NO IORG
هه‌لبژارتى1

ئەڤرۆ نیوز، بارزان مزووری:
رێڤەبەرێ سەخبێری و پاراستنا رێک و پران ل پارێزگەھا دھۆکێ بۆ ئەڤرۆ نیوز دیار کر، ل دووڤ پلانا ھاتیە دارێژتن بۆ دوبارە نووژەنکرنا رێیێن پارێزگەھا دھۆکێ و یێن گوندێن سەر ب پارێزگەھێ ڤە، وان پێدڤی ب ١٠٠ ملیار دیناران ھەیە.
ئەندازیار دێولی حەمێ بریندار، رێڤەبەرێ سەخبێری و پاراستنا رێک و پران ل پارێزگەھا دھۆکێ خویا کر، ب درێژاھیا زێدەتری دو ھزار کیلۆمەتران رێ ل سنوورێ پارێزگەھا دھۆکێ پێدڤی ب نووژەنکرنێ نە و گۆت: “ئەم چاڤەڕێینە کانێ چەند بودجە بۆ نووژەنکرنا رێیێن پارێزگەھا دھۆکێ دێ ھێتە مەزاختن، ئەم ل دووڤ وێ بودجێ دێ ھێتە دەستنیشانکرن دێ شێین دەست ب نووژەنکرن و سەخبێریکرنا رێیێن پارێزگەھێ کەین و دووماھی رێ دێ یێن گوندان بن”.
ناڤھاتی گۆتژی: “ژ لایێ حوکمەتا بەغداڤە چو بۆ سەخبێریا رێک و پرێن پارێزگەھا دھۆکێ نەھاتیە کرن، ژ بەرکو رێیا سەرەکیا شێخان بۆ بەدریکێ د ناڤبەرا ھەردو ئیداران دایە، مە ڤەدیتن بۆ کریە کو ئەڤ رێیە دوبارە بھێتە دروستکرن”.
ئەندازیار دێولی حەمێ ئاشکرا کر، ئەڤە شەش سالە ژ بەر قەیرانا دارایی یا ب سەر ھەرێما کوردستانێ دا ھاتی سەخبێریەکا دروست بۆ رێیێن پارێزگەھا دھۆکێ نەھاتیە کرن، ژ بەرکو پلان و بودجە و پارێ گەشەپێدانا پارێزگەھان نەبوون، ب تنێ سەخبێریەکا بلەز و سڤک بۆ رێیێن سەرەکی دھاتە کرن، ژ بەرکو ھەکە پێنج سالا چ سەخبێریێن دروست بۆ رێیا نەھێنە کرن ئەڤ رێیە ب تمامی دێ ژ کارکەڤن.

ئەڤرۆ نيوز:

سەربەست تروانشی، ئەندامی ئەنجومەنێ سەرکردایەتیا پارتی و بەرپرسێ لقا ئێک ب ئامادەبوونا بەرپرسێ نڤێسینگەھا شەھیدان – لقا ئێک، ل سنوورێ لژنا ناوچا شورەش دگەل ژمارەکا مالباتێن شەھیدان کۆمبوون.

د ڤێ کۆمبوونێ دا سەربەست تروانشی، ئەندامی ئەنجومەنێ سەرکردایەتیا پارتی و بەرپرسێ لقا ئێک پیرۆزباھیێن ھەیڤا رەمەزانێ ل وان کرن و گۆت: “دایکێن شەھیدان ئەم فێری وانێنن ژیانێ کرین و گەلەک عەگید و مێرخاس پەروەردەکرن بۆ بەرەڤانیکرنێ ژ ئاخ و کەرامەتا مرۆڤێ کوردستانێ، ئەڤرۆ سەرێ ھەوە وەکو دایک و خێزان و کور و کچێن شەھیدان ھندی چیایێن کوردستانێ د بلندن، ئەڤ ھاریکاریێن ئەم پێشکێشی ھەوە دکەین ل دووڤ بەرنامە و پلانێن جەنابێ سەرۆک بارزانی نە بۆ خوەشکرنا ژیانا مالباتێن شەھیدان و سۆزێ د دەین بەردەوام بین بۆ خزمەتکرنا ھەوەیێن ھێژا و قەدر گران”.

ژ ئالیێ خوە ڤە مالباتێن شەھیدان ژی سوپاسیا بەرپرسێ لقێ کر بۆ ڤێ بەرێخودانا وی بۆ ژیارا وان.

ھەژی گۆتنێ یە کو د دڕێژاھیا بەرنامێ لقا ئێک پارتی دیموکراتی کوردستان بۆ خزمەتکرنا ئیماندار و رۆژیگرێن پارێزگەھا دھۆکێ و سێمێلێ (سەربەست تڕوانشی) ئەندامێ ئەنجومەنێ سەرکردایەتیا پارتی و بەرپرسێ لقا ئێک دگەل رۆژیگرێن ھەر ئێک ژ مزگەفتا (قازی محەمەد) ل تاخێ رەزا و مزگەفتا (کوردستان) ل تاخێ سەرھلدان و مزگەفتا (نزارکێ) ل تاخێ نزارکێ ل بەربانگێ فتارێ بەرھەڤ بۆ و شریناھی و پێدڤیێن بەربانگی بەرھەڤ کربوون.

ئه‌ڤرۆ نيوز:

بڕياره‌ ئه‌ڤرۆ رۆژا دوشه‌مبى 20ى گۆلانا 2019ێ عادل عه‌بدولمه‌هدى، سه‌رۆك وه‌زيرێن عيراقێ ل گه‌ل سه‌رۆك فراكسيۆنێن كوردستانى ل جڤاتا نوونه‌رێن عيراقێ كۆم بيت و كۆمبوون ژى ل سه‌ر داخوازيا “عادل عه‌بدولمه‌هدى” يه‌.

ب گۆره‌ى پێزانينێن ئه‌ڤرۆ نيوز ئه‌ڤ كۆمبوونه‌ ل سه‌ر داخوازيا عادل عه‌بدولمه‌هدى يه‌ و دێ چه‌ند ته‌وه‌ران ب خوه‌ ڤه‌گريت و زێده‌تر ژى گرێداى ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ نه‌ وه‌كو سۆتنا گه‌نمێ جۆتياران ژ لايێ چه‌كدارێن داعش و لڤينێن وان و روودانێن په‌لكانه‌ و داگيركرنا ئه‌ردێ جۆتيارێن كورد بيت.

هه‌رديسا دێ به‌حس ل مه‌زاختنا پارێ گه‌نمێ جۆتيارێن هه‌رێما كوردستانێ ژى هێته‌ كرن و دهێته‌ پێشبينكرن چه‌ند بابه‌تێن دژى بهێنه‌ گه‌نگه‌شه‌كرن.

ئەڤرۆ نیوز:
فه‌رهاد ئه‌مین ئه‌ترووشى پارێزگه‌رێ دهوكێ ئەڤرۆ پێشوازیا (ئه‌حمه‌د ئه‌لزاهرى) قونسلێ ده‌وله‌تا ئیمارات ل هه‌رێما كوردستانێ وشاندێ دگه‌لدا كر.
دهه‌ڤدیتنه‌كێدا ب ئاماده‌بونا ئیسماعیل محەمەد ئەحمەد هاریكارێ پارێزگه‌رى بو كاروبارێن مروڤایه‌تى به‌حسێ په‌یوه‌ندیێن دوو قولى دناڤبه‌را ده‌وله‌تا ئیمارات وهه‌رێما كوردستانێ وره‌وشا ئاواره‌ وپه‌نابه‌ران ل سنورێ پارێزگه‌ها دهوكێ وئه‌و هاریكاریێن پارێزگه‌ها دهوكێ ورێكخراوێن ده‌وله‌تى پێشكێشدكه‌ن تایبه‌تى هاریكاریێن ده‌وله‌تا ئیمارات هاته‌ كرن.
قونسلێ ئیمارات ته‌كه‌زكر كو هه‌رێما كوردستانێ جهه‌كێ گرنگه‌ بو ده‌وله‌تا ئیمارات وكومپانیێن وه‌لاتێ وان ژ بو بجهئینانا پروژێن وه‌به‌رهێنانێ وگه‌شت وگوزارێ وده‌وله‌تا ئیمارات روژبو روژێ دێ په‌یوه‌ندیێن خو دگه‌ل هه‌رێمێ پێشئێخیت ودهه‌موو بیاڤه‌كیدا وبه‌رده‌وام دێ هاریكاریێن مروڤایه‌تى پێشكێشى ئاواره‌ وپه‌نابه‌ران ل هه‌رێمێ ب گشتى ول پارێزگه‌ها دهوكێ ب تایبه‌تى كه‌ت .
ژلایێ خوڤه‌ پارێزگه‌رێ دهوكێ پیروزباهى ل قونسلێ ده‌وله‌تا ئیمارات كر هه‌مبه‌ر ده‌ست ب كاربونا وى وداخازا سه‌ركه‌فتنێ بو كر وسوپاسیا ده‌وله‌تا ئیمارات وبالیوزخانه‌ وكونسلخانا وى وه‌لاتى كر ل دور ئه‌و هاریكاریێن مروڤایه‌تى یێن بو هه‌رێمێ پێشكێشدكه‌ن ، وخواست كو تێكهه‌لى دناڤبه‌را هه‌ردوو ئالیان دا روژ بو روژێ خوتر لێ بهێن بو خزمه‌تكرنا خه‌لكێ هه‌ردوو وه‌لاتان .
هه‌ژى گوتنێ یه‌ دوهى 19-5-2019وب ئاماده‌بونا قونسلێ ده‌وله‌تا ئیمارات وب هه‌ڤكارى دگه‌ل بوردێ كاروبارێن مروڤایه‌تى هاریكاریێن مروڤایه‌تى ل سه‌ر 860 خێزانا ل قه‌زا شێخان و78خێزانا ل كه‌مپا گه‌رماوا و260خێزانا ل كه‌مپا ئاكرێ هاتینه‌ به‌لافكرن وبریاره‌ ئه‌ڤرو 20-5-2019 كومه‌كا دى یا هاریكاریێن مروڤایه‌تى یێن وى وه‌لاتى ل سه‌ر 1894خێزانا ل ناڤ كه‌مپا دومیز دوو و 1592خێزانێن دن ل كه‌مپا گه‌ویلان بهێنه‌ به‌لافكرن.
هه‌روه‌سا بریاره‌ ل روژێن بهێت هاریكاریێن ده‌وله‌تا ئیمارات كو ئه‌وژى (5525) سه‌لكێن ئاهێن خارنێ نه‌ ل سه‌ر رونشتڤانێن كه‌مپا دومیز ئێك بهێنه‌ به‌لافكرن.

3-٣

ئەڤرۆ نیوز، قائید میرۆ:

بەرپرسەکێ پارتی دیموکراتی کوردستان ل مووسل ئاشکرا کر، ھەتا نوکە زێدەتری حەفت سەد ھزار دەنگدەرێن پارێزگەھا نەینەوا پشکداری د پڕۆسا بایۆمەتریێ دا کریە و دبێژیت: پتریا پشکداران دکەڤنە سنوورێ دەڤەرێن کوردستانی.

مەناف حەسەن، بەرپرسێ نڤیسینگەھا ھەلبژارتنێن پارتی ل مووسل بۆ ئەڤرۆ نیوز گۆت: “پڕۆسا بایۆمەتریا دەنگدەران ل سنوورێ پارێزگەھا نەینەوا یا بەردەوامە و پەیوەندی ب چارەنڤیسێ دەنگدەرانڤە ھەیە بۆ ھەلبژارتنێن داھاتی، ئانکو ھەر کەسەکێ بخوازیت ل ھەلبژارتنێن داھاتی پشکداریێ بکەت، پێدڤیە پشکداریێ د بایۆمەتریێ دا بکەت و ببیتە خوەدیێ کارتا دەنگدانێ، ل سنوورێ پارێزگەھا نەینەوا ھەتا رۆژا ١٢ی ئایارا سالا بۆری ٣٢٠ ھزار کەسان پشکداری د بایۆمەتریێ دا کربوو، بەلێ د دووڤ دا قووناغەکا دی دەستپێکریە و نوکە یا بەردەوامە”.

مەناف حەسەن دیار کر، د قووناغا دویێ یا بایۆمەتریێ دا کو پشتی ھەلبژارتنێن سالا بۆریا پەرلەمانێ عیراقێ دەستپێکریە ٤٠٠ ھزار کەسێن دیژی پشکداری کریە و گۆت: “ھەتا نوکە زێدەتری ٧٠٠ ھزار دەنگدەران پشکداری کریە، ئەڤا بۆ مە گرنگ ئەڤەیە پتریا کەسێن پشکداری د بایۆمەتریێ دا کری دکەڤنە سنوورێن دەڤەرێن مادێ ١٤٠ یێ دستوورێ عیراقێ و کوردن، بەلێ مخابن ھندەک ژ وان دەڤەران ل بن کۆنتڕۆلا حوکمەتا عیراقێ نە و دبن دەستھەلاتا ھەرێما کوردستانێ دا نینن”.

ئەڤرۆ نیوز، لەزگین جوقی:
ئەندامەکا پەرلەمانێ کوردستانێ بۆ رۆژناما ئەڤرۆ دیار کر کو فراکسیۆنا پارتی دیموکراتی کوردستان پرۆژەقانوونەک د بەرژوەندیا قوربانیێن کارەساتا شنگالێ دا پێشکێشی پەرلەمانێ کوردستانێ کر و تێدا قەرەبووکرنا کەسوکارێن قوربانیێن کارەساتا شنگالێ دھێتە کرن.
ھەدیە موراد حەیدەر، ئەنداما پەرلەمانێ کوردستانێ ئاشکرا کر، ئەو تەڤکوژیا د راستا ئێزدیان دا ل ٣/٨/٢٠١٤ێ ل قەزا شنگالێ ھاتیە کرن ل سەر دەستێن رێکخراوا تیرۆرستیا داعش، تاوانەکا دژی مرۆڤایەتیێ بوو و ب ھەموو واتا جینوسایدە و پێدڤیە حوکمەتا عیراقێ وێ بەرپرسیارەتیێ وەربگریت و ھەموو کەسوکارێن قوربانیان قەرەبوو بکەت و دەڤەرێن وان ئاڤەدان بکەت، دیسا ھەموو قوربانیێن ڤێ تاوانا مەزن ب شەھید بھێنە ھژمارتن و مامەلە د گەل دا بھێتە کرن و ھەموو ماف و ئیمتازاتێن کەسوکارێن شەھید و ئەنفالکریان پێ بھێنە دان، دیسا پێدڤیە وەزارەتا کاروبارێن شەھید و ئەنفالکریان ل ھەرێما کوردستانێ ژی رێنمایێن پێدڤی دەربێخیت بۆ ب جھئینانا ڤان بڕیاران.
وێ ئەنداما پەرلەمانێ کوردستانێ ئاماژە ب وێ چەندێ ژی کر کو ئەڤ پرۆژێ فراکسیۆنا پارتی ل پەرلەمانێ کوردستانێ گەلەک یێ گرنگە و ب ئیمزایێن پەرلەمانتاران پرۆژە بۆ پەرلەمانی ھاتیە رەوانەکرن و دێ کار ل سەر ھێتە کرن و گۆت: “ب ھەموو شیانێن خوە ڤە دێ پشتەڤانیێ ل پرۆژەی کەین د ناڤ ھەموو فراکسیۆنێن پەرلەمانی دا بۆ ب دەستڤەئینانا پشتەڤانیا ھەموویان، داکو بکەڤیتە د وارێ ب جھئینانێ دا”.

ئەڤرۆ نیوز، ئەمیر ئەترووشی:

بەرپرسێ سامانێ ئاژەلێ ماسیان ل رێڤەبەریا گشتیا چاندنا دھۆکێ راگەھاند، کیلۆیا ماسیێ ل پارێزگەھا دھۆکێ بەری نھا ب پێنچ ھزار دیناران بوویە و ئەڤە چەند رۆژەکە بۆھایێ ئێک کیلۆیا ماسیێ ب ٩ ھزار دینارنە و ئەڤێ ژی سێ ئەگەر ھەنە.

شوکری عومەر، بەرپرسێ سامانێ ئاژەلێ ماسیان ل رێڤەبەریا گشتیا چاندنا دھۆکێ تایبەت بۆ ئەڤرۆ دیار کر کو گرانبوونا بھایێ ماسیێ چو پەیوەندی ب ھەیڤا رەمەزانێ ڤە نینە و سێ ئەگەر ھەنە، ئێک ژ وان ئەوە ئەڤە دەمێ دو ھەیڤانە بریار ھاتیە دان ماسیا ھاوردە ژ دەرڤەی وەلاتی نەھێت و ئەڤێ چەندێ ژی کارتێکرنەکا مەزن ل سەر کێمبوونا ماسیێ و گرانبوونا بھایێ ماسیێ کریە.

ناڤھاتی ئاماژە دا وێ چەندێ کو ئەگەرێ دویێ ئەوە کو ئەڤە چەند رۆژەکە رێیا ئینانا ماسیا ژ باشوورێ عیراقێ ھاتیە گرتن، ژ بەر ھەبوونا نەخۆشیا ئەلکو ڤایرۆس یا ماسیان، داکو ئەو نەخۆشیە ل دھۆکێ بەربەلاڤتر لێ نەھێت.

شوکری عومەر، بەرپرسێ سامانێ ئاژەلی ئەگەرێ سیێ یێ گرانبوونا بھایێ ماسیێ بۆ خەرزێ ماسیان ڤەگەراندن، چونکو نوکە نێچیرا وان ھاتیە قەدەغەکرن ھەتا ١٤ ھەیڤا ٦ و گۆت ژی: رەنگە د دەمێ ١٠ رۆژێن بھێت دا قەیرانا ماسیان ب دووماھی بھێت و جارەکا دی ماسی بەرمشە ببیت و بھایێ وان دابەزیتەڤە.

ژ ئالیێ خوە ڤە سیروان سەعید، رێڤەبەرێ سامانێ ئاژەلێ ماسیان ل وەزارتا چاندنا ھەرێما کوردستانێ بۆ ئەڤرۆ نیوز دیار کر کو ھەیڤانە نێزیکی ١٥٤٠ تەنێن ماسیان بۆ ھەرێما کوردستانێ دھاتنە ھاوردەکرن و ژ وان ژی ٢١٦ تەن بۆ پارێزگەھا دھۆکێ بوون.

ئەڤرۆ نیوز:

پشتی ل ناڤەڕاستا ھەیڤا بۆری، چار گۆڕێن ب کۆم ل سنوورێ پارێزگەھا سەماوە ھاتینە دیتن، شاندەکێ وەزارەتا شەھید و ئەنفالکریان یا حوکمەتا ھەرێما کوردستانێ بۆ کۆلانا گۆرێن زێدەتر یێن ئەنفالکریان سەرەدانا پارێزگەھا سەماوە کر.

نەبیل کامل، رێڤەبەرێ چاڤدێریا پارێزگەھا سەماوە ل دۆر سەرەدانا شاندێ ھەرێمێ بۆ پارێزگەھا ناڤھاتی دیار کر کو وان پەیوەندیێن بەردەوام ل گەل ھەرێما کوردستانێ ھەنە و ڤەکۆلینێن باش ل دۆر گۆڕێن ب کۆم دھێنەکرن و پرۆسا ڤەگەڕاندنێ ژی یا بەردەوامە و بۆ کوردستان ٢٤ گۆت: “مە ھندەک پێزانینێن پشتراستکری ھەنە کو ھەتا نوکە سێ گۆڕێن ب کۆم ل سنوورێ سەماوە ھەنە و نەھاتینە دیتن”.

بەختیار فەرەج، سەرپەرشتێ گۆڕێن ب کۆم ل وەزارەتا شەھید و ئەنفالکریان یا حوکمەتا ھەرێما کوردستانآ دیار کر کو سەرەدانا وان بۆ پلرێزگەھا سەماوە ب مەرەما دیتنا جھان بوو و گۆت: “پشتی ھەیڤا رەمەزانا پیرۆز دێ دەست ب پشکنین و کۆلانا گۆڕان کەین”.

ئەڤرۆ نيوز:

سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک ل بارەگایێ لقێ پێشوازیا ل (مەتران رەبان ئەلقەس) مەترانێ کەنیسێن (دھوک، زاخو، ئامێدی)یێ کر.

د روونشتنەکێ دا مەتران رەبان پیرۆزباھیا خەلکێ دھۆکێ و کوردستانێ کر ب ھەلکەفتا ھاتنا ھەیڤا رەمەزانا پیرۆز و ھیڤی خواست ئەڤ ھەیڤە ھەیڤا خێر و بەرەکەتێ بیت بۆ ھەمی خەلکێ کوردستانێ و گۆت: “ب ڤێ پێکڤەژیانا ل کوردستانێ ھەی ئەم شیاینە ب ئازادانە ھەلکەفت و بیرەوەریێن خوە بگێرین و ب ڤێ تەبایی و ئێک رێزیا د ناڤبەرا مە دا ھەیی رۆژ بۆ رۆژێ کوردستانێ جوانتر بکەین”.

ژ ئالیێ خوە ڤە سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک سۆپاسی و بخێرھاتنا مەتران رەبانی کر بۆ ڤێ سەرەدانێ و گوت ” ژمێژەیە کوردستانی د کەد و خەباتێ دانە بۆ ئازادی و سەربەستیا گەلێن کوردستانی کرستیان ژی ئێک ژ پێکھاتێن سەرەکی نە د ناڤ کوردستانێ دا وان ژی د دەمێ شۆرەشێ دا مالێن وان حەشارگەھا بارەگایێن پێشمەرگا بوون و شیان خزمەتەکا گەلەک مەزن ژ بلی روحا خوە ب نان و ئاڤێن خوە ژی پارزینکێن پێشمەرگەیان تژی بکەن”.

ئه‌ڤرۆ نيوز:

ب گۆره‌ى به‌لگه‌نامه‌كێ ئێكه‌تيێ و لايه‌نێن توركمانى و عه‌ره‌بى يێن ناڤ جڤاتا پارێزگه‌ها كه‌ركووكێ ل 16ى نيسانا 2017ێ ئيمزا كريه‌ و رێكه‌فتينه‌ كو “راكان سه‌عيد جبۆرى” وه‌كو جێگرێ پارێزگارى و پارێزگارێ كه‌ركووك ب وه‌كاله‌ت هه‌تا هه‌لبژارتنێن جڤاتا پارێزگه‌ها كه‌ركووك د پۆستێ خوه‌ دا يێ به‌رده‌وام بيت.

د وێ رێكه‌فتنێ دا، هه‌ر ئێك ژ سه‌رۆكێ كوتلا عه‌ره‌بى و توركمانى و كاكه‌ ره‌ش سه‌ديق ئه‌ندامێ ليستا برايه‌تى، كو سه‌ر ب ئێكه‌تى نشتيمانى كوردستانه‌ وه‌كو “سه‌رۆك ليست” ئيمزا ل سه‌ر كريه‌ د ده‌مه‌كى دا “محه‌مه‌د كه‌مال” سه‌رۆكێ ليستا برايه‌تى يا كه‌ركووك كو سه‌ر ب پارتى ديموكراتى كوردستانه‌ نه‌كو كاكه‌ره‌ش سه‌ديق.

نڤيسارا ناڤبرى به‌حس ل به‌لاڤكرنا ده‌سته‌لاتێن ديوانا پارێزگه‌ها كه‌ركووك دكه‌ت كو ژ 9 خالان پێك هاتيه‌ و د هه‌مان رۆژ دا ب نڤيساره‌كا فه‌رمى ژ لايێ راكان سه‌عيد پارێزگارێ كه‌ركووك ب وه‌كاله‌ت ره‌وانه‌ى نڤيسينگه‌ها سه‌رۆك وه‌زيرێن عيراقێ كريه‌.

د خالا ئێكێ يا رێكه‌فتنێ دا، داخواز كريه‌ كو راكان سه‌عيد جبۆرى وه‌كو پارێزگارێ كه‌ركووك ب وه‌كاله‌ت هه‌تا ئه‌نجامدانا هه‌لبژارتنا جڤاتا پارێزگه‌هێ د پۆستێ خوه‌ دا بمينيت.

كه‌ركووك راكان ئێكه‌تى

 

website security
WP Facebook Auto Publish Powered By : XYZScripts.com