سەرۆكێ هەرێما كوردستانێ پێشوازی ل بالیۆزا نوو یا هۆلەندا ل ئیراقێ كر، كو د وێ دیدارێدا بالیۆزا هۆلەندا پیرۆزباهییا سەركەفتنا هەلبژارتنێن پەرلەمانێ كوردستانێ ل نێچیرڤان بارزانی و گەلێ كوردستانێ پیرۆز كر.
دوهی چارشەمبی 30/10/2024 نێچیرڤان بارزانی، سەرۆكێ هەرێما كوردستانێ پێشوازی ل جانێت ئالبێردا، بالیۆزا نوو یا وەلاتێ هۆلەندا ل ئیراقێ كر.
ب گۆڕەی بەیاننامەیا سەرۆكایەتییا هەرێما كوردستانێ، د كۆمبوونێدا نێچیرڤان بارزانی سەرەرای پیرۆزباهیكرنێ بۆ دەستكاربوونا وێ، هیڤییا سەركەفتنا بۆ بالیۆزا نوو یا هۆلەندا ل ئیراقێ خواست و هەموو پشتەڤانییەكا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وێ، دوپاتكر.
ژ ئالیێ خوەڤە، ئالبێردا خوەشحالییا خوە ب سەرەدانێ و دەستبكاربوونێ ل هەرێما كوردستانێ نیشاندا، وەكو د بەیاننامەیا سەرۆكایەتییا هەرێما كوردستانێدا هاتی، بالیۆزا هۆلەندا ل ئیراقێ پیرۆزباهییا سەركەفتنا هەلبژارتنێن پەرلەمانێ كوردستانێ ل نێچیرڤان بارزانی و گەلێ كوردستانێ كر.
هەردو ئالییان دوپاتی ل خواستا دو ئالییانە بۆ پێشڤەبرنا پەیوەندیێن هۆلەندا ل گەل ئیراقێ و هەرێما كوردستانێ و بەرفرەهكرنا هاریكارییا هەڤپشك د ناڤبەرا واندنا د وارێن جودا جودا كر، هەروەسا رۆلێ هۆلەندا ل هەڤپەیمانییا نێڤدەولەتییا دژی داعشێ و هاریكارییێن وێ بۆ ئیراقێ و هەرێما كوردستانێ ب بلند هاتە هەلسەنگاندن.
پەیوەندیێن هەولێرێ – بەغدا، دووماهی پێشهاتێن رەوشا ئالۆز یا رۆژهەلاتا ناڤین و مەترسی و ئەگەرێن ئەنجامێن وێ ل سەر ئاسایش و سەقامگیرییا دەڤەرێ، تەوەرەكێ دی یێ كۆمبوونێ بوو.

دوهی چارشەمبی 30/10/2024 مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ ئەلمانی ب سەرۆكایەتییا پەرلەمانتار سیمتیێ میولەر، وەزیرا دەولەتێ ل وەزارەتا بەرگرییا ئەلمانیا كر.
د كۆمبوونەكێدا پێشڤەبرنا پەیوەندیێن دو ئالییانە و پێشكەفتنێن پڕۆسەیا چاكسازیێ ل وەزارەتا كاروبارێن پێشمەرگەی و رەوشا ئەمنی و لەشكرییا ئیراقێ و دەڤەرێ هاتە باسكرن.
سەرۆكێ حوكمەتا هەرێما كوردستانێ سوپاسییا پشتەڤانی و هاریكارییا ئەلمانیا بۆ هێزا پێشمەرگەی كر، هەروەسا پێزانینا هەرێما كوردستانێ بۆ بڕیارا حوكمەت وپەرلەمانێ ئەلمانیا دیاركر بۆ درێژكرنا دەمێ مانا هێزێن ئەلمانی ل هەرێما كوردستانێ.
هەردو ئالی د هەڤڕا بوون ل سەر گرنگییا پێكئینانا كابینەیا نوو یا حوكمەتا هەرێما كوردستانێ د زووترین دەمدا.
دووماهی پێشهاتێن رەوشا ئالۆز یا رۆژهەلاتا ناڤین و گرنگییا پاراستنا ئاسایش و سەقامگیرییا دەڤەرێ، پشكەكا دی یا دانوستاندنان بوو.

دوهی چارشەمبی 30/10/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل موسەننا سامەرائی، ئەندامێ جڤاتا نوونەرێن ئیراقێ و سەرۆكێ هەڤپەیمانییا عەزم كر.
د دیدارەكێدا، باس ل رەوشا گشتی و پەیوەندیێن هەرێما كوردستانێ و حوكمەتا فیدرال هاتە كرن.
سەرۆكێ هەڤپەیمانییا عەزم، پیرۆزباهییا سەركەفتنا هەلبژارتنێن خولا شەشێ یا پەرلەمانێ كوردستانێ ل سەرۆكێ حوكمەتا هەرێمێ كر كو پڕۆسەیەكا دیموكراسییانەیا سەركەفتی بوو.
هەروەسا دوپاتی ل گرنگییا چارەسەركرنا كێشەیێن دناڤبەرا هەرێما كوردستانێ كوردستانێ و حوكمەتا فیدرال ل سەر بنەمایێ دستووری و رێككەفتنان هاتە كرن.

دوهی 29/10/2024 سەرۆك مەسعود بارزانی ل سەلاحەدین پێشوازی عەمار ئەلحەكیم، سەرۆكێ باسكێ حیكمە یێ نیشتمانیێ ئیراقی كر.
بارەگەهێ بارزانی بەلاڤكر» ل دەستپێكا دیدارێ، عەمار ئەلحەكیم ب هەلكەفتا سەركەفتنا هەلبژارتنێن خولا شەشێ یا پەرلەمانێ كوردستانێ كو ل 20 ئۆكتۆبەرێ هاتبوونە ئەنجامدان، پیرۆزباهی ل سەرۆك بارزانی و گەلێ كوردستانێ كر و ب دەستكەفتەكا گرنگ هەژمارت».
هەر د وێ دیدارێدا هەردو ئالییان بیر و بۆچوون ل دۆر رەوشا سیاسییا ئیراقێ و پەیوەندیێن د ناڤبەرا هەرێما كوردستانێ و ئیراقا فیدرال و هەروەسا دوماهی پێشهات و گوهۆڕینێن سیاسی و ئەمنی یێن دەڤەرێ و پێدڤییا پاراستنا سەقامگیرییا ئیراقێ، لێكگوهارت.

بارەگەهێ بارزانی بەلاڤكر، ل رۆژا سێشەمبی 29/10/2024، سەرۆك مەسعود بارزانی ل سەلاحەدین پێشوازی ل موسەننا سامەرائی، سەرۆكێ هەڤپەیمانییا عەزم كر.
د دیدارەكێدا رەوشا سیاسییا ئیراقێ و دوماهی پێشهات و پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال هاتنە گەنگەشەكرن.
هەر د وێ دیدارێدا باس ل ئەنجامدانا هەلبژارتنێن خولا شەشێ یا پەرلەمانێ كوردستانێ هاتە كرن و سەرۆكێ هەڤپەیمانییا عەزم پیرۆزباهییا سەركەفتنا پڕۆسەیا هەلبژارتنێن پەرلەمانێ كوردستانێ ل سەرۆك بارزانی كر.

دوهی سێشەمبی 29/10/2024، نێچیرڤان بارزانی، سەرۆكێ هەرێما كوردستانێ، پێشوازی ل ئێلینا رۆمانووسكی، بالیۆزا ئەمریكا ل ئیراقێ كر.
د كۆمبوونەكێدا هەلبژارتنێن خولا شەشێ یا پەرلەمانێ كوردستانێ و ئەنجامێن وان هاتنە گەنگەشەكرن و رۆمانووسكی، پیرۆباهییا سەركەفتنا هەلبژارتنێن پەرلەمانێ كوردستانێ ل نێچیرڤان بارزانی و گەلێ كوردستانێ كر. سەبارەت ڤێ چەندێ هەردو ئالییان دوپاتی ل گرنگییا تێكگەهشتنا ئالیێن سیاسی بۆ پێكئینانا حوكمەتا نوو یا هەرێما كوردستانێ كر.
د كۆمبوونەكێدا، باس ل پەیوەندیێن حوكمەتا هەرێما كوردستانێ و حوكمەتا ئیراقا فیدرال و بزاڤێن وان بۆ چارەسەركرنا كێشەیێن د ناڤبەرا واندا كر. هەردو ئالییان بەردەوامییا دانوستاندنان د ناڤبەرا بەغدا و هەولێرێ بۆ چارەسەركرنا كێشەیان ب تێكگەهشتنێ بلند هەلسەنگاند و د هەڤڕا بوون ل سەر وێ چەندێ چارەسەربوونا كێشەیێن دناڤبەرا بەغدا و هەولێرێدا، دێ سەقامگیرییا وەلاتی ب هێزتر لێكەت.
د تەوەرەكێ دی یێ كۆمبوونێ رۆناهی ئێخستە سەر دوماهی پێشهاتێن رەوشا مەترسیدارا رۆژهەلاتا ناڤین و دوپاتی ل گرنگییا كاركرنا هەمە ئالییانە ل دەڤەرێ كر بۆ پاراستنا سەقامگیریێ ورێگرتنێ ل پتر زێدەبوونا ئالۆزییان. هەر سەبارەت ڤێ چەندێ هەردو ئالییان دوپاتكر كو پێدڤییە ئیراق ژ ململانێ و كێشەیێن دەڤەرێ، یا دوور بیت.
پەیوەندیێن ئەمریكا ل گەل ئیراقێ و هەرێما كوردستانێ و چەند پرسێن دی یێن جهێ گرنگییا هەڤپشك، ئالییەكێ دی یێ كۆمبوونێ بوو.

دوهی سێشەمبی 29/10/2024، نێچیرڤان بارزانی، سەرۆكێ هەرێما كوردستانێ، د دیدارەكێدا ل گەل عەمار ئەلحەكیم، سەرۆكێ باسكێ حیكمە یێ نیشتمانیێ ئیراقی، هەلبژارتنێن پەرلەمانێ كوردستانێ و ئەنجامێن وان گەنگەشەكر، عەمار ئەلحەكیم پیرۆزباهییا سەركەفتنا هەلبژارتنێن پەرلەمانێ كوردستانێ ل نێچیرڤان بارزانی كر.
هەردو ئالییان دوپاتی ل سەر گرنگییا بەردەوامییا دانوستاندنێن هەولێر – بەغدا كر و د هەڤڕا بوون كو چارەسەركرنا كێشەیان ب تێكگەهشتنێ و ل سەر بنەمایێ دستووری، دێ بیتە ئەگەرێ زێدەتر ب هێزكرنا ئارامیێ و سەقامگیریێ ل ئیراقێ.
هەر سەبارەت ڤێ چەندێ هەردو ئالییان پێكڤەكاركرن و هاریكاری د ناڤبەرا هێز و ئالیێن سیاسی و پێكهاتەیێن ئیراقێ ژ پێخەمەت بەرژەوەندییا بلند یا وەلاتی، ب پێدڤی هەژمارت.
هەر د وێ دیدارێدا سەرۆكێ هەرێما كوردستانێ و سەرۆكێ باسكێ حیكمە یێ نیشتمانی داكۆكی ل وێ چەندێ كر كو پێدڤییە هەموو ئالییەك كار بۆ وێ چەندێ بكەن ئارامی و سەقامگیری ل رۆژهەلاتا ناڤین بهێتە پاراستن، ب هیچ شێوەیەكی ئیراق نەچیتە د ناڤ ئالۆزیێن دەڤەرێدا و ژ ئەنجامێن وان ئالۆزییان یا دوور بیت.

دیدارا ئینیستیتیۆتا مێری 2024، ب ناڤونیشانێ ( بەر ب حوكمڕانییا دروست و خوەشگوزەرانی) دوهی سێشەمبی 29/10/2024، چالاكیێن خوە ل هەولێرێ دەستپێكر.
مەسرور بارزانی، سەرۆكێ حوكمەتا هەرێما كوردستانێ پشكداری د پەنەلەكێ دیدارێ كر و تێدا راگەهاند» هەلبژارتن گەلەك د گرنگ بوون بۆ هەرێما كوردستانێ، بۆ زڤراندنا شەرعییەتێ بۆ هەموو دەزگەه و پێگەهێن حوكمڕانیێ و دەستهەلاتێ ل هەرێما كوردستانێ».
مەسرور بارزانی گۆت ژی» پێدڤی بوو بەری دو سالان ئەڤ هەلبژارتنە هاتبانە ئەنجامدان، بەلێ ژ بەر هندەك هۆكارێن دیار و پێداگیرییا هندەك ئالییان هەلبژارتن هاتنە پاشئێخستن، تاكو گەهشتە وێ حالەتێ داخوازا گوهۆڕینا قانوونا هەلبژارتنان هاتە كرن، هەروەسا داخوازییا نەهێلانا كورسیێن كۆتایان هاتە كرن، هەروەسا داخواز هاتە كرن كۆمسیۆنا بلند یا سەربخوە یا هەلبژارتنان ل بەغدا سەرپەرشتییا هەلبژارتنان بكەت».
سەرۆكێ حوكمەتا هەرێمێ ئاماژە ب وێ چەندێ ژی كر» هەموو ڤان تشتان وەكر، ئەم ل 20 ڤێ مەهێ هەلبژارتنان ئەنجام بدەین، ب پشكدارییا 72% ژ دەنگدەرێن هەرێما كوردستانێ، كو ئەڤە ژی ئاماژەیەكا دیارە، كو خەلكێ هەرێما كوردستانێ یێ هشیارە و ب دەنگدان ب وان ئالیێن كو باوەری یا پێ هەی، دیاركر كو چ دڤێت».
مەسرور بارزانی رۆهنكر ژی» نوكە چاڤەڕێی ئەنجامێن فەرمی یێ هەلبژارتنان دكەین، وی دەمی دێ دیار بیت كا ئەنجام د چاوانن، هیڤیدارم هەموو ئالییەك بشێن قبوول بكەن، ئەگە تێبینی ژی هەبن، بەلێ بێگومان ب پشكدارییا ئالیێن نێڤدەولەتی دیار بوو كو هەلبژارتنێن باش بوون».
سەرۆكێ حوكمەتا هەرێما كوردستانێ باس ل وێ چەندێ ژی كر» هەموو ئەو ئالیێن سیاسی یێن پشكدار د پڕۆسەیێدا وەكر، هەلبژارتن سەركەڤن، هەروەسا لایەنگرێن ئالییان ژی ب پشكدارییا وان وەكر كوردستانێ د وێ پڕۆسەیا سیاسیدا یا سەركەفتی بیت و ئێكەم بیت».
گۆت ژی» گەلەك ئالی هەبوون بەرێ هەلبژارتنان پێشبینییا ئەنجامەكی دكر، بەلێ پشتی هەلبژارتنان كو ئەنجام ب شێوەیەكی دەركەفتن، نوكە هەلویستەكێ دی یێ وەرگرتی».
مەسرور بارزانی ئاماژە كر ژی» پێدڤییە ئێدی خەلكێ كوردستانێ د وێ چەندێ بگەهیت كو راستییەك یا هەی، دڤێت ئەو راستییە بهێتە قبوولكرن، ئەنجامێن ڤان هەلبژارتنان بۆچوونا راستەقینەیا خەلكێ كوردستانێ بوو كو خەلكێ كوردستانێ باوەری ب كێ كریە، هەڤدەم ئەو بزاڤێن جەواشەكاری كو گەلەك تشت ب شێوەیەكێ دی دهاتە گۆتن، نوكە بۆ خەلكی دیاربوو چ راستی بۆ وان ئاخڤتنان نەبوو و پێگەه نەبوو، خەلكی ب بۆچوونا خوە دیاركر و ئاشكراكر كا ئەو ل گەل چ جۆرە پاشەڕۆژەكێ نە و چ پاشەڕۆژەك دڤێت، هەر ژ ڤێ روانگەهێ ژی پارتی وەكو حزبا سەركەفتی د ڤان هەلبژارتناندا دێ یا راستگۆ بیت ل گەل پەیامێن خوە كو پەیاما ئاڤەدانیێ بوو، پەیاما ئاشتیێ بوو، پەیاما پێكڤەژیانێ بوو، پەیاما ئارامیێ بوو، پەیاما خۆڕاگریێ بوو، ئەو پەیامە ژ ناخێ پارتی نە، ئەو ئەڤ رێبازەیە كو پارتی ل سەر هاتییە پەروەردەكرن، پارتی ل سەر كاركرییە، ژ نوكە و پێڤە ژی ل گەل هەر كەسەكێ دی كو بخوازیت پشكدار ببیت د حوكمەتێدا، دێ بزاڤێ كەت بەرسڤا حەز و خواستێن خەلكی بیت كو ئەو دخوازن وەلاتەكێ ئارام هەبیت، وەلاتەكێ گەشەكری هەبیت، وەلاتەك هەبیت رۆژ ل دووڤ رۆژێ پێنگاڤان ب هاڤێژیت».
خویاكر ژی» ئەم دشێین بۆ هەوە بێژین كو پارتی و ئەم دێ د راستگۆ بین ل گەل سۆزێن خوە و دێ د راستگۆ بین ل گەل خەلكێ كوردستانێ».
گۆت ژی» ل چەند سالێن بۆری یێن كابینەیا نەهێ، پارتی ل گەل وی بەرنامەیێ هەڤپشك كو ل حوكمەتێ هەبوو، بەردەوام بوو د دروستكرنا نیشتمانسازیێ دا، مە هەست ب وێ چەندێ كریە خەلكی پێدڤی ب چ هەیە، ب تایبەتی د وارێ خزمەتگوزاریێ پێنگاڤێن باش یێن هاتینە هاڤێتن، ژ روویێ دررستكرنا ژێرخانەیا ئابووری كارێ گەلەك باش یێ هاتییە كرن، ژ روویێ دروستكرنا ستراتیژییەكا نیشتمانی و نەتەوەی ل سەر ئاستێ هەموو كوردستانێ كارێ گەلەك باش یێ هاتییە كرن، ئەو ژی ب وێ رامانێ نینە هیچ ئاستەنگ نەبووینە، رێگری هەبوو ل جهئینانا بەرنامەیێن حوكمەتێ ل سالێن بۆری، لەوما باسێ سالێن بۆری دكەم، چونكە ل سالێن بۆری هندەك تشت هاتنە دروستكرن كو پێدڤی ب تمامكرنێ هەبوو، بۆ نموونە باسێ ب دیجیتالكرنا كارێن خزمەتگوزاری دكەم كو ئێك ژ پڕۆژەیێن گەلەك گرنگ بوو».
مەسرور بارزانی رۆهنكر ژی» مە ل سالێن بۆری بزاڤێن جدی كرن كو داتا سەنتەرەكێ گەلەك پێشكەفتی ل سەر ئاستێ جیهانێ ل هەرێما كوردستانێ دروست بكەین و سوپاس بۆ خودای مە دروست كرن، نوكە داتایەكا گەلەك باش یا ل بەردەست بۆ وێ چەندێ بڕیار ل سەر بهیچتە دان، پاشی بزاڤەكا جدی هاتە كرن بۆ وێ چەندێ كارێن خزمەتگوزاری چ یێن ساخلەمی بن یان راپەراندنا كاروبارێن رۆژانە بن ل هەر وەزارەتەكێ بیت، هەموو ئەو كار هاتنە ئەنجامدان، ژ روویێ ئابووریڤە كەسەك بهیچت و بخوازیت، كۆمپانییەك هەبیت و بخوازیت تۆمار بكەت، نوكە پێرابوون وەسا یێن هاتینە ب ساناهیكرن ب چەند ساتان دشییاندایە كارێن خوە ئەنجام بدەت كو پێشتر دەمەكێ گەلەك درێژتر بۆ دخواست.
مەسرور بارزانی، سەرۆكێ حوكمەتا هەرێما كوردستانێ ئەوژی گۆت» ژ روویێ ئابووری ژی ڤە، مە بڕیارا هەمەجۆركرنا ئابووری دا و پێنگاڤێن گەلەك باش مە هاڤێتن و گەهشتینە ئاستەكی ڤەژاندنا ئابووری ژ 1.8% ببیتە 8%، هەڤدەم مە بازارێن ئیراقێ و دەرڤە بۆ جوتیارێن كوردستانێ و بەرهەمێن وان ڤەكر.
پتر گۆت» ژ روویێ سێكتەرێن بەنكی پێنگاڤێن گەلەك باش یێن هاتینە هاڤێتن كو هەتا نوكە هەموو ب دوماهی نەهاتینە، بەلێ قۆناغێن گەلەك باش یێن بڕین، مە ئومێد یا هەی د دەمەكیچ نێزیكدا ئەڤە هەموو ببنە هۆكار بۆ دروستكرنا وێ نیشتمانسازییا كو باس لێ دكەین، ئەڤە هەموو ئەو ژێرخانەنە كو د پێدڤی نە».
هەروەسا گۆت» بابەتێ پێدڤیێن رۆژانە وەكو ئاڤێ و كارەبێ كو بڕیارێن جدی بۆ هاتینە دان پێنگاڤێن گەلەك باش یێن بۆ هاتینە هاڤێتن بۆ وێ چەندێ كێشەیا بێئاڤیێ و بێكارەبیێ بەر ب دوماهیێ بچیت، هەروەسا هاریكارییا تەخا گەنج و دروستكرنا دەلیڤەیێن كاری یێن یەكسان بۆ هەموو هەڤوەلاتییان، نەهێلانا گەندەلیێ، نەهێلانا واستێ و واستەكاریێ، ئەڤە هەموو ئەو بزاڤ بوون كو مە ل كابینەیا بۆری هەتا ئاستەكێ زۆر دەستكەفت هەبوون بەلێ هەموو نەگەهشتینە قۆناغا دوماهیێ، لەوما ژ نوكە و وێڤە بۆ وێ چەندێ ئەم بشێین د خزمەتا خەلكی دا بین و كارێن باشتر بكەین، پێدڤییە وان پێنگاڤان تمام بكەین، هندەك ژوان بەر ب قۆناغا دوماهیێ یێن چوون، بەلێ كارێن زێدەتر ژی مە یێن ماین، بەلێ كو ئەڤە هاتینە كرن، وەكو دروستكرنا ژێرخانەكێ، ئەڤجا ئەم دشێین هزر د پێنگاڤێن گەلەك گەلەك باشتر دا بكەین، ئەوا گرنگ د سیاسەتا مە دا ( هەڤوەلاتی سەنتەرە)، سەنتەرێ گرنگی پێدانێیە، ئانكو هەر تشتەك د بەرژەوەندییا هەڤوەلاتییاندا بیت، هەر كارەكێ ئاسانكاریێن زێدەتر بۆ هەڤوەلاتی كەت، دڤێت حوكمەت خوە بگونجینیت ل گەل داخوازی و خواستێن خەلكی.

دوهی سێشەمبی 29/10/2024، مەسرور بارزانی، سەرۆكێ حوكمەتا هەرێما كوردستانێ پێشانگەها نێڤدەولەتییا وەبەرئێنانێ و خانوبەران یا پێنجێ ل هەولێرێ ڤەكر، كو چەندین كۆمپانیێن ناڤخوەیی و دەرڤە پشكدارن تێدا.
پێشانگەها نێڤدەولەتییا وەبەرئێنانێ و خانوبەران یا پێنجێ هەتا رۆژا 1/11/2024 دێ یا بەردەوام بیت كو نێزیكی 260 كۆمپانی و قۆنتەرچی و وەبەرئێنەران پشكداری تێدا كریە، ب تایبەت ئەوێن ل دووڤ دەلیڤەیێن گونجای یێن وەبەرئێنانێدا د گەریێن.
پشكەك ژ مەزنە كۆمپانیێن بیانی ژ 15 وەلاتان وەكو توركیا، ئیران، یۆنان، عومان، ئیمارات، لوبنان، ئوردن، سعودیە، ئەلمانیا، چین، ئیتالیا و كەنەدا و چەندین وەلاتێن دی ژی پشكدارن تێدا.

فەرماندارێ گشتی یێ هێزێن سووریا دیموکرات دیار دکەت ژ بەر ئێرشێن ڤێ دووماهیێ یێن تورکیا زیانێن گەلەک مەزن گەهشتینە خەلکێ سڤیل، تورکیا بەرهەڤیان بۆ ئێرشەکا مەزن دکەت و نها ب ناڤبژیڤانیا هێزێن هەڤپەیمانان ئەو ل گەل تورکیا دانوستاندنان دکەن.

مەزلوم عەبدی فەرماندارێ گشتی یێ هێزێن سووریا دیموکرات بۆ ئاژانسا AFP یا فرەنسا دیار کر، چو پەیوەندیا وان ل گەل ئێرشا ل ئەنقەرە نینە، وەکو هێزێن سووریا دیموکرات ئەو چو دەمەکێ ئاریشان بۆ تورکیا دروست ناکەن و هێزێن وان دەربازی ئاخا تورکیا ژی نەبووینە و گۆت: (پشتی ئێرشا ل ئەنقەرە، تورکیا بەردەوام ئێرشی رۆژئاڤایێ کوردستانێ دکەت و ژ بەر ئێرشێن تورکیا ژی زیانێن گەلەک مەزن گەهشتینە وەلاتیێن سڤیل، یا نها تورکیا ل دژی خەلکێ رۆژئاڤایێ کوردستانێ دکەت تاوانەکا مەزنە و دڤێت ئەمریکا، ئێکەتیا ئۆرۆپا، وەلاتێن عەرەبی و وەلاتێن دی یێن جیهانێ ل هەمبەر ئێرشێن تورکیا بێدەنگ نەمینن).
ناڤهاتی ئەو یەک ژی دیار کر، تورکیا بەرهەڤیان بۆ ئێرشەکا مەزنتر ژی دکەت، تورکیا دڤێت مفایێ ژ ئالۆزیێن نها ل دەڤەرێ وەربگریت و دڤێت پشکەکا دی ژ ئاخا رۆژئاڤایێ کوردستانێ داگیر بکەت، هەکە تورکیا ئێرشەکا مەزن بکەت وەکو هێزێن سووریا دیموکرات ئەو دێ خەلکێ خوە پارێزن و گۆت: (بێگومان مە شەڕ نەڤێت، لێ ل هەمبەر هەر ئێرشەکێ ژی ئەم دێ خەلکێ خوە پارێزین، نها ب رێیا هێزێن هەڤپەیمانان ئەم ل گەل تورکیا دانوستاندنان دکەین و مە بۆ تورکیا دیار کریە، ئەم نابیتە مەترسی بۆ وی وەلاتی، بەلکو مە دڤێت پەیوەندیێن خوە ل گەل تورکیا باش بکەین و بەرهەڤین ل گەل ئەنقەرە دانوستاندنان ژی بکەین، هێزێن هەڤپەیمانان وەکو ناڤبژیڤان د ناڤبەرا مە و تورکیا دا کار دکەن، ئەم هیڤیدارین تورکیا دەست ژ ئێرشێن خوە یێن ل سەر خەلکێ سڤیل یێ رۆژئاڤایێ کوردستانێ بەردەت).
فەرماندارێ گشتی یێ هێزێن سووریا دیموکرات ئەو یەک ژی دیار کر، بەرپرسێن تورکیا ژ ئالیەکێ بەحسێ ئاشتیێ و چارەسەرکرنا پرسا کوردی دکەن و ل ئالیێ دی ب چەکێ گران کوردان دکوژن، ئەو یەک ژی ناکۆکیەکا گەلەک مەزنە، وەکو هێزێن سووریا دیموکرات ئەم چو دەمەکێ نابینە مەترسی ل سەر تورکیا، مە بەری نها ژی دیار کریە بەرهەڤین هەموو پرسێن هەی ب رێیا دانوستاندنان چارەسەر کەین، لێ دیارە تورکیا دیسان دڤێت ب ئێرشان و ئۆپەراسیۆنێن سەربازی رەوشا هەی ئالۆزتر بکەت و گۆت: (هەکە تورکیا ئێرشی مە بکەت ئەم دێ بەرسڤا ئێرشێن تورکیا دەین، ئەم قەبوول ناکەین تورکیا ب بەهانێن بێ بنەما ئێرشی خەلکێ مە بکەت، هیڤیدارین دانوستاندنێن نها د ناڤبەرا تورکیا و هێزێن هەڤپەیمانان دا باش بیت و تورکیا ژی دەست ژ ئێرشێن خوە یێن ل سەر خەلکێ سڤیل ل رۆژئاڤایێ کوردستانێ بەردەت).