سەرۆك بارزانی ل گەل رێكخەرا كۆنسلخانەیا گشتی یا ئیماراتێ ل هەرێما كوردستانێ كۆمبوو، د كۆمبوونێ دا باسێ دۆستایەتی و پەیوەندیێن هەرێما كوردستانی و ئیماراتێ هاتە كرن.
سەرۆك مەسعود بارزانی، دوهی ل هەولێرێ، ل گەل شێخە بەشیر فەرحان، رێكخەرا كۆنسلخانەیا گشتی یا ئیماراتێ ل هەرێما كوردستانێ كۆمبوو، بارەگەهێ بارزانی راگەهاند؛ سەرۆك بارزانی، ژبەر پشتەڤانییا وان بۆ هەرێما كوردستانێ د قووناغێن جودا جودا دا، سوپاسییێن خۆ پێشكێشی سەركردایەتییا ئیماراتێ كرن.
هەروەسا د كۆمبوونێ دا هەردو ئالیان دوپاتی ل دۆستایەتی و پەیوەندیێن هەرێما كوردستانێ و ئیماراتێ كرن.
رەوشا سیاسی و دووماهی پێشهاتێن دەڤەرێ تەوەرەكێ‌ دی یێ‌ دیدارێ‌ بوون.

دوهی سێشەمبی 17/6/2025، نێچیرڤان بارزانی، سەرۆكێ هەرێما كوردستانێ، د دیدارەكێدا ل گەل شەیخە بەشیر فەرحان، كاربرێكەرا قونسلخانەیا گشتییا ئیماراتی ل هەرێما كوردستانێ، هەڤبەندیێن هەرێما كوردستانێ و ئیماراتێ، گەنگەشەكر.
سەرۆكایەتییا هەرێما كوردستانێ بەلاڤكر» نێچیرڤان بارزانی، سەرەرای پیرۆزباهیێ بۆ دەستبكاربوونێ، هیڤییا سەركەفتنێ بۆ خواست و پشتەڤانییا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وێ، دوپاتكر».
سەرۆكایەتییا هەرێمێ ئاماژەكر ژی» ژ ئالیێ خوەڤە شەیخە بەشیر فەرحان، سلاڤ و رێزێن شێخ محەمەد بن زاید ئال نەهیان، سەرۆكێ ئیماراتێ و سەركردایەتییا وەلاتێ خوە گەهاندە سەرۆكێ هەرێما كوردستانێ و دوپاتی ل خواستا ئیماراتێ بۆ زێدەتر پێشڤەبرنا هەڤبەندیێن خوە ل گەل هەرێما كوردستانێ كر».
دەلیڤەیێن كاری و وەبەرئینانا ئیماراتی ل ئیراقێ و هەرێما كوردستانێ، دووماهی پێشهاتێن دەڤەرێ و دەرئەنجامێن وێ، تەوەرەكێ دی یێ دیدارێ بوو.

سەرۆكێ هەرێما كوردستانێ و وەزیرێ دەرڤەیێ ئیرانی دووپاتی ل وێ چەندێ كر كو پێدڤییە جڤاكێ نێڤدەولەتی رۆلێ خوە بگێریت بۆ راوەستاندنا كریارێن سەربازی و چارەسەركرنا ئاشتییانەیا ناكۆكییان.
نێچیرڤان بارزانی، سەرۆكێ هەرێما كوردستانێ و عەباس عراقچی، وەزیرێ دەرڤەیێ كۆمارا ئیسلامییا ئیرانێ، د هەڤبەندییەكا تەلەفۆنی ئەنجامدا.
سەرۆكایەتییا هەرێما كوردستانێ د بەیاننامەیەكێدا گوت» هەردو ئالییان دووماهی پێشهاتێن ئۆپەراسیۆن و روو ب رووبوونێن سەربازی د ناڤبەرا ئیرانێ و ئیسرائیلێ گەنگەشەكر و دەربارەی كاریگەری و دەرئەنجامێن وێ چەندێ ل سەر دەڤەرێ، بیر و بۆچوون لێكگۆهارتن».
ب گۆڕەی بەیاننامەیا سەرۆكایەتییا هەرێمێ» نێچیرڤان بارزانی و عەباس عراقچی هەڤڕابوون ل سەر گرنگییا پاراستنا ئارامیێ و دوورئێخستنا دەڤەرێ ژ ئالۆزیێن زێدەتر و دوپاتی ل وێ چەندێ كر كو دڤێت جڤاكێ نێڤدەولەتی رۆلێ خوە بگێریت بۆ راوەستاندنا كریارێن سەربازی و چارەسەركرنا ئاشتییانەیا ناكۆكییان».
سەرۆكایەتییا هەرێما كوردستانێ دیاركر ژی» د هەڤبەندییا تەلەفۆنیدا هەردو ئالییان رۆناهی ئێخستە سەر رێككەفتنا ئەمنی د ناڤبەرا ئیراقێ و ئیرانێدا و سەرۆكێ هەرێما كوردستانێ، پێگیرییا هەرێما كوردستانێ ب وێ رێككەفتنێ دوپاتكر».
مەترسیێن ئەگەرێ پێشڤەچوونا زێدەتر یا پێشهاتان و چەند پرسێن دی یێن جهێ گرنگییا هەڤپشك، تەوەرەكێ دی یێ هەڤبەندییا تەلەفۆنی بوو.

وەزیرێ سامانێن سروشتی ل حوكمەتا هەرێما كوردستانێ جودا ل گەل قۆنسلێ گشتیێ هنگاریا و قۆنسلێ گشتیێ ئەرمینیا ل هەولێرێ كۆمبوو. تێدا گەنگەشە ل دۆر ئاستەنگێن پێشبەری هنارتنا پەترۆلا هەرێما كوردستانێ كر.
وەزارەتا سامانێن سروشتی ل حوكمەتا هەرێما كوردستانێ راگەهاند، حوكمەتا ئیراقێ بەرۆڤاژی دستووری و قانوونێ و هەتا بڕیارێن دادگەها بلند یا فیدرالی ل ئیراقێ، ئاستەنگ ل پێشبەری هنارتنا پەترۆلا هەرێما كوردستانێ دروستكرینە.
كەمال محەمەد، وەزیرێ سامانێن سروشتی ل حوكمەتا هەرێما كوردستانێ ل هەردو دیداران ل گەل هەر ئێك ژ ئاتیلا تۆس، قۆنسلێ گشتیێ هنگاریا و رافائێل مۆڤسێسیان، قۆنسلێ گشتیێ ئەرمینیا ل هەولێرێ، باس ل ئاستەنگ و بەربەستێن پێشبەری هنارتنا پەترۆلا هەرێما كوردستانێ كر.
وەزیرێ سامانێن سروشتی دیاركر ئەڤە د دەمەكی دایە هیچ كێشەیەك د گرێبەستێن پەترۆلی یێن هەرێما كوردستانێ ل گەل كۆمپانییان نینە و حوكمەتا ئیراقێ یا بەرهەڤ نینە ماف و گەرەنتی و تێچوویێ بەرهەمئینانا پەترۆلێ یا كۆمپانییان بدەت، ژ ئالیێ خوەڤە هەردو قۆنسلێن گشتی یێن هنگاریا و ئەرمینیا پشتەڤانییا خوە و حوكمەتێن خوە بۆ چارەسەركرنا كێشەیێن د ناڤبەرا هەرێما كوردستانێ و حوكمەتا ناڤەندی نیشادا.

هەڤپەیمانییا ئیدارەیا دەولەتی ب بەرهەڤبوونا سەرۆك وەزیران و سەرۆكێ جڤاتا نوونەران ل دۆر شەڕێ
د ناڤبەرا ئیرانێ و ئیسرائیلیدا و ئالۆزیێن دەڤەرێ و كاریگەرییا وێ چەندێ ل سەر ئاسایش و ئارامییا ئیراقێ كۆمبوو و شاخەوان عەبدوللا جێگرێ سەرۆكێ جڤاتا نوونەرێن ئیراقێ دبێژیت: د كۆمبوونێدا مە باس ل مووچەیێن فەرمانبەرێن هەرێما كوردستانێ كر.
ب گۆڕەی بەیاننامەیەكا نڤیسینگەها محەمەد شیاع سودانی، سەرۆك وەزیرێن ئیراقێ» د كۆمبوونێدا هێرشێن ئیسرائیلێ ل سەر ئیرانێ هاتنە پرۆتەستۆكرن و دوپاتی ل سەر گرنگییا ئێكهەلوەستیێ هاتە كرن، هەڤدەم بكارئینانا ئەسمانێ ئیراقێ ژ ئالیێ ئیسرائیلیڤە رەتكر، د وی چارچۆڤەیدا ئالیێن د ناڤ هەڤپەیمانیێ پشتەڤانییا خوە بۆ وەرگرتنا هەر پێرابوونەكێ ژ پێخەمەت وێ چەندێ ژ ئالیێ حوكمەتیڤە نیشادا».
هەر د وێ بەیاننامەیێدا هاتیە ژی» دوپاتی ل ئێكگرتنا هەلوەستێ ئالیێن سیاسی هاتە كرن، بۆ روو ب رووبوونا كاریگەریێن نەرینی یێن رەوشا دەڤەرێ ل سەر ئیراقێ و گرنگییا ل بەرچاڤ وەرگرتنا بەرژەوەندیێن نیشتمانی ژ پێخەمەت پاراستنا وەلاتی ژ هەر شەڕ و قەیرانەكێ».
هەر ل دۆر كۆمبوونا هەڤپەیمانییا ئیدارەیا دەولەتێ، شاخەوان عەبدوللا، جێگرێ سەرۆكێ جڤاتا نوونەرێن ئیراقێ كو پشكداری كۆمبوونێ بوو، بەیاننامەیەك بەلاڤكر و تێدا دیاركر» كۆمبوونا ئیدارەیا دەولەتێ ل سەر بابەتێ شەڕێ ئیسرائیلێ و ئیرانێ بوو، بەلێ بۆ من بابەتێ مووچەیێن فەرمانبەرێن هەرێما كوردستانێ ژ هەموو پرسەكێ گرنگتر بوو».
هەروەسا گوت» ب رۆهنی مە باس ل كاریگەریێن خەرج نەكرنا مووچەیێن فەرمانبەرێن هەرێما كوردستانێ كر و مە دیاركر ژی كو راستە ناڤونیشانێ كۆمبوونێ تایبەتە ب هێرشێن د ناڤبەرا ئیرانێ و ئیسرائیلێدا و مەترسیێن وان ل سەر ئیراقێ، بەلێ بابەتێ خەرج نەكرنا مووچەیان و برسیكرنا زێدەتر ژ ملیۆن مووچەخۆرێن هەرێما كوردستانێ ژی دڤێت بۆ هەموویان ئەولەویەت بیت».
جێگرێ سەرۆكێ جڤاتا نوونەرێن ئیراقێ د كۆمبوونا هەڤپەیمانییا ئیدارەیا دەولەتیدا داخوازكر، هەر چ زوویە دڤێت ئەڤ كێشەیە بهێتە چارەسەركرن، هەروەسا ئاماژەكر كو ب سوپاسیڤە هندەك ژ سەركردەیان هەڤڕابوون ل سەر ڤی بابەتی.
رۆهنكر ژی، ل رۆژێن داهاتی ژ روویێ قانوونی و ئیداریڤە دێ بزاڤ د بەردەوام بن بۆ چارەسەركرنا پرسا مووچەیێن فەرمانبەرێن هەرێما كوردستانێ.