ئەڤرۆ نیوز:
سەرۆک وەزیرێن یونانێ راگەهاند کو پەیوەندیێن وان ل گەل تورکیا نها گەلەک خرابن، ژ بەر ئالۆزیێن ل دەریا سپی و هەلویستێ خراب یێ تورکیا وەسا کریە کو پەیوەندیێن هەر دو وەلاتان خراب ببن.
کریاکاس میتسوتاکیس سەرۆک وەزیرێن یونانێ ئەو یەک ژی دیار کر کو ئەو بەرهەڤن ل گەل تورکیا دەست ب دانوستاندنان بکەن و راگەهاند کو دانوستاندن ل گەل تورکیا ژ رەوشا نها یا خراب باشترە و دڤێت تورکیا ژی داخوازا خوە بۆ دانوستاندنان و چارەسەریێ ئاشکرا بکەت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٨٨ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و چو نەخوش نەمرینە و د هەمان دەمی دا ٩٨٣ نەخوشێن کۆرۆنایێ ژی چارەسەر بووینە.
ل پارێزگەها دهۆکێ ژی ٢١ کەسێن دی تووشی کۆرۆنایێ بووینە و ٣٦٩ نەخوشێن کۆرۆنایێ ژی چارەسەر بووینە.
ئەڤرۆ نیوز:
بەرپرسێن پەیوەندیێن نشتیمانی یێ پارتی دیموکراتی کوردستان راگەهاند کو ئەو وەکو پارتی دێ سەرەدانا هەموو پارتێن هەرێما کوردستانێ کەن و رۆژا پێنجشەمبیێ ژی دێ ل گەل ئێکەتیێ کۆمبن.
عەلی حسێن ئەندامێ سەرکردایەتیا پارتی و بەرپرسێن پەیوەندیێن نشتیمانی یێ پارتی راگەهاند کو ئەڤرۆ دێ سەرەدانا بارەگایێ مەکتەبا سیاسی یا ئێکگرتویێ کەن و پاشی ژی دێ ل گەل هەموو پارتێن دی یێن هەرێما کوردستانێ کۆمبن.
سەبارەت ب ناڤەرۆکا هەڤدیتنان ژی ناڤهاتی راگەهاند کو ل دۆر هەلبژارتنێن عیراقێ و ئاریشێن ناڤخوەیی یێن ل هەرێما کوردستانێ و چاوانیا چارەسەرکرنا وان دێ سەرەدانا هەموو حزبێن هەرێما کوردستانێ کەن.
ئەڤرۆ نیوز، عەلی حاجی :
بەرپرسێ راگەهاندنا ساخلەمیا زاخۆ دیار کر خوەشبەختانە پشتی زێدەتری شەش هەیڤان ژ ڤەکرنا دو سەنتەرێن ڤەحەواندنا تووشبوویێن کورونایێ نوکە ئەو سەنتەرە هاتنە ڤالا کرن.
زێدەتر ئەمیر عەلی گۆت: (پشتی زێدەتری شەش هەیڤان ژ ڤەکرنا سەنتەرێن ڤەحەواندنا تووشبوویێن کورونایێ ل نەخوشخانا گشتی و زانکویا زاخۆ بۆ دەما سێ رۆژان هاتیە ڤالا کرن و چو نەخوشەک تێدا نەمایە، د دەما هاتنا کورونایێ دا و هەتا نوکە گەلەک جاران ژبەر زوریا تووشبوویێن کورونایێ جهـ د وان سەنتەران دا نەدما و ژ نەچاری رەوانەی باژێرێ دهوکێ دکرن بەلێ نوکە چو نەخوشەک یان ژی تووشبوویەکێ کورونایێ دناڤ وان هەر دو سەنتەران دا نەمایە و هەر دیسان ژ بەری نوکە ژبەر زوریا نەخوشان گەلەک جاران ئالوزی دروست دبوون و ئێدی رەوش هاتیە گوهورین و بەرەڤ باشتر بوونێ ڤە چوویە).
ناڤهاتی ئەو یەک ژی دیار کر د ماوەیێ ٢٤ دەمژمێرێن بوری دا ب تنێ ئێک حالەتێ کورونایێ ل زاخۆ هاتیە تومار کرن و ئەڤە ژی بۆ پابەندبوونا وەلاتیان ب رێنماێین ساخلەمیێ ڤەدگەریت و پێدڤیە ژی زێدەتر وەلاتی پێگیریێ ب رێنمایێ ساخلەمیێ بکەن و پشت گوهڤە نەهاڤێژن.
ئەڤرۆ نیوز، عەلی حاجی:
د بن چاڤدێریا رێڤەبەریا گشتی یا شەهید ئەنفالکریان ل پارێزگەها دهوکێ و رێڤەبەریا شەهید و ئەنفالکریان ل زاخۆ و ب پشتەڤانیا کومپانیا کورەک تێلیکوم کوژمەکێ پارەیی ب سەر شەهیدێن شەرێ دژی رێکخراوا داعش و حەشدا شەعبی دا هاتنە بەلاڤ کرن.
ئەحمەد خەمو رێڤەبەرێ شەهید و ئەنفال کریان ل زاخۆ بۆ ئەڤرۆ نیوز گۆت: (ب پشتەڤانیا ماددی یا کومپانیا کورەک تێلیکوم و د بن چاڤدێریا رێڤەبەریا گشتی و رێڤەبەریا شەهید و ئەنفال کریان ل زاخۆ کوژمەیەکێ پارەیی کو سەرجەمێ گشتی دگەهشتە ٦١ ملیون دینارێن عێراقی ب سەر ١٢٢ خێزانێن شەهیدێن شەرێ دژی رێکخراوا تیروریستیا داعش و حەشدا شەعبی ل سنورێ قەزا زاخۆ هاتنە بەلاڤ کرن و ئەم نوزانین کو ئەڤ هاریکاری یە دێ د بەردەوام بن یان ژی بتنێ دێ بۆ جارەکێ بیت، بەلێ ئەڤە کارەکێ باش بوو ژلایێ کومپانیا ناڤهاتی ڤە هاتیە ئەنجام دان بۆ کەس و کارێن شەهیدان و د ڤان کاودانان دا دێ هاریکاریەکا باش بیت بۆ خێزانێن وان و هەر خزمەتەکا بۆ کەس و کارێن شەهیدان بهێتە کرن کو کێمترین خزمەتە ل بەرامبەر خوینا شەهیدان دهێتە کرن).
ئەڤرۆ نیوز، عەلی حاجی:
دناڤ كەمپێن پارێزگەها دهوكێ یا ئاوارەیان دا گرنگی ب پێشئێسختنا شیانێن گەنجان دهێتە دان و ب رێیا ڤەكرنا خولێن دوروارێ و فروتنا بەرهەمێ دەستێ پشكدار بویان پارەیەك ب سەر پشكداربویان دا دهێتە بەلاڤ كرن .
ئاڤان ئەحمەد بەرپرسا سەنتەری ل كەمپا چەمشكو بۆ ئەڤرۆ نیوز گۆت: (رێكخراوا جی ئای زێد ب هەڤكاری دگەل رێڤەبەری یا گشتی یا گشەپێدانا جڤاكی ل پارێزگەها دهوكێ ب رێیا پروژەیەكێ بناڤێ پشتەڤانیا پێشكێش كرنا خزمەتێن جڤاكی دناڤ كەمپێن ئاوارەیان دا و قەزایێن زاخۆ و سێمێلێ دا ، ئەڤ پروژەیە هاتە بجه ئینان كو ل هەر ئێك ژ كەمپێن كەمپەرتو ئێك و دوو و شاریا و باجد كەندالا و قادیا و چەمشكو دگەل دوو جهێن دیتر دناڤ سەنتەرێن قەزایێن سێمێلێ و زاخۆ دا كو ب رێیا وی پروژەیی هندەك خول هاتنە ڤە كرن كو ژ وان ژی خولێن دوروارێ و كاریچن دەستی كو ل كەمپا چەمشكو نەه ئافرەتان پشكداری د وان خولان دا كر و ئەو خول بۆ دەما 35 رۆژان یا بەردەوام بوو،د بەردەوامیا وان خولان دا كو ئافرەتیچن پشكدار هندەك جل و بەرگ دروست كرن و ئەو بەرهەمە ژی د پێشانگەهەكا تایبەت دا هاتنە نیشان دان) .
ناڤبریێ دیار كر ژی پشتی ئەو بەرهەمە هاتینە نیشا دان و نیڤەكا وی بەرهەمی هاتنە فروتن و بریارە ئەو داهاتێ وی بەرهەمی وەكو هاریكاری ب سەر پشكدار بویان دا بهێتە بەلاڤ كرن.
ئەڤرۆ نیوز:
قوباد تالەبانی جێگرێ سەرۆکێ حوکمەتا هەرێما کوردستانێ راگەهاند کو پشتی پشکنین بۆ وی هاتیە کرن دەرکەفت کو تووشی ڤایرۆسێ کۆرۆنایێ بوویە و دیار کر کو پێدڤیە ئەو دەمەکێ خوە گەرەنتین بکەت هەتا کو بشێت کۆرۆنایێ دەرباز بکەت.
جێگرێ سەرۆکێ حوکمەتێ داخواز ژ هەموو وەلاتیان ژی کر کو پتر گرنگیێ ب خوەپارێزیێ بدەن و پێگیریێ ب رێنمایێن ساخلەمیێ بکەن.
ئەڤرۆ نیوز:
فائیزە رەفسەنجانی کچا هاشمی رەفسەنجانی سەرۆک کۆمارێ بەرێ یێ ئیرانێ راگەهاند کو بەری بابێ وێ بمریت هۆشداری دابوو قاسم سلێمانی کو ب چو رەنگەکێ دەستێوەردانێ د کاروبارێ ناڤخوەیی یێ سووریێ دا نەکەن، لێ مخابن کەسێ گوه نەدا بابێ من و ژ بەر دەستێوەردانێن ئیرانێ ل سووریێ نیڤ ملیون کەس بوونە قوربانی.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٦٨ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و هەروەسا شەش نەخوشێن کۆرۆنایێ ژی مرینە.
وەزارەتا ساخلەمیێ ئەو یەک ژی دیار کریە کو د ماوەیێ ٢٤ دەمژمێرێن بۆری دا ٩٦٨ نەخوشێن کۆرۆنایێ ژی چارەسەر بووینە.
ل پارێزگەها دهۆکێ ژی بیست کەسێن دی تووشی ڤایرۆسێ کۆرۆنایێ بووینە و نەخوشەک ژی مریە و ٣٢٠ نەخوش ژی ب تەمامی چارەسەر بووینە.
ئەڤرۆ نیوز، عەلی حاجی:
د داخۆیانیەكێ دا سەرۆكێ باژێرڤانیا زاخۆ بۆ ئەڤرۆ نیوز دیار كر وان دەست ب هەلمەتەكا بەرفرەه كریە بۆ پاقژكرنا گلێش و بەرمایكێن خانیێن دناڤ سەنتەرێ باژێرێ زاخۆ دا و پێدڤیە خەلك ژی هاریكار بیت بۆ پاقژ راگرتنا باژێری .
زێدەتر ئەندازیار وەلات سەعدی دیار کر بۆ دەما چەند رۆژەكانە باژێرڤانیا زاخۆ ب هەڤكاری دگەل كومپانیا هیزل دبن سەرپەرشتیا راستەوخویا یا من دا دەست ب هەوەكا پاقژكرنێ دناڤ سەنتەرێ باژێرێ زاخۆ دا هاتیە كرن و ئەڤ هەوە ژی هەوەكا بەرفرەهە ب تایبەتی ژی ئەو جهێن گلێش و بەرمایكێن خانیان لێ كوم بووینە و نەهاتینە راكرن، ل دووڤ پلانێ كو ئەو جهێن گلێش لێ كومڤە بوویی تیمێن كومپانیا هیزا رادبن ب راكرنا وی گلێشی و هەر دیسان ئەو جهێ بەرمایكێن خانیان لێ هاتینە هاڤێتن و كومڤە بووین تیمێن مە یێن باژێرڤانیا زاخۆ رادبن ب راكرنا وان بەرمایكان بەلێ ب مخابنی ڤە خەلكێ مە یێ هاریكار نینە دگەل مە دا دەمێ كو رادبین ب پاقژكرنا جهەكێ دێ بینن رۆژا دووڤ دا ئەو جه دیسان ڤە ژلایێ وەلاتیان ڤە دهێتە پیس كرن و ئەڤە ژی دبیتە ئەگەر كو بارێ مە گرانتر ببیت) .
ناڤهاتی ئەو یەک ژی دیار کر بۆ قوناغا دویێ ژی كو پشتی ناڤ سەنتەرێ باژێری دا ئەڤ هەوە ب دووماهی دهێت دێ ل جهێن كو سەیرانی ب تایبەتی ل وەرزێ بهارێ قەستا وان جهان دكەن وەكو دەڤەرێن بێزهێ و بێتاسێ دێ ژ بەرمایك و گلێشی هێنە پاقژ كرن و ژ بەر كو ئەڤە بۆ دەمەكە درێژە ئەو دەڤەر هاتینە پشتگوه هاڤێتن ب تایبەتی ژی د دەما هاتنا كورونایێ دا.
نيشاندان