عەلی حاجی:

چاڤەڕێ‌ دهێتە كرن ئەڤرۆ بەردەوامی دان ب هەڤڕكیێن گەڕا 16 یا قارەمانییا كۆپا ئیراقێ‌ یا فوتبۆلێ‌ بیت ب ئەنجامدانا چار یارییان، نەورۆز و زاخۆ دناڤ ئەردێن خوە دنە و چاڤ ل سەركەفتنێ‌ و دەربازبوونێ‌ نە.
ل دەمژمێر 7:30 شەڤ پشتەڤانێن یانەیا زاخۆ چاڤەڕێ‌ زنجیرەكا دی یا یاریێن تیما خوە نە و ئەڤچارە ژی د كۆپا ئیراقێ‌ دا دەمێ‌ یانەیا ئەلگەرمە یا ئەنباری مێڤان دكەت، هەردو یانە د خولا ستێرێن ئیراقێ‌ دا كەڤتینە ل بەر ئێك لەوما ژی ئەركێ‌ كوڕێن خابووری ب سانەهی نابیت، د دیدارا ئێكانە یا هەردو تیما ل دەستپێكا كانوونا دویێ‌ یا سالا بۆری ل یاریگەها زاخۆ بوو ئەوا ب گۆلەكێ‌ بێ‌ بەرانبەر سەركەفتن ئینابوو، هەرچەندە شەڕێ‌ مەزن یێ‌ زاخۆییان د خولا ستێرێن ئیراقێ‌ دایە ئەوا سەرێ‌ لیستێ‌ دهێت ب كۆمكرنا 42 خالان و دبیت هند كۆپا بەرانبەر خولێ‌ گرنگ نەبیت، لێ‌ یانەیا ئەلگەرمە ئەوا د خولا ستێرێن ئیراقێ‌ دا 27 خال كۆمكرین رێزا 12ێ‌ دهێت و دێ‌ بزاڤێ‌ كەت تۆلێن خوە ڤەكەت دبیت ئەوژی ب زەحمەت بیت بەرانبەر هێزا زاخۆ كو پشتەڤانێن وێ‌ نە.
ل دۆر دووماهی به‌رهه‌ڤیێن زاخۆییان سیپان سەدیق ستێرێ تیمێ بۆ رۆژنامه‌یا ئه‌ڤرۆ گۆت: ل دووڤ پلانا هاتیە دارێشتن ژلایێ راهێنەرێ تیما مه‌ ته‌لال ئه‌لبلۆشی ئه‌م بەردەوامن ل سەر کارکرنێ نه‌ بۆ یاریا بەرامبەر ئه‌لگەرمە، تیما گەرمە ئێک ژ تیمێن گەلەک باشە نەخاسمە ل ڤێ دووماهیێ وان ژی گوهۆڕین دناڤ پێکهاتیێ تیما خوە دا کرینە و ئاستەکێ باش د خولێ دا پێشکێش دکەن، دڤێت ئەم ب باشترین شێوە خوە ئامادە بکەن بۆ وێ یاریێ و ئەم دزانین دێ ئەرکێ مە د وێ یاریێ دا یێ ب زەحمەت بیت لێ یاری د یاریگەها مە دایە و دێ هەمی تشتا کەین کو بشێن باشترین ئاست پێشکێش بکەین ژبەرکو ئارمانجا مە سەرکەڤتنە و دەرباز بونە د قوناغا داهاتی دا.
ل دووماهیێ گۆت: ئه‌و به‌رنامه‌یێ بۆ مه‌ هاتیه‌ دانان ژلایێ كارگێریێ سه‌ركه‌فتییه‌‌ ل سەر ڕێیەکا دروست دچین، هەمی یاریزان د جەنگین بۆ ناڤێ یانەیا زاخۆ و هیڤییا مه‌ ده‌ستكه‌فته‌كی بۆ ڤی ناڤی بینن.
ژ یاریێن دی یێن ئەڤرۆ، نەورۆز دێ‌ ل یاریگەها خوە ئەلحوسەین مێڤان كەت، یاریگەها ئەلمەدینە ل پایتەختێ‌ ئیراقێ‌ بەغدا یانەیا تەلەبە و ئەمانەت بەغدا مێڤان كەت، هەروەسان ل یاریگەها ئەلشەعب دێ‌ مێڤاندارییا شورتە و مووسل كەت.

قەیس وەیس:

پشتی بۆرینا زێدەتری دو مەهان بڕیارە سوبەهی ئەینی هەڤڕكیێن قارەمانییا كۆپا كوردستانێ‌ یا فوتبۆلێ‌ ژ چارچووڤەیێ‌ قۆناغا 16ێ‌ ب ئەنجامدانا سێ‌ یارییان بهێنە كرن و هەتا ئێكشەمبییا بهێت یاری بەردەوامبن ئەوا دهێتە چاڤەڕێ‌ كرن هەموو یاری ل دەمژمێر 2:30 پشتی نیڤرۆ هێنە ئەنجامدان.
ل یاریگەها خوە و دناڤ پشتەڤانێن خوە تیما یانەیا دهۆك دێ‌ مێڤاندارییا یانەیا زانكۆیا جیهان كەت، هەردو یانە د خولا پلا ئێكا كوردستانێ‌ دا پشكدارن، ئەلهۆیێن چیا ب 13 خالان رێزا هەشتێ‌ دهێت و مێڤانا وێ‌ یانەیا زانكۆیا جیهان ب19 خالان رێزا چارێ‌ دهێت، هەرچەندە ئاست و ئەنجامێن هەردو تیما د جودانە لێ‌ د كۆپایێ‌ دا هەموو هیڤیێن دهۆكییان سەركەفتنە و دەربازبوونە بۆ قۆناغا هەشتێ‌ و هزر د دەستكەڤتەكی دا دكەن، د بەرانبەر دا یانەیا زانكۆیا جیهانێ‌ چاڤێ‌ وێ‌ ل دەربازبوونێ‌ یە بۆ خولا پلا نایابا كوردستانێ‌ دبیت ئەو شەڕێ‌ د خولێ‌ دا وەكو یێ‌ كۆپایێ‌ نەبیت.
زاخۆ ل دۆ چەپەران شەڕە
ژلایەكێ‌ دووڤە رۆژا ئێكشەمبییا بهێت تیما یانەیا زاخۆ دێ‌ ل یاریگەها خوە دەلال مێڤاندارییا یانەیا ڕزگاری كەت و دەلیڤەیەكا دەربازبوونێ‌ دبیت بۆ وێ‌ نێزكتر بیت، كورێن خابووری د خولا پلا نایابا كوردستانێ‌ ل رێزا سێیێ‌ دهێن ب34 خالان ئەوا شێورانە ب37 خالان سەرێ‌ لیستێ‌ دهێن، ئانكو زاخۆ چاڤ ل سەرێ‌ لیستێ‌ یە و ب هەموو هێزا خوە دێ‌ شەڕی بۆ كەت، لێ‌ ئەو چەپەرێ‌ كۆپا كوردستانێ‌ ژی ناهێلیت و هەموو هیڤیێن وێ‌ دەربازبوونە بۆ قۆناغا هەشتێ‌ و ب گەهنە یارییا دووماهیێ‌، تیما ڕزگاری ئێك ژ یانەیێن هەڤڕكە بۆ زاخۆ و رێزێن پێشێ‌ د خولا نایابا كوردستانێ‌ دا ئەوا 26خال كۆمكرین و رێزا پێنجێ‌ دهێت.
ئاكرێ‌ دێ‌ قەرەبووكرنا خولێ‌ ب كۆپایێ‌ گوهۆڕیت
ژلایێ‌ خوەڤە تیما یانەیا ئاكرێ‌ دێ‌ ل یاریگەها خوە یانەیا كۆیە مێڤان كەت، تیما پایتەختێ‌ نەورۆزێ‌ قارەمانا وەرزێ‌ بۆری یا خولا پلا نایابا كوردستانێ‌، دیسان رێزا دویێ‌ یا كۆپایێ‌ دگەل سۆپەرا كوردستانێ‌ ب دەستڤە ئینابوو، ئانكو بۆ كۆپایا ئەڤ سالە هیچ سستاهیەكێ‌ د یاریێ‌ دا ناكەت و هەموو ئارمانجا وان سەركەفتنە تایبەت پشتی هیڤیێن پاراستنا ناسناڤێ‌ خولێ‌ لاواز بووین، د خولێ‌ دا ئاكرێ‌ ل رێزا شەشێ‌ دهێت ب كۆمكرنا 26 خالان، تیما ڕانیە ب20 خالان رێزا 12 دهێت.
ژ یاریێن دی، ئەینیێ‌، بابان- كفرە، رۆژا شەمبی، خاك- برایەتی، رۆژا ئێك شەمبی پێشمەرگەیا هەولێر- سیروانی نوو.

چاڤەڕێ‌ دهێتە كرن سوبەهی ل دەمژمێر 2:30 پشتی نیڤرۆ یاریێن گەڕا چارێ‌ كو دبیتە قۆناغا دویێ‌ یا خولا فوتسالا كچێن كوردستانێ‌ ب ئەنجامدانا چار یارییا دێ‌ هێنە كرن تیما یانەیا ئافرەتێن دهۆكێ‌ ژ كۆما ئێكێ‌ و ژ كۆما دویێ‌ دێ‌ یاریێن خوە د ناڤ ئەرد و جەماوەرێ‌ خوە دا كەن
دهۆك بۆ مسۆگەركرنا قۆناغا چارگۆشەیا زێرینە
ل هۆلا گرتییا چالاكیێن وەرزشی یا پەروەردەیا رۆژئاڤا یا دهۆكێ‌ بڕیارە تیما یانەیا ئافرەتێن دهۆكێ‌ مێڤاندارییا یانەیا چەمچەمال ژ كۆما ئێكێ‌ دا بكەت، ئافرەتێن دهۆكێ‌ ل رێزا ئێكێ‌ د هێت ب كۆمكرنا نەهـ خالان ژ سێ‌ سەركەفتنان، د یارییا قۆناغا ئێكێ‌ دا شیابوون سەركەفتنێ‌ ل سەر چەمچەمال بینن ب 3-2 گۆلان، هەتا نوكە هێرشبەرا وێ‌ سیپەل شوكر ب تۆماركرنا 14 گۆلان سەرێ‌ لیستا گۆلكەران بهێت، كچێن یانەیا چەمچەمال ل رێزا دویێ‌ دهێت ب شەش خالان، هەر دڤێ‌ كۆمێ‌ دا یانەیا رواندۆز دێ‌ بیتە مێڤانا كۆیە.
لدۆر دووماهی بەرهەڤیێن ئافرەتێن دهۆك ئاراز سالح ڕاهێنەرێ‌ تیمێ‌ بۆ رۆژنامەیا ئەڤرۆ گۆت: یارییا سوبەهی بەرانبەر چەمچەمال گەلەك یا گرنگە ژبەركو سەركەفتن دێ‌ سەرێ‌ لیستێ‌ پارێزین و دەربازبوونێ‌ مسۆگەر كەین، هەرچەندە د یارییا بۆری دا مە سەركەفتن ئینابوو لێ‌ ئەو ژی دێ‌ شەڕی كەت بۆ سەركەفتنێ‌ پێخەمەت هەڤڕكیێ‌ بۆ پلێتا دەربازبوونێ‌، یاریزانێن مە هەموو د بەرهەڤن و ڕژدین بۆ سێ‌ خالان.
زاخۆ بۆ گەشكرنا هیڤیێن دەربازبوونێ‌ یە
ژلایێ‌ تیما كچێن یانەیا زاخۆ دێ‌ ل یاریگەها خوە یانەیا ئافرەتێن دهۆكێ‌ مێڤان كەت د یارییەكا دی با زەحمەت دا، كچێن زاخۆییان د هەرسێ‌ یاریێن خوە یێن قۆناغا ئێكێ‌ ژ كۆما دویێ‌ ب وەكهەڤی ئیناینە، ل رێزا سێیێ‌ هات ب سێ‌ خالان ئەوا كچێن یانەیا سیروانی هەلەبچە ب كۆمكرنا حەفت خالان سەرێ‌ لیستێ‌ دهێت، ئافرەتێن هەولێر ب چار خالان رێزا دویێ‌ و ئافرەتێن سۆران تنێ‌ ئێك خال هەیە رێزا چارێ‌ دهێت، ئەڤ یارییە بۆ كچێن خابووری ئا گرنگە ژبۆ گەشكرنا هیڤیێن دەربازبوونێ‌، ژلایەكێ‌ دووڤە ئافرەتێن سۆران دێ‌ بنە مێڤانێن سیروانی هەلەبچە.

زنار تۆڤی:

بڕیاره‌ ئه‌ڤرۆ ب ئه‌نجامدانا یارییا دووماهییا ڤۆلی بۆلێ به‌رنامه‌یێ سالانه‌ ل سه‌ر ئاستێ په‌روه‌رده‌یێن قه‌زایان ل سنۆرێ په‌روه‌رده‌یا گشتی یا پارێزگه‌ها دهۆكێ بۆ وه‌رزێ 2024-2025ێ یێ قاره‌مانیێن په‌روه‌رده‌یان ب دووماهی بهێت ئه‌وا ژلایێ ڕێڤه‌به‌رییا چالاكیێن وه‌رزشی و دیده‌ڤانی ل پارێزگه‌ها دهۆكێ هاتینه‌ ڕێكخستن ب هه‌ڤكاری دگه‌ل رێڤه‌به‌رییا گشتیی یا په‌روەردا پارێزگەها دهۆكێ، بڕیاره‌ ئه‌ڤرۆ ب ئه‌نجامدانا یارییا دووماهیێ د ناڤبه‌را په‌روه‌رده‌یا به‌رده‌ڕه‌ش و شنگال بۆ ڤۆلیبۆلێ ل سه‌ر ئاستێ كوڕان زنجیره‌یا یاریێن ڕێكخستی ل سه‌ر ئاستێ په‌روه‌رده‌یێن قه‌زایان په‌رده‌ ل سه‌ر ڤێ چالاكیێ بهێته‌ دانان.
رێزبه‌ندییا سێ هه‌لبژارتیێن ئێكێ یێن په‌روه‌رده‌یێن قه‌زایان بڤی ره‌نگی بوون.
قارەمانییا باسکێت بۆلا کوران، دهۆک رۆژئاڤا رێزا ئێکێ، دهۆک رۆژهەلات-رێزا دویێ، بەردەرەش- رێزا سێیێ، باسکێت بۆلا 3×3 کچان، دهۆک رۆژهەلات- ئێكێ، دهۆک رۆژئاڤا- دویێ، شێخان- سێیێ، تێنسا مێزێ یا کچان، دهۆک رۆژهەلات- ئێكێ، دهۆک رۆژئاڤا- دویێ، بەردەرەش- سێیێ، تێنسا مێزێ یا کوران، دهۆک رۆژهەلات- ئێكێ، دهۆک رۆژئاڤا- دویێ و بەردەرەش یا سێیێ هات.
ل دۆر ڤێ یه‌كێ ئێحسان حه‌سه‌ن ڕێڤه‌به‌رێ چالاكیێن وه‌رزشی و دیده‌ڤانی بۆ رۆژنامه‌یا ئه‌ڤرۆ گۆت: ل دووڤ به‌رنامه‌یێ سالانه‌ یێ ڕێكخستی ل سه‌ر ئاستێ هه‌لبژارتیێ په‌روه‌رده‌یان بۆ كۆمه‌كا یاریێن وه‌رزشی یێن كوڕان و كچان هاتینه‌ كرن، بڕیاره‌ ئه‌ڤرۆ ژی یارییا دووماهیێ دناڤبه‌را په‌روه‌رده‌یا به‌رده‌ڕه‌ش و شنگال بۆ یارییا ڤۆلی بۆلێ بهێته‌ كرن كو دبنه‌ شه‌ش قاره‌مانیێن جودا، چاڤه‌ڕێ یه‌‌ ل نیسانا بهێت فه‌ستیڤالا وه‌رزێ نوو ل سه‌ر ئاستێ قه‌زایان ده‌ستپێبكه‌ن، یا گرنگ د وه‌رزێ ئه‌ڤ ساله‌ دا پێشكه‌فتنه‌كا باش ب خوه‌ڤه‌كرتییه‌ و به‌لگه‌ژی ئه‌و قاره‌مانێن وه‌رزێ بۆری ل سه‌ر ئاستێ په‌روه‌رده‌یان ئه‌ڤ ساله‌ نه‌شیان پارێزن و هنده‌ك په‌روه‌رده‌یێن دی بوونه‌ قاره‌مان، گه‌شبینن دێ هێدی وه‌رزشا قوتابخانه‌یان به‌ر ب باشتر و پێشكه‌فتنێ چێت.

شاهۆ فەرید:

راهێنەر و دادڤانێ یارییا كەراتێ عادل رەحمان ب فەرمی پلەیا خوە یا نێڤدەولەتی بلند بكەت پشتی دو باوەرنامەیێن فەرمی بۆ سیستەمێ‌ كاتا و كومێتە یێن یارییا كاراتێ‌ دەستڤە ئینایی، پشتی پشكداربوویی د دو خولێن جودا ئەوێن بۆ دو حەفتییە ل وەلاتێ ئیماراتێ هاتینە كرن.
د داخویانیەكێ دا ناڤهاتی بۆ رۆژنامەیا ئەڤرۆ گۆت: گەلەكێ دلخوەشم ئێك ژ ئەوان دادڤانێن ل سەر ئاستێ‌ جیهانێ‌ كو پشكداریا زێدەتر ژ 450 دادڤانان ببمە هەلگرێ ئەڤان دو باوەرنامەیێن نێڤدەولەتی ئەوێ، ژلایێ فێدراسیونا جیهانی یا كەراتێ هاتبوو ڕێكخستن، یا كەیفخوەشتر پشتی خول ب داویی هاتی ئێكسەر ژلایێ‌ فدراسیۆنا ناڤهاتی هاتمە داخوازكرن بۆ بڕێڤەبرنا قارەمانییەكا نێڤدەولەتی ل ئیماراتێ‌ و بوو مە جهێ‌ ڕازیبوونا هەموویان.
هەروەسان عادل رەحمان گۆت: ئێكەم باوەرنامەیا نێڤدەولەتی ل 2016ێ‌ ب دەستڤەئینابوو و ڕژدم بەردەوامیێ‌ بدەمە بلندكرنا ئاست و پلەیا خوە د ناڤا یارییا كاراتێ‌ دا، تێچوویێ پشكداریا من د ئەڤێ خول و قارەمانیێ دا مەزاختیێ تایبەت بۆ برێكا سوشالیێ هندەكا زانیین من پشكداریا كریی و دەست خوەشی ل وێرێ‌ من كرن، هەرچەندە یاریێن جەنگی بێ خودانن و یاریزانێن بچوویك دەمێ قەست دكەن مورالەكا بلند دهێت لێ ژیێ گەنجاتی دەمێ دبینیت بێ دەستكەفتە و نەشێت ژیانا خوە پێ رێڤەبەت دەستا ژیێ بەردەت، هیڤییا مە ئەوە پشتەڤانیێ‌ ل ڤێ‌ یاریێ‌ بكەن.

پەیچێ‌ فۆت مێركاتۆ یێ‌ بناڤودەنگ ل ئسپانیا سۆپرایزا ڤەگەڕیانا ستێرێ‌ پۆرتۆگالی و یانەیا نەسر یا سعۆدیێ‌ كرێستیانۆ رۆنالدۆ بۆ خولا ئسپانیا بەلاڤكرییە، ئەڤ دەنگۆباسە بوویە جهێ‌ سەرنجراكێشا یانەیا ریال مەدرید.
د ڕاپۆرتا خوە دا پەیچێ‌ ناڤهاتی دیاركر كرێستیانۆ رۆنالدۆ دگەل خودانێ‌ یانەیا ڤالنسیا بازرگانێ‌ سنگاپۆری پیتەر لیم كۆمبوویە ژبۆ كرینا پشكەكا باش یا شێرسێن-اسهم- یێن یانەیا ڤالینسا و ڕازیبوونا دەستپیكێ‌ دناڤبەرا وان دا پەیدابوویە، ئەڤچەندە هات ژبەركو رۆنالدۆ و پیتەر پەیوەندیەكا هەڤالینی یا باش دگەل هەیە و ستێرێ‌ پۆرتۆگالی حەز دكەت ژیانا وی یا مایی ل باژێرێ‌ ڤالێنسا دەرباز ببیت هەروەسان گرێبەستا وی دگەل یانەیا نەسر دێ‌ ل خزیرانا ئەڤ سالە ب دووماهی هێت، ژلایەكێ‌ دووڤە دەنگۆباس دهێنە گۆتن كو میرێ‌ سعۆدیێ‌ محەمەد بن سەلمان ژی بەرهەڤییا خوە دیاركرییە پشكەكا وێ‌ یانەیێ‌ بكرین.