كارگێریێن یانەیا وەرزشی ئەوێن تیمێن وان د خولا ستێرێن ئیراقێ‌ یا فوتبۆلێ‌ دا دەست ب لڤینان كرینە ژبۆ ڤەگرنا دەرگەهێ‌ ڤەگۆهاستنێن یاریزان و ڕاهێنەران و دهێتە پێشبینیكرن هەر دڤێ‌ حەفتیێ‌ دا ئەڤ لڤینە دژوارتر لێبهێن.
هەرچەندە هیچ یانەیەك هەتا نوكە گرێبەست ب شێوەیێ‌ فەرمی یان بزاڤێن ئینانا یاریزانەكی ڕانەگەهاندییە، لێ‌ لدووڤ ژێدەرێن رۆژنامەڤانی هندەك یانەیان كاركرییە بۆ دەستبەردان و ئینانا چەند یاریزانان ژ وانا یاریزانێن یانەیا دهۆكێ‌ كو دهێتە گۆتن دو گرێبەستێن گران بوها بۆ ستێرێ‌ تیمێ‌ یانیك زاكێری ژلایێ‌ یانەیێن شورتە و جەوییە هاتینە، دیسان یانەیەكا دی داخوازا گۆلپارێزێ‌ تیمێ‌ محەمەد سەلاح كرییە، ژلایەكێ‌ دووڤە یانەیێن زەورا، جەوییە و شورتە دخوازن ستێرێ‌ دهۆكێ‌ هارۆن ئەحمەد گرێبەستا وان نوو كەت، ژبیر نەكەین چوونا پیتەر گۆرگیس ژ یانەیا دهۆك بێ‌ ڕازیبوونا كارگێریێ‌ بوویە و دبیت بۆ وەرزێ‌ بهێت ڤەگەڕیتە دناڤ ڕێزێن تیمێ‌ دا، ژلایەكێ‌ دووڤە پاشەنگ عەبدوللا حەز دكەت بۆ وەرزەكێ‌ دی بمینتە ل دهۆكێ‌ لێ‌ هێشتا چو بڕیارێن دووماهیێ‌ نە هاتینە دان، هەروەسان ڤەگەریانا هەر ئێك ژ ئەحمەد زیرۆ و ڕێوان ئەمین ژ یانەیا شورتە بۆ دهۆكێ‌ بابەتەكێ‌ دی یێ‌ گەرمە.
ژلایەكێ‌ دووڤە لڤین دناڤا یاریزانێن زاخۆ ژی دا پەیدا دبن، ل دووڤ دەنگۆباسێن رۆژنامەڤانی عەلی كازم گۆلپارێزێ‌ زاخۆ نێزیكە گرێبەستا زەورا ئیمزا بكەت، ژلایێ‌ خوەڤە چوونا ستێرێ‌ وێ‌ ئەمجەد عتۆان، گۆستاڤۆ هێنریك بۆ یانەیێن ناڤەڕاستا ئیراقێ‌ و ئەلگەرمە بوویە بابەتەكێ‌ گەرم، دیسان یانەیا زەورا پەیوەندیێن باش ب محەمەد عەلی عبود كرینە ژبۆ ئیمزاكرنا گرێبەستێ‌، دیسان یانەیا زاخۆ هەر ئێك ژ موستەفا قابیل یانەیا هەولێرێ‌ و ئەحمەد سەبری ژ یانەیا نەفت دڤێت، چوونا یێ‌ ئوردنی محەمەد ئەبۆحەشیش بۆ یانەیا ئەلگەرمە هاتییە ڕاگەهاندن

یانەیا نەسر یا سعۆدیێ‌ ڕاگەهاند ئەوا گرێبەستا ستێرێ‌ خوە یێ‌ پۆرتۆگالی بۆ وەرزەكێ‌ دی نوو كر ب مووچە و پاداشتێن سەرسۆرمان كو دبیتە ئێك ژ بوهاترین گرێبەستێن ل سەر ئاستێ‌ جیهانێ‌ دهێتە ئیمزا كرن.
هەرچەندە یانەیا نەسر ب فەرمی كۆژمەیێ‌ گرێبەستێ‌ ڕانەگەهاندیە لێ‌ رۆژنامەیا سەن یا ئنگلتەرایێ‌ هووربینیا گرێبەست ل دووڤ ژێدەرێن خوە بەلاڤكرییە و بڤی شێوەیی، سالانە كریستیانۆ رۆالدۆ دێ‌ 244.3 ملیۆن دۆلاران وەرگریت، ئانكۆ هەیڤانە نێزیكی 20 ملیۆن دۆلاران كو د حەفتیێ دا دگەهیتە 4.69 ملیۆن دۆلاران، ئەوا دبیتە رۆژانە 670 هزار دۆلاران ب ڕێژەییا28 هزار دۆلار د ئێك دەمژمێر دا، ئانكۆ 465 دۆلار د ئێك خولەك دا ئانكۆ هەشت دۆلار د چركەكێ‌ دا.
رۆژنامەیا سەن خۆیاكر هەر ئەڤە بتنێ‌ نینە بەلكو، پاداشتا ئیمزاكرنا گرێبەستێ‌ 33.6 ملیۆن دۆلارن، هەكە بۆ وەرزێ‌ دووڤدا ئیمزاكر دێ‌ گەهیتە 52.1 ملیۆن دۆلار، هەروەسان بۆ هەر گۆلەكا دگەل تیما خوە دكەت، 109.8 دۆلاران، هەر ئەسیسەك ژی 54.9 هزار دۆلارن، دیسان 11 ملیۆن دۆلار پاداشتن هەكە یانەیا نەسر ناسناڤ دەستڤە ئینا، هەكە رۆنالدۆ بوو خودانێ‌ پێلاڤا زێری ئانكو بوو باشترین یاریزانێ‌ خولا سعۆدیێ‌ دێ‌ 5.5 ملیۆن دۆلاران وەكو پاداشت وەرگریت، هەروەسان هەكە یانەیا نەسر دەربازبوو چامپیۆنزا ئاسیا و ناسناڤ دەستڤە ئینا دێ‌ رۆنالدۆ 8.9 ملیۆن دۆلاران وەرگریت، دیسان د گرێبەستێ‌ دا هاتییە 5.5 ملیۆن دۆلار بۆ مەزاختیێن فرۆكا تایبەت هاتینە دانان، هەروەسان 16 كەس بۆ خزمەتا رۆنالدۆی و خێزانا وی داناینە، سێ‌ شۆفێر، چار خزمەتكارێن دناڤ مال دا، دو شیف، سێ‌ جوتیار و چار پۆلیسێن ئێمناهیێ.
پشتی ئیمزاكرنا گرێبەستێ‌ رۆنالدۆیی كەیفخوەشیا خوە دیاركر و پۆستەك بەلاڤكرن و گۆت: وەرزەكێ‌ نوو دەستپێكر، ب مۆرالەكا بلند، هەمان خەون، دا دیرۆكەكێ‌ بنڤێسین، بۆ زانین كانوونا ئێكێ‌ یا 2022 رۆنالدیی ب كۆژمەیێ‌ 200 ملیۆن یۆرۆیان كو دگەهیتە 234 ملیۆن دۆلاران بۆ ماوەیێ‌ دو سالان ئیمزاكربوو، شیابوو د 111 یاریان دا 99 گۆلان بینت، ل وەرزێ‌ بۆری ببو گۆلكەرێ‌ خولێ‌ و پێلاڤا زێری وەرگرتبوو.

رۆژنامەیا ماركا یا ئسپانی بەلاڤكرییە كو یانەیا ریال مەدرید هنگاڤتنا ستێرێ‌ تیما خوە یێ‌ هێلا بەرەڤانیێ‌ دێڤێد ئالابا ڕاگەهاند پشتی نۆژدارێ‌ تایبەتمەند هەبوونا هنگاڤتنەكا ب ترس دا زانین كو د ماسۆلینكا بنێ‌ پێ وی دا بوویە ئەگەر شیانێن بڕێڤەچوونا بلەز نینن، لەوما ژی پێدڤی ب چارەسەریێ‌ و بهێنڤەدانێ‌ یە.
نۆژدارێ‌ تایبەتمەند خۆیاكرییە كود بیت بۆ سێ‌ حەفتییان زێدەتر پێدڤی ب چارەسەریێ‌ بیت هەتا ڤەگەڕیتە دناڤ ڕێزێن تیما ڕیالێ‌ دا، ئەڤچەندە ژی ڕاهێنەرێ‌ تیمێ‌ چاڤی ئالۆنسۆ نەچاركرییە دەستان ژێ‌ بەردەت و بهێنڤەدانێ‌ بدەتێ‌ دیسان دێ‌ بیتە ئەگەر كاروانێ‌ ئالبایی دگەل ریالێ‌ د كۆپا مۆندیالا جیهانی دا ب دووماهی هات و هەكە ریال بگەهیتە یارییا دووماهیێ‌ ژی نەشێت پشكداربیت.

ژ نشكەكێ‌ ڤە یانەیا بایرن میۆنخ یا ئەلمانی چوونا گەوهەرێ‌ خوە یێ‌ 19 سالی مۆریس كراتینماخر بۆ یانەیا هێرتا بەرلین پشتراست كر ئێك ژ یانەیێن خولا پلا دو یا ئەلمانی كو ئەڤ گرێبەستە بشێوەیی خواستن دناڤبەرا هەردو یانەیان هاتییە كرن.
رۆژنامەیا بێلد یا ئەلمانی ڤەگۆهاستییە كو بوو پشتەڤانێن یانەیا بایرن میۆنخ یا سەیر بوو چوونا گەوهەرێ‌ یانەیا وان ژبەركو بوویە جهێ‌ ڕازیبوون و ئەو ڤیانا پشتەڤانێن یانەیا باڤارییا ل یاریزانی هەیە ، لێ‌ د ڕاگەهاندنا خوە دا بەرپرسێن ڤێ‌ یانەیێ‌ چوونا وی ب باشی دانایە پێخەمەت زێدەتر وەرگرتنا شارەزاهیێ‌.
د تۆرێن كۆمەلایەتی دا پشكەكا پشتەڤانێن بایرنێ‌ ترسا هندێ‌ هەیە زیانێن چوونا وی پتربن ژ مفایێن هاتینە دیاركرن و دخوازن بهێتە ڤەگەڕأندن یان ژی چاڤدێرییەكا بەردەوام ل سەر هەبیت ژبەركو یاریزانەكێ‌ خودان بەهرەیە و پاشەرۆژا یانەیێ‌ یە.