رەمەزان زەكەریا

دداخوایانیەكێ دا راهێنەرێ تیما فوتبۆلا یانەیا ئاكرێ ئاشكراكر ل هندەك دەما یانەیێن كوردستانێ ب گشتی دڤی بارودۆخی دا تێدپەرن ئەگەر هندەك تشتێ بچووك كارتێكرنێ ل كەش و هەوایێ یاریزانا دكەن هەتا رادەیەكێ مە ئەڤ ئاریشە چارەسەر كرینە مە ب گشتی یاریەكا باش دكەن لێ هندەك جارا ئەنجام وەكۆ پێدڤی ناهێن.
زێدەتر هەژار سابر بۆ ئەڤرۆ گۆت: هەتا دووماهیك گەرا خولا نایابا كوردستانێ ئەم دێ بزاڤێن دكەین بۆ پاراستنا ناسناڤێ خۆلێ‌، یا گرنگ ئەوە تیما مە د ناڤ خولێ دا هژمارەكا ب زەحمەتە هەموو یانە حسابەكا جودا بۆ یانەیا ئاكرێ دكەن.
ناڤبری گۆتژی: دێ هەموو بزاڤێن یانەیا ئاكرێ بۆ وێ چەندێ بن كو ناسناڤێ كۆپا كوردستانێ ب دەستڤەبینن، ژبەركو ڤان دو سالا ب تنێ ناسناڤێ كۆپا كوردستانێ ژ یانەیا ئاكرێ كێمە، دێ بزاڤێن مە بەردەوام بن بۆ ئەنجامێن باش مە باشترین بەرهەڤی كرینە بۆ یاریا بهێت یا كۆپا كوردستانێ.
ناڤهاتی ئاشكراكر: وەكۆ دیار كارگێرییا یانەیا ئاكرێ و مە ئێك ئارمانج هەیە ئەو ژی دەستڤەئینانا كۆپا كوردستانێ پشتی دووركەفتنا مە ژ رێزبەندی خولا نایاب مە بەرنامە هەیە گرنگیەكا باش و زۆر ب كۆپا كوردستانێ بدەین.
بۆ زانین تیما یانەیا ئاكرێ‌ ل رێزا حەفتێ‌ دهێت ب كۆمكرنا 32 خالان ژ نەهـ سەركەفتن پێنج وەكهەڤی و 10 خوسارەتیان، د وەرزێ‌ ئەڤ سالە دا نە شیا ناسناڤێ‌ خوە یێ‌ وەرزێ‌ بۆری پارێزیت ئەوا یانەیا شێروانە ناسناڤێ‌ وێ‌ مسۆگەر كری، سەرباری دەستپێكەكا باش و گەشبینیێن كارگێریا یانەیێ‌ و كادرێ‌ راهێنانێ‌.

د دیدارەكا تایبەت دا كوڕێ‌ باژێرێ‌ سێمێلێ‌ و دادڤانێ‌ نێڤدەولەتی شڤان لەزگین دیار كر ئەو ژلایێ‌ فدراسیۆنا یارییا تایكواندۆییا ئاسیا بۆ جارا دویێ‌ ل دووڤ ئێك د هێتە داخوازكرن ژبۆ بڕێڤەبەرنا چەند یاریێن كۆپا ئاسیا ل سەر ئاستێ‌ یانەیان، ئەوا بڕیارە هەڤڕكیێن وێ‌ ل دووماهییا ڤێ‌ حەفتیێ‌ بەكین پایتەختێ‌ چینێ‌ مێڤاندارییا وێ‌ بكەت.
زێدەتر ناڤهاتی بۆ رۆژنامەیا ئەڤرۆ گۆت: ب خوەشحالی ڤە بۆ سالا دویێ‌ ل دووڤئێك و جارا چارێ‌ یە فدراسیۆنا تایكواندۆیا ئاسیا داخوازییا پشكداریێ‌ بۆ من فرێكەت وەكو دادڤانەكێ‌ سەرەكی د ناڤ هەڤڕكیێن قارەمانییا ئاسیا ل ل سەر ئاستێ‌ یانەیان ئەوا بڕیارە هەڤڕكیێن وێ‌ ل ئێكی ئەیارا بهێت وەلاتێ‌ چینێ‌ بهێتە كرن، ئەڤە ژی دەرئەنجامێ‌ وێ‌ یەكێ‌ یە كو ژبەركو د قارەمانیێن پێشتر دا تایبەت یا سالا بۆری ئەوا ل وەلاتێ‌ ئیرانێ‌ هاتیە كرن شیابووم ببمە جهێ‌ باوەرییا لژنەیا دادڤانێن فدراسیۆنا تایكواندۆیا ئاسیا، دێ‌ هەموو بزاڤان كەم بۆ ڤێ‌ قارەمانیێ‌ ژی ببمە جهێ‌ ڕازیبوونێ‌ پێخەمەت بشێم بەر ب قارەمانیێن فەرمی یێن جیهانی ژی بچم و ئەڤە ژی هیڤیێن منن و دێ‌ هەموو شیانێن خوە بۆ پێشئێخستنا ئاست و شیانان كەم.
هەروەسان شڤان لەزگین گۆت: شانازیێ‌ پێ‌ دبەم وەكو دادڤانەكێ‌ كورد نوونەراتیا كوردستانێ‌ و ئیراقێ‌ د ڤێ‌ قارەمانیێ‌ دا بكەم كو دهاتە هژمارتن ب هێزتر قارەمانیە ل سەر ئاستێ‌ ئاسیا و پێشبینی دكەم دێ‌ هەڤڕكییەكا دژوار هێتە كرن ژبەركو پرانییا یانەیێن ئاسیایی تایبەت یێن لایێ‌ رۆژهەلاتا ئاسیا و ئیرانێ‌ خودان شیانن و سەربۆرەكا مەزن یا هەی، وەكو ئێكانە كورد دناڤ دادڤانێن ئاسیا پشكداربم پێنگاڤەكا مەزنە و نە یا ب سانەهی دادڤان ب گەهیتە ڤێ‌ قارەمانیێ‌ بۆ من گرنگە وەكو كوردستانیەك و خەلكێ‌ باژێرێ‌ سێمێلێ‌ و پارێزگەهێ‌ باشتر خوە بەرهەڤبكەم پێخمەت نوونەراتیەكا سەرفەراز بكەم.

قەیس وەیس:

بڕیارە سوبەهی وەرزێ‌ 2024-2025 یا خولا پلا نایابا كوردستانێ‌ یا فوتبۆلێ‌ ب دووماهی بهێت پشتی كاروانەكێ‌ درێ ژكو زێدەتری حەفت مەهان ب پشكدارییا 15 یانەیا ب شێوەیێ‌ خول دو قۆناغ هاتییە كرن، بەری ب دووماهی هاتنا خولێ‌ ب سێ‌ گەڕان یانەیا شێروانە ناسناڤێ‌ وێ‌ مسۆگەر كرییە، یاریێن ڤێ‌ حەفتیێ‌ و دووماهییا خولێ‌ بڤی شێوەی نە ئەوا دێ‌ هەموو یاری ل دەمژمێر چارێ‌ ئێڤاری هێنە ئەنجامدان.
زاخۆ دێ‌ بزاڤێن ڕێزا دویێ‌ كەت
تیما یانەیا زاخۆ دناڤ ئەرد و یاریگەها خوە یا دەلال دا دێ‌ مێڤاندارییا یانەیا پیشەسازی كەت و چاڤ ل رێزا دویێ‌ یە، ئەوا نوكە ب 43 خالان رێزا سێیێ‌ دهێت ژ 11 سەركەفتنان، حەفت وەكهەڤی و شەش خوسارەتی، دبەرانبەر دا یانەیا پیشەسازی 34 خال هەنە رێزا 10ێ‌ دهێت.
ژلایێ‌ خوەڤە یانەیا ئاكرێ‌ ئەوا نە شیایی پاراستنا ناسناڤێ‌ خوە یێ‌ وەرزێ‌ بۆری بكەت دێ‌ ل باژێرێ‌ سلێمانیێ‌ بیتە مێڤانا یانەیا سیروان نوو، كوڕێن پایتەختێ‌ نەورۆزێ‌ 36 خال كۆمكرینە رێزا حەفتێ‌ دهێت ب 10 سەركەفتن، شەش وەكهەڤی و 10 خوسارەتی، یانەیا باژێرێ‌ سلێمانیێ‌ 41 خال هەنە رێزا پێنجێ‌ دهێت.
ژ یاریێن دی یێن ڤێ‌ گەڕێ‌
یانەیا پێشمەرگەیا هەولێر دێ‌ دناڤ ئەرد و جەماوەرێ‌ خوەدا بزاڤێن پاراستنا رێزا خوە یا دویێ‌ كەت دەمێ‌ یانەیا ڕزگاری مێڤان دكەت، ژ لایێ‌ خوەڤە یانەیا هەولێر ئەوا ب فەرمی پاشڤەچوویە پلا ئێك دێ‌ ل یاریگەها خوە ڕانیە مێڤانكەت، برایەتی دێ‌ مێڤاندارییا هندرین كەت، چوارقۆرنە دێ‌ بیتە مێڤانا دەربەندیخان، ژبەر خوەڤەكێشانا سەیدسادق د خولێ‌ دا یارییا وێ‌ بەرانبەر شەقلاوە ب خوسارەتی هاتییە هژمارتن، یانەیا شێروانە قارەمانا وەرزێ‌ ئەڤسالە دێ‌ یا چاڤەڕێ‌ كری بیت.
هەلوەستێ‌ گشتی یێ‌ خولێ‌ بڤی شێوەیە
1- شێروانە 56 خال.
2- پێشمەرگەیێ‌ هەولێر 46 خال.
3- زاخۆ 43 خال.
4- هندرین 41 خال.
5- سیروانی نوو 41 خال.
6- ڕزگاری 37 خال.
7- ئاكرێ‌ 36 خال.
8- دەربەندیخان 35 خال.
9- ڕانیە 34 خال.
10- پیشەسازی 34 خال.
11- برایەتی 33 خال.
12- چوارقۆرنە 33 خال.
13- شەقلاوە 25 خال.
14- هەولێر 25 خال.
15- سەید سادق پێنج خال.
چەند یانە پاشڤە چووینە و چەند هاتینە جهێ‌ وان؟
بۆ زانین هەر چار یانەیێن شەقلاوە، هەولێر و سەیدسادق ئەوا پشتی بۆرینا ئێك قۆناغ دگەل یانەیا ئارارات ئەوا هەر بەری دەستپێكرنا خولێ‌ خوە ڤەكێشاین ب فەرمی پاشڤە چووینە پلا ئێكا كوردستانێ‌، ل دووڤ ڕێنمایێن فدراسیۆنێ‌ بۆ وەرزێ‌ 2024-2025ێ‌ چار یانە دێ‌ پاشڤە چنە پلا ئێك لێ‌ بۆ وەرزێ‌ 2025-2026ێ‌ دێ‌ دو یانە سەركەڤنە پلا نایاب كو دێ‌ سەرجەمێ‌ وان ژ 16 یانەیان بنە 14 و سالا دووڤدا دێ‌ هەمان سیستەم بیت هەتا دبنە 12 یانە، بۆ زانین هەردو یانەیێن قەلادز قارەمان و هەلۆ خودانا رێزا دویێ‌ د خولا پلا ئێك دا دەربازبوونە پلا نایاب.

بڕیارە ئەڤرۆ پایتەختێ‌ كوردستانێ‌ هەولێر مێڤاندارییا قارەمانییا رۆژئاڤا ئاسیا یا یارییا بلندكرنا پارسەنگی یا ڤەكری بكەت ئەوا بڕیارە هەڤڕكیێن وێ‌ سوبەهی بهێتە ئەنجامدان و پێشبینی دهێتەكرن هەتا هەشت هەلبژارتیێن رۆژئاڤا ل سەر ئاستێ‌ كوڕان پشكداربن.
د كۆنگرەیەكێ‌ رۆژنامەڤانی دا محەمەد كازم مزعل سەرۆكێ‌ فدراسیۆنا بلندكرنا پارسەنگی گۆت: بۆ ماوەیێ‌ چەند رۆژە ئەم ل هەولێرێ‌ بووین و بەرهەڤی بۆ ڕێكخستنا قارەمانییا ڤەكری یا رۆژئاڤا ئاسیا دهاتنە كرم، بڕیارە سوبەهی هەتا ئەینیا بهێت بەردەوامبن، بڕیارە دەهـ هەلبژارتیێن وەلاتێن رۆژئاڤا پشكداربن ژبەر كو مە داخوازنامە بۆ هەموویان هاتینە هنارتن و پرانییا وان ڕازیبوون وەرگرتییە.
ژلایەكێ‌ دووڤە ناڤهاتی ئەوچەندە ژی دیار كر ئەڤ قارەمانییە دێ‌ ل سەر ئاستێن تازەپێگەهشتی، لاوان و پێشكەڤتیان بۆ كوڕان بیت و دهێتە پێشبینیكرن هەڤڕكییەكا بهێز دناڤبەرا هەلبژارتییان دا هەبیت ژبەركو پرانییا وان یاریزانێن خودان شیان ل سەر ئاستێ‌ ئاسیا و نێڤدەولەتی هەنە، ئەم گەشبینن دێ‌ قارەمانییەكا ڕێكخستی و سەركەڤتی بیت ژبەركو ل باژێرەكێ‌ جوان و ئارام و وەرزشڤانن.
محەمەد كازمی دوپاتی ل سەر هەبوونا هەلبژارتنێن فدراسیۆنا رۆژئاڤا ئاسیا ل هەولێرێ‌ كر و گۆت: ژبەر خالێن سەركەفتنێ‌ و حەزا دەستكەكا گشتی یا فدراسیۆنێ‌ كو هەلبژارتنێن وان ل هەولێرێ‌ بهێنە كرن، لەوما ژی بڕیارە پشتی ب دووماهی هاتنا قارەمانیێ‌ ئێكسەر دێ‌ هەلبژارتن بۆ دەستەكا نوو یا فدراسیۆنێ‌ هێتە دانان، د وێ‌ باوەرێ‌ دا مە چەند كەسەكێن خەلكێ‌ ئیراقێ‌ و كوردستانێ‌ ژی دێ‌ پشكداری د هەلبژارتنان دا كەن.