ئەڤرۆ نیوز:
رێکخراوا مافێن مرۆڤی یا سەر ب نەتەوێن ئێکگرتی د راپۆرتەکێ دا دیار دکەت کو پشتی نەمانا کۆرۆنایێ دێ رێژا برسیبوونێ ل هندەک وەلاتێن هەژار ٥٠% زێدەتر لێ هێت و ئەو یەک دشێت کارتێکرنەکا گەلەک خراب ل هەموو جیهانێ بکەت، ژ بەر هندێ ژی دڤێت هەر ژ نها ڤە دەست ب پێرابوونێن پێدڤی بهێتە کرن و هاریکاریا وان وەلاتان بهێتە کرن.
د راپۆرتا نەتەوێن ئێکگرتی دا بەحسێ وەلاتێن ئەفریقیا دهێتە کرن کو نها کۆرۆنا ب رێژەکا بەرچاڤ ل ئەفریقیا بەلاڤ بوویە و مەترسیا مرنا ب هزاران کەسان یا هەی.
ئەڤرۆ نیوز:
بسپۆرێن ئابووری یێن جیهانی دیار دکەن کو چەندین ئەگەر هەنە کو وەسا کریە بهایێ پەترۆلێ گەلەک هاتیە خوارێ، لێ ئەو یەک بەروەختە و دێ جارەکا دی بهایێ پەترۆلێ بلند بیت.
ل گۆر بسپۆرێن ئابووری ئەگەرێ سەرەکی ڤایرۆسێ کۆرۆنایێ یە کو وەسا کریە ژیان ل هەموو جیهانێ هاتیە راوەستان ب تایبەتی ژی چالاکیێن ئابووری، خالا دی ژی گەلەک پەترۆل د عومباران دا مایە و ژ بەر هندێ نها کەس وەکو جاران پەترۆلێ ناکڕیت، لێ ئەو یەک ژی بەروەختە و پشتی ڤایرۆسێ کۆرۆنا ژناڤ بچیت دێ جارەکا دی بهایێ پەترۆلێ وەکو جاران بلند بیت.
ئەڤرۆ نیوز:
بهایێ لیرێ تورکی ل هەمبەر دۆلارێ ئەمریکی رۆژ ب رۆژێ دهێتە خوارێ و نها هەر سەد دۆلارێن ئەمریکی نێزیکی ٧٠٠ لیرێن تورکی یە و هژمارەک سەرمایەدارێن تورکیا ژی ئەڤرۆ دیار کرن کو هەکە رەوش وەسا بیت دێ تورکیا تووشی قەیرانەکا مەترسیدار هێت و دڤێت دەستهەلات دەست ب هندەک چاکسازیێن نوو بکەت.
بەری دو رۆژان هژمارەک ژ ئەندامێن پەرلەمانێ تورکیا ژی دیار کربوون کو دڤێت حوکمەت دەست ب هندەک چاکسازیان بکەت دا رێ بۆ ژیانا خەلکی خوش بیت، چونکو رەوشا ئابووری یا تورکیا رۆژ ب رۆژێ خرابتر لێ دهێت.
ئەڤرۆ نیوز:
غولام حسێن ئیسماعیلی پەیڤدارێ دەستهەلاتا دادوەریێ ل ئیرانێ راگەهاند کو بەری نها وان فەرمانا ئازادکرنا بەروەخت بۆ سەد هزار گرتیان دەرخستیە کو د ناڤ وان کەسان دا هزار گرتیێن بیانی ژی هەنە.
ناڤهاتی راگەهاند کو ژ بەر مەترسیا کۆرۆنایێ ئیرانێ بریارەکا وەسا دایە و داخواز ژ نەتەوێن ئێکگرتی ژی کر کو دووڤچوونا گرتیێن ئیرانی ژی بکەت کو ل زیندانێن ئەمریکا و بریتانیا دا هەنە و هەتا نها ژی ژ بەر مەترسیا کۆرۆنایێ نەهاتینە ئازادکرن.
ئەڤرۆ نیوز، له‌زگین جوقی:
ئه‌ڤسالە رێوره‌سمێن توافا كه‌ره‌جال هه‌لكه‌فتا ئایینی یا گرێدایی هۆزا قائیدیا ل رۆژا چارشه‌مبیا بهێت 22/4/2020 ناهێته گێران.
قادر خه‌لیل قائیدی بناڤێ هۆزا قائیدیا دیاركر كو وه‌كو ئه‌ركه‌كێ نیشتیمانی ل دووڤ داخوازی و بریار و رێنمایێن حكومه‌تا هه‌رێما كوردستانێ و جڤاتا رۆحانیا ئێزدیان ژبۆ پاراستنا گیانێ هاوولاتیان قه‌ره‌بالغه‌كا مه‌زن و پابه‌ندبوون ب رێنما و رێكارێن وه‌زاره‌تا نافخوە و ته‌ندرۆستی ژ بۆ خۆپاراستن ژ به‌لاڤه‌بوونا(ڤایرۆسا كۆرۆنایێ)ئەڤساله مه وه‌ك هۆزا قائیدیا بریار دا كو رێوره‌سمێن ڤێ هه‌لكه‌فتێ مینا سالێن چوویی نه‌گێرین.
ئاشكه‌را كر كو سوپاسیه‌كا گه‌رم ئاراسته‌ی هه‌موو خه‌لكێ خۆراگر و هێزێن پۆلیس و كارمه‌ند و ستافێ ته‌ندرۆستی دكه‌ین رێزێ ل ماندیبوونا وان دگرین ژ خودێ دخوازین گه‌له‌ك نه‌مایه دێ ب سه‌ر كۆرۆنایێ ژی سه‌ركه‌ڤین و زالبین وه‌ك سه‌ركه‌فتنامه ل سه رداعش و چه‌ند كاودانێت دیتر.
هۆزا قائێدیا سالانه هه‌لكه‌فته‌كا ئایینێ ل چیایێ گۆندی سینا كۆمه‌لگه‌ها شاریا سه‌ر قه‌زا سێمیلێ ڤه سنۆری پارێزگه‌ها دهۆكێ ئه‌نجام دده‌ن ئه‌ڤسالە وێ هه‌لكه‌فتی ژ به‌ر ڤایرۆسێ كۆرۆنا ناكه‌ن.
ئه‌ڤرۆ نیوز، له‌زگین جوقی:
رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو مه‌ترسیا كورۆنا هێشتا هه‌یه و بنبڕ نه‌بوویه كو هه‌ر 15 نه‌خۆش یێن دهۆكێ هاتبوونه ده‌ستنیشانكرن هه‌موو چاره‌سه‌ر بووینه.
د. نزار عسمه‌ت، رێڤه‌به‌رێ گشتی ساخله‌میا پارێزگه‌ها دهۆكێ دیاركر كو هه‌تا ئه‌ڤرۆ پێنچ هزار و 690 پشكنینن هاتینه كرن بۆ كه‌سێن گومانلێكری ژ به‌ر ڤایرۆسی كۆرۆنا هه‌تا ئه‌ڤرۆكه ل دهۆكێ دو هزار و 697 كه‌س یێن هاتینه كه‌ره‌نیتكرن ژ وانا ژی هزار و 838 كه‌س ژ كه‌ره‌نتیكرنێ چووینه مالێن خوه و هێشتا 859 كه‌س ماینه ناڤ كه‌ره‌نتیكرنێ دا، هه‌تا ئه‌ڤ كه‌سێن ناڤ كه‌ره‌نیكرنێ دا بن و خه‌لك به‌رده‌وام ژ ده‌رڤه‌ی وه‌لاتی بهێته دهۆكێ و خه‌لكه‌ك هه‌بیت قه‌ستا دهۆكێ بكه‌ت ئه‌ڤه وێ دگه‌هینت مه‌ترسیا كۆرۆنا هیشتا هه‌یه، چونكو ئه‌ڤه جهێ مه‌ترسیی نه مه پلانه‌كا زۆر گونجایی دانایه ئه‌م ل نه‌خوشی بگه‌رین ژ نوكه و پێڤه‌و نه‌خۆشی ده‌ستنیشان بكهین و چاره‌سه‌ر بكهین دا كو بیژین دهۆكێ پاقژ بوویه ژ كۆرۆنایێ پێدڤیه خه‌لكێ مه یێ پێگیر بیت ب رێنمایان”.
ئاشكه‌را كركو:” خه‌لكێ دهۆكێ حه‌ز دكه‌ن ژیان یا ئاسایی بیت و ژوورا ئوپه‌راسیۆنا ل دهۆكێ ژی حه‌ز دكه‌ت ئاسانكاریان بۆ وه‌لاتیان بكه‌ت و تێگه‌هشتنا مه وه‌كو ساخله‌میا دهۆكێ زۆر گه‌له‌ك لسه‌ر مه فه‌رە ئه‌م دیار بكهین نه‌خوشی هێشتا بنبڕ نه‌بوویه و مه‌ترسیا وێ هه‌یه هه‌ر كه‌سی ژمال ده‌ركه‌ڤیت ده‌مامك و كه‌ره‌ستێن خوه پاراستنێ بكار بینیت”.
ئه‌ڤرۆ نیوز:
هه‌موو ئه‌ندامێن نه‌ته‌وه‌یێن ئێكگرتی بریارا كارێ هه‌ڤبه‌ش ل به‌رهنگاربوونا ڤایرۆسێ كورونایێ دده‌ن.
كومه‌له‌یا گشتی یا نه‌ته‌وه‌یێن ئێكگرتی كۆ 193 ئه‌ندام هه‌نه، هه‌موویان ره‌زامه‌ندی ل سه‌ر پێشنیاره‌كا هنارتیێ مه‌كسیكێ ل نه‌ته‌وه‌یێن ئێكگرتی دا.
پێشنیارا مه‌كسیكێ بۆ ئه‌وێ چه‌ندێ یه كۆ هه‌ماهه‌نگی یا وه‌لاتان ژ روویێ زانستی ڤه بۆ دیتنا چاره‌یه‌كێ بۆ ڤایرۆسێ كورونایێ و پارڤه‌كرنا وێ چاره‌سه‌ریێ ب ئاوایه‌كێ دادپه‌روه‌رانه ب سه‌ر هه‌موو جیهانێ.
تا نوكه دو ملیۆن و 495 هزار و 296 كه‌س ل ته‌ڤایا جیهانێ تووشی ڤایرۆسێ كوروناێ بوون و ژ وێ ژماره‌یێ 171 هزار و 64 كه‌س ژی ب ئه‌گه‌رێ كورونای مرینه.
ئه‌ڤرۆ نیوز:
ئه‌ندامه‌كێ سه‌ركردایه‌تیا ئێكه‌تیێ راگه‌هاند: سوبه‌هی هه‌ردو مه‌كته‌بێن سیاسی یێن ئێكه‌تی و پارتی ل هه‌ولێرێ كۆم دبن.
زبێر عوسمان ئه‌ندامێ سه‌ركردایه‌تیا ئێكه‌تیێ راگه‌هاند: بریاره سوبه‌هی رۆژا چارشه‌مبی ل باره‌گه‌هێ مه‌كته‌با سیاسیا ئێكه‌تیێ ل هه‌ولێرێ، كۆمبوونه‌ك دناڤبه‌را هه‌ردو مه‌كته‌بێن سیاسی یێن ئێكه‌تیێ و پارتیێ بهێته كرن، كۆ تایبه‌ته ب ئاریشه و ئالوزی و ره‌وشا نوكه‌یا هه‌رێما كوردستانێ و عیراق ب گشتی تێدا ده‌رباز دبیت.
ئه‌ندامێ سه‌ركردایه‌تیا ئێكه‌تیێ ئه‌و چه‌نده ژی دیاركر كۆمبوون ل سه‌ر ئاستێ مه‌كته‌بێن سیاسی یێن هه‌ردولایان دبیت كۆ ژلایێ ئێكه‌تیێ ده‌رباز كوسره‌ت ره‌سول و رزگار عه‌لی ژ ده‌سته‌یا كارگێری و سێ ئه‌ندامێن دی یێن مه‌كته‌با سیاسی پشكدار دبن.
ئه‌ڤرۆ نیوز:
رێڤه‌به‌رێ سه‌رۆكاتیا هه‌ردو مزگه‌فتا مه‌كه‌هێ و مزگه‌فتا پێغه‌مبه‌ری سلاڤێن خودێ ل سه‌ر بن ل باژێرێ مه‌دینه دو ماهی بریار ل سه‌ر نڤێژ و ته‌راویحان دده‌ت.
شێخ عه‌بدلره‌خمان سوده‌یسی رێڤه‌به‌رێ سه‌رۆكاتیا هه‌ردو مزگه‌فتا مه‌كه‌هێ و مزگه‌فتا پێغه‌مبه‌ری ل مه‌دینێ سلاڤێن خودێ ل سه‌ر بن راگه‌هاند: بریار هاتیه دان دێ به‌رده‌وام بین ب پێگیر بوون و لبه‌رچاڤكرنا رێنمایێن ساخله‌میێ ب گرتنا ئه‌وان هه‌ردو مزگه‌فتان، ل هه‌یڤا ره‌مه‌زانێ و موسلمان نه‌شێن ل ئه‌وان هه‌ردو مزگه‌فتان نڤێژ و ته‌راویحان بكه‌ن، بتنێ فه‌رمانبه‌ر و كرێكارێن تایبه‌ت ب مزگه‌فتا پێغه‌مه‌بری (س) وكه‌عبێ،دێ نڤێژ و ته‌راویحێ دناڤ ئه‌وان هه‌ردو مزگه‌فتان كه‌ن.
رێڤه‌به‌رێ سه‌رۆكاتیا هه‌ردو مزگه‌فتا مه‌كه‌هێ و مزگه‌فتا پێغه‌مبه‌ری ل مه‌دینێ سلاڤێن خودێ ل سه‌ر بن ئه‌و چه‌نده ژی راگه‌هاند: بۆ خۆ پاراستنا خه‌لكی و رێگرتن ژ به‌لاڤبوونا ڤایرۆسێ كورونایێ ب چ ئاوایی كه‌س نه‌شیت ل ئه‌وان هه‌ردو مزگه‌فتان ب مینیت و نڤێژ و ته‌راویحان بكه‌ت.
نيشاندان