ب هەلكەفتا 18 شواتێ و بۆرینا 72 سالان ل سەر دامەزراندنا ئێكەتیا قوتابی و لاوێن دیموكراتا كوردستانێ‌ چەندین چالاكیێن جودا ل سەرانسەری پارێزگەها دهۆكێ‌ هاتنە ئەنجامدان.
ب ئامادەبوونا سەربەست لەزگین، ئەندامێ مەكتەبا سیاسی یا پارتی دیموكراتی كوردستان و بەرپرسێ مەكتەبا رێكخستنێ ل پارێزگەها دهۆكێ و د. عەلی تەتەر، پارێزگارێ دهۆكێ و حەمید عەلی، جێگرێ بەرپرسێ مەكتەبا رێكخستنێ ل دهۆكێ و چەندین بەرپرسێن حزبی و حكومی و قوتابیان، دوهی 18/2/2025 ل ناڤەندا قوتابیان ل زانكۆیا دهۆكێ لقێ زانكۆ یێ ئێكەتیا قوتابیان ئاهەنگەكا هونەری یا تایبەت سازكر.
د ئاهەنگێ دا پەیڤێن بەرپرسێ لقێ زانكۆ یێ قوتابیان و هاریكارێ سەرۆكێ زانكۆیێ و بەرپرسێ مەكتەبا رێكخستنا پارتی ل پارێزگەهێ و پارێزگارێ دهۆكێ هاتنە خواندن و ئەڤ هەلكەفتە ل هەموو قوتابی و لاوان و ئەندام و لایەنگێرێن وان پیرۆزكر و رۆلێ هەردو ئێكەتیان د بزاڤا رزگاریخوازیا كوردستانێ دا بلند هەلسەنگاند، دیسا دوپاتی ل سەر خواندن و زانینێ و مۆكمكرنا هزرا نەتەوەیی و نیشتمانی ل نك قوتابیان كر و داخوازا سەركەفتنێ بۆ هەموو قوتابی و لاوان كرن.
دیسا هەر ب هەلكەفتا 18 شواتێ و بۆرینا 72 سالان ل سەر دامەزراندنا ئێكەتیا قوتابی و لاوێن دیموكراتا كوردستانێ‌ و گەهاندنا پەیاما پیرۆزباهیێ، دوهی 18/2/2025 سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ ب هەڤالینیا حەمید عەلی و خانم د. ڤیان سلێمان، هاریكارێن بەرپرسێ مەكتەبێ سەرەدانا لقێ‌ ئێكەتیا قوتابیێن كوردستانێ و ناڤەندا بالا یا لاوێن دهۆك و سێمێلێ كر و 72 سالیا دامەزراندنا ئێكەتیا قوتابیێن كوردستانێ و ئێكەتیا لاوێن دیموكراتا كوردستانێ پیرۆز كرن و هەستێ بلندێ نەتەوایەتی و نیشتیمانی یێن هەردو رێكخراوێن خەباتكەر د قووناغێن خەباتێ و بزاڤا رزگاریخوازا كوردستانێ دا بلند هەلسەنگاند و هیڤیا سەركەفتنێ و پێشكەفتنێ بۆ خواست و پشتەڤانیا مەكتەبا رێكخستنێ‌ بۆ وان دوپاتكر.
دیسا هەر ب هەلكەفتا 18 شواتێ و بۆرینا 72 سالان ل سەر دامەزراندنا ئێكەتیا قوتابی و لاوێن دیموكراتا كوردستانێ‌، ل بارزان و ئاكرێ چەندین چالاكی هاتنە ئەنجامدان و ئەڤ هەلكەفتە هاتە ساخكرن.

سالار محەمەد دۆسكی:

وەك پشتەڤانی بۆ جۆتیارێن كورد ل پارێزگەها كەركووكێ، دوهی 18/2/2025 شاندەكێ پەرلەمانتارێن كورد ژ فراكسیۆنێن جودا سەرەدانا دەڤەرێ كر و پشتەڤانیا خوە بۆ وان دیاركر.
د. خەلیل غازی دۆسكی، ژ فراكسیۆنا پارتی بۆ رۆژناما ئەڤرۆ گۆت: «ل سەر فەرمانا سەرۆك (مەسعود بارزانی) وەكو پشتەڤانی بۆ جۆتیارێن كورد ل پارێزگەها كەركووكێ، دوهی ئەم ب هەڤالنیا هەژمارەكا ئەندامێن پەرلەمانێ ئیراقێ ژ فراكسیۆنێن جودا ل گوندێ (شناغە) ل سەرگەڕان بەرهەڤ بووین، مەرەم ژ سەرەدانا مە پشتەڤانی بوو بۆ جۆتیارێن كورد ل دەڤەرێن كوردستانی».
گۆتژی: «ئەم پشەڤانیێ ل گۆتنێن سەرۆك بارزانی دكەین بۆ جۆتیارێن كورد، كو (هوون ب تنێ نینن) دیسا مەرەم ژ چوونا مە بۆ دەڤەرێ گەهاندنا پەیامەكێ بوو بۆ خەلكێ كوردستانێ و ئیراقێ، كو ب خوین و گیان دێ بەڕەڤانیێ ژ مافێن خەلكێ خوە یێن قانوونی و دستووری كەین و هەر ئالیەكێ سەرپێچیێ بكەت دێ گەهیتە سزایێ خوە یێ قانوونی».

د دو رێورەسمێن جودا دا دوهی ب بەرهەڤبوونا جێگرێ‌ پارێزگارێ‌ دهۆكێ‌ دو رێڤەبەر ل دهۆكێ‌ دەست ب كاربوون.
دوهی 18/2/2025 ب ئامادەبوونا شەمعون شلیمون ئیشۆ، جێگرێ پارێزگارێ دهۆكێ د ڕێورەسمەكی دا رزا نایف عەبدولقادر، ل شوونا د. شێرزاد حەمید، وەكو رێڤەبەرێ نوو یێ ڕێڤەبەریا چاڤدێری و گەشەپێدانا جڤاكی ب وەكالەت دەست ب كاربوو.
جێگرێ پارێزگارێ دهۆكێ د پەیڤەكێ دا دەستخوشی و سوپاسی ئاراستەی رێڤەبەرێ بەرێ كرن، بۆ وێ خزمەتا ب دلسۆزانە ئەنجامدای و پیرۆزباهی ل رێڤەبەرێ نوو كر و خواست د ئەركێ خوە دا یێ سەركەفتی بیت و پشتەڤانیا پارێزگەهێ بۆ ڕێڤەبەریێ دوپاتكر.
دیسا هەر دوهی 18/2/2025 و ب ئامادەبوونا شمعون شلیمون ئیشۆ، جێگرێ پارێزگارێ دهۆكێ د ڕێورەسمەكی دا خەلیل عەبدولغەفور، ل شوونا خانم شیلان یونس وەكو رێڤەبەرێ نوو یێ رێڤەبەریا راگەهاندن و چاپ و بەلاڤكرنێ ل پارێزگەها دهۆكێ ب وەكالەت دەست ب كاربوو، دیسا جێگرێ پارێزگارێ دهۆكێ دەستخوشی ل رێڤەبەرا بەرێ كر و پیرۆزباهی ل رێڤەبەرێ نوو كر و پشتەڤانیا پارێزگەهێ بۆ ڕێڤەبەریێ دوپاتكر.

هەولێر، قائید میرۆ:

بریكارێ وەزارەتا پەروەردەیێ ئاشكرا كر، سالانە بۆ مەها رەمەزانێ بڕیار ل دۆر كێمكرنا دەوامێ دهێتەدان و بۆ ئەڤ سالە ژی لیژنە دێ بڕیارێ ل دۆر دەوامێ‌ دەت و دبێژیت: مە داخوازكریە مامۆستایێن خانەنشین هەتا دووماهیا وەرزێ دویێ بمینن.
دكتۆر سەیوان عەلی، بریكارێ وەزارەتا پەروەردێ بۆ رۆژناما ئەڤرۆ دیاركر، زێدەتری پینج هزار و 500 مامۆستا دێ خانەنشین بن، ئەڤە ژی دێ ڤالاهیێ د كەرتێ پەروەردێ دا چێكەت و گۆت: «ئەم نوكە نەشێین جهێ وان تژی بكەین، چونكی هەموو جۆرێن دامەزراندنێ هاتینە راگرتن، بەلێ مە داخواز ژ سەرۆكایەتیا جڤاتا وەزیران كریە، مامۆستایێن خانەنشین هەتا دوماهیا سالا خواندنی بەردەوامیێ بدەنە ئەركێ خۆ، بەرانبەر ژی ژ لایێ حوكمەتا هەرێما كوردستانێ ڤە بهێنە پاداشتكرن و قەرەبووكرن».
ل دۆر كێمكرنا دەواما قوتابخانان د مەها رەمەزان دا دكتۆر سەیوان گۆت: «سالانە بڕیار ل دۆر دەواما مەها رەمەزانێ دهێتەدان، ئەڤ سالە هەتا نوكە چو بڕیار نینن، بەلێ لیژنەیەك هەیە و ئەز باوەرم نێزیكی مەها رەمەزانێ ببین، بڕیار ل دۆر كێمكرن و چاوانیا دەوامێ ل مەها پیرۆزا رەمەزانێ دێ هێتەدان».

ئامێدیێ، مەحمود نهێلی:

ژ ئەگەرێ شەڕێ بەردەوامێ د ناڤبەرا لەشكرێ و توركیا و چەكدارێن پەكەكێ دا ، دوهی 18/2/2025 درۆنەكا TNT كری ب بانێ مالا وەلاتیەكێ ئاكنجیێ گوندێ سەرگەلێ یێ سەر ب ناوچەدارییا دێرەلۆكێ‌ كەفت.
شێروان سەدیق، خەلكێ گوندێ سەرگەلێ بۆ رۆژناما ئەڤرۆ دیار كر، ئەڤ درۆنە یا تژی بزمار و تی ئێن تی بوو، ب بانێ مالەكێ‌ كەفت، لێ‌ نەپەقی و گۆت: «هەكە پەقی بایە، دا كارەسات ژێ‌ دروست بن، ژ بەر كو دەمێ ئەو درۆن كەفتی زاۆكێن وێ مالێ ل بن وی چینكۆی دخواند یێ درۆن ل سەر كەفتی».
گۆتژی: «ناهێتە زانین ئەڤ درۆنە ژ ئالایێ كێڤە هاتیە بلندكرن و ئاراستە كرن، لێ دیارە ژ ئەگەرێ ڤی شەڕێ بەردەوامێ د ناڤبەرا پەكەكێ و توركیا دا ل دەڤەرێ، وەلاتی رۆژانە تووشی شەڕی و نەخوەشیان دبن، لەو داخوازێ‌ ژ لایەنێن پەیوەندار دكەین، چارەكێ‌ ل مە بكەن، هەكە ب ڤی رەنگی بیت دێ گوند هێتە چۆلكرن».