ئەڤ دلە
ب سەد پەسن و پەیڤ و گۆتن
::: ::: :::
من ژی دڤییا ئەڤینا مە
هەمی كەیف و روناهی با
چاڤێن مە ب ئێك و دو دكەڤن
ئەڤرۆ وەكی دو غەریبا

ئاشتی یونس

شەڤ ل دوماهییا خوە بوو، بەری ببتە سپێدە و رۆژ چاڤێن خوە ڤەکەت، هیڤی یێن گەش ددلێ وی دانە، ژیانێ د چاڤێن وی دا کاتە ددان، ل وێ شەڤێ هەتا بەرێ سپێدێ خەوا وی نەهات، و دناخێ ویدا شەرەکێ گران ونیگەرانی هەبوو، هەول ددا چاڤێن خوە بگرت، لێ ترس ژ سوبەهی گرانتر بوو و ژ وێ خەوا سۆتی، دەرگەهێ ژۆرا خوە گرت و چوو دناڤ باخچەیێ مالێدا، ول بن دارا پرتەقالێ یا بابێ وی چاندی بێهنەکێ روونشتە خوارێ، بایەکێ فێنك تێکەلی بێهنا گول و داران بوو هەناسەکر، و دگەل خوە بتنێ پەیڤی و گۆتە خوە: ئەرێ ئەز ژی دێ شێم ل جهەکێ وەکو هەڤالێن خوە بهێمە دامەزراندن، ئەڤە ژ نوو بۆ من ژیانێ دەست پێکر، و بوومە خودان باوەرنامە.
خەون ددیتن و خوەزی دخواستن ببتە فەرمانبەر و خودان مۆچە و ب هیڤی و ئارمانجێن خوە شاد بژیت، دبت ئەڤە نە تشتەکێ گەلەك مەزن بت، لێ بۆ وی خەونەکا گەلەك مەزن بوو وخەمەکا گەلەك گران بوو، و بیر ل گۆتنێن بابێ خوە کرن دەما گۆتیێ: کوڕێ من گەلەك خەونان نەبینە، ئەڤ وەلاتە نانی نادەتە خەونبینان.! ب دلەکێ خەمگینڤە گۆت: بەلێ پا ئەز خەونان نابینم، بەلکو من هیڤی وئارمانج ل بەرن داکو بگەهمێ بۆ پاشەرۆژێ، و پشتی هینگێ رابوو جارەکا دی چوو دژۆرا خوەڤە، خوە درێژکر و چاڤێن خوە نقاندن و بکووراتی چوو دناڤ جیهانا خەوا شریندا، و ل داوییێ ئەو رۆژ هات دەمێ چاڤەرێکرنا وی ب داوی هات و ژنیشکەکێڤە پەیوەندییەك ژجهەکێ حکۆمی بۆ وی هات، ب ترس ژ خەو رابوو، کو بەری چەندەکێ داخوازییا خوە بۆ وێرێ پێشکێش کربوو، و ب لەز بەرسڤ دا:
-بەلێ فەرموو؟
ب مخابنیڤە دەنگەکێ سار گۆتە وی:
-ب لێبۆرینڤە تو نەهاتییە وەرگرتن، بەختێ تە دگەل مە نە یێ سپی بوو بۆ ڤێ دەلیڤێ.
تەلەفۆنا خوە گرت، چاڤێن وی قەرسین و ب دلەکێ خەمگین کەفتە ناڤ کلێسا خوە و بەتەنی ب سەر چاڤێن خوە دادا، وی دەمی زانی کو ترس ژ سوبەهی نە تنێ وەهمەکە، بەلکو راستییەکا نەگۆڕە، و خوە ل بن بەتەنییا خوە درێژ کر و ب دەنگەکێ نزم پرسیار ژ خوە کرن و بۆ نموونە دگۆتە خوە، ئەرێ ئەڤە چیە ڕوو ددەت؟ ئەرێ ما وەسا ب ساناهی دەست ژ خەون و هیڤی یێن خوە بەردەم؟
ئەز چو جاران ژ خەون و هیڤی یێن خوە پەشیمان نابم، و نە ژێ بێ هیڤی دبم، و دێ هەر ل سەر خاترا وان ژیم و جەنگم، ژبەرکو ئەڤە نە داوییا ژیانێیە، لێ دێ هەول دەم جارەکا دی هشیار بم بەری خەونێن من بسۆژن.!

دلدار محەمەد

ئەو چەند رۆژ بوو چاڤێن وی ب شاشەیا موبایلێ ڤە شڕببوون، «تی – ڤی» یان هەمی دەمێ وی ب خەما دبۆراندن، حەتا حەفت نیڤەکێن شەڤێ خەما و هزرا رێ نەددایێ بنڤیت.
وێ شەڤێ پشتی درەنگی و دگەل هەلکێشانا دوماهیک ئاخینک بریارد:
– بخودێ، مانێ هەر چ ژ دەستێ من ناهێت، ئەز دێ ئێدی هەدارێ کێشم و گەشبین بم؛ ما دێ بۆچی خۆ ژی و بچویکا ژی بخەمێن خۆ بخەم ئێخم.
سپێدێ هەکو ژ بن بەتەنیێ دەرکەفتی، بزاڤکر گڕنژینەکێ لسەر دێمێ خۆ ب نەخشینیت. بەری سپێدەباش ژ لێڤێن وی دەرباز ببیت ، خانما وی ب دێمەکێ بەهتی و دەنگەکێ خەمێ نزمکری ڤه :
– جامێرۆ، ئەڤه من دوماهیک نان بۆ ڤێ سپێدێ رەشاند، ڤێجا بێژە کا دێ ئەم ئێدی چ خوین ؟
بێ بەرسڤیێ هەمی ئالیێن باژێرێ بێ دەنگییا وی دۆرپێچکرن، گڕنژینا ب دەست چێکری پاشڤه زڤڕی، چ ددەستان دا نەما ژبلی ببیتە دارکۆکەیێ سۆزێ و وەکی رۆژ و دەمێن بۆری برسا خۆ ب خەمخوارنێ تێر بکەت .

قەهرەمان عەبدوللا بەرواری

دلێ من،
یێ د ناڤ خۆ دا سار دبیت
وەکو بەفرەکا بێ سیما
ل گەل باکوزیرکێ شەپرزە دبیت
جوانیەکا تەعل.. تەعلە
خۆ فێردکەت شرینبوونێ
دێ وەرە.. دێ..
دا ئەز و تۆ
دلێن برسی
پڕی پرسێن قورمزی بکەین
بەرچێلکێن مە،
دپڕن ژ خەمێن خوەشاڤی
دا خشیمییا هەست و سۆزا هەڤسار بکەین.
و بۆ دەمەکێ سەرمەدی
ئەز و تو
خۆ د کەلا عەشق و ئەڤینێ دا زیندان بکەین
دا کو ببینی ئێخسیر بووم ئەز
دەمێ بێ عەشق.
و نها ژی
ئێخسیرەکێ دلشادم،
دەمێ زیندانیەکێ عاشق.