دوهی دوشەمبی 28/10/2024، ب گۆڕەی بەیاننامەیەكا حوكمەتا هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ پێشوازی ل ئەلیسیا ریكۆ پێرێز دێل پۆلگار، بالیۆزا نوو یا ئیسپانیا ل ئیراقێ كر.
د بەیاننامەیا حوكمەتا هەرێمێدا هاتیە» سەرۆكێ حوكمەتا هەرێما كوردستانێ سەرەرای پیرۆزباهی و هیڤییا سەركەفتنێ بۆ بالیۆزا نوو یا ئیسپانیا، سوپاسییا هاریكاری و پشتەڤانییا ئیسپانیا كر، د چارچۆڤەیێ هەڤپەیمانییا نێڤدەولەتییا دژی تیرۆرستێن داعشێ».
بالیۆزا ئیسپانیا ل ئیراقێ دوپاتی ل پێشڤەبرنا پەیوەندیێن وەلاتێ خوە ل گەل ئیراقێ و هەرێما كوردستانێ د بوارێن جودا جودا دا كر. هەروەسا پیرۆزباهی ژی ل سەرۆكێ حوكمەتا هەرێمێ كر، ب هەلكەفتا سەركەفتنا هەلبژارتنێن پەرلەمانێ كوردستانێ.
هەروەسا گرنگییا چارەسەركرنا كێشەیێن هەرێما كوردستانێ و حوكمەتا فیدرال ل سەر بنەمایێ دستووری و رێزگرتنێ ل سیستەمێ فیدرالی و قەوارەیێ دستووریێ هەرێما كوردستانێ، پشكەكا دی یا دیدارێ بوو.
هەر دوهی دوشەمبی 28/10/2024، مەسرور بارزانی، سەرۆكێ حوكمەتا هەرێما كوردستانێ پێشوازی ل دانیێل هوون، بالیۆزێ نوو یێ سویسرا ل ئیراقێ كر.
حوكمەتا هەرێمێ د بەباننامەیەكێدا دیاركر» سەرۆكێ حوكمەتا هەرێمێ پیرۆزباهییا ڤەكرنا بالیۆزخانەیا سویسرا ل بەغدا و دەستبكاربوونا بالیۆزێ نوو كر و پشتەڤانییا حوكمەتا هەرێما كوردستانێ بۆ بالیۆزێ دیاركر، ژ پێخەمەت زێدەتر پێشڤەبرنا پەیوەندییان ل گەل هەرێما كوردستانێ، دوپاتكر» .
د دیدارێدا، بالیۆزێ سویسرا ل ئیراقێ پیرۆزباهییا سەركەفتنا هەلبژارتنێن خولا شەشێ یا پەرلەمانێ كوردستانێ ل سەرۆكێ حوكمەتا هەرێما كوردستانێ كر.

هاریكارێ سەرۆكێ حوكمەتا هەرێما كوردستانێ راگەهاند: حوكمەت، پەرلەمان و هەموو كوردستان ب ئۆپۆزسیۆنێ بهێنە دان ئەو ب خوەژی نزانن چ دڤێت. دوپاتی ل وێ چەندێ ژی كر، خەلكی باوەری ب ئاخڤتنێن ئۆپۆزسیۆنێ نەمایە.
رێباز حەملان، هاریكارێ سەرۆكێ حوكمەتا هەرێما كوردستانێ د داخۆیانییەكا رۆژنامەڤانیدا گۆت» ئۆپۆزسیۆنێ نەشێت خوە ل بەر واقعێ نوكە بگریت لەوما هەلوەستێن وێ ب وی ئاراستەی نە».
هەڤدەن گۆت» حوكمەت، پەرلەمان و هەموو كوردستان ب ئۆپۆزسیۆنێ بهێنە دان ئەو ب خوەژی نزانن چ دڤێت. دوپاتی ل وێ چەندێ ژی كر، خەلكی باوەری ب ئاخڤتنێن ئۆپۆزسیۆنێ نەمایە».
هاریكارێ سەرۆكێ حوكمەتا هەرێما كوردستانێ، ل دۆر پارتی دیموكراتی كوردستان، گۆت» پارتی دخوازیت قەوارەیێ هەرێما كوردستانێ یێ ب هێز بیت، لەوما دخوازیت حوكمەتەكا سەرانسەری پێكبینیت».
گۆت ژی» دەرگەهێ پارتی بۆ هەموو ئالییەكی یێ ڤەكرییە و ڤیتۆ ل سەر هیچ ئالییەكی نینە، كۆمەكا خالێن سەرەكی یێن هەین وەكو پاراستنا ب هێزبوونا هەرێما كوردستانێ و دڤێت ئالی ڤان خالان ل بەرچاڤ وەربگرن».

ئەندامەكا كۆمیتەیا ناڤەندییا پارتی دیموكراتی كوردستان دبێژیت: سەنگ و پێگەها پارتی ژ ئالیێ هندەك هێزێن سیاسی وەكو خوە ناهێتە دیتن چونكە ل بن كاریگەرییا سۆشیال میدیایێ نە، خواندنا وان یا شاشە.
چنار سەعد عەبدوللا، ئەنداما كۆمیتەیا ناڤەندییا پارتی دیموكراتی كوردستان گۆت» هیچ دەمەكی پارتی هەتا وی دەمێ 45 كورسی د پەرلەمانێ كوردستانێدا هەین پەنا بۆ هێزا زۆرینە نەبریە».
هەڤدەم ئاماژە ب وێ چەندێ كر» سەنگ و پێگەها پارتی ژ ئالیێ هندەك هێزێن سیاسی وەكو خوە ناهێتە دیتن چونكە یێن ل بن كاریگەرییا سۆشیال میدیایێدا و خواندنا وان یا شاشە».
ل رۆژا 26/10/2024، كۆمیتەیا ناڤەندییا پارتی ب سەرپەرشتییا سەرۆك بارزانی كۆمبوونەكا بەرفرهە ئەنجامدابوو.
كۆمیتەیا ناڤەندییا پارتی پشتی وێ كۆمبوونێ بەیاننامەیەك بەلاڤكربوو و تێدا راگەهاندبوو» تەوەرێ ئێكێ یێ كۆمبوونێ یێ تایبەت بوو ب هەلبژارتنێن خولا شەشێ یا پەرلەمانێ كوردستانێ و هەڤدەم سەرۆك بارزانی و سەركردایەتییا پارتی سوپاسییا جەماوەرێ خوڕاگرێ كوردستانێ دكەن و پارتی پاراست وەكو حزبا هەژمار ئێك ل كوردستانێ هەم ژ روویێ هەژمارا دەنگان و هەم ژی ژ روویێ هەژمارا كورسیێن پەرلەمانی».
دوپاتی ل وێ چەندێ ژی كربوو» هەڤال و راگەهاندنا پارتی ب شێوازەكێ شارستانی و دوور ژ تێكدانا ئاسایشا جڤاكی و دلتەنككرنا خەلكێ كوردستانێ، بانگەشەیەكا میدیایی یا هەژی ل ئاستێ دیرۆك و مەزناهییا پارتی و رێبازا بارزانی نیشاندا».

چاڤدێرەكێ سیاسی، دیاردكەت كو ژ ئەزموونێن پێشتر یێ هەلبژارتنان فێربووینە كو هەموو جاران ئەوێن سەرنەكەفتین تۆمەتان ئاراستە دكەن. هەروەسا دوپاتكر كو هەلبژارتنێن 20 ئۆكتۆبەرێ یێن پەرلەمانێ كوردستانێ، ژ هەموو هەلبژارتنێن پێشتر ل ئیراقێ، د سەركەفتیتر بوون.
ل رۆژا 20/10/2024، هەلبژارتنێن پەرلەمانێ كوردستانێ هاتنە ئەنجامدان كو تێدا خەلكێ كوردستانێ جارەكا دی باوەری دا پارتی دیموكراتی كوردستان و زێدەتر ژ 809 هزار دەنگدەرێن كوردستانێ دەنگ ب پارتی دا، د بەرامبەر ژی دا گەلەك ژ وان ئالیێن كو چاڤەڕێ بوون ژ ئەگەرێ دیزایینا دەرەكی یا هەلبژارتنان گەلەك دەنگان ب دەستڤەبینن و پێشتر بانگەشەیا وێ چەندێ دكر كو ئەڤ هەلبژارتنە دێ ژ ئالیێ كۆمسیۆنا بلند یا سەربخوە یا هەلبژارتنان ل ئیراقێ ڤە هێنە كرن و هیچ سەختەكارییەك تێدا نابیت، ب شكەستنا خوە حێبەتی بوون و كەفتنە تانەیان و بانگەشەیا هەبوونا سەختەكاریێ د هەلبژارتناندا.
سەبارەت ڤێ چەندێ كیفاح مەحمود، چاڤدێرێ سیاسی بۆ مالپەرێ (ئیندیپیندیت عەرەبی) گۆت» ئەزموونێن پێشتر یێن هەلبژارتنان بۆمە یا دیاركری كو وان جۆرە تۆمەتان ژ ئالیێن سەرنەكەفتی گوهلێببین. سەرەرای باوەرییا من یا تمام كو هەلبژارتنێن دادپەروەرانە ل هەموو جیهانێ نینن، بەلكو ب هەموو راستگۆیی و دانپێدانێن كەسێن بانگەشەیا وێ چەندێ دكەن كو سەختەكاری یا هاتییە كرن، ئەڤ هەلبژارتن ژ هەلبژارتنێن پێشتر باشتر بوون، چ هەلبژارتنێن ل ناڤخوەیا ئیراقێ هاتینە كرن یان ل دەڤەرێ».
كیفاح مەحمود ئاماژە ب وێ چەندێ ژی كر» كۆمسیۆنا بلند یا سەربخوە یا هەلبژارتنان ل ئیراقێ یا رژد بوو ل سەر وێ چەندێ بلندترین پلەیا زەلالیێ ب دەستڤەبینیت ل بن چاڤدێرییا سەدان چاڤدێرێن نێڤدەولەتی و ناڤخوەیی، ژ بلی چاڤدێریكرنا ئەمریكی و ئۆرۆپی، كو هەموویان سەركەفتنا هەلبژارتنان بلند هەلسەنگاند و ب دیتنا وان هەلبژارتن ب شێوەیەكێ دروست و د سەقایەكێ ئارامدا هاتنە ئەنجامدان و رێژەیا پشكداریكرنێ د هەلبژارتناندا ژی یا بلند بوو كو گەهشتبوو 72% ژ دەنگدەران».
هەروەسا گۆت ژی» ئەوێن ژ ئەنجامێن هەلبژارتنان نە د رازی، ئەڤرۆ هەموو یێ دژایەتییا ئاخڤتنێن خوە یێن بەری دكەن، وان گەلەك داخواز ژ دەنگدەران دكر ڤێجارێ پشكداریێ بكەن، ب بەرچاڤ وەرگرتنا هەبوونا پێرابوونێن گرەنتیكرنێ و پێنگاڤێن رێگریكرنێ ل سەختەكاریێ».

دەزگەهێن راگەهاندنا تورکیا دیار دکەن د هەڤدیتنا ل گەل عومەر ئۆجەلانێ پەرلەمانتارێ تورکیا رێبەرێ پەکەکێ دیار کریە، ئەو بەرهەڤە قۆناغا ئاشتیێ برێڤە ببەت، لێ دڤێت ئالیێ سێیێ د قۆناغا ئاشتیێ دا رۆلێ خوە بگێریت و سزایێن ل سەر وی ژی بهێنە راکرن.

پشتی سه‌ره‌دانا عومه‌ر ئۆجه‌لان په‌رلەمانتارێ ده‌م پارتیێ و برازایێ عه‌بدوللا ئۆجەلان رێبەرێ زیندانکری یێ پەکەکێ، دەزگەهێن راگەهاندنا تورکیا داخوازی ئانکۆ مه‌رجێن ئۆجه‌لانی بۆ ده‌ستپێکرنا قۆناغا نوو یا ئاشتیێ دیار دکەن، ل دووڤ ده‌زگه‌هێن راگه‌هاندنا تورکیا، عەبدوللا ئۆجه‌لان د هه‌ڤدیتنا ل گەل پەرلەمانتار عومەر ئۆجەلانی دا دیار کریە، کو ئه‌و شیان و هێزا وی هەیە و دشێت پرسا کوردی ل تورکیا ب رێیێن ئاشتیانە چارەسەر کەت، لێ بۆ ده‌ستپێکرنا قۆناغێ دڤێت وه‌لاته‌کی دی د هه‌ڤدیتنان ئانکۆ دانوستاندنان دا پشکدار بیت و دووڤچوونا دانوستاندنان بکەت. هه‌روه‌سا وه‌ک مه‌رجێ دویه‌م ژی داخواز کریه‌ کو سزایێن ل سه‌ر وی بهێنە راکرن دا کو بشێت قۆناغێ برێڤه‌ ببەت.
مالپەرێ T24 یێ تورکیا د ڤێ دەربارێ دا دیار کریە، دهێته‌ چاڤه‌رێ کرن کو پشتی به‌رپرسێن پارتا کرێکارێن کوردستانێ ل قه‌ندیلێ په‌یاما ئۆجه‌لانی شرۆڤه‌ بکه‌ن دێ ناڤه‌رۆکا هه‌ڤدیتنا ل گەل ئۆجەلانی بۆ رایا گشتی ئاشکرا کەن.
ل ئالیێ دی ئۆزگور ئۆزه‌ل سه‌رۆکێ گشتی یێ پارتا گەل یا کۆماری ژی داخواز ژ ئه‌ردۆغانێ سه‌رۆک کۆمارێ تورکیا کر کو هزرا خوه‌ یا د ده‌ربارێ چارەسەرکرنا پرسا کوردی و هه‌ڤدیتنێن ل گەل ئۆجەلانی دا بۆ رایا گشتی یا تورکیا ئاشکرا بکەت و گۆت: (بلا ئه‌ردۆغان پرۆژێ خوه‌ ل دۆر چاوانیا چارەسەر‌کرنا پرسا کوردی بۆ رایا گشتی ئاشکرا بکه‌ت دا کو ژی ل گۆر تشتێ نها روو ددەن هەلوەستێ خوە دیار بکەن).
ژ ئالیێ خوه‌ ڤه‌ تونجه‌ر باکرهان هه‌ڤسه‌رۆکێ ده‌م پارتیێ ژی راگه‌هاند کو ئه‌و وه‌ک ده‌م پارتی بۆ چارەسەر‌کرنا پرسا کوردی ئاماده‌نه‌ و گۆت: (ئه‌م گه‌نگه‌شەیێن ل سه‌ر ئاشتیێ و چارەسەر‌کرنا پرسا کوردی گەلەک باش دبینین و ژ بۆ ڤێ یەکێ ژی دڤێت سزایێن ل سەر ئۆجەلانی بهێنە راکرن دا ئەو بشێت ب ئازادانە نێرینێن خوە دیار بکەت، هەروەسا دڤێت دەولەت ژی دەست ب قۆناغەکا نوو بکەت و هندەک پێنگاڤێن باش بهێنە ئاڤێتن، چونکی بەری نها ژی مە ئەزموونەکا خراب هەبوویە و ژ بەر ڤێ یەکێ ژی گرنگە دەولەت رێ بدەت دا ئۆجەلان ب رۆلێ خوە رابیت، هەروەسا دڤێت هەموو سازی و رێکخستنێن جڤاکێ سڤیل و کەسایەتیێن ناڤدار یێن کورد و تورک ژی پشتەڤانیێ ل قۆناغا ئاشتیێ و چارەسەرکرنا پرسا کوردی ل تورکیا بکەن، ئەو یەک گەلەک یا گرنگە، چونکی هەموو کەس دزانن هەتا پرسا کوردی ل تورکیا نەهێتە چارەسەرکرن دێ رەوشا نها یا ئالۆز ل تورکیا ژی بەردەوام بیت).

ئەندامەكێ جڤاتا نوونەرێن ئیراقێ ژ فراكسیۆنا ئێكگرتوو راگەهاند: پشتی پشكەك ژ ئامیرەیێن دەنگدانێ ل بەرچاڤێن وان كەفتینە بن ئەزموونێ، دیاربوو كو ب هیچ شێوەیەكی سەختەكاری د لێدانا مۆرەكا دی بۆ سەر كاخەزا دەنگدانێ دناڤ ئامیرەیدا نینە. هەڤدەم دوپاتی ل وێ چەندێ كر، هیچ بەلگەیەك نینە ب سەلمینیت د هەلبژارتنێن پەرلەمانێ كوردستانێدا سەختەكاری هاتبیتە كرن.
موسەننا ئەمین، ئەندامێ جڤاتا نوونەرێن ئیراقێ ژ فراكسیۆنا ئیكگرتوو د كۆنفرانسەكێ رۆژنامەڤانیدا ئاشكراكر» ل 24 ڤێ مەهێ مە نڤیسارەك ئاراستەی كۆمسیۆنا بلند یا سەربخوە یا هەلبژارتنان ل ئیراقێ كر و مە سێ داخوازی تێدا بەرچاڤكرن، یا ئێكێ: مە داخواز كربوو كو رێك بهێتە دان ئەو ئامیرەیێن كو ل دەنگدانێ هاتینە بكارئینان، بهێنە تێستكرن و بكەڤنە ژێر ئەزموونێ. خالا دویێ، وێنەیێ دەنگێن هەموو پشكداربوویێن هەلبژارتنان ب ئالیێن سیاسی یێن هەرێما كوردستانێ بهێتە دان. یا سیێ، ئەو دەنگدانێن كو ژناڤچووین ب ئالیێن سیاسی بهێنە دان».
وی ئەندامێ جڤاتا نوونەرێن ئیراقێ ئاماژە ب وێ چەندێ كر» ب بەرهەڤبوونا نوونەرێن ئالیێن سیاسی، چەند ئامیرەیێن دەنگدانێ كەفتە بەر ڤەكۆلینێ، ئێك ژ وان ئامیرەیان ب دەرنەفیسی ل بن چاڤێن مە هاتە ڤەكرن و پارچەیێن وی هاتنە هەلوەشاندن، مە هەموو پارچەیێن ئامیرەی دیتن ئەو بۆچوونێن د ناڤ خەلكیدا هەین بۆمە دیاربوو كو وەسا نینە، ژ وان كو مۆرەكا دی هەبیت د ناڤ ئامیرەیدا بۆ ژناڤبرنا دەنگان».
موسەننا ئەمین پتر گۆت» دیاربوو شیانا ژناڤبرنا مۆرا ل سەر كاخەزا دەنگدانێ ئەستەمە و هیچ ئامیرەیەك نەشێت وی كاری بكەت، مۆر ژی پێكهاتەیەكا كاربۆنییا تایبەتە و مە ب خوە تێست كر».
هەڤدەم ئاشكراكر ژی» ئەو ئەزموونا ل سەر وی ئامیرەیێ دەنگدانێ هاتییە كرن ئەو چەندە سەلماند كو هەموو وان گۆتگوتكان رەت بكەت یێن دبێژن مۆرا دەنگدانی هاتبیتە ژناڤبرن».
دیاركر ژی» هەتا نوكە هیچ بەلگەیەكا ئێكلاكەر نینە ب سەلمینیت كو د هەلبژارتنێن پەرلەمانێ كوردستانێدا سەختەكاری هاتبیتە كرن».
ل دووماهیێ گۆت» بێی هەبوونا بەلگەیان ئەم نەشێین ب سەلمینین كو د ڤان هەلبژارتناندا سەختەكاری هاتبیتە كرن».

دوهی ئێكشەمبی 27/10/2024، ب گۆرەی بەیاننامەیەكا حوكمەتا هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ، پێشوازی ل قاسم ئەعرەجی، شیرەتكارێ ئاسایشا نیشتمانییا ئیراقێ كر.
د كۆمبوونەكێدا، گەنگەشە ل دۆردووماهی گوهۆڕین و پێشهاتێن رەوشا ئەمنییا ئیراقێ ب گشتی هاتە كرن.
بەیاننامەیا حوكمەتا هەرێما كوردستانێ دیاركر ژی» شیرەتكارێ ئاسایشا نیشتمانییا ئیراقێ، پیرۆزباهییا سەركەفتنا پڕۆسەیا هەلبژارتنێن خولا شەشێ یا پەرلەمانێ كوردستانێ ل سەرۆكێ حوكمەتا هەرێما كوردستانێ كر».
ل دووماهییا كۆمبوونێ، هەردو ئالی د هەڤڕا بوون ل سەر گرنگییا زێدەتر پێشڤەبرنا هاریكاریێ و هەماهەنگیێ دناڤبەرا حوكمەتا هەرێما كوردستانێ و حوكمەتا فیدرالیدا بۆ روو ب رووبوونا مەترسی و گەفێن تیرۆرێ و پاراستنا ئاسایش و سەقامگیرییا هەرێما كوردستانێ و ئیراقێ ب گشتی.

هەولێر، قائید میرۆ

ئەندامەكێ كۆمیتەیا ناڤەندییا پارتی دیموكراتی كوردستان ئاشكرا كر، مەكتەبا سیاسییا پارتی دێ كۆمبیت و لژنەیەك بۆ سەرەدانا ئالیێن سیاسی ل هەرێما كوردستانێ دێ هێتە پێكئینان. هەروەسا دیاركر، پارتی دێ سەرەدانا هەموو ئالیێن سیاسی ل هەرێما كوردستانێ كەت.
د. ئاراس حەسۆ میرخان، ئەندامێ كۆمیتەیا ناڤەندییا پارتی دیموكراتی كوردستان گۆت «بڕیارە ل دەمەكێ نێزیك شاندەكێ پارتی سەرەدانا ئالیێن سیاسی یێن هەرێما كوردستانێ بكەت، ئەو سەردانە ژی بۆ لێكگوهارتنا بۆچوونێن ئالیێن سیاسییە و پاشی دێ بڕیار هێتە دان، دەرگەهێ پارتی ژی بۆ هەموو ئالییان یێ ڤەكرییە، چونكە نیازا سەرەدانا پارتی هەر بۆ وێ چەندێیە».
سەبارەت سەرەدانا شاندێ پارتی بۆ ئێكەتی نیشتمانی كوردستان، د. ئاراسی گۆت» دێ سەرەدانا ئێكەتیێ و هەموو ئالییان كەین و تێدا دێ بۆچوونا ئالییان ل دۆر پێكئینانا كابینەیا نوو یا حوكمەتا هەرێما كوردستانێ وەرگرین».
وی ئەندامێ كۆمیتەیا ناڤەندییا پارتی دیموكراتی كوردستان دیاركر ژی» دخوازین ئێك حوكمەت و ئێك پەرلەمان و ئێك بڕیار هەبیت، پشتی سەرەدانا شاندێ پارتی دیموكراتی كوردستان بۆ ئالیێن سیاسی، پارتی دێ كۆمبیت و بڕیارا خوە دەت».
ل دۆر دەمێ سەرەدانا شاندێ پارتی دیموكراتی كوردستان بۆ ئالیێن سیاسی ل هەرێما كوردستانێ. د. ئاراس گۆت» مەكتەبا سیاسییا پارتی دێ كۆمبیت و دێ وی لژنەیا سەرەدانا ئالیێن سیاسی دكەت تێدا هێتە دیاركرن و پاشی دێ دەست ب سەرەدانان هێتە كرن، هیچ رۆژەك نەهاتییە دیاركرن، بەلێ پشتی كۆمبوونا مەكتەبا سیاسی، پارتی دێ دەست ب سەرەدانێن خوە كەت».

شرۆڤەكارەكێ سیاسی راگەهاند: بانگەشەیا پارتی دیموكراتی كوردستان بۆ هەلبژارتنێن خولا شەشێ یا پەرلەمانێ كوردستانێ كاریگەری ل سەر زێدەكرنا دەنگێن پارتی هەبوو، هەروەسا دبێژیت: خەلكی باوەری یا دایە پارتی و ئەركێ وێ زێدەتر گران كریە.
عرفان عەزیز، شرۆڤەكارێ سیاسی، د داخۆیانییەكا رۆژنامەڤانیدا گۆت» شێوازێ بانگەشەیا پارتی د هەلبژارتنێن ڤێجارێدا كاریگەری ل سەر زێدەبوونا دەنگێن وێ هەبوو، چونكە شێوازەكێ جودابوو، ل هەر بازنەیەكێ پارتی ب جۆرەكی كەمپینا مودێرن بڕێڤەدبر، بۆ جارا ئێكێیە ل ئیراقێ و هەرێما كوردستانێ بانگەشەیا ب وی شێوەی بهێتە كرن ژ ئالیێ لیست و پارتێن سیاسی ڤە».
پارتی ب لیستا 190 پشكداری د هەلبژارتنێن رۆژا 20 ئۆكتۆبەرێ یێن پەرلەمانێ كوردستانێدا كر و شییا ب جوداهییەكا مەزن ل گەل ئالیێن دی یێن سیاسی ببیتە یا ئێكێ ل سەر ئاستێ هەرێما كوردستانێ.
وی شرۆڤەكارێ سیاسی دیاركر» ب دەستڤەئینانا لیستا پارتی دیموكراتی كوردستان د هەلبژارتنێن پەرلەمانێ كوردستانێدا زێدەتر ژ 800 هزار دەنگان ئاماژەیە بۆ وێ چەندێ پارتی د وی چارچۆڤەیدا دەركەفتی كو هیچ ئالییەك بشێت هەڤڕكییا وێ بكەت، ژ بەر كو جوداهی گەلەكە و دەنگێ هیچ ئالییەكی یێ نێزیك نینە ژ دەنگێ پارتی تاكو هەڤڕكییا وێ بكەت».
عرفان عەزیز ئەوژی گۆت» سەركەفتنا پارتی دیموكراتی كوردستان د بانگەشەیا هەلبژارتناندا بۆ چەند خالان دزڤریت، ژبلی وێ چەندێ بانگەشەیەكا ل سەرخوە و سەردەمییانە بڕێڤەبر، پڕۆژە ژی راگەهاند، پەیام و درووشمێن پارتی زێدەتر نیشتمانی بوون، ئەوێ چەندێ ژی وەكر كاریگەری ل سەر خەلكێ نیشتمانپەروەر و گوهۆڕینا ئاراستەیێ دەنگدەری بۆ لیستا خوە هەبیت، هەروەسادووماهی یەیڤا سەرۆك مەسعود بارزانی ل رۆژا 15 ئۆكتۆبەرێ وێ ژی كاریگەرێ ل سەر بانگەشەیا پارتی كر، چونكە سەرۆك بارزانی زێدەتر وەكو كەسەكێ نیشتمانپەروەر و نەتەوەیی پەیڤا خوە پێشكێشی جەماوەرێ كوردستانێ كر، وەكو خودانێ مللەتێ نەكو وەكو سەرۆكێ حزبەكێ».
ل دووماهیێ، عرفان عەزیز ئاماژەكر» پارتی سەركەفتنەكا بەرچاڤ د هەلبژارتنێن پەرلەمانێ كوردستانێدا تۆماركر، بەلێ د گەل وێ چەندێ ژی دا ئەركێ پارتی زێدەتر گران بوو، هەكە پێشتر 500 هزار دەنگ هەبوون نوكە زێدەتر ژ 800 هزار دەنگ یێن هەین و دەنگدەری دلسۆزییا خوە بۆ پارتی نیشادا، ب دیتنا من پێدڤییە پارتی ژی پاداشتا دلسۆزییا دەنگدەران بدەت، ئەوژی ب پێشكێشكرنا خزمەتگوزارییان و ب جهئینانا كارنامەیا لیستا خوە».

هەولێر، قائید میرۆ

چاڤدێرەكێ سیاسی راگەهاند، پێشبینی دهێتە كرن هەتا رۆژا 31ی ڤێ مەهێ ئەنجامێندووماهیێ یێن هەلبژارتنێن پەرلەمانێ كوردستانێ بهێنە راگەهاندن و دبێژیت، پێكئینانا كابینەیا دەهێ سێ هەتا چار مەهان دێ ڤەكێشیت.
ئیبراهیم مەندەلاوی، چاڤدێرێ سیاسی بۆ رۆژنامەیا (ئەڤرۆ) گۆت « كۆمسیۆنا بلند یا سەربخوەیا هەلبژارتنان ل ئیراقێ ل رۆژا 21ی مەهێ ئەنجامێن دەستپێكێ یێن هەلبژارتنێن پەرلەمانێ كوردستان راگەهاندن و هێشتا 26 سندووق یێن ماین بهێنە ئێكلاكرن، پشتی ئێكلاكرنا وان سندووقێن ئاریشە ل سەر هەی دێ ئەنجامێن دووماهیێ یێن هەلبژارتنێن رۆژا 20ی ئۆكتۆبەرێ هێنە راگەهاندن، ئەز پێشبینیێ دكەم رۆژا 31ی ئۆكتۆبەرێ كۆمسیۆنا بلند یا سەربخوە یا هەلبژارتنان ل ئیراقێ ئەنجامێندووماهیێ یێن هەلبژارتنان ئاشكرا بكەت».
گۆت ژی» پشتی راگەهاندنا ئەنجامێندووماهیێ دێ دەمەك وەك دەلیڤە بۆ قەوارە و بەربژێران هێتە دیاركرن بۆ تۆماركرنا سكالایان ل سەر ئەنجامێن هەلبژارتنان، كو پێدڤییە د دەمێ حەفتیەكێدا جڤاتا كۆمسیاران یا سەر ب كۆمسیۆنێ ڤە سكالایان بلند بكەت بۆ جڤاتا دادوەری و د دەمی 10 رۆژاندا بهێنە ئێكلاكرن و د دووڤدا پێدڤییە دادگەها بلند ئەنجامان پەسەند بكەت».
ئیبراهیم مەندەلاوی ئاماژەكر» قۆناغا دویێیا پشتی پەسەندكرنا ئەنجامێن هەلبژارتنێن پەرلەمانێ كوردستانێ، دێ سەرۆكێ هەرێما كوردستانێ داخوازێ ژپەرلەمانی كەت د دەمێ 15 رۆژاندا كۆمبوونا خوە ئەنجام بدەت و تێدا مەزنترین پەرلەمانتار دێ سەرۆكایەتییا كۆمبوونا ئێكێ یا پەرلەمانی كەت و دەستەیا سەرۆكایەتییا پەرلەمانی دێ هێتە هەلبژارتن، بەلێ هەكە ئالیێن سەركەفتی د هەلبژارتناندا نەگەهشتنە رێككەفتنێ بۆ دانانا دەستەیا سەرۆكایەتییا پەرلەمانی دێ كۆمبوونا پەرلەمانی ب ڤەكری مینیت، پشتی ب رێڤەچوونا ئیكەم كۆمبوونا پەرلەمانێ كوردستانێ د دەمێ 30 رۆژاندا دێ سەرۆكێ هەرێما كوردستانێ ژی هێتە هەلبژارتن و دێ دەرگەهێ وەرگرتنا بەربژاران بۆ پۆستێ سەرۆكێ هەرێمێ هێتەڤەكرن و ب گۆڕەی مەرجێن دیاركری هەر كەسەك دشێت خوە بەربژار بكەت بۆ پۆستێ سەرۆكێ هەرێما كوردستانێ، د كۆمبوونا دویێ یا پەرلەمانیدا كو نابیت ژ 30 رۆژان دەرباز ببیت، دێ سەرۆكێ هەرێمێ هێتە هەلبژارتن و د دەمێ 15 رۆژاندا سەرۆكێ هەرێما كوردستانێ دێ ئالیێ سەركەفتی د هەلبژارتناندا راسپێریت بۆ پێكئینانا كابینەیا نوو یا حوكمەتا هەرێما كوردستانێ، پێدڤییە ژی د دەمێ 30 رۆژاندا كابینەیا نوو یا حوكمەتێ بهێتە پێكئینان و رادەستی پەرلەمانی بهێتەكرن بۆ پەسەندكرنێ، كو پێدڤییە 51 پەرلەمانتار دەنگی ل سەر بدەن و پەسەند بكەن، ئەز باوەرم هەكە چو ئاریشە پەیدا نەبن دێ ئالیێن سیاسی گەهنە رێككەفتنێ و د دەمێ 3 هەتا 4 مەهاندا حوكمەتا نوو دێ هێتە پێكئینان»