نێچیرڤان بارزانی، سەرۆكێ هەرێما كوردستانێ، ب هەلكەفتا ب دوماهیك هاتنا ئەركێ وی، پێشوازی ل ئەندرۆ بیزلی، قونسلێ گشتی یێ بەریتانیا ل هەرێما كوردستانێ كر.
د دیدارەكێدا، سەرۆكێ هەرێما كوردستانێ سوپاسییا قونسلێ گشتی یێ بەریتانیا كر بۆ كار و بزاڤێن وی د دەمێ كارێ وی دا بۆ پێشڤەبرنا پەیوەندیێن د ناڤبەرا بەریتانیا و هەرێما كوردستانێ دا، هەروەسا هیڤییا سەركەفتنێ د ئەركێ وی یێ نوو دا بۆ خواست.
ژ ئالیێ خۆ ڤە، قونسلێ گشتی یێ بەریتانیا سوپاسی و پێزانینێن خۆ ئاراستەی نێچیرڤان بارزانی و ئالیێن پەیوەندیدارێن هەرێما كوردستانێ كر ئەوێن هاریكار و پشتەڤان بووین بۆ سەرئێخستنا ئەركێ وی، هەروەسا دوپاتی ل سەر حەزا وەلاتێ خۆ كر بۆ بەردەوامییا ب هێزكرنا پەیوەندیێن وەلاتێ خۆ دگەل هەرێما كوردستانێ دا.

ئەندامەكێ دەستەیا كارگێڕییا مەكتەبا سیاسییا پارتی، پیرۆزباهی ل سەرۆك وەزیرێن ئیراقێ كر ب هەلكەفتا سەركەفتنا سەرەدانا وی بۆ ئەمریكا و دبێژیت: ئەڤ سەرەدانە هەڤپشكییەكا ستراتیژی یا نوو بۆ ئیراقێ ئاڤا دكەت.
هشیار زێباری، ئەندامێ دەستەیا كارگێڕییا مەكتەبا سیاسییا پارتی دیموكراتی كوردستان، ل سەر هەژمارا خۆ یا تۆرا جڤاكی یا (ئێكس) نڤیسییە: پیرۆزباهیێ ل عەلی زەیدی، سەرۆك وەزیرێن ئیراقێ دكەین ب هەلكەفتا سەرەدانا وی یا سەركەفتی بۆ ئەمریكا، كو مەرەم ژێ داڕشتنا هەڤپشكییەكا ستراتیژی یا ب مفا و كاریگەرە د بوارێن ئابۆری، بازرگانی و سیاسی دا ژ بۆ دابینكرنا پاشەڕۆژەكا باشتر بۆ وەلاتێ مە.
هەروەسا ئاماژە ب وێ چەندێ ژی كریە، شێوازێ پێشوازییا فەرمی یا سەرۆكاتییا ئەمریكا ل سەرۆك وەزیرێن ئیراقێ و ئیمزاكرنا یاداشتنامەیێن تێكگەهشتنێ د بوارێن گرنگ دا وەكو دارایی و وزەیێ، ژ دیارترین و گرنگترین دەستكەفتێن ڤێ سەرەدانا دیپلۆماسی دهێنە هەژمارتن.

ئەندامەكێ كۆمیتەیا ناڤین یا پارتی دیموكراتی كوردستان دیار كر كو پارتی بۆ هەر بزاڤەكا چارەسەركرنا قەیرانان ئامادیە، لێ هێشتا بەرهەڤی بۆ كۆمبوونا گۆپیتكێ نەهاتینە كرن چونكی ئەو كۆمبوونە ل دووماهیێ دهێتە سازكرن و پێتڤی ب بڕیارێن بنەڕەتییە دیسان ناڤهاتی ئەو تۆهمەتێن كو دبێژن جوداهی د ناڤبەرا پارێزگەهان دا دهێتە كرن رەت كر و دیار كر كو بەلاڤکرنا بودجەی ل سەر بنەمایێ جوگرافی و رێژەیا ئاكنجییان و داهاتی دهێتە دیاركرن زێدەباری هندێ كو ئێكەتیێ بابەتێ وەزارەتا ناڤخۆ وەك بەهانە بكارئینایە بۆ داخوازییا چەندین پۆستێن دی یێن بلند وەك سەرۆكایەتییا هەرێمێ و سەرۆكاتییا جڤاتا دادوەریێ.
مەحەمەد خورشید، ئەندامێ كۆمیتەیا ناڤین یا پارتی گۆت «پارتی ئامادەیا خۆ یا تەمام دیاركریە بۆ هەر بزاڤەكێ كو ببیتە ئەگەرێ چارەسەركرنا قەیرانان و كۆمبوونا گۆپیتكێ بەردەوام ل دووماهیێ دهێتە كرن پشتی كو بڕیارێن دووماهیێ ل سەر بابەتان دهێنە دان لەوما هێشتا بەرهەڤكاری بۆ وێ نەهاتینە كرن و دیار نینە كا كەنگی و ل كیڤە دێ هێتە ئەنجامدان و پارتی چ ئاستەنگان ل پێش كۆمبوونان ل گەل چو ئالییەكی نابینیت و سەركردایەتییا پارتی بەردەوام ل گەل بەرپرسێن ئالیێن دی كۆم دبیت».
سەبارەت ب كاراكرنا پەرلەمانی ناڤهاتی ئاشكرا كر» چونكی ئالی ل دەرڤەی پەرلەمانی ناگەهنە رێككەفتنان بلا پەرلەمان بهێتە كاراكرن و فراكسیۆنێن د ناڤ پەرلەمانی دا بەرپرس بن ژ راپەڕاندنا كارێن خەلكی و بڕێڤەبرنا رۆلێ تەشریعی و چاڤدێریێ و ئێكەتی دبێژیت بلا پەرلەمان و حوكمەت پێكڤە وەك ئێك پاكێج بن بەلێ دو سالە ل سەر ڤێ چەندێ رێك نەكەفتینە لەوما رێكا باشتر كاراكرنا پەرلەمانییە و پاشی گەنگەشەكرن ل سەر پێكئینانا حوكمەتێ».
دەربارەی داخویانیێن ئێكەتیێ ل دۆر هەبوونا 41 كورسییان ل پەرلەمانی» گۆت هەكە دشێن بلا پێكڤە ل گەل ئالیێن دی زۆرینەیەكا (50+ 1) پێكبینن و كارێ پەرلەمانی بكەن و كابینەیا دەهێ پێكبینن هەكە خەلكی دەنگ دابیتە وان پێدڤییە رێز ل دەنگێ خەلكی بهێتە گرتن بەلێ هەكە ئێكەتیێ زانیبا دشێت ڤێ چەندێ بكەت دا كەت».
سەبارەت ب پۆستێن حوكمەتێ مەحەمەد خورشید دیار كر» بابەتێ وەزارەتا ناڤخۆ تنێ وەك بەهانە هاتییە بكارئینان چونكی ئێكەتی نوكە داخوازییا چەندین پۆستێن دی یێن بلند دكەت وەك سەرۆكایەتییا هەرێمێ و سەرۆكایەتییا جڤاتا دادوەری و درێژكرنا دەمێ گەنگەشەیان ژ ئالیێ ئێكەتیێ ڤە و هندەك ئەگەرێن دەرەكی وەك كارتێكرنا شەڕێ ئیران و ئەمریكا بوونە ئەگەرێ ڤێ قەیرانێ».
ل دۆر تۆهمەتێن جوداهیێ د بەلاڤكرنا پرۆژەیان دا وی ئەندامێ كۆمیتەیا ناڤین یا پارتی رۆهنكر» حوكمەت جوداهیێ ناكەت و یا هەموو خەلكی یە و بەلاڤكرنا بودجەی و پرۆژەیان ل سەر بنەمایێ جوگرافی و رێژەیا ئاكنجییان و رێژەیا داهاتی دهێتە دیاركرن و بۆ نموونە داهاتێ سلێمانیێ كێمترە ژ 35% بۆ حوكمەتێ بەلێ داهاتێ دەڤەرێن دی زێدەترە ژ 75% و دیسان رێژەیا ئاكنجییێن دهۆكێ و هەولێرێ پترە ژ 60% و تریلیۆنەك و 865 ملیار دینار بۆ سنۆرێ سلێمانیێ تنێ ل پرۆژەیێن رێك و جادەیان هاتییە خەرجكرن».

زنار تۆڤی:

بەختیار عزەت دەرگەلەیی، چاڤدێرێ سیاسی و نڤیسەر ل وەلاتێ ئەمریكا بۆ رۆژنامەیا (ئەڤرۆ) دیاكر: چەندین رێكخراوێن كوردی ل ئەمریكا نامەیەك بۆ عەلی زەیدی، سەرۆك وەزیرێن ئیراقێ ب هەلكەفتا سەرەدانا وی بۆ ئەمریكا هنارتییە و تێدا هاتییە، سەرێ رێزێ بۆ هەوە یێن هێژا د چەمینین كو هوون هێژایی ڤی پۆستێ بەرپرسیارەتییا دیرۆكینە، یێ كو هەوە وەرگرتی بۆ قووناغەكا نوو ژ پێشكەفتنا ئیراقا كورد و ئەرەب و هەموو تەخ وچینین دی یێن گەلێ مە، كو هوون ئاگەهداری وان هەموو قوربانیێن مەزنن یێن كو گەلێ كورد داین ژ پێخەمەت مافین خۆ یێن رەوا.
د نامەیا رێكخراوێن كوردی ل ئەمریكا بۆ زەیدی هاتیە ژی» ل دەف هەوە یا ئاشكرایە كو پرسا كوردان بەردەوام بوویە هەر ژ دەستپێكا دامەزراندنا دەولەتا ئیراقێ و هەتا ئەڤرۆ، ل گەل بزاڤێن كەسێن باش یێن ڤی وەلاتی بۆ چارەسەركرنێ، بەلێ مخابن چارەسەری چو جاران ئەو نەبوون یێن كو هیڤی ل سەر دهاتە كرن، كو هیڤییا هەموو تەخ وچین و نەتەوەیێن ڤی نیشتیمانی ئەوە كو هەموو كێشە ل گەل حوكمەتا هەرێما كوردستانێ بهێنە چارەسەركرن، كو چارەسەركرنا وان دێ بیتە هێز و سەروەری بۆ وەلاتی و ئێكگرتنا هەموو شیانێن گەلێ ئیراقێ د سەردەمێ هەوە دا، داكو ئەم هەموو پێكڤە كار بكەین بۆ ئاشتی، برایەتی و ئێكریزیێ، بۆ پڕكرنا وان ڤالاهیێن كو د دەمێ بۆری دا بووینە پرس و بێ چارەسەری و ب هەلاویستی ماینە، ژ پێخەمەت خۆشی و سەربلندییا ئیراقەكا فیدرالی یا خۆشتڤی».
ئەو رێكخراو ژی ئەڤەنە:
سەنتەرێ جڤاتا كوردی ل كالیفۆرنیا
كۆمەلا برێڤەبرنا رەڤەندا كوردی ل ئەمریكا
سەنتەرێ كورد ل دالاس
ژۆرا بازرگانی یا كوردی و ئەمریكی
رەڤەندا كوردی ل ویلایەتا تێنیسی
سەنتەرێ ئەمریكی و كوردی ل واشنتۆنا پایتەخت
ناڤەندا رەڤەندا كوردستانی ل ویلایەتا واشنتۆنێ

دهۆك ،لەزگین جوقی

شێروان دووبەردانی، ئەندامێ لیژنا ئاسایش و بەرگریێ ل جڤاتا نوونەرێن ئیراقێ ژ فراكسیۆنا پارتی دوپاتكر كو هەلوەستێ وی یێ بنەجه ژ پێگیرییا وی ب بەرگریكرنێ ژ مافێن هەموو وەلاتیێن پارێزگەها نەینەوا ب هەموو پێكهاتە، نەتەوە و تەخ و چینێن وان ڤە دهێت، ئەڤ چەندە ژی ل سەر بنەمایێ دەستوور و یاسایێ یە، و رەتكرنا هەر پێنگاڤەكێ كو ببیتە ئەگەرێ زیانگەهاندنێ ب مافێن هەر ئالییەكی یان دەستكاریكرنا پرەنسیپێ دادپەروەری و وەكهەڤیێ د ناڤبەرا وەلاتییان دا.
دووبەردانی گۆت «پارێزگەها نەینەوا هەر یا وەسا بوو و دێ هەر مینیتە نموونەیا فرەهییێ و پێكڤەژیانێ، و ئەركێ مە هەموویانە ئەڤێ فرەهییێ بپارێزین و بەرگریێ ژ مافێن هەموو پێكهاتەیێن وێ بكەین. ئەم چو جاران قەبوول ناكەین چو پێرابوون دەستكارییا مافێن دەستووری یان یاسایی یێن چو پێكهاتەیان بكەن، و دێ بەردەوام بین ل سەر بجهئینانا ئەركێ خۆ د بەرگریكرنێ ژ مافێن رەوا یێن هەموو وەلاتییان دا، و دێ دوور بین ژ هەر بەرژەوەندییەكا سیاسی یان یا بەرتەنگ».
زێدەباری وێ چەندێ گۆت كو دڤێت دۆسێیا ئاڤادانكرنێ ل دووڤ چارچۆڤەیێن یاسایی بهێتە چارەسەركرن، ب شێوەیەكێ كو بگونجیت ل گەل بڕیارێن دادوەرییا ئیراقێ. د هەمان دەم دا پشتەڤانییا خۆ دیار كر بۆ مافێ وان وەلاتیێن خودان سەنەدێن یاسایی و دروست دا كو پێرابوونێن ئاڤادانكرنێ ل دۆور رێڕەوێن كارگێڕی تەمام بكەن، ب شێوەیەكێ كو پاراستنا مافان مسۆگەر بكەت و بەرژەوەندییا گشتی بپارێزیت و دادپەروەریێ د ناڤبەرا هەموو وەلاتیێن پارێزگەهێ دا دیار بكەت.
دووبەردانی دوپاتی ل سەر هندێ كر كو هەر دۆسێیەكا پەیوەندی ب مافێن وەلاتییان ڤە هەبیت، دڤێت ب رێیا كەنالێن فەرمی یێن یاسایی بهێتە ئێكلاكرن، ب شێوەیەكێ كو سەروەرییا یاسایێ بهێز بكەت و پرەنسیپێ وەكهەڤیێ بچەسپینیت. هەروەسا دیار كر كو پاراستنا مافان بجه ناهێت هەكە ب رێیا پەنابرنا بۆ یاسایێ و رێزگرتن ل بڕیارێن دادوەری یێن كارپێكری نەبیت.