ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو رێژا تووشبوونا ب کۆرۆنایێ ل هەرێما کوردستانێ ٣٢% بوویە کو ئەو یەک ژی جهێ دلخوشیێ یە، داخستنا قۆتابخانان ژی کارتێکرنا خوە ل کێمبوونا رێژا کۆرۆنایێ ل هەرێما کوردستانێ کریە.
دکتور خالس قادر رێڤەبەرێ گشتی ل دیوانا وەزارەتا ساخلەمیێ دیار ژی دکەت کو رێژا مرنا ب کۆرۆنایێ ژی ل گۆر رۆژێن بۆری کێمتر لێ هاتیە، لێ مخابن هندەک نەخوش درەنگ سەرەدانا نوشداران دکەن و ژ بەر هندێ ژی رەوشا وان گەلەک خراب دبیت و چارەسەریا وان ژی ب زەحمەت دکەڤیت.
ئەڤرۆ نیوز، عەلی حاجی :
رێڤەبەرێ ناحیا رزگاری د داخویانیەکێ دا بۆ ئەڤرۆ نیوز دیار کر ئەندەر پاسا زاخۆ گەهشتیە د قوناغێن دەست نیشان کرنا نەخشەیەکێ و پێدڤیە رێیەک ژی بهێتە دیتن بۆ نەهێلا قەرەبالغیێ ل جاددەیا زانکویا زاخۆ.
زێدەتر ئەندازیار سەروەر سەعید گۆت: (نوکە دا سێ نەخشە بۆ ئەندەر پاسا زاخۆ هاتینە دەست نیشان کرن و هێشتا بریار ل سەر دەست نیشان کرنا نەخشەیەکێ نەهاتیە دان بەلێ پێدڤی یە ئەو نەخشەیێ دهێتە دەست نیشان کرن ببیتە ئەگەرێ کێم کرنا قەرەبالغیا ترومبێلان ل دەف زانکویا زاخۆ ژبەر کو قەرەبالغیەکا زێدە ل سەر وێ جاددەیێ دروست دبیت،بۆ ڤێ چەندێ ژئ مە دگەل رێڤەبەریا هاتن و چوونا زاخۆ پەیوەندی هەنە و وان ژی ژلایێ خوە ڤە پلانەکا باش هەیە ب رەنگەکێ کو ئەو ترافیک لایت نێزیک زانکویا زاخۆ نەمینیت و ئەم چاڤەرێ نە هەتا کو نەخشەیێ ئەندەر پاسێ بهێتە ئێکلا کرن دێ ل دویف دا پلانەک ژی هێتە دانان بۆ نەمانا قەرەبالغیێ ل سەر وێ جاددەیێ).
ناڤهاتی گۆت ژی دروستکرنا وێ ئەندەر پاسا نێزیک نیو زاخۆ بەر ب کومپانیەکا نافخۆ کەفتی یە و ب دوماهی ژی هاتیە و وێ کومپانیێ ژی پشکنینێن وێ جاددەیێ ژی کرینە پێخەمەتی وێ چەندێ هەر دەما رەزامەندی ل سەر نەخشەیەکێ هاتە دان ئێکسەر دەست ب کاری بن و پارەیەکێ تەخمین کری هاتیە دانان بەلێ پارەیێ دەست نیشان کریێ دروست بۆ ئەندەر پاسێ ئێکلا نەبوویە ئەو ژی دێ دگەل نەخشەیی هێتە ئێکلا کرن.
ئەڤرۆ نیوز:
د كۆمبوونا خوه یا دوهى دا، سەرکردایه‌تیا ئێکەتیا نشتیمانی یا کوردستانى هۆشداری و سزادان بۆ سێ کەساتیان دناڤا وێ حزبێ دا دەرخستییه.
ل رۆژا شه‌مبى، سەرکرداتیا ئێکەتیا نشتیمانی یا کوردستانێ دا، بریارا سرکرنا مەلا بەختیار، ئەندامێ جڤاتا بلند و پاراستنا بەرژەوەندیێن ئێکەتیێ دەرکریه، وان ئەگەرێ ڤێ چه‌ندێ ڤه‌گه‌راندیه بۆ هندێ كو مەلا بەختیاری ب هندەک نڤیسینان پەیرەوێ ناڤخۆ یێ ئێکەتیێ بنپێ کریە، له‌وما وان ژى ئه‌ڤ بریاره ل دژى وى ده‌رخستییه.
هه‌ر د وێ کۆمبوونێ دا، ئێکەتیا نشتیمانیا كوردستانى ژ بەر پشکداریا وان د کۆمبوونا شیرەتکارییا هەرسێ سەرۆکاتیێن هەرێمێ دا، هۆشداری دایە قوباد تالەبانی، جێگرێ سەرۆکێ حکومەتا هەرێما کوردستانێ و رێواز فایەق، سەرۆکا پەرلەمانێ کوردستانێ.
ئەڤرۆ نیوز:
وەزیرێ دەرڤە یێ عه‌ره‌بستانا سعودى ئامادەیا وەلاتێ خوه بۆ رێککەفتنێ ل گەل ئسرائیلێ ده‌ربرى و ئاشكرا كریه، كو ئیدارا نوویا ویلایه‌تێن ئێكگرتى یێن ئەمریکا، دێ هەمان سیاسەت ل رۆژهەلاتا ناڤین هه‌بیت.
ئەمیر فەیسەل بن فەرحان، بۆ رۆیتەرز گۆتیه: وەلاتێ وی یێ ئامادەیە پەیوەندیان ب رەنگەکێ تەمام ل گەل ئسرائیلێ ئاسایی بکەت، لێ ب مەرجێ رێککەفتنەکا ئاشتیێ ل گەل فەلەستینێ و دانانا دەولەتەکا سەربه‌خۆ بۆ وی وەلاتی، هه‌روه‌سا عه‌ره‌بستانا سعوودى یا گەشبینە کو ئیدارەیا نوو یا ئه‌مریكا دێ بۆ پاراستنا سەقامگیریێ، هەمان سیاسەت ل رۆژهەلاتا ناڤین په‌یره‌و كه‌ت.
واشنتون پۆست خویا كریه، ژ بلی عه‌ره‌بستانا سعوودی، دێ هنده‌ك وه‌لاتێن دیتر یێن عه‌ره‌بى، وه‌كو وه‌لاتین عومان، قەتەر، مەغرب ژی پەیوەندیان ل گەل وه‌لاتێ ئسرائیلێ ئاسایی کەن.
ئیدارەیا دۆنالد ترامپی هەر ئێک ژ وه‌لاتێن ئیمارات، مسر، ئوردن، بەحرەین و سۆدانێ رازی کربوون، كو پەیوەندیێن خوه ل گەل وه‌لاتێ ئسرائیلێ ئاسایی بکەن.
ئەڤرۆنیوز:
ئەندامه‌كێ لژنا دارایی ل پەرلەمانێ عیراقێ راگەهاند، ب تنێ ل سەردەمێ سه‌رۆكوه‌زیرێ به‌رێ یێ ئیراقێ عادل عەبدولمەهدی، هژمارا فەرمانبەرێن عیراقێ ب رێژا 20% زێدە بوویه، ب تایبەتی د ده‌مێ شەش هەیڤێن دووماهیێ ژ ژیێ حوکمەتا وى ب هزاران فەرمانبەر ب شێوەكێ به‌ره‌لایی هاتنە دامەزراندن.
جەمال كۆچەر گۆت ژى: هژمارا هه‌موو فەرمانبەرێن عیراقێ ب شەش ملیۆنان دهێتە تەخمینكرن و ڤێ وه‌كریه كو درێژاهیا پێدانا سیاسەتا دامەزراندنێ دا، ئه‌ڤه ب بیتە ئەگەر كو داهاتێ دەولەتێ تێرا مووچێن فەرمانبەران نەكەت.
ئەڤرۆ نیوز:
ئه‌یمه‌ن زه‌واهرى، سەرۆکێ رێکخستنا قاعیدە بوویه و ئێک ژ وان کەسان بوو یێن كو ژ ئالیێ ویلایه‌تێن ئێكگرتى یێن ئەمریکا ڤە داخواز کری، د ژیێ شێست و نەهـ سالیێ دا وه‌غه‌ر كر، زەواهری ل سالا 1951 ل وه‌لاتێ مسرێ ژدایک بوویە، ل سالا 2011 هه‌تا بەری وه‌غه‌ر كرنێ، سەرۆکێ رێكخستنا تیرۆرستى یا قاعیدە بوو.
ل رۆژا شه‌مبیێ، میدیایێن پاکستانی راگەهاندیه، كو لدووڤ ژێدەرێن هەوالگیری یێن پاکستانی و ئەفغانی، ئەیمەن زەواهری، سەرۆکێ رێکخستنا قاعیدە د ژیێ 69 سالیێ دا وه‌غه‌ر كریە.
دهێته زانین پشتی روودانێن 11 ئیلۆنا 2001، ئه‌مریكا ئه‌یمه‌ن زەواهری کربوو د لیستا کەسێن داخوازکری دا و 25 ملیۆن دۆلار وەکو پاداشت بۆ هەر کەسەکێ دانابوون کو زانیاریان ل سەر جهێ وی بدەت، لێ هه‌تا مرنا وى جهێ وى نه‌هاته ئاشكرا كرن.
ئەڤرۆ نیوز:
وه‌زاره‌تا ساخله‌میا هه‌رێما كوردستانێ، ئامارێن 24 ده‌مژمێرێن بورى یێن كۆرۆنایێ به‌لاڤكرن، لدووڤ وان ئاماران هژمارا تووشبوویێن كۆرۆنایێ ب ره‌نگه‌كێ به‌رچاڤ ل كێمیێ دایه، هه‌روه‌سا 361 كه‌س تووشی په‌ژیكا كۆرۆنایێ بووینه، دیسان 20 تووشبوویان ژى وه‌غه‌ر كریه.
لدووڤ ئامارا وه‌زاره‌تا ساخله‌میێ، 371 تووشبوویێن كۆرۆنایێ باشبووینه، كو ژ هژمارا تووشبوویان زێده‌تره، دیسان رێژا تووشبووویان ل دهۆكێ ژى ل كێمیێ دایه.
ب پشكداریا سەرۆکێ حکومەتا هەرێما کوردستانێ، دێ کۆنفرانسێ ئابووریی یێ هەرێما کوردستانێ یێ پشتى كۆرۆنایێ، ژ ئالیێ ژوورا بازرگانی و پیشەسازیێن ئەمریکا ڤه هێته رێکخستن.
ئێكه‌تیا ژوورا بازرگانی و پیشەسازیێن ئەمریکا راگه‌هاندیه، ئه‌ڤ کۆنفرانسە دێ ل رۆژانێن 23 و 24ـ 11-2020 ب شێوێ ئۆنلاین ب پشكداریا بەرپرسێن بلند یێن ئەمریکا و هەرێما کوردستانێ و ئەو کۆمپانیێن ئەمریکی یێن كو ل هەرێما کوردستانێ وەبەرهێنانێ دکەن، هێته رێكخستن.
د ڤى کۆنفرانسى دا، دێ چاوانیا پێشڤه‌برنا گەشەیا ئابووری ل هەرێما کوردستانێ، ده‌لیڤێن وەبەرهێنانێ ل هەرێما کوردستانێ، گرنگیدان ب ئاسایشا خوارنێ، داهاتیێ پەیوەندیێن ئەمریکا و ئیراقێ د وارێ وزێ دا هێته كرن.
لدووڤ راگەهاندنه‌كا نوونەراتیا حکومەتا هەرێما کوردستانێ ل واشنتۆن، مەسرور بارزانی، سەرۆکێ حکومەتا هەرێما کوردستانێ ل گه‌ل به‌رپرسێن بلند یێن ئه‌مریكا، دێ تێبینی و خواستێن پشكداربوویان تۆمار كه‌ت و پشكداریێ د گوتۆبێژان دا كه‌ت.
ئەڤرۆ نیوز، زنار تۆڤی:
گولیزار رەشید سندی، جێگرا سەرۆکا لژنا وزێ و سامانێن سروشتی ل پەرلەمانێ کوردستانێ، بۆ ئەڤرۆ نیوز دیار کر: بەری چه‌ند رۆژان لژنا تایبه‌ت ب وزێ و سامانێن سروشتی ڤە، ل پەرلەمانی کوردستانێ، ئه‌و مه‌ترسیە خستنە بەرچاڤ، یێن کو روو ب روو كاره‌با نیشتیمانی دبن، ئەڤە چه‌ند رۆژه كاره‌با نیشتیمانی دوباره یا كێم دبیت، هەروەسا ژ ئەگەرێ هاتنا وه‌رزێ زڤستانێ و گەلەک ب كارئینانا كاره‌بێ ژ ئالیێ وەلاتیانڤە، دهێتە پێشبینی کرن، ل ڤێ زڤستانێ ژی كوردستان روو ب روو كێمیا كاره‌بێ ببیت، ئەگەرێ کێمیێ ژی یێ گرێدایە ب دو هۆكاران ڤە و دڤێت كار ل سه‌ر بهێتە کرن، ئێک دزینا كاره‌بێ یە یا دیتر ژی ته‌كنیكیا كاره‌بێ یە، د هەردو حالەتان دا %44 یا كاره‌با كوردستانێ ب هه‌ده‌ر دچیت، هەتا نوکە كوردستان سێ هزار مێگاواتێن كاره‌بێ بەرهەم دئینیت، هەکە ب رێژا %44 وه‌ربگرین، 1200 مێگاواتێن كاره‌بێ دهێنە دزین، ب ڤێ رێژێ دشێن كاره‌بێ بۆ هەموو باژێرێ هه‌ولێری پێ دابین بكەن.
ناڤهاتیێ زێدەتر دیار کر: وه‌زاره‌تا كاره‌بێ رابوویە ب دانانا پیڤەرێ زیره‌ك وه‌كو تێست و نێزیكی 400 هزار پیڤەران هاتینە دانان، به‌لێ كار پێ نەهاتیە كرن، کو ئەڤ رێژە دبیتە (%30) یا پشکدارێن كاره‌با نیشتیمانی، دڤێت وه‌زاره‌تا كاره‌بێ دەست بکەت ب دانانا پێڤەرێن زیره‌ك بۆ هندێ، داکو رێژه‌کا باش ژ وێ كاره‌با دهێتە دزین ڤەگەرینیت
گولیزارێ ئاشکرا کر ژی: دڤێت لژنەک ژ وه‌زاره‌تا نافخۆ و باژێرڤانیێ و كاره‌بێ و ئه‌ندامێن پارێزگەهان بهێتە دروستکرن، بۆ هندێ داکو درێژی ب به‌رنامێ وێ لژنێ بهێتە دان، یێ کو دانایی بۆ بڕینا زێدەگاڤیێن ل سه‌ر كاره‌با نیشتیمانی، هەکە ئەڤ لژنە لەزێ بكەت، ژ بڕینا وان زێدەگاڤیان دێ شێت رێژه‌کا باش یا كاره‌بێ ڤەگەرینیتەڤە، دڤێت هەڤسه‌نگی بهێته دروست کرن دناڤبەرا به‌رهه‌مئینان و خواستا کارەبێ دا، چونكی هەکە حوکمه‌ت ب ڤی سیسته‌می رێژا كاره‌بێ بگه‌هینیته 6000 مێگاواتێن كاره‌بێ، هێشتا گرفتێن مە چاره‌سه‌ر نابن، چونکی پشکەکا کارەبێ دچیت بۆ دزیێ و رێژا دزیێ د كاره‌بێ دا هەڤدەمە ل گه‌ل زێدەبوونا به‌رهه‌مێ كاره‌با زێدەتر، لەوما دڤێت ب ڤان رێكاران رێگری بهێتە کرن ژ هندێ، داکو زێدەبوونا به‌رهه‌مێ دزیا كاره‌بێ زێدەتر نه‌بیت، ئەڤە ژ پێخەمەت به‌رژه‌وه‌ندیا گشتییە و نابیت خەلک باجا دزینا كاره‌با نیشتیمانی بدەت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٣٦١ کەس ل هەرێما کوردستانێ تووشی کۆرۆنایێ بووینە و ٢٠ نەخوش ژی مرینە.
ل گۆر ئامارا وەزارەتا ساخلەمیێ ٣٧١ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ١٧٦ کەسێن دی تووشی کۆرۆنایێ بووینە و سێ نەخوش ژی مرینە، هەروەسا ل پارێزگەها دهۆکێ ٢١٢ نەخوش ژی ب تەمامی چارەسەر بووینە.
ل گۆر ئامارا ٢٤ دەمژمێرێن بۆری دیار دبیت کو رێژا تووشبوونێ کێم بوویە و رێژا چارەسەربوونێ ژی زێدەتر لێ هاتیە.
نيشاندان