ئەندامەكێ مەكتەبا سیاسییا رێكخراوا بەدر و سەركردە ل هەڤپەیمانییا چارچۆڤەیێ هەماهەنگیێ یا شیعەیان، راگەهاند: محەمەد شیاع سوودانی، سەرۆك وەزیرێن ئیراقێ، دخوازیت بۆ هەلبژارتنێن داهاتی یێن جڤاتا نوونەرێن ئیراقێ جهێ موقتەدا سەدر ل (هەڤپەیمانییا سێقۆلی) دا بگریت و بۆ وێ مەبەستێ ژی فشارێ ل سەر پارتی دیموكراتی كوردستان دكەت، تاكو د گەلدا هەڤپەیمانیێ بكەت، هەروەسا دبێژیت: پرسا مووچەی سیاسییە.
ئەبو میساق ئەلمەساری، ئەندامێ مەكتەبا سیاسییا رێكخراوا بەدر و سەركردە ل هەڤپەیمانییا چارچۆڤەیێ هەماهەنگیێ یا شیعەیان د داخۆیانییەكا رۆژنامەڤانیدا گوت» محەمەد شیاع سوودانی كو هەڤپەیمانییا (ئاڤەدانكرن و گەشەپێدان) بۆ هەلبژارتنێن داهاتی یێن جڤاتا نوونەرێن ئیراقێ پێكئینایە، گەلەك گرنگە ل دەف وی پارتی دیموكراتی كوردستان و كوردان ب گشتی بۆ ئالیێ خوە رابكێشیت».
ل دووڤ گوتنا وی سەركردەیێ چارچۆڤەیێ هەماهەنگیێ، سوودانی بۆ راكێشانا پارتی جۆرە فشارەك دروستكریە و گوت» هزرەك هەیە هەڤپەیمانییا سێقۆلی بهێتە زیندیكرن و ل شوونا سەدرییان، سوودانی بیت و حوكمەتا زۆرینە بهێتە پێكئینان. ئەو پرسە د دانوستاندناندا دێ باس ل سەر هێتە كرن».
وی ئەندامێ مەكتەبا سیاسییا رێكخراوا بەدر دیاركر ژی» سوودانی دخوازیت هەڤشێوەیێ موقتەدا سەدر، بشێت زێدەتر ژ 70 كورسیێن جڤاتا نوونەرێن ئیراقێ ب دەستڤەبینیت».
د دەمەكیدا مووچەیێ خانەنشینان ل ئیراقێ بۆ مەها هەشت هاتیە بەلاڤكرن، هەتا نوكە فەرمانبەرێن هەرێما كوردستانێ مووچەیێ مەهێن شەش و حەفت وەرنەگرتییە.
ئەبو میساق ئەلمەساری دوپاتكر» پرسا مووچەیێ فەرمانبەرێن هەرێما كوردستانێ بابەتەكێ سیاسییە زێدەتر كو تەكنیكی بیت، ئالیێ سیاسی، لهەڤهاتنا سیاسی و پرسا هەلبژارتنان ژی هاتییە د ناڤ بابەتیدا».
سەبارەت هەڤبەندیێن د ناڤبەرا هەولێرێ و بەغدایێدا، وی ئەندامێ مەكتەبا سیاسییا رێكخراوا بەدر ئاماژە ب وێ چەندێ كر» هەڤبەندی ل سەردەمێ كابینەیا سوودانی هەڤبەركرن ب كابینەیێن پێشتر د نموونەیێ بوون، بەلێ كێشەیا سەرەكی د ناڤبەرا واندا تێنەگەهشتنا ل چەمكێ ئەرك و ماف دا».
ئەلمەساری گوت ژی» هەكە قانوونا پەترۆل و غازێ د ڤێ خولا جڤاتا نوونەراندنا هاتبا پەسەندكرن، دا بیتە بنەمایەكێ ب هێز بۆ هەڤبەندیێن داهاتی».

سەرۆك مەسعود بارزانی دوهی ل سەلاحەدین پێشوازی ل گویندەلن گرین، قونسلا نوو یا ئەمریكا و ستیڤ بیتنەر، قونسلێ‌ بەرێ‌ یێ‌ ئەمریكا ل هەولێرێ‌ كر.
د دیدارەكێ‌ دا، سەرۆك بارزانی هیڤیا سەركەفتنێ‌ بۆ هەردو قونسلێن ئەمریكا د ئەركێن وان یێن نوو دا خواست و سوپاس و پێزانین بۆ قونسلێ‌ بەرێ‌ یێ‌ ئەمریكا هەبوون كو د دەمێ‌ كاركرنا خوە دا ل هەرێما كوردستانێ‌ رۆلەكێ‌ بەرچاڤ د پێشڤەبرنا پەیوەندیان دا د ناڤبەر ئەمریكا و هەرێما كوردستانێ‌ دا و كاركرنا هەڤپشك و چاكسازیێن وەزارەتا پێشمەرگەی دا هەبوو.
سەرۆك بارزانی ئاماژە ب هەلوەست و پشتەڤانیا ئەمریكا پشتی سەرهلدانا سالا 1991 و ژناڤچوونا رژێما بەرێ‌ یا ئیراقێ‌ و شەڕێ‌ دژی تیرۆرستێن داعشێ‌ كر و ئەو هەلوەست و پشتەڤانیێن ئەمریكا بلند هەلسەنگاندن.
هەر د وێ‌ دیدارێ‌ دا، قونسلێ‌ بەرێ‌ یێ‌ ئەمریكا ل هەولێرێ‌ سوپاس و پێزانینێن خوە دەربڕین بۆ وی ماوەیێ‌ ل هەرێما كوردستانێ‌ كار كری و ئاماژە ب پشتەڤانیا سەرۆك بارزانی و دامودەزگەهێن حكومەتێ‌ دا و دوپاتی ل پەیوەندیێن موكوم د ناڤبەرا ئەمریكا و هەرێما كوردستانێ‌ دا كر و رۆناهی ئێخستە سەر رەوشا نوكە و هەلبژارتنێن بهێن یێن پەرلەمانێ‌ ئیراقێ‌ و پێكئینانا كابینەیا نوو یا حكومەتا هەرێما كوردستانێ‌ و رۆلێ‌ سەرۆك بارزانی د ئاسایكرنا رەوشێن ئالۆز دا ل سەر ئاستێ‌ ئیراقێ‌ و هەرێما كوردستانێ‌ بلند هەلسەنگاند.
هەروەسا قونسلا نوو یا ئەمریكا باسێ‌ رۆلێ‌ سەرۆك بارزانی كر و ب رۆلەكێ‌ ئەفسانەیی وەسفكر و دوپاتی ل پەیوەندیێن ب هێز و بەردەوام و دولایەنە د ناڤبەرا ئەمریكا و هەرێما كوردستانێ‌ دا كر.
دووماهی گوهۆڕین و ئاستەنگێن دەڤەرێ‌ و پرسا پرۆسەیا ئاشتیێ‌ ل توركیا و رەوشا سووریا تەوەرەكێ‌ دی یێ‌ دیدارێ‌ بوون.

جێگرێ سەرۆكێ جڤاتا نوونەرێن ئیراقێ ل دۆر داخۆیانییەكا سەرۆكێ ژ كارلادایێ جڤاتا نوونەرێن ئیراقێ، كو نەجمەدین كەرێم ژ پۆستێ پارێزگەرێ كەركووكێ دوور ئێخستییە، دبێژیت: دەمێ نەجمەدین كەریم پارێزگەرێ كەركووكێ، تو ئاوارە بووی و ل دهۆكێ دژیای.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ بەرسڤا محەمەد حەلبووسی، سەرۆكێ ژ كارلادایێ جڤاتا نوونەرێن ئیراقێ دا دەمێ ل دەستپێكا ڤێ حەفتیێ سەرەدانا كەركووكێ كری و و راگەهاندی كو وی نەحمەدین كەریم ژ پۆستێ پارێزگەرێ كەركووكێ لادا.
شاخەوان عەبدوللای دیاركر، هەرچەندە نەجمەدین كەریم، ئەندامێ مەكتەبا سیاسییا ئێكەتی نیشتمانی كوردستان بوو، بەلێ ب پێدڤی زانی وەكو كوردەك بەرسڤا وێ بانگەشەیا حەلبووسی بدەت.
جێگرێ سەرۆكێ جڤاتا نوونەرێن ئیراقێ د بەرسڤا حەلبووسیدا دبێژیت» جەنابێ تە سەرۆكێ جڤاتا نوونەران بووی و سەرۆكێ حزبەكێ ژی بووی، بەلێ تو نەشیای بەرگریێ ژ خوە بگەی و تو ژ پۆستێ خوە هاتیە لادان، چاوان دێ شێی بێژی من نەجمەدین كەریم ژ پۆستێ وی یێ لادای؟، د دەمەكیدا ئەو پارێزگەرێ كەركووكێ بوو، تو تنێ پەرلەمانتارەك بووی و ئاوارە بووی و ل دهۆكێ د ژیای !».
شاخەوان عەبدوللای ئاماژە ب وێ چەندێ كر، د داهاتیدا دێ بەرسڤەكا دی بۆ ئاخڤتنێن سەرۆكێ ژكارلادایێ جڤاتا نوونەران هەبیت و هیڤی ژی خواست، ل كەركووكێ كو ب خوینا پێشمەرگەی و هێزێن دی یا پاراستییە و هەڤشێوەیێ ئەنبارێ كو جهێ حەلبووسییە نەكەڤیتە بن دەستێ داعشێ.

دیدار/ دلۆڤان ئاكرەیی

هاریكارێ بەرپرسێ مەكتەبا رێكخستنا پارتی دیموكراتی كوردستان ل كەركووكێ و گەرمیان ل دۆر سەرەدانێن وان بۆ ئالیێن سیاسی ل وان دەڤەران راگەهاند: ئارمانجا سەرەدانێن پارتی ئەوە كورد ئێكدەنگ و ئێك هەلوەست بن.
دیاری حسێن، هاریكارێ بەرپرسێ مەكتەبا رێكخستنا پارتی دیموكراتی كوردستان ل كەركووكێ و گەرمیان بۆ رۆژنامەیا (ئەڤرۆ) گوت» پشتی ڤەگەریانا بارەگەهێن پارتی دیموكراتی كوردستان بۆ كەركووكێ ، ئالیێن سیاسی سەرەدانا پارتی كریە و مە ژی سەرەدانا وان كر و ئارمانجا مە ژی ژبۆ ئێكدەنگیا كوردانە ل كەركووكێ ب تایبەتی پشتی هەلبژارتنان ، چونكی نوكە ئەم نەشێین ب ئێك لیست پشكداریێ بكەین ژ بەر كو دەمێ وێ ب دووماهی هاتیە و نێزیكە كو هەژمار ژی بۆ لیستان هاتینە دیاركرن ، لێ مە دڤێت كورد ئێكدەنگ و ئێكهەلوەست بن نوكە و پشتی هەلبژارتنان ژی، دا كو بشێین مافێن كوردان بپارێزین و ئەوێ مای ژی بدەستڤەبینین ژ دەستهەلات و حوكمەتا خۆجهی و ئەوێن ل سالێن بۆری ئاریشە بۆ هاتینە دروستكرن بهێنە چارەسەركرن».
دیاری حوسێن گوت ژی» هەموو ئالییان ب راستی دخوازن پێكڤەژیان ل كەركووكێ هەبیت و جوداهی د ناڤبەرا پێكهاتەیاندا نەهێتە كرن ژ بەر كو ئەم هندەك رەفتارێن نەگونجای دبینین ، ئەڤە بۆ وێ چەندێ بوو كو ئێكدەنگی و پێكڤەژیان و پێكڤەكاركرن د پاشەرۆژێدا بەردەوام بیت و وان ژی دەستپێشخەرییا مە ب باش زانی وبۆچوونێن وان ژی د باش بوون و ئەم هیڤیدارین ئەو ئاریشەیێن هەین ژی بهێنە چارەسەركرن «.
هاریكارێ بەرپرسێ مەكتەبا رێكخستنا كەركووك – گەرمیان یا پارتی دیاركر ژی» نوكە ل جڤاتا پارێزگەها كەركووكێ ئەم بەردەوامین ل سەر بایكۆتكرنێ و شەش ئەندامێن دی ژی دگەل مە بایكۆت كریە ، نوكە نیڤا جڤاتێ بایكۆت كریە و نیڤا دی دەوامێ دكەن و هەتا داخوازی و مەرجێن مە نەهێنە بجهئینان ئەم پشكداریێ د كۆمبوونێن جڤاتا پارێزگەها كەركووكێدا ناكەین و ئەو ژی نەشێن كۆمبوونان بێی مە ئەنجام بدەن ، چونكی كۆمەكا ئاریشەیان د ئیدارە و دەستهەلاتێ و دابەشكرنا پۆستاندا هەنە ، لەوما پێدڤییە ئەو ئاریشە بهێنە چارەسەركرن و وی دەمی ئەم دێ پشكدار بین ، ئەگەر نە ، دێ هەتا هەلبژارتنێن بهێت یێن جڤاتا نوونەرێن ئیراقێ بەردەوام بین».

دیپلۆماتكارەكێ پێشتر یێ ئەمریكی راگەهاند: سەرەرای گۆرزێن توند دژێ بەرژەوەندیێن ئیرانی ژ پشتی سالا 2023، هێشتا ئیران یا رژدە ل سەر ب هێزكرن و پێشڤەبرنێ ب میلیشیا و بریكارێن خوە ل رۆژهەلاتا ناڤین، ب دیاركری ژی كاری ل سەر ب دەزگەهكرنا حەشدا شەعبی ب رێكا قانوونەكا پەرلەمانی دكەت، لەوما دڤێت ئەمریكا بەرسڤەكا هەژی ڤێ سەرپێچیێ بدەت.
دەیڤێد شنیكەر، شرۆڤەكار و هاریكارێ بەرێ یێ وەزیرێ دەرڤەیێ ئەمریكا بۆ رۆژهەلاتا نێزیك، بابەتەك ل پەیمانگەها واشنتۆن بەلاڤكر و تێدا شنیكەر واشنتۆن هاندا د ئاستێ دەربازكرنا پڕۆژە قانوونا حەشدا شەعبیدا بێدەنگ نەبیت.
وی دیپلۆماتكارێ بەرێ یێ ئەمریكی گوت» ستیڤن فاگن، كاربرێكەرێ بالیۆزخانەیا ئەمریكا ل ئیراقێ، محەمەد شیاع سودانی ژ (دەستێوەردانا نێڤدەولەتییا مەزن) ئاگەهدار كریە هەكە ئەو پڕۆژە قانوونە بهێتە دەربازكرن».
هەڤدەم شنیكەری راگەهاند» هەكە واشنتۆنێ پێزانینێن هەوالگیری ل سەر هێرشێن درۆنی یێن ڤێ دووماهیێ ل سەر هەرێما كوردستانێ هەبن، پێدڤییە ئاشكرا بكەت، چونكە یا رۆهنە حەشدا شەعبی ل پشت وان هێرشایە».
هەروەسا شنیكەری گوت» حەشدا شەعبی 238 هزار چەكدار یێن هەین و بودجەیا وێ یا سالانە سێ ملیار و 600 ملیۆن دۆلارن، زێدەتر ژ 70 دەستەیایە، ژوان كەتائیب نوجەبا و عەسائیب ئەهلولحەق و كەتائب حزبوللا كو هەموو ژ ئالیێ ئەمریكاڤە ب تیرۆرست هاتینە نیاسین. هەكە حوكمەتا ئیراقێ پارەیێ وان گرۆپێن تیرۆرستی دابین بكەت، بەلێ دبنڤە هەڤسۆزێن ئیرانێ نە و خوە بۆ دەركرنا هێزێن ئەمریكی ژ ئیراقێ تەرخان كرییە».
ل 16/7/2025، جڤاتا نوونەرێن ئیراقێ دووماهی خواندن بۆ پڕۆژە قانوونا حەشدا شەعبی كر، ئانكو نوكە یێ بەرهەڤە بۆ دەنگدانێ، هەكە ببیتە قانوون، حەشدا شەعبی دێ بیتە بالەكێ فەرمیێ چەكداریێ ئیراقێ و فەرماندارێن وێ دێ پلە و پۆستێن تایبەت هەبن، سەرۆكێ وێ ژی دێ پلەیا وەزیر پێ هێتە دان و كەلیژەكا سەربازییا تایبەت بۆ ئەندامێن حەشدێ دێ هێتە ڤەكرن.
بالیۆزخانەیا ئەمریكا بزاڤێن پەرلەمانی یێن ب ڤی ئاراستەی پرۆتەستۆكرن. سەبارەت ڤێ چەندێ شنیكەری دوپاتكر» سەرەرای هەبوونا بڕگەیا قانوونی، هیچ پشتڕاستبوونەك نینە كو حەشدا شەعبی بچیتە بن دەستهەلاتا دەولەتێ، بەلكو دێ بیتە ئامرازەكا كاریگەر ب دەستێ ئیرانێ بۆ گەفكرنێ ل بەرژەوەندیێن ئەمریكا».
هەروەسا دیاركر» ب زەقی پەیكەرێ تیرۆرستی و شیعەیان، مۆركێ مەزهەبی یێ پێڤە دیارە و ئەو ب هیچ جۆرەكی شەرم ژ ملكەچبوونا خوە بۆ ئیرانێ ناكەن، بگرە ل شوونا وێ چەندێ بێژنە ئەندامێن خوە سەرباز، ناڤێ موجاهدین دانایە سەر».
هەڤدەم شنیكەری راگەهاند» ژبلی بەرژەوەندیێن ئەمریكا، گرۆپێن ب سەر حەشدا شەعبی ڤە رۆژنامەڤانان دكوژن، گەفان ل پێكهاتەیان دكەن و هەروەسا هێرشێن درۆنی دكەنە سەر هەرێما كوردستانێ».
لەوما شنیكەر داخواز ژ واشنتۆنێ دكەت كو رێكێ نەدەت محەمەد شیاع سودانی، سەرۆك وەزیرێن ئیراقێ بهێتە كۆچكا سپی، چونكە چەند كەسەك ل دەوروبەرێن وی نە كو ئەمریكییا دكۆژن و سودانی یێ بەرهەڤە نینە پشتا خوە بدەتە وان.
بڕیارە بەری هەلبژارتنێن جڤاتا نوونەرێن ئیراقێ ل 11/11/2025، محەمەد شیاع سودانی، سەرۆك وەزیرێن ئیراقێ سەرەدانا ئەمریكا بكەت، مەبەست ژی ژ سەرەدانا خوە مسۆگەركرنا پشتەڤانییا واشنتۆنێیە بۆ دوبارە وەرگرتنا وی بۆ پۆستێ سەرۆك وەزیران.
د حالەتا سەپاندنا دەستهەلاتا ئیرانێ یا تمام ل سەر ئیراقێ، ب دیتنا دیپلۆماتكارێ ئەمریكی دڤێت واشنتۆن ئیراقێ وەك دەولەتەكا پشتەڤان بۆ تیرۆرێ ب هەژمێریت.

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: دڤیایا هەتا نوكە ب كێمی مووچەیێ فەرمانبەرێن هەرێما كوردستانێ یێ مەها خزیرانێ هاتبا هنارتن، بەلێ بەغدایێ نەهنارتییە، لەوما دڤێت دڤێ حەفتیێدا بڕیار ل چارەنڤیسێ مووچەی بهێتە دان».
ئامانج هەركی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گوت» دڤیابا نوكە حوكمەتا فیدرالی مووچەیێ مەها شەش هنارتبا، بەلێ هێشتا د ئینانا بەهانەیاندا د بەردەوامن، د دەمەكیدا حوكمەتا هەرێما كوردستانێ بەرهەڤییا هنارتنا رێژەیا داخوازكری داهاتێ نە پەترۆلی و هنارتنا پەترۆلێ كوردستانێ دەربڕییە».
رۆهنكر ژی» پێدڤی بوو بەغدا وەكو سەلماندنا نیازپاقژیێ مووچەیێ مەها شەش هنارتبا».
دوپاتكر ژی» دانوستاندن د بەردەوامن و دڤێت د ڤێ حەفتیێدا بابەتێ هنارتنا مووچەی بهێتە ئێكلاكرن و پێشبینیێ دكەم كۆمبوونا جڤاتا وەزیران بهێتە پێشئێخستن، چونكە چلەیی یا نێزیك بووی، دڤێت زووتر كۆمبوونا جڤاتا وەزیرێن ئیراقێ بهێتە ئەنجامدان».
دهێتە زانین حوكمەتا هەرێما كوردستانێ ل دووماهی كۆمبوونا جڤاتا وەزیرێن هەرێمێ، بەرهەڤی بۆ رادەستكرنا وێ رێژەیا پەترۆلا نوكە ل هەرێمێ دهێتە بەرهەمئینان بۆ كۆمپانییا (سۆمۆ) دیاركر، بەلێ هەتا نوكە ژ بەر وێ چەندێ بەردەوام مەرج و داخوازیێن بەغدایێ د زێدەبوونێدانە، پڕۆژەیێ هنارتنا پەترۆلێ دەست پێ نەكریە.

ناڤەندا چاڤدێریا مافێن مرۆڤی یا سووریێ دیار دکەت، پشتی ژناڤچوونا رژێما بەشاری و لاوازبوونا گرۆپێن چەکدار یێن سەر ب تورکیا ل عەفرینێ نها رێژەیەکا زێدە ژ خەلکێ عەفرینێ ڤەگەڕاینە دەڤەرێن خوە و رێژەیا کوردان ژی ل عەفرینێ زێدەتر لێ هاتیە.

ناڤەندا چاڤدێریا مافێن مرۆڤی یا عەفرینێ دیار دکەت، پشتی عەفرین ژ ئالیێ گرۆپێن سەر ب تورکیا ڤە هاتە داگیرکرن، رێژەیەکا گەلەک زێدە ژ کوردان ژ ترسا گرۆپێن چەکدار نەچار مان ژ عەفرینێ دەرکەڤن و ب جهێ وان عەرەب هاتنە بجهکرن، لێ پشتی ژناڤچوونا رژێما بەشاری و باشبوونا رەوشا دەڤەرێن دی یێن سووریێ، عەرەبێن ل عەفرینێ ژی ئەو باژێر بجه هێلان و بەرێ خوە دانە دەڤەرێن خوە و کوردێن عەفرینێ ژی ڤەگەرینە ڤە سەر جه و مالێن خوە و نها رەوشا عەفرینێ و دەوروبەرێن وێ باشتر لێ هاتیە و رۆژانە ژی وەلاتیێن کورد ڤەدگەرنە ڤە باژێرێ عەفرینێ.
هەمان ناڤەندێ ئەو یەک ژی دیار کریە، کاریگەریا گرۆپێن چەکدار یێن سەر ب تورکیا ل عەفرینێ وەکو بەرێ نها نەمایە، کاریگەریا وان لاواز بوویە و هژمارەک زێدە ژ گرۆپێن چەکدار ژی ژ عەفرینێ چووینە و بەرێ خوە داینە شامێ و دەڤەرێن دی، ئەو یەک ژی د بەرژەوەندیا خەلکێ عەفرینێ دایە و نها رێژەیەکا زێدە ژ کوردان ڤەگەرینە ڤە عەفرینێ، ل گۆر دووماهی زانیاری هەتا نها پتر ژ ٢٠ هزار خێزانێن عەفرینێ ڤەگەرینە ڤە مالێن خوە و رۆژانە ژی خەلک ڤەدگەرنە عەفرینێ.
ئەو یەک د دەمەکێ دایە کو بەری نها ئەنجوومەنێ نشتیمانی یێ کوردی ل سووریێ ژی داخواز ژ شامێ کربوو هەموو گرۆپێن چەکدار ژ عەفرینێ دەرکەڤن دا خەلک بشێن ڤەگەرنە ڤە عەفرینێ و دڤێت عەفرینی ژ ئالیێ خەلکێ وی باژێرێ ڤە بهێتە برێڤەبرن، چونکی ژ بەر هەبوونا گرۆپێن چەکدار هەتا نها خەلک نەشێن ڤەگەرنە ڤە باژێرێن خوە و گرۆپێن چەکدار د دەمێن بۆری دا گەلەک زۆرداری ل وەلاتیێن کورد کرینە و دڤێت دەستهەلاتا نها یا شامێ دووماهیێ ب زۆرداریا گرۆپێن چەکدار ل عەفرینێ بینیت.
چاڤدێرێن سیاسی ژی دیار دکەن، پشتی ژناڤچوونا رژێما بەشاری نها زەمینەکا گونجای هاتیە پێش و گرنگە هەموو هێز و ئالیێن سیاسی یێن رۆژئاڤایێ کوردستانێ ژی کار بکەن دا وەلاتیێن کورد یێن کو بەری نها ژ عەفرینێ چوویی جارەکا دی ڤەگەرنە ڤە عەفرینێ، چونکی عەفرین باژێرەکێ گرنگ یێ کوردانە ل رۆژئاڤایێ کوردستانێ و سووریێ و دڤێت کورد رێ نەدەن رێژەیا عەرەبان ل عەفرینێ بهێتە زێدەکرن، ژ بەر ڤێ یەکێ ژی ڤەگەریانا وەلاتیێن کورد گرنگە و دڤێت کورد ل گەل دەستهەلاتا نوو یا شامێ ژی رێککەفتنەکێ بکەن و رێ نەدەن چو گرۆپێن چەکدار ل عەفرینێ بمینن.

سەرۆك بارزانی ل سالڤەگەڕا 49 یا دامەزراندنا حزبا سۆسیال دیموكراتا كوردستانی پەیامەكا پیرۆزباهیێ ئاراستەی سكرتێرێ گشتی و ئەنداێن سەركردایەتییا وێ حزبێ كر.
بارەگەهێ بارزانی د بەیاننامەیەكێدا بەلاڤكر» سەرۆك بارزانی، ب هەلكەفتا سالڤەگەڕا 49 یا دامەزراندنا حزبا سۆشیال دیموكراتا كوردستانی گەرمترین پیرۆزباهی ئاراستەی محەمەد حاجی مەحموود، سكرتێرێ گشتی و ئەندامێن سەركردایەتیێ و هەموو ئەندام و لایەنگرێن حزبا سۆشیال دیموكراتا كوردستانی كر».
بارەگەهێ بارزانی ئاماژەكر كو سەرۆك بارزانی د پەیاما پیرۆزباهیێدا دیاركر ژی گوت» مە رێز بۆ خەبات و قوربانیدانا محەمەد حاجی مەحموود و كادر و ئەندام و لایەنگرێن حزبا سۆشیال دیموكراتا كوردستانی ل وەستگەهـ و قۆناغێن خەباتا گەلێ مە هەیە و هیڤییا سەركەفتنێ بۆ دخوازین».

ل سالڤەگەڕا 92 یا رۆژا شەهیدێ ئاشووری، سەرۆكێ هەرێما كوردستانێ پەیامەك بەلاڤكر و راگەهاند: كوردستان بۆ هەردەم دێ ب لاندك و وەلاتێ هەموو پێكهاتەیان مینیت.
د پەیامەكێدا ل تۆرا جڤاكییا ئێكس، نێچیرڤان بارزانی، سەرۆكێ هەرێما كوردستانێ گوت» سلاڤان بۆ قوربانیێن بێتاوان یێن كۆمكوژییا سێمێلێ دهنێرین كو ل سالا 1933 ل گەل ئاكنجیێن زێدەتر ژ 60 گوندێن پارێزگەهێن نەینەوا و دهۆكێ، بوونە قوربانیێن دەستێ دەستهلەاتا شاهانەیا وی دەمی ل ئیراقێ.
نێچیرڤان بارزانی دوپاتی ل سەر پاراستنا كەلتوورێ پێكڤەژیانێ ل هەرێما كوردستانێ كر و گوت» داكۆكیێ ل پاراستن و پێشڤەبرنا كەلتوورێ فرەهیێ و پێكڤەژیانێ و هەڤدو قەبوولكرنێ دكەین و هەموو پێكهاتەیان پشتڕاست دكەین كو كوردستانێ بۆ هەردەم دێ ب لاندك و وەلاتێ هەموویان مینیت».
رۆژا 7 ئاب ژ ئالیێ ئاشووریێن جیهانێ وەكو رۆژا شەهیدێ ئاشووری هاتیە نیاسین، كو سالانە ئاشووریێن هەرێما كوردستانێ سالڤەگەڕا بیرئینانا قوربانیێن كۆمكوژییا سێمێلێ و گوندێن دەوروبەرێن وێ ساخ دكەن.

ئەندامەكێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند: حوكمەتا هەرێما كوردستانێ د چارچۆڤەیێ رێزگرتنێ ل پەیڕەوێن مەزهەبێ شیعی، هەموو كارئاسانییەك بۆ سەرەدانكەرێن ئیرانی و ئازەربایجانی كرینە.
هشیار زێباری، ئەندامێ دەستەیا كارگێرییا مەكتەبا سیاسییا پارتی دیموكراتی كوردستان، ل پێگەهێ خوە ل تۆرا جڤاكییا ئێكس بەلاڤكر» رێزێ ل بیروباوەرێن مرۆڤی ب گشتی و پەیرەوێن مەزهەبێ شیعی ب تایبەتی و رێوڕەسمێن وان ل وەرزێ سەرەدانكرنا جهێن پیرۆز دگرین».
هشیار زێباری دوپاتی ل وێ چەندێ كر» حوكمەتا هەرێما كوردستانێ د چارچۆڤەیێ ڤێ رێزلێگرتنێ ل بیروباوەرێن مرۆڤایەتی و پەیڕەوێن شیعە، هەموو ئاسانكاری و هاریكاری پێشكێشی سەرەدانكەرێن ئیرانی و ئازەربایجانی بۆ پشكداریكرنا وان د چلەییا ئیمام حوسێنی و ل رێوڕەسمێن كەربەلا و نەجەف دا».