ئەڤرۆ نیۆز ، زنار تۆڤی:
هەژاری و بێكاریا ئێرانیان ل دژی سیستەمێ ویلایەتا فیقهی ئیناینە سەر جادەیان،هەروەسا ژنان رۆلەکێ كاریگەر هەیە و سەركردایەتیا خۆنیشاندانان دكەن،کو ل شارێن مەشهەد و نیشابور و شاهروود و كاشمیر ل باكۆرێ رۆژهەلاتێ ئیرانێ دەست پێکر کو ل دژی گرانیێ هاتبوو رێکخستن.
خۆنیشاندانێن ئیرانێ کو ل ئەینیا بوری دەست پێکرن و رژێمێ ژی بۆ بەلاڤکرنا خۆنیشاندەران گازا فرمێسكرێژ بكار ئینایە و هژمارەک ژ خۆنیشاندەران هاتینە گرتن.
بەلێ ژنان و ب تایبەتی قوتابیێن زانكۆیان هانا گەنجان ددەن بۆ بەردەوامبوونا وان ل خۆنیشاندان و دروشمێ رووخاندنا ویلایەتا فیقهی و ئایەتولا خامەنەیی بلندکرینە، حوکمەتێ ژی بۆ كۆنترۆلکرنا هەردوو تۆرێن كۆمەلایەتی یێن ئینستگرام و فێسبووک راگرتینە.
ئەڤە دویەمین و مەزنترین خۆنیشاندانە د ماوێ 10 سالێن بوریدا ل ئیرانێ دهێنە کرن، جارا بوری ل 2009 بوو،کو خۆنیشاندەر رژیانە سەر جادان و داخوازا چاكسازیان كر،خۆنیشاندانێن ئیرانێ نێزیكی 40 شاران ڤەگرتینە و ژنێ ژی رۆلەکێ گرنگ و سەركردایەتیێ دیتیە.
ل باژێرێ قوم،کو ب باژێر و ناڤەندا ئاینی ل ئیرانێ یا ناسیارە، ژنان بتنێ بەشداری د خۆپیشاندانان نەکریە، بەلکی داخواز ژ گەنجان دكر کو سار نەبن و بەشدار بن د خۆنیشاندان،جڤاتا نیشتمانی یا بەرگریا ئیرانێ ئاماژە ب هندێ دایە،کو ژنێن زانكۆیا تەهرانێ هانا گەنجان دایە بۆ بەشداریكرنێ ل خۆنیشاندان و بەرفرەهکرنا بازنێ خۆنیشاندان و داخواز ژێکریە کو نەترسن و ب ئێكگرتوویی خۆنیشاندان بگەهیننە ئارمانجێ.
هەڤدەم ل كرمانشان، ژنان سەركردایەتیا خۆنیشاندان كریە و دروشمێ مرن بۆ دكتاتۆران بلند كریە و ل شارێ ئەسفەهان ژی ژن روو ب روو هێزێن ئاسایشێ بووینە.
ژنان داخوازا رووخانا رژێما ویلایەتا فیقهی کریە و دروشمێ راستەوخۆ دژ ب ئایەتولا عەلی خامەنەیی رێبەرێ كۆمارا ئیسلامی یا ئیرانێ و حەسەن رووحانی سەرۆك كۆماری بلند کرینە،ژنێن خۆنیشاندەر وێنێ خامەنەیی دراندیە و داخواز دكەن،کو دەستهەلاتێ بجهبهێلن و ئەو داهاتێ وان دزی بۆ وەلاتی ڤەگەرینن و وان سۆزدایە ب ئێكگرتی ل دژی هێزێن ستەمێ راوەستن.
خۆنیشاندانێن ئیرانێ دەستپێکێ ل باژێرێ مەشهەد دویەم مەزنترین شارێ ئیرانێ یە دەست پێكر،کو دروشمێن وان زێدەتر ل سەر گرانیا بهایی بوو،پاشی بەرفرەهبوو و چەندین دروشم ئێخستنە ناڤ و خۆنیشاندەران و داخوا دكر دەستان ژ سووریێ بەردەن و چارەکێ ل خەلکێ خۆ بكەن.
ل كرمانشان دروشم مەزنتر بوون و وێنێن خامەنەیی و خومەینی هاتنە سووتن، پاشی خۆنیشاندانان نێزیكی 40 شارێن ئیرانێ ڤەگرتن و تا نوکە د بەردەوامن و ژن ل پتریا باژێران رۆلێ سەركردایەتیكرنا خۆنیشاندانان دكەن.
ل باژێرێ قوم زۆربەیا رێبەرێن رژێما ئیرانێ ل وی باژێری خواندنا ئاینی تەمامکریە،لێ ژن سەركردایەتیا خۆنیشاندان دكەن و خۆنشاندەران داخواز ژ عەلی خامەنەیی رێبەرێ ئیرانێ كریە کو وەلاتی بجهبهێلیت.
ئاراستا خۆنیشاندانان دوماهی جار روو ل سەرجەم سیستەمێ سیاسی یێ ئیرانێ كریە،هەکە خەلک ژ لایەكێ ل دژی حوکمەتا حەسەن روحانی بن و ب حوکمەتەکا شكستخواری هژمار بكەن، ئەو هەتا سەر هەستی ل دژی خامەنەیی رێبەرێ كۆمارا ئیسلامییا ئیرانێ نە،کو ئەو ئەگەرێ سەرەکی یێ هەموو وان ستەم و زۆرییانە یێن کو ل ئێرانێ دهێنە کرن.
نيشاندان