سەرۆكێ هەرێما كوردستانێ د سالڤەگەڕا (38) یا كیمیابارانكرنا هەلەبجە دا پەیامەك بەلاڤكر، تێدا هاتییە»ئەڤرۆ كو دەڤەر د بارودۆخەكێ مەترسیدار یێ شەڕی دا دەرباز دبیت، ئەركەكێ گران یێ نشتیمانی ل سەر ملێن مە هەموویانە بۆ پاراستنا هەرێما كوردستانێ».
د پەیاما خوە دا نێچیرڤان بارزانی، سەرۆكێ هەرێما كوردستانێ دبێژیت: « كیمیابارانكرنا هەلەبجە بتنێ بزاڤەكا ژناڤبرنا جەستەیی یا كوردان نەبوو، بەلكو تاوانەكا دژی مرۆڤایەتیێ و هێرشەكا درندانە بوو ل سەر ئیرادەیا مللەتەكی كو بتنێ داخوازا ژیان و ئازادیێ دكر. هەلەبجە وەك دیدەڤانەكا زیندی یا دیرۆكێ د ویژدانا جیهانێ دا دێ مینیت، دا كو مرۆڤایەتی وانەیان ژێ وەربگریت و رێگریێ ل دووبارەبوونا هەر جۆرە كۆمەلكوژییەكێ بكەت، ل هەر جهەكێ جیهانێ بیت».
سەرۆكێ هەرێما كوردستانێ، حوكمەتا فیدرال یا ئیراقێ ب بەرپرس دزانیت كو پێدڤییە قەرەبوویا هەژی بۆ قوربانیێن كیمیابارانكرنا هەلەبجە بكەت، دا كو دادپەروەری بۆ قوربانییان پەیدا ببیت وگوت «د هەرێما كوردستانێ ژی دا، دڤێت باشترین خزمەت و چاڤدێرییا پێدڤی پێشكێشی بەركەفتیێن وێ تاوانێ بهێتە كرن».
نێچیرڤان بارزانی باسێ بارودۆخێ دەڤەرێ ژی كر كو نوكە تێدا دەرباز دبیت و دبێژیت «د ڤی بارودۆخێ هەستیار دا، ئێكڕێزی و تەبایی تاكە رێكا پاراستنا دەستكەفتان و بەرهنگاربوونا ئاستەنگانە. ئەم هەموو قەردارێن خوونا شەهیداینە و باشترین وەفاداری بۆ گیانێ وان یێ پاقژ، پێكڤەكاركرنە بۆ دوورئێخستنا مەترسییان ل سەر گەل و ئاخا كوردستانێ».

ل رۆژا دوشەمبی 16 ئادارا 2026ێ، نێچیرڤان بارزانی، سەرۆكێ هەرێما كوردستانێ، پێشوازی ل غولام محەمەد ئیسحاقزای، بەرپرسێ نەتەوەیێن ئێكگرتی ل ئیراقێ و شاندەكێ د گەل دا كر.
د كۆمبوونێ دا بارودۆخێ سیاسی و ئەمنی یێ ئیراقێ و چالاكییێن نەتەوەیێن ئێكگرتی هاتنە گەنگەشەكرن.
نێچیرڤان بارزانی سەرەرای سوپاسیكرنا بەرهەڤبوون و رۆلێ نەتەوەیێن ئێكگرتی ل ئیراقێ، دوپاتی ل سەر گرنگییا بەردەوامبوونا پشتەڤانی و هاریكارییێن جڤاكا نێڤدەولەتی بۆ ئیراقێ و هەرێما كوردستانێ كر، ب مەرەما جهگیركرنا ئارامیێ و بەرهنگاربوونا ئاستەنگان.
ژ ئالیێ خوە ڤە، ئیسحاقزای سوپاسییا هاریكارییا ئالییێن پەیوەندیدار یێن هەرێما كوردستانێ ل گەل نەتەوەیێن ئێكگرتی كر و پێگیربوونا نەتەوەیێن ئێكگرتی ب بەردەوامبوونا هاریكاریكرنا ئیراقێ و هەرێما كوردستانێ دوپاتكر.
بارودۆخێ ئالۆز یێ دەڤەرێ و كارتێكرنێن شەڕی، تەوەرەكێ دی یێ كۆمبوونێ بوو. تێدا هەردو ئالییان دوپاتی ل سەر گرنگییا چڕكرنا بزاڤێن دیپلۆماسی بۆ چارەسەركرنا ئاشتییانە یا كێشەیان كر.

سەرۆكێ حوكمەتا هەرێما كوردستانێ د سالڤەگەڕا (38) یا كیمیابارانكرنا هەلەبجە دا رادگەهینیت، پێدڤییە حوكمەتا فیدرال د ئاستێ بەرپرسیارەتییا خوە یا قانوونی و دەستووری دا بیت، خەلكێ كوردستانێ ژی نابیت ژ بیرا وان بچیت كو ئەو دەستكەفتێن ئەڤرۆ یێن هەرێما كوردستانێ بەرهەمێ خوونا شەهیدانە.
ل رۆژا دووشەمبی16 ئادارا 2026ێ، مەسرور بارزانی، سەرۆكێ حوكمەتا هەرێما كوردستانێ پەیامەك بەلاڤكر و جارەكا دی ب بیرا حوكمەتا فیدرال دئینیت كو پێدڤییە قەرەبوویا قوربانییان بكەت و دبێژیت»ب شێوەیەكێ هەژی، بنەمال و كەسوكارێن سەربلندێن شەهیدێن هەلەبجە، ئەنفالكری و هەموو قوربانییێن دی یێن دەستێ رژێما بەرێ یا ئیراقێ قەرەبوو بكەت».
مەسرور بارزانی هەروەسا دبێژیت» ئارمانجا وێ كارەساتێ یا كو بەرامبەر خەلكێ هەلەبجە هاتییە ئەنجامدان قڕكرن و جینۆسایدكرنا گەلێ كوردستانێ بوو».
د پشكەكا دی یا پەیاما خوە دا، سەرۆكێ حوكمەتا هەرێما كوردستانێ باسێ وێ چەندێ دكەت، كیمیابارانكرنا هەلەبجە هەموو وەختان برینەكا كوورە د دیرۆكێ دا و نیشانەكا دیار و رۆهنە یا وێ ستەمكاری و زۆردارییا دژی خەلكێ كوردستانێ هاتییە ئەنجامدان. لەوما دوپات دكەت، نابیت ئەو تاوانا هووڤانە چو جاران ژ بیرا خەلكێ كوردستانێ و مرۆڤایەتیێ بچیت.

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان، باسێ وێ نەخشەرێكا دەستووری دكەت یا كو هەرێما كوردستانێ بۆ هنارتنا پەترۆلا ئیراقێ پێشكێش كری. هەروەسا دبێژیت كو خال د بەرژەوەندییا خەلكێ كوردستانێ و ئیراقێ دا نە.
زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان، د داخۆیانییەكا رۆژنامەڤانیدا گۆت»پشتی هێرشێن ئەمریكا و ئیسرائیلێ ل سەر ئێرانێ، ئیراق تووشی قەیرانەكا داراییا مەزن بوویە، ئەو ژی ژ بەر نەفرۆتنا پەترۆلێ ب ئەگەرێ دائێخستنا ئاڤتەنگا هورمز، ب ڤی ئەگەری رۆژانە زیانەكا ئابۆرییا مەزن دگەهیتە حوكمەتا ئیراقێ، لەوما نوكە ئیراق ب د مەبەستە ب رێكا بۆرییا كوردستانێ بۆ بەندەرێ جەیهان یێ توركی پشكەك ژ پەترۆلا خوە بفرۆشیت. بۆ ڤێ مەرەمێ حوكمەتا هەرێما كوردستانێ نیەتا خوە دیار كرییە بۆ فرۆتنا پشكەك ژ پەترۆلا ئیراقێ ب رێكا بۆرییا پەترۆلا كوردستانێ، بەرامبەر ڤێ چەندێ هەرێما كوردستانێ چەند داخوازییەك هەنە كو د قانوونی و دەستووری نە، ژ وان ژی: گەرنتیكرنا مووچەیێ مووچەخۆرێن هەرێما كوردستانێ، جیهگیركرنا بودجەیا كوردستانێ وەك هەموو پشكێن دی یێن ئیراقێ ب گۆرەی دەستووری، دابینكرنا شایستەیێن دارایی یێن كوردستانێ كو چەندین سالە دهێنە بنپێكرن».
زیرەك زێباری ئەو چەندە ژی دیار كر «دڤێت ئیراق گرووپێن ژ قانوونێ دەركەفتی كۆنترۆل بكەت، چونكی وان گرۆپان هەم ئیراق ئێخستییە د ناڤ شەڕی دا و هەم دڤێت ناكۆكییان د ناڤبەرا هەولێرێ و بەغدایێ دا دروست بكەن و هەم ژیانا خەلكێ هەرێما كوردستانێ و ئابۆر و ژیارا وان دكەنە ئارمانج. وان گرۆپان دڤێت دەستێوەردانێ د سیاسەتا دەولەتێ دا بكەن، كو دەست ب بەلاڤكرنا دەنگوباسێن نەراست و چەواشەكاری كرییە، كو وەك بێژن كوردستان رێكێ نادەت پەترۆلا ئیراقێ د وێرێ را دەرباز ببیت! د وەختەكی دا ئەم رێكێ د دەین، بەلێ نەخشەرێكا مە یا دەستووری هەیە».
وی پەرلەمانتارێ فراكسیۆنا پارتی، هەروەسا راگەهاند»بەغدا یا بەرهەڤ نینە بەرهنگاری وان هێرشێن تیرۆریستی ببیت یێن كو دهێنە سەر هەرێما كوردستانێ و رێگریێ لێ بكەت. هەتا نوكە چو پێرابوونێن كاریگەر ناهێنە دیتن بۆ راوەستاندنا وان هێرشان، پشكەكا مەزن ژ وان هێرشبەران ل بەغدا مووچەی وەردگرن و هاتینە پڕچەككرن و پارەداركرن، د وەختەكی دا كو مووچەیێ خەلكێ كوردستانێ هەوو دەمان پاشدكەڤیت و كێمتر ژ گوژمەیێ پێدڤی دهێتە هنارتن».
رۆهنكر ژی «هەرێما كوردستانێ ب هەموو رەنگان بەرهەڤییا خوە دیار كرییە كو ئیراقێ ژ ڤێ قەیرانێ رزگار بكەت و ئەڤە چەندین جارە داخوازێ ژ بەغدا دكەین دانوستاندنەكا ئاڤاكەر بۆ چارەسەركرنا كۆما وان كێشەیان دەستپێبكەت، بەلێ داخوازا مە هاتییە پشتگوه ئێخستن و بزاڤ هاتییە كرن ئەجێندایێن نەدەستووری و نە قانوونی ب سەر هەرێما كوردستانێ دا بسەپینن».

فراكسیۆنا پارتی دیموكراتی كوردستان ل جڤاتا نوونەرێن ئیراقێ د بەیاننامەیەكێ دا بەرسڤا گەفێن پشكەك ژ فراكسیۆنێن د ناڤ جڤاتا نوونەران دا ددەت و تێدا دوپات كر كو هەرێما كوردستانێ رێزێ ل دەستوورێ بەردەوام دگریت و پێدڤییە حوكمەتا فیدرال ژی رێزێ ل دەستووری بگریت و پێگیری مافێن دەستووری یێن هەرێما كوردستانێ بیت.
هەر د وێ بەیاننامەیێ دا، فراكسیۆنا پارتی داخوازا كۆمبوونەكا ب لەز ژ حوكمەتا فیدرال دكەت، بۆ چارەسەركرنا كێشەیێن هەلاویستی ل شوونا بەلاڤكرنا بەیاننامەیێن گەفهەلگر.
دەقێ بەیاننامەیا فراكسیۆنا پارتی دیموكراتی كوردستان ل جڤاتا نوونەرێن ئیراقێ:
ل دووڤ وێ روونكرنا وەزارەتا سامانێن سروشتی ل حوكمەتا هەرێما كوردستانێ دەربارەی بەیاننامەیا وەزارەتا پەترۆلا فیدرال، هەژمارەكا فراكسیۆنێن جڤاتا نوونەران بەیاننامە بەلاڤكرن كو گەف و هوشداری تێدا بوون.
لەوما بۆ هەموو ئالییان رۆهن دكەین كو وەزارەتا سامانێن سروشتی بەرهەڤییا خوە یا تمام دیار كرییە بۆ پشكداریكرنا تیمێن تەكنیكی یێن پسپۆر د دانوستاندنێن ب لەز دا بۆ چارەسەركرنا خالێن هەلاویستی یێن ناكۆكییا د ناڤبەرا حوكمەتا فیدرال و حوكمەتا هەرێما كوردستانێ دا، ب مەرەما گەهشتن ب چارەسەرییەكا ب لەز كو خزمەتا بەرژەوەندییا بلند یا نشتیمانییا وەلاتی بكەت.
حوكمەتا هەرێما كوردستانێ رێزێ ل دەستووری دگریت و پێگیری دەستووری یە، چاڤەڕێ ژی دكەت بەغدا رێزێ ل مافێن وێ یێن دەستووری بگریت و دەست ژ بنپێكرنا وان بەردەت.
وەك د مادەیێ (112)ێ دەستوورێ ئیراقێ دا هاتی»حوكمەتا فیدرال و حوكمەتێن هەرێمان و پارێزگەهێن بەرهەمهێنەر پێكڤە سیاسەتێن ستراتیژی یێن پێدڤی بۆ پێشئێخستنا سامانێ پەترۆلێ و غازێ ب رەنگەكێ دادڕێژن كو بلندترین مفا بۆ گەلێ ئیراقێ بدەستڤە بهێت، ب بكارئینانا نووترین تەكنەلۆژییا و بنەمایێن بازاڕی و هاندانا وەبەرهێنانێ».
ل ڤێرە ئەم دوپاتیێ ل سەر پەیڤا «پێكڤە» دكەین، چونكی ب رۆهنی ئاماژەیە كو ئەڤ دەسهەلاتە یا تایبەت نینە ب حوكمەتا فیدرال ب تنێ، وەك چەوا هندەك ژ وان فراكسیۆنان وێ چەندێ دبێژن.
لەوما ب لەز داخوازێ ژ حوكمەتا فیدرال دكەین ل شوونا بەلاڤكرنا بەیاننامەیێن گەفهەلگر، كۆمبوونەكا ب لەز بۆ چارەسەركرنا كێشەیێن هەلاویستی ئەنجام بدەت.

سەرۆك بارزانی داخواز ژ حوكمەتا ئیراقێ كر، سنۆرەكی بۆ گرۆپێن ژ دەرڤەی قانوونی دابنیت، دوپاتكر ژی: خوونا شەهیدان ب هەروە ناچیت.
سەرۆك بارزانی و مەسرور بارزانی، سەرۆكێ حوكمەتا هەرێما كوردستانێ، پشكداری د بەهییا شەهید (وەلات تاهر) دا كر كو ل شەڤا شەمبییا بۆری ژ ئەنجامێ هێرشەكا درۆنی ل سەر فڕۆكخانەیا نێڤدەولەتییا هەولێرێ، شەهید بووی.
د داخویانییەكێدا بۆ دەزگەهێن ڕاگەهاندنێ، سەرۆك بارزانی ڕۆناهی ئێخستە سەر ڕەوشا ئالۆز یا دەڤەرێ و هێرشێن ڤێ دوماهیێ ل سەر هەرێما كوردستانێ و ڕاگەهاند» دەڤەر هەموو د ڕەوشەكا ئالۆز دا دەرباز دبیت، مە هەر ژ دەستپێكێ بزاڤكر كوردستان یا دوور بیت ژ شەڕ و نەخوەشییان».
سەرۆك بارزانی دلگرانییا خوە یا توند بەرامبەر هێرشێن ل سەر هەرێما كوردستانێ دهێنە كرن دەربڕی و گوت» مخابن دبینین هندەك گرۆپێن ژ دەرڤەی قانوونێ شەڕی ب مە د فرۆشن».
د پشكەكا دی یا ئاخڤتنێن خوەدا، سەرۆك بارزانی پەیامەك ئاراستەی ناڤەندا بڕیارێ ل ئیراقێ كر و ڕاگەهاند» ئەم داخوازێ ژ حوكمەتا فیدرال و جڤاتا نوونەران و هێزێن سیاسی یێن ئیراقی ل بەغدایێ دكەین، سینۆرەكی بۆ ڤان تاوانباران دابنن».
ل دوماهییا داخۆیانییا خوە، سەرۆك بارزانی پەیامەكا پشتراستیێ دا وەلاتیێن كوردستانێ و دوپاتی ل وێ چەندێ كر كو دێ تاوانبار باجێ دەن و گوت» گەلێ كوردستانێ پشتڕاست دكەین، خوونا شەهید وەلاتی و شەهیدێن دی ب هەروە ناچیت».

نێچیرڤان بارزانی، سەرۆكێ هەرێما كوردستانێ وتونجر باكرهان، هەڤسەرۆكێ پارتا وەكهەڤی و دیموكراسییا گەلان (دەم پارتی) د پەیوەندییەكا تەلەفۆنیدا ڕەوشا دەڤەرێ گەنگەشەكر.
ب گۆرەی بەیاننامەیەكا نڤیسینگەها ڕاگەهاندنا (دەم پارتی)، د وێ پەیوەندییا تەلەفۆنیدا باكرهانی ئەو هێرشێن ل سەر هەرێما كوردستانێ دهێنە كرن پرۆتەستۆ كرن.
هەڤسەرۆكێ دەم پارتی سەرەخوەشییا خوە ئاراستەی كەسوكارێن وی كارمەندێ ئاسایشا فڕۆكخانەیا نێڤدەولەتییا هەولێرێ كو ل ڕۆژا شەمبییا بۆری د هێرشەكا درۆنیدا ل سەر فڕۆكخانەیا نێڤدەولەتییا هەولێرێ گیانێ خوە ژ دەستدا.
هەڤسەرۆكێ دەم پارتی ب سەرۆكێ هەرێما كوردستانێ ڕاگەهاند» ئەم وان هێرشێن ل سەر هەرێما كوردستانێ دهێنە كرن پرۆتەستۆ دكەین».

سەرۆكێ حوكمەتا هەرێما كوردستانێ دوپاتكر كو ب هیچ جۆرەكی قەبوول ناكەن هێرشێن سەر هەرێما كوردستانێ بەردەوام بن، هەروەسا داخواز ژی ژ حوكمەتا ئیراقێ كر، سینۆرەكی بۆ تاوانباران دابنیت.
سەرۆك بارزانی و مەسرور بارزانی، سەرۆكێ حوكمەتا هەرێما كوردستانێ پشكداری د بەهییا شەهید (وەلات تاهر) دا كر كو ل شەڤا شەمبییا بۆری ژ ئەنجامێ هێرشەكا درۆنی ل سەر فڕۆكخانەیا نێڤدەولەتییا هەولێرێ، شەهید بووی.
مەسرور بارزانی، سەرۆكێ حوكمەتا هەرێما كوردستانێ د داخۆیانییەكا ڕۆژنامەڤانیدا سەرخوەشییا خوە ئاراستەی بنەمالا شەهید وەلاتی، سەرۆك بارزانی و گەلێ كوردستانێ كر و گوت» بێگومان ئەڤە ئێكەم شەهیدێ كوردستانێ نینە و دوماهی شەهید ژی نابیت».
مەسرور بارزانی، ب توندی هێرشێن ل سەر هەرێما كوردستانێ دهێنە كرن پرۆتەستۆكرن و ڕاگەهاند» هیچ بهانەیەك بۆ وان هێرشان نینە و تنێ ژ بەر كەرب و كێنەكا مەزنە بەرامبەر كوردستانێ و گەلێ وێ».
گوت ژی» پێدڤییە ئەو شۆڤینییە وێ چەندێ بزانن كو ئەڤ هەلوەستێ دوژمنكارانەیێ نوكە بەرامبەر هەرێما كوردستانێ وەرگرتی، ژ بیرا خەلكێ كوردستانێ ناچیت».
سەرۆكێ حوكمەتا هەرێما كوردستانێ دیاركر ژی» داخواز ژ حوكمەتا ئیراقا فیدرال و جڤاتا نوونەرێن ئیراقێ دكەین هەلوەست هەبیت و سینۆرەكی بۆ ڤان تاوانباران دابنن، چونكە مخابن هەتا نوكە ژی ئەو گرۆپێن ڤان كریاران دكەن، ژ ئالیێ حوكمەتا ئیراقێ ڤە دهێنە پارەداركرن و مووچە و چەك پێ دهێتە دان».
مەسرور بارزانی پتر گوت» داخوازا مە ژی ئەڤ تیرۆرستە ئێدی، هێرشی كوردستانێ نەكەن و ب نەچاری مە نەكەنە د هەلوەستەكی دا كو پێدڤی بیت ئەم هەلوەستەكێ دی وەربگرین».
دوپاتكر ژی» ب هیچ جۆرەكی قەبوول ناكەین ئەڤ هێرشە بەردەوام بن و قەبوول ژی ناكەین خوونا شەهیدێن مە ب هەروە بچیت، دێ هەموو بزاڤان ژی كەین كوردستانێ ژ شەڕی و ئالۆزییان دووربێخین، بەلێ وەكو سەرۆك بارزانی گوت هەر تشتەكی سینۆر هەیە، هیڤیدارین حوكمەتا فیدرال ژی بهێتە سەر هێل و سینۆرەكی بۆ تاوانباران دابنیت و ئێدی پشتەڤانییا وان نەكەت».
سەرۆكێ حوكمەتا هەرێمێ دوپاتكر ژی» هەرێما كوردستانێ هیچ وەختەكی جهێ مەترسیێ نەبوویە ونابیت ل سەر هیچ وەلاتەكێ دەوروبەر و داخوازێ ژ جڤاكا نێڤدەولەتی دكەین هاریكار بیت بۆ پاراستنا هەرێما كوردستانێ».
سەبارەت ڕەوشا كارەبێ ژی ل هەرێما كوردستانێ، سەرۆكێ حوكمەتا هەرێما كوردستانێ ڕۆهنكر كو كێشە ل دەف وان نینە، بەلكو كۆمپانیێن بەرهەمئینانا پەترۆل و غازێ بەرهەمێ خوە كێمكریە و هیڤی خواست، پشتی ب دوماهیهاتنا شەڕی، ڕەوش بزڤڕیتە ئاستێ بەرێ و كێشە ب زووترین وەخت بهێتە چارەسەركرن.

نوری مالكی و فراكسیۆنا پارتی دیموكراتی كوردستان ل جڤاتا نوونەرێن ئیراقێ، دوپاتی ل گرنگییا ئێكگرتنا هەلوەستێن نیشتمانی و ب هێزكرنا هەماهەنگیێ د ناڤبەرا هێزێن سیاسیدا كر.
نوری مالكی، سەرۆكێ هەڤپەیمانییا دەولەتا قانوونێ پێشوازی ل شاندەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ ب سەرۆكایەتییا فەرهاد ئەترووشی، جێگرێ سەرۆكێ جڤاتا نوونەران كر.
د دیدارەكێدا، دوماهی پێشهاتێن ڕەوشا گشتییا وەلاتی و دەرئەنجامێن شەڕێ ل دەڤەرێ دهێتە كرن و كاریگەریێن وی ل سەر ئیراقێ هاتنە گەنگەشەكرن.
هەردو ئالییان دوپاتی ل گرنگییا ئێكگرتنا هەلوەستێن نیشتمانی و ب هێزكرنا هەماهەنگیێ د ناڤبەرا هێزێن سیاسی كر، ب وی ئاراستەی كو ئارامییا سیاسی ب هێز بكەت و تەناهیێ ل وەلاتێ بچەسپینیت، هەروەسا كاركرن ب بۆچۆنەكا هەڤپشك كو بەرژەوەندییا بلند یا نیشتمانی بێخیتە بەراهییا هەموو بەرژەوەندیێن دی.
هەر د وی چارچۆڤەیدا، هەردو ئالییان دوپاتی ل سەر پێدڤییا ب هێزكرنا هاریكاریێ و تێكگەهشتنێ د ناڤبەرا حوكمەتا فیدرال و حوكمەتا هەرێما كوردستانێ دا و چارەسەركرنا كێشەیێن هەلاویستی ل سەر بنەمایێ دەستووری و قانوونێ، ب جۆرەكی كو ببیتە ئەگەرێ ب هێزكرنا هەڤپشكییا نیشتمانی و خزمەتكرنا بەرژەوەندیێن هەموو گەلێن ئیراقێ.
ل دوماهییا دیدارێ، ئاماژە ب گرنگییا ب قایمكرنا ناڤمالا ئیراقی هاتە دان ل بەر ڕۆناهییا ئاستەنگێن هەرێمایەتی و نێڤدەولەتی، ل گەل پشتەڤانیكرنا وان بزاڤێن كو ئارمانج ژی چەسپاندنا ئارامییا سیاسی و ئەمنییە ل هەموو دەڤەرێن وەلاتی.

پەیڤدارێ سەرۆكایەتییا هەرێما كوردستانێ ڕەخنەیێن توند ئاراستەی دەزگەهێن فەرمی ل ئیراقێ و ب تایبەتی جڤاتا نوونەرێن ئیراقێ گرتن و ڕاگەهاند: بێدەنگییا وان بەرانبەر هێرشێن ل سەر هەرێما كوردستانێ دهێنە كرن جهێ حێبەتیێ یە.
دلشاد شەهاب، پەیڤدارێ سەرۆكایەتییا هەرێما كوردستانێ د داخۆیانییەكێدا ڕاگەاهند» دەزگەهێن فەرمی ل ئیراقێ ل پێشبەری پرسیارەكا مەزندانە، هەتا جڤاتا نوونەران ژی ب ڕاستی جهێ دلگرانیێ و حێبەتییەكا مەزنە».
سەبارەت ب دوماهی ڕوونشتنا جڤاتا نوونەرێن ئیراقێ ل ڕۆژا شەمبییا بۆری، دلشاد شەهاب گوت» ل ڕۆژا شەمبیێ ڕوونشتنەكا جڤاتا نوونەران بڕێڤەچوو بۆ هەلسەنگاندنا ڕەوشا ئەمنییا ئیراقێ، بەلێ ب ئێك پەیڤ ژی باسێ هێرشێن ل سەر هەرێما كوردستانێ نەهاتە كرن، ئەڤە ژی ئاماژەیەكا شاشە و پێدڤی دكەت دەزگەهێن فەرمی ب جدی هەلوەستێ كریاری هەبیت و ڕێكێ ل وان دەستدرێژیێن ترسناك بگرن» .
پەیڤدارێ سەرۆكایەتییا هەرێما كوردستانێ دوپاتكر ژی» سەرەرای وێ چەندێ ب توندی وان هێرشان پرۆتەستۆ دكەین، هەڤدەم چاڤەڕێبوون ژ دەستهەلاتدارێن حوكمەتا فیدرالی و ئالیێن سیاسی هەیە، ب تایبەت ئەوێن خوە ب خودانێن بڕیارا ئیراقێ دزانن، هەلوەستێ وان یێ ڕۆهن بیت بەرامبەر وان هێرشێن ل سەر هەرێما كوردستانێ دهێنە كرن».