ئەڤرۆ:

سەرۆکێ بەرێ یا شاندێ پەرلەمانێ ئورۆپی بۆ عیراقێ راگەھاند، ئەو باوەریا رۆژئاڤای و ب تایبەتی ئورۆپا ب سەرۆکێ ھەرێما کوردستانێ ھەی گەلەک یا زێدەترە ژ وێ باوەریا وان ب سەرۆک وەزیرێن عیراقێ حەیدەر عەبادی ھەی.
ستۆران ستیڤنسۆن سەرۆکێ بەرێ یا شاندێ پەرلەمانێ ئورۆپی بۆ عیراقێ د دیدارەکێ دا ل گەل گۆڤارا گولان ، ئەگەرێ وێ باوەریا زێدەتر ب سەرۆک بارزانی ھەی ل ئورۆپا، بۆ رەفتارێن سەرۆک وەزیرێن عیراقێ یێ بەری نوری مالکی دزڤرینیت کو زیانەکا مەزن ب باوەریا نێڤدەولەتی ب عیراقێ گەھاندیە، لەوما ئەمریکا و رۆژئاڤا و نەتەوێن ئێکگرتی پتر گرنگیێ ددەنە ھەرێما کوردستانێ و ھەولێرێ، دیاردکەت ژی کو ڤەکرنا نڤیسینگەھا ئێکەتیا ئورۆپی ل ھەولێرێ گەلەک یا گرنگ بوو، ژ بەر کو ھەولێر یا بوویە جھێ گرنگیدانی د شەڕێ دژی داعشێ دا و جھێ پێشکەفتنێ و دیموکراسیێ ل ھەموو عیراقێ، بەغدا ژی یا بوویە پایتەختا دەولەتەکا شکەستی.
ناڤبری د وێ دیدارێ دا دبێژیت” ئەو باوەریا سەرۆک بارزانی ل رۆژئاڤای و ب تایبەتی ل ئورۆپا ھەی، گەلەک یا زێدەترە ژ حەیدەر عەبادی، ژ بەر کو زیانەکا مەزن ب باوەریا نێڤدەولەتی ب عیراقێ یا کەفتی ژ ئەگەرێ رەفتارێن مالکی، لەوما پیچدڤیە گرنگیا پتر یا ئەمریکا و رۆژئاڤای و نەتەوێن ئێکگرتی ب ھەرێما کوردستانێ و ھەولێرێ بیت و ئەم یێن گەھشتینە وێ باوەریێ کو ب تنێ کوردستان و پێشمەرگە ئەگەرێ شکاندنا داعشێ بوون ل دەڤەرێ و دڤێت ب شێوەکێ رێکوپێک دەست بھێتە کرن ب پێدانا چەکێ مودێرن بۆ پێشمەرگەی
بۆ وێ چەندێ سەرکەفتنێن مەزن دژی داعشێ بدەستڤە بینیت و لەشکرێ عیراقێ ئەو شیان نینن وێ چەندێ بکەت و وەلاتیێن سونی ل عیراقێ پتر ژ چەکدارێن شیعە ئەوێن ژلایێ (قاسم سلێمانی) ڤە دھێنە ب رێڤەبرن دترسن ژ چەکدارێن داعشێ، لەوما ڤەکرنا نڤیسینگەھا ئێکەتیا ئورۆپی ل ھەولێرێ گەلەک یا گرنگە کو ستاف ھەبیت و کوردان راستەوخوە پەیوەندی ل گەل ئێکەتیا ئورۆپی و نەتەوێن ئێکگرتی و ئەمریکا ھەبیت بۆ وێ چەندێ بەردەوام ئاگەھداربن و ھاریکاریێن پێدڤی ژی بگەھینن وەکو دابینکرنا ھاریکاریێن لەشکری بۆ پێشمەرگەی، ھەروەسا قەیرانێن ئاواران ژی چارە بکەن کو بەردەوام رێژا وان د زێدەبوونێ دایە ژبەر کێشێن عیراقێ و سووریێ.

ئەڤرۆ نیوز،زنار تۆڤی:
گەلەک پەنابەرێن کوردێن رۆژئاڤا و باشوور گەهشتینە وەلاتێن هنگاریا و سربیا،لێ رەوشا وان پەنابەران گەلەک دناڤ کەمپاندا گەلەکا خرابە و ژ بەر کو هەتا نوکە پتریا خزمەتگۆزاریێن دەستپێکی ژی بۆ وان دناڤ کەمپان دا نەهاتینه درۆستکرن، لەورا پتریا پەنابەران نەچارن دناڤ پارک و جهێن راوەستیانا شەمەندەفران ب شەڤ دمینن و ل وان جهان دنڤن.

هەروسا پولیس و سازیێن وان هەردو وەلاتان سەرەدەریەکا خراب دگەل پەنابەران دکەن، لەورا هنگاریا نوکە دیوارەکێ چار مەتران بلند دگەل سنورێ وەلاتێ سربیا دروستکریە، ژ پێخەمەت پەنابەر نەشێن بچنە وی وەلاتی.