شڤان فەتاح كۆچەر
بلند بفڕن ئەلهۆ یێن چیا
كوردستانیان عەشقا وە ڤیا
چەنگ قژێن دمخوار ب خوە بباوەرن
لڕاڤ و نێچیران ئەو جەنگاوەرن
گۆپیتكێن بلند دسەخت و ئاسێ نە
لەوما هێلینێن ئەلهۆیان لێنە
یانەیا مەیە پارچەك ژ دلی
هێزا ئەلهۆیان ئێتوونا هلی
لمەیدانا یاریێ سوار قەبخوازن
لجەنگێ هەڤڕكیێ هەرمانێ دخوازن
ئەڤرۆكە دهۆك هەمی بوویە زەر
شینێ ئاسمانی جان مل دایە بەر
ڤان پشتەڤانان دگەل یانێ سۆزە
باوەری و هاندان ناما دلسۆزە
پێكڤە هەوار دكن دهۆكە دهۆك
ئەڤ سەركەفتنە دێ بتە دیرۆك
ئەلند مزووری
ئەلهویێن دهۆكییا
دفرن ل دەشت و چییا
نێچیرا سەركەفتنا
بدەنە مە هەمییا
::: ::: :::
لاوێن یانا دهۆكێ
یاریزانن دگەل گۆكێ
ئەڤرۆكە رۆژا وەیە
لمە گەشبكەن دیرۆكێ
::: ::: :::
یاریگەهێ ب شارینن
گۆلێ لدویڤ گۆلێ بینن
سەركەفتنێ تۆماركەن
جامێ ب دەستڤە بینن
::: ::: :::
ڕەنگێ زەر هێما وەیە
مە جان و دل دگەل وەیە
ئەم ژ وەرە پشتەڤانین
سەركەفتن هەر بۆ وەیە
شاكر ئەتروشی:
سەنتەرێ پێشمەرگە یێ رەوشەنبیری ل دهۆكێ، دوهی ئێڤاری 14/4/2025 د چالاكیەكا تایبەتدا پەرتووكا (ژین و ژیارا پێشمەرگەیێ دێرینێ شۆڕەشا ئیلۆنێ و گولانێ عەبدوللا مووسا گەلناسكی) ل هولا سەنتەری دا نیاسین و ب ئیمزا نڤیسەرێ وێ ئەو پەرتووك ب دیاری ل سەر بەرهەڤبوویان هاتە بەلاڤكرن.
ل دەستپێكێ (ماجد سەید سالح) جێگرێ پارێزگەرێ دهۆكێ د پەیڤەكێ دا بەحسێ رۆلێ پێشمەرگەیێ قەهرەمان (عەبدوللا مووسا گەلناسكی) د شوڕەشێن ئیلۆنێ و گولاتێ دا كر و ب پێشمەرگەیەكێ قەهرەمان و چاڤ نەترس ل قەلەم دا، هەروەسا بەرهەڤیا پارێزگەها دهۆكێ بۆ چاپكرنا ڤان رەنگە پەرتووكان دیاركر، پاشان هەردو پێشمەرگەیێن دێرین (سادق گەلناسكی و محەمەد زڤنگی) چەند بیرهاتنێن خوە ل گەل شەهید عەبدوللا گەلناسكی ڤەگێڕان.
د دووڤدا عەقید (رەشید عەلی مووسا گەلناسكی) كو ب كارێ نڤیسین و بەرهەڤكرنا وێ پەرتووكێ رابوویە، پەرتووكا خوە بۆ بەرهەڤبوویان دا نیاسین و بەحسێ وان ئەگەران كر كو بووینە پالدەر ڤێ پەرتووكێ بەرهەڤ بكەت و گۆت: ئەڤە وەكو ئەمانەتەكی بوو من دڤیا بۆ نڤشێ نوو دانمە بەرچاڤ دا بزانن كو ئەڤ ئازادیا ئەڤرۆ ئەم تێدا بەرهەمێ خوین و خەباتا ب هزاران شەهیدێن قەهرەمانە و ئەركە ل سەر هەموو نڤیسەران بیرهاتێن وان قەهرەمانان خرڤە بكەن و چاپ بكەن.
پەرتووك ژ (118) پەرپەران پێك دهێت، محەمەد عەبدوللا زێباری ب كارێ پێداچوونا زمانی رابوویە و دیزاینەرێ چەلەنگ (ناسر منبەری) ب كارێ دیزاینكرنا بەرگ و ناڤەرۆكێ رابوویە و ب تیراژێ (1000) دانەیان ل چاپخانەیەكا رۆژهەلاتێ كوردستانێ هاتیە چاپكرن.
بێوار حەمدی:
ئەكتەرێ گەنج (گۆڤەند بەهزاد) كو ب (تیتۆ) دهێتە نیاسین، د دیدارەكێ بۆ رۆژنامەیا ئەڤرۆ گۆت: ئەز دەرچۆیێ پەیمانگەها هونەرێن جوانم/ پشكا شانۆیێ و هەتا نوكە من پشكداری د گەلەك كارێن هونەری دا كریە، لێ ئەو درامایێن من رۆلێن باش تێدا دیتین (سنۆر، كەسەر) بوون كو خەلكەكێ زۆر ئەز پێ نیاسیم.
هەروەسا گۆت: پتریا ئەكتەران حەزدكەن رۆلێن سەرەكی دناڤ درامایان دا ببینن، ب تایبەت ئەوێن خودان بەهرە و من ژی ئەو حەزە هەیە، لێ هەتا نوكە ب رۆلێن خوە یێ رازیمە، ژبەركو ئەو رۆلێن ئەز پێ رابوویم پتر ل گەل ژیانا من دگونجن، بۆ دەمێ بهێت ژی مە هزر د گەلەك كارێن هونەری دا كریە و دێ یێ بەردەوامبم و داخوازا سەركەفتنێ بۆ هەموو هونەرمەندان دكەم.
دلۆڤان هالۆ:
سترانبێژ (كاوە زاخۆیی) د دیدارەكێ دا بۆ رۆژنامەیا ئەڤرۆ گۆت: ئەڤە دەمەكە ئەز مژوولی تۆماركرنا دو سترانامە، یا ئێكێ ل دۆر مرنا برایێ منە و یا دویێ ژی خۆشكێ.
ناڤبری گۆت: هەردو ستران ژ پەیڤ و ئاوازێن منن، بۆ زانین هەتا نوكە من بیست ستران و حەفت كلیپ بەلاڤكرینە و ئەز ب سترانا (شەهید شیفایێ) بەرنیاس بووم و بۆ پاشەرۆژێ ژی هندەك سترانێن نوو دێ دڕێ دا هەبن و ل دووف شیانان دێ وان ژی تۆمار و كلیپكەم.
فەرماندارێ گشتی یێ هێزێن سووریا دیموکرات دیار دکەت، وان دڤێت هەموو پرسێن هەی د ناڤبەرا هێزێن سیاسی یێن رۆژئاڤایێ کوردستانێ دا چارەسەر بکەن دا کورد وەکو ئێک شاند ل گەل شامێ دانوستاندنان بکەن و ژ بۆ ڤێ یەکێ ژی دێ کۆنگرە هێتە ساز کرن.
مەزلوم عەبدی فەرماندارێ گشتی یێ هێزێن سووریا دیموکرات د داخویانیەکێ دا راگەهاند، نها رەوشا رۆژئاڤایێ کوردستانێ ئارامە و ئێرشێن تورکیا یێن ل سەر بەنداڤا تشرینێ ژی هاتینە راگرتن، وان ل گەل شامێ سەبارەت ب بەنداڤا تشرینێ رێککەفتنەک ئیمزا کرینە و ل گۆر رێککەفتنێ دێ رێڤەبەریا نها یا بەنداڤێ وەکو خوە مینیت و دێ ب هەڤپشکی ل گەل شامێ کاروبارێن پێدڤی بۆ بەنداڤێ هێنە کرن و گۆت: (مە هەتا نها چەندین رێککەفتن ل گەل شامێ ئیمزا کرینە و ئارمانجا مە یا سەرەکی ئەوە دا شەڕێ چەندین سالان ل سووریێ ب دووماهی بهێت، چونکی پێدڤیا هەموو خەلکێ سووریێ ب ئاشتیێ هەیە و بێگومان ئەمریکا و فرەنسا رۆلەکێ کاریگەر دگێرن و هەتا نها ژی رێککەفتن وەکو خوە دهێنە بجهئینان و ئەو یەک ژی جهێ دلخوەشیێ یە).
فەرماندارێ گشتی یێ هێزێن سووریا دیموکرات ئەو یەک ژی دیار کر، ژ بۆ وان گەلەک یا گرنگە ئاریشەیێن هەی ل رۆژئاڤایێ کوردستانێ ب تەمامی بهێنە چارەسەرکرن و کورد ل سووریێ پێکڤە کار بکەن و ژ بۆ ڤێ یەکێ ژی نها بەرهەڤی بۆ سازکرنا کۆنگرەیەکێ نەتەوەیی دهێتە کرن، بێگومان ئارمانجا سەرەکی یا کۆنگرەی ئەوە دا پرسێن هەی بهێنە چارەسەرکرن و کورد وەکو ئێک شاند ل گەل شامێ دانوستاندنان بکەن.
سەبارەت ب پاشەرۆژا رۆژئاڤایێ کوردستانێ ژی مەزلوم عەبدی دیار کر، هەلوەستێ تورکیا نها گەلەک باش هاتیە گوهۆڕین و ئەم وەسا هەست دکەین کو دێ تورکیا هەبوونا رێڤەبەریا خوەسەر قەبوول کەت، چونکی کوردان ل سووریێ دڤێت هەرێمەکا خوە هەبیت و خوە برێڤە ببەن، بێگومان هەتا نها تورکیا ئاریشە دروست دکرن، لێ نها هەلوەستێ تورکیا ژی باش بوویە و مە دڤێت ب رێیا دانوستاندنان ل گەل شامێ بابەتێ پاشەرۆژا رۆژئاڤایێ کوردستانێ ژی ئێکلا بکەین و گۆت: (بێگومان هەموو وەلاتیێن رۆژئاڤایێ کوردستانێ دخوازن رێڤەبەریا خوەسەر هەبیت و ئەو یەک ژی د چارچۆڤەیێ سووریایەک نوو دا بیت، بێگومان د دانوستاندنێن ل گەل شامێ دا ئەو یەک ژی دێ چارەسەر بیت).
چاڤدێرێن سیاسی ژی وەسا دبینن قۆناغا ئاشتیێ یا ل تورکیا دەستپێکریە کاریگەریا خوە یا باش ل سەر رۆژئاڤایێ کوردستانێ ژی کریە و پشتەڤانیا ئەمریکا و فرەنسا یا بۆ کوردان ل سووریێ ژی وەسا کریە تورکیا نەچار بیت هەلوەستێ خوە ل هەمبەر مافێن گەلێ کورد ل سووریێ بگوهۆڕیت.
سەرۆکێ پەرلەمانێ ئیرانێ دیار کر، وەکو پەرلەمان ئەو ژ ناڤەرۆکا دانوستاندنێن د ناڤبەرا ئیرانێ و ئەمریکا دا ئاگەهدار نینن و وان ژی وەکو وەلاتیێن دی ب رێیا راگەهاندنێ دووڤچوونا بابەتێ کریە و ئەو یەک ژی ب چو رەنگەکێ ناهێتە قەبوول کرن و دڤێت حوکمەت سەبارەت ب ناڤەرۆکا دانوستاندنێن ل گەل ئەمریکا پەرلەمانی ئاگەهدار بکەت.
محەمەد باقر قالیباف ئەو یەک ژی دیار کر، هەر دانوستاندنەک ل گەل ئەمریکا بهێتە کرن دڤێت پەرلەمان و لیژنەیێن پەیوەندیدار بهێنە ئاگەهدار کرن، لێ مخابن ئەو یەک هەتا نها نەهاتیە کرن و ژ بلی چەند کەسان ل ئیرانێ یێن دی نزانن کا دانوستاندن ل سەر چ بنەمایەکێ هاتینە کرن.
ل ئالیێ دی هژمارەک زێدە ژ ئەندامێن پەرلەمانێ ئیرانێ ژی دوهی نەرازیبوونا خوە ل دۆر دانوستاندنێن ل گەل ئەمریکا دیار کرن و راگەهاندن دڤێت پەرلەمان ژ ناڤەرۆکا دانوستاندنان بهێتە ئاگەهدار کرن.
سەرۆکێ ئەمریکا سەبارەت ب دانوستاندنێن ل گەل ئیرانێ بۆ رۆژنامەڤانان ئاخڤی و دیار کر، ئەز نها نەشێم گەلەک بەحسێ ناڤەرۆکا دانوستاندنان بۆ هەوە بکەم، چونکی دێ جارێ دانوستاندن بەردەوام بن، لێ هەتا نها دانوستاندن ب رەنگەکێ باش بەردەوام دکەن و هەکە وەسا بەردەوام بیت دێ گەهیتە ئەنجامەکێ گەلەک باش.
سەرۆکێ ئەمریکا ئەو یەک ژی دیار کر، ئەنجامێ دانوستاندنان بێگومان دێ بۆ ئیرانێ گەلەک باش بیت و گەلێ ئیرانێ ژی هەمان تشت دڤێت و ژ بەر ڤێ یەکێ ژی دڤێت ئەم لەزێ نەکەین و چاڤەرێی ئەنجامێ دووماهیێ بین.
بەرپرسەکێ وەزارەتا دەرڤە یا ئەمریکا ژی دوهی بۆ رۆژناما واشنتۆن پۆست یا ئەمریکا دیار کریە، هەکە ئیران داخوازیێن ئەمریکا قەبوول نەکەت دێ ئێرشی بنگەهێن ئەتۆمی یێن ئیرانێ هێتە کرن و د دانوستاندنان دا ژی ئەو یەک ب رەنگەکێ ئاشکرا بۆ شاندێ ئیرانێ هاتیە گۆتن، لێ هەتا نها هەلوەستێ ئیرانێ باشە و ئەمریکا چاڤەرێی رێککەفتنەکا باشە.
هه‌ولێر، قائید میرۆ:
دوهی رۆژا ئێكشه‌مبی ب به‌رهه‌ڤبوونا سه‌رۆك بارزانی ئێكه‌م كۆنفرانسێ ئافره‌تێن پارتی بڕێڤه چوو بڕیاره ئه‌ڤرۆ ژی به‌رده‌وامی هه‌بیت و چه‌ندین راسپارده بهێنه ده‌ركرن.
جوان رۆژبه‌یانی، ئه‌نداما كۆمیته‌یا ناڤه‌ندیا پارتی دیموكراتی كوردستان بۆ رۆژناما ئه‌ڤرۆ دیار كر، ئێكه‌م جاره پارتی كۆنفرانسه‌كێ تایبه‌ت ب ئافره‌تان بڕێڤه دبه‌ت و مه‌ره‌م ژ رێڤه‌برنا كۆنفرانسی چاره‌سه‌ركرنا ئاریشه‌یێن ل هه‌مبه‌ر ئافره‌تێ یه، بتایبه‌تی ئافره‌تێن دناڤا رێكخستنێن پارتی دیموكراتی كوردستان، ئاریشه و ئاسته‌نگێن ئافره‌تێ دناڤا ئورگانێن حزبێ و یێن حوكمه‌تێ ژی هه‌موو دێ هێنە گه‌نگه‌شه كرن و به‌حسكرن و گۆت: ئامانجا كۆنفرانسی ئه‌وە پارتی جاره‌كا دی رۆلی بده‌ته ئافره‌تێ، ئێكه‌م حزبا سیاسیه لسه‌ر فه‌رمانا بارزانی رێكخراوه‌كا تایبه‌ت ب ئافره‌تان دامه‌زراندیه ئه‌و ژی ئێكه‌تیا ئافره‌تێن كوردستانێ یه، واته هه‌ر ژ ده‌ستپێكا دامه‌زراندنا پارتی، پارتی رۆله‌كێ زۆر دایه ئافره‌تێ و چه‌ندین ئافره‌تێن سه‌ركرده مه هه‌بووینه و نوكه رێژا ئافره‌تێ زۆر زێده‌تره ژ به‌رێ، چونكه پێدڤیه ل گوره‌ی سه‌رده‌مێ نوكه ئاریشه‌یێن ئافره‌تێ بهێنه چاره‌سه‌ركرن.
جوانێ گۆتژی: كۆنفرانس دێ كار كه‌ت بۆ نه‌هێلانا هه‌موو وان ئاسته‌نگێن بووینه رێگر ل هه‌مبه‌ر ئافره‌تێ، بتایبه‌تی ئه‌و ئافره‌تا نوكه دناڤا حزبێ یان حوكمه‌تێ دا كار دكه‌ت، ئاسته‌نگ و ئاریشه‌یێن هه‌مبه‌ر ئافره‌تێ دێ هێنه دیاركرن و چاره‌سه‌ری بۆ هێته دیتن، ڤێجا ئه‌و ئاریشه و ئاسته‌نگ دناڤا حزبێ هه‌بن یان حوكمه‌تێ دڤێت نه‌مینن و بهێنه چاره‌سه‌ر كرن، هه‌تا ژلایێ قانوونی دڤێت كار بۆ نه‌هێلانا ئاسته‌نگان بهێته كرن و بۆ ڤێ مه‌ره‌مێ پارتی دیموكراتی كوردستان پشتی كارابوونا په‌رله‌مانێ كوردستانێ دێ ب ده‌ركرنا هژماره‌كا قانوونان كار كه‌ت بۆ ئافره‌تێ.
جوان رۆژبه‌یانی ئاماژه پێ كر کو بڕیاره ئه‌ڤرۆ پشتی دووماهی هاتنا كۆنفرانسی هژماره‌كا راسپاردها بهێنه ده‌ركرن، هه‌موو ئه‌و راسپارده بسه‌رپه‌رشتیا سه‌رۆك بارزانی دێ هێنه ده‌ركرن، ژبه‌ركو سه‌رۆك بارزانی بخۆ گرنگیه‌كا تایبه‌ت دده‌تە ئافره‌تێ و رۆل و پێگه‌هێ وێ، هه‌موو ئه‌و ئاریشه‌یێن ئافره‌تێ هه‌ین دێ هێنه دیار كرن و چاره‌سه‌ری بۆ بهێته دیتن.
جوانێ د بەردەوامیا ئاخفتنێن دیار کر کو د چه‌ند هه‌یڤێن بۆریدا راپرسی هاتینه كرن و ڤه‌كۆلین هاتینه ئه‌نجامدان لدۆر ئاریشه‌یێن ئافره‌تێ، پێنج مژارێن گرنگ ل كۆنفرانسی هه‌نه و ئافره‌ت دێ گه‌نگه‌شێ لسه‌ر كه‌ن بۆ نموونه مژاره‌ك یا تایبه‌ته ب حوكه‌ت و په‌رله‌مان و سه‌رۆكایه‌تیا هه‌رێمێ، مژاره‌كا دی یا تیایبه‌ته ب ئافره‌تێ و سۆشیال میدیایێ و گۆت: هه‌روه‌سا مژاره‌كا تایبه‌ته ب ئێكه‌تیا ئافره‌تێن كوردستانێ، هه‌موو مژارێن گرنگن و گرێدایی ئافره‌تێ نه، بێگومان ئه‌و راسپارده‌یێن دهێنه ده‌ركرن ئه‌ڤرۆ دێ ژلایێ پارتی دیموكراتی كوردستان دێ هێنه جێبه‌جێكرن و ئه‌م پێشبینی دكه‌ین پشتی كۆنفرانسی پرسا ئافره‌تێ بكه‌ڤیته د قۆناغه‌كا نوودا و دێ كاریگه‌ریێن خۆ هه‌بن لسه‌ر ئافره‌تێ.
له‌یلا عه‌بدولجه‌بار، پشكدارا كۆنفرانسی گۆت: ئه‌ز دناڤا لیژنه‌كێ بووم یا تایبه‌ت ب سۆشیال میدیایێ، سێ مژارێن گرنگ دێ هێنه به‌حسكرن لدۆر رۆلێ ئافره‌تێ و سۆشیال میدیایێ ئه‌ڤرۆ دێ پانێل هه‌بن لدۆر میدیا گه‌شه‌پێدان و رۆلێ ئافره‌تێ، هه‌روه‌سا سۆشیال میدیا وه‌كو سه‌كۆیه‌ك بۆ ده‌رخستنا شیانێن ئافره‌تێ، هه‌روه‌سا سیاسه‌ت و ستراتیژیه‌تا پارتی دیموكراتی كوردستان لدۆر میدیا و پرسا ئافره‌تێ.
لەیلایێ گۆتژی: ئه‌ڤه بۆ جارا ئێكێ یه ئافره‌تێن سه‌ركرده لدۆر مێزه‌كێ كۆم ببن سه‌باره‌ت پرسا ئافره‌تێ و ئه‌ڤه هیڤیا هه‌ر ئافره‌ته‌كا دلسۆزه، ئه‌م گه‌شبینین ب ئه‌نجامدانا ئه‌ڤی كۆنفرانسی، پێدڤیه بەردەوام كۆنفرانس بهێنە گێران و زێده‌تر كار لسه‌ر رۆل و پێگه‌هێ ئافره‌تێ بهێته كرن ل هه‌رێما كوردستانێ.
لەیلا عەبدولجەبار د بەردەوامیا ئاخفتنێن خۆدا گۆت: هه‌موو ئافره‌تێن پێگه‌هه‌ك هه‌ی دناڤا پارتی و حوكمه‌تێ دا پشكداری هه‌بوویه، ئێكه‌مین جاره كۆنفرانسه‌كێ بڤی شێوه‌ی بڕێڤه بچیت و سه‌رۆك بارزانی ژی زۆر گرنگیێ ب پرسا ئافره‌تێ و مافێ ئافره‌تێ دده‌ت، سه‌رۆك بارزانی جاره‌كا دی پشته‌ڤانیا خۆ بۆ ئافره‌تا كوردستانێ نیشا دا، پشته‌ڤانیا سه‌رۆك بارزانی هێزه‌كا دی دده‌تە ئافره‌تێ و زێده‌تر مه هان دده‌ت بۆ كاركرنێ و خه‌باتا به‌رده‌وام، ئه‌ز باوه‌رم هه‌موو ئافره‌ت هه‌تا ئافره‌تێن لایه‌نێن دیژی دلخۆشن ب ئه‌ڤێ پێنگاڤێ، چونكه ئه‌نجامدانا كۆنفرانسه‌كی تایبه‌ت ب پرسا ئافره‌تێ دبیته ئه‌گه‌رێ ڤێ چه‌ندێ ئاسته‌نگێن هه‌مبه‌ر ئافره‌تێ نه‌مینن، ژلایه‌كێ دیڤه ژی بشێوه‌یه‌كێ ئه‌كادیمی و زانستی كار ل سه‌ر بهێزكرنا پێگه‌هێ ئافره‌تێ دهێته كرن.
هاوژین ره‌سول، كادرا پێشكه‌فتیا ئێكه‌تیا ئافره‌تێن كوردستانێ دیار کر کو ئه‌نجامدانا كۆنفرانسی بخۆ یا گرنگه، چونكه پشكداریا سه‌رۆك بارزانی و سه‌ركردایه‌تیا پارتی رامانا وێ چه‌ندێ دده‌ت هێشتا پرسا ئافره‌تێ ئێكه ژ وان پرسێن گرنگ ل ده‌ف سه‌رۆك بارزانی و پارتی دیموكراتی كوردستان و گۆت: پارتی ب درێژاهیا دیرۆكێ بوویه قۆتابخانا پێگه‌هاندنا ئافره‌تێ و چه‌ندین ئافره‌تێن سه‌ركرده و شه‌هید مه هه‌نه یان ئه‌ندامێن پارتی بووینه یانژی ئه‌ندامێن ئێكه‌تیا ئافره‌تێن كوردستانێ.
هاوژینێ ئەو چەندە ژی دیار کر کو سه‌رۆك بارزانی د گۆتارا خۆدا یا كۆنفرانسێ ئافره‌تان ئاماژه ب گه‌له‌ك خالێن گرنگ دایه، سەرۆکی جاره‌كا دی سه‌لماند كو ئەو پشته‌ڤانه‌كێ بهێزه بۆ ته‌خا ئافره‌تێ، هه‌روه‌كی سه‌رۆك بارزانی گۆتی، رۆلێ ئافره‌تێ هەکە زێده‌تر نه‌بیت ژ رۆلێ زه‌لامی كێمتر نینه و به‌حسێ رۆلێ ئافره‌تێ ل شۆڕشێن كوردی و شه‌ڕێ به‌رهنگاربوونا داعش كر و گۆت: مه هیڤیه‌ك هه‌یه نوكه پێڤه دێ پارتی و سه‌رۆك بارزانی رۆله‌كێ زێده‌تر ده‌نه ئافره‌تێ، چونكه سه‌ره‌ڕای هه‌بوونا شیانێن بێسنور یێن ئافره‌تێ، به‌لێ ئافره‌تێ هه‌ر پێدڤی ب پشته‌ڤانیه‌كا بهێز هه‌یه و بدیتنا من مه‌زنترین پشته‌ڤانی مه هه‌یه ئه‌و ژی پشته‌ڤانیا سه‌رۆك بارزانیه بۆ ئافره‌تێ.
هاوژینێ د بەردەوامیا ئاخفتنێن خۆدا دیار کر، سه‌رده‌م هاتیه گۆهۆڕین و دڤێت هه‌رێما كوردستانێ و لایه‌نێن سیاسی و جڤاكی ژی خۆ بگونجینن دگه‌ل پێشكه‌فتنێن نوكه ئه‌م تێداینه، له‌وڕا ئه‌نجامدانا كۆنفرانسێن تایبه‌ت ب پرسا ئافره‌تێ دێ بیته وه‌راره‌ك بۆ پێشخستنا شیانێن ئافره‌تێ و گۆت: ئه‌ز پێشنیار دكه‌م چالاكیێن زێده‌تر هه‌بن مینا كۆنفرانس و کومبۆن و دیمه‌نێن گرێدایی ئافره‌تێ، ئه‌ڤرۆ پرسا ئافره‌تێ ل چوارچوڤه‌كێ به‌رته‌سك ده‌رباز بوویه بۆ قۆناغه‌كێ كو پێشكه‌فتنێن به‌رچاڤ بخۆڤه دیتینه، به‌لێ هێشتا مه وه‌كی ئافره‌ت و تایبه‌ت ئافره‌تێن ناڤا پارتی حه‌زا ڤێ چه‌ندێ هه‌یه هێشتا رۆل ب ئافره‌تێ بهێته‌دان و هه‌موو ئه‌و ئاسته‌نگێن بووینه رێگر ل هه‌مبه‌ر ئافره‌تێ نه‌مینن، مه بڤێت و نه‌ڤێت به‌هرا هندێ ئاسته‌نگ و رێگری هه‌نه ل هه‌مبه‌ر ئافره‌تێ، لێ دلخۆشین سال بۆ سالێ ره‌وشا ئافره‌تێ باشتره و كار یێ دهێته كرن رۆله‌كێ مه‌زنتر ب ئافره‌تێ بهێته دان.
هاوژینێ دیار کر ژی کو پارتی دیموكراتی كوردستان ل كۆنگرێ چاردێ شیا هه‌تا راده‌كی رۆلی بده‌ته ئافره‌تێ و نوكه ئافره‌ت یا پشكداره دناڤا هه‌موو ئورگانێن پارتی هه‌ر ل سه‌ركردایه‌تی هه‌تا ئورگانێن خوارێ، دناڤا حوكمه‌ت و سه‌رۆكایه‌تیێن په‌رله‌مان و هه‌رێما كوردستانێ ژی ئافره‌ت یا پشكداره و گۆت: هەکە ئه‌م به‌روارد بكه‌ین دگه‌ل وه‌لاتێن ده‌وروبه‌ر ئه‌ڤه ناهێته ڤه‌شارتن ئافره‌تێ پێگه‌هێ خۆ هه‌یه ل هه‌رێما كوردستانێ.
زاخۆ، دلۆڤان هالۆ:
دلخاز مووسا، رێڤەبەرێ رەوشەنبیری و هونەری ل زاخۆ بۆ ڕۆژناما ئەڤرۆ دیار کر کو ل ل رۆژا 29ێ ڤێ هەیڤێ دێ سێیەمین فیستەڤالا شەلوشەپك و جلوبەرگێن کوردی ل ئیدارەیا سەربخوە یا زاخۆ هێتە گێڕان، و بۆ دەمێ دوو ڕۆژان دێ یا بەردەوام بیت.
ناڤهاتی ئاماژە ب وێ چەندێ ژی کر کو ئەڤە پتری دوو هەیڤانە مە لیژنا بەرهەڤیێن فیستەڤالێ پێکئینایی و هەتا نوکە مژوولی بەرهەڤیانە، وەکو جهێن هونەری و دکانێن جلوبەرگێن کوردی و هژمارەکا گرۆپێن هونەری و دەنگبێژیێ و هەمیان ژی رازەمەندیا پشکداریێ دایە مە، ئەڤ تیپە ژ هەر چار پارچێن کوردستانێ دێ پشکدار بن وەکو تیپێن باژێڕێن کەرکووکێ و هەولێرێ و دهۆکێ و زاخۆ و باتیفا و کرماشانێ و هەورامانێ وخۆراسانێ و بەدلیسێ و جزیرێ و شەڕنەخێ و تیپێن کوردێن ڕۆژئاڤا، و ژ دەرڤەی هەرێما کوردستانێ ژی دێ هندەك تیپێن هونەرێ مللی ژ بەسرا و ئیماراتێ و تاجیکستانێ پشکدار بن، ب ڤێ چەندێ دێ فیستەڤالا ئەڤ جارە یا جیاواز بیت.
ناڤهاتی گۆت ژی:»هژمارەکا زۆر یا دکانان بۆ فرۆتنا شەلوشەپك و جلوبەرگێن کوردی ژی دێ ل گۆڕەپانا پرا دەلال هێنە دانان، د ڤێ فیستەڤالێ دا دێ شەلوشەپك و جلوبەرگێن کوردی یێن کەڤنار هێنە نیشاندان و کور و کچێن زاخۆ و دەوروبەران وەکو نمایشکارێن جلوبەرگان دێ پشکدار بن.
زێدەتر ژی گۆت:» هەموو پێکول هاتینە کرن کو ل زاخۆ ڕوویەکێ جوان بدەینە پیشەسازییا شەلوشەپکان چونکی زاخۆ باژێڕێ سەرەکی یێ چێکڕنا شەلوشەپكانە و ژماڕەکا ئێکە ل سەر ئاستێ هەرێما کوردستانێ، و ئارمانجا مە ئەوە کو د ڤێ ڤیستەڤالێ دا ڕەهەندەکێ نەتەوەیی د چارچووڤێ هەر چار پارچێن کوردستانێ و نێڤدەولەتی دا پیشانی هەموو خەلکێ کوردستانێ و جیهانێ بدەین».
نيشاندان