بڕیارە ئەڤرۆ ل دەمژمێر حەفتی شەڤ و بۆ جارا ئێكێ‌ د دیرۆكا وەرزشا ئیراقێ‌ و كوردستانێ‌ یارییا فینالا كۆپا كەنداڤی بۆ وەرزێ‌ 2024-2025ێ‌ ل یاریگەها یانەیا دهۆك بهێتە كرن، ئەوا دێ‌ دناڤبەرا هەردو یانەیێن دهۆك و ئەلقادسیە یا كوێتی هێتە كرن كو دبیتە یارییا دویێ‌ و ڤەبڕ بۆ دەستڤە ئینانا ناسناڤی، پشتی د یارییا ئێكێ‌ یا فینالێ‌ دا ل حەفتییا بۆری تیما دهۆكێ‌ شیایی بێ‌ گۆل وەكهەڤی ژ كوێتێ‌ ڤەگەڕیت.
یارییەكا دیرۆكییە و پشتەڤانێن دهۆكێ‌ چاڤ ل دەستكەفتەكێ‌ مەزنە
پێشبینی دهێتە كرن یارییا ئەڤرۆ ب ئامادەبوونا رێزدار مەسرۆر بارزانی سەرۆكێ‌ حوكمەتا هەرێما كوردستانێ‌، دگەل بەرهەڤبووناچەندین بەرپرسێن حوكمی و حزبی یێن كوردستانی و بەرپرسێن وەرزش یێن ئیراقی، هەروەسان بەرهەڤبوونا حەمەد بن خەلیفە سەرۆكێ‌ فدراسیۆنا كەنداڤی و شاندێن چەند یانەیێن پشكدار د كۆپایێ‌ دا.
یارییا ئەڤرۆ دیرۆكییە و دێ‌ نیشاندان و فەستیڤالەكا جوان بەری یاریێ‌ هێتە دیتن، دهێتە پێشبینیكرن جەماوەرەكێ‌ ئێكچار زوور دناڤ یاریگەهێ‌ دا بەرهەڤ بیت سەرباری گرانییا نرخێ‌ پلێتان كو یا ژ هەموویان كێمتر 15 هزارە و یا ب100 هزار دیناران ژی یا هاتییە بەلاڤكرن، لێ‌ چاڤێ‌ جەماوەرێ‌ یانەیا دهۆك ل دەستكەفتەكێ‌ نوو یێ‌ دەولەتییە كو ببیتە جارا ئێكێ‌ د دیرۆكا ئیراقێ‌ و كوردستانێ‌ دا یانەك ب دەستڤە بینت.
ڕاهێنەرێ‌ دهۆكێ‌: ب هیڤی مە ناسناڤی ب دەستڤە بینن
د داخویانیەكا رۆژنامەڤانی دا مەسعۆد میرال دیاركربوو یارییا دووماهیێ‌ ب سانەهی نابیت و دێ‌ هەڤڕكی هەبیت و گۆت: ب هیڤی مە ب گەهینە ئارمانجا خوە و دناڤ ئەرد و جەماوەرێ‌ خوە دا ناسناڤی ب دەستڤە بینن، ئەم تیمەكا خودان باوەرین و ب ئێك دەست و دل كار بۆ سەركەفتنان دكەین، ئەم یێ‌ ل دەرازینكا دیرۆكەكا مەزن، دێ‌ ب پشتەڤانییا جەماوەرێ‌ خوە دناڤ یاریگەهێ‌ دا كار بۆ سەركەفتنێ‌ و دەستڤە ئینانا ناسناڤی كەین، مە دو نیڤێن یاریێ‌ ماینە و دڤێت یاریزان د هوشداریێ‌ دابن.
ڕاهێنەرێ‌ قادسییە پەسنا تیما دهۆكێ‌ دكەت
ژلایێ‌ خوەڤە ڕاهێنەرێ‌ یانەیا قادسیە یا كوێتی یێ‌ مۆنتێنیرۆیی زیلكۆ پێترۆڤێچ گۆت: هەموو یانەیێن پشكدار د كۆپا دا حەز دكر ب گەهنە ڤێ‌ یاریێ‌ و مافەكێ‌ سرۆشتییە، د یارییا ئێكێ‌ دا تیما دهۆكێ‌ ب شێوەیێ سەردەمانە ب تەكتیك و هۆنەرەكێ‌ جوان یێ‌ وەرزشی هاتە دیتن، یاریزانێن خودان شیان هەنە و خالێن سەركەفتنێ‌ ژی لبەردەستێ‌ وانە ژ وانا دناڤ یاریگەها خوە و جەماوەرێ‌ خوەدا، یارییا ئەڤرۆ دێ‌ بیتە بەرپەرەكێ‌ دیرۆكی بۆ هەردو یانەیان، ژبەركو یا دووماهیێ‌ یە و پێشبینییا یارییەكا جوان ئاست بلند بیت، ڤەگەڕیانا چار یاریزانێن ژ هنگاڤتنێ‌ پالدەرە بۆ یارییا ئەڤرۆ باشتر خوە بەرهەڤبكەین.
وەحید رەشید گەشبینە
لدۆر ڤێ‌ یاریێ‌ وەحید رەشید شرۆڤەكارێ‌ بەرنیاس ل پارێزگەهێ‌ و ڕاهێنەرێ‌ فوتبۆلێ‌ بۆ رۆژنامەیا ئەڤرۆ گۆت: ئەم چارێ‌ بەحسی یارییا بۆری یا ئێكێ‌ ژ فینالێ‌ بەحس ناكەین وەكو ئەنجام، لێ‌ بۆ یارییا دویێ‌ و ئەڤرۆ كو یا چارەنڤیسە بۆ دیاركرنا قارەمانا كۆپایێ‌ و هەموو هیڤی و خوزەیێن مە ئەون یانەیا دهۆك ب ناسناڤێ‌ دیرۆكی بهێتە خەلاتكرن و ببیتە قارەمانا كۆپا كەنداڤی، ژلایێ‌ هۆنەری ڤە بۆ ئاستێ‌ تەكتیكی و هونەری بۆ هەردو ڕاهێنەران دیاربوویە ب هێز و كێماسیێن خوەڤە، پێنەڤێت ڕاهێنەرێ‌ دهۆكێ‌ مەسعۆد میرالی دێ‌ پلان و هزرێن خوە یێن جودا هەبن، د یارییا بۆری دا مەسعۆدی ئیشارەت ب چەند خالان دا تایبەت لڤینێن مارلۆن، زاكێری، پیتەری و شۆتێن كەریم دەرویشی و دیاركربوو بۆ ڤێ‌ یاریێ‌ دێ‌ باشتر هێنە دناڤ یاریگەهێ‌ دا و هەروەسان یاریزانێن وی ئەوێن كەڤتینە لبن زێرەڤانیێ‌ دا، لێ‌ راهێنەر یێ‌ سەركەفتی بوو و شیان ب وەكهەڤی ڤەگەڕینە دهۆكێ‌.
هەروەسان ناڤهاتی گۆت: یارییا ئەڤرۆ دێ‌ زێدەتر د بەرژوەندییا تیما دهۆكێ‌ دا ژبەر یاریگەهـ و جەماوەرێ‌ وێ‌، بدیتنا من كارێ‌ ئەڤچارە دڤێت د سێكا دووماهیێ‌ یا نیڤا دویێ‌ دا دهۆك گڤاشتنەكا ئێكجار مەزن بكەت، ژبەركو تیما قادسیە شێوازێ‌ بەرەڤانییەكا ڕێكخستی و هێرشێن هەڤدژ دكەن و زڤڕینا وان ب كۆم دهێتە دیتن، لێ‌ هەڤكارییا هارۆنی ئەحمەدی یا زانا عەلی بۆ هێلا پێشیێ‌ دێ‌ بیتە ئەگەر دهۆك بشێن هێرشێن مەترسی چێكەن و شێن گەهنە گۆلا قادسیە،
ل دووماهیێ‌ وەحید رەشید گەشبینییا خوە دیاركر كو ئەلهۆیێن چیا شیانێن هەین سەركەفتنێ‌ بینت و دیرۆكەكا مەزن تۆماربكەت و گۆت: مە باوەری ب كادرێ‌ راهێنانێ‌ و هەموو یاریزانان هەیە و ئەڤ یارییە دەلیڤەكا زێرین ژبۆ تۆماركرنا دیرۆكەكا مەزن و دەستكەفتەكێ‌ كەنداڤی یێ‌ دەرڤە، هیڤییا من ئەوە ئەلهۆیێن چیا بشێن دلێ‌ مە هەموویان خوەش بكەت و بەر ب ناسناڤەكێ‌ دیرۆكی بچین و ئاهنگا ناسناڤی ب گێڕین.
دیرۆكا كۆپایێ‌ و كێ ناسناڤ دەستڤە ئیناینە
ل دووڤ ئامارێن هاتینە بەلاڤكرن بۆ جارا ئێكێ‌ قارەمانییا كۆپا كەنداڤی ل سالا 1982ێ‌ ب پشكدارییا پێنج یانەیان بوو، یانەیا عەرەبی یا كوێتێ‌ ئێكەم ناسناڤی دەستڤە ئینابوو، ب گشتی 30 جاران قارەمانی هاتیە كرن، ل 12 جاران هاتییە هەلوەشاندن یان ژی نە هاتییە ئەنجامدان، یانەیێن شەباب، ئەهلی و ئیتفاق یێن سعۆدیێ‌ پترترین ناسناڤ برینە ئەوژی هەر ئێكی سێ‌ جاران، یانەیا ئەڤرۆ دهۆك دێ‌ یاریێ‌ بەرانبەر كەت دو جاران ب دەستڤە ئینایە ل سالێن 2000 و 2005 بوویە.
گۆلكەرێن قارەمانیێ‌ و یێن دهۆكێ‌ كینە؟
هەتا نوكە لیستا گۆلكەرێن قارەمانیێ‌ بڤی شێوەینە، كارل تۆكۆ ئیكامبی- ئیتفاقا سعۆدیێ‌ چار گۆل، عەلی ئەحمەد مبخۆت- نەسرا ئیماراتی چار گۆل، هەر ئێك ژ عادل تاهراب- نەسر، بەدر ئەلمتوع- قادسیە، ئیسماعیل خاڤی- قادسیە، سامی فریۆی- ریفاعی یا بەحرێنی سێ‌ گۆل، ژ یانەیا دهۆكێ‌ پیتەر گۆرگیس و گراهێر یانیك زاكێری هەر ئێك دو گۆل هەنە، بەیار ئەبۆبەكر، ئیبراهیم غازی، مارلۆن دۆسانتۆس، پاشەنگ عەبدوللا، كەریم دەرویش، زوئەلفەقار، رۆبێن ئەكۆا هەر ئێك گۆلەك تۆماركریە.
ئەلهۆیێن چیا چەوا دەربازبوو یارییا دووماهیێ‌
تیما فوتبۆلا یانەیا دهۆك وەكو نوونەرا ئێكانە یا ئیراقێ‌ و كوردستانێ‌ دەربازبوو یارییا دووماهییا كۆپا كەنداڤی بڤی شێوەیی، دەستپێكێ‌ د كۆما ئێكێ‌ دا ل رێزا دویێ‌ هاتبوو ب كۆمكرنا نەهـ خالان ژ دو سەركەفتن، سێ‌ وەكهەڤی و خوسارەتیەكێ‌، یانەیا ئیتفاق وەكو خودانا رێزا ئێكێ‌ یا كۆما دویێ‌ دەربازبوو قۆناغا چارگۆشەیا زێرین ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ‌، د قۆناغا چارگۆشەیێ‌ دا د یارییا هاتنۆچوونێ‌ دا سەركەفتن ل سعۆدیی ب گۆلەكێ‌ ل سەر یانەیا ئیتفاق ئینا و یارییا دویێ‌ ل یاریگەها خوە سەركەفتن ب هەمان ئەنجام ل سەر ئیتفاق دوبارەكر، ژلایێ‌ خوەڤە یانەیا ئەلقادسیە وەكو قارەمانا كۆما دویێ‌ دەربازبوو چارگۆشەیا زێرین و ل سەركیستێ‌ یانەیا نەسر یا ئیماراتی هاتە یارییا دووماهیێ‌.
خەلاتێن قارەمانیێ‌
ژلایەكێ‌ دووڤە بۆ هەر یانەكا پشكدار سێ‌ هزار دۆلار بۆ هاتبوونە مەزاختن وەكو پشتەڤانیەك، هەروەسان ئەو یانەیا دەربازبوویە قۆناغا پێش دووماهیێ‌- چارگۆشەیا زێرین- 100 هزار دۆلار بۆ هاتبوونە دان، دیسان ئەو یانەیا گەشتەكێ‌ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە 30 هزار دۆلار بۆ هاتبوونە تەرخانكرن، دیسان دهەر یارییەكا د كۆمێ‌ دا هاتییە كرن و هەر یانەیەكا سەركەفتنێ‌ بینت سیهـ هزار دۆلار وەرگرتبوون.
خودانا ناسناڤێ‌ قارەمانییا كۆپا كەنداڤی دێ‌ سێ‌ ملیۆن دۆلاران وەرگریت وەكو خەلاتكرن، خودانا رێزا دویێ‌ دێ‌ ئێك ملیۆن دۆلاران وەرگریت، باشترین یاریزانێ‌ قارەمانیێ‌ دێ‌ 50 هزار دۆلاران وەرگریت، باشترین گۆلپارێز دێ‌ خەلاتێ‌ 50 هزار دۆلاران وەرگریت، گۆلكەرێ‌ قارەمانیێ‌ ژی دێ‌ 50 هزار دۆلاران وەرگریت.

چاڤەڕێ‌ دهێتە كرن ئەڤرۆ و سوبەهی ل دەمژمێر 10ی شەڤ چار یاریێن ئاگرین ژ چارچووڤەیێ‌ قۆناغا چارێك دووماهییا قارەمانییا یانەیێن ئۆرۆپا قارەمانێن خولا چامپیۆنز لیگ كو دبیتە یارییا دویێ‌ و ڤەبڕ بۆ دەربازبوونێ‌ بەر ب قۆناغا پێش دووماهیێ‌.
یاریێن رۆژا سێ‌ شەمبی.
یارییا ئێكێ‌ یا ئەڤ شەڤە بڕیارە ل یاریگەها سیگنال ئیدۆنا دناڤبەرا خودانێن ئەردی بۆرۆسیا دۆرتمۆند یا ئەلمانی و مێڤانا وێ‌ یانەیا بەرشەلۆنا یا ئسپانی هێتە كرن، د یارییا حەفتییا بۆری دا یانەیا كاتەلۆنی شیابوو سەركەفتنەكا مەزن بینت ب چار گۆلێن پاقژ ل یاریگەها خوە و بەلانسا دەربازبوونێ‌ بۆ قۆناغا پێش دووماهیێ‌ بلند بكەت، یانەیا ئەلمانی پێدڤی ب ریمۆنتادایە هەتا بشێت دەرباز بیت.
دیارییا دویێ‌ یا ئەڤ شەڤە دا دێ‌ یانەیا ئاستۆن ڤێلا یا ئنگلتەرایێ‌ ل یاریگەها خوە مێڤاندارییا یانەیا پاریس سانجێرمان یا فرەنسی كەت، د یارییا ئێكێ‌ یا حەفتییا بۆری یانەیا فرەنسی ب3-1 سەركەفتن ئینابوو و تا ڕادەیەكی دەرگەهێ‌ دەربازبوونێ‌ بخوە ڤەكرییە لێ‌ سۆپرایز ژی دناڤ یارییان دا دهێنە دیتن.
یاریێن رۆژا چارشەمبی
ئێك ژ هێزترین یاریێن ڤێ‌ قۆناغێ‌ یانەیا ریال مەدرید خودانا 15 ناسناڤان لبن گەڤێن دووركەفتنێ‌ دایە و دێ‌ ل یاریگەها خوە سانتیاگۆ بیرنابیۆ بەرانبەر ئارسنال شەڕی بۆ سەركەفتنەكا مەزن كەت و بزاڤێن ئینانا ڕینمۆنتادایی كەت، ژبەركو د یارییا حەفتییا بۆری دا ب سێ‌ گۆلان تووشی خوسارەتیێ‌ بوو.
یارییا چارێ‌ و دووماهیێ‌ ژ چارچووڤەیێ‌ قۆناغا چارێك دووماهیێ‌ ئەو ژی ئاگرینە، ئەوا بڕیارە ل یاریگەها سانیرۆ بهێتە كرن یانەیا ئینتەر میلان یا ئیتالی مێڤاندارییا یانەیا بایرن میۆنخ یا ئەلمانی دكەت، د یارییا حەفتییا بۆری دا بایرن میۆنخ دناڤ ئەردێ‌ خوە دا ب2-1 تووشی خوسارەتیێ‌ ببوو، دێ‌ بزاڤێ‌ كەت ڕیمۆنتادایێ‌ بینن سەرباری یانەیا ئینتەر ژی ئێك تیمێن هەرە ب هێزە د چامپیۆنزێ‌ دا.

عەلی حاجی:

چاڤەڕێ‌ دهێتە كرن سوبەهی چارشەمبی دەست ب هەڤڕكیێن گەڕا 28ێ‌ ژ خولا ستێرێن ئیراقێ‌ یا فوتبۆلێ‌ ب ئەنجامدانا چار بهێنە كرن، یانەیێن زاخۆ و هەولێر دێ‌ دناڤ ئەردێ‌ خوە دا كەن، دهۆك دێ‌ ڤەگەڕیتە خولێ‌ و نەورۆز مێڤانا كەرخێ‌ یە.
بڕیارە ل دەمژمێر پێنجێ‌ ئێڤاری تیما یانەیا زاخۆ د ناڤ ئەرد و جەماوەرێ‌ خوە دا مێڤاندارییا یانەیا نەفت میسان بكەت و چاڤ ل قەرەبوویا خالانە و ئاشتكرنا جەماوەرێ‌ خوەیە ئەوێن د یارییا حەفتییا بۆری دا تۆرەبووین ژبەر خوسارەتیەكا نە چاڤەڕێ‌ كری بەرانبەر كەربەلا تا بوویە ئەگەر ڕاهێنەرێ‌ وێ‌ لبن گەڤێن دوورئێخستنێ‌ بۆ ژ تیمێ‌، لێ‌ دوبارە باوەری پێ هاتە دان و ڕژدی لسەر هەڤڕكیێ‌ بۆ رێزێن پێشیێ‌ هاتە كرن.
ژلایێ‌ خوەڤە سوبەهی دەمژمێر 7:30 شەڤ یانەیا هەولێر دێ‌ مێڤاندارییا یانەیا نەفتێ‌ كەت، كوڕێن كەلهە و منارە گەشبینن بەردەوامیێ‌ بدەنە ئەنجامێن خوە یێن باش، ژ یاریێن دی یێن ئەڤرۆ، دیالا- جەوییە، زەورا- ئەلگەرمە، یاریێن رۆژا پێنج شەمبی، تەلەبە- كارەبا، نەجەف- كەربەلا، مینا- شورتە، رۆژا ئەینیێ‌، كەرخ- نەورۆز دەمژمێر پێنجێ‌ ئێڤاری، نەفت بەسرا- ئەلقاسم، ل شەمبییا بهێت تیما دهۆكێ‌ دێ‌ ل دەمژمێر شەشی ئێڤاری مێڤاندارییا حدود كەت.
بۆ زانین شورتە سەرێ‌ لیستێ‌ دهێت ب 56 خالان، زەورا ب55 خالان رێزا دویێ‌، زاخۆ ب52 خالان رێزا سێیێ‌، هەر ئێك ژتەلەبە ب44خال، جەوییە44 خال، ئەلقاسم 42خال دهۆك 40 خال كێمترییا شەش یارییان، نەفت میسان 39 خال، كەرخ 37 خال، ئەلگەرمە 37خال، نەفت 37خال، نەفت37 خال، هەولێر 35 خال، كارەبا 34 خال رێزێن چارێ‌ هەتا 13دهێت، نەورۆز ب34 خالان، نەجەف 33خال، مینا 28خال، نەفت بەسرا 23خال، كەربەلا 21 خال،دیالا 18 خال و حدود 13 خال ژ رێزا 15 هەتا 20ێ‌ دهێن.