ئه‌ڤرۆ نيوز:

ھەمی گوندێن سەر ب دەڤەرا نیروە و رێکان و دوسکی ن یا سەر ب ناحیا شێلادزێ ڤە پەکەکێ داگیرکرینە و وەک دەڤەرێن سەربازی دھێنە ھژمارتن ژلایێ چەکدارێن پەکەکێ ڤە. ب ڤێ یەکێ پرانیا خەلکێ قەزا ئامێدیی تووشی زەرەر و زیانەکا مەزن بووینە، ژ بەر کو 27 سالن گوندێن وان ھاتینە داگیرکرن و ھەروەسا ھاتینە سوتن و وێرانکرن و ژ ناڤربر و ھەتا نھا خەلکێ ڤان دەڤەران نەھاتینە قەرەبووکرن.

وارشین سەلمان رێڤەبەرێ ناحیا شێلادزێ بۆ رۆژناما ئەڤرۆ دیار کر، 85 گوندێن دەڤەرا نێروە رێکان و دوسکی ژووری یێن سەر ب ناحیا شێلادزێ ڤە داگیرکرینە ژلایێ چەکدارێن (پەکەکێ) ڤە و بەردەوام ژلایێ فروکە و تۆپخانێن لەشکرێ (تورکیا) ڤە دھێنە توپ بارانکرن و گۆت: ئەڤ یەکە بوویە ئەگەر خەلکێ ناحیا شێلادزێ نەشێن سەرەدانا گۆند و دەڤەرێن خوە بکەن و بوویە ئەگەر بێکاری ژی ل ڤێ دەڤەری سەری ھەلدەت و وەلاتیێن ناحیا شێلادزێ ژ بێکاریێ دا بنالن، چونکو خەلکێ ڤێ دەڤەرێ زور حەزا کارێ چاندن و خوەدانکرنا تەرش کەوالی ھەیە.

زێدەتر دبێژیت: ئەڤ دەڤەرە یا ناڤدارە ب جھێن گەشت و گوزاری و چەندین رووبار و کانی و شیڤ و دولێن پری ئاڤ دناڤ ڤان چیایێن ڤێ دەڤەرێ را دەرباس دبن، سەرێ چەندین سالانە ئەڤ دەڤەرە یا بوویە جھێ مل ملانا چەکدارێن پەکەکێ و سوپایێ تورکیا نە ئارامیەکا مەزن ل ڤێ دەڤەرێ پەیدابوویە و بوویە ئەگەرێ بێکاریێ ل ڤێ دەڤەرێ، ھەبوونا ڤان ئالۆزیێن سیاسی و یێن سەربازی یا بوویە ھۆکار خەلکەکی ئازادیەکا تەمام نەبیت و نەشێن سەرەدانا گوندێن خوە بکەن.

ئاشکرا ژی کر، پرانیا خەلکێ قەزا ئامێدیی تووشی زەرە و زیانەکا مەزن بووینە، ژ بەر کو 27 سالن گوندێن وان ھاتینە داگیرکرن، ھەروەسا ھاتینە سۆتن و وێرانکرن و ژناڤبرن، ھەمی داروبارێ ئاڤی و یێ دێم ژناڤ چووینە و ھەتا نھا نەھاتینە قەرەبووکرن، چەندین جاران فۆرمە ژ بۆ وان وەلاتێن دەڤەرا (نێروە و رێکان و دوسکی ژوری) یا ھاتینە پرکرن و بۆ جھێن پەیوەندیدار ھاتینە رەوانەکرن، بەلی حوکمەتا ھەرێمێ ژی تووشی قەیرانا دارایی بوو و د ڤی دەمی دا دشیان دا نینن ڤی ل قەرەبوو بکەت، دیسان ئەگەر ب ڤی رەنگی سۆتنا دارستانێن ڤان دەڤەران یا بەردەوام بیت ژلایێ فرۆکە و تۆپخانێن لەشکەرێ (تورکیا) ڤە، ل دەمەک نێزیک دێ ئەڤ دارستانە ژناڤچن و نامینن.

رێڤەبەرێ ناحیێ دا خۆیاکرن ژی، پێدڤیە حوکمەت پلانێن ستراتیجی بۆ ژێرخانەکا ئابووری یا بھێز بدانیت، ب تایبەتی ژ بۆ ڤێ دەڤەرێ کارگەە بھێنە دروستکرن، دا کو دەلیڤا کاری بۆ خەلکێ ڤێ دەڤەرێ پەیدا ببیت و گوت: گەلەک دەڤەرێن دی ھەنە حوکمەتا ھەرێما کوردستانێ شیایە گرنگیێ پێ بدەت، لێ ژ بەر کو چەکدارێن پەکەکێ رێژەکا زۆر یا گۆندێن (نێروە و رێکان و دوسکی ژووریان) ل سنورێ ناحیا شێلادزێ داگیرکرینە و ئەڤ دەڤەرێن پری خێر و خێرات و بەرەکەت کرینە دەڤەرێن سەربازی و جھێن بارەگایێن گەریلایێن خوە، لەورا ژلایێ حوکمەتا ھەرێما کوردستانێ ڤە تا نھا چو گرنگی پێ نەھاتیە دان و ب چو رەنگان.

وارشین سەلمان رێڤەبەرێ ناحیا شێلادزێ بۆ ئەڤرۆ دبێژیت ژی: ل سنورێ ناحیا شێلادزێ کو دکەڤیتە سنورێ قەزا (ئامێدیێ) (92) گوند ھەنە، لێ ژ سەرجەمێ وان ھەموو یان(92) گوندان ب تنێ حەفت گوند د ئاڤەدان کرینە، ئەو ھەموو گوندێن ماین کو دبنە (85) گوند ل ژێر دەسھەلاتا پەکەکێ دانە و ئەو ھەموو دەڤەرە بووینە دەڤەرەکا سەربازی و ھەموو رۆژان فرۆکێن شەرکەرێن (تورکیا) ب ھێجەتا ھەبوونا بارەگایێن پەکەکێ وان ھەموو دەڤەران بۆردومان دکەن و ئەو ھەموو گوندە د چۆلکرینە و ب دەڤەرێن سەربازی دھێنە ھژمارتن و ب چو رەنگان نھا دا ژیان ل وان گوندان ناھێتە ب سەر برن.

گۆتژى: خەلکێ ڤان دەڤەران خودان زیانەکا مەزنن و مەزنترین زیان بەر ب خەلکێ دەڤەرێ کەفتی ئەو چەندە بوویە کو ئەو خەلکە وەک دەڤەرێن دی نەشێن ل ھەر وەرزەکێ سالێ قەستا گوندێن خوە بکەن و کەیف و خوەشی د ناڤا ئاڤ و بیستانێن خوە دا ببەن و ژبلی وێ چەندێ ژی کو ژ لایێ جوگرافی ڤە ل سنورێ وان ھەرسێ دەڤەرێن (نێروە رێکان و دوسکی ژووریان) کو ئەو دەڤەرن ئەوێن (پەکەکە) لێ ھەی، پتری (39) ھزار دونەمێن ئەردی ھەنە کو بۆ چاندنێ د گونجای نە و ئەڤ چەندە ھەموو بوویە ئەگەر زیانەکا مەزن بەر ب کەرتێ چاندنێ گەھاندنیە ل سنورێ ناحیا شێلادزێ، چونکە خەلکێ ڤێ دەڤەرێ ھەموو ل سەردەمێن باب و باپیرێن وان حەزا کارێ چاندنێ و خودان کرنا تەرش و کەوالی ھەبوویە و نھاژی خەلکێ ڤێ دەڤەرێ ھەر ھەمان کار دکەن، لێ (پەکەکە) بوویە ئەگەر خەلکێ ڤان دەڤەران ژ چاندن و تەرش و کەوالی بێ بەھر ببن.

خویاژی کر، زێدەباری وێ چەندێ ژی زیانەکا دی یا گەلەک مەزن (پەکەکێ) گەھاندیە ڤێ دەڤەرێ، ئەو ژی ژێک دوورکرن و ژ ناڤبرنا مرۆڤانیا کوردێ باکور و یێ باشور کو د گەلەک گوندێن سەر سنوری کو ل ھەردو ئالیان برا و پسمام و خیشک و برا ھەبوون، ژبەرکو توخیبێ تورک و عیراقێ دناڤ گوندان دا دەربازکر بوو، بۆ نموونە گوندێ زێوە و کنیانش و ھەروەسا بوونە ئەگەر کو خەلکێ باکور و باشور ژ بازرگانیا سەر توخیبی دوورکەڤن و نەشێن دەبارا ژیانا خوە بکەن.

رێڤەبەرێ ناحیا شێلادزێ ئەو چەندە ژی نەڤەشارت: نێزیکی (196) ھزار دونەمێن دارستانێ کو بۆ ب خوەدانکرنا (تەرش و کەوالی و ئاژەلی) ل ڤێ دەڤەرێ یا گونجایە، لێ ھەمان ئەگەر کو ھەبوونا (پەکەکێ ) ل وان دەڤەران بوویە ئەگەر ئەو ھەموو مفایە یێ دوور بیت ژ خەلکێ دەڤەرا (نێروە ورێکان و دوسکی ژووریان) و پشتی سەرھەلدنا پیرۆز ھەتا نھا حکومەتا ھەرێما کوردستانێ ب ھەموو شیانێن خوە ڤە ل ھەمو دەڤەران کارکریە، ژ ھەر لایەکێ ڤە ب تایبەت ژ لایێ ئاڤەدانکرنا گوندان و ب نەخوشبەختانەیە حکومەتا ھەرێمێ ل دەڤەرێن (نێروە و رێکان و دوسکی ژووریان) چو خزمەتگوزاری ئەنجام نەداینە، چونکە ئەو ھەرسێ دەڤەرە ب درێژاھیا چەندین سالانە بوویە دەڤەرەکا (سەربازی) و پەکەکێ ئەو دەڤەرە یا داگیر کری، لەورا حکومەتا ھەرێما کوردستانێ ب چو رەنگان نەشێت کار ل وان دەڤەران بکەت ژ ھەر لایەکێ ڤە.