فراكسیۆنا پارتی دیموكراتی كوردستان ل جڤاتا نوونەرێن ئیراقێ، زێدەكرنا بڕگەیەكێ بۆ بەرنامەیێ كارێ كۆمبوونا ڕۆژا سێشەمبییا بۆری ب بنپێكرنا ئاشكرا یا دەستووری و مادەیێن پەیڕەوێ ناڤخوە هەژمارت. هەروەسا فراكسیۆنا پارتی راگەهاند ژی كو ئەو پێنگاڤە دژی پرەنسیپێ كۆدەنگییەكا سیاسی و ب تمامێ ڕەت دكەین.
فراكسیۆنا پارتی دیموكراتی كوردستان ل جڤاتا نوونەرێن ئیراقێ د بەیاننامەیەكێدا نەڕازیبوونا خوە یا توند بەرانبەر ب شێوەیی بڕێڤەچوونا كۆمبوونا ڕۆژا سێشەمبییا بۆری یا جڤاتا نوونەرێن ئیراقێ دیاركر و دوپاتكر كو شێوازێ زێدەكرنا بڕگەیان بۆ بەرنامەیێ كارێ جڤاتێ ب ڕۆهنی بەرۆڤاژی بڕگەیێن مادەیێ (37/دو) ژ پەیڕەوێ ناڤخوەیێ جڤاتا نوونەرایە.
فراكسیۆنا پارتی ئەو پێنگاڤە ب بنپێكرنەكا ئاشكرا یا دەستووری و لێدان ل كۆدەنگییا سیاسی د ناڤبەرا پێكهاتەیاندا هەژمارت.
د پشكەكا دی یا بەیاننامەیا فراكسیۆنا پارتی دا هاتیە» ڕەتكرنا ئێكجارییا خوە بۆ وێ بنپێكرنێ ڕادگەهینین كو بوویە ئەگەرێ تێكدانا ڕێككەفتنێن سیاسی، ئەڤە ژی دژی پرەنسیپێ كۆدەنگیێ و هەڤسەنگیێیە د پرسا ئێكلاكرن و دانانا پۆستێن بلند یێن دەولەتێدا».
فراكسیۆنا پارتی دیموكراتی كوردستان ل جڤاتا نوونەرێن ئیراقێ، ڕەخنەیا توند ل شێوازێ بڕێڤەبرنا كۆمبوونا جڤاتا نوونەران ژ ئالیێ سەرۆكێ جڤاتا نوونەران ڤە گرت و هۆشداریدا ژ دوبارەبوونا وێ شێوازێ كاركرنێ.
هەڤدەم فراكسیۆنا پارتی دوپاتكر» ئاڤەدانكرنا دەولەتێ ب ڕێكا قۆرخكرنا بڕیاران و پشت گوه هاڤێتنا مافێن پێكهاتەیان، ب دەستڤەناهێت».

جێگرێ سەرۆكێ جڤاتا نوونەرێن ئیراقێ ب توندی دژی شێوازێ دەنگدانێ ل سەر پۆستێ سوپاسالارێ لەشكرێ ئیراقێ ڕاوەسا و ب بنپێكرنەكا دیار یا دەستووری هەژمارت و راگەهاند كو سەرۆكێ جڤاتا نوونەرێن ئیراقێ بێی رێككەفتنا پێشوەخت و ب لەزەكا گومانلێكری ئەو پۆستە ئێكلاكر كوئەو پۆستە دهێتە هەژمارتن بەهرا كوردان.
فەرهاد ئەمین ئەترووشی، جێگرێ سەرۆكێ جڤاتا نوونەرێن ئیراقێ د بەیاننامەیەكێدا ب توندێ دژی شێوازێ بڕێڤەچوونا ڕوونشتنا ڕۆژا سێشەمبی یا جڤاتا نوونەرێن ئیراقێ ڕاوەستا و راگەهاند» دەربازكرنا پۆستێ سوپاسالاری ب وی شێوەی بنپێكرنەكا دیارە و دێ پەنایێ بۆ دادگەهێ بەین».
د بەیاننامەیا جێگرێ سەرۆكێ جڤاتا نوونەرێن ئیراقێدا هاتیە» سەرەرای ڕەوشا دژوار یا ئیراق و دەڤەر تێدا دەرباز دبیت، سەرۆكێ جڤاتا نوونەرێن ئیراقێ پێنگاڤەك هاڤێت كو دێ ڕەوشێ زێدەتر ئالۆزكەت، ئەوژی ب لەزكرنەكا گومانلێكری د دەنگدانێ ل سەر هندەك پلەیێن تایبەت».
جێگرێ سەرۆكێ جڤاتا نوونەرێن ئیراقێ د بەیاننامەیا خوە دا ئاشكرا كر» بەری ڕوونشتنا ڕۆژا سێشەمبی 17/2/2026، سەرۆكاتییا جڤاتا نوونەران كۆمبوو و رێككەفتن هاتە كرن ل سەر وێ چەندێ بەرنامەیێ كاری تنێ تایبەت بیت ب ڕاستڤەكرنا پەیڕەوێ ناڤخوە و ئێكگرتنا لژنەیێن جڤاتا نوونەران، بەلێ مخابن بێی رێككەفتن بڕگەیەكا دی هاتە زێدەكرن و ب شێوەیەكێ ب لەز دەنگ ل سەر پۆستێن هەستیار هاتە دان، ژ وان ژی پۆستێ سوپاسالارێ لەشكرێ ئیراقێ، كو ئەڤێ چەندێ ژی گۆمانەكا مەزن ل دەف مە و پێكهاتەیان دروستكر».
فەرهاد ئەترووشی ئەڤ پێنگاڤا سەرۆكێ جڤاتا نوونەرێن ئیراقێ ب « بنپێكرنا ئاشكرا یا مادەیا 9 ژ دەستوورێ ئیراقێ و مادەیا 37 ژ پەیڕەوێ ناڤخوەیێ جڤاتا نوونەران» هەژمارت و ب لێدانا پرەنسیپێ هەڤپشكییا نیشتمانی و هەڤسەنگیێ و لهەڤكرنا سیاسی دزانیت كو ب هیچ شێوەیەكی یا قەبوولكری نینە.
جێگرێ سەرۆكێ جڤاتا نوونەرێن ئیراقێ هۆشداریدا و گوت» ژ ئالیێ مەڤە ئەڤ دەنگدانە هیچ شوونوارەكێ قانوونی و ئیداری لێ پەیدا نابیت و دێ هەموو پێرابوونێن قانوونی و دەستووری وەرگرین، ژ وان ژی پەنابرن بۆ دادگەهێ».
ئەڤە د وەختەكیدایە، عەبدولئەمیر یارەللا پێشتر ب وەكالەت پۆستێ سوپاسالارێ لەشكرێ ئیراقێ وەرگرتبوو و ل ڕۆژا سێشەمبییا بۆری ب سوپاسالارێ لەشكرێ ئیراقێ هاتە هەلبژارتن، د وەختەكیدا ئەو پۆستە بەهرا كوردایە».
هەروەسا شاخەوان عەبدوللا، سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ د كۆنگرەیەكێ ڕۆژنامەڤانیدا راگەهاند» وەرگرتنا پۆستێ سوپاسالارێ لەشكرێ ئیراقێ ژ كوردان دەستپێكەكا گەلەك خرابە و ئەوا سەرۆكێ جڤاتا نوونەرێن ئیراقێ ئەنجامدای بنپێكرنا دەستوورییە».

بەرپرسەکێ رۆژئاڤایێ کوردستانێ دیار کر، ب چاڤدێریا ئەمریکا و ئێکەتیا ئۆرۆپا دێ دستوورەک نوو بۆ سووریێ هێتە ئامادەکرن و کورد دێ د ئامادەکرنا دستوورێ نوو دا پشکدار بن و د دەمەکێ نێزیک دا گوهۆڕینێن باش دێ ل سووریێ روو دەن.

ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ دیار کر، ئەمریکا و وەلاتێن ئێکەتیا ئۆرۆپا پشتەڤانیێ ل مافێن گەلێ کورد ل سووریێ دکەن و نها کار بۆ سیستەمەک نوو ل سووریێ دهێتە کرن و گۆت: (راستە د رێککەفتنا نوو یا د ناڤبەرا شامێ و هەسەدێ دا بەحسێ رێڤەبەریا خوەسەر نەهاتیە کرن، لێ هەموو سازیێن رێڤەبەریا خوەسەر دێ مینن و دێ خزمەتا وەلاتیان کەن، هێزێن سەربازی دێ بنە پشکەک ژ وەزارەتا بەرگریێ یا سووریێ و هێزێن دی یێن ئێمناهیێ ژی بێگومان دێ بنە پشکەک ژ وەزارەتا ناڤخوە یا سووریێ و دێ وەسا ژی دەڤەرێن کوردی هێنە پاراستن).
ناڤهاتیێ ئەو یەک ژی دیار کر، نها هەبوونا کوردان ب فەرمی ل سووریێ هاتیە قەبوول کرن و ئەو یەک ژی بێگومان پێگاڤەک گەلەک باشە، وەکو کوردێن سووریێ تشتێ نها وان بدەستڤەئیناینە بێگومان د ئاستێ داخوازیێن خەلکی دا نینن، لێ رێککەفتنا ڤێ دووماهیێ هاتیە کرن تشتەک باشە و دێ کار بۆ دەستکەفتیێن زێدەتر ژی ل سووریێ بۆ کوردان هێتە کرن و گۆت: (نها پشتەڤانیا ئەمریکا و وەلاتێن ئێکەتیا ئۆرۆپا بۆ رۆژئاڤایێ کوردستانێ گەلەک گرنگە، د کۆمبوونێن ل کۆنفرانسێ میونشنێ دا ئەو یەک دیار بوو کو پشتەڤانیەکا باش بۆ مافێن کوردان هەیە، بێگومان دانوستاندنێن ل گەل شامێ ژی دێ بەردەوام بن).
ئیلهام ئەحمەد ئەو یەک ژی دیار کر، وەکو کوردێن سووریێ وان دڤێت دەڤەرێن خوە برێڤە ببەن، ئانکو کوردان دڤێت خوە برێڤە ببەن، ژ ئالیێ شامێ ڤە هەتا نها ژی رێڤەبەریا خوەسەر یان ژی سیستەمەک فیدرالی نەهاتیە قەبوول کرن، لێ کار دهێتە کرن و پێشڤەچوونێن باش ژی هەنە و گۆت: (کورد دێ وەکو پشکەک ژ دەولەتا سووریێ مینن، لێ دڤێت سیستەمێ رێڤەبەریێ ل سووریێ بهێتە گوهۆڕین، مە بەری نها ژی گەلەک جاران دیار کریە کو دڤێت سیستەمێ سووریێ ببیتە نە ناڤەندی، هەتا نها ژی شامێ ئەو یەک قەبوول نەکریە، لێ هەلوەستێ شامێ ژی وەکو بەری نها نینە و هەلوەستێ وان ژی هاتیە گوهۆڕین، ژ بەر ڤێ یەکێ ژی ئەم گەشبینین دێ گوهۆڕینێن گەلەک باش ل سووریێ روو دەن).
بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ ئاماژە ب ڤێ یەکێ ژی کر، مە بەری نها گەلەک جاران دیار کریە، کو پێدڤیا سووریێ ب دستوورەک نوو و دیموکراتی هەیە و د کۆمبوونێن ل ئەلمانیا دا ژی ئەو یەک ب رەنگەکێ ئاشکرا هاتە بەحس کرن، ئەمریکا و وەلاتێن ئێکەتیا ئۆرۆپا ژی پشتەڤانیێ ل سووریایەک دیموکراتی دکەن، کو تێدا مافێن گەلێ کورد و هەموو پێکهاتەیێن دی پاراستی بن و گۆت: (دێ دستوورەک نوو بۆ سووریێ هێتە ئامادە کرن، کورد دێ د ئامادەکرنا دستوورێ نوو یێ سووریێ دا پشکدار بن، بێگومان دڤێت هەموو مافێن گەلێ کورد و پێکهاتەیێن دی یێن ل سووریێ د دستوورێ نوو دا بهێنە گەرەنتیکرن، هەتا ئەو یەک نەهێتە کرن بێگومان ئالۆزیێن ل سووریێ دێ بەردەوام بن و ئەو یەک د بەرژەوەندیا چو ئالیەکێ دا نینە و ئەمریکی ژی دخوازن ئالۆزیێن هەی چارەسەر بن).
ناڤهاتیێ د پشکەکا دی یا ئاخڤتنا خوە دا بەحسێ رۆلێ مەزلوم عەبدی فەرماندارێ گشتی یێ هێزێن سووریا دیموکرات ژی کر و دیار کر، بەرپرسێن سووریێ داخواز کرن کو مەزلوم عەبدی پۆستێن بلند ل شامێ وەربگریت، لێ مەزلوم عەبدی ب رەنگەکێ ئاشکرا دیار کر وی نەڤێت چو پۆستێن بلند ل سووریێ وەربگریت، بەلکو وی دڤێت ل رۆژئاڤایێ کوردستانێ بمینیت و خزمەتا خەلکێ خوە بکەت.
ل دۆر پەیوەندیێن وان ل گەل تورکیا ژی ئیلهام ئەحمەد دیار کر، پەیوەندیێن وان ل گەل تورکیا هەنە، بەری نها ژی وان گەلەک جاران دیار کرینە، کو دخوازن پەیوەندیێن خوە ل گەل تورکیا باش بکەن، نها ژی پەیوەندی هەنە و دانوستاندن ژی ل گەل تورکیا هەنە، تورکیا ل دژی رێککەفتنا ڤێ دووماهیێ نینە و گۆت: (بەرپرسێن تورکیا ژی باش دزانن هەتا کورد ل سووریێ نەگەهنە مافێن خوە دێ رەوشا سووریێ هەر یا ئالۆز بیت و ئەو یەک د بەرژەوەندیا تورکیا دا نینە و بۆ تورکیا ژی باشترە ل سووریێ ببیتە فاکتەرێ ئارامیێ).
ناڤهاتیێ د دووماهیا ئاخڤتنا خوە دا ئەو یەک ژی نەڤەشارت نها ئەو کار بۆ ڤێ یەکێ دکەن دا هەموو ئاوارە ڤەگەرنە ڤە دەڤەرێن خوە ب تایبەتی ژی ئاوارەیێن ل عەفرینێ و گرێ سپی، حوکمەتا سووریێ ژی سۆز دایە بۆ ڤەگەرا ئاوارەیان هاریکار بیت.

نێچیرڤان بارزانی، سەرۆكێ هەرێما كوردستانێ ل میۆنشنێ ل ئەلمانیا راگەهاند: هەموو وەلات دخوازن هەرێما كوردستانەكا ب هێز د چارچۆڤەیێ ئیراقا فیدرال دا هەبیت.
نێچیرڤان بارزانی، سەرۆكێ هەرێما كوردستانێ ل دوماهێ رۆژا كۆنفرانسێ ئاسایشێ ل میۆنشن ل ئەلمانیا د كۆنگرەیەكێ رۆژنامەڤانیدا باسێ پرسێن رۆژەڤێ یێن ئیراقێ و هەرێما كوردستانێ كر.
ل دۆر رۆلێ هەرێما كوردستانێ ل دەڤەرێ، نێچیرڤان بارزانی گوت» هەموو وەلات دخوازن هەرێما كوردستانەكا ب هێز د چارچۆڤەیێ ئیراقا فیدرال دا هەبیت و ئەم دێ فاكتەرێ سەرەكیێ ئارامیێ بین ل دەڤەرێ».
ل دۆر پێكئینانا حوكمەتا نوو یا ئیراقێ، سەرۆكێ هەرێما كوردستانێ راگەهاند» ئەوا د شیانێن مە دا بیت بۆ پێكئینانا حوكمەتا نوو یا ئیراقێ دێ كەین».
نێچیرڤان بارزانی باسێ كۆمبوونا سەرۆك بارزانی و بافل تالەبانی كر و گوت» كۆمبوونا سەرۆك بارزانی و كاك بافل تالەبانی گەلەك یا ئەرێنی بوو» هەروەسا دیاركر» ئەو كۆمبوون دەستپێكەكا گەلەك باش بوو».
بابەتێ پرۆسەیا چارەسەریێ ل توركیا و باكوورێ كوردستانێ پرسیارەكا دی بوو ژ سەرۆكێ هەرێما كوردستانێ هاتیە كرن و د بەرسڤێدا ئاماژە ب وێ چەندێ كر» بابەت گەلەك یێ جدییە، راستە هندەك ئاستەنگ هەنە بەلێ ئەرێنییە».
سەرۆكێ هەرێما كوردستانێ ئاماژە ب رۆلێ پەكەكێ د پرۆسەیێ دا كر و گوت» دڤێت پەكەكە ل دووڤ داخوازیێن عەبدوللا ئۆجەلان بچیت».
ل دۆر رێككەفتنا دیمەشقێ و هەسەدە، نێچیرڤان بارزانی دیاركر» ب گۆرەی رەوشا دەڤەرێ ئەو رێككەفتن یا
گونجایە و گرنگ ئەوە نوكە ئەو رێككەفتن بهێتە بجهئینان و شێوازێ بجهئینانێ دێ بۆ وان هەردو ئالیێن گرێدای رێككەفتنێ هێلن» .
رۆهنكر ژی» نیازەك هەیە بۆ چارەسەركرنا كێشەیان د ناڤبەرا دیمەشقێ و كوردان دا. ئەم ژی دێ هاریكار بین بۆ وێ چەندێ بگەهنە چارەسەریێ».

د چارچۆڤەیێ پشكداریێ د كۆنفرانسێ ئاسایشێ دا ل میۆنشنێ ل ئەلمانیا، نێچیرڤان بارزانی، سەرۆكێ هەرێما كوردستانێ هەژمارەكا دی یا كۆمبوون و دیداران ل گەل سەركردە و بەرپرسێن وەلاتێن جیهانێ ئەنجامدان.
ماركۆ روبیۆ بۆ نێچیرڤان بارزانی: د پێگیرین ب پشتەڤانییا هەرێما كوردستانێ و پاراستنا ئارامیێ ل دەڤەرێ
د كۆمبوونا سەرۆكێ هەرێما كوردستانێ ل گەل ماركۆ روبیۆ، وەزیرێ دەرڤەیێ ئەمریكا، هەردو ئالییان دوپاتی ل پاراستنا مافێن كوردان و پێكهاتەیان ل سووریایەكا ئێكگرتی كر.
وەزیرێ دەرڤەیێ ئەمریكا دوپاتی ل پێگیرییا وەلاتێ خوە بۆ پشتەڤانیێ ل ئیراقێ و هەرێما كوردستانێ و پاراستنا ئارامیێ ل دەڤەرێ كر، هەروەسا پێگەهێ هەرێما كوردستانێ وەك هەڤپشكەكێ سەرەكی و فاكتەرێ سەقامگیریێ بلند هەلسەنگاند.
سەرۆكێ هەرێمێ: سوپاس بۆ رۆلێ كۆنگرێسێ ئەمریكا د پشتەڤانیكرنا ئاشتیێ و ئارامیێ ل دەڤەرا مە
د بەردەوامییا دیدارێن خوەدا ل میۆنشنێ، نێچیرڤان بارزانی، سەرۆكێ هەرێما كوردستانێ ل گەل سیناتۆر لیندزی گراهام و شاندەكێ د گەلدا كو ژ هەژمارەكا ئەندامێن كۆنگرێسی پێكهاتبوو، كۆمبوو و تێدا هەڤبەندیێن ئەمریكا ل گەل ئیراقێ و هەرێما كوردستانێ و پێشڤەبرنا هاریكارییا هەڤپشك د ناڤبەرا واندا هاتە باسكرن.
نێچیرڤان بارزانی سوپاسی و پێزانینا هەرێما كوردستانێ بۆ پشتەڤانییا بەردەوام یا ئەمریكا و كۆنگرێسی بۆ ئیراقێ و هەرێما كوردستانێ دوپاتكر.
شاندێ كۆنگرێسێ ئەمریكی دوپاتی ل گرنگییا پێگەهێ هەرێما كوردستانێ وەك فاكتەرێ ئارامیێ ل دەڤەرێ كر و پشتەڤانییا خوە بۆ ئیراقێ و پاراستنا قەوارەیێ هەرێما كوردستانێ و چارەسەركرنا كێشەیێن هەولێرێ و بەغدایێ و پاراستنا ئارامییا وەلاتی نیشادا.
رەوشا سووریێ و كوردان ل وی وەلاتی تەوەرەكێ دی كۆومبوونێ بوو، تێدا نێچیرڤان بارزانی و شاندێ كۆنگرێسێ ئەمریما دوپاتی ل پاراستنا مافێن كوردان و پێكهاتەیان د نوكە و دەستوورێ داهاتیێ سووریا ئێكگرتی دا كر.
سەرۆكێ هەرێمێ دوپاتیێ ل گرنگییا بەردەوامییا تێكگەهشتنێ بۆ چارسەەركرنا كێشەیێن سووریێ دكەت
هەر ل میۆنشنێ، نێچیرڤان بارزانی، سەرۆكێ هەرێما كوردستانێ و مەزلووم عەبدی، فەرماندەیێ گشتیێ هێزێن سووریا دیموكرات (هەسەدە)دوماهی پێشهاتێن سیاسی و ئەمنی ل سووریێ و دەڤەرێ و رەوشا كوردان و پێكهاتەیان ل سووریێ گەنگەشەكر.
سەرۆكێ هەرێمێ دوپاتی ل گرنگییا بەردەوامییا دیالۆگێ و تێكگەهشتنێ بۆ چارەسەركرنا سیاسیانەیا كێشەیان ل سووریێ كر، ب شێوەیەكێ كو مافێن كوردان و هەموو پێكهاتەیان د چارچۆڤەیێ سووریایەكا ئێكگرتی و د دەستوورێ داهاتیێ وەلاتیدا د پاراستی بن.
ژ ئالیێ خوەڤە مەزلووم عەبدی سوپاسی و پێزانینا خوە ئاراستەی سەرۆك مەسعود بارزانی و سەرۆكاتییا هەرێما كوردستانێ كر بۆ بزاڤێن بەردەوام و ڕۆلێ وان یێ كاریگەر ژ پێخەمەت ئارامكرنا رەوشێ و گەهشتنا دیمەشقێ و هەسەدە ب رێككەفتنا ئاگربەستێ.
مەترسیێن دوبارە پەیدابوونا داعشێ و گەفێن تیرۆرێ، تەوەرەكێ دی یێ كۆمبوونێ بوو.
نێچیرڤان بارزانی بۆ وەزیرێ دەرڤەیێ سووریێ: دڤێت مافێن كوردان د دەستوورێ داهاتیێ سووریێ دا بهێنە پاراستن
د كۆمبوونا د ناڤبەرا نێچیرڤان بارزانی، سەرۆكێ هەرێما كوردستانێ و ئەسعەد شیبانی، وەزیرێ دەرڤەیێ سووریێ ل میۆنشنێ، دوماهی پێشهاتێن رەوشا سووریێ و كاریگەریێن وێ ل سەر ئارامییا دەڤەرێ هاتنە گەنگەشەكرن و هەردو ئالییان دوپاتی ل گرنگییا چارەسەركرنا ئالۆزیێن سووریێ و پاراستنا مافێن هەموو پێكهاتەیان كر.
هەروەسا باس ل رەوشا ئاوارەیان و پێشڤەبرنێ ب دیالۆگا نیشتمانی ژ پێخەمەت پاشەڕۆژەكا ئارام بۆ سووریێ هاتە كرن.
وەزیرێ دەرڤەیێ سووریێ رۆلێ سەركردایەتییا هەرێما كوردستانێ بۆ رێككەفتنا دیمەشقێ و هەسەدە و هاریكاریكرنا ئاوارەیان و بزاڤێن وێ بۆ پاراستنا ئارامیێ ل دەڤەرێ، بلند هەلسەنگاند».
نێچیرڤان بارزانی هیڤییا سەركەفتنێ و ئارامیێ بۆ سووریێ خواست، هەروەسا دوپاتی ل گرنگییا پاراستنا مافێن كوردان د دەستوورێ داهاتیێ سووریا ئێكگرتی دا كر.
سەرۆكێ هەرێما كوردستانێ و وەزیرێ دەرڤەیێ پۆلەندا دوپاتیێ ل هاریكارییا هەڤپشك دكەن
د كۆمبوونا د ناڤبەرا نێچیرڤان بارزانی، سەرۆكێ هەرێما كوردستانێ و رادۆسلاڤ سیكۆرسكی، وەزیرێ دەرڤەیێ پۆلەندا دا، پێشڤەبرنا ب هەڤبەندیێن پۆلەندا ل گەل ئیراقێ و هەرێما كوردستانێ د وارێن جودا جودا دا هاتە گەنگەشەكرن و هەردو ئالییان دوپاتی ل گرنگییا ب هێزكرنا هاریكارییا هەڤپشك كر، ب تایبەتی د وان واراندا كو خزمەتا گەشەپێدانا ئابۆری و ئارامیێ دكەن.
سەرۆكێ هەرێمێ و كۆمیسیارێ بلند یێ UN بۆ كاروبارێن پەناهندەیان دوپاتیێ ل بەردەوامییا هاریكاریێ بۆ ئیراقێ و هەرێمێ دكەن
هەر ل كۆنفرانسێ میۆنشنێ، نێچیرڤان بارزانی، سەرۆكێ هەرێما كوردستانێ ل گەل د. بەرهەم سالح، كۆمیسیارێ بلند یێ نەتەوەیێن ئێكگرتی بۆ كاروبارێن پەناهندەیان (UNHCR) كۆمبوو و رەوشا پەناهندەیان ل ئیراقێ و هەرێما كوردستانێ و دەڤەرێ هاتە گەنگەشەكرن.
سەرۆكێ هەرێما كوردستانێ رۆناهی ئێخستە سەر رەوشا پەناهندیان ل هەرێما كوردستانێ و دوپاتی ل گرنگییا بەردەوامییا هاریكاریێن نەتەوەیێن ئێكگرتی بۆ ئیراقێ و هەرێما كوردستانێ كر.
ژ ئالیێ خوەڤە د. بەرهەم سالح رۆلێ مرۆڤایەتی و دیرۆكیێ هەرێما كوردستانێ بلند هەلسەنگاند د حەواندنا بێی جوداهی یا ئاوارە و پەناهندەیان، هەروەسا دوپاتی ل پێگرییا (UNHCR) بۆ پشتەڤانیكرنا بزاڤێن حوكمەتا ئیراقێ و حوكمەتا هەرێما كوردستانێ بۆ باشتركرنا رەوشا پەناهندەیان و دابینكرنا پێدڤیێن وان كر.
نێچیرڤان بارزانی خواستا هەرێما كوردستانێ بۆ مفاوەرگرتنێ ژ ئەزموونا ئەلمانیا د وارێ ئابۆریدا دوپاتكر
د دیدارا نێچیرڤان بارزانی، سەرۆكێ هەرێما كوردستانێ و كاترینا رایشە، وەزیرا كاروبارێن ئابۆری و وزەیێ یا ئەلمانی، پێشڤەبرنا هەڤبەندیێن ئابۆری یێن ئەلمانیا ل گەل ئیراقێ و هەرێما كوردستانێ و هاندانا وەبەرهێنانا ئەلمانی د وارێن جودا جودا دا هاتە گەنگەشەكرن و نێچیرڤان بارزانی سوپاسییا پشتەڤانییا بەردەوام یا ئەلمانیا بۆ ئیراقێ و هەرێما كوردستانێ كر و خواستا هەرێما كوردستانێ بۆ مفاوەرگرتنێ ژ ئەزموونا ئەلمانیا د وارێ وزەیێ و ئابۆریدا دوپاتكر
وەزیرێ دەرڤەیێ ئەلمانیا بۆ نێچیرڤان بارزانی: هەرێما كوردستانێ فاكتەرێ ئارامیێیە ل دەڤەرێ
د كۆمبوونا سەرۆكێ هەرێما كوردستانێ و د. یۆهان ڤادەفول، وەزیرێ دەرڤەیێ ئەلمانیا، هەڤبەندیێن ئەلمانیا ل گەل ئیراقێ و هەرێما كوردستانێ وڕۆلێ كارا یێ ئەلمانیا ل دەڤەرێ هاتنە گەنگەشەكرن.
نێچیرڤان بارزانی ڕیز و سوپاسی بۆ پشتەڤانی و هاریكاریێن ئەلمانیا د وارێن جودا دا بۆ ئیراقێ و هەرێما كوردستانێ دوپاتكر.
وەزیرێ دەرڤەیێ ئەلمانیا پێگەهێ هەرێما كوردستانێ وەك فاكتەرێ ئارامیێ ل دەڤەرێ بلند هەلسەنگاند، هەروەسا پێگیرییا وەلاتێ خوە بۆ بەردەوامییا پشتەڤانیێ ل ئارامییا ئیراقێ و هەرێما كوردستانێ نیشادا.

سەرۆكێ حوكمەتا هەرێما كوردستانێ و بالیۆزا هنگاریا دوپاتی ل گرنگییا ب هێزكرنا هەڤبەندیێن دو ئالییانە كر و ل سەر زێدەتر پێشئێخستنا هەڤبەندیێن هەرێما كوردستانێ و هنگاریا هەڤڕابوون.
نڤیسینگەها سەرۆكێ حوكمەتا هەرێما كوردستانێ د بەیاننامەیەكێدا بەلاڤكر» ل رۆژا ئێكشەمبی 15/2/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئوسامە ئیراهیم نەففاع، بالیۆزێ هنگاریا ل ئیراقێ كر».
د بەیاننامەیێدا هاتیە ژی» د كۆمبوونێدا، هەردو ئالی هەڤڕابوون ل سەر زێدەتر پێشئێخستنا هەڤبەندیێن هەرێما كوردستانێ و هنگاریا، ب تایبەتی د وارێن بازرگانی و وزەیێ و كەلتووری و خواندنا بلند».
ب گۆرەی بەیاننامەیێ» بالیۆزێ هنگاریا ل ئیراقێ، سلاڤ و ڕێزێن سەرۆك وەزیرێن هنگاریا گەهاندنە سەرۆكێ حوكمەتا هەرێما كوردستانێ و دوپاتی ل گرنگییا ب هێزكرنا هەڤبەندیێن دوقۆلی د وارێن جۆراوجۆردا كر».
نڤیسینگەها سەرۆكێ حوكمەتا هەرێما كوردستانێ ئاماژەكر ژی» سەرۆكێ حوكمەتا هەرێمێ سوپاسییا پشتەڤانییا هنگاریا كر وەك پشكەك ژ هەڤپەیمانییا نێڤدەولەتی دژی داعشێ، خواستا هەرێما كوردستانێ ژی بۆ پێشڤەبرنا هەڤبەندیێن هەرێما كوردستانێ و هنگاریا دوپاتكر».

سەرۆك مەسعود بارزانی پێشوازی ل حەسەن محەمەد زەمان، بالیۆزێ كوێتێ ل ئیراقێ كر.
د دیارەكێدا بالیۆزێ كوێتێ سلاڤ و رێزێن شێخ مەشعەل ئەلئەحمەد ئەلجابر ئەلسەباح، میرێ دەولەتا كوێتێ گەهاندنە سەرۆك بارزانی و دوپاتی ل سەر هەڤبەندی و برایەتییا د ناڤبەرا كوێتێ و گەلێ كوردستانێ كر و خەبات و قوربانیدانا گەلێ كوردستانێ بۆ گەهشتنێ ب ئازادیێ بلند هەلسەنگاند.
سەرۆك بارزانی سلاڤێن تایبەت بۆ میرێ كوێتێ و گەلێ كوێتی هەبوو و ئاماژە ب ب ئازارێن هەڤپشك یێن گەلێ كوردستانێ و گەلێ كوێتێ كر ل سەردەمێ رژێما ئیراقی یا بەرێ و دوپاتی ل برایەتی و ب هێزكرنا هەڤبەندیێن هەردو ئالییان كر.

د چارچۆڤەیێ پشكداریێ د گۆنگرەیێ ئاسایشا میونشن ل ئەلمانیا، سەرۆكێ هەرێما كوردستانێ چەندین كۆمبوون و دیدارێن گرنگ ل گەل چەندین بەرپرسێن بلند یێن وەلاتێن جیهانێ ئەنجامدان.
نێچیرڤان بارزانی و سەرۆكێ ئازەربایجانێ : گرنگە هەڤبەندیێن خوە ب هێز بكەین
نێچیرڤان بارزانی، سەرۆكێ هەرێما كوردستانێ ل میونشن ل ئەلمانیا ل گەل ئیلهام عەلیێڤ، سەرۆكێ ئازەربایجانێ كۆمبوو و د دیدارەكێدا هەڤبەندیێن وەلاتێ ئازەربایجانێ ل گەل ئیراقێ و هەرێما كوردستانێ و دەلیڤەیێن پێشڤەبرنێ ب هاریكارییا دوقۆلی د وارێن جودا دا هاتە گەنگەشەكرن. دیسان هەردو ئالییان دوپاتی ل گرنگییا ب هێزكرنا هەڤبەندیێن ئابۆری و كولتووری و بەرفرەهكرنا هەماهەنگیێ د ناڤبەرا هەردوئالییاندا كر.
هەر د كۆمبوونێدا، سەرەرای پرسا ڤەكرنا قونسلخانەیا ئازەربایجانێ ل هەرێما كوردستانێ، بیر و بۆچۆن ل دۆر رەوشا سیاسییا دەڤەرێ و چەند پرسێن جهێ گرنگییا هەڤپشك لێكگۆهارتن.
سەرۆكێ هەرێمێ و شیرەتكارێ ئاسایشا نەتەوەییا بریتانیا دوپاتیێ ل هەماهەنگیێ دژی تیرۆرێ دكەن
هەر د چارچۆڤەیێ كۆنفرانسێ ئاسایشێ ل میونشن، نێچیرڤان بارزانی، سەرۆكێ هەرێما كوردستانێ، ل گەل جۆناسان پاول، شیرەتكارێ ئاسایشا نەتەوەییا بریتانیا كۆمبوو و د دیدارەكێدا دوماهی پێشهاتێن ئەمنی و سیاسی یێن ئیراقێ و دەڤەرێ و گەفێن تیرۆرێ هاتنە باسكرن و هەردو ئالییان دوپاتی ل گرنگییا بەردەوامییا هەماهەنگیێ د ناڤبەرا ئیراقێ و هەرێما كوردستانێ ل گەل بریتانیا كر بۆ روو ب رووبوونا مەترسیێن تیرۆرێ و پاراستنا ئارامیێ. ژ ئالیێ خوەڤە، جۆناسان پاول، پێگیرییا وەلاتێ خوە بۆ بەردەوامییا پشتەڤانیكرنا ئیراقێ و هەرێما كوردستانێ دوپاتكر و رۆلێ هەرێما كوردستانێ د پاراستنا ئارامییا دەڤەرێدا بلند هەلسەنگاند.
نێچیرڤان بارزانی و سەرۆك وەزیرێن لوبنانێ دوماهی پێشهاتێن دەڤەرێ گەنگەشەكرن
هەر ل كۆنفرانسێ ئاسایشێ ل میونشن، سەرۆكێ هەرێما كوردستانێ، ل گەل نەواف سەلام، سەرۆك وەزیرێن لوبنانێ كۆمبوو و د دیدارەكێدا هەڤبەندیێن ئیراقێ و هەرێما كوردستانێ ل گەل لوبنانێ و دوماهی پێشهاتێن رەوشا سیاسی و ئەمنی ل دەڤەرێ هاتنە گەنگەشەكرن و هەردو ئالییان دوپاتی ل ب هێزكرنا هاریكارییا هەڤپشك د وارێن جودا دا كر، ب تایبەتی د وان وارێن خزمەتا بەرژەوەندیێن هەردو ئالییان دكەن. د تەوەرەكێ دی یێ دیدارێدا، باس ل گرنگییا پاراستنا ئارامیێ ل رۆژهەلاتا ناڤین هاتە كرن، دیسان بیر و بۆچۆن ل دۆر دەرئەنجامێن ئالۆزییان ل سەر رەوشا مرۆڤایەتی و ئابۆری ل دەڤەرێ لێكگۆهارتن.
نێچیرڤان بارزانی و سەرۆك وەزیرێن قەتەر: پێدڤییە ئارامییا دەڤەرێ بهێتە پاراستن
هەر ل میونشن و د بەردەوانییا دیدارێن خوەدا، نێچیرڤان بارزانی، سەرۆكێ هەرێما كوردستانێ ل گەل شێخ محەمەد بن عەبدولڕەحمان ئال سانی، سەرۆك وەزیران و وەزیرێ دەرڤەیێ قەتەر كۆمبوو و د دیدارەكێدا دوماهی پێشهاتێن سیاسی و ئەمنی یێن دەڤەرێ و دەرئەنجامێن وان ئالۆزییان هاتنە گەنگەشەكرن. هەردو ئالییان دوپاتی ل گرنگییا پاراستنا ئارامیێ ل رۆژهەلاتا ناڤین كر و هەڤڕابوون ل سەر پێدڤییا بزاڤێن نێڤدەولەتی بۆ رێگریكرنێ ل زێدەبوونا ئالۆزییان. هەر د دیدارێدا، باس ل رەوشا ئیراقێ و هەرێما كوردستانێ هاتە كرن و هاریكارییا هەڤپشك بۆ روو ب روونا ئاستەنگێن ئەمنی و بەرقەراركرنا ئاشتیێ ل دەڤەرێ، ب پێدڤی و گرنگ زانی.
نێچیرڤان بارزانی سوپاسییا هەرێما كوردستانێ بۆ پشتەڤانییا ئیتالیا دوپاتكر
هەر د چارچۆڤەیێ كۆنفرانسێ ئاسایشێ ل میونشین، نێچیرڤان بارزانی ،سەرۆكێ هەرێما كوردستانێ ل گەل گویدۆ كرۆسێتۆ، وەزیرێ بەرگرییا ئیتالیا كۆمبوو. د دیدارەكێدا پێشڤەبرنا هەڤبەندیێن ئیتالیا ل گەل ئیراقێ و هەرێما كوردستانێ و ب هێزكرنا هاریكارییا ئەمنی و سەربازی هاتنە گەنگەشەكرن.
سەرۆكێ هەرێما كوردستانێ سوپاسی و پێزانینا هەرێمێ بۆ پشتەڤانییا ئیتالیا و رۆلێ وێ یێ كارا د چارچۆڤەیێ هەڤپەیمانییا نێڤدەولەتیدا بۆ مەشق و ڕاهێنانێ ب هێزا پێشمەرگەی دیاركر. ژ ئالیێ خوەڤە، وەزیرێ بەرگرییا ئیتالیا پێگیرییا وەلاتێ بۆ بۆ بەردەوامییا پشتەڤانیكرنا ئیراقێ و هەرێما كوردستانێ دوپاتكر و رۆلێ پێشمەرگەی د شكاندنا داعشێدا بلند هەلسەنگاند.
دوماهی پێشهاتێن ئەمنی یێن دەڤەرێ و مەترسیێن تیرۆرێ، تەوەرەكێ دی یێ دیدارێ بوو.
سەرۆكێ هەرێمێ سوپاسییا پشتەڤانییا ئەلمانیا بۆ گەشەپێدانا هەرێما كوردستانێ كر
هەر د بەردەوامییا دیدارێن خوە دا، سەرۆكێ هەرێمێ ل گەل ڕیم ئەلەبالی ڕادۆڤان، وەزیرا فیدرالییا ئەلمانیا بۆ هاریكارییا ئابۆری و گەشپێدانێ كۆمبوو و د دیدارەكێدا باس ل پڕۆژە و هاریكاریێن ئەلمانیا ل ئیراقێ و هەرێما كوردستانێ هاتە كرن، ب تایبەتی د وارێ ئاڤەدانكرنێ، گەشەپێدانا مرۆڤی و پشتەڤانییا چاكسازیێ.
نێچیرڤان بارزانی پێزانینا سوپاسییا رۆلێ ئەلمانیا كر بۆ هاریكارییا ئاوارەیان و باشتركرنا ژێرخانەیا خزمەتگوزارییان ب تایبەتی بۆ هاریكاری و پشتەڤانییا خوشك و برایێن ئێزدی.
سەرۆكێ هەرێمێ هەروەسا دوپاتی ل پاراستنا مافێن پێكهاتەیان و كولتوورێ پێكڤەژیانێ ل هەرێما كوردستانێ كر.
ژ ئالیێ خوەڤە، وەزیرا ئەلمانی دوپاتی ل بەردەوامییا هاریكاریێن وەلاتێ خوە كر و دەستخوەشی ل بزاڤێن هەرێما كوردستانێ كر بۆ پاراستنا مافێن پێكهاتەیان و پێشڤەبرنا وارێن جودا یێن گەشەپێدانێ.
نێچیرڤان بارزانی و وەزیرێ بەرگرییا ئەلمانیا هاریكارییا هەڤپشك گەنگەشە كر
هەر ل كۆنفرانسێ ئاسایشێ ل میونشن، نێچیرڤان بارزانی، سەرۆكێ هەرێما كوردستانێ، ل گەل بۆریس پیستۆریۆس، وەزیرێ بەرگرییا ئەلمانیا كۆمبوو و د دیدارەكێدا هەڤبەندی و هاریكارییا هەڤپشك یا ئیراقێ و هەرێما كوردستانێ ل گەل ئەلمانیا د وارێ سەربازی و ئەمنیدا هاتە باسكرن و سەرۆكێ هەرێما كوردستانێ ڕیز و سوپاسی بۆ درێژكرنا ئەركێ هێزێن سەربازی یێن ئەلمانی ل ئیراقێ و هەرێما كوردستانێ هەبوون، هەروەسا بۆ هاریكارییا ئەلمانیا و رۆلێ كارا یێ شیرەتكارێن وێ د مەشق و ڕاهێنانێ ب پێشمەرگەی و پشتەڤانیكرنا پرۆسەیا چاكسازیێ ل وەزارەتا پێشمەرگە دوپاتكر.
ژ ئالیێ خوەڤە وەزیرێ بەرگرییا ئەلمانیا پێگیرییا وەلاتێ خوە بۆ بەردەوامییا پشتەڤانیكرنا ئیراقێ و هەرێما كوردستانێ وەك دۆست و هەڤپەیمان نیشادا و دوپاتی ل گرنگییا پاراستنا ئارامیێ و بەردەوامییا هاریكارییا هەڤپشك كر بۆ روو ب رووبوونا تیرۆرێ.
رەوشا سووریێ و پێشهاتێن دەڤەرێ ب گشتی، تەوەرەكێ دی یێ كۆمبوونێ بوو.
سەرۆكێ هەرێمێ بۆ سەرۆك وەزیرێن هۆلەندا: سوپاس بۆ هاریكارییا هۆلەندا
د بەردەوامییا كۆمبوونێن خوەدا ل میونشنێ، نێچیرڤان بارزانی، سەرۆكێ هەرێما كوردستانێ ل گەل دیك شوف، سەرۆك وەزیرێن هۆلەندا و رووبن بریكەلمانس، وەزیرێ بەرگرییا هۆلەندا كۆمبوو و تێدا پێشڤەبرنا هەڤبەندیێن هۆلەندا ل گەل ئیراقێ و هەرێما كوردستانێ و بەردەوامییا هاریكاریێن وی وەلاتی د وارێن جودا دا هاتنە گەنگەشەكرن. نێچیرڤان بارزانی سوپاسییا هۆلەندا كر بۆ پشتەڤانیێن بەردەوام بۆ هەرێمێ. هەروەسا شاندێ هۆلەندا دوپاتكر كو وەلاتێ وان ب گرنگی ڤە دنێریتە هەڤبەندیێن خوە ل گەل هەرێما كوردستانێ و دێ بەردەوام بیت د پشتەڤانیكرنا ئارامیێ و گەشەپێدانێ ل دەڤەرێ.
سەرۆكا كۆمسیۆنا ئەرۆپا رۆلێ هەرێما كوردستانێ وەك فاكتەرەكێ گرنگ یێ ئارامیێ ل دەڤەرێ پلند د هەلسەنگینیت
د كۆمبوونا خوەدا ل گەل ئورسولا ڤۆن دیرلاین، سەرۆكا كۆمسیۆنا ئورۆپا، سەرۆكێ هەرێما كوردستانێ هەڤبەندیێن ئێكەتییا ئورۆپا ل گەل ئیراقێ و هەرێما كوردستانێ و دوماهی پێشهاتێن دەڤەرێ گەنگەشەكر و هەردو ئالییان دوپاتی ل گرنگییا ب هێزكرنا هاریكارییا هەڤپشك كر، ب تایبەت د وان وارێ خزمەتا ئارامیێ و گەشەپێدانا ئابۆری دكەن. هەر د كۆمبوونێدا باس ل رەوشا سووریێ و كورد و پێكهاتەیان ل وەلاتی، ل گەل مەترسیێن تیرۆرێ و دوماهی پێشهاتێن دەڤەرێ و ئاستەنگێن پێشبەری ئاشتیێ ل رۆژهەلاتا ناڤین هاتە كرن.
ڤۆن دیرلاین پشتەڤانییا ئێكەتییا ئورۆپا بۆ ئارامییا هەرێما كوردستانێ دوپاتكر و بزاڤێن نێچیرڤان بارزانی و رۆلێ هەرێما كوردستانێ بلند هەلسەنگاند وەك فاكتەرەكێ گرنگ یێ ئارامیێ ل دەڤەرێ.
سەرۆكێ هەرێمێ و ئەمیندارێ گشتیێ كۆمكارا عەرەبی دوپاتیێ ل گرنگییا پاراستنا ئارامیێ دەڤەرێ دكەن
هەر ل میونشنێ و د دیدارا سەرۆكێ هەرێما كوردستانێ دا ل گەل ئەحمەد ئەبولغەیت، ئەمیندارێ گشتیێ كۆمكارا عەرەبی دوماهێ پێشهاتێن سیاسی و ئەمنی یێن ئیراقێ و دەڤەرێ و هەڤبەندیێن هەرێما كوردستانێ ل گەل وەلاتێن عەرەبی هاتنە گەنگەشەكرن، هەردو ئالییان ژی دوپاتی ل گرنگییا پاراستنا سەقامگێریێ و دوورئێخستنا دەڤەرێ ژ ئالۆزییان كر.
ئەبولغەیت، رۆلێ نێچیرڤان بارزانی و هەرێما كوردستانێ د پاراستنا هەڤسەنگیێ و ب هێزكرنا گیانێ پێكڤەژیانێ بلند هەلسەنگاند، هەروەسا پشتەڤانییا كۆمكارا عەرەبی بۆ ئارامییا ئیراقێ و هەرێما كوردستانێ دوپاتكر.
وەزیرێ دەرڤەیێ ڤاتیكانێ سەقایێ لێبۆرینێ و پێكڤەژیانێ ل هەرێما كوردستانێ بلند هەلسەنگاند
سەرۆكێ هەرێما كوردستانێ د بەردەوامییا كۆمبوونێن خوە ل كۆنفرانسێ ئاسایشێ ل میونشنێ ل گەل پۆل ریچارد گالاگەر، وەزیرێ دەرڤەیێ ڤاتیكانێ كۆمبوو و هەردو ئالییان دوماهی پێشهاتێن دەڤەرێ و رەوشا پێكهاتەیێن ئایینی و نەتەوەیی گەنگەشەكر و نێچیرڤان بارزانی پێگیرییا هەرێما كوردستانێ بۆ پاراستنا مافێن پێكهاتەیان و پێشڤەبرنا كەلتوورێ پێكڤەژیانێ دوپاتكر. ژ ئالیێ خوەڤە وەزیرێ دەرڤەیێ ڤاتیكانێ سەقایێ لێبۆرینێ و پێكڤەژیانێ ل هەرێما كوردستانێ بلند هەلسەنگاند و پشتەڤانییا ڤاتیكانێ بۆ ئارامییا ئیراقێ و هەرێما كوردستانێ نیشادا.

مەسرور بارزانی، سەرۆكێ حوكمەتا هەرێما كوردستانێ، پێشوازی ل ڕۆبین سۆگۆیان، بالیۆزێ ئەرمینیا ل ئیراقێ كر.
د دیدارەكێدا دوپاتی ل گرنگییا پێشڤەبرنێ ب هەڤبەندیێن هەرێما كوردستانێ و ئەرمینیا د وارێن جۆرا و جۆردا هاتە كرن و ئاماژە ب كۆمبوون و دیدارێن سەرۆكێ حوكمەتا هەرێمێ ل گەل سەرۆك و سەرۆك وەزیرێن ئەرمینیا د چارچۆڤەیێ كۆڕبەندێ ئابۆریێ جیهانی ل داڤۆس هاتە كرن.
بالیۆزێ ئەرمینیا پێزانینا وەلاتێ خوە بۆ پاراستنا مافێن پێكهاتەیێ ئەرمەن ل هەرێما كوردستانێ دیاركر. د پشكەكا دی یا دیدارێدا، باس ل چاكسازیێن حوكمەتا هەرێمێ د هەموو كەرتاندا پێخەمەت دروستكرنا ژێرخانەیەكا ئابۆرییا ب هێز هاتە كرن.

مەسرور بارزانی، سەرۆكێ حوكمەتا هەرێما كوردستانێ، پێشوازی ل ئارچیل دزولیاشڤیلی، بالیۆزێ جۆرجیا ل ئیراقێ و ئوردنێ و لوبنانێ كر.
د كۆمبوونەكێدا هەردو ئالی هەڤڕابوون ل سەر ب هێزكرنا هەڤبەندیێن هەرێما كوردستانێ و جۆرجیا ل سەر بنەمایێ كۆمبوونا ڤێ دووماهیێ د ناڤبەرا سەرۆكێ حوكمەتا هەرێمێ و سەرۆك وەزیرێن جۆرجیا ل گۆپیتكا جیهانیێ حوكمەتان ل دوبەی.
رەوشا گشتییا ئیراقێ و دەڤەرێ و ب تایبەتی گوهۆڕینێن ڤێ دوماهیێ یێن سووریێ، پشكەكا دی یا دانوستاندنێن كۆمبوونێ بوو.