بریكارێ پێشتر یێ وه‌زاره‌تا دارایی یا ئیراقێ راگه‌هاند، حوكمه‌تا هه‌رێما كوردستانێ هیچ بیانوویه‌ك بۆ بجهئینانا قانوونا بودجا گشتی یا ئیراقێ بۆ سالا 2021 و هنارتنا پشكا هه‌رێما كوردستانێ بۆ به‌غدا نه‌هێلایه‌، له‌وما هه‌كه‌ حوكمه‌تا ئیراقێ پێگیر نه‌بیت، حوكمه‌تا هه‌رێمێ دشێت ل دادگه‌ها فیدرالی سكالایێ تۆمار بكه‌ت.

د. فازل نه‌بی، بریكارێ پێشتر یێ وه‌زاره‌تا دارایی یا ئیراقێ گۆت” ئه‌وا ل سه‌ر حوكمه‌تا هه‌رێما كوردستانێ پێدڤی و ئه‌ركێ وێ، به‌رهه‌ڤیا خوه‌ یا نیشاندای بجه بینیت ل دۆر پشكا هه‌رێما كوردستانێ د قانوونا بودجا گشتی یا ئیراقێ بۆ سالا 2021، له‌وما حوكمه‌تا هه‌رێمێ شاند هنارتیه‌ به‌غدا و هیچ بیانوویه‌ك بۆ حوكمه‌تا ئیراقێ نه‌هێلایه‌ و به‌غدا یا نه‌چاره‌ پێگیریێ ب قانوونا بودجه‌ی بكه‌ت، چونكه‌ ل جڤاتا نوونه‌رێن ئیراقێ ده‌نگ ل سه‌ر هاتیه‌ دان و بوویه‌ قانوون”.

بریكارێ پێشتر یێ وه‌زاره‌تا دارایی یا ئیراقێ به‌حس ل وێ چه‌ندێ ژی كر، هه‌كه‌ هات و حوكمه‌تا ئیراقێ پێگیری ب قانوونا بودجێ نه‌كر و پشكا هه‌رێما كوردستانێ نه‌ هنارت، كو ب گۆره‌ی قانوونێ پێدڤیه‌ بهێته‌ هنارتن، وی ده‌می حوكمه‌تا هه‌رێما كوردستانێ دشێت ل دادگه‌ها فیدرالی سكالایێ تۆمار بكه‌ت و ئه‌و سكالایه‌ ژی دێ د به‌رژه‌وه‌ندیا هه‌رێما كوردستانێ دا ئێكلا بیت، چونكه‌ حوكمه‌تا هه‌رێمێ ب باشی ره‌فتار كریه‌ كو هیچ بیانوویه‌ك بۆ حوكمه‌تا ئیراقێ نه‌هێلاینه‌”.

دیاركر ژی” نوكه‌ لژنه‌كا هه‌ڤپشك یا چاڤدێریا دارایی ژ هه‌رێما كوردستانێ و ئیراقێ هووربینیێ د داهاتان دا دكه‌ن و د به‌رده‌وامن ل سه‌ر كارێن خوه‌، هه‌كه‌ نیازێن به‌غدا ژی د باش بن، د ده‌مه‌كێ كێم دا ئه‌و كاره‌ ژی دێ ب دووماهی هێت”.

شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری راگه‌هاند، حوكمه‌تا هه‌رێما كوردستانێ ل گه‌ل حوكمه‌تا ئیراقێ ل دۆر ده‌ڤه‌رێن سنووری ل سه‌ر هێلێ یه‌ و حوكمه‌تا ئیراقێ بریار دایه‌ هێزێن پاسه‌وانێن سنووری زێده‌ بكه‌ت و چه‌ك و پێدڤیێن زێده‌تر بۆ دابین بكه‌ت، بۆ وێ چه‌ندێ بشێن ده‌ڤه‌رێن سنووری كونترۆل بكه‌ن.

بابه‌كر زێباری، شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری، گۆت” چاره‌كرنا كێشان ل گه‌ل pkk گه‌له‌ك یا ب زه‌حمه‌ته‌، چونكه‌ خوه‌ د سه‌پینیت و دكه‌ته‌ خودانا هه‌موو جهه‌كی، له‌وما ب ڤی جۆرێ هزركرنێ گه‌له‌ك یا ب زه‌حمه‌ته‌ دانوستاندن ل گه‌ل بهێنه‌ كرن بۆ چاره‌كرنا كێشان، چونكه‌ نه‌كو تنێ ده‌ڤه‌ران داگیر دكه‌ن، به‌لكو رێ ناده‌ن خه‌لكێ هه‌رێما كوردستانێ بچیته‌ سه‌ر ده‌ڤه‌رێن خوه‌ ژی”.

بابه‌كر زێباری زێده‌تر گۆت” دو لیوایێن پاسه‌وانێن سنووری یێن هه‌ین، ئه‌و ب سه‌ر ئیراقێ ڤه‌نه‌، به‌لێ هژمارا وان یا كێمه‌، له‌وما حوكمه‌تا هه‌رێمێ ل گه‌ل به‌غدا ل سه‌ر هێلێ یه‌ و حوكمه‌تا ئیراقێ سۆزت زێده‌كرنا هێزێن پاسه‌وانێن سنووری دایه‌، كو پێدڤیێن له‌شكری و چه‌ك ژی بۆ وان هێزان زێده‌تر بهێنه‌ دابینكرن، بۆ وێ چه‌ندێ بشێن رۆلێ خوه‌ ببینن د پرسا پاسه‌وانیا سنووران دا، چونكه‌ ئه‌و هێزێن هه‌ین، د كێمن و پێدڤی ب هێزێن زێده‌تره‌”.

زێباری به‌حس ل وێ چه‌ندێ ژی كر، pkk كۆمه‌كا ئه‌جیندایێن ده‌ره‌كی بجه دئینیت و چه‌كێ كرێ گرتی نه‌، له‌وما ئه‌و هه‌ر دێ مینن و هه‌كه‌ ب شه‌ری نه‌بیت، كو ئه‌وژی د به‌رژه‌وه‌ندیا هیچ كه‌سه‌كی دا نینه‌، به‌لێ مخابن زمانێ دانوستاندنێ نزانن”.

خویاكر ژی” pkk ل ڤێرێ نه‌شێت چ بكه‌ت، ئه‌ڤجا چاوان ل باكوورێ كوردستانێ، له‌وما ئه‌و بۆ خه‌باتێ نه‌هاتینه‌ و تنیچ بۆ تێكدانا ره‌وشا هه‌رێما كوردستانێ یێن هاتین”.

ناڤه‌ندا چاڤدێریا مافێن مرۆڤی كو بنگه‌ها وێ ل له‌نده‌نێ یه‌ دوهی راگه‌هاند كو هێزێن سه‌ر ب ئیرانێ ل سووریێ ب تایبه‌تی ژی گرۆپێ چه‌كدارێن ئه‌فغانی كو چه‌ند سالن ل سووریێ شه‌ری دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی بۆ هێزێن سووریا دیموكرات مه‌ترسیه‌كا مه‌زنه‌.

ناڤه‌ندا چاڤدێریا مافێن مرۆڤی یا سووریێ‌ دوهی راگه‌هاند كو چه‌ند رۆژن هێزێن سه‌ر ب ئیرانێ ب تایبه‌تی ژی گرۆپێ فاتمیون كو هه‌موو چه‌كدارێن وێ خه‌لكێ ئه‌فغانستانێ نه‌ و چه‌ند سالن ل سووریێ شه‌رێ داعشێ دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی دشێت ببیته‌ مه‌ترسیه‌كا مه‌زن بۆ هێزێن سووریا دیموكرات، چونكو ده‌مه‌كه‌ رژێما سووریێ دڤێت ئاخا ل ژێر ده‌ستهه‌لاتا هێزێن سووریا دیموكرات ژێ وه‌ربگریت و دیاره‌ نها دڤێت ب پشته‌ڤانیا هێزێن سه‌ر ب ئیرانێ ده‌ست ب پیلانه‌كا نوو بكه‌ت.

هه‌مان ناڤه‌ندێ ئه‌و یه‌ك ژی دیار كریه‌ كو ل نێزیكی دێرازۆرێ و چه‌ندین ده‌ڤه‌رێن دی یێن ستراتیژی گرۆپێ فاتمیون چه‌كێن گران بجه كرینه‌ و ئه‌و یه‌ك ژی ب رازیبوونا له‌شكرێ سووریێ هاتیه‌ كرن، لێ هه‌تا نها دیار نینه‌ كا ئارمانجا سه‌ره‌كی یا وێ هێزێ ئه‌وه‌ كو شه‌رێ هێزێن سووریا دیموكرات بكه‌ن یان ژی ژ به‌ر داعشێ ل وان ده‌ڤه‌ران بجه بووینه‌ لێ هه‌ر چاوا بیت بجهبوونا وێ هێزێ كو سه‌ر ب ئیرانێ یه‌ د ره‌وشا نها دا د به‌رژه‌وه‌ندیا هێزێن سووریا دیموكرات دا نینه‌.

ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه‌ كو چه‌ندین بنگه‌هێن سه‌ربازی یێن ئه‌مریكا ژی ل وێ ده‌ڤه‌رێ هه‌نه‌ و هه‌روه‌سا ئه‌مریكا ژی گه‌له‌ك چه‌كێن گران ل وێ ده‌ڤه‌رێ و ده‌ڤه‌رێن دی یێن ستراتیژی بجه كرینه‌، ژ به‌ر هندێ ژی هه‌كه‌ ئه‌مریكا ئاسته‌نگیان ل هه‌مبه‌ر بزاڤێن نوو یێن هێزێن سه‌ر ب ئیرانێ دروست نه‌كه‌ت له‌شكرێ فاتمیون و هێزێن دی یێن سه‌ر ب ئیرانێ دشێن ئاریشێن نوو بۆ ئه‌مریكا و هه‌ڤپه‌یمانێن وێ ل سووریێ دروست بكه‌ن، ژ به‌ر هندێ ژی دڤێت چاڤه‌رێ بین دا بزانین كا دێ د پاشه‌رۆژێ دا هه‌لویستێ ئه‌مریكا چ بیت.

ئه‌و یه‌ك د ده‌مه‌كێ دایه‌ كو حه‌فتیا بۆری شانده‌ك بلند ژ به‌رپرسێن وه‌زاره‌تا ده‌رڤه‌ و به‌ره‌ڤانیێ یا ئه‌مریكا سه‌ره‌دانا رۆژئاڤایێ كوردستانێ كرن و ل گه‌ل به‌رپرسێن رێڤه‌به‌ریا خوه‌سه‌ر یا رۆژئاڤایێ كوردستانێ و هێزێن سووریا دیموكرات كۆمبوون و د كۆمبوونێ دا شاندێ ئه‌مریكی بۆ ره‌نگه‌كێ ئاشكرا بۆ هێزێن سووریا دیموكرات دیار كر كو ئه‌و رێ ناده‌ن توركیا و هێزێن رژێما سووریێ هێرشی ده‌ڤه‌رێن ل ژێر كۆنترۆلا وان بكه‌ن و هه‌روه‌سا ژ به‌ر شه‌رێ ل دژی داعشێ ژی ئه‌مریكا دێ به‌رده‌وام هاریكاریا هێزێن سووریا دیموكرات كه‌ت.

چاڤدێرێن سیاسی ژی دیار دكه‌ن كو مه‌ترسیا ئیرانێ ل سووریێ و عیراقێ ل سه‌ر به‌رژه‌وه‌ندیێن ئه‌مریكا رۆژ ب رۆژێ زێده‌تر لێ دهێت و هه‌كه‌ ئه‌مریكا ل عیراقێ و سووریێ ده‌ست ب هنده‌ك پێرابوونێن نوو ل دژی ئیرانێ و هێزێن سه‌ر ب وێ ڤه‌ نه‌كه‌ت دێ مه‌ترسیا ئیرانێ و هێزێن سه‌ر ب وێ ل سه‌ر ئه‌مریكا زێده‌تر لێ هێت و ژ به‌ر هندێ ژی دڤێت ئه‌مریكا رێ نه‌ده‌ت كو له‌شكرێ فاتمیون و هێزێن دی یێن سه‌ر ب ئیرانێ ل سووریێ ببنه‌ مه‌ترسی بۆ هه‌ڤپه‌یمانێن وێ.

ئه‌ڤرۆ ، زنار تۆڤی:

بسپۆره‌كێ زانستێن سیاسی ل زانكۆیا سه‌لاحه‌دین ل هه‌ولێرێ‌، بۆ رۆژناما راگه‌هاند، ل سالێن نۆتان ل سه‌دێ‌ بۆری له‌شكرێ توركی چه‌ندین ئۆپه‌راسیۆن ل دژی pkk  ل سه‌ر ئاخا هه‌رێما كوردستانێ‌ ئه‌نجامداینه‌ و ل سالا 1995 توركیا ئۆپه‌راسیۆنه‌كا مه‌زن ب ناڤێ‌ ” پیلا “، ل دژی په‌كه‌كێ‌ ئه‌نجامدا و ل وی ده‌می نێزیكی 35 هزار سه‌ربازێن توركی ئه‌و ئۆپه‌راسیۆنه‌ ئه‌نجامدا و نێزیكی 35 كیلۆمه‌تران هاتنه‌ د ناڤا ئاخا هه‌رێمێ‌ دا، د دووڤدا چه‌ندین ئۆپه‌راسیۆنێن دیتر ئه‌نجامداینه‌، نوكه‌ ژی ئۆپه‌راسیۆنێن توركی ل سه‌ر گوند و ده‌ڤه‌رێن هه‌رێما كوردستانێ‌ د به‌رده‌وامن و چه‌ندین گوند ژی ژ ئه‌نجامێ‌ ئۆپه‌راسنیۆنێن توركی هاتینه‌ چۆلكرن.

د نه‌وزاد هێتوتی، بسپۆرێ زانستێن سیاسی و مامۆستا ل زانكۆیا سه‌لاحه‌دین بۆ رۆژناما (ئه‌ڤرۆ) گۆت” ژ سالا 2015 وێڤه‌ سیاسه‌تا توركیا ل هه‌مبه‌ری هه‌رێما كوردستانێ‌ گوهۆرین ب سه‌ر دا هاتن، ڤێ‌ چه‌ندێ‌ هژماره‌كا فاكته‌رێن ناڤخوه‌یی هه‌نه‌، كو توركیا دڤێت ئۆپه‌راسیۆنان دناڤا ئاخا هه‌رێمێ‌ دا ئه‌نجام بده‌ت و ئارمانج ژ وان ئۆپه‌راسیۆنان ئه‌وه‌، ل سالا 2023 دێ‌ هه‌لبژارتن ل توركیا هێنه‌ ئه‌نجامدان، ل سه‌ر ئاستێ‌ ناڤخوه‌یی ده‌ستهه‌لاتا akp لاواز بوویه‌ و دڤێت ب  ڤێ‌ چه‌ندێ‌ پشته‌ڤانیا خه‌لكێ‌ بۆ خوه‌ ب ده‌ستڤه‌ بینیت، دیسان بریارا ناساندنا جینۆسایدا ئه‌رمه‌نان ژ لایێ‌ ئه‌مریكا ڤه‌ شكه‌ستنه‌كا مه‌زن بوو بۆ حوكمه‌تا akp ، دیسان ئابوورێ‌ توركیا ژی گه‌له‌ك لاواز بوویه‌ و بۆ ڤه‌شارتنا ڤان شكه‌ستنێن خوه‌، ئه‌ردۆگانی دڤێت ڤان ئۆپه‌راسیۆنان ل هه‌رێما كوردستانێ‌ و رۆژئاڤایێ‌ كوردستانێ‌ ئه‌نجام بده‌ت، دیسان هه‌تا راده‌كێ‌ مه‌زن ژی pkk به‌هانه‌ دایه‌ توركیا كو ئۆپه‌راسیۆنان ل دژی وان دناڤا ئاخا هه‌رێمێ‌ دا ئه‌نجام بده‌ت، هه‌ر چه‌نده‌ pkk ئه‌و شیان و هێز نه‌ماینه‌ هێرشێ‌ بكه‌ته‌ سه‌ر له‌شكرێ توركی، دیسان توركیا دشێت سه‌دێ‌ سه‌د سنۆرێن خوه‌ بپارێزیت و پێدڤی ب ڤان ئۆپه‌راسیۆنان نه‌بیت، لێ‌ ژ بلی pkk توركیا هنده‌ك ئارمانجێن دیتر هه‌نه‌.

نه‌وزادی زێده‌تر گۆت” توركیا دڤێت ده‌ڤه‌ره‌كا دابرایی ژ هه‌رێما كوردستانێ‌ دروست بكه‌ت، وه‌كو ئه‌وا ل رۆژئاڤایێ‌ كوردستانێ‌ دروست كری، توركیا نوكه‌ ل ده‌ڤه‌رێن چیایی رێیان دگریت و لبه‌ره‌ ده‌ڤه‌ره‌كا ژێك دابرایی ل سنۆرێ‌ خوه‌ هه‌تا دچیته‌ قه‌ندیلی، دیسان ل گه‌ل رۆژئاڤایێ‌ كوردستانێ‌ ژی دروست بكه‌ت، وان ده‌ڤه‌ران هه‌موویان كونترۆل بكه‌ت، ئه‌ڤه‌ ئێك ژ ئارمانجێن توركیا یه‌، ئه‌و ده‌ڤه‌ره‌ د گرنگ و ستراتیژی نه‌ بۆ توركیا، هه‌ر چه‌نده‌ هه‌تا نوكه‌ توركیا نێزیكی 40 پێگه‌هێن له‌شكری دناڤا ئاخا هه‌رێما كوردستانێ‌ دا هه‌نه‌، توركیا دشێت ب ساناهی ب رێیا وان بنگه‌هێن له‌شكری فشاران ل سه‌ر ئیراقێ‌ و هه‌رێمێ‌ دروست بكه‌ت، دیسان توركیا دڤێت لسه‌ر ئاستێ‌ ڤێ‌ ده‌ڤه‌رێ‌ ژی خودان هێزه‌كا مه‌زن بیت، نوكه‌ ئیران و توركیا هه‌ردو یێ‌ هه‌ڤركیێ‌ ل سه‌ر ئیراقێ‌ دكه‌ن، توركیا ل هه‌مبه‌ری هه‌ژموونا ئیرانێ‌ ل ئیراقێ‌ بێده‌نگ نابیت، دیسان توركیا وێ‌ هزرێ‌ دكه‌ت، هه‌كه‌ هات و ئیراق دابه‌ش ببیت، یان ئه‌مریكا هێزێن خوه‌ ژ وی وه‌لاتی ڤه‌كێشیت و ره‌وشا ئیراقێ‌ گه‌له‌ك ئالۆز ببیت، ئیران كونترۆلێ‌ ل سه‌ر پشكه‌كا ئیراقێ‌ بكه‌ت، ل وی ده‌می دێ‌ توركیا ژی كونترۆلێ‌ هه‌تا باژێرێ‌ مووسلێ‌ كه‌ت، ل سه‌ر ئاستێ‌ ڤێ‌ ده‌ڤه‌رێ‌ ئه‌ڤ چه‌نده‌ یا هه‌ی، نوكه‌ بنگه‌هه‌كێ له‌شكری یێن توركی ل به‌عشیقه‌ یێ هه‌ی، هه‌ر چه‌نده‌ ڤێ‌ ئێكێ دوور دبینم، چونكی هه‌رێما كوردستانێ‌ قه‌وارێ‌ خوه‌ یێ هه‌ی، دیسان د وارێ‌ ئابووری و بازرگانی و ڤه‌دیتنا مه‌عده‌نی و برینا داران دا، توركیا ڤیایه‌ ئۆپه‌راسیۆنان ل سه‌ر ئاخا هه‌رێمێ‌ ئه‌نجام بده‌ت و ئه‌ڤه‌ ژی ئێكه‌ ژ ئارمانجێن وێ‌”

ناڤهاتی ئه‌و چه‌ند ژی خویاكر” توركیا دخوازیت په‌یوه‌ندیێن هه‌رێمێ‌ ل گه‌ل كوردێن رۆژئاڤا تێكبچن، هه‌موو بزاڤان دكه‌ت، چو رێككه‌فتن د ناڤبه‌را كوردێن رۆژئاڤا دا نه‌هێنه‌ كرن، دیسان توركیا دێ‌ هه‌موو بزاڤان كه‌ت، رێیا قه‌ندیلی ژی بگریت، پاشی بهێته‌ شنگالێ‌ و دیسان ده‌روازێ‌ ئۆڤاكوی ل گه‌ل ئیراقێ‌ ڤه‌كه‌ت و ب ڤێ‌ چه‌ندێ‌ توركیا دڤێت ئابوورێ‌ هه‌رێمێ‌ لاواز بكه‌ت و ئه‌ڤ چه‌نده‌ مه‌ترسیه‌كا مه‌زنه‌ ل سه‌ر هه‌رێما كوردستانێ‌، هه‌روه‌سا توركیا دڤێت هه‌موو ده‌ڤه‌رێن چیایی یێن بلند كونترۆل بكه‌ت و بنگه‌هێن له‌شكری لێ‌ دانیت و كوردێن هه‌رێمێ هه‌موو قه‌ستا ده‌شتێ‌ و باژێران بكه‌ن و ب ڤی ره‌نگی كورد دێ‌ مه‌زنترین دۆستێن خوه‌ ژ ده‌ست ده‌ن، ئه‌و ژی چیانه‌، تورك دێ‌ شێن ب ساناهی فشاران ل سه‌ر هه‌رێما كوردستانێ‌ دروست كه‌ن، دیسان د نوكه‌ دا دڤێت pkk خوه‌ ژ هنده‌ك ده‌ڤه‌ران ڤه‌كێشیت، ب تایبه‌تی وان ده‌ڤه‌رێن توركیا ئۆپه‌راسیۆنان لێ‌ ئه‌نجام دده‌ت،  هه‌كه‌ پێشمه‌رگه‌ بچنه‌ وان ده‌ڤه‌ران، توركیا نه‌شێت ئۆپه‌راسیۆنان ل هه‌موو ده‌ڤه‌ران ئه‌نجام بده‌ت، دیسان نابیت ب چ ره‌نگان گوند بهێنه‌ چۆلكرن، هه‌ر چه‌نده‌ هه‌كه‌ ئه‌و ئۆپه‌راسیۆنێن توركی چه‌ند ب هێز ژی بن، دڤێت خه‌لك گوندێن خوه‌ چۆل نه‌كه‌ن، هه‌كه‌ گه‌له‌ك مه‌ترسی كه‌فته‌ سه‌ر ژیانا خه‌لكی، بلا ژن و زارۆیان ژ گوندان ده‌ربێخن و ب تنێ‌ زه‌لام بمینن تێدا، چونكی هه‌كه‌ گوند هاتنه‌ چۆلكرن، ئێدی ئه‌و گوند و ده‌ڤه‌ر دێ‌ كه‌ڤنه‌ ژێر ده‌ستێ‌  توركان و ژێ‌ ده‌رناكه‌ڤن”.

د. نه‌وزاد هێشتا دبێژیت ژی” دڤێت هه‌رێم فشاران ل سه‌ر به‌غدا دروست بكه‌ت، چونكی به‌غدا سه‌روه‌ریا خوه‌ هه‌یه‌ و دشێت مایێ‌ خوه‌ دڤی بابه‌تی بكه‌ت و نه‌هێلیت تورك ئۆپه‌راسیۆنێن له‌شكری ل سه‌ر ئاخا هه‌رێمێ‌ ئه‌نجام بده‌ن، هه‌روه‌سا دڤێت هه‌رێم سه‌ره‌ده‌ریه‌كا نه‌رم ل گه‌ل ڤی بابه‌تی بكه‌ت، چونكی دروستبوونا هه‌ر شه‌ره‌كی دێ‌ مه‌ترسیان ل سه‌ر هه‌رێمێ‌ په‌یدا كه‌ت، ب تایبه‌تی ژی د ڤێ‌ قووناغێ‌ دا، هه‌ر چه‌نده‌ pkk گه‌له‌ك به‌هانه‌ داینه‌ ده‌ستێ‌ توركیا، كو ئه‌ڤان ئۆپه‌راسیۆنان دناڤا ئاخا هه‌رێما كوردستانێ‌ دا ئه‌نجام بده‌ت، لێ‌ ڤێ‌ جارێ‌ هه‌ر ده‌ڤه‌را توركیا گرت، ئێدی ژێ‌ ناڤه‌كێشیت”.

ئه‌ڤرۆ، عه‌زیز هه‌ورامی

ئه‌ندامه‌كێ په‌رله‌مانێ كوردستانێ راگه‌هاند، هه‌بوونا دستووری بۆ ب رێڤه‌برنێ و حوكمرانیا وه‌لاتی یێ پێدڤیه‌ وه‌كو بلندترین به‌لگه‌ناما قانوونی و دستوور ل سه‌ر هه‌موو قانوونایه‌ و دبیته‌ چه‌تره‌ك بۆ چاره‌سه‌ركرنا هه‌موو كێشان، وه‌لاتێن جیهانێ خودانێن دستوورێ خوه‌نه‌ و هه‌رێما كوردستانێ ژی مافێ وێ چه‌ندێ یێ هه‌ی كو خودانا دستوورێ خوه‌ بیت.

وه‌یسی سه‌عید وه‌یسی، ئه‌ندامێ په‌رله‌مانێ كوردستانێ ژ فراكسیۆنا پارتی دیموكراتی كوردستان بۆ رۆژناما (ئه‌ڤرۆ) گۆت” پێدڤی بوو هه‌رێما كوردستانێ ژمێژه‌ خودانا دستوورێ خوه‌ با، ژ به‌ر كو دستوورێ به‌رده‌وام یێ ئیراقێ ماف دایه‌ هه‌رێما كوردستانێ دستوورێ خوه‌ هه‌بیت، د ده‌مێن بۆری دا گه‌له‌ك بزاڤ بۆ نڤیسینا دستوورێ هه‌رێما كوردستانێ هاتینه‌ كرن، ل خۆلا چارێ یا په‌رله‌مانێ كوردستانێ دانوستاندن ل سه‌ر 70 مادێن دستووری هاتینه‌ كرن و هاتینه‌ نڤیسین ژلایێ لژنه‌كا تایبه‌ت ڤه‌، به‌لێ ململانێیا سیاسی و نه‌بوونا كۆده‌نگیێ  كارێن تمامكرنا دستووری راوه‌ستاندن”.

وی په‌رله‌مانتاری ئاماژه‌ كر ژی كو ل سه‌ر ئاستێ سه‌رۆكایه‌تیا هه‌رێمێ و په‌رله‌مانی، بزاڤ هاتینه‌ كرن بۆ نڤیسینا دستووری، تاكو ب رێیا وی دستووری هه‌موو ئه‌و كێشێن هه‌ین یان دروست دبن بهێنه‌ چاره‌سه‌ركرن، لایه‌نێن سیاسی ژی ل سه‌ر وێ ئێكێ د هه‌ڤرانه‌ كو پێدڤیه‌ هه‌رێما كوردستانێ ببیته‌ خودانا دستوورێ خوه‌، ژ به‌ر كو ژ ئه‌گه‌رێ نه‌بوونا دستووری ڤالاتیه‌كا قانوونی یا مه‌زن یا هه‌ی و پێشڤه‌برن و په‌ره‌سه‌ندنا دیموكراسیه‌تێ بێ دستووری یا ئه‌سته‌مه‌”.

ناڤبری دیاركر ژی” د هه‌وا حزبان دا بۆ خۆلا پێنجێ یا په‌رله‌مانێ كوردستانێ، سۆز دابوونه‌ خه‌لكێ هه‌رێما كوردستانێ كو نڤیسینا دستووره‌كێ هه‌ڤچه‌رخ دێ ئێك ژ كارێن سه‌ره‌كی یێن وان بیت، له‌وما پێدڤیه‌ كۆده‌نگیه‌كا نیشتمانی هه‌بیت بۆ نڤیسینا دستووری، ره‌هندێن نیشتمانی ژی یێن هه‌ین كو دستوور بۆ هه‌موو خه‌لكێ هه‌رێما كوردستانێ یه‌ بێ جوداهیا ئایینی و نه‌ته‌وی”.

پتر رۆهنكر” ده‌لیڤه‌ یا هه‌ی و بزاڤ ژی د كارانه‌ كو د ڤێ خۆلا په‌رله‌مانی دا هه‌رێما كوردستانێ ببیته‌ خودان دستوور و ئه‌و دستوور ببیته‌ بنه‌مایه‌ك كو هه‌موو ره‌نگێن جودا و ئایین و نه‌ته‌وێن جودا ب خوه‌ڤه‌ بگریت و حه‌ز و خواستێن كوردستانیان بجهبینیت و رێزێ ل هه‌موو ئایین و نه‌ته‌وان بگریت و نابیت ژی رێ بهێته‌ دان بۆ دروستكرنا ناكۆكیێن سیاسی ل به‌رده‌م دستووری”.

ل دووماهیێ گۆتژی” هه‌بوونا دستووری گره‌نتیا بۆ پاراستنا قه‌وارێ هه‌ریچما كوردستانێ و ل سه‌ر ئاستێ نێڤده‌وله‌تی ژی پێگه‌هێ هه‌رێما كوردستانێ ب هێز دكه‌ت”.

ب، سه‌رجان مه‌حمود:

پارتا كۆماریا گه‌ل (جه‌هه‌پێ) راگه‌هاند كو ئه‌و وه‌سا دبینن پرسا كوردی ب شه‌ری و توندوتیژیێ و ب رێیێن سه‌ربازی چاره‌سه‌ر‌ نابیت و بۆ ڤێ چه‌ندێ خوه‌ ئاماده‌ دكه‌ن ب ره‌نگه‌كێ به‌رفره‌ه پرسا كوردی گه‌نگه‌شه‌ بكه‌ن و ل ژێر سیبه‌را په‌رله‌مانی و ب رێیێن سیاسی و ئاشتیانه‌ چاره‌سه‌ر بكه‌ن.

شانده‌كێ په‌رله‌مانتارێن توركیا یێن سه‌ر ب پارتا كۆماریا گه‌ل، ب سه‌رۆكاتیا وه‌لی ئاخبابا سه‌ره‌دانا باژێرێن باكورێ كوردستانێ كرن و ل گه‌ل وه‌لاتیان، كاسبكار، ته‌خ و چینێن جڤاكێ كوردی كۆمبوونێن جودا جودا ساز كرن و هه‌ری دووماهیێ ژی ل باژێرێ ئامه‌دێ بۆ ئاشكراكرنا ئه‌نجامێن كۆمبوونێن خوه‌ كۆنگره‌كا رۆژنامه‌ڤانی ساز كرن و تێدا وه‌لی ئاخبابا جێگرێ سه‌رۆكێ گشتی یێ پارتا كۆماریا گه‌ل راگه‌هاند كو د سه‌ره‌دانێن ل باژێرێن سێرت، چه‌ولیك، موش، به‌دلیس و ئامه‌دێ ده‌لیڤه‌كا باش دیتنه‌ كو ل گه‌ل وه‌لاتیان و ته‌خ و چینێن جڤاكی پرسێن هه‌ی گه‌نگه‌شه‌ بكه‌ن و گۆت: (خه‌لكێ ده‌ڤه‌رێ ب گشتی ژ ره‌وشا شه‌ری بێزار بووینه‌ و ئابووریا پرانیا خه‌لكێ گه‌له‌ك خراب بوویه‌ و رێژا بێكاریێ ژی گه‌له‌ك زێده‌ بوویه‌  ‌ و بۆ ڤێ چه‌ندێ پێدڤی ب چاره‌سه‌ریێن بله‌ز هه‌یه‌ و ئه‌م دخوازین هه‌موو پرسێن هه‌ی ب سیاسه‌ته‌كا زه‌لال و ب رێیا ئاشتیێ چاره‌سه‌ر‌ بكه‌ین).

هه‌روه‌سا سه‌زگین تانری كولو ئه‌ندامێ په‌رله‌مانێ توركیا ژی راگه‌هاند كو پرسا هه‌ری گرنگ یا توركیا پرسا كوردی یه‌‌ و دڤێت ئه‌ڤ پرسه‌ ب دیالۆگێ و ئاشتیێ بهێته‌ چاره‌سه‌ر كرن و گۆت: (ل توركیا ئه‌و یه‌ك هاتیه‌ سه‌لماندن‌ كو چ ده‌ستهه‌لاته‌ك ئانكۆ پارته‌كا سیاسی خوه‌ ژ چاره‌سه‌ر ‌كرنا پرسا كوردی دوور كربیت یان نه‌شیابیت‌ پرسا كوردی چاره‌سه‌ر‌ بكه‌ت ژناڤ چوویه‌ و ئه‌ڤرۆ ئه‌م به‌رێ خوه‌ بده‌ینێ ئاكپارتی ژی رۆژ ب رۆژێ به‌ر ب نه‌مانێ ڤه‌ دچیت، سه‌ده‌مێ وێ یا سه‌ره‌كی ژی پرسا كوردیه‌ و ده‌ستهه‌لاتا ئاكپارتیێ به‌رده‌وام خوا‌ست ب رێیێن سه‌ربازی و توندوتیژیێ نێزیكی پرسا كوردی ببیت و ژ به‌ر ڤێ یه‌كێ پارچه‌بوون و لاوازبوونا وان ده‌ستپێ كریه‌).

سه‌زگین تانری كولو هه‌روه‌سا راگه‌هاند ژی كو پارتا كۆماریا گه‌ل دخوازیت پرسا كوردی ب رێیێن سیاسی و ئاشتیێ و ب سیاسه‌ته‌كا زه‌لال چاره‌سه‌ر‌ بكه‌ت و گۆت: (مه‌ وه‌ك جه‌هه‌په‌ ب هزره‌كا سه‌رده‌م و ب سیاسه‌ته‌كا ب هێز به‌رێ خوه‌ دایه‌ چاره‌سه‌ر‌كرنا پرسا كوردی و ئه‌و هێز و شیان ل گه‌ل جه‌هه‌پێ دروست بوویه‌ و خه‌لكێ مه‌ ژی چاڤه‌رێی ئاشتیێ و چاره‌سه‌ریا پرسا كوردی یه‌، دڤێت ئێدی ئه‌م گه‌لێ كورد و گه‌لێن هه‌رێمێ ژ ده‌ست نه‌ده‌ین و مه‌ بۆ بجهكرنا ئاشتیه‌كا جڤاكی ئیرادا خوه‌ ده‌رخستیه‌ هۆلێ و دێ ب هه‌موو ره‌نگه‌كێ بۆ چاره‌سه‌ركرنا پرسا كوردی كار كه‌ین).

ل دۆر هه‌لویستێ پارتا كۆماریا گه‌ل هژماره‌ك ژ نڤیسه‌ر، رۆژنامه‌ڤان و چاڤدێرێن سیاسی یێن كورد ل باكورێ كوردستانێ دیار كرن كو د بنه‌مایێ خوه‌ دا پارتا كۆماری چو به‌رنامه‌ بۆ چاره‌سه‌ركرنا پرسا كوردی نینن، نها ئاكپارتیێ ل باكورێ كوردستانێ پێگه‌هێ خوه‌ یێ جه‌ماوه‌ری ژ ده‌ست دایه‌ و پارتا كۆماری ژی دڤێت جهێ ئاكپارتیێ بگریت و ده‌نگێ كوردان بۆ خوه‌ كۆم بكه‌ت، چونكو پارتا كۆماری هه‌تا نها ژی ل دژی هندێ یه‌ كو ل توركیا زمانێ كوردی ببیته‌ زمانێ فه‌رمی یێ په‌روه‌ردێ، پارته‌ك كو ل دژی زمانێ كوردی بیت بێگومان نه‌شێت پرسا كوردی ژی چاره‌سه‌ر بكه‌ت و هه‌موو بزاڤێن نها یێن جه‌هه‌پێ بۆ بده‌ستڤه‌ئینانا ده‌نگێن كوردانه‌.

لژنه‌كا هه‌ڤپشك یا په‌رله‌مانێ كوردستانێ و جڤاتا نوونه‌رێن عیراقێ سه‌ره‌دانا پارێزگه‌ها دهۆكێ كر و د كونفرانسه‌كێ رۆژنامه‌ڤانی دا ئه‌ندامه‌كێ لژنا ئاسایش و به‌رگریێ ل جڤاتا نوونه‌رێن عیراقێ راگه‌هاند، پێدڤیه‌ ئه‌ڤ هێرشێن PKK دژی خالێن پێشمه‌رگه‌ی بهێنه‌ راوه‌ستاندن، ژ به‌ر كو ئه‌و ده‌ستدرێژینه‌ PKK دكه‌ت و قانوونێن مه‌ رێ ناده‌ن لڤینێن له‌شكری یێن بیانی د ناڤ عیراقێ دا هه‌بن و ژ ئاخا عیراقێ هێرش ل سه‌ر وه‌لاته‌كێ دی بهێته‌ كرن.

عه‌لی ته‌ته‌ر، پارێزگه‌رێ دهۆكێ د كۆنفرانسێ رۆژنامه‌ڤانی دا راگه‌هاند، PKK هێزه‌كا نه‌ شه‌رعی یه‌ ل هه‌رێما كوردستانێ و هێرشێن وێ ژی بۆ سه‌ر هێزێن پێشمه‌رگه‌ی كاره‌كێ تیرۆرستی یه‌.

پارێزگه‌رێ دهۆكێ گۆت ژی” ئه‌م ل گه‌ل شه‌ری نینین، شه‌ری هیچ لایه‌نه‌كێ سیاسی ژی ناكه‌ین، داخوازێ ژ هه‌موو وان هێزان ژی دكه‌ین، كو هێزێن خوه‌ ژ ئاخا هه‌رێما كوردستانێ و عیراقێ ڤه‌كێشن، هه‌كه‌ وان شه‌ر ململانێ هه‌یه‌، بلا شه‌رێ خوه‌ ببه‌نه‌ ناڤ ئاخا خوه‌، به‌لێ هه‌كه‌ ب رێیا دانوستاندنێ و چاره‌سه‌ریا ئاشتیانه‌ بیت، گه‌له‌ك باشتره‌ ژی”.

گۆت ژی” ئه‌م وان ده‌ستدرێژیێن PKK بۆ سه‌ر هێزا پێشمه‌رگه‌ی ب توندی شه‌رمزار دكه‌ین و ب كاره‌كێ تیرۆرستی دزانین، هه‌ر هێزه‌كا ده‌ستدرێژیێ بكه‌ته‌ سه‌ر هێزا شه‌رعی یا هه‌رێما كوردستانێ، كاره‌كێ تیرۆرستی یه‌، ژ به‌ر كو پێشمه‌رگه‌ هه‌رێما كوردستانێ د پارێزیت”.

ژلایێ خوه‌ڤه‌، محه‌مه‌د رزا  ئه‌لحه‌یده‌ر، سه‌رۆكێ لژنا ئاسایش و به‌رگریێ ل جڤاتا نوونه‌رێن عیراقێ گۆت” ئه‌م یێن هاتینه‌ پارێزگه‌ها دهۆكێ بۆ وێ چه‌ندێ ژ نێزیك چاڤدێریا ره‌وشێ بكه‌ین، كو ل ده‌ڤه‌رێ دروست بووی و ژ ئه‌نجامێ هێرشا ڤێ دووماهیێ یا PKK بۆ سه‌ر هێزا پێشمه‌رگه‌ی كو هژماره‌كا پێشمه‌رگان شه‌هید بووین و هژماره‌كا دی بریندار بووین”.

وی په‌رله‌مانتارێ عیراقی گۆت ژی” وه‌لاتی ل ده‌ڤه‌رێن ب سه‌ر ئامێدیێ و زاخۆ ڤه‌ شه‌هید دبن، ل گه‌ل وێ ژی ده‌ستدرێژیا به‌رده‌وام یا توركی بۆ سه‌ر ده‌ڤه‌رێ یا هه‌ی، كو چه‌ندین بنگه‌هێن له‌شكری ل ناڤ ئاخا عیراقێ دروستكرینه‌، كو ئه‌ڤه‌ داگیركاریه‌، عیراقێ مافێ به‌رسڤدانێ یێ هه‌ی ب رێیا هێزێن فیدرالی ڤه‌، هیڤیدارین ب زووترین ده‌م ئاگربه‌ست بهێته‌ راگه‌هاندن، تاكو وه‌لاتیێن هه‌رێما كوردستانێ نه‌بنه‌ قوربانیێن شه‌رێ PKK و له‌شكرێ توركی”.

سه‌رۆكێ لژنا ئاسایش و به‌رگریێ ل جڤاتا نوونه‌رێن عیراقێ زێده‌تر گۆت” پێدڤیه‌ ئه‌و كێشا PKK و توركیا بهێته‌ چاره‌سه‌ركرن، نابیت وێ چه‌ندێ كاریگه‌ری ل سه‌ر عیراقێ هه‌بیت، پێدڤیه‌ هێرشێن PKK ل سه‌ر خالێن پێشمه‌رگه‌ی ژی بهێنه‌ راوه‌ستاندن، ژ به‌ر كو ئه‌و ده‌ستدرێژیه‌ بۆ سه‌ر ئاخا عیراقێ و قانوونێن مه‌ رێ ناده‌ن لڤینێن له‌شكری یێن بیانی د ناڤ ئاخا عیراقێ دا هه‌بن و ژ عیراقێ ژی هێرش ل سه‌ر وه‌لاته‌كێ دی بهێته‌ كرن”.

ئاماژه‌ ب وێ چه‌ندێ ژی كر” ب پشت به‌ستن ب قانوونا نێڤده‌وله‌تی مه‌ مافێ به‌رسڤدانێ ل هه‌ر ده‌مه‌كی یێ هه‌ی، هیڤیدار هه‌ڤكاری یا زێده‌تر دناڤ هێزێن مه‌ دا هه‌بیت، هه‌ر چه‌نده‌ ئه‌و هه‌ڤكاریه‌ ژی ب رۆهنی ژ لایێ هه‌ولێرێ و به‌غدا هاتیه‌ دیتن، كو چه‌ندین ناڤه‌ندێن هه‌ڤپشك هاتینه‌ پێكئینان د ناڤبه‌را هێزا پێشمه‌رگه‌ی و هێزێن عیراقێ، به‌لێ پێدڤیه‌ هێزا پاسه‌وانێن سنوری ل زاخۆ بهێنه‌ زێده‌كرن، كو یا هه‌ڤسنوره‌ ل گه‌ل توركیا، ئه‌و سنوور زێده‌تر ه‌ ژ 320 كیلومه‌تران و كونترۆلكرنا وی یا ب ساناهی نینه‌”.

ناڤبری دوپاتكر ژی” ده‌ڤه‌رێن سنووری پێدڤی ب هێزێن زێده‌ترن، پێدڤیه‌ لیوایه‌كا دی بهێته‌ هنارتن، هیڤیدارم لێكتێگه‌هشتنه‌كا زێده‌تر هه‌بیت، تاكو هێزا فیدرالی بگه‌هیته‌ سه‌ر سنووری، بۆ وێ چه‌ندێ هێرش بهێنه‌ كێمكرن و ئه‌و شه‌رێ كو خوینرشتنا به‌رده‌وام نه‌هێلین”.

رۆهنكر ژی” د سه‌ره‌دانا خوه‌ دا ئه‌م دخوازین سه‌ره‌دانا وان جهان بكه‌ین، كو هێزا پێشمه‌رگه‌ی و پاسه‌وانێن سنووری تێدا هاتینه‌ جهگیركرن، دخوازین ب شێوه‌كێ مه‌یدانی ره‌وشێ ببینین، پاشی دێ سپاردێن خوه‌ بۆ سه‌رۆكایه‌تیا جڤاتا نوونه‌ران بلند كه‌ین كو ئه‌ڤ لژنه‌ ژی ل سه‌ر بریارا سه‌رۆكایه‌تیا جڤاتا نوونه‌ران هاتیه‌ پێكئینان”.

وه‌زاره‌تا پێشمه‌رگه‌ ل حوكمه‌تا هه‌رێما كوردستانێ، به‌یاننامه‌ك ل دۆر شه‌هیدبوونا پێشمه‌رگه‌كێ دی ل ناحیا ده‌ركارێ سه‌ر ب قه‌زا زاخۆ به‌لاڤكر و تێدا داخواز ژ هه‌ڤپه‌یمانان و حوكمه‌تا عیراقێ كر رۆلێ خوه‌ د راگرتنا وان ده‌ستدرێژیان بگێرن.

د به‌یاننامه‌یا وه‌زاره‌تا پێشمه‌رگه‌ دا دووپاتی ل وێ چه‌ندێ هاتیه‌ كرن، سه‌روه‌ریا ئاخا هه‌رێما كوردستانێ ژ ئه‌وله‌ویه‌تا كارێن وێ یه‌ و رێ ناده‌ت هیچ هێز و لایه‌نه‌ك سنووران بێخیته‌ د مه‌ترسیێ دا، بۆ ڤێ چه‌ندێ ژی ب مافێ خوه‌ دزانیت ب هه‌موو هێزێن دیموكراتیخواز و وه‌لاتێن دۆست رابگه‌هینیت، كو ئه‌ركێ پێشمه‌رگه‌ی پاراستنا ئاشتیێ و ئازادیێ و راهێلانا تیرۆرستێن داعشێ یه‌، نه‌كو شه‌ره‌كێ نه‌خوازراو و ده‌ستدرێژیكارانه‌.

د به‌یاننامێ دا هاتیه‌ ژی، وه‌زاره‌تا پێشمه‌رگه‌ دووپاتی ل وێ چه‌ندێ دكه‌ت، پێدڤیه‌ هێزێن pkk د وێ چه‌ندێ بگه‌هن، ئه‌ڤ جۆره‌ كریاره‌ هیچ ئارمانجه‌كا گه‌لێ كورد بجه نائینن.

ده‌قێ به‌یانناما وه‌زاره‌تا پێشمه‌رگه‌ ..

ل ده‌ڤه‌را شه‌رانش ل ناحیا ده‌ركار یا سه‌ر ب قه‌زا زاخۆ، جاره‌كادی ل درێژیا وان روودانێن نه‌خوازراو یێن چه‌ند رۆژێن بۆری، پێشمه‌رگه‌ك ب ناڤێ (ره‌زوان محه‌مه‌د عه‌لی) شه‌هید بوو.

د ده‌مێ سێ رۆژێن بۆری دا، ئه‌ڤه‌ جارا دویێ یه‌ روودانه‌كا نه‌ خوازراو ب وی شێوه‌ی روو دده‌ت، ئه‌م ل وه‌زاره‌تا پێشمه‌رگه‌ ڤان جۆره‌ كریاران ب توندی ئیدانه‌ و شه‌رمزار دكه‌ین، كو ل دووماهیی مفایێن وان بۆ دوژمن و نه‌حه‌زێن گه‌لێ مه‌ دزڤریت.

داخوازێ ژ هه‌ڤپه‌یمانان و حوكمه‌تا عیراقێ دكه‌ین، بۆ نیشاندانا رۆلێ كارا و كاریگه‌ر د راگرتنا وان ده‌ستدرێژیان و پاراستنا ده‌ڤه‌رێن سنووری یێن هه‌رێمێ، مل ب ملی هێزێن پێشمه‌رگه‌ی دا رۆلێ خوه‌ بگێرن.

پێدڤیه‌ هێزێن pkk ژی د وێ چه‌ندێ بگه‌هن كو چ ئارمانجێن وان ب ده‌ستڤه‌ ناهێن و تنێ گه‌لێ مه‌ باجا مه‌زن دده‌ت، هێزێن پێشمه‌رگه‌ی دێ ل ئاستێ به‌رپرسیاره‌تیا مه‌زن یا ل سه‌ر ملێن وان بن، د پاراستنا باژێر و گوندان و خه‌لكێ كوردستانێو ده‌ستكه‌فتێن هه‌رێمێ ژ حوكمه‌ت و په‌رله‌مان و ده‌زگه‌هێن وێ.

وه‌زاره‌تا پێشمه‌رگه‌ دووپات دكه‌ت، كو پاراستنا سه‌روه‌ریا ئاخ هه‌رێمێ ل ئه‌وله‌ویه‌تێن كارێن وێ یه‌ و رێ ناده‌ت هیچ هێز و لایه‌نه‌ك سنوورێن وێ بێخیته‌ د مه‌ترسیێ دا، بۆ ڤێ چه‌ندێ ژی ب مافێ خوه‌ دزانیت ب هه‌موو هێزێن دیموكراتخواز و وه‌لاتێن دۆست رابگه‌هینیت، كو ئه‌ركێ پێشمه‌رگه‌ی پاراستنا ئاشتیێ و ئازادیێ و راهێلانا تیرۆرستێن داعشێ یه‌، نه‌كو شه‌ره‌كێ نه‌خوازراوێ ده‌ستدرێژكارانه‌.