ئەڤرۆ نیوز، نەوزاد هلۆری:
پشتى دو حهفتیێن بورى ئێكهم حالهتێ كۆرۆنایێ ل دهڤهرا بارزان هاتیه تۆمار كرن و پاشی سێ گوند هاتینه كهرهنتین كرن، د نوكه دا ئهو حالهتێ كۆرۆنایێ چاكبوویە و كهرهنتین ژى هاته راكرن.
د. ههوار عهبدوللا، رێڤهبهرێ گشتیێ نهخۆشخانا بلێ ل دهڤهرا بارزان بۆ ئهڤرۆ نیوز گۆت: (پشتى كو ل ئێكهم رۆژا جهژنا رهمهزانا پیرۆز ل رێكهفتى 24/5/2020 ئێكهم حالهتێ كۆرۆنایێ ل دهڤهرا بارزان هاتیه توماركرن و ئهوى وهلاتى سهرهدانا گوندێن دهڤهرێ كرى، ههر ئێك ژ گوندێن هوستان، رێشه و ههسنهكا هاتنه كهرهنیتن كرن داكو گیانێ وهلاتیان ژ ڤایرۆسا كۆرۆنایێ پاراستى بیت).
زێدهتر گۆت: (یهكهیا چاڤدێریا نهخۆشیێن كۆرۆنایێ ل دهڤهرا بارزان دهست ب پشكنینان كر ل وان گوندێن كهرهنتین كرى، ژبهركو ههموو رونشتڤانێن وان گوندان ب بهركهفتى هاتنه هژمارتن، د ههوهكا بهرفرههـ دا ب پشكداریا كهسانێن تایبهتمهند و ب سهرپهرشتیا نوژدار و ستافێ نهخۆشخانا گشتى یا بلێ شیان هزار و 945 پشكنینان بو خهلكێ وان گوندان و دهوروبهر بكهین، سوپاس بۆ خودێ پشكنینێن ههمووان نیگهتیڤ دهرچوون ئانكو پاقژبوون).
ناڤبرى دیاركر ژى كو د نوكه دا چوو حالهتێن كۆرۆنایێ ل دهڤهرێ نهمان و داخوازێ ل وهلاتیان دكهین ل سهر رێنمایێن خوه پاراستن ژ كۆرۆنایێ بهردهوام بن.
ئەڤرۆ نیوز، عەلی حاجی :
بەرپرسێ راگەهاندنا ساخلەمیا زاخۆ دیار کر:ل بەری دەمەکێ کێم ل نێزیک دەروازێ زاخۆ ترومبێلەکا ژ جورێ تەکسی خوە ل گەنجەکێ دەت و ئێکسەر کوشت.
زێدەتر ئەمیر عەلی گۆت : ئەو روودان ل نێزیکی دەمژمێر ٦:٣٠ ئێڤاریا ئەڤرۆ ل سەر رێیا سەرەکی یا دەروازێ زاخۆ دروست بوویە، دەما شوفێرەک ب ترومبێلەکا ژ جورێ تەکسی خوە ل گەنجەکێ دەت و ئێکسەر دکوژیت و نوکە دا تەرمێ وی گەنجی ل نۆشداریا دادە ل زاخۆ.
ل گورەی پێزانینێن تایبەت ب دەست ئەڤرۆ نیوز کەفتین شوفێرێ تەکسیێ پشتی وێ روودانێ خوە ڤەشارتییە و ترومبێلا خوە هێلایە دەستێ هێزێن ئەمنی و هێزێن ئەمنی ژی بەردەوامن ل سەر لێگەریا شوفێرێ ترۆمبێلێ.
ئهڤرۆ نیوز:
ستێرا ههلبژارتیێ نێچیریا و یانا لیل یا فرهنسى ڤیكتور ئوسیمێن نوكه بوویه جهێ ئارمانجا هژمارهكا یانێن بهرنیاس ل سهر ئاستێ ئورۆپا پشتى ل وهرزێ ئهڤ ساله شیاى ئاستهكێ بلند ل گهل یانا خوه دخۆلا فرهنسا دا وقارهمانیا ئورۆپى پێشكێش بكهت.
راپورتێن رۆژنامهڤانى ل فرهنسا دیاركرینه بهرپرسێن یانا لیل رازیبووینه ل سهر فروتنا وى یاریزانێ خوه و دیاركریه ههر یانا حهزا ئیمزاكرنا ههڤبهستا ڤیكتور ئوسمین ههبیت پێدڤى یه كوژمێ 80 ملیۆن یورۆیان پێشكێشى ئهوان بكهت بهرامبهر دهست بهردانا وى یاریزانى.
ڤیكتور ئوسیمین ل وهرزێ ئهڤ ساله 13 گول دخۆلا فرهنسا دا توماركرینه ژ سهرجهمێ 27 یاریان ههردیسان دو گول ژى ل قارهمانیا چامپیونیز لیگ توماركرینه و ههر ئێك ژ یانێن ریال مهدرید یا ئیسپانى و مانچێستهر یونایتد و لیڤهرپول و توتنهام یێن ئنگلیزى و ناپولى یا ئیتالى ههڤركیێ ل سهر دهستڤه ئینانا وى یاریزانى دكهن.
ئەڤرۆ نیوز:
وەزارەتا ساخلەمیا عیراقێ ئامارێن 24 دەمژمێرێن بوری یێن ڤایرۆسێ کۆرۆنا یێ بەلاڤە کرن و راگەهاند: هزار و 180 کەسێن دی تووشی کۆرۆنا یێ بووینە و 53 پێکەفتیان گیانێ خوە ژ دەستداینە.
هەروەسا گۆتیە: 10 هزار و 325 پشکنین بۆ دەست نیشانکرنا تووشبوویێن ڤایرۆسێ کۆرۆنا یێ هاتینە کرن و ژ وی هژمارێ هزار و 180 تووشبوویی هاتینە تۆمار کرن و رێژا هەرە مەزن ل بەغدا یە کو ئەو ژی 495 پێکەفتی نە.
ئەڤرۆ نیوز، عەلی حاجی :
رێڤەبەرێ چاندنێ ل زاخۆ بۆ ئەڤرۆ نیوز دیار کر د ئەڤسالە دا کێمترین رێژەیا وەرگرتنێ ل سەرانسەری عێراقێ بەر ب پارێزگەها دهوکێ و ب تایبەتی ژی زاخۆ کەفتیە و بەردەوامین ل سەر وێ چەندێ دا کو ئەڤ رێژەیە بهێتە زێدە کرن.
زێدەتر ئەحمەد سامی گۆت: ( ئەو رێژەیا بۆ زاخۆ هاتیە دانان بتنێ ١٢ هزار تەنن کو دبیتە نیڤا رێژەیا سالا بوری کو ئەو ژی رەزامەندی ل سەر ٢١ هزار تەنان هاتبوو دان، ئەڤ رێژەیا د ئەڤسالە دا بۆ زاخۆ هاتیە دانان کێمترین رێژەیە ژ بەر کو مە رێژەیەکا گەلەک زێدەتر یا گەنمی ل باژێرێ زاخۆ هەیە، ل سەر ڤێ ئاریشەیێ ژی مە هەمی جهێن پەیوەندیدار ئاگەهدار کرینە و هەتا پەرلەمانتارێن کوردستانێ ل پەرلەمانێ عێراقێ ئاگەهدار کرینە، هەر دیسان رێڤەبەریا گشتی یا چاندنێ ژی ل پارێزگەها دهوکێ بەردەوامە ل سەر هەولێن خوە بۆ زێدەکرنا پشکا گەنمی ل زاخۆ و ئەڤ ئاریشەیە ل سەرانسەری پارێزگەها دهوکێ د ئەڤ سالە دا دروست بوویە).
ناڤبری ئاشکەرا ژی کر ئەو لیستەیا ئەم رەوانە دکەین بۆ بەغدا باوەری پێ نینە لەورا ئەڤسالە کێمترین رێژە داناینە و بەروڤاژی بۆ پارێزگەهێن دیترێن عێراقێ پشک ناهێتە دانان و بۆ جوتیارێن وان دەڤەران یا ڤەکریە و لەورا نوکە باشترە جهێن پەیوەندیدار کار ل سەر زێدەکرنا پشکا پارێزگەها دهوکێ بکەن دا کو ئەم بشێین دەست ب وەرگرتنا بەرهەمێن جوتیاران د ئەڤسالە دا بکەین).
ئەڤرۆ نیوز، عەلی حاجی:
رێڤەبەرێ گشتیێ گوشت و گوزارێ ل پارێزگەها دهوکێ بۆ ئەڤرۆ نیوز دیار کر بۆ قوناغا نوکە داخواز هاتیە کرن ژلایێ مە بۆ ڤەکرنا هاڤینگەهێن گەشتیاری ل پارێزگەها دهوکێ و ئەم چاڤەرێ رازی بونا ژورا ئوپەراسیونا ڤایروسێ کورونایێ پارێزگەها دهوکێ نە بۆ ڤەکرنا وان جهان.
زێدەتر عوبەیدوللا داود گۆت: (بۆ قوناغا نوکە ئەم پشتەڤانیا ڤەکرنا جهێن گەشتیارینە و ب رێیا نڤێسارەکێ ژی مە داخواز ژ ژوورا ئوپەراسیونا ڤایروسێ کورونایێ ل پارێزگەها دهوکێ کریە بۆ ڤەکرنا جهێن گەشتیاری، ژبەر کو گرنگە ئەم کەرتێ گەشتیاری ئەکتیف بکەین ل بەرامبەر وەلاتیێن خوە و نابیت نوکە دا کەرتێ گەشتیاری بهێتە راوەستاندن و وان ژی ژلایێ خوەڤە دیار کری یە قوناغ بۆ قوناغ دێ رێک ب هندەک جهێن گەشتیاری هێتە دان بهێنە ڤەکرن و نوکە ژی وەلو خارنگەهێن گەشتیاری و هندەک جهێن دیتر رێک ب وان هاتیە دان بهێنە ڤەکرن،ئەم پێشنیار دکەین کەرتێ گەشتیاری ل سەر پێنج قوناغان بهێتە ڤەکرن کو قوناغا ئێکێ ل بەرامبەر گەشتیارێن پارێزگەها دهوکێ بهێتە ڤەکرن و بۆ قوناغا دووێ ژی ئەو جهە ل بەرامبەر گەشتیارێن پارێزگەهێن دیترێن کوردستانێ بهێتە ڤەکرن و قوناغا سیێ ژی ل بەرامبەر گەشتیارێن دیترێن عێراقێ بهێتە ڤەکرن وو بۆ قوناغا چارێ ل بەرامبەر گەشتیارێن وەلاتێ تورکیا بیت و قوناغا پێنچێ ژی ل بەرامبەر وەلاتێن دیترێن جیهانی بیت).
ناڤهاتی ئاشکرا کر ژی ڤەکرنا هندەک هاڤینگەها ل هندەک قەزایێن پارێزگەها دهوکێ دکەڤیتە ستویێ بەرپرسێ ئێکێ ل وی باژێری دا و بەرامبەر هەر خەلەتیەکا بهێتە کرن ئەو دێ بەرپرسێ ئێکێ بیت ل بەرامبەر وان جهێن هاتینە ڤەکرن و ژبەر کو هێشتا چو بریارێن فەرمی ژلایێ ژورا ئوپەراسیونا ڤایروسێ کورونایێ ل دور ڤەکرنا هاڤینگەهان نەهاتیە دان .
ئەڤرۆ نیوز، عەلی حاجی:
بەرپرسێ راگەهاندنا بەرەڤانیا باژێری ل دهوکێ بۆ ئەڤرۆ نیوز دیار کر ل سالا بوری هەتا نوکە تەرمێن چار کەسان ل سنورێ دەڤەرا زاخۆ نەهاتیە دیتن و ئەو کەسێن خەندقین ژی پرانیا وان تەرمێ وان هاتیە دیتن و دەرئینان ژ ئاڤێ.
زێدەتە موقەدەم بێوار عەبدولعەزیز گۆت: (د ئەڤسالە دا هەتا نوکە سێ کەس د ئاڤێ ل دەوروبەرێن باژێرێ زاخۆ دا خەندقینی نە و تەرمێ دو کەسان هاتیە دەرئینان و تەرمێ کەسەکێ دیتر ژی نەهاتیە دیتن و لێگەریان ژی بەردەوامە ژلایێ تیمێن نقومەڤانی ڤە ل زاخۆ بۆ دیتنا تەرمێ وی وەلاتی، هەر دیسان ژی کەسەکێ دیتر ژی ژ خەندقینێ هاتیە رزگار کرن، پرانیا ئەو کەسێن خەندقین ژی ژ ئەگەرێ بلندیا ئاڤێ بوویە و یان ژی شارەزا نەبووینە د مەلەڤانیان دا، لەورا ئەم داخواز ژ وەلاتیێن خوە دکەین د نوکە دا خوە گەلەک نەئێخنە د ئاڤێ دا، دا کو گیانێ وان یێ ب سلامەت بیت و دێ بەردەوام ژی بین دا کو بشێن تیمێن خوە یێن نقومەڤانی جێگیر بکەین جهێن خابیری دا کو بۆ هەر روودانەکا خەندقینێ بشێن وان کەسان رزگار بکەن ژبەریا گیانێ خوە ژ دەست بدەن).
ناڤهاتی خویاکر ژی ” ژ سالا بوری هەتا نوکە رێژەیەکا زور ژ وەلاتیان خەندقینە و تەرمێن چار کەسان ژی نەهاتیە دیتن و هەمی هەول دان ژی هاتنە کرن بۆ دیتنا تەرمێ وان بەلێ بێ ئەنجام بوون”.
ئەڤرۆ نیوز:
شاخەوان عەبدوللا ئەندامێ بەرێ یێ پەرلەمانێ عیراقێ راگەهاند کو پشتی ل هندەک دەزگەهێن راگەهاندنێ دا وەسا هاتە بەلاڤکرن کو راکان جبوری بوویە پارێزگارێ کەرکووکێ وی پەیوەندی ب نڤیسینگەها سەرۆک وەزیرێن عیراقێ و ئەمیندارێ جڤاتا وەزیران کریە و دەرکەفت کو چو راستی بۆ هندێ نینە.
ناڤهاتی دیار دکەت کو راکان جبوری ل سەر خەلکێ کەرکووکێ وەکو پارێزگارێ ب وەکالەت هاتیە سەپاندن و گەلەک کارێن نەقانوونی ژی کرینە و دێ بزاڤێ کەن کو هەموو بریارێن وی یێن نەقانوونی بهێنە هلوەشاندن و ژ کاری ژی بهێتە دوورخستن.