ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٣٥ کەسێن دی ل هەرێما کوردستانێ تووشی کۆرۆنایێ بووینە و هەروەسا ٢٢ تووشبوو ژی مرینە.
ل پارێزگەها دهۆکێ ژی ٢٨٣ کەس تووشی کۆرۆنایێ بووینە و چار تووشبوو ژی مرینە.
هەروەسا د ماوەیێ ٢٤ دەمژمێرێن بۆری دا ٢٨٦ نەخوشێن کۆرۆنایێ ژی ب تەمامی باش بووینە.
ئەڤرۆ نیوز، عەلی حاجی :
سەروكێ فراكسیونا زەر ل ئەنجومەنێ پارێزگەها دهوكێ بۆ ئەڤرۆ نیوز دیار كر حكومەتا عێراقێ رێژەیەكا كێم ژ گازا سپی دێ رەوانەی پارێزگەها دهوكێ كەت بەلێ ئەو رێژەیە تێرا پارێزگەهێ ناكەت و پێدڤیە حكومەتا هەرێما كوردستانێ ژی ژلایێ خوەڤە پشكەكێ دابین بكەت دا كو ئەو گاز ب سەر وەلاتیان دا بهێتە بەلاڤ كرن .
زێدەتر هشیار گوللی گۆت : (بریار بوو د ماوەیێ سێ روژێن بوری دا بەهرا گازاس سپی یا یارێزگەها دهوكێ كو ئەوا 7 ملیون و 900 هزار لیتر بۆ پارێزگەها دهوكێ ژلایێ حكومەتا عێراقێ ڤە هاتینە دابین كرن گەهشتبایە پارێزگەها دهوكێ بەلێ هەتا نوكە نەهاتیە رەوانە كرن و ئەم ب هێڤی نە دەمەكێ نێزیك دا بهێتە رەوانە كرن، هەر چەندە ئەو پشكە گەلەك كێمە تا كو هەر خێزانەك بشێت بەرمیلەكا گازا سپی وەربگریت ژبەر كو پارێزگەها دهوكێ پێدڤی ب 54 ملیوت لترایە و بۆ هەر سێ پارێزگەهێن هەرێما كوردستانێ ژی حكومەتا عێراقێ بتنێ 50 هزار لتر دابین كرینە ئەڤجا ژبەر ڤێ چەندێ پێدڤی یە حكومەتا هەرێما كوردستانێ ژلایێ خوە رێژەیەكا دیتر یا یا گازا سپی دابین بكەت ل سەر پشكا پارێزگەها دهوكێ هەتا كو بشێن دەمەكێ نێزیك دا پروشەیا گازا سپی بهێتە دەست پێكرن و زێدەتر وەلاتی سد مەند ببن).
ناڤهاتی ئەو چەندە ژی گۆت: (هەر دەمێ پشكا پارێزگەها دهوكێ گەهشتە دەست ب رێڤەبەریا بەلاڤ كرنا بەرهەمێن نەفتێ د وی دەمی دا دێ چاڤدێریەكا باش ل سەر كەین دا كو د زووترین دەم دا ل دویڤ پلانەكا باش دەست ب بەلاڤ كرنا پروسەیا گازا سپی بۆ مالان بهێتە كرن ژبەر كو ئەم یێ بەرەڤ وەزرێ زڤستانێ ڤە دچین و دێ وەلاتیان پێدڤی ب وێ گازا سپی هەبیت).
ئەڤرۆ نیوز،عەلی حاجی :
رێڤەبەرا رێکوپرا ل پارێزگەها دهوکێ بۆ ئەڤرۆ نیوز دیار کر وان نەخشەیەکێ دەست پێکی ئامادە کری یە بۆ پروژەیێ ئەندەر پاسا دەروازا باژێرێ زاخۆ و دانانا ئەندەر پاسێ ژی ل دویف داخازیا رێڤەبەریا هاتن و چوونا زاخۆ بوو .
زێدەتر خەدیجە محەمەد گۆت : وەکو لەز کرن د کاری دا مە دیزاینەکا دەست پێکی دروست کری یە بۆ ئەندەر پاسا زاخۆ ئەوا دێ ل دەروازا زاخۆ هێتە دانان و نوکە دا ئەو پروژەیە د قوناغا راگەهاندنێ دایە و پشتی وی قوناغێ ژی ئەو پروژەیە وەکو وەکو تەندەرەک دێ ب وەبەرهێنەرەکێ هێتە دان داکو قوناغێن رووتینی ببریت و ئەو پروژەیە بکەڤیتە د وارێ جێبەجێ کرنێ دا و دشێن بێژین هەتا نوکە وی پروژەیی قوناغێن باش دەرباز کرینە ل سەر رێیەکا دروست دچیت و پشتی کارێن رووتینی خلاس دبن دێ د وی دەمی دا ژڤانێ دەست پێکرنا وی پروژەیی هێتە ئاشکەرا کرن و قوناغێن دیترێ دیزاینا دووماهیێ ژی دێ بۆ وەبەر هێنەری ڤەگەریت ژبەر کو ئەو دێ دیزاینا دووماهیێ لدوو رەزامەندیا مە دروست کەت.
ناڤهاتیێ گۆت ژی : ئەو پروژەیە لدووڤ داخوازیا رێڤەبەریا هاتنوچوونا زاخۆ بوو ژبەر کو هەر وان دایە دیار کرن ژبەر نەبونا ئەندەرپاسەکێ ل دەروازەیا زاخۆ روودانێن هاتن چوونێ ل وێ جادێ د زێدەنە و ئەو چەندە ژی ئەگەرێ سەرەکیێ دروست بوونا روودانێن هاتن وچوونێ یە و ب دانانا ئەندەر پاسێ ژی دێ روودانێن هاتن و چوونێ بەرەڤ کێم بوونێ ڤە چن .
ئەڤرۆ نیوز،عەلی حاجی :
بەرپرسێ راگەهاندنا ساخلەمیا زاخۆ بۆ ئەڤرۆ نیوز دیار کر روژانە تووشبوویێن کورونایێ دهێنە تومار کرن و هەتا نوکە ژی ١٤٥٩ کەس ل زاخۆ تووشی کورونایێ بوینە و پێدڤی خەلک ژی پتر هوشیاریا خوە پاراستنێ لدەف خوە بلند بکەت .
زێدەتر ئەمیر عەلی گۆت : بۆ دەما ٢٤ دەمژمێرێن بوری دا ژ سەرجەمێ ٧٠ تێستێن هاتینە ئەنجام دان ٢٤ کەس ل سنورێ قەزا زاخۆ تووشی کورونایێ بوینە و سەرجەمێ گشتی ژی دبیتە ١٤٥٩ کەس و ژ وان ژی ٩٠ کارمەندێن مەیێن ساخلەمیێ نە و روژانە ژی حالەتێن گیان ژ دەست دانێ دهێنە تومار کرن لەورا پێدڤی یە خەلکێ مە زێدەتر هەستا هوشیاریێ ل دەف خوە دروست بکەت داکو ژ ڤایروسێ کورونایێ پاراستی بن و تیمێن مە ژی بەردەوامن ل سەر وەرگرتنا تێستان بۆ زانینا حالەتێن روژانەیێن کورونایێ و هەکە ئاستێ خوە پاراستنا وەلاتیان ب ڤی رەنگی بیت دڤیت حالەتێن زێدەتر بهێنە تومار کرن .
ئەڤرۆ نیوز، زنار تۆڤی:
ئەڤرۆ ل دەمژمێر 9:30 سپێدێ هەتا دەمژمێر 10:00 فرۆکێن سۆپایێ تورکی ب سێ بۆمبەیان گەلیێ بازێ ل ناحیا کانی ماسێ یێ سەر ب قەزا ئامێدیێ ڤە بوردۆمان کریە.
محەمەد وەلاتیەکێ وێ دەڤەرێ یە، بۆ ئەڤرۆ نیوز دیار کر: ب بەهانەیا گەریلایێن پەکەکێ جارەکا دی فرۆکێن ئێف 16 یێن سۆپایێ تورکی بۆ دەمێ نیڤ دەمژمێرێ گەلیێ بازێ بۆمبە باران کریە و سێ بۆمبە ل ناڤا وی گەلی داینە، دەنگەکێ مەزن ژ وان بۆمبەیان دهات، هەروەسا د ئەڤ سالە دا ئەڤە چەندین جاران ئەو گەلیە ژ ئالیێ هێزێن ئەسمانی یێن تورکی ڤە دهێتە بۆمبە باران کرن.
گەلیێ بازێ گەلیەکێ کوور و ئاسێ یە و دکەڤتە باکورێ گوندێ بازێ ل بنارێ چیایێ مەتینی و شکەفتێن مەزن ئاسێ لێ هەنە، هەر هەیام هەیام فرۆکێن تورکی وی گەلی بوردۆمان دکەن و ژ ئەگەرێ وان بۆمبە بارانان زیان دگەهیتە خەلکێ گوندێ بازێ.
ئەڤرۆ نیوز، زنار تۆڤی:
هاریكارێ سەرۆكێ زانكۆیا دهۆكێ بۆ كاروبارێن قوتابیان د. مێڤان عارف بۆ ئەڤرۆ نیوز دیار كر: ژ بەر رەوشا نوكە یا ساخلەمیێ و ب رێككەفتن ل گەل هەردو زانكۆیێن سەلاحەدین و سلێمانیێ، هەتا 1/11/2020 پشكێن ناڤخۆیی ناهێنە بەلاڤ كرن و گۆت ژی: بریار هاتیە دان وانێن پراكتیكی بهێنە پاشخستن بۆ پشتی 1/11 و ب تنێ وانێن تیوری بهێنە گۆتن ب رێكا ئۆنلاین.
د. مێڤان عارفی گۆت ژی: ل 1/11 دێ پشكێن ناڤخۆیی هێنە بەلاڤ كرن بۆ وان قوتابیێن وانێن پراكتیكی هەین دناڤ كەمپێ زانكۆیێ دا داكو بشێن خواندنا خوە ل تاقیگەهـ و پشكێن خۆ یێن زانستی ب دروستی ب رێڤە ببەن، هەروەسا هەتا وی دەمی داپتر د شیان دا بیت پشكێن ناڤخۆیی ژی بهێنە بەرهەڤ كرن و باشترین ئاڤاهیی بۆ بهێنە دابین كرن، لەوما ژ نوكە هەتا هەیڤا 11 قوتابی دێ وانێن تیۆری وەرگرن لدووڤ راسپاردا سەرۆكێ زانكۆیا دهۆكێ كو رێككەفتن ل گەل هەردو زانكۆیێن سەلاحەدین و سلێمانیێ ژی كریە ل دۆر ڤی بابەتی.
هاریكارێ سەرۆكێ زانكۆیا دهۆكێ بۆ كاروبارێن قوتابیان ئاشكرا كر ژی: ئەو ئاڤاهیێن ئەڤ سالە بۆ پشكێن ناڤخۆیی دهێنە گرتن دڤێن ئاڤاهیێن رائێخستی بن ژلایێ كەلوپەلان ڤە ژبەر بابەتێن مەزاختنێ و دابین كرنا پێدڤیێن قوتابیان، هەروەسا بۆ ئەزموونان ژی لدووڤ پیڤەرێن وەزارەتێ دێ پشك هێنە دابین كرن كو هەتا رێنمایی دگەهن، كانێ دێ بۆ سالا نوو یا خواندنێ بەلاڤكرنا ڤان پشكا ب چو شێوە بیت، چونكی ژ بەر ڤایرۆسێ كورونایێ، پێشتر هندەك ژوورا هەتا چار قوتابیان دكرنە دئێك ژوور ڤە، بەلێ نوكە دبیت هەر دو قوتابی ب تنێ بچنە د ئێك ژوورڤە بن، ئەڤ رێنمایە دێ ڤێ هەیڤێ گەهن و ل سەر بنیاتێ وان رێنمایان پشك دێ هێنە بەلاڤ كرن.
ئەڤرۆ نیوز:
گەلەک کەس بۆ کێمکرنا کێشا لەشێ خوە شیڤێ ناخون، لێ نۆشدار دبێژن، هەکە دانەکێ خوارنێ نەخۆت دێ زیان گەهیتە ساخلەمیا مرۆڤی.
مالپەرێ سحەتی د بابەتەکێ دا نڤیسیە، خوارنا شیڤێ ب ئاوایەکێ ساخلەم بۆ لەشی یا گرنگە و نابیتە ئەگەرێ قەلەویێ، ب تایبەت هەکە گەلەک شەکر و چەوری تێدا نەبیت.
ژ مفایێن گرنگ یێن خوارنا شیڤێ ئەوە، مادێن خوارنێ یێن گرنگ ددەتە لەشی، کو ب درێژاهیا شەڤێ لەشی چالاک دهێلیت.
هەروەسا نۆشدار ئامۆژگاریان ل خەلکێ دکەن، کو خوارنا نانێ ئێڤاری ژبیر نەکەن، هەروەسا بۆ کێمکرنا لەشی باشترە مرۆڤ کەسکاتی و زەلاتێ و ماسی و خوارنێن پڕۆتینی و ئەو خوارنێن چەوری تێدا نەبن بخون.
دیسان دبێژن ژی، ئەو خوارنێن کالۆریا وان یا زێدە نەخۆن ل گەل شرینیان، ژبەر کو هەڤکار نابن بۆ کێمکرنا کێشا لەشی.
ئەڤرۆ نیوز:
ئەڤرۆ ئێکشەمبی، بهایێ تمەنێ ئیرانی نزمترین ئاست ل هەمبەر دۆلاری تۆمار کر، کو دۆلارەکێ ئەمریکی هەمبەری ٢٩ هزار تمەنێ ئیرانی بوویە ب ڤێ چەندێ ژی بهایێ ١٠٠ دۆلاران ب دو ملیون و٩٠٠ هزار تمەنان بوویە.
ل دەمێ چەند رۆژێن بوریدا، بهایێ تمەنێ ئیرانی ل هەمبەر دۆلاری داکەفتنەکا بەرچاڤ بخوە ڤە دیتیە، ئەڤەژی پشتی بریارا دۆنالد ترەمپێ سەروکێ ئەمریکا دهێت، کو پشکەک ژ سزایێن ل سەر ئیرانێ چالاک کرین
ئەڤرۆ نیوز:
وەزارەتا ساخلەمی و ژینگەها عیراقێ راگەھاند: د ٢٤ دەمژمێرێن بوری دا، سێ ھزار و ٤٨١ حالەتێن نوو یێن کۆرۆنایێ و سێ ھزار و ٧٥٥ حالەتێن باشبوونێ و ٥٥ حالەتێن وەغەرکرنێ ھاتینە تۆمار کرن.
ھەتا نوکە ٣٤٩ ھزار و ٤٥٠ کەس ل عیراقێ تووشی ڤایرۆسێ کۆرۆنایێ بووینە، دیسان هەتا ڤی دەمی هەشت ھزار و ٩٩٠ کەسان وەغەرکریە، هەروەسا ٢٨٠ ھزار و ٦٧٣ کەس ژی باشبووینە.
ئەڤرۆ نیوز:
بریارە سوبەهی، شاندەکێ بازرگانی یێ تورکیا سەرەدانا ھەرێما کوردستانێ بکەت و چەندین دیدارێن بازرگانی ئەنجام بدەت.
سوبەهی دوشەمبی، 28.9.2020 دی شاندەکێ بازرگانی یێ تورکی کو پێکھاتینە ژ کۆنسولخانا تورکیا ل ھەولێرێ، دەستەیا گومرکی یا تورکیا و نوونەرێ وەزارەتا بازرگانیا تورکیا سەرەدانا لقێ ھەولێرێ یێ ئێکەتیا ھاوردە و هنارتنێ یا ھەرێما کوردستانێ بکەن.
نيشاندان