بەرپرسەکێ کورد ل رۆژئاڤایێ کوردستانێ دیار کریە، بەری کو هەسەدە بهێتە هلوەشاندن دێ پارتەکا نوو یا سیاسی ل رۆژئاڤایێ کوردستانێ و سووریێ هێتە راگەهاندن و دێ پەیەدە و تەڤدەم ژی پاشی هێنە  هلوەشاندن و دێ قووناغەکا نوو ل سووریێ دەستپێکەت.

بەرپرسەکێ کورد ل سووریێ کو نەخواستیە ناڤێ وی بهێتە ئاشکرا کرن بۆ ئاژانسا میزۆپۆتامیا دیار کریە، وەکو پشکەک ژ قووناغا ئاشتیێ یا ل تورکیا ل سووریێ ژی دێ گوهۆڕینێن مەزن روو دەن، راستە دەمەکە بەحسێ هلوەشاندنا هێزێن سووریا دیموکرات و رێڤەبەریا خوەسەر دهێتە کرن، لێ بەری کو ئەو هەر دو ب فەرمی بهێنە هلوەشاندن دێ پارتەکا نوو یا سیاسی هێتە راگەهاندن و گۆت: (دەمەکە کار بۆ ئاڤاکرنا وێ پارتا سیاسی دهێتە کرن، لێ پارتا نوو یا سیاسی وەکو پەیەدێ و تەڤدەمێ نابیت، بەلکو دێ پارتا نوو پارتەکا سووری بیت، ئانکۆ دێ ل هەموو سووریێ خەباتێ کەت و تنێ پارتەکا کوردی نابیت و ژ بلی کوردان دێ عەرەب و پێکهاتەیێن دی یێن سووریێ ژی د ناڤ پارتا نوو دا جهێ خوە گرن، ئانکۆ دێ پارتا هەموو خەلکێن سووریێ بیت، لێ دێ گرانی کورد بن).
سەبارەت ب پەیەدێ و تەڤدەمێ ژی وی بەرپرسی دیار کریە، بێگومان پشتی کو پارتا نوو بهێتە راگەهاندن ئێدی پێدڤی ب مانا پەیەدێ و تەڤدەمێ نابیت و دێ هەر دو هێزێن سیاسی ژی هێنە هلوەشاندن، ل گۆر رێککەفتنا ل گەل شامێ دڤێت هەموو سازیێن بەری نها نەمینن و ل گۆر قووناغا نوو یا ل سووریێ کار بهێتە کرن، ژ بەر ڤێ یەکێ ژی بێگومان دێ پەیەدە و تەڤدەم ژی هێنە هلوەشاندن و گۆت: (بەری نها سەبارەت ب سازیێن سەر ب رێڤەبەریا خوەسەر گەلەک دانوستاندن هاتینە کرن، سازیێن سەر ب رێڤەبەریا خوەسەر دێ بنە پشکەک ژ سازیێن دەولەتێ، ژ خوە هەتا نها گەلەک ژ هێزێن سووریا دیموکرات بووینە پشکەک ژ وەزارەتا بەرگریێ و هێزێن ئاسایشێ ژی بووینە پشکەک ژ وەزارەتا ناڤخوە، دێ وەسا سازیێن دی ژی بنە پشکەک ژ وەزارەتێن سووریێ و دێ وەسا خزمەتا خەلکی کەن).
هەمان بەرپرسێ کورد ل سووریێ ئەو یەک ژی دیار کریە، پشتی کو قووناغا ئینتیگراسیۆنێ تەمام بیت و پارتا نوو ژی بهێتە راگەهاندن بێگومان دێ ب پشکداریان کوردان کار بۆ ئامادەکرنا دستوورەک نوو ل سووریێ هێتە کرن، بەرپرسێن شامێ ژی سۆز داینە کو دێ د دستوورێ نوو دا هەبوونا گەلێ کورد ل سووریێ ب فەرمی هێتە قەبوول کرن و هەروەسا دێ گەلەک داخوازیێن کوردان ژی د دستوورێ نوو دا هێنە بجهکرن، ئەو یەک ژی دێ بیتە دەستپێکەکا نوو بۆ چارەسەریا پرسا کوردی و پرسێن دی یێن ل سووریێ و نها کارێن گەلەک باش ژی دهێنە کرن.
سەبارەت ب ئامادەکاریێن ل رۆژئاڤایێ کوردستانێ بۆ قووناغا نوو ژی وی بەرپرسی دیار کریە، دەمەکە د ئاستێ پەیەدێ و تەڤدەمێ گەلەک کۆمبوون هاتینە کرن، دا رەوش بۆ ئەندامێن وان هێزێن سیاسی بهێتە ئاشکرا کرن، چونکی بابەت وەسا ساناهی نینە، راستە دێ هێزێن سووریا دیموکرات و رێڤەبەریا خوەسەر و پەیەدە هێنە هلوەشاندن، لێ ئەو یەک رامانا هندێ نادەت دێ خەباتا وان هێتە راگرتن، بەلکو دێ د چارچۆڤەیەکێ نوو دا بەردەوامیێ دەنە خەباتا خوە، ئانکۆ دێ ل گۆر رەوشا نوو یا ل سووریێ ئەو ژی بەردەوامیێ دەنە خەباتێن خوە، پارتا نوو کو بهێتە راگەهاندن نە تنێ ل دەڤەرێن کوردی بەلکو دێ ل هەموو سووریێ کار کەت و ئەندامێن پەیەدێ و تەڤدەمێ ژی دێ د ناڤ پارتا نوو دا کار کەن.
ئەو یەک د دەمەکێ دایە کو بەری نها چەندین جاران بەرپرسێن سووریێ و رۆژئاڤایێ کوردستانێ د داخویانیێن جودا جودا دا ئاماژە ب ڤێ یەکێ کربوون کو دێ رێڤەبەریا خوەسەر و هێزێن سووریا دیموکرات ل سووریێ هێنە هلوەشاندن و هەموو سازیێن رێڤەبەریا خوەسەر ژی د چارچۆڤەیێ رێککەفتنا نوو یا ل گەل شامێ دا دێ بنە پشکەک ژ وەزارەت و سازیێن فەرمی یێن دەولەتا سووریێ و دێ کارێن خوە ل رۆژئاڤایێ کوردستانێ ژی وەسا بەردەوام کەن.
ل ئالیێ دی بەری نها گەلەک ژ چاڤدێرێن سیاسی و کەسایەتێن رۆژئاڤایێ کوردستانێ ژی دیار کربوون، دڤێت هەموو مافێن گەلێ کورد د دستوورێ نوو یێ سووریێ دا بهێنە گەرەنتیکرن، هەتا کورد ل سووریێ نەگەهنە مافێن خوە نابیت رێڤەبەریا خوەسەر و هێزێن سووریا دیموکرات هێنە هلوەشاندن، دڤێت هەموو دەستکەفتیێن گەلێ کورد ل سووریێ کو بەرهەمی خوونا ب هزاران شەهیدانە بهێنە پاراستن و هەر رێککەفتنەک ژی ل گەل شامێ بهێتە کرن دڤێت نەبیتە مەترسی ل سەر دەستکەفتیێن گەلێ کورد ل سووریێ.

سەرۆک کۆمارێ ئیرانێ مەسعود پزشیکیان د داخویانیەکێ دا بۆ دەزگەهێن راگەهاندنا ئیرانێ دیار کر، نها رەوشا ئابووری یا ئیرانێ گەلەک خرابە، ژ بەر ڤێ یەکێ ژی دڤێت هەموو سازیێن دەولەتێ ل گۆر رەوشا هەی بزاڤێ بکەن و گۆت: (ژ بەر شەڕی گەلەک کارگەهێن مەزن یێن ئیرانێ ژناڤ چووینە و هەروەسا نها دۆرپێچەکا گەلەک مەزن ل سەر ئیرانێ هەیە و گەلەک کەلوپەل ناهێنە ئیرانێ و ئیران نەشێت پەترۆلا خوە بفرۆشیت و داهاتێ ئیرانێ گەلەک کێم بوویە و ژ بەر ڤێ یەکێ ژی نها ئیران د رەوشەکا گەلەک خراب یا ئابووری دایە).
سەرۆک کۆمارێ ئیرانێ ئەو یەک ژی دیار کر، ژ بۆ باشکرنا رەوشا ئابووری دڤێت هەموو ئالی یا پێدڤی بکەن، وان دڤێت ل گەل ئەمریکا ب رێیا دانوستاندنان هەموو پرسێن هەی چارەسەر بکەن، لێ مخابن ئەمریکا ژی د دانوستاندنان دا یا جدی نینە و ترامپ هەر جارێ تشتەکێ دبێژیت و ژ بەر ڤێ یەکێ ژی دانوستاندنێن ل گەل ئەمریکا ژی هەتا نها چو ئەنجامێن خوە نەبووینە.
سەبارەت ب هەلوەستێ ترامپی کو بەری دو رۆژان دیار کربوو دەرتەنگا هورمزێ دێ بیتە پشکەک ژ ئاخا ئەمریکا ژی سەرۆک کۆمارێ ئیرانێ دیار کر، دەرتەنگا هورمزێ پشکەکە ژ ئاخا ئیرانێ و نها ژی ل ژێر کۆنترۆلا ئیرانێ دایە و دێ هەردەم ژی د دەستێ ئیرانێ دا بیت.