نەوزاد زادە
یا خۆیایە كو حەز، ڤیان و بۆچوونا گەلان د وەلاتێن دیموكراسی دا گرنگترین و بهێزترین بنەمایێ دەستهەلاتێن سیاسی یە. ل ڤان وەلاتان، بۆچوون و ئیرادەیا خەلكی ب رێیا هەلبژارتنان بەردەوام دهێتە دەربڕین و ب ئەنجامێ دەنگدانێ، حزب یان لایەنێ سەركەفتی مافێ پێكئینانا حوكمەتێ وەرگرتیە. ڕاستییەكا دیار و بەرچاڤە كو، هەر ل پشتی سەرهەلدانا گەلێ كوردستانێ ل بهارا سالا 1991، رێزدار جەنابێ سەرۆك بارزانی ئێكەم كەس بوو كو داخوازا ئەنجامدانا هەلبژارتنان ل هەرێما كوردستانێ كر، داكو ب ئیرادە و دەنگێن خەلكی حوكمەتەكا خۆدان شەرعیەت بهێتە دامەزراندن. لەوما، ل رێكەفتی 19/5/1992 ئێكەم هەلبژارتنا پەرلەمانێ كوردستانێ هاتە ئەنجامدان. ئەڤ هەلبژارتنە بۆ خۆی گەنگەشەیەكا سیاسی یا گرنگ بوو، ب تایبەت د ناڤ دەڤەرەكا وەكو رۆژهەلاتا ناڤین دا، كو دیموكراسی و هەلبژارتن هێشتا نەببوونە كولتۆرەكێ سیاسی. هەر ژ وێ دەمێ هەتا نوكە، چەندین هەلبژارتن هاتینە ئەنجامدان، و پشتی هەر هەلبژارتنێ، حوكمەت ب پێی ئەنجامان هاتیە پێكئینان.
دووماهیك هەلبژارتنا پەرلەمانێ كوردستانێ ل رێكەفتی 20/10/2024 هاتە ئەنجامدان. هەرچەندە پشتی ئەنجامدانا هەلبژارتنان، دانوستاندنێن درێژ د ناڤبەرا حزب و لایەنێن كوردستانی، ب تایبەت ل ناڤبەرا پارتی و ئێكەتی، بۆ پێكئینانا كابینەیا نوی هاتنە ئەنجامدان، لێ ئەو دانوستاندن نەگەهشتنە ئەنجامەكێ باش. لەوما، نێزیكی دو سالان ل سەر هەلبژارتنان دەرباز بوون، بەلێ هێشتا پەرلەمان دەست ب كار نەكریە و كابینەیا نوی یا حوكمەتا هەرێما كوردستانێ ژی نەهاتیە پێكئینان. ئەڤ بارودۆخە بوویە ئەگەرێ دلگرانی و نیگەرانیەكا مەزن ل دەڤ خەلكێ كوردستانێ، هەروەسا ل دەڤ دۆست و هەڤپەیمانێن هەرێمی و نێڤدەولەتی، و كاریگەریا خۆ ژی ل سەر ناڤودەنگ و پێگەی هەرێما كوردستانێ هەبوویە.
لەوما، ب بۆچوونا مە، پێدڤیە هەمی هێز و لایەنێن سیاسی بەرپرسیارییا نەتەوەیی و نیشتمانی بگرنە سەر خۆ، هەول و بزاڤێن خۆ زێدەتر بكەن و ب زووتری كابینەیا 10 یا حوكمەتا هەرێما كوردستانێ پێك بینن. چونكو دامەزراندنا حوكمەتەكا نوو، نە تەنێ بۆ كاراكرنا دامەزراوە دەستورییان گرنگە، بەلكو دێ شێت خزمەتگوزارییان باشتر بكەت، چارەسەریا قەیران و كێشەیێن هەرێمێ بكەت و بەرسڤا داخوازی و پێداویستیێن هەڤوەلاتیان بدەت.
هەروەسا، كاڕاكرنا پەرلەمانێ و پێكئینانا كابینەیا نوی دێ ببیتە ئەگەرێ بهێزتركرنا پێگەی هەرێما كوردستانێ هەنبەری بەغدا و دێ ئێك هەلوەست و ئێكرێزی زێدەتر ل پرسێن نەتەوەیی، دەستووری و نیشتمانی دا پەیدا كەت، كو بەرژەوەندیێن هەرێم و گەلێ كوردستانێ باشتر دێ پارێزیت.
ل دوماهیێ، دبێژین هەمی حزب و لایەنێن هەرێما كوردستانێ پێدڤیە بەرژەوەندیێن گشتی ل سەر هەر بەرژەوەندیەكا تایبەتی حزبی دانێن، ئێكرێز و ئێك هەلوەست بن، داكو د ڤان گوهۆڕینێن هەستیارێن رۆژهەلاتا ناڤین دا، قەوارەیا هەرێما كوردستانێ، ماف و دەستكەفتێن گەلێ كوردستانێ ب باشترین شێوە بهێنە پاراستن و حوكمەت بشێت ڤان قەیرانا ب باشترین شێوە چارەسەبكەت.ئەویێن ب ئەگەرێ ئالۆزی و شەرێ ئەمریكا و ئیرانێ دروست بووی كو كارگەریێن ڤان كاودانێن شەڕی كارتێكرن ل سەر هەمی جیهانێ هەبوویە.
