سالار محەمەد دۆسكی:

د. خەلیل غازی دۆسكی، ئەندامێ لژنا دارایی ل جڤاتا نوونەرێن ئیراقێ بۆ رۆژنامەیا (ئەڤرۆ) گۆت: دو تشتێن هەرە گرنگ ل بەغدا یێن هەین و دڤێت بۆ هەموو خەلكێ كوردستانێ ئاشكەرا بكەین، هەڤڕكییەك د ناڤبەرا هەولێر و بەغدایێ دا یا هەی كو ئەم هەموو بزاڤا دكەین سەروەرییا هەرێما كوردستانێ یا پاراستی بیت وەك هەرێمەكا فیدرال و مە ژی هندەك ماف یێن هەین و د دەستوریدا یێن هاتین و دەستهەلات داینە هەرێما كوردستانێ هندەك كاران ئەنجام بدەت، د بەرامبەردا بەغدا یا هەموو بزاڤان دكەت بەر ب مەركزیەتێ ڤە بچین و هەموو بڕیار ژ بەغدایێ دەركەڤن و ئەڤە د دەمەكیدا مللەتێ كورد ب سەدان سالە خەباتێ دكەت و قوربانیێ د دەت و چو دەلیڤە بۆ ڤەگەراندنا هزرا بەغدا نینە، یا دویێ ل بەغدایێ گەلەك نەراستی دهێنە گۆتن ژ ئالیێن جودا جودا یێن سیاسی ڤە و گەلەك یا ب زحمەتە مرۆف پشیتبەستنێ ب ئالییەكێ سیاسی هەتا سەرۆكێ حوكمەتێ ژی بكەت، دەمەكێ درێژ بوو دانوستاندن هاتبوونەكرن و هەردو حكومەت روونشتبوون و رێككەفتن هاتبووكرن و رەشنڤیس ل مەها (11) یا سالا 2024 هاتبوو لژنا دارایی ل جڤاتا نوونەران و ئەو رەشنڤیس بوو یێ حوكمەتێ رازیبوون ل سەر دیاركری و د شیا بجهبینیت و دبەرژوەندیا حوكمەتا فیدرال دا بوو، چونكە رێژەیەكا هەرە مەزن یا داهاتێ پەترۆلێ دێ بۆ حوكمەتا فیدرال ڤەگەریت و مە چو تێبینی ل سەر نەبوون كو مافێ كۆمپانییان بگەهیتێ، مخابن ل ڤێ دووماهیێ پێشنیازەكا دی هاتیەكرن و ژئالییەكی ڤە سەرۆكێ حوكمەتێ دبیژیت نەیا منە و نوونەرێ حوكمەتێ ل جڤاتا نوونەران كو وەزیرە دبێژیت ژ حوكمەتێ هاتییە و ئەڤە جهێ گومانێیە، جێگرێ ئێكێ یێ لژنا دارایی دبێژیت من پەیوەندی ب سەرۆكێ حوكمەتێ یا كری و گۆتە من ئەو پێشنیاز من نەڤرێكرییە.
د. خەلیلی گۆت ژی: ل بەغدا ئەم نزانین باوەر ژ كێ بكەین، هندەك ئالیێن سیاسی یێن هەین گڤاشتن ل سەر حوكمەتێ یا كری هەتا ئەف پێشنیازە دەركەفتی و من ب خوە باوەری پێ نینە و ئەو پێشنیاز دارێشتنەكا فەرمی بیت بەلكو یا سیاسییە و مەرەم ژێ ئەوە زێدەتر گڤاشتن ل سەر هەرێما كوردستانێ بهێنەكرن و مافێن دەستوری یێن هەرێما كوردستانێ ژێ بهێنە ستاندن، هندەك ئەندامێن لژنا دارایی پێشنیازەك هەبوو ل سەر گوهۆڕینا بەندێ ئێكێ یێ راستڤەكرنێ ژ فەقرا (ج) دا كو بهێتە نڤێسین ئەو داهاتێ ژ بەر سلفێ دمینیت هەموو بهێتە تۆماركرن بۆ حوكمەتا فیدرال و حوكمەتا هەرێما كوردستانێ چو نەرازیبوون و تێبینی ل سەر نەبوون و ب تنێ كۆمپانی درازی بن و حوكمەتا هەرێما كوردستانێ وەك ئالییەكێ رێكخستنێ تێدا بیت.
زێدەتر گۆت: ژ بەر نەرۆهنی و نە ئاشكەرابوونێ ئەم نەچار بووین بابەتێ بۆدجێ ژ خشتەیدا بینینە دەر ژ بەركو مە ترس هەبوو كو دەنگدان ل سەر نەهێتەدان، پێشبینیێ دكەین ل رۆژا ئێك شەمبێ شاندێ حوكمەتا هەرێما كوردستانێ ڤەگەریتە بەغدا و رێككەفتنەكا گرنگ د ناڤبەرا هەرێمێ وەزارەتا دارایی دا یا هەی و پێشنیاز گەهاندینێ ل سەر بابەتێ مۆچا و شاندێ هەرێما كوردستانێ هەموو پێشنیاز گەهاندینێ كو وەزارەتا دارایی مەزاختنا بۆدجێ بجهبینیت، بۆ نموونە شاندێ هەرێما كوردستانێ یا پێشنیازكری كو هەموو داهاتێ ناڤخوەیی رادەست بكەن ب تنێ پشكا هەرێما كوردستانێ ژ بۆدجێ بهێتە دابینكرن و دڤێت پشتراستبوونەك بۆ ئەڤێ پێشنیازێ هەبیت و نابیت هەرێما كوردستانێ هەموو داهاتێ ناڤخوەیی رادەست بكەت و ئەم خوە بگرین هەتا هندە پارە ژ بەغدا بهێت و نە بەهرا مۆچان بكەت و نە بەهرا چ تشتێن دی، پێشنیازا دویێ وەزارەتا دارایی مۆچان بدەت و ئەم 50% داهاتێ ناڤخوەیی رادەست بكەین و 50% بمینیت بۆ بۆدجا تەشغیلی و وەبەرهێنانێ، هەر دو پێشنیاز بۆ بەغدا یێن هاتینە بلندكرن و چاڤەڕێی بەرسڤێ نە و پێشبینی دهێتەكرن حەفتییا داهاتی رێككەفتن ل سەر بهێتەكرن، ل دووف ئەزموونا مە ل بەغدا دیاربوو لێڤەبوون ژ هەموو رێككەفتنان گەلەك یا ب ساناهییە.
د.خەلیل غازی دۆسكی گۆت ژی: ب گشتی من باوەری ب بەغدا نینە و زێدەتر وان دڤێت بەر ب مەركەزیەتێ بچین و زیدەتر وان كونترۆل ل سەر پارێزگەه و هەرێمان هەبیت و نەب تنێ هەرێما كوردستانێ بەلكو كاودانێن هەموو پارێزگەهێن ئیراقێ د دەستێ وەزارەتا دارایییا ئیراقێ دا یێ نەخوەشە و جوداهی ئەو مۆچا وەردگرن بەلێ بابەتێن دی گەلەك ب زەحمەت پارە بۆ پارێزگەهان دهێنە مەزاختن، یێ هەرێما كوردستانێ و ئاریشا مەزن ئەوە مووچێ خەلكێ كوردستانێ كو ژیانا وان ل سەر ڤی مۆچەیە ئاستەنگ دهێنە د رێكێدا و دهێتە گیرۆكرن.
د.خەلیلی ئەو ژی ئاشكەراكر كو ل (12) مەهێن سالا (2024) بەغدا ب تنێ (6) مەهان مووچە ب دروستی بۆ هەرێما كوردستانێ یێ هنارتی و هەر شەش مەهێن دی دبیت هندەك مەهان(400 – 500- 600- و ژ هەموویان پتر 700 ملیار) یێن هنارتین و پارێ مای حوكمەتا هەرێما كوردستانێ ژ داهاتێ ناڤخوەیی یێ تمامكری، دیسا نەفەقاتێن ناڤخوەیی یێن تەشغیلی و وەبەرهێنانێ یێن پێ ئەدا كرین، ل دووڤ گۆتنا بانكا ناڤەندی كو ئەو ژێدەرێ سەرەكیێ هنارتنا پارایە دبێژن 10 ترلیۆن و 26 ملیار دینار مە یێن هنارتین، وەزارەتا دارایی دبێژیت مە 11 ترلیۆن و نیف یێن هنارتین و یا دروست بەنكا ناڤەندییە.

نوری فرات نڤیسەر و ڤەکۆلەرێ تورکیا دیار دکەت، دانوستاندنێن د ناڤبەرا دەولەتا تورکیا و ئۆجەلانی دا ب تەمامی نهینی نە، شاندێ ئیمرالیێ ژی چو تشتەکێ بۆ رایا گشتی ئاشکرا ناکەت، گەلێ کورد ل تورکیا ژ رەوشا نها دلگرانە، چونکی کەس نزانیت کا چ روو ددەت، ژ بەر ڤێ یەکێ ژی باوەریا کوردان ب پرۆسیسا نها ناهێت و هەکە د پاشەرۆژێ دا ب کریاری هندەک تشت نەهێنە کرن ئەوا نها ب ناڤێ قۆناغا ئاشتیێ دهێتە کرن ناگەهیتە چو ئەنجامەکێ.
ناڤهاتی ئەو یەک ژی دیار کر، ئارمانجا سەرەکی یا تورکیا ژ دەستپێکرنا قۆناغا ئاشتیێ یا ل گەل ئۆجەلانی رۆژئاڤایێ کوردستانێ یە، ناکۆکی ژی ل سەر رۆژئاڤا نە، لێ دیارە بەرپرسێن پەکەکێ یێن ل قەندیلی ل دژی داخوازیێن تورکیا نە، ژ بەر ڤێ یەکێ ژی گەلەک زەحمەتە تورکیا بشێت ب رێیا ئۆجەلانی بگەهیتە ئارمانجا خوە ل رۆژئاڤایێ کوردستانێ.

سەرۆك بارزانی پەیامەكا سەرەخوەشیێ ل تۆرا جڤاكییا ئێكس ئاراستەی كەسوكارێن قوربانیێن ئاگرێ توركیا كر و تێدا هاتیە» گەلەك مخابن بۆ روودانا دلتەزین یا ئاگركەفتنێ ل هۆتێلەكا پارێزگەها بۆلۆ ل توركیا، كو هەژمارەكا مەزن یا هەڤوەلاتییان بوونە قوربانی».
سەرۆك بارزانی گۆت ژی» سەرەخوەشییا خوە ئاراستەی مالباتێن كەسێن كەسێن د وێ روودانێدا گیانێ خوە ژ دەستدای دكەم و خوە ب هەڤپشكێ خەما وان دزانم و هیڤییا چاكبوونێ بۆ بریندارێن وێ روودانا دلتەزین دخوازم».
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ ل تۆرا جڤاكییا ئێكس ل دۆر ئاگرێ هۆتێلا باژێرێ بۆلو یێ توركی نڤیسی» ئاگرێ تراژیدیێ هۆتێلا بۆلۆ ل توركیا خەمبار كرم».
نێچیرڤان بارزانی هەڤسۆزییا خوە بۆ كەسوكارێن وەغەركری د روودانا ئاگریدا دیاركر و گۆت» هزرا من یا ل دەف قوربانییان، كەسوكار و خەلكێ توركیا د ڤی دەمێ دژواردا».
مەسرور بارزانی، سەرۆكێ حوكمەتا هەرێما كوردستانێ ژی ل تۆرا جڤاكییا ئێكس پەیامەكا هەڤخەمیێ و دلگرانیێ بۆ روودانا ئاگری توركیا بەلاڤكر و تێدا سەرەخوەشییا خوە ئاراستەی گەل و حوكمەتا توركیا كر و گۆت» یێ خەمبارم ب روودانا ئاگركەفتنا باژێرێ بۆلۆ ل توركیا، د ڤی دەمێ دژواردا سەرەخوەشییا خوە د گەهینمە كەسوكارێن قوربانییان و گەل و حوكمەتا توركیا».
دهێتە زانین د ئەنجامێ ئاگركەفتنێ ل هۆتێلەكێ ل كۆمەلگەهەكا گەشتیاری ل بۆلۆ ل توركیا 76 كەسان گیانێ خوە ژ دەستدا و 41 كەس ژی بریندار بوون.

دوهی چارشەمبی 22/1/2025، نێچیرڤان بارزانی، سەرۆكێ هەرێما كوردستانێ ل گەل ئەدریان ئایسلستین، قۆنسلێ گشتیێ نوو یێ هۆلەندا ل هەرێما كوردستانێ كۆمبوو.
د دیدارەكێدا سەرۆكێ هەرێمێ پشتەڤانی بۆ سەرئێخستنا ئەركێن قۆنسلێ نوو یێ هۆلەندا ل هەرێمێ نیشاندا و دوپاتی ل خواستا هەرێما كوردستانێ بۆ پێشڤەبرنا پەیوەندیێن خوە ل گەل هۆلەندا، كر.
قۆنسلێ گشتیێ هۆلەندا خوەشحالییا خوە ب دەستبكاربوونێ نیشاندا و دوپاتی ل بەرهەڤی و خواستا وەلاتێ خوە بۆ زێدەتر پێشڤەبرنا پەیوەندیێن خوە ل گەل هەولێرێ كر و هیڤی خواست بشێت د دەمێ ئەركێ خوە دا و د هەموو واراندا، پەیوەندییان و هاریكارییا هەڤپشك یا هەرێما كوردستانێ و هۆلەندا زێدەتر پێشڤە ببەت.
كەرت و وارێن بۆ هەردو ئالییان د گرنگ، رەوشا گشتییا ئیراقێ و هەرێما كوردستانێ و دوماهی پێشهاتێن دەڤەرێ، تەوەرێ دی یێ دیدارێ بوون.

مەسرور بارزانی، سەرۆكێ حوكمەتا هەرێما كوردستانێ د چارچۆڤەیێ پشكداریكرنێ د كۆڕبەندێ جیهانیێ داڤۆسێ دا ل وەلاتێ سویسرا چەندین دیدار و كۆمبوون ل گەل سەركردە و بەرپرسێن وەلاتێن جیهانێ ئەنجامدان.
سەرۆكێ حوكمەتا هەرێما كوردستانێ د بەردەوامییا دیدارێن خوە دا ل داڤۆسێ ل گەل دیك شوف، سەرۆك وەزیرێن هۆلەندا گەنگەشە ل سەر گوهۆڕین و پێشهاتێن رۆژهەلاتا ناڤین، ب تایبەتی سووریێ كر و هەردو ئالی د هەڤڕابوون ب سەر پێدڤییا پاراستنا ئاشتیێ و سەقامگیریێ و پشتەڤانییا نێڤدەولەتی بۆ پێكئینانا حوكمەتەكا گشتگیر و هەمەئالییانە و پشكدارییا هەموو پێكهاتەیێن سووریێ د پڕۆسەیا سیاسی و ب رێڤەبرنا وەلاتێ خوە دا. هەر د وێ دیدارێدا هەردو ئالییان دوپاتی ل گرنگییا ب هێزكرنا پەیوەندیێن دو ئالییانە یێن هەرێما كوردستانێ و هۆلەندا كر د وارێن جۆرا و جۆر دا.
هەر ل داڤۆسێ سەرۆكێ حوكمەتا هەرێمێ ل گەل محەمەد بن عەبدولرەحمان ئال سانی، سەرۆكێ وەزیران و وەزیرێ دەرڤەیێ دەولەتا قەتەرێ كۆمبوو.
د دیدارەكێدا بۆچوون ل دۆر ب هێزكرنا پەیوەندیێن دو ئالییانە و رەوشا گشتییا ئیراقێ هاتنە لێكگۆهارتن.
پشكەكا دی یا گەنگەشێ تایبەت بوو ب گوهۆڕین و پێشهاتێن سووریێ. سەرۆكێ وەزیران و وەزیرێ دەرڤەیێ قەتەرێ پشتەڤانییا وەلاتێ خوە بۆ بزاڤێن سەرۆك مەسعود بارزانی بۆ نێزیككرنا ئالیێن كوردی و سووری نیشاندا. هەروەسا هەردو ئالی د هەڤڕابوون ل سەر پاراستنا ئاسایشێ و ئارامیێ و مافێن پێكهاتەیێن جودا یێن وەلاتێ سووریێ.
هەر د بەردەوامییا دیدار و كۆمبوونێن خوە دا ل داڤۆسێ، مەسرور بارزانی، سەرۆكێ حوكمەتا هەرێما كوردستانێ ل گەل محەمەد قرقاوی، وەزیرێ كاروبارێن جڤاتا وەزیران ل دەولەتا ئیماراتێ كۆمبوو.
د دیدارەكێدا گەنگەشە ل دۆر پێشڤەبرنا پەیوەندییان و هەماهەنگیێ د ناڤبەرا هەرێما كوردستانێ و دەولەتا ئیماراتێ دا د وارێن ئابووری، لێكگۆهارتنا بازرگانی، حوكمڕانییا ئەلكترۆنی، گەشەپێدانا ئابووری و پێشئێخستنا شیانێن مرۆڤی و كارگێری یێن هەرێما كوردستانێ هاتە كرن.
هەر ل داڤۆسێ سەرۆكێ حوكمەتا هەرێما كوردستانێ ل گەل محەمەد جەواد زەریف، هاریكارێ سەرۆككۆمارێ ئیرانێ بۆ كاروبارێن ستراتیژی كۆمبوو.
د دیدارەكێدا گەنگەشە ل دۆر پێشڤەبرنا پەیوەندیێن هەرێما كوردستانێ و كۆمارا ئیسلامییا ئیرانێ و رەوشا گشتییا ئیراقێ ودەڤەرێ و ب تایبەتی سووریێ هاتە كرن.
گرنگییا چارەسەرییا كێشەیێن د ناڤبەرا هەرێما كوردستانێ و حوكمەتا فیدرال و دابینكرنا مافێن دستووری و شایستەیێن دارایی یێن هەرێما كوردستانێ، تەوەرەكێ دی یێ دیدارێ بوو.
سەرۆكێ حوكمەتا هەرێمێ د بەردەوامییا دیدارێن خوە دا ل داڤۆسێ ل گەل ماجد ئەلقەسەبی، وەزیرێ بازرگانی یێ سعودی كۆمبوو و د كۆمبوونێدا دوپاتی ل پێدڤییا ب هێزكرنا پەیوەندیێن هەرێما كوردستانێ و وەلاتێ سعودیێ ب تایبەتی د وارێ بازرگانی و وەبەرئێنانێدا هاتە كرن.

ب سەرپەرشتییا فوئاد حسێن، جێگرێ سەرۆك وەزیرێن ئیراقێ و سەرۆكێ جڤاتا ئابووری، كۆمبوونەكا هەڤپشك د ناڤبەرا شاندێ هەرێما كوردستانێ ب سەرۆكایەتییا ئاوات شێخ جەناب، وەزیرێ دارایی و ئابووری و ئومێد سەباح، سەرۆكێ دیوانا جڤاتا وەزیران و ئامانج رەحیم، سكرتێرێ جڤاتا وەزیران و عەبدولحەكیم خەسرەو، سەرۆكێ فەرمانگەها هەماهەنگیێ و دووڤچوونێ ل گەل شاندێ حوكمەتا فیدرال كو پێكهاتبوو ژ تەیف سامی، وەزیرا داراییا ئیراقێ و بەنگێن رێكانی، وەزیرێ ئاڤەدانكرن و ئاكنجیكرنێ ل ئیراقێ ب رێڤەچوو.
ب گۆڕەی بەیاننامەیەكا وەزارەتا دارایی و ئابووری ل حوكمەتا هەرێما كوردستانێ، د كۆمبوونێدا هەژمارەكا رێڤەبەرێن گشتی ل وەزارەتا داراییا ئیراقێ و تیما تەكنیكی یا وەزارەتا داراییا هەرێما كوردستانێ بەرهەڤ بوون، د سەقایەكێ ئەرێنی و بەرپرسیاردا گەنگشە ل سەر ماف و شایستەیێن دارایی یێن هەرێما كوردستانێ بۆ سالا 2025 هاتە كرن، هەردو ئالی د هەڤڕابوون ل سەر وێ چەندێ هەموو بزاڤ بهێنە بكارئینان بۆ لادانا ئاستەنگێن پێشبەری هنارتنا مووچێ فەرمانبەرێن هەرێما كوردستانێ ل سالا 2025، هەڤدەم داخوازیێن حوكمەتا هەرێمێ بۆ هنارتنا شایستەیێن سالا بۆری نەهاتینە هنارتن و بەلگەیێ فەرمی هاتە بەرچاڤكرن، هەروەسا گەنگەشە ل سەر وێ چەندێ هاتە كرن.
وەزارەتا دارایی و ئابووری ل هەرێمێ ئاماژە ب وێ چەندێ كر كو هەردو ئالی رێككەفتن كۆمبوون د بەردەوام بن و رۆژا ئێكشەمبییا داهاتی كۆمبوونا هەڤپشك بهێتە ئەنجامدان، تێدا بڕیارا پێدڤی ل سەر ماف و شایستەیێن دارایی یێن هەرێما كوردستانێ بهێتە دان و راسپاردەیێن پێدڤی ژی ئاراستەی جڤاتا وەزیرێن ئیراقێ بهێنە كرن.
هەر د وێ كۆمبوونێدا بڕیار هاتە دان تیمەكا هەڤپشك ژ هەردو وەزارەتێن داراییا فیدرال و وەزارەتا دارایی و ئابووری ل هەرێمێ بهێتە پێكئینان و هەر ژ رۆژا سێشەمبی 21/1/2025 دێ ل وەزارەتا دارایی و ئابووری ل هەرێمێ دەستبكاربن، هەڤدەم بەرهەڤیێن پێدڤی بكەن بۆ كۆمبوونا دەستپێكا حەفتییا داهاتی ل سەر ئەرك و پێگیریێن هەردو ئالییان بۆ سالا 2025.

مەكتەبا سیاسییا پارتی دیموكراتی كوردستان هەلوەشاندنا بڕیارێن حزبا بەعسا ژناڤچووی ب پێنگاڤەكا گرنگ و پێدڤی دزانیت و داخوازێ ژ حوكمەتا فیدرالی و ئالیێن پەیوەندیدار دكەت د جهئینانا ڤێ قانوونێدا رۆلێ خوە ببینن.
دوهی چارشەمبی 22/1/2025، مەكتەبا سیاسیی پارتی دیموكراتی كوردستان بەیاننامەیەك ل دۆر پەسەندكرنا قانوونا (هەلوەشاندنا بڕیارێن بەعسا ژناڤچووی) ژ ئالیێ جڤاتا نوونەرێن ئیراقێ و ڤەگەراندنا زەڤیێن دەست ب سەرداگرتی بۆ خودانێن وان یێن رەسەن، بەلاڤكر.
مەكتەبا سیاسییا پارتی هەلوەشاندنا بڕیارێن بەعسا ژناڤچووی ژ ئالیێ جڤاتا نوونەرێن ئیراقێ ب پێنگاڤەكا گرنگ و پێدڤی هەژمارت و ب ڤێ هەلكەفتێ دەستخوەشی ل نوونەرێن پارتی و فراكسیۆنێن كوردستانی كر.
د بەیاننامەیا مەكتەبا سیاسییا پارتی دا هاتیە» هیڤیدارین ئەڤ پێنگاڤە هاندەرا زێدەتر ب هێزكرنا گیانێ هەڤدوقبوولكرنێ و پێكڤەژیانا ئاشتییانە و ب هێزكرنا بنەمایێن ئاڤەدانكرنا ئیراقا نوو بیت».
مەكتەبا سیاسییا پارتی ئاماژە ب وێ چەندێ ژی كر» چاڤەڕێیا مە ژ حوكمەتا فیدرال و دامودەزگەهێن پەیوەندار یا هەی كو د وەرگرتنا پێرابوونێن بجهئینانا ڤێ قانوونێ، خەمساریێ نەكەن و رۆلێ خوە ببینن».

پەیڤدارێ ئەنجوومەنێ نشتیمانی یێ کوردی ل سووریێ دیار کر، سەرۆک بارزانی داخواز ژ وان کریە ل ئاستەنگێن ل گەل هێزێن سووریا دیموکرات نەهێلن و پێکڤە ژ  بۆ مافێن گەلێ کورد ل سووریێ کار بکەن و وان ژی دڤێت داخوازیێن سەرۆک بارزانی بجه بینن.

فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ راگەهاند، هەڤدیتنا وان وەکو ئەنجوومەنێ نشتیمانی یێ کوردی ل گەل جەنابێ سەرۆک بارزانی ب رەنگەکێ باش برێڤە چوو و تێدا جەنابێ سەرۆک بارزانی دیار کر، دیدارا وی ل گەل مەزلوم عەبدی باش بوویە و نها دەلیڤەکا باش ژ بۆ کوردان ل سووریێ هاتیە پێش و دڤێت کورد پێکڤە کار بۆ بدەستڤەئینانا مافێن خوە بکەن و گۆت: (جەنابێ سەرۆکی داخواز ژ مە کر کو ئاستەنگێن هەی ل گەل هێزێن سووریا دیموکرات نەهێلین و پێکڤە کار بکەین دا کورد ل دەستهەلاتا نوو یا ل شامێ خوەدان پێگەهەک باش بن و بگەهنە مافێن خوە).
پەیڤدارێ ئەنجوومەنێ نشتیمانی یێ کوردی ل سووریێ دیار کر، هەر پشتی ئالۆزیێن ل سووریێ هەتا نها سەرۆک بارزانی داخواز کریە کو کوردێن سووریێ پێکڤە کار بکەن و بەری نها ژی سەرۆک بارزانی گەلەک بزاڤ کرن و نها ژی سەرۆک بارزانی دەست ب بزاڤەکا مەزن کریە و هەڤدیتنا جەنابێ سەرۆکی ل گەل مەزلوم عەبدی ژی بێگومان بوویە جهێ دلخوەشیا کوردێن رۆژئاڤایێ کوردستانێ و ئەم هیڤیدارین قۆناغەکا نوو و باش ل سووریێ و رۆژئاڤایێ کوردستانێ دەستپێ بکەت کو ئەو یەک د بەرژەوەندیا هەموو کوردێن رۆژئاڤایێ کوردستانێ دایە.
ل ئالیێ دی چاڤدێرێن سیاسی ل رۆژئاڤایێ کوردستانێ ژی دیار دکەن، پشتی هەڤدیتنا سەرۆک بارزانی ل گەل فەرماندارێ گشتی یێ هێزێن سووریا دیموکرات ئەو ب هیڤی نە کو هەر دو جڤاتێن کوردی یێن رۆژئاڤایێ کوردستانێ دەست ب قۆناغەکا نوو بکەن و پرسێن هەی د ناڤبەرا خوە دا چارەسەر بکەن، چونکی نها دەلیڤەکا دیرۆکی بۆ کوردان هاتیە پێش و دڤێت هێزێن کوردی ئێکگرتی بن و پێکڤە ژ بۆ بدەستڤەئینانا مافێن کوردان ل سووریا نوو کار بکەن.
ل گۆر باوەریا چاڤدێرێن سیاسی دڤێت هەر زوو دیالۆگا د ناڤبەرا هەر دو جڤاتێن کوردی یێن رۆژئاڤایێ کوردستانێ دا دەستپێ بکەت و دڤێت کورد وەکو ئێک شاند ل گەل شامێ دەست ب دانوستاندنان بکەن، چونکی ئەمریکا و پڕانیا وەلاتێن ئێکەتیا ئۆرۆپا ژی هەمان داخوازی ژ کوردان کرینە، ڤێجا گرنگە هەر دو جڤاتێن کوردی هەست ب بەرپرسیاریا خوە یا دیرۆکی بکەن و د چارچۆڤێ بزاڤێن سەرۆک بارزانی دا پێکڤە دەست ب قۆناغەکا نوو بکەن، چونکی دەمێ کورد بهێز بن دێ شام ژی نەچار بیت داخوازیێن کوردان قەبوول بکەت.

سەرۆك بارزانی پێشوازی ل دەستەیا سەرۆكایەتییا جڤاتا نیتشمانییا كوردی ل سووریێ (ئەنەكەسە) كر، د كۆمبوونێدا سەرۆك بارزانی دوپاتی ل ئێكڕێزیی و هەماهەنگیێ و كارێ هەڤپشك یێ ئالیێن كوردێن سووریێ كر.
دوهی سێشەمبی 21/1/2025 ل سەلاحەدین سەرۆك مەسعود بارزانی، پێشوازی ل دەستەیا سەرۆكایەتییا جڤاتا نیشتمانییا كوردی ل سووریێ كر، د دیدارەكێدا رەوشا سیاسی و ئەمنی ل سووریێ و ئەنجامێن دانوستاندن و نێزیككبوونا ئالیێن كوردی ل سووریێ و سەرەدانا فەرماندەیێ گشتیێ هێزێن سووریا دیموكراتی (هەسەدە) بۆ سەرۆك بارزانی هاتە گەنگەشەكرن.
د كۆمبوونێدا سەرۆك بارزانی دوپاتی ل ئێكڕێزی و هەماهەنگی و كارێ هەڤپشك یێ ئالیێن كوردی ل سووریێ كر.

دوهی سێشەمبی 21/1/2025، نێچیرڤان بارزانی، سەرۆكێ هەرێما كوردستانێ ل گەل تۆماسۆ سانسۆنێ، قۆنسلێ گشتیێ نوو یێ ئیتالیا ل هەرێما كوردستانێ كۆمبوو و پیرۆزباهییا دەستبكاربوونێ لێ كر.
د كۆمبوونێدا نێچیرڤان بارزانی هیڤییا سەركەفتنێ بۆ قۆنسلێ گشتیێ نوو یێ ئیتالیا خواست و هەموو پشتەڤانییەكا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی دەربڕی.
قۆنسلێ گشتیێ نوو یێ ئیتالیا ژی خوەشحالییا خوە ب دەستبكاربوونێ ل هەرێما كوردستانێ نیشاندا و دوپاتكر وەلاتێ وێ ب گرنگییەكا مەزنڤە دنێریتە پەیوەندیێن خوە ل گەل هەرێما كوردستانێ و دخوازیت د هەموو واراندا هاریكارییا هەڤپشك یا د ناڤبەرا واندا پێشڤەببەت.
گرنگترین وارێن پەیوەندییا ئیتالیا ل گەل ئیراقێ و هەرێما كوردستانێ، رەوشا دەڤەرێ و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.