سەرۆك بارزانی د پەیامەكێدا بۆ كوردستانیێن دەرڤەی وەلاتی، سەرەرای بلند هەلسەنگاندنا پشتەڤانییا وان بۆ رۆژئاڤایێ كوردستانێ، دووپاتكر كو كورد پارێزەرێن مرۆڤایەتیێ بوون و نوكە وەختێ وێ چەندێیە مرۆڤایەتی پارێزەرا كوردستانێ بیت.
دەقێ پەیاما سەرۆك بارزانی:
جهێ شانازیێیە ئەڤرۆ ل باژێرێن وەلاتێن ئورۆپا، هەژمارەكا مەزن ژ رەڤەندا كوردی ب شێوەیەكێ بێوێنە د خرڤەبوونێن ئاشتییانەدا، پشتەڤانییا خوشك و برایێن خوە ل رۆژئاڤایێ كوردستانێ دكەن.
ئەڤە ئاماژەیەكا رۆهنە بۆ شیان و زیندییا رەڤەندا كوردی ل دەرڤەی وەلاتی، وێ چەندێ ژی د سەلمینیت كو گەلێ مە ل دەرڤەی وەلاتی، هەردەم هێزەكا مەزن و بەرهەڤ و ئێكگرتییە، بۆ پشتەڤانیكرنا دۆزا رەوا یا گەلێ كوردستانێ ل هەر پارچەیەكا كوردستانێ بیت. سلاڤ و رێزێن من یێن تایبەت، بۆ هەوەیێن خوەشتڤی هەنە.
ل دەستپێكا چەرخێ بیستی، ئاخا كوردستانێ ب نەحەقی هاتە پارچەكرن، پشتی وێ پارچەكرنێ، گەلێ كوردستانێ روو ب روویێ كارەسات و نەهامەتی و ئازارێن مەزن بوویە. بەلێ ئەو رەوشا دژوار كو بۆ گەلێ كوردستانێ دروست بووی، نەبوویە ئەگەرێ وێ چەندێ كو گەلێ مە ئیرادەیا خوە ژ دەست بدەت و مافێن خوە ژبیر بكەت. بەروڤاژی، گەلێ كوردستانێ رۆژ ب رۆژ ب هێزتر و هشیارتر ل سەر خەباتا خوە بۆ مسۆگەركرنا مافێن خوە بەردەوام بوو. ب رێكا خەباتێ ژی دا قوربانیێن بێ هەژمار داینە.
هەروەكە پارچەیێن دی یێن كوردستانێ، ل رۆژئاڤایێ كوردستانێ ژی گەلێ كورد خەباتەكا دوور و درێژ هەیە. خەباتكەر و شۆڕشگێرێن رۆژئاڤایێ كوردستانێ، ئازار و زیندان و دەربەدەری و ئاوارەیی دیتییە. پشتی خەباتەكا مەزن روو ب روویێ گەفا تیرۆرستێن داعشێ بوون، گەنج و لاوێن گەلێ مە ب ئازایەتییا خوە و ب خوین و قوربانییان داعش شكاند و بوونە پارێزەرێ مرۆڤایەتیێ.
نوكە گەلێ مە ل رۆژئاڤایێ كوردستانێ تووشی گەفەكا نوو و رەوشەكا ئالۆز و مەترسیدار بوویە. ئەركەكێ نیشتمانی و نەتەوەییێ هەر كوردستانییەكییە كو پشتەڤانێن خوشك و برایێن مە ل رۆژئاڤایێ كوردستانێ بین.
دەنگێ هەر ئێكی ژ هەوە كاریگەرییا خوە ل سەر مۆرال و خۆڕاگرییا گەلێ كورد ل كوردستانێ و ب تایبەتی ل رۆژئاڤایێ كوردستانێ هەیە، پەیامەكە ژی بۆ خەلكێ جیهانێ بۆ وێ چەندێ كو پشتەڤانیێ ل داخوازی و مافێن رەوا یێن خوشك و برایێن مە بكەن.
ئەركێ جڤاكا نێڤدەولەتی و وەلاتێن رۆژئاڤایە، كو ملێ خوە بدەنە بەر بەرپرسیارەتییا خوە و رێكێ نەدەن نەهامەتی و ئازارێن گەلێ مە دووبارە ببن. ل شەڕێ داعشێ كورد پارێزەرێن مرۆڤایەتیێ بوون، نوكە پێدڤییە مرۆڤایەتی پارێزەرێن كوردستانێ بن.
خوەنیشادان و خرڤەبوونێن هەوە، نیشانەكا رۆهن یا وێ ئێكدەنگییا نەتەوەیییە كو ل ناخێ كوردستانییێن دەرڤەی وەلاتیدایە. ئەوژی وێ راستیێ نیشا ددەت، كو جوداهییا سنووران و بیر وبۆچۆنێن سیاسی، نەشێن هەڤبەندیێن دیرۆكی و نەتەوەیی د ناخێ مەدا لاواز و بێهێز بكەن. ئەم ئێك نەتەوەینە و مە ئێك دیرۆك و پاشەڕۆژ مە هەیە و ل خوەشی و نەخوەشییاندا هەڤپشكین. كوردبوونا مە ل سەر هەر ئایدیۆلۆژییەكێیە. كوردبوون پەیاما ئاشتیێ و پێكڤەژیانێیە، نەك تنێ بۆ گەلێ مە، بەلكو بۆ گەلێن دەڤەرێ و هەموو جیهانێ ژی.
ئەز سوپاسییا هەوەیێن ئەزیز ئێك ئێك و رێكخەرێن وان خرڤەبوونا و كۆنفیدراسیۆنا رەڤەندا كوردستانی دكەم، سوپاسییا هەموو كوردستانیێن دەرڤەی وەلاتی دكەم، كو ل رۆژێن بۆری ب هیممەت و حەماسەكا مەزن پشتەڤانییا خوشك و برایێن خوە ل رۆژئاڤا بوون. دەستخوەشیێ ل هەوە دكەم، هەر ئەڤە ژ هەوە دهاتە چاڤەڕێكرن. پێدڤییە ئەو پشتەڤانیكرنە د چارچۆڤەیێ شێوازێن ئاشتییانە و پێرابوونێن مەدەنیدا هەر بەردەوام بن.
داخوازا من ئەوە كو د كۆمبوونێن هەوەدا، د مەراسیم و خوەنیشاداناند، ب تمامی پێگیری بهایێن بلند یێن مللەتێ مە بن و پێگیری قانوون و رێنمایێن وان وەلاتان بن كو هوون لێ دژین. ب هەموو شێوەیەكی خوە ژ هنگامێ و ئالۆزیێ و توندوتیژیێ دووربێخن. گەلێ كوردستانێ كێشە ل گەل سیاسەتا حوكمەت و رژێمان هەیە و هیچ كێشەیەك ل گەل نەتەوەیان نینە، دڤێت هەموو ئاگەهداری وێ چەندێ بن نابیت كەرب و كێشە د ناڤبەرا كورد و نەتەوەیێن دی دا دروست ببیت، پەیاما گەلێ كوردستانێ پەیاما ئاشتیێ و مرۆڤدۆستیێ و پێكڤەژیانێیە.
هەروەسا ل ڤێرێ ب پێدڤی دزانم كو داخوازێ ژ حوكمەتا سووریێ و هێزێن (هەسەدە) بكەم كو ل سەر ئاگربەستا د ناڤبەرا خوەدا بەردەوام بن. بۆ چارەسەركرنا كێشە و ناكۆكیێن خوە، پشتبەستنێ ل دیالۆگێ و تێكگەهشتنێ بكەن و ب هیچ شێوەیەكی رێك نەهێتە دان كو درفت و كێشەیێن سیاسی ببنە ئەگەرێ پەیدابوونا ناكۆكی و كێشەیێن نەتەوەیی د ناڤبەرا كورد و عەرەباندا.
هەروەسا بۆ گەهشتنێ ب ئاشتیێ و ئارامیێ، پێدڤییە دووماهی ب ئازارێن گەلێ كورد و بزاڤێن حەلاندن و بەهۆژاندنا وی دا بهێتە دان و د پاشەڕۆژا سووریێ دا مافێن سیاسی و مەدەنی و نیشتمانی یێن گەلێ كورد د دەستووریدا بهێنە گەرەنتیكرن.
ل دووماهیێ وێ چەندێ دووپات دكەم، كو دڤێت ئەم هەموو پشتەڤانییا دۆزا رەوا یا گەلێ خوە ب هێز بكەین و دڤێت هەردەم مە هیڤی ب پاشەڕۆژەكا گەش بۆ گەلێ كوردستانێ هەبیت.

ل رۆژا ئێكشەمبی 1/2/2026، ل پیرمام سەرۆك مەسعود بارزانی پیشوازی ل جوشوا هاریس، كاربڕێڤەبەرێ بالیۆزخانەیا ئەمریكا ل ئیراقێ و ویندی گرین، قونسلا گشتییا ئەمریكا ل هەرێما كوردستانێ كر.
د دیدارەكێدا جۆشوا هاریس، ب ناڤێ سەرۆك و حوكمەتا ئەمریكا رێز و سوپاسی ئاراستەی سەرۆك بارزانی كر بۆ هەموو وێ پشتەڤانییا كو بۆ دووماهی رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) بەرچاڤكری.
ل دۆر پرۆسەیا سیاسیا ئیراقێ جارەكادی پشتەڤانی و هەلوەستێ ئەمریكا بۆ هەرێما كوردستانەكا ب هێز د چارچۆڤەیێ ئیراقێدا دووپاتكر.
سەرۆك بارزانی، سوپاسییا رۆل و هەلوەستێ ئەمریكا كر بۆ پشتەڤانییا وێ ل گەلێ كوردستانێ و ئاماژە بۆ وێ چەندێ كر كو هەكە هەلوەست و پشتەڤانییا ئەمریكا ل سالا 1991 نەبا ئەم نەدشیاین دەستكەفتێن سەرهلدانێ و پەرلەمان و حوكمەتا هەرێما كوردستانێ بپارێزین.
سەبارەت پرۆسەیا سیاسییا ئیراقێ بیر و بۆچۆن هاتنە لێكگۆهارتن و هەردو ئالییان دووپاتی ل گرنگییا پێگیریبوون ب دەستووری كر و هەڤڕابوون كو دڤێت وەلاتیێن ئیراقی ب خوە بڕیارێ ل دۆر رەوشا وەلاتێ خوە ل سەر بنەمایێ هەڤپشكی و هەڤسەنگی و لهەڤكرن بدەن.
د ڤی چارچۆڤەیدا هەردو ئالییان پێشوازی ل دانوستاندنێن ڤێ دووماهیێ یێن بەغدایێ كر بۆ دیتنا پێرابوون و سیناریۆیێن سیاسی كو تێدا بەرژەوەندییا وەلاتێن ئیراقێ ل بەرچاڤ بهێتە وەرگرتن و ژ هەموو روویەكی ژی ڤە هەڤپشكییا ئەمریكا و ئیراقێ بهێتە ب هێزتركرن.

سەرۆك مەسعود بارزانی و فەرماندەیێ گشتیێ هێزێن سووریا دیموكرات (هەسەدە) د پەیوەندییەكا تەلەفۆنیدا باس ل پێنگاڤێن بجهئینانا رێككەفتنا د ناڤبەرا دیمەشقێ و هەسەدە دا كر.
ل رۆژا ئێكشەمبی 1/2/2026، سەرۆك مەسعود بارزانی و مەزلووم عەبدی، فەرماندەیێ هێزێن سووریا دیموكرات (هەسەدە) ب تەلەفۆنێ ل گەل هەڤدوو ئاخڤتن.
ب گۆرەی بەیاننامەیەكا بارەگەهێ بارزانی، د پەیوەندییا تەلەفۆنیدا باس ل دووماهی پێشهاتێن سووریێ و پێنگاڤێن بجهئینانا رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) هاتە كرن.
د پشكەكا دی یا پەیوەندیێدا، هەردو ئالییان دووپاتی ل چارەسەربوونا كێشە و گرفتان ب رێكا دیالۆكێ و بەرقەراربوونا ئاشتیێ و ئارامیێ ل سووریێ كر.
ئەڤ پەیوەندییا تەلەفۆنی د ناڤبەرا سەرۆك بارزانی و مەزلووم عەبدی دا پشتی وێ پەیوەندییا تەلەفۆنی د ناڤبەرا سەرۆك مەسعود بارزانی و ئەحمەد شەرع، سەرۆكێ سووریێ ل رۆژا 31/1/2026 هاتیە ئەنجامدان.
بارەگەهێ بارزانی ل دۆر وێ پەیوەندییا تەلەفۆنی د ناڤبەرا سەرۆك بارزانی و سەرۆكێ سووریێ دا بەلاڤكربوو» باس ل رەوشا سووریێ و دووماهی گوهۆڕین و رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) دا و پێنگاڤێن داهاتی هاتە كرن، هەروەسا دووپاتی ل پێدڤییا بەرقەراربوونا ئاشتیێ و ئارامیێ ل سووریێ هاتە كرن و ئەوژی هاتە دووپاتكرن كو پێدڤییە دیالۆگ و تێكگەهشتن تنێ رێكا چارەسەركرنا كێشە و ناكۆكییان بیت».

نێچیرڤان بارزانی، سەرۆكێ هەرێما كوردستانێ ل سالڤەگەڕا 22 یا كارەساتا ئێكێ شوباتێ پەیامەك بەلاڤكر و تێدا هاتیە، شەهیدێن ئێكێ شوباتێ، سیمبۆلا پێكڤەژیانێ، ئێكڕێزیێ و تێكهەلبوونا خوینا رۆلێن كوردستانێیە ژ پێخەمەت ئازادیێ و سەرفەرازیێ.
دەقێ پەیاما نێچیرڤان بارزانی:
ب رێز ڤە بیرئینانا شەهیدێن نەمر یێن كارەساتا ئێكێ شوباتا 2004 دكەین، ئەو رۆژا تیرۆرستێن تاریپەرێس ل سپێدەهییا جەژنێدا، ب كەرب و كینەكا رەش، دو بارەگەهێن سەرەكی یێن پارتی دیموكراتی كوردستان و ئێكەتی نیشتمانی كوردستان ل هەولێرێ كرینە ئارمانج و كۆمەكا سەركردە و خەباتكەرێن دیار و وەلاتیێن بێتاوان شەهید و برینداركرن.
شەهیدێن ئێكێ شوباتێ، سیمبۆلێن پێكڤەژیانێ، ئێكڕێزیێ و تێكهەلبوونا خوینا رۆلێن كوردستانێ ژ پێخەمەت ئازادیێ و سەرفەرازیێدا. ئەو ل وەختەكی شەهید بوون كو مژوولی پیرۆزباهییا جەژنێ و ب هێزكرنا تەباییێ و خوەشتڤیێ بوون، لەوما بیرئینانا وان تنێ بیرئینانا ئازارەكێ نینە، بەلكو دووپاتكرنەڤەیە ل سەر وان بهایێن وان ژ پێخەمەت گیانێ خوە بەخشی.
باشترین وەفا بۆ خوینا شەهیدێن ئێكێ شوباتێ و هەموو شەهیدێن كوردستانێ، پاراستنا دەستكەفتان، ب هێزكرنا گیانێ تەباییێ و پێكڤەكاركرنێ و ئێكڕێزیێ د ناڤبەرا ئالیێن سیاسییە.دڤێت ڤێ هەلكەفتێ بكەینە هێڤێنێ دەربازكرنا ناكۆكییان و كاركرن بۆ دروستكرنا پاشەڕۆژەكا گەشتر بۆ نفشێن مە كو هەژی قوربانیدانا شەهیدێن مەبیت.

ل رۆژا ئێكشەمبی 1/2/2026، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، رێورەسمەكێ تایبەت ل سالڤەگەڕا شەهیدێن ئێكێ شوباتێ، ل پاركا شەهید سامی عەبدولرەحمان ل باژێرێ هەولێرێ بڕێڤەچوو.
د رێوڕەسمیدا، سەرۆكێ حوكمەتا هەرێما كوردستانێ و قۆنسل و دیپلۆماتكارێن وەلاتان، قەفتەگولێن رێز و وەفایێ ل سەر مۆنۆمێنتا شەهیدێن ئێكێ شوباتێ دانا.

ل رۆژا 1/2/2026، مەسرور بارزانی، سەرۆكێ حوكمەتا هەرێما كوردستانێ د كۆنفرانسەكێ رۆژنامەڤانیدا راگەهاند: هیڤیدارین ئەڤ نەهامتییە ئێدی ب سەر مللەتێ كورد دا نەهێن. مخابن ئەڤرۆ سالڤەگەڕا شەهیدبوونا كۆمەكا سەركردە و خەلكێ كوردستانێیە كو مخابن د كریارەكا تیرۆرستیدا هەموو شەهید بوون. ئەڤرۆ بیرئینانا ڤان شەهیدانە و هەموو شەهیدێن رێكا رزگاریخوازییا كوردستانێ، دڤێت وێ پەیامێ بدەتە مە كو پێدڤییە د ئێكگرتی بین، خودان هەلوەست بین و ل سەر مافێن رەوا یێن مللەتێ خوە بەردەوام بین و رێكا وان شەهیدان بەرنەدەین تاكو دگەهینە ئارمانجا دووماهیێ یا مللەتێ خوە.
سەرۆكێ حوكمەتا هەرێما كوردستانێ دووپاتكر، دانوستاندنێن هەردو شاندێن دانوستاندكارێن پارتی دیموكراتی كوردستان و ئێكەتی نیشتمانی كوردستان ل دۆر پێكئینانا حوكمەتا نوو یا هەرێما كوردستانێ و هەلبژارتنا سەرۆككۆمارێ نوو یێ ئیراقێ بەردەوامن، بەلێ هەتا نوكە نەگەهشتینە رێككەفتنێ.
هەر ل دۆر پێكئینانا حوكمەتێ، مەسرور بارزانی گوت» هەر ژ پشتی هەلبژارتنێن كوردستانێ كو زێدەتر ژ سالەكێیە هاتینە ئەنجامدان، مە گوتییە پێدڤییە رێز ل دەنگێ خەلكێ كوردستانێ بهێتە گرتن و رێز ل ئەنجامێن هەلبژارتنان بهێتە گرتن. ئەم ل سەر وێ بۆچۆنا خوە بەردەوامین، ئەڤە بیر و بۆچۆنا پارتییە كو ئەنجامێن هەلبژارتنان دێ بن رێك بۆ دروستكرنا كابینەیا نوو یا حوكمەتێ».
ل دۆر سەرەدانا شاندێ چارچۆڤەیێ هەماهەنگیێ كو بڕیارە ل گەل سەرۆك بارزانی كۆمببیت، سەرۆكێ حوكمەتا هەرێما كوردستانێ ئاماژەكر، چاڤەڕێی ئەنجامێ كۆمبوونا د ناڤبەرا وی شاندی و سەرۆك بارزانی دكەن و پاشی ل بەرچاڤ وەرگرتنا بەرژەوەندیێن بلند یێن گەلێ كورد، دێ بڕیارا دووماهیێ ل دۆر پرسان دەن.
سەبارەت رەوشا رۆژئاڤایێ كوردستانێ، مەسرور بارزانی دیاركر» سەرۆك بارزانی رۆلەكێ سەرەكی د رێككەفتنا د ناڤبەرا هێزێن سووریا دیموكرات (هەسەدە) و حوكمەتا سووریێ و راگەهاندنا ئاگربەستا سەرانسەری هەبوو و هیڤیدارین ئەو رێككەفتنە بهێتە بەرفرەهكرن و ئاشتی و ئارامی بۆ سووریێ بزڤڕیت و ب تایبەتی دەڤەرێن كوردی».
مەسرور بارزانی دلخوەشییا خوە ب راگەهاندنا رێككەفتنێ دیاركر و هیڤی خواست» شەڕ ب راوەستیت و مافێن خەلكێ هەموو سووریێ و ب تایبەتی كوردان ب شێوەیەكێ قانوونی و د دەستووریدا بهێنە جهگیركرن و ئاشتی بەرقەرار بیت، ئەڤە د بەرژەوەندییا هەموو ئالییەكی دایە».
د بەرسڤا پرسیارەكێدا هەكە رێككەفتنا رۆژئاڤا نەهێتە بجهئینان دێ مەترسی چ بن؟ سەرۆكێ حوكمەتا هەرێما كوردستانێ گوت» ئالۆزی ل هەر جهەكی ل دەڤەرێ بەردەوام بیت د بەرژەوەندییا خەلكێ مە دا نینە. لەوما ئەم ل گەل وێ چەندێ نە ئالۆزی نەبیت و ئاشتی و ئارامی هەبیت. ژ بەر وێ چەندێ دێ د بزاڤێن خوە دا بەردەوام بین بۆ نێزیككرنا ئالییان».

چاڤدێرێن سیاسی دیار دکەن، رۆژهەلاتا ناڤین بەر ب گوهۆڕینێن مەزن ڤە دچیت و ئێکگرتنا کوردان د ڤێ دووماهیێ دا ئەنجامێن خوە یێن باش هەبووینە و گرنگە نها پتر ژ هەر دەمەکێ کورد ئێکگرتی بن و خوە بۆ هەر گوهۆڕینەکێ ژی بەرهەڤ بکەن.

سڕی ساکیک ئەندامێ پەرلەمانێ تورکیا سەر ب فراکسیۆنا دەم پارتی دیار کر، پلانێن مەزن ل دژی گەلێ کورد دهێنە گێران و ل رۆژئاڤایێ کوردستانێ دا ئەو یەک دیار بوو، مخابن جارەکا دی هێزێن جیهانی و هەرێمی دخوازن کورد نەگەهنە مافێن خوە و پیلانێن گەلەک کرێت ل دژی کوردان دهێنە گێران، لێ جهێ دلخوەشیێ یە کو گەلێ کورد هشیارە و ب ئێکگرتنا کوردان ل هەموو جیهانێ پلانا ل دژی رۆژئاڤایێ کوردستانێ سەر نەگرت، لێ د هەمان دەمی دا پلان هەر دهێنە گێران و گرنگە ئەڤ ئێکگرتنا ڤێ دووماهیێ دروست بوویی بەردەوام بیت و هەروەسا دڤێت هێزێن سیاسی یێن کوردی ژی ل هەر چار پارچەیێن کوردستانێ خوە بۆ قووناغەکا نوو ئامادە بکەن.
کەمال ئەحمەدی چاڤدێرێ سیاسی یێ رۆژهەلاتێ کوردستانێ ژی کو ل ئۆرۆپا دژیت دیار کر، وەسا دیارە نها بەرژەوەندیێن ئەمریکا و هێزێن هەرێمی د هندێ دایە کو دیسان رێ نەدەن کورد بگەهنە مافێن خوە، ل رۆژئاڤایێ کوردستانێ ئەو یەک دیار بوو، هەتا دوهی ئەمریکا ل هەمبەر داعشێ پشتەڤانی ل کوردان دکر لێ نها بەرۆڤاژی بوویە و ئەمریکا پشتەڤانیا وان تیرۆرست و توندرەوان دکەت یێن هەتا دوهی مەترسی بوون بۆ هەموو جیهانێ، ئەو یەک ژی نیشا ددەت سیستەمێ جیهانی هاتیە گوهۆڕین و هەر ئالیەک ژ بۆ بەرژەوەندیێن خوە بەرهەڤە دوژمنێ دوهی بکەتە هەڤالێ ئەڤرۆکە، ڤێجا گرنگە ئەم وەکو کورد ژی دەست ب قووناغەکا نوو بکەین و گۆت: (د روودانێن ل رۆژئاڤایێ کوردستانێ دا جارەکا دی دەرکەفت کو تنێ کورد برایێن هەڤدو نە، چو تشتەک ب ناڤێ براتیا گەلان نینە، رۆلێ گرنگ یێ هەرێما کوردستانێ بۆ رۆژئاڤایێ کوردستانێ سەلماند هەکە کورد پێکڤە کار بکەن و ئێکگرتی بن دێ شێن گەلەک بهێز بن و وی دەمی هەر کەس نەچارە حسابەکا تایبەت بۆ کوردان بکەت).
چاڤدێرێن سیاسی ل رۆژئاڤایێ کوردستانێ ژی وەسا دبینن کو دڤێت هەموو هێزێن سیاسی یێن ل رۆژئاڤایێ کوردستانێ و پارچەیێن دی پێکڤە بەرەیەکێ ئاڤا بکەن، نها دەم هاتیە کو کۆنگرەیێ نەتەوەیی یێ کوردی ب سەرۆکاتیا سەرۆک بارزانی بهێتە ساز کرن و کورد هەموو پرسێن هەی د ناڤبەرا خوە دا چارەسەر بکەن، چونکی گوهۆڕینێن گەلەک مەزن د رێ دانە و هەکە کورد ئێکگرتی بن و پێکڤە کار بکەن دێ گەهنە مافێن خوە، ئەزموونا ڤێ دووماهیێ ژی سەلماند هەکە کورد ئێکگرتی بن جیهان ژی دێ هزرەکا مەزن بۆ کوردان کەت.

سەرۆك بارزانی د پەیامەكێدا، سەرەرای پێشوازیكرنێ ل رێككەفتنا د ناڤبەرا دیمەشقێ و هێزێن سووریا دیموكرات (هەسەدە) دا، پیرۆزباهی ل هەردو ئالییان كر و گوت» هەردەم د وێ باوەریێ داینە كو دیالۆگ و ئاشتی رێكا دروستە بۆ چارەسەركرنا كێشە و ناكۆكییان».
سەرۆك بارزانی، هیڤی خواست ئێدی دووماهی ب ئازار و مەینەتێن گەلێ كورد ل سووریێ بهێن و هەموو ئالی ب ئاشتی، ئازادی و ئارامی ل سووریێ شاد بن.

نێچیرڤان بارزانی، سەرۆكێ هەرێما كوردستانێ  د پەیامەكێدا پێشوازی ل رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) دا كر و دیاركر پشتەڤانیێ ل وێ رێككەفتنێ دكەین بۆ راگرتنا شەڕی و تێكهەلكرنا دەزگەهێن سەربازی و كارگێری و مسۆگەركرنا مافێن مەدەنی و پەروەردەیی یێن گەلێ كورد و زڤڕینا ئاوارەیان بۆ جهێن خوە. هەروەسا دیاركر ژی، ئەڤ رێككەفتنە پێنگاڤەكا گرنگ و دروستە ب ئاراستەیا چارەسەرییا ئاشتییانە. هەروەسا دووپاتكر ئەڤ رێككەفتنە دێ دەلیڤەیەكا ب هێز بۆ ئارامیێ، ئاشتییا جڤاكی و پێكڤەژیانا ئاشتییانە د ناڤبەرا پێكهاتەیاندا پەیداكەت و هیڤیدارین ببیتە ئەگەرێ دروستكرنا سووریایەكا ئێكگرتی، پاراستنا مافێن گەلێ كورد و هەموو پێكهاتەیان د دەستوورێ داهاتیدا.

مەسرور بارزانی، سەرۆكێ حوكمەتا هەرێما كوردستانێ راگەهاند، پێشوازیێ ل رێككەفتنا حوكمەتا سووریێ و هەسەدە دكەین و هیڤیدارین ئەڤ رێككەفتنە بهێتە بەرفرەهكرن و ببیتە جهێ زێدەتر ئارامیێ و پێشكەفتنێ بۆ هەموو سووریێ و ب تایبەتی بۆ دەڤەرێن كوردی و ببیتە دەستپێكەك بۆ دابینكرنا مافێن رەوا یێن هەموو پێكهاتەیێن سووریێ و رێكێ خوەش بكەت بۆ زڤڕینا ئاوارەیان بۆ دەڤەرێن خوە. هەروەسا پشتەڤانییا گەلێ كوردستانێ ل هەموو جیهانێ و ب تایبەتی رۆلێ سەرۆك بارزانی د دووماهئینانێ ب ئالۆزییان و پەنابرنێ بۆ رێكا دیالۆگێ بۆ چارەسەرییا بنەڕەتییا كێشەیان، جهێ شانازیێیە. مە رێز و سوپاسی هەیە بۆ رۆلێ سەرۆك و حوكمەت و نوونەر و كۆنگرێسێ ئەمریكا و وەلاتێن دۆست د دووماهیئینانێ ب ئالۆزییان و پشتەڤانیكرنا مافێن رەوا یێن هەموو پێكهاتەیێن سووریێ و ئارامیێ ل دەڤەرێ.