سه‌رۆك مه‌سعود بارزانی ل پیرمام، پێشوازی ل جین شین، جێگرێ به‌رپرسێ په‌یوه‌ندیێن ده‌رڤه‌ یێن حزبا شیوعی یا چینێ و تسوی وی، بالیۆزێ وه‌لاتێ چینێ ل ئیراقێ و لیو جیون، كونسولێ گشتی یێ وه‌لاتێ چینێ ل هه‌رێما كوردستانێ كر.
د دیدارێ دا شاندێ مێهڤان به‌حس ل گرنگیا پێگه‌هێ هه‌رێما كوردستانێ و په‌یوه‌ندیێن حزبا شیوعی یا چینێ هاته‌ كرن كو په‌یوه‌ندیه‌كا كه‌ڤنار و دیرۆكی یه‌، شاندێ مێهڤان دوپاتی ل وێ چه‌ندێ كر كو وه‌كی كۆمارا چینێ دخوازن په‌یوه‌ندیه‌كا ب هێز د ناڤبه‌را هه‌ردو ئالیان دا هه‌بیت د وارێن ئابووری و بازرگانی و كه‌لتووری.
هه‌ر د كۆمبوونێ دا، سه‌رۆك بارزانی ب گه‌رمی بخێرهاتنا شاندێ مێهڤان كر و رێز و پێزانین بۆ گه‌ل و شارستانی و مێژوویا چینێ ده‌ربڕین، به‌حس ژی ل گرنگیا په‌یوه‌ندیێن د ناڤبه‌را پارتی و حزبا شیوعی یا چینێ و هه‌روه‌سا د ناڤبه‌را هه‌رێما كوردستانێ و چینێ دا كر و هیڤی ژی خواست په‌یوه‌ندیێن د ناڤبه‌را هه‌ردو ئالیان دا به‌رده‌وام بن و زێده‌تر بهێنه‌ به‌رفره‌هكرن.
هه‌ردیسا، سه‌رۆك مه‌سعود بارزانی ل پیرمام، پێشوازی ل به‌رێز محه‌ممه‌د كازم ئال سادق، بالیۆزێ كۆمارا ئیسلامی یا ئیرانێ ل ئیراقێ كر.
د دیدارێ دا كو فه‌رامه‌رز ئه‌سه‌دی، كونسولێ گشتی یێ كۆمارا ئیسلامی یا ئیرانێ ل هه‌ولێرێ به‌رهه‌ڤ ببوو، ره‌وشا ده‌ڤه‌رێ ب گشتی و ره‌وشا سیاسی یا ئیراقێ و په‌یوه‌ندیێن د ناڤبه‌را هه‌ولێر و به‌غدا دا كه‌فتنه‌ به‌ر به‌حس و گفتوگۆیێ.
هه‌ر د وێ دیدارێ دا به‌حس ل په‌یوه‌ندیێن د ناڤبه‌را هه‌رێما كوردستانێ و كۆمارا ئیسلامی یا ئیرانێ دا هاته‌ كرن و هه‌ردو ئالیان دوپاتی ل پێشڤه‌برنا زێده‌تر یا ڤان په‌یوه‌ندیان ل سه‌ر بنه‌مایێ به‌رژه‌وه‌ندیا هه‌ڤپشك د هه‌موو واران دا كر.

سەرۆكێ هەرێما كوردستانێ و بالیۆزێ ئیرانێ ل ئیراقێ كۆمبوون و چەند پرسێن گرێدای ب ئیراقێ و هەرێما كوردستانێ ل گەل وەلاتێن دەوروبەر گەنگەشەكر.
ل رۆژا دوشەمبی 15/12/2025، نێچیرڤان بارزانی، سەرۆكێ هەرێما كوردستانێ پێشوازی ل محەمەد كازم ئال سادق، بالیۆزێ كۆمارا ئیسلامییا ئیرانێ ل ئیراقێ و شاندەكێ د گەلدا كر.
ب گۆڕەی بەیاننامەیەكا سەرۆكایەتییا هەرێما كوردستانێ، د كۆمبوونەكێدا هەردو ئالییان هەڤبەندیێن ئیرانێ ل گەل ئیراقێ و هەرێما كوردستانێ، رەوشا گشتییا ئیراقێ، هەڤبەندیێن هەولێر- بەغدا و دانوستاندنێن د ناڤبەرا واندنا بۆ چارەسەركرنا كێشەیێن وان هاتە باسكرن.
د بەیاننامەیا سەرۆكایەتییا هەرێما كوردستانێ هاتیە ژی، هەردو ئالییان دوپاتی ل خواستا دولایەنی بۆ پێشڤەبرنێ ب هەڤبەندیێن هەرێما كوردستانێ و كۆمارا ئیسلامییا ئیرانێ ل سەر بنەمایێ جیرانییا باش و بەرژەوەندیێن هەڤپشك كر، ب تایبەتی د وارێ ئابۆری و بازرگانیدا.
رەوشا دەڤەرێ ب گشتی و گرنگییا پاراستنا ئارامیێ، تەوەرەكێ دی یێ كۆمبوونێ بوو كو قونسلێ گشتیێ ئیرانێ ل هەولێرێ بەرهەڤ ببوو.

ل رۆژا دوشەمبی 15/12/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل جەنەڕال فرانسوا تریكۆ، نوونەرێ بلند یێ فرەنسا ل هەڤپەیمانییا نێڤدەولەتییا دژی داعشێ كر.
د كۆمبوونەكێدا كو یان برێم، قونسلێ گشتیێ فرەنسا ل هەرێما كوردستانێ بەرهەڤبووی، پێشڤەبرنا هەڤبەندیێن فرەنسا و هەرێما كوردستانێ و رەوشا ئەمنی یا ئیراقێ و روو ب رووبوونا مەترسیێن تیرۆرێ و گەفێن داعشێ ل ئیراقێ و سووریێ هاتنە گەنگەشەكرن.
هەردو ئالی هەڤڕابوون ل سەر گرنگییا بەردەوامبوونا پشتەڤانیكرنا هێزێن پێشمەرگەی و هەماهەنگیێ د ناڤبەرا هەڤپەیمانییا نێڤدەولەتی و هەرێما كوردستانێ بۆ روو ب رووبوونا تیرۆرێ و پاراستنا ئاسایش و ئارامییا دەڤەرێ.

سەرۆكێ حوكمەتا هەرێما كوردستانێ، پێشوازی ل بالیۆز و قونسلێن گشتی و دیقلۆماتكارێن وەلاتان و نوونەرێن ئاژانسێن نەتەوەیێن ئێكگرتی ل هەرێما كوردستانێ كر.
مەسرور بارزانی، سەرۆكێ حوكمەتا هەرێما كوردستانێ د پەیڤەكێدا، سەرەرای پیرۆزباهییا جەژنێن ژ دایكبوونێ و سالا نوو، هیڤی خواست سالا نوو، سالا خوەشیێ و شادیێ و ئاشتیێ و ئارامیێ بیت بۆ هەرێما كوردستانێ و جیهانێ.
مەسرور بارزانی ئاماژە دا كو 2025 سالا سەركەفتنا چاكسازیێن حوكمەتا هەرێمێ و ب دەستڤەئینانا چەندین دەستكەفتان بوو، بەلێ مخابن ل ڤان رۆژان كارەساتا سروشتییا روودانا لەهییان ژی ل چەند دەڤەرێن كوردستانێ ب تایبەتی چەمچەمال روودا.
سەرۆكێ حوكمەتا هەرێمێ هەروەسا باسێ دووماهی گوهۆڕین و پێشهاتێن رەوشا گشتییا ئیراقێ و هەرێما كوردستانێ و بزاڤ و دانوستاندنێن پێكئینانا كابینەیا نوو یا حوكمەتا ئیراقێ و حوكمەتا هەرێما كوردستانێ كر.

هەولێر، قائید میرۆ

بسپۆرەكێ زانستێن سیاسی ئاشكراكر، ڤەكرنا قونسلخانەیا ئەمریكا ب ڤی قەبارەیێ مەزن ل هەرێما كوردستانێ پێنگاڤەكا گرنگە بۆ هەڤبەندیێن د ناڤبەرا هەرێمێ و ئەمریكا دا و دبێژیت، هەرێما كوردستانێ ئارامییا سیاسی هەیە و چو مەترسی لس ەر ئەمریكا نینە.
د. هەوار نێروەیی، پسپۆرێ زانستێن سیاسی بۆ رۆژنامەیا (ئەڤرۆ) گوت « ڤەكرنا ئاڤاهیێ نوو یێ قونسلخانەیا ئەمریكا ل هەرێما كوردستانێ كو ل باژێرێ هەولێرێ یە ب ڤی قەبارەیێ مەزن ژلئالیێ تۆبۆگرافی و شێوازێ دانانا قونسلخانەیێ پەیامەكا گەلەك ئاشكرایە هەم ژئالیێ دیپلۆماسی هەم ژلئالیێ سیاسی بۆ هەڤبەندیێن سەربازی و سیاسی یێن ئەمریكا دگەل هەرێما كوردستانێ، ل ڤێ چەندێ ژی گرنگتر دێ بیتە بنگەهەكێ گەلەك گرنگ ونەك تنێ دێ نوونەرایەتییا ئەمریكا ل هەرێما كوردستانێ و ئیراقێ كەت، بەرۆڤاژی پەیامەكا گەلەك رۆهنەژی بۆ سەنگا ئەمریكا و گرنگیدانا وێ ب هەرێما كوردستانێ، ب دیتنا من ڤەكرنا قونسلخانەیا ئەمریكا ل هەولێرێ نیشانا وێ چەندێیە ئارامییا سیاسی ل هەرێما كوردستانێ هەیە، ئەڤەژی خالەكا گەلەك گرنگە، چونكە ب پشت گرێدان ب ڤێ ئارامییا سیاسی ل هەریما كوردستانێ دێ شێن ب ئارامی ل جهێ خوە ئانكو ل قونسلخانەیا ئەمریكا ل هەولێرێ ب دروستی پڕۆژەیێ خوە یێ ستراتیژیێ ناڤین و دومدرێژ بۆ دەڤەرا رۆژهەلاتا ناڤین داڕێژیت».
د.هەوار نێروەیی ئاماژەكر» هەرێما كوردستانێ د كەڤیتە د ناڤا جەرگێ رۆژهەلاتا ناڤیندا، ژئالیێ جوگرافی ژی هەرێما كوردستانێ نیڤا رۆژهەلاتا ناڤینە و ئەز باوەرم مادەم ئەم وەك هەرێم كەفتینە ڤی جهێ گرنگ و قونسلخانەیە ژی ب ڤی قەبارەی هاتیە ڤەكرن ئەڤە رامانا وێ چەندێ ددەت ئەمریكا ب ساناهی دێ خوە گەهینیتە هەموو وەلاتێن رۆژهەلاتا ناڤین، ئانكو دێ دەستێ ئەمریكا گەهیتە ئیرانێ و توركیا و هەموو وەلاتێن دەڤەرێ».
رۆهنكر 1ی» نوكە ل هەرێما كوردستانێ چو ڤالاهییەكا سیاسی نینە، هەتا ببیتە مەترسی بۆ سەر ئەمریكا، چونكە د سیاسەتێدا ئەگەر ڤالاهییەكا سیاسی هەبیت گروپێن جودا پەیدا دبن ب ئەگەرێ ڤالاهییا سیاسی، بەلێ مە ڤالاهییا سیاسی نە و هەبوونا ئەمریكا ب ڤی قەبارەی پەیامەكە بۆ هەرێما كوردستانێ ژئالیێ ئەمریكا كو دێ هەڤبەندیێن ئەمریكا دگەل هەرێما كوردستانێ و سەركردە و ئالیێن كوردستانێ درێژخایەن بن، هەروەسا دێ بیتە فاكتەرەكێ گرنگ بۆ پاراستنا ئاسایشا هەرێما كوردستانێ، ژ بەر كو هەبوونا قونسلخانەیێ ب ڤی قەبارەی دێ بیتە رێگر ل هەمبەر وان هێرشێن ل سەر هەرێما كوردستانێ دهێنەكرن، دەستپێكێ دێ پاراستنا خوە بیت د ددووڤدا پاراستنا هەرێما كوردستانێ، چونكە ئەو تێدا دژین و دێ پارێزن ژی، ئەم دزانین د هەڤبەندیێن د ناڤبەرا دەولەتاندا بەرژەوەندی هەنە و ل سەر بنەمایێ وان بەرژەوەندییان هەڤدو د پارێزن، ئانكو هەكە ئەمریكا قونسلخانەیا خوە بپارێزیت دێ هەرێما كوردستانێ و پاشەڕۆژا وێ ژی پارێزیت».

ئەندامەكێ مەكتەبا سیاسی یا پارتی دیموكراتی كوردستان راگەهاند: ئەگەرێ پێكنەئینانا حوكمەتێ و كاراكرنا پەرلەمانێ كوردستانێ خەتایێ پارتی نینە. هەروەسا دووپاتكر، سەردەمێ 50-50 ب دووماهی هاتیە، دڤێت ژ نوكە و وێڤە پارتی ل دووڤ كورسییان رەفتارێ ل گەل ئالییان بكەت.
كەمال كەركووكی، ئەندامێ مەكتەبا سیاسی یا پارتی دیموكراتی كوردستان دیاركر ل دۆر ئەگەرێ پێكنەئینانا كابینەیا دەهێ یا حوكمەتا هەرێما كوردستانێ، ئاشكراكر» پێكنەئینانا حوكمەتێ و كاراكرنا پەرلەمانێ كوردستانێ، خەتایێن پارتی نینە، بەلكو پارتی هەر وەختەكی یا بەرهەڤە بۆ كۆمبوونێ ب مەبەستا رێككەفتنێ ل سەر پێكئینانا كابینەیا نوو».
هەروەسا ئاماژە ب وێ چەندێ ژی كر» سەردەمێ 50-50 ب دووماهی هاتیە، دڤێت پارتی ژ نوكە و وێڤە ب گۆرەی كورسییان رەفتارێ ل گەل ئالییان بكەت».
سەبارەت پۆستێ سەرۆككۆمارێ ئیراقێ، گوت» پۆستێ سەرۆككۆمارێ ئیراقێ مولكێ گەلێ كوردستانێیە و هیچ پارت و ئالییەك ب تنێ خودانێ وی پۆستی نینە».
گوت ژی» خەلكێ كوردستانێ د هەلبژارتناندا بڕیارا خوە دایە و دڤێت ئەو ئالیێ پترییا دەنگان ب دەستڤەئیناین سەرپشك بیت ژ وێ چەندێ كار وی پۆستێ دێ دەتە كێ».
سەبارەت پێكئینانا حوكمەتا ئیراقێ یا نوو گوت» دڤێت شاندێ دانوستاندكارێ كورد ب داخوازی و ئەجیندایێن جهگیر بچیتە بەغدایێ و ل سەر رێككەڤیت».
ناڤبری دووپاتكر كو دڤێت دەستوور بهێتە بجهئینان و گەرەنتییەكا ب هێز بۆ بجهئینانا رێككەفتنا پێكئینانا حوكمەتا ئیراقێ هەبیت.

دوهی دوشەمبی 8/12/2025، ل پیرمام سەرۆك مەسعود بارزانی پێشوازی ل جڤاكناس و زانایێ ناڤدارێ كورد د. رەشاد میران كر.
د دیدارەكێدا سەرۆك بارزانی رێز هەبوو بۆ بزاڤێن زانستی و ئەكادیمی یێن د. رەشاد میران و دەستخوەشی و پیرۆزباهی ژی لێ كر بۆ بدەسڤەئینانا خەلاتێ (پۆشكین) كو ژ ئالیێ فلادیمێر پۆتین، سەرۆكێ رووسیا ل باژێرێ مۆسكۆ ل مەها بۆری پێ هاتیە بەخشین.
هەر د وێ دیدارێدا د. رەشاد میران سەرەرای سوپاسگوزاریێ بۆ سەرۆك بارزانی، كورتییەك ل دۆر كارێن خوە یێن زانستی باسكر و چەند پرتووكێن خوە وەك دیاری پێشكێشی سەرۆك بارزانی كرن.

ئەندامەكێ كۆمیتەیا ناڤین یا پارتی و بەربژارێ سەركەفتیێ پارتی ل كەركووكێ د هەلبژارتنێن جڤاتا نوونەرێن ئیراقێدا دیاركر: ل گەل بزاڤێن ئالیێن سیاسی بۆ پێكئینانا حوكمەتێ، ئێك ژ مەرجێن پارتی ئەوە دەستوور بهێتە بجهئینان.
د. شاخەوان عەبدوللا، ئەندامێ كۆمیتەیا ناڤین یا پارتی دیموكراتی كوردستان و بەربژارێ سەركەڤتی یێ پارتی ل كەركووكێ بۆ رۆژنامەیا (ئەڤرۆ) گوت» ئەركێ مە ل جڤاتا نوونەرێن ئیراقێ ئەوە كو بەغدا پێگیر بكەین بجهئینانا دەستووری، چونكی بجهئینانا دەستووری ئارامیێ ل ئیراقێ پەیدا دكەت و سیستەمێ فیدرالی ل ئیراقێ ب هێز دئێخیت و ئێك ژ مەرجێن پارتی ئەوە دەستوور بهێتە بجهئینان».
شاخەوان عەبدوللا، ئاماژە ب وێ چەندێ دا» ڤێجارێ ئەركێ مە ل جڤاتا نوونەرێن ئیراقێ دێ یێ گران بیت، چونكی پشكەك ژ وان هێزێن نوكە هاتینە جڤاتا نوونەران، بەری نوكە هەلوەستێ وان بەرامبەر هەرێما كوردستانێ باش نەبوویە و درۆن بۆ سەر ژێرخانەیا ئابۆرییا هەرێما كوردستانێ هنارتینە، و نوكە كورسی ل جڤاتا نوونەران ب دەست ڤە ئیناینە و د نوكەدا بزاڤێن ئالیێن سیاسی بۆ پێكئینانا حوكمەتێ كارا بووینە و دێ بەر ب هەرێما كوردستانێ و ب تایبەتی پیرمام هێن، تاكو پشتەڤانییا پارتی ب دەستڤەبینن».

نوونەرا حوكمەتا هەرێما كوردستانێ ل ئەمریكا راگەهاند: ڤەكرنا مەزنترین قونسلخانەیا ئەمریكا ل جیهانێ ل باژێرێ هەولێرێ، ئاماژەیە بۆ باوەرییا ب هێز یا واشنتۆنێ ب هەرێما كوردستانێ، هەڤدەم دوپاتیێ ل وێ چەندێ دكەت كو چاڤەڕیێ وەرگرتنا سیستەمێ بەرگرییا ئەسمانی دكەن.
تریفە عەزیز، نوونەرا حوكمەتا هەرێما كوردستانێ ل ئەمریكا گوت» ڤەكرنا مەزنترین ئاڤاهیێ قونسلخانەیا ئەمریكا ل جیهانێ ل باژێرێ هەولێرێ رەنگڤەدانا وێ باوەرییا مەزن یا ئەمریكایە ب هەرێما كوردستانێ هەی».
گوت ژی» ئەڤە وێ چەندێ ژی دیار دكەت كوردستان دێ مینیت وەك پشتڕاسترین هەڤپەیمانا ئەمریكا ل دەڤەرێ و هەڤبەندی دەرئەنجامێ چەندین سالێن هەڤپشكییا ستراتیژییە».
ل دۆر پرسا ئەمنی و پاراستنا هەرێما كوردستانێ، تریفە عەزیز ئاشكراكر» هێشتا حوكمەتا هەرێما كوردستانێ چاڤەڕێیە ئەمریكا سیستەمێ (دژەدرۆن) رادەستی وێ بكەت. ئەو سیستەمێ بەرگریێ دێ هاریكارییا مە كەت هەرێما خوە ژ وان هێرشێن ل ڤێ دووماهیێ مە دیتین، بپارێزین».
نوونەرا حوكمەتا هەرێما كوردستانێ ل ئەمریكا باس ل وێ چەندێ ژی كر كو وەزارەتێن دەرڤە و بەرگریێ یێن ئەمریكا كار ل سەر پرۆسەیێ دكەن و هێرشێن ڤێ دووماهیێ ل سەر كۆمپانیێن وزەیێ وەدكەت پرۆسەیا پێدانا وی سیستەمی د چارچۆڤەیێ قانوونا بەرگرییا نیشتمانیدا ب لەزتر ببیت.
سەبارەت هەڤبەندیێن ئابۆری، گوت» ئێك ژ ئارمانجێن بەراهیێ یێن ئیدارەیا سەرۆكێ ئەمریكی دۆنالد ترەمپی ئاشتی و ئارامییە ل رۆژهەلاتا ناڤین، مل ب ملێ بەرفرەهكرنا هەڤبەندیێن ئابۆری».
تریفە عەزیز ئاماژە ب سەرەدانا مەسرور بارزانی، سەرۆكێ حوكمەتا هەرێما كوردستانێ بۆ واشنتۆنێ كر كو تێدا هەژمارەكا رێككەفتنێن چەند ملیار دۆلاری ل گەل كۆمپانیێن ئەمریكی هاتبوونە ئیمزاكرن، دوپاتكر ژی كو ب هێزكرنا ژێرخانەیا ئابۆری و سەربخوەییا ئابۆری ئارمانجەكا هەڤپشكا هەردو ئالییانە.

هەولێر، قائید میرۆ

چاڤدێرەكێ سیاسی ئاشكراكر، پارتی یا رژدە لسەر دامەزراندنا جڤاتا بلندا فیدرالی ل ئیراقێ و راستڤەكرنا قانوونا هەلبژارتنان، چونكە ب دامەزراندنا جڤاتا فیدرالی گەلەك ئاریشە و پرس دێ هێنە ئێكلاكرن و دبێژیت، بڕیاربوو بەری پەسەندكرنا دەستوورێ ئیراقێ، جڤاتا فیدرالی بهێتە دامەزراندن، بەلێ حوكمەتێن ئیراقێ پێگیر نەبوون.
د. نەوزاد عەزیز، چاڤدێرێ سیاسی وسەرۆكێ رێكخراوا دووربین بۆ پرسێن سیاسی و ئابۆری بۆ رۆژنامەیا (ئەڤرۆ) گوت» سەرۆك بارزانی بەری دەمەكی و ب دیاركری ل كۆڕبەندێ (مێپس) ل باژێڕێ دهۆكێ ئاماژە ب سی خالێن گەلەك گرنگ دابوو، ئێك ژوان دامەزراندنا جڤاتا بلندا فیدرالییە ل ئیراقێ، بەریا پەسەندكرنا دەستوورێ ئیراقێ بڕیاربوو جڤاتا فیدرالی ل ئیراقێ بهێتە دامەزراندن، بەلێ مخابن حوكمەتێن ئێك ل دووف ئێك یێن ئیراقێ پێگیرنەبوون ب دامەزراندنا جڤاتا فیدرالی و هەتا نوكە ئەو جڤات نەهاتیە دامەزراندن، چونكە دامەزراندنا جڤاتا فیدڕالی گەلەك یا پێدڤییە بۆ قووناغا نوكە یا ئیراقێ و دێ هەڤسەنگییا د ناڤبەرا كورد و سوننە و شیعەیان راگریت».
گوت ژی» پارتی دیموكراتی كوردستان یا بزاڤان دكەت لەزی د دامەزراندنا جڤاتا فیدرالیدا بهێتەكرن وپارتی وەك حزبا ئێكێ لسەر ئاستێ ئیراقێ دێ كاركەت ئەو جڤاتە بهێتە دامەزراندن و دەست بكاری بكەت، ژ بەر كو چەندین ئاریشە و پرسێن گرنگ هەنە وهەكە ل ئیراقێ جڤاتا بلندا فیدرالی هەبیت ئەو پرس دێ هێنە ئێكلاكرن».
خویاكر ژی»خالەكا دی یا گرنگ كو سەرۆك بارزانی تەكەزی لسەركری راستڤەكرنا قانوونا هەلبژارتنایە ل ئیراقێ، یا خۆیایە قانوونا هەلبژارتنان یا نوكە نەدادپەروەری تێدا هەیە و بەری نوكە ژی ب نەحەقی ئەو قانوونا هەلبژارتنان ب سەر كوردان هاتیە دەربازكرن و گەلەك كێماسی تێدانە، یا بەرئاقل نینە حزبەكا وەك پارتی دیموكراتی كوردستان زێدەتری ملیۆن دەنگان بدەستڤەبینیت و كورسیێن وێ كێم بن، ئەڤە د دەمەكی دایە حزب هەنە ل ئیراقێ دەنگێن وێ نیڤا دەنگێن پارتی نە و هەژمارا كورسیێن وێ پترن ژ هەژمارا كۆرسیێن پارتی ، لەوڕا ژی قانوونا هەلبژارتنان پێدڤی ب راستڤەكرن و گوهۆڕینێ هەیە، چەندین جاران قانوونا هەلبژارتنان هاتیە گوهۆڕین هەتا پارتی بشكێنن ونەهێلن سەركەڤیت، بەرەڤاژی ب گوهۆڕینا قانوونا هەلبژارتنان پارتی هەر هێزا ئێكێیە لسەر ئاستێ ئیراقێ و هەرێما كوردستانێ، ئانكو ب گوهۆڕینا قانوونا هەلبژارتنان ژی نەشیان پارتی لاواز بكەن و سەرۆك بارزانی ژی گەلەك تەكەزیێ لسەر گوهۆڕینا قانوونا هەلبژارتنان دكەت».
د. نەوزاد محەمەد عەزیز ئاماژە كر» ئاریشەیەكا دی د پرۆسەیا سیاسی و قانوونیدا ل ئیراقێ هەیە ئەوژی بابەتێ دادگەها بلندا فیدرالییە، چەندین سالە كوردان ئاریشە ل گەل دادگەها فیدرالی هەنە و دادگەها نوكە هەی ب گۆڕەی پیڤەرێن دەستوورێ ئیراقێ نەهاتیە پێكئینان، چونكە ل دووڤ دەستووری پێدڤی ب گوهۆڕینان هەیە و نابیت ئەو دادگەها نوكە كار دكەت ب ڤی شێوەی یا بەردەوامبیت، دڤێت دادگەها فیدرالی رەنگڤەدانا دادوەری یا هەموو پێكهاتەیێن ئیراقێ پێڤە دیاربیت، ئێك ژوان خالێن پارتی یا رژدە لسەر بۆ چار سالێن داهاتی راستڤەكرنا دادگەها بلند یا فیدرالییە ل ئیراقێ و نابیت چو پێكهاتە و ئالیێن دیاركری زالبن لسەر وێ دادگەهێ، بەرەڤاژی پارتی دخوازیت دادگەهەك ل ئیراقێ هەبیت چو پێكهاتەیێن وی وەلاتی هەست ب وێ چەندێ نەكەن كو ب گۆڕەی دەستووری كار ناكەت و نابیت لایەنگری ژی ب بڕیارێن ڤێ دادگەهێ ڤە دیار بیت».