ئەڤرۆ نیوز:
ژێدەرێن میدیایی ل رۆژئاڤایێ کوردستانێ دیار دکەن کو دو رۆژن چەند کاروانێن سەربازی یێن ئەمریکا ل پارێزگەها حەسەکێ ل تەل تەمرێ بجه بووینە و ئەو یەک ژی بوویە جهێ دلخوەشیا خەلکی.
بەرپرسەکێ هێزێن سووریا دیموکرات ژی دیار کریە کو ژ بەر مەترسیا هێرشێن تورکیا و گرۆپێن چەکدار ئەمریکا دڤێت هێزێن خوە ل چەندین دەڤەرێن گرنگ بجه بکەت.
ئەڤرۆ نیوز:
ناڤەندا چاڤدێریا مافێن مرۆڤی یا سووریێ راگەهاند کو پشتی بزاڤێن تورکیا یێن بۆ داگیرکرنا باژێرکێ عەین عیسا شاندەکێ هێزێن سووریا دیموکرات ل گەل هێزێن ئەمریکا کۆمبووینە و د کۆمبوونێ دا شاندێ ئەمریکا بۆ وان دیار کریە کو ئەو رێ نادەن تورکیا عەین عیسا و دەڤەرێن دی یێن رۆژئاڤایێ کوردستانێ داگیر بکەت.
ئەڤرۆ نیوز:
سەرۆکێ دەستەیا حەشدا شەعبی راگەهاند کو وان پرۆژەیەک بۆ ئاڤاکرنا باژێرکێن ئاکنجیبوونێ بۆ چەکدارێن خوە بەرهەڤ کرینە و دێ ل هەموو پارێزگەهان باژێرکێن ئاکنجیبوونێ ئاڤا کەن و دەستپێکێ ژی دێ ل هەر دو پارێزگەهێن بەسرە و بەغدا بجه ئینن.
فالح فەیاز ئەو یەک ژی دیار کر کو د چارچۆڤێ پرۆژێ وان، وان ل بەرە ل کەرکووکێ و شەنگالێ ژی باژێرکێن ئاکنجیبوونێ دروست بکەن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٨٠ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و چار نەخوش ژی مرینە.
وەزارەتا ساخلەمیێ ئەو یەک ژی دیار کریە کو ٩٧٦ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ١٤ کەسێن دی تووشی ڤایرۆسێ کۆرۆنایێ بووینە و نەخوشەک ژی مریە و هەروەسا ٣٧٦ نەخوشێن کۆرۆنایێ ژی ب تەمامی چارەسەر بووینە.
ئەڤرۆ نیوز:
پشتی ناکۆکیێن زێدە و رەتکرنا ئەنجامێن هەلبژارتنان ژ ئالیێ دۆنالد ترامپێ سەرۆکێ نها یێ ئەمریکا و هەروەسا ئالۆزیێن دوهی ل ئەمریکا، د ئەنجام دا کۆنگرێسێ ئەمریکا ب ٣٠٦ دەنگان جۆ بایدن وەکو ٤٦ مین سەرۆکێ ئەمریکا پەسەند کر و نها چو ئاستەنگی ل هەمبەر دەستبکاربوونا جۆ بایدن وەکو سەرۆکێ ئەمریکا نەماینە.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ١٠٣ کەسێن دی ل هەرێما کوردستانێ تووشی ڤایرۆسێ کۆرۆنایێ بووینە و سێ نەخوش ژی مرینە.
وەزارەتا ساخلەمیێ ئەو یەک ژی دیار کریە کو د ماوەیێ ٢٤ دەمژمێرێن بۆری دا ٩٧٤ نەخوشێن کۆرۆنایێ ژی چارەسەر بووینە.
ل پارێزگەها دهۆکێ ژی ٥٩ کەسێن دی تووشی ڤایرۆسێ کۆرۆنایێ بووینە و ٣٨٦ نەخوش ژی چارەسەر بووینە و چو حالەتێن مرنێ ژی نەهاتیە تۆمار کرن.
ئەڤرۆ نیوز:
وەزارەتا شەهیدان و ئەنفالکریان یا حوکمەتا هەرێما کوردستانێ راگەهاند کو ژ بەر نەبوونا مەرجێن قانوونی موچێ ١٣ هزار و ٢٨٢ کەسان هاتیە بڕین و ئەڤ بریارە ژی دێ ل رۆژا ١/١/٢٠٢١ هێتە بجهئینان.
وەزارەتا شەهیدان و ئەنفالکریان یا حوکمەتا هەرێما کوردستانێ ئەو یەک ژی دیار کریە کو بریارا وان د چارچۆڤێ پرۆژێ چاکسازیێ دا هاتیە دان.
ئەڤرۆ نیوز:
د روونشتنا ئەڤرۆکە یا پەرلەمانێ کوردستانێ دا د. کەمال ئەتروشی کاندیدێ پارتی دیموکراتی کوردستان ب دەنگێ ٨١ ئەندامێن پەرلەمانێ کوردستانێ ب فەرمی بوویە وەزیرێ نوو یێ سامانێن سروشتی ل حوکمەتا هەرێما کوردستانێ.
د. کەمال ئەتروشی ب فەرمی سووندا قانوونی ژی خوار و دێ وەکو وەزیرێ سامانێن سروشتی ل حوکمەتا هەرێما کوردستانێ دەست ب کارێ خوە کەت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ١٠٧ کەسێن دی ل هەرێما کوردستانێ تووشی کۆرۆنایێ بووینە و شەش نەخوش ژی مرینە.
وەزارەتا ساخلەمیێ راگەهاند ژی کو د ماوەیێ ٢٤ دەمژمێرێن بۆری دا ٩٨٢ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٥٠ کەسێن دی تووشی کۆرۆنایێ بووینە و چار نەخوش ژی مرینە و هەروەسا ٣٨٢ نەخوشێن کۆرۆنایێ ژی ل پارێزگەها دهۆکێ چارەسەر بووینە.
نيشاندان