دهۆك، لەزگین جۆقی:

د چارچوڤێ‌ گرنگیدان ب گەهاندنا خزمەتگوزاریێن ساخلەمیێ‌ بۆ وەلاتییان ل نەخۆشخانەیێن پارێزگەهێ، د. عەلی تەتەر، پارێزگارێ دهۆكێ و ب ئامادەبوونا ئەفراسیاب موسا، رێڤەبەرێ گشتی یێ ساخلەمیێ و چەندین بەرپرسێن دەزگەهێن ساخلەمیێ ل پارێزگەهێ، دوهی 29/7/2025 هەردو پڕۆژەیێن دابینكرنا ئامیرێن (CT-SCAN) بۆ پشكا تەنگاڤیان ل نەخۆشخانەیا ئازادی یا فێركرنێ و قاتێ دویێ و ئامیرێن چاڤدێریا چڕ بۆ زارۆكێن ژ نوو ژ دایك دبن ل نەخۆشخانەیا ژ دایكبوونێ ڤەكرن.
پارێزگارێ دهۆكێ گەڕیانەك د ناڤ هەردو پڕۆژەیان دا كر و ژ نێزیك سەحكرە بەرهەڤیا وان بۆ خزمەتكرنا نەخۆشان و بناڤێ خەلكێ پارێزگەهێ سوپاسیا مەسرور بارزانی، سەرۆكێ حكومەتا هەرێما كوردستانێ و وەزیرێ ساخلەمیێ‌ و هەموو دام و دەزگەه و نۆشدار و كارمەندێن ساخلەمیێ كر، ل دۆر ئەو گرنگیا ب كەرتێ ساخلەمیێ و نەخۆشان ددەن و پشتەڤانیا پارێزگەهێ بۆ هەر هاریكاریەكێ دیاركر.
هەژی گۆتنێ یە هەردو پڕۆژە ب گوژمێ چار ملیار و 100 ملیۆن دیناران هاتینە بجهئینان و دێ خزمەتێن پێشكەفتی پیشكێشی نەخۆشان كەن.

رەمەزان زەكەریا:

ل زانكۆیا ئاكرێ بۆ زانستێن كرداری، بۆ وەرزێ نوو یێ خواندنێ دو كۆلیژێن نوو دێ زێدەبن.
د. لوقمان سەعید، بەرپرسێ راگەهاندنا زانكۆیا ئاكرێ بۆ زانستێن كرداری گۆت: «ل زانكۆیا ئاكرێ بۆ زانستێن كرداری 25 پشكێن زانستی و سێ كۆلیژ و دو پەیمانگەهێن تەكنیكی هەنە، بڕیارە ئەڤ سالە زانكۆیا ئاكرێ كۆلیژا یاسا و كۆلیژا رەزگەریێ ل بەردەڕەشێ‌ ڤەكەت».
د كابینەیا نەهێ یا حكومەتا هەرێما كوردستانێ گەلەك گرنكی ب كەرتێ خواندنێ هاتیەدان و چەندین كۆلیژ و پەیمانگەهـ ل سنۆرێ دەڤەرداریێن ئاكرێ و بەردەڕەشێ‌ هاتینە ڤەكرن.

ئەڤرۆ، پروین سەلاح:

مامۆستایەكێ زانكۆیێ دیار كر، بازارێن ئۆنلاین ل ئاستێ جیهانێ پێشكەفتینە، لێ ل هەرێما كوردستانێ و ل پارێزگەها دهۆكێ ب تایبەتی د قۆناغا گەشەپێدانێ دانە و ل قوناغێن دەسپێكی نە، ئەگەر ئەم بازارێن خۆ بەراورد بكەین دگەل بازارێن بیانی یێن ئۆنلاین گەلەك یا مای ئەم بگەهینێ، ژ وان لاوازیا ژێرخانا مە یا ئەلكترۆنی، ب تایبەت بابەتێ پارەداركرنێ و پارەدانا ئەلكترۆنی و یێن باوەری پتر هەبیت بۆ بازارێن ئۆنلان پتریا وان گەنجن، لێ خەلكێ دی یێ دانعەمر پتریا وان باوەری ب بازارێ كلاسیك هەیە.

د.هلۆڤان حوسنی مامۆستایێ زانكۆیێ و شارەزا د وارێ ئابووری دا د دیدارەكێ بۆ رۆژناما ئەڤرۆ دیار كر، سالۆخەتێن ڤان جۆرە بازاران و جیاوازیا وان دگەل بازارێ كلاسیك د چەند خالان دا دهێتە دیاركرن، ئێك ژ وان سالۆخەتان ژی سالۆخەتێ گەهاندنێ یە، گەهشتن بۆ ڤی بازاری ل بەرامبەر بازارێ كلاسیك ب ترۆمبێلێ یان هەر رێكەكا هەبیت بۆ ریكێن دوور و گۆت: بەلكی ب كلیكەكێ دگەهیە ڤان بازارێن ئۆنلاین
خویاژی كر، ل هەموو وەلاتان بازارێ ئۆنلاین بۆ بەرهەمێ ئەلكترۆنی، زوو گەهاندنا كەرەستەیە یان ژی پرۆگرامەكە ب رێیا وی زوو دگەهیت، بەلێ‌ بۆ بەرهەمێ لۆجستی ئۆنلاین دا گەهاندن پتر پێرابوونێن كۆمپانیێن تایبەتمەندن و شارەزای هەنە د ڤی واری دا، لێ هەرێما كۆردستانێ هێشتا ئەڤ كارە نەبووینە وەك كۆمپانی هاریكار و پشتەڤان بن و ئاریشە د گەهاندنێ دا هەیە.
هلۆڤان ئاماژە ب وێ چەندێ دا، ئەگەر وەك فرۆشیار بیت بۆ بازارێ ئۆنلاین هندەك مەرج هەنە، ب تایبەت بازارێ چێكرنا ئۆنلاینێ یان وێنەكرنا ژمارێ و ڤەگۆهاستنا بەرهەمی چ بەرهەمەكێ خۆمالی نیشان بدەت، نیشاندنا وی وەك ئۆنلاین ئەڤە گەلەكا گرنگە ئەو شیان و بەهرەمەندیە هەبن ل سەر زێدەكرنا پێدڤیێن دی وەك سیستەمێ گەهاندنێ و پارەدانا ئەلكترۆنی و چاوانیا ڤەكێشانا بكری و بەرسڤدانا پرسیارێن بكران و پەیوەندی دگەل بكران باش بیت و ل دووڤدا هەردوو لایەن ژی دشێن بازارێ ئۆنلاین بكەن، بەلێ‌ ل دووڤ ڤان مەرجان بچن.

سندس سالح سلێڤانەیی:

خەلكێ شەش گوندێن دەڤەرا بەرواری بالا ل گوندێن (ئەدنێ، سەرەرۆ، دشێش، قۆمریێ، ئۆرە، تیلەرێ) نە، داخوازێ ژ كۆمپانیا (كۆڕەك تلیكۆم) دكەن بورجەك ل دەڤەرا وان بهێتە دانان، چونكو ئەو نەشێن پەیوەندیێ ب دهۆك و زاخۆ و چو دەڤەرێن دی بكەن و گەلەك جاران مرۆڤێن وان تووشی نەخۆشیان بووینە وان ئاگەه ژێ نینە و نەشێن پەیوەندیێن ب نەساخێ خوە بكەن و رێڤەبەرێ پوستە و گەهاندنێ ل دهۆكێ ژی دبێژیت: ما ئاگەه ژ ئاریشەیان وان هەیە و ل نێزیك دێ بورجەكێ گەڕۆك گەهیتە وێ دەڤەرێ.

مام ئەحمەد ژ گوندێ سەرەرۆ یە دبێژیت: ئەڤە چەندین سالن مە ئەڤ ئاریشە هەی و هەتا نوكە بۆ مە نەهاتیە چارەكرن، بۆ زانین هێلا كۆڕەك ل دەف مە نینە و ژ ناچاری ئەم كارتێن توركی دكڕین، ئەو ژی گەلەك دگرانن، لەورا هەكە بورجەك بۆ مە بهێتە دانان دێ سەرێ مە تەنا بیت و ئەڤە مافێ مەیە، چونكو مە نەڤێت كارتێن توركی بكڕین و پارەیێ مە بۆ وان بچیت، بەلكو مە دڤێت پارەیێ مە هەر بۆ كۆمپانیێن مە یێن نافخۆی بیت.
بابێ حسێنی، هاولاتیەكێ دی یێ گوندێ ئۆرە یە، دبێژیت: ئەم كارتێن توركی ب (26) هزار دیناران دكڕین و د ڤێ رەوشێ دا ئەڤ پارە گەلەكە و هەكە بورج بۆ مە بهێتە دانان دێ بارێ مە سڤك بیت، چونكو گەلەك جاران ئەم هزردكەین كو ئەم یێ د چالاكیێ دا و كەسێ ئاگەه ژ مە نینە.
ل دووماهیێ عەبدولجەلیل تاهر رێڤەبەرێ پوستە و گەهاندنێ ل پارێزگەها دهۆكێ دەربارەی داخوازیا وان گۆت: هەر گازندەیەكا بۆ مە دهێت ئەم دكەینە نڤیسارەكا فەرمی و ددەینە وێ كۆمپانیێ، هەروەسا دووفچوونا وێ ژی دكەین، سەبارەت وان شەش گوندان من دڤێت بێژەمە وان بورجەكێ گەڕۆك ل دەڤەرا كانیماسێ هەبوو، نوكە بورجەك یێ بۆ وان دهێتە چێكرن و ل نێزیك دێ ب دووماهی هێت پاشی ئەو بورجێ گەڕۆك دێ وێ دەڤەرێ هێتە ڤەگوهاستن و ئاریشەیا وان دێ چارە بیت.

ئەڤرۆ، دلۆڤان ئاكرەیی:

رێڤەبەرێ ناحیا كەلەكچی دیار كر ، پرۆژێ پاركا مەزن یا ناحیێ و جوتسایدكرنا رێكا ناڤ سەنتەرێ ناحیێ و چەندین پرۆژەیێن دی یێن خزمەتگۆزاری دێ هێنە جێبەجێكرن، هەموو ئامادەكاری بۆ دابەشكرنا پارچە زەڤییان ب سەر وەلاتییاندا هاتینە كرن و بیرێن ئاڤێ و هێلا ئاڤێ ژی بۆ چەند گوندان هاتینە كۆلان و راكێشان.

هەڤال مەحەمەد شەریف رێڤەبەرێ ناحیا كەلەكچی یا سەر ب قەزا شێخان ڤە بۆ رۆژنامەیا ئەڤرۆ دیاركر، ل ناحیا كەلەكچی چەندین پرۆژە ب رێكا دەڤەردارییا شێخان و پارێزگەها دهۆكێ هاتینە جێبەجێكرن، وەكو كۆلانا بیرێن ئاڤێ و ئاڤاكرنا قوتابخانە و چێكرنا رێكێن ناڤخۆیی، هەروەسا چێكرنا ڕێیێن ناڤخۆ لناڤا سەنتەرێ ناحیێ و ب چێكرن و تەمامبوونا ڤان رێیان دێ تەڤایا رێیێن ناحیێ هێنە قێركرن و جۆدا ل ڤان دێ دو قوتابخانە ل سەنتەرێ ناحیێ و ل گۆندێ دێریشان هێنە درۆستكرن و بیرەكا ئاڤێ ژی بۆ ئێك ژێ گەرەكێن ناحیێ بۆ چارەسەركرنا كێشەیا كێم ئاڤیێ هاتیە كۆلان و ژبلی ڤان پرۆژەیێن هەنێ كار ل سەر هێلا ئاڤێ بۆ گوندێن دێریشان و هەردو زیناڤان بەردەوامە.
رێڤەبەرێ ناحیێ ئاشكرا كر، ل ماوەیەكێ نێزیك دێ رازەمەندی ل سەر پرۆژەیێن چێكرنا پاركەكا مەزن یێ ناحیا كەلەكچی ب كۆژمێ زێدەتری ملیارەك و 200 ملیون دیناران و چێكرنا جۆتسایدكرنا رێیا كەلەكچی ب كۆژمێ زێدەتری سێ ملیار دیناران دگەل هەژمارەكا پرۆژەیێن دێ یێن خزمەتگۆزاری هێنە دان و ل دەمەكێ نێزیك دێ كار ب سەر وان پرۆژەیان دەست پێكەت.