ئەڤرۆ نیوز:
وەزیرێ ساخلەمیێ یێ حوکمەتا هەرێما کوردستانێ د پرێس کۆنفرانسەکێ دا راگەهاند کو مخابن رۆژ ب رۆژێ رێژا تووشبوون و مرنا ب کۆرۆنایێ ل هەرێما کوردستانێ زێدە دبیت و گۆت: (د ماوەیێ ٢٤ دەمژمێرێن بۆری دا ٤٨٣ کەس ل هەرێما کوردستانێ تووشی کۆرۆنایێ بووینە و ٢٤ کەس ژی مرینە).
د. سامان بەرزنجی داخواز ژ هەموو وەلاتیان ژی کو پێگیریێ ب رێنمایێن ساخلەمیێ بکەن و خوە ب پارێزن.
ئەڤرۆ نیوز،عەلی حاجی :
ژێدەرەکێ باوەر پێکری ل ناحیا باتیفا بۆ ئەڤرۆ نیوز دیار کر پشتی دوو وەلاتیێن گوندێ ئەڤلهێ یا سەر ب ناحیا باتیفا ڤە سەرەدانا گوندێ خوە کرین ژلایێ هێزەکا سوپایێ تورکیا ڤە دهێنە دەستە سەر کرن و پشتی دەمەکێ کورت هاتنە ئازاد کرن.
زێدەتر وی ژێدەری گۆت : ئەو کێشەیە ئەڤرۆ ل روژا پێنچ شەمبێ دروست بوو دەما دوو وەلاتیێن گوندێ ئەڤلهێ ب مەرەما کارێ چاندنێ قەستا وی گوندێ خوە کرین کو هێزەکا سوپایێ تورکیا دناڤ وی گوندی دا بوو ئەو دوو کەسە ژلایێ وێ هێزێ ڤە هاتنە دەستە سەر کرن و پشتی لایەنێن پەیوەندیدار ل ناحیا باتیفا ئاگەهداری ڤێ کێشەیێ بووین ئێکسەر ب رێیا پەیوەندیێن خوە دگەل سوپایێ تورکیا جارەکادی ئەو دوو وەلاتی هاتنە ئازاد کرن و قەستا مالێن خوە کرن و ئەڤە د دەمەکێ دایە شەرێن بەردەوام ل هندەک گوندێن سنوری ل ناحیا باتیفا دناڤبەرا سوپایێ تورکیا و هێزێن پەکەکێ دا دروست دبن .
ئه‌ڤرۆ نیوز:
لگۆری ئه‌وێ خشته‌یێ وه‌زاره‌تا دارایی راگه‌هاندی رۆژا هه‌ینیێ چه‌ند وه‌زاره‌ت و چه‌ند ده‌سته‌یه‌ك دێ موچه‌یی هه‌یڤا ئاداری وه‌رگرن.
سوبه‌هی رۆژا هه‌ینیێ كۆ 21/8/2020 موچه‌یێ وه‌زاره‌تا خاندنا بلند هێته پارڤه‌كرن، دێ به‌نك به‌رده‌وام بن بۆ پارڤه‌كرنا موچه‌یی، كۆ هه‌ر ماموستایه‌ك و فه‌رمانبه‌ره‌كی دڤێت موچه‌یێ خوه وه‌ربگریت.
سوبه‌هی هه‌ینیێ ل گۆری خشته‌یێ وه‌زاره‌تا دارایی دێ موچه‌یێ هه‌موو ئه‌وان وه‌زاره‌ت و ده‌سته‌یان هێته پارڤه‌كرن كۆ ژلایێ وه‌زاره‌تا دارایی ڤه هاتینه راگه‌هاندن و به‌نك دێ ڤه‌كری بن بۆ پارڤه‌كرنا موچه‌ی.
ئه‌ڤرۆ نیوز:
دونالد تره‌مپ سه‌رۆكێ ئه‌مریكا راگه‌هاند ژماره‌یه‌كا وه‌لاتێن دی یێن عه‌ره‌بی به‌رهه‌ڤن رێكه‌تنێ ل گه‌ل ئیسرائیلێ بكه‌ن.
سه‌رۆكێ ئه‌مریكا به‌ره‌ڤانی ژ بزاڤێن كوچكا سپی كر بۆ هه‌ڤكاریكرنا رێكه‌تنا دناڤبه‌را ئیمارات وئیسرائیلێ ئاشكراكر هنده‌ك وه‌لاتێن دی یێن عه‌ره‌بی به‌رهه‌ڤن وه‌ك ئیماراتێ ل گه‌ل ئیسرائیلێ رێك بكه‌ڤن بڤێ ژی ئاشتی ل رۆژهه‌لاتا ناڤین بده‌ستڤه دهێت.
دونالد تره‌مپ سه‌رۆكێ ئه‌مریكا ئه‌و چه‌نده ژی دیاركر هنده‌ك وه‌لاتێن عه‌ره‌بی یێن هه‌ین دبیت هین باوه‌ر نه‌كه‌ن، دێ چیته دانوستاندنێن ئاشتیێ ل گه‌ل ئیسرائیلێ، به‌لێ به‌رهه‌ڤن رێكه‌تنێ بكه‌ن و ل ده‌مێن بهێت دێ بینن.
ئه‌ڤ چه‌نده پشتی ئه‌وێ ئێكێ هات كۆ بنیامین نه‌ته‌نیاهو سه‌رۆك وه‌زیرێ ئیسرائیلێ و محه‌مه‌د بن زاید جێنشینێ ئه‌بو زه‌بی گه‌هشتینه رێكه‌تنێ ل سه‌ر ئاسایكرنا ته‌ڤایا په‌یوه‌ندیێن دناڤبه‌را وان دا.
ئیسرائیل و ئیمارات رێكه‌تن ل سه‌ر ئاستێ وه‌به‌رهێنانێ و گه‌شتوگۆزاری و گه‌شتێن ئاسمانی یێن راسته‌خو و پرسا ئه‌منی و هێلێن په‌یوه‌ندیێ و ته‌كنولوژیایی و ووزه و ساخله‌میێ و كلتوری و ژینگه‌هی و ڤه‌كرنا بالیوزخانه‌یان و پرسێن دی یێن مفایێ هه‌ردو وه‌لاتان تێداهه‌ی.
ئه‌ڤرۆ نیوز:
حه‌سه‌ن ته‌میمی وه‌زیرێ ساخله‌میا عیراقێ راگه‌هاند ته‌ڤایا ئه‌و ڤاكسینێن تایبه‌ت ب كورونایێ هاتینه راگه‌هاندن، تا نوكه ل بن ڤه‌كۆلینان دانه،به‌لێ ل گه‌ل په‌سندكرنێ ژلایێ ساخله‌میا جیهانی ڤه، به‌غدا راسته‌خو دێ كریت.
تانوكه روسیا چین سه‌ركه‌فتنا ڤاكسینێ دژه كورونایێ راگه‌هاندیه، به‌لێ ژلایێ رێكخراوا ساخله‌میا جیهانی ڤه نه‌هاتیه په‌سندكرن، وه‌زیرێ ساخله‌میێ ل سه‌ر ئه‌ڤێ چه‌ندێ دیاركر عیراق وه‌لاتێ ئێكێ دبیت كۆ ڤاكسینا دژه كورونایێ بده‌ستڤه بینیت هه‌كه رێكخراوا ساخله‌میا جیهانی په‌سند بكه‌ت، هه‌ماهه‌نگی هه‌یه ل گه‌ل وه‌زاره‌تا ده‌رڤه‌یا عیراقێ بۆ په‌یوه‌ندیێ ل گه‌ل ئه‌وان ده‌وله‌تێن ڤاكسین به‌رهه‌م دئینن، هه‌ر ده‌مێ ره‌زامه‌ندی ل سه‌ر ڤاكسینی هاته‌دان، ئه‌ڤه عیراق دناڤ ئه‌وان وه‌لاتان دایه كۆ پشكداریێ ل پێشڤه‌برنا ڤاكسینی دا بكه‌ت.
وه‌زیرێ ساخله‌میا یعراقێ ئه‌و چه‌نده ژی دازانین ته‌ڤایا ئه‌و ڤاكسینێن ژلایێ هنده‌ك ده‌و‌له‌تانڤه هاتینه راگه‌هاندن جارێ ل بن تاقیكرنان دانه و ره‌زامه‌ندیا رێكخراوا ساخله‌میا جیهانی بده‌ستڤه بینن، به‌لێ عیراق ل گه‌ل هه‌موو ئه‌وان وه‌لاتان دا د په‌یوه‌ندیێن به‌رده‌وام دایه.
ئه‌ڤرۆ نیوز:
به‌نكا ناڤه‌ندیا عیراقێ داخاز ژ وه‌لاتیان كر پاره‌ی ل مال نه هه‌لگرن و برێكا به‌نكێ و كۆمپانییێن نێڤ ده‌وله‌تی لهه‌ڤگوهارتنا بازرگانیێ پێ بكه‌ن.
به‌نكا ناڤه‌ندیا عیراقێ هوشداریا ئه‌وێ چه‌ندێ دا وه‌لاتیان كو پاره‌یێ كاغه‌زێ ئه‌گه‌ره بۆ ڤه‌گۆهاستنا ڤایرۆسی و به‌كتریا، ژ وان ژی كورونایێ، ئه‌ڤ رێنمایی بۆ پاراستنا پاره‌یێ كاشێ وه‌لاتیانه ژ دزین و فێلكرن و پاره‌یێ سه‌خته.
عیراق د قوناغه‌كا مه‌ترسیدار یا دارایی دا ده‌رباز دبیت و شاره‌زایێن ئابووری ئه‌وێ چه‌ندێ دیاردكه‌ن كۆ دڤێت هانا وه‌لاتیان بده‌ن كۆ پاره‌یی بێخنه ناڤ به‌نكان.
ئه‌ڤرۆ نیۆز، عه‌زیز هه‌ورامی
له چه‌ندڕۆژی ڕابردوو سه‌رۆك وه‌زیرانی كوردستان مه‌سروور بارزانی و سه‌رۆك وه‌زیرانی عێراق مسته‌فا كازمی، پێوه‌ندیه‌كی ته‌له‌فۆنیان ئه‌نجامدا و ڕێكه‌وتنێكی له‌سه‌ر مووچه و خاڵه بازرگانییه‌كانی لێكه‌وته‌وه.
شیروان میرزا ئه‌ندامی په‌رله‌مانی عێراق له فڕاكسیۆنی یه‌كێتی نیشتیمانی كوردستان، به ئه‌ڤرۆ نیۆزی ڕاگه‌یاند:” ڕێكه‌وتنی مه‌سروور بارزانی و مسته‌فا كازمی له به‌رژه‌وه‌ندی هه‌ردوو لادایه ڕێكه‌وتنه‌كه تاكو كۆتای ساڵی 2020 به‌رده‌وام ده‌بێت.
هه‌روه‌ها ئاماژه‌ی به‌وه‌كرد:” به‌پێ ئه‌و ڕێكه‌وتنه 50% داهاتی مه‌رزه‌كانی بازرگانی ده‌گه‌ڕێته‌وه بۆ حكوومه‌تی عێراق و له به‌رامبه‌ردا مانگانه 320 ملیار دینار به‌غدا ڕه‌وانه‌ی كوردستان ده‌كات.
ئاماژه‌ی به‌وه‌كرد:” ڕێكه‌وتنی به‌غدا و هه‌ولێر له ئێسته‌دا بنه‌ماییه‌كی زۆر باشه بۆ ڕێكه‌وتنی میزانییه‌ی ساڵی 2021 عێراق.
ئەڤرۆ نیوز، عەلی حاجی :
پەیڤدارێ دەروازا نێڤدەولەتی یێ ئیبراهیم خەلیل د داخویانیەکێ دا بۆ ئەڤرۆ نیوز دیار کر: پشتی سەرەدانا ئەڤرۆ یا قونسلێ تورکیا ل هەولێرێ بۆ دەروازێ ئیبراهیم خەلیل دەمژمێر ٧ شەڤ رێک ب شوفێرێن تورک یێ بارهەلگر هاتە دان بهێنە دناڤ تورکیا دا.
زێدەتر کامی کامل گۆت: ئەڤرۆ چارشەمبێ کومبونەک دناڤبەرا دەروازێ ئیبراهیم خەلیل و قونسلێ تورکیا ل هەولێرێ هاتیە ئەنجام دان و پشتی دانانا میکانیزمەکا نوو د بن رێکارێن ساخلەمیێ دا ئێدی رێک دێ ب شوفێرێن بارهەلگرێن تورکی هێتە دان ب رێیا دەروازێ ئیبراهیم خەلیل بهێنە دناڤ ئاخا کوردستانێ دا کو ب رەنگەکێ پشتی دەرکەڤتنا ئەنجامێن پشکنینێن کورونایێ د دەما چار دەمژمێران دا ژ نوو دێ رێک ب وی شوفێری هێتە دان ب هێتە دناڤ کوردستانێ دا کو بەرامبەر هەر پشکنینەکێ ژی دێ ٣٠ هزار دینارێن عێراقی هێتە وەرگرتن.
ناڤبری گۆت ژی : بۆ ڤێ قوناغێ جارێ ئەڤ بریارە بۆ هاتنا شوفێران دایە و هەر دەما رێکارێن باشتر هاتنە دانان ل دەروازەی دبیت بریارەکا دیتر بهێتە دان و بریار ژی د دەستێ مە دا نینە وەکو دەروازە بەلکو د دەستێ حکومەتێ هەرێمێ دایە بریارێ ل سەر ئاسای بونا دەروازەیێ بدەت .
نيشاندان