شیرەتكارێ سەرۆك وەزیرێن ئیراقێ بۆ كاروبارێن كوردێن ئێزدی ئاشكرا دكەت، ئیراقێ پڕۆژەیاسایەكا نوو بۆ دادگەهكرنا چەكدارێن داعشێ ب تاوانا «جێنۆسایدێ» بەرهەڤ كریە و دێ ب زووترین دەم هنێرنە جڤاتا نوونەران. هەروەسا دوپاتیێ ل وێ چەندێ دكەت كو هەبوونا گرۆپێن چەكدارێن دەرڤەی یاسایێ ل شنگالێ، ئاستەنگا سەرەكییە ل هەمبەر ڤەگەڕیانا ئاوارەیان.
خەلەف شنگالی، شیرەتكارێسەرۆك وەزیرێن ئیراقێ بۆ كاروبارێن كوردێن ئێزدی گۆت» ل بەرێ چەكدارێن داعشێ ل دادگەهێن ئیراقێ تنێ ل دووڤ یاسایا دژەتیرۆرێ دهاتنە دادگەهكرن، لێ نها پڕۆژەیاسایەكا تایبەت ب ناڤێ (پڕۆژەیاسایا بەرهنگاربوونا تاوانێن نێڤدەولەتی) هەموو قووناغێن خۆ ل ئەمیندارییا گشتی یا جڤاتا وەزیران و جڤاتا دەولەتێ بڕینە و دێ ب زووترین دەم هنێرنە جڤاتا نوونەران».
شیرەتكارێ سەرۆك وەزیرێن ئیراقێ رۆهنكر، ل دووڤ ڤێ یاسایا نوو، چەكدارێن داعشێ ب شێوەیێ راستەوخۆ ب تاوانێن «جێنۆساید، تاوانێن شەڕی و تاوانێن دژی مرۆڤایەتیێ» دێ هێنە دادگەهكرن. هەروەسا د ناڤ یاسایێ دا بنەمایێ دامەزراندنا سندۆقەكا تایبەت بۆ قەرەبووكرنا ماددی و مەعنەویی یا رزگاربوویان و زیانڤێكەفتیێن دەستێ داعشێ بنەجه كریە.
سەبارەت ب رەوشا ئەمنی و ئیداری یا دەڤەرێ، خەلەف شنگالی ئاماژە ب وێ چەندێ كر، سەرۆك وەزیرێن ئیراقێ حەز ناكەت چ گرۆپەكێ چەكدار یێ دەرڤەی یاسایێ ل شنگالێ بمینیت و كارەكێ جددی بۆ رێكخستنا رەوشا ئەمنی دهێتە كرن.
ناڤبری دوپاتكر كر: «هەبوونا گرۆپێن چەكدارێن جودا و نەفەرمی ل دەڤەرێ، ئاستەنگا هەرە مەزنە ل هەمبەر بجهئینانا رێككەفتنا شنگالێ و ڤەگەڕیانا ئاوارەیان. جهئینانا ڤێ رێككەفتنێ پێدڤی ب ئیرادەكا هەڤپشك یا بەغدایێ وهەولێرێ و كۆمەلگەها نێڤدەولەتی هەیە داكو خزمەتگوزاری بگەهنە دەڤەرێ و ئارامی بنەجهـ ببیت».
د پشكەكا دی یا ئاخڤتنێن خۆ دا، خەلەف شنگالی بزاڤێن هەرێما كوردستانێ د كەیسێ ئێزدییان دا بلند هەلسەنگاند و گۆت: «حوكمەتا هەرێما كوردستانێ جێنۆسایدا ئێزدییان ب جیهانێ ناساند، هزاران ئاوارە حەواندن و هەموو شیان و بزاڤێن خۆ بۆ پاراستنا وان تەرخان كرن، داخوازێن مەسرور بارزانی، سەرۆكێ حوكمەتا هەرێما كوردستانێ ژی بۆ هاریكاریكرنا ئێزدییان د جهێ خۆ دا نە».
شیرەتكارێ سەرۆك وەزیرێن ئیراقێ بۆ كاروبارێن كوردێن ئێزدی ئاماژە ب وێ چەندێ ژی كر كو هەتا نها 120 هزار ئاوارەیێن شنگالێ ل كەمپان دژین و پێدڤییە سندۆقەكا نێڤدەولەتی بۆ قەرەبووكرنا وان بهێتە دانان. سەبارەت ب مەلەفێ رەڤاندییان ژی رۆهنكر كو پترییا رەڤاندیێن ئێزدی ل ئاخا سووریایێ نە و بزاڤ بۆ دیتن و رزگاركرنا وان بەردەوامن.

ئەندامەكێ مەكتەبا سیاسی یا پارتی دیموكراتی كوردستان دوپاتی ل وێ چەندێ كر كو كلیلا دەربازبوونا ژ ڤی رەوشێ، پرۆسەیا دیالۆگێ یە د ناڤبەرا هەموو ئالیێن سیاسی و كاراكرنا پەرلەمانێ و پێكئینانا كابینەیا دەهی یا حوكمەتا هەرێمێ یە.
هێمن هەورامی، ئەندامێ مەكتەبا سیاسی یا پارتی دیموكراتی كوردستان، ل پیرمام پێشوازی ل هۆلی ڤەیر، قونسلا گشتی یا بەریتانیایێ ل هەرێما كوردستانێ كر.
هەورامی، ب هەلكەفتا دەستبكاربوونا هۆلی ڤەیر، سەرەرای پیرۆزباهیێ، هیڤییا سەركەفتنێ ل ئەركێ وێ دا بۆ خواست.
ئەندامێ مەكتەبا سیاسی یا پارتی دیاركر: د كۆمبوونێ دا مە هەلوەست و سیاسەتا پارتی دوپات كر، كو دڤێت قەیرانا سیاسی ب دووماهی بهێت و پەرلەمان بهێتە كاراكرن.
د تەوەرەكێ دی یێ كۆمبوونێ دا، سیاسەت و هەلوەستێ پارتی ل سەر رەوشا ناڤخۆیی یا كوردستانێ و ئەگەرێن قەیرانا سیاسی و دیتنا پارتی بۆ دەربازبوون ژ ڤی قووناغی هاتنە رۆهنكرن.
هێمن هەورامی دوپاتی ل وێ چەندێ كر، كو كلیلا دەربازبوونێ ژ ڤی رەوشێ، پرۆسەیا دیالۆگێ یە د ناڤبەرا هەموو ئالیێن سیاسی و كاراكرنا پەرلەمانێ و پێكئینانا كابینەیا دەهی یە، ل سەر بنەمایێ وێ رێككەفتنا سیاسی یا د ناڤبەرا پارتی و ئێكەتیێ دا كو ل مەها گولانا 2025 هاتییە ئیمزاكرن.

دیدار/ دلۆڤان ئاكرەیی

بەرپرسێ لقا 17 یا پارتی دیموكراتی كوردستان ل شنگالێ و دەوروبەران راگەهاند، حوكمەتا ئیراقێ د جهئینانا رێككەفتنا شنگالێ دا یا رژد نینە، ئەڤ چەندە ژی بۆیە ئەگەرێ نەئاڤەدانكرنا شنگالێ و هەبوونا هێزێن نەیاسایی ژی رەوشا ئەمنی ل وێ دەڤەرێ ئالۆزتر كریە.
نازم هەركی، بەرپرسێ لقا 17 یا پارتی دیموكراتی كوردستان ل قەزا شنگالێ بۆ رۆژنامەیا (ئەڤرۆ) گۆت «پێدڤییە حوكمەتا ئیراقێ ب ئەركێ خۆ رابیت و كار بۆ جهئینانا رێككەفتنا شنگالێ بكەت، چونكی بجهئینانا وێ رێككەفتنێ، دەستپێكەكا گرنگە بۆ ئاساییكرنا رەوشێ ب هەڤكارییا حوكمەتا هەرێما كوردستانێ و حوكمەتا ئیراقێ».
ناڤبری زێدەتر گۆت «پێدڤییە هەموو ئالیێن سیاسی بزانن كو نەبوونا ئارامیێ و بجهنەئینانا رێككەفتنێ، رێگرە ل هەمبەر ڤەگەڕیانا خەلكێ مە بۆ سەر وار و مالێن خۆ. ئارمانجا سەرەكی یا وان هێزێن نەیاسایی ئەوە كو رێككەفتن نەهێتە بجهئینان، داكو ئێمناهییا شنگالێ نەكەڤیتە دەستەكێ باوەرپێكری و خەلك نەشێن ئاڤەدانیێ ل دەڤەرێ بكەن و ژ ژیانەكا پڕ دژواری رزگار ببن».

دهۆك ،لەزگین جوقی

ئەندامەكێ بەرێ یێ جڤاتا نوونەریچن ئیراقێ ژ فراكسیۆنا پارتی راگەهاند: پاشمایێن تیرۆرستێن داعشێ مەزنترین مەترسی نە ل سەر ئیراقێ ب تایبەت هزر و سەقایێ هزری یێ وان بەرهەم ئینای.
مەحما خەلیل، پەرلەمانتارێ بەرێ یێ ئێزدی دیاركركو جینۆسایدا ب سەرێ ئێزدییان دا هاتی، ب دووماهیهاتنا دەستهەلاتا مەیدانی یا “داعشێ” ل سەر ئەردی ب دووماهی نەهاتییە، بەلكو هێشتا ب شێوازێن دی بەردەوامە. ئەو ژی ب رێیا بەهانەئینان و بچووككرنا تاوانان، یان نیشاندانا گوهۆڕینا ناسنامەیا ئۆلی و رەوشەنبیری یا قوربانییان وەكو دەستكەفت كو ل ڤێ دووماهیێ هاتییە باسكرن ل دۆر چاوانییا سەرەدەریكرنێ ل گەل كەیسا ئێك ژ كچێن رزگاربوویی یێن ئێزدی پشتی چەندین سالێن ئێخسیركرنێ.
مەحمای زێدەتر گۆت” ئەوا داعشێ كری یا دەستنیشانكری بوو ب دەمەكی، بەلێ ئاخڤتنێن كەربوكینێ گەلەك مەترسیدارترن، چنكو د هزر و هشا جڤاكی دا دچن و وێ سەقای سەر ژ نوو بەرهەم دئیننەڤە یا كو رێ دایی ب روودانا تاوانێ. ئەڤە ژی گەفێ ل پاشەڕۆژا پێكڤەژیانێ دكەت و هەبوونا پێكهاتەیان دكەتە ئارمانج».
ئاماژە ب وێ چەندێ دا، ئارمانجا دووماهیێ یا ڤان ئاخڤتنان، ڤالاكرنا ئیراقێ یە ژ هەمەرەنگییا ئۆلی و نەتەوەیی، ئینانا گڤاشتنێ یە ل سەر پێكهاتەیان بۆ كۆچكرنێ، كو ئەڤە ب دەق بنپێكرنا دەستوورێ ئیراقێ و بهایێن وەلاتیبوونێ و پێگێریێن نێڤدەولەتی یێن پەیوەندیدار ب پاراستنا قوربانیێن جینۆسایدێ یە.
هەروەسا دا زانین كو بەردەوامبوونا ڤێ هاندان و جوداكارییێ چ ب رێیا پرۆپاگندەیێ، بەهانەئینانێ، یان بێدەنگییێ بیت، ئەگەرێ سەرەكی یە بۆ مانا دۆسێیا جینۆسایدا ئێزدییان و كێمبوونا مافێن وان هەتا ئەڤرۆ.
مەحمای داخوازیێن بلەز ئاراستەی حوكمەتا ئیراقێ و جڤاتا نوونەران و دەستهەلاتا دادوەری ودەستەیا راگەهاندن و پەیوەندییان وكۆمسیۆنا مافێن مروڤی كر كو ڕێكارێن توند بگرنە بەر بۆ تاوانباركرن و سزادانا هەر كەسەكێ كو پروپاگەندەیێ بۆ ئاخڤتنێن كەربوكینێ دكەت یان بەهانەیان بۆ تاوانێن جینۆسایدێ دئینیت. هەروەسا دوپاتی ل سەر راگەهاندنا ستراتیژییەكا نشتیمانی كر بۆ بەرهنگاربوونا توندڕەویێ و كەربوكینێ و مسۆگەركرنا نەئێخستنا كەنالێن راگەهاندنێ د خزمەتا برینداركرنا كەرامەتا قوربانییان دا.
مەحما خەلیلی ئاخفتنا خوە ب وێ چەندێ ب دووماهیئینا كو پاراستنا پێكهاتەیێ ئێزدی ب تنێ ب ساخكرنا یاداشتێن سالانە نابیت، بەلكو ب نەهێلانا هزرا تیرۆریستی ژ ریهـوڕیشالان ڤە و هشككرنا ژێدەرێن كەربوكینیێ دبیت. دوپات ژی كر كو ئیراق دێ ئارام مینیت ب تنێ دەما كو هەموو ئۆل و نەتەوەیێن وێ یێن جودا ئارام بن.

زنار تۆڤی:

كارۆخ خۆشناو، سەرۆكێ پەیمانگەها ڤەكۆلینێن ئەمریكی- كوردی، بۆ رۆژنامەیا (ئەڤرۆ) دیاركر: «كۆمەلەیێن رەڤەندا كوردی هەردەم هێزەكا مەزنا نەتەوەیی و كارتێكەرن بۆ گەل و نیشتمانێ خۆ ل وەلاتێن دی، چونكی دشێن ل هەموو ئاستێن ئابۆری، سیاسی، دیپلۆماسی و كلتووری، پشتەڤانێن مللەتێ خۆ بن. نەتەوەیێن خودان دەولەت وەك (یۆنانی، ئیتالی، ئەرمەنی، جوهی، تورك و لوبنانی) هەروەسا نەتەوەیێن بێ دەولەت وەك (باسك، كەتەلۆنیا، سكۆتلەندا و تامیل) نموونەیێن بەرچاڤێن ڤێ چەندێ نە».
ناڤهاتی گۆت ژی «ژ ئەگەرێ قەیرانێن مەزن و سیاسەتا زۆردارییا دەولەتێن داگیركەرێن كوردستانێ، ب سەدان هزار كوردستانی ب نەچاری وەلاتێ خۆ هێلاینە و بووینە پەنابەر ل سەرانسەری جیهانێ، ب تایبەتی ل وەلاتێن ئۆرۆپا، ئەمریكا، كەنەدا و ئوسترالیا. ب ڤێ چەندێ ژی رەڤەندا كوردستانی د ڤان 30 بۆ 40 سالێن دووماهیێ دا، گەشەكرنەكا بەرفرەهـە ب خۆ ڤە دیتیە.»
خۆشناوی ئاماژە دا وێ چەندێ كو «نڤشێ ئێكێ یێ رەڤەندا كوردستانی، تەركیزا وان ل سەر بنەجكرن و دابینكرنا ژیارێ بوویە، لێ ل گەل هندێ ژی ڕێژەیەكا وان شیاینە خزمەتا كۆمەلگەهێن خۆ بكەن. نڤشێ ئێكێ هەر د خەما وەلاتێ خۆ دا بووینە، بەلێ كاریگەرییا وان ل سەر پێشهاتێن گرنگ ل وەلاتێن بیانی ب سنۆری مایە، پشكەكا ڤێ ژی گرێدایە ب ڤەقەتیانا جڤاكی و سیاسی یا رەڤەندێ كو كێشە و جەمسەرگیریێن ناڤخۆیا كوردستانێ ڤەگوهاستینە بۆ وەلاتێن دی، ئەڤێ چەندێ رەڤەند تووشی پەژیكا دابەشبوونێ كریە و نەشیاینە ل دۆر دۆزا خۆ یا هەڤپشك ب شێوەیەكێ لۆبی كار بكەن».
سەرۆكێ پەیمانگەها ڤەكۆلینێن ئەمریكی- كوردی ل دووماهیێ گۆت»جهێ دلخۆشیێ یە كو نڤشێ دوویێ و سێیێ یێ رەڤەندا كوردستانی پێگەهشتینە و وەك خودانمال ل وەلاتێن دی، د وارێن فێربوون، سیاست، هونەر و بزنسێ دا شیاینە شوونتبلێن خۆ دیار بكەن. ئەڤ نڤشە شارەزاترن و شیانێن وان یێن كارتێكرنێ ل سەر سیستەمێ بڕیاردانێ پترن و دشێن رۆلەكێ مەزن ل دۆر دۆزا كوردستانێ ببینن، ب تایبەتی هەكە شیانێن وان ب ستراتیژەكا نیشتمانی بهێتە ئاراستەكرن».

سەرۆك بارزانی د پەیامەكێ دا راگەهاند: ئەو تاوانا نەمرۆڤانە یا تیرۆرستێن داعشێ بەری 12 سالان دەرهەقێ ئێزدییان ئەنجامدای، ژ بەر ناسنامەیا كوردی و رەسەنایەتییا ئایینێ وان بوو. ل سالڤەگەڕا ڤێ كارەساتێ، سلاڤان بۆ وان پێشمەرگەیێن قەهرەمان دهنێرین یێن كو ئەفسانەیا داعشێ شكاندی و داخوازێ ژ ئێزدییان دكەن ژ بۆ مسۆگەركرنا پاشەڕۆژەكا گەش، ئێكڕێزییا خۆ بپارێزن.
دەقێ پەیاما سەرۆك بارزانی:
ئەو تاوانا تیرۆرستێن داعشێ بەری 12 سالان دژی خوشك و برایێن مە یێن ئێزدی ئەنجامدای، ئازارەكا هەتا هەتایێ یە و د بیرا كوردستانییان دا دێ مینیت. ئێزدی ژ بەر كوردبوون و رەسەنایەتی و بیروباوەرێن خۆ یێن ئایینی كەفتنە بەر هێرش و كریارێن نەمرۆڤانە یێن تیرۆرستێن داعشێ و هاتنە جینۆسایدكرن. ئەو تاوانا ل سەر دەستێ داعشێ ل دەڤەرا شنگالێ هاتییە كرن، درێژەپێدەرا وان زنجیرە كارەسات و كۆمكوژی و تاوانان بوو یێن كو ل درێژاهییا دیرۆكێ دژی گەلێ كوردستانێ هاتینە ئەنجامدان.
ل سالڤەگەڕا 12 یا ڤێ كارەساتێ، سلاڤ بۆ گیانێ پاقژێ شەهیدان و قوربانیێن ڤێ تاوانێ، سلاڤ بۆ دلێری و چاڤنەترسییا وان پێشمەرگەیێن قەهرەمان یێن كو ل سەر چیایێ شنگالێ مانەڤە و رێ نەدان دەستێ تیرۆرستان بگەهیتە چیایێ شنگالێ. سلاڤ بۆ وەفا و ئازایەتییا هەموو وان پێشمەرگەیێن قەهرەمان یێن كو ژ بۆ شكاندنا دۆرپێچا چیایێ شنگالێ و قورتالكرنا باژێڕێ شنگالێ خوونا خۆ بەخشی و ئەفسانەیا داعشێ شكاندی. هەروەسا ب دلەكێ تژی سوپاسی، سوپاسگوزارییا خۆ ئاراستەی هەموو تاكەكێ سەربلندێ كوردستانێ دكەین، كو وەك ئێك جەستە هەڤسۆز و هەڤخەمێن خوشك و برایێن ئێزدی بوون، ل گەل رێز و سوپاسیێن مە یێن زۆر بۆ هێزێن هەڤپەیمانان كو رۆلەكێ دیار هەبوو د هاریكاریكرنا پێشمەرگەی و پاشڤەچوون و شكاندنا تیرۆرستان دا.
ل بیرئینانا ڤێ كارەساتێ، بۆ خوشك و برایێن ئێزدی دوپات دكەم كو ب هەموو شیانان پشتەڤانێ خواست و داخوازیێن وانم. داخوازێ ژێ دكەم ژ پێخەمەت مسۆگەركرنا پاشەڕۆژەكا گەش، د ناڤخۆیا خۆ دا ئێكڕێز بن و هیڤییا وان ب پاشەڕۆژێ هەبیت. بێگۆمان، ئەو رەوشا سەپاندی و نەئاساییا ل شنگالێ هەی، بەردەوام نابیت و دڤێت خوشك و برایێن مە یێن ئێزدی ب سەربلندی ڤە ڤەگەڕنە سەر جهێ باب و باپیرێن خۆ و قەرەبوویا زیان و ئازارێن وان بهێتە كرن.
هزاران سلاڤ ل گیانێ پاقژێ شەهیدێن شنگالێ و هەموو شەهیدێن رێكا ئازادییا كوردستانێ.

ل رۆژا دووشەمبی 3/8/2026، سەرۆك مەسعود بارزانی پێشوازی ل مامۆستا عەلی باپیر، سەرۆكێ كۆمەلا دادگەرییا كوردستانێ و شاندەكێ د گەلدا كر.
بارەگەهێ بارزانی ل دۆر كۆمبوونێ بەلاڤكر» د دیدارێ دا، بیروڕا ل دۆر دووماهی ئەگەر و پێشهاتان، رەوشا دەڤەرێ و ئیراقێ، هەروەسا كارتێكرنا ئالۆزی و گرژیێن دەڤەرێ ل سەر ئارامی و ئابۆرییا جیهانی، هەرێمی و ناڤخۆیی هاتنە لێكگۆهارتن».
بارەگەهێ بارزانی دیاركر ژی» هەر د وێ دیدارێ دا، باس ل پڕۆسەیا سیاسی یا هەرێمێ و ئەو بزاڤێن د وارێ نێزیككرنا ئالیێن سیاسی و دەربازكرن و چارەسەركرنا قەیرانا سیاسی یا هەرێما كوردستانێ دا دهێنە كرن».

ل رۆژا دووشەمبی 3/8/2026، سەرۆك مەسعود بارزانی پێشوازی ل پاتریارك مار پۆلسێ سیێ نونا، پاتریاركێ كەنیسەیا كلدانی ل ئیراقێ و جیهانێ كر.
د دیدارێ دا، پاتریاركێ كەنیسەیا كلدانی سوپاسی و پێزانینێن خۆ ئاراستەی سەرۆك بارزانی كر بۆ بزاڤێن وی یێن بەردەوام د پاراستن و پشتەڤانییا ماف و داخوازێن مەسیحییان و هەموو پێكهاتەیێن نەتەوەیی و ئایینی یێن ئیراقێ و هەرێما كوردستانێ، هەروەسا رۆلێ سەرۆك بارزانی د هێزكرنا برایەتی، تەبایی و فەرهەنگا بێكڤەژیانێ دا بلند هەلسەنگاند.
هەر د وێ دیدارێ دا، سەرۆك بارزانی ئاماژە ب قوربانیدان و خەباتا هەڤپشك یا هەموو پێكهاتەیێن كوردستانێ كر و دوپاتی ل سەر وێ چەندێ كر، كو جهێ شانازیێ یە ل كوردستانێ فەرهەنگا بێكڤەژیانێ هەیە و هەموو د خۆشی و نەخۆشییان دا هەڤسۆز و هەڤپشكین، كوردستان دێ جهێ بێكڤەژیانێ، برایەتی و تەباییێ مینیت.

ل رۆژا دووشەمبی 3/8/2026 نێچیرڤان بارزانی، سەرۆكێ هەرێما كوردستانێ، ب سەرەدانەكا فەرمی گەهشتە دیمەشقا پایتەختێ سووریێ و ل كۆچكا گەل، ژ ئالیێ ئەحمەد شەرع، سەرۆككۆمارێ سووریایێ ڤە هاتە پێشوازیكرن و هەردوویان كۆمبوونەك ئەنجام دا.
د رێورەسمێن پێشوازیكرنێ دا ل كۆچكا گەل، ب ئالایا كوردستانێ پێشوازییا سەرۆكێ هەرێما كوردستانێ هاتە كرن. بەری گەهشتنێ ژی، سەرۆكاتییا هەرێما كوردستانێ راگەهاندبوو كو نێچیرڤان بارزانی ل سەر ڤەخواندنەكا فەرمی یا ئەحمەد شەرع، سەرۆككۆمارێ سووریایێ، سەرەدانا دیمەشقێ دكەت.
سەرۆكاتییا هەرێما كوردستانێ ل دۆر كۆمبوونێ راگەهاند» د كۆمبوونێ دا كو ئەسعەد حەسەن ئەلشەیبانی، وەزیرێ دەرڤەیێ سووریێ بەرهەڤ بوو، پەیوەندیێن سووریایێ ل گەل ئیراقێ و هەرێما كوردستانێ هاتنە گەنگەشەكرن و دوپاتی ل سەر گرنگییا بەرفرەهكرنا هەڤكارییا هەڤپشك ل بوارێن جودا، ب تایبەتی ل بوارێ ئابۆری دا، هاتە كرن».
سەرۆكاتییا هەرێمێ دیاركر ژی» د پشكەكا دی یا كۆمبوونێ دا، بیروڕا ل دۆر دووماهی پێشهاتێن رەوشادەڤەرێ هاتنە گۆهۆرین. د ڤی واریدا هەردو ئالییان داكۆكی ل سەر بهێزكرنا ئارامیێ وبەرفرەهكرنا هەڤكارییا هەرێمی و چارەسەركرنا ئاشتییانە یا كێشەیان كر».
ئاماژە كر ژی»د تەوەرەكێ دی دا دوپاتی ل وێ چەندێ هاتە كرن كو د سووریایا نوو دا مافێ هەموو پێكهاتەیان پاراستی بیت، هەروەسا سەرۆك شەرع سوپاسییا هەرێما كوردستانێ كر بۆ پێشوازیكرن و حەواندنا پەنابەرێن سووری د دەمێ شەڕی دا و راگەهاند كو سووریا ب گرنگی ڤە ل رۆلێ ئیراقێ و هەرێما كوردستانێ دنێڕیت».
د بەیاننامەیا سەرۆكاتییا هەرێما كوردستانێ هاتییە ژی» ژ ئالیێ خۆڤە، سەرۆكێ هەرێما كوردستانێ رۆلێ سەرۆكێ سووریایێ بۆ وان پێشكەفتنێن ل بوارێن جودا ل سووریێ هاتینە دەستڤەئینان بلند هەلسەنگاند، هەروەسا بۆ ئامادەیی و رۆلێ سووریایێ ل سەر ئاستێ هەرێمی و نێڤدەولەتی. د كۆمبوونێ دا چەند پرسێن دی یێن جهێ گرنگی و بەرژەوەندییا هەڤپشك ژی هاتنە گەنگەشەكرن».
ژ ئالییەكێ دی ڤە، دلشاد شەهاب، پەیڤدارێ سەرۆكاتییا هەرێما كوردستانێ د كۆنفرانسەكێ رۆژنامەڤانی دا ل دیمەشقێ راگەهاند، د كۆمبوونەكێ دا سەرۆكێ هەرێما كوردستانێ و سەرۆككۆمارێ سووریێ گەنگەشەی پەیوەندیێن دوولایەنە كرینە و نێچیرڤان بارزانی سەرۆككۆمارێ سووریایێ بۆ سەرەدانا ئیراقێ و هەرێما كوردستانێ ڤەخواند.
دلشاد شەهاب ئاماژە ب وێ چەندێ كر كو سەرەدانا سەرۆكێ هەرێمێ ل سەر ڤەخواندنەكا فەرمی یا سەرۆككۆمارێ سووریایێ بوویە و د كۆمبوونێ دا گەنگەشە ل سەر بابەتێن جهێ گرنگیێ بۆ هەردوو ئالییان هاتیە كرن. هەروەسا ئاشكەرا كر كو نێچیرڤان بارزانی سلاڤ و رێزێن سەرۆك بارزانی و سەرۆك وەزیرێن ئیراقێ و سەرۆكێ حوكمەتا هەرێما كوردستانێ گەهاندینە سەرۆك ئەحمەد شەرع.
پەیڤدارێ سەرۆكاتییا هەرێمێ دیار كر كو سەرۆكێ هەرێما كوردستانێ كەیفخوەشیا خوە ب وان گۆڕانكاریێن ل سووریایێ رویداین دیار كریە و گۆت «گەلێ سووریایێ د سالێن بۆری دا نەهامەتیێن مەزن دیتینە.» د كۆمبوونێ دا، رۆلێ هەرێما كوردستانێ ژی د ڤەكرنا دەرگەهان ب روویێ سەدان هزار ئاوارەیێن سووری دا ب گرنگی ڤە هاتییە باسكرن.
ل دۆر كۆمبوونێن دووقۆلی، شەهاب دیار كر»د كۆمبوونێ دا بابەتێن ئابۆری، ئەمنی، پێشڤەبرنا پەیوەندیێن ئیراقێ و هەرێما كوردستانێ ل گەل سووریایێ، و پرسا رێككەفتنا د ناڤبەرا هێزێن سووریا دیموكرات (هەسەدێ) و حوكمەتا سوورییایێ دا هاتنە گەنگەشەكرن».
سەبارەت ب رێككەفتنا ئادارا ئەڤسالە د ناڤبەرا هەسەدێ و حوكمەتا سووریایێ دا، دلشاد شەهاب دوپاتی ل سەر وێ كر كو هەرێما كوردستانێ رۆلەكێ ئەرێنی هەبوویە و گۆت «سەرۆك بارزانی هەموو شیانێن خۆ مەزاختینە دا كو ئەو نێزیكبوونە هەبیت، نوكە ژی سەرۆكێ هەرێما كوردستانێ د پڕۆسەیا رێككەفتنا گشتی دا وەكو ئالیۆەكێ هاریكار بەردەوامە، ل گەل رێزگرتنا تایبەتمەندییا دەولەتا سووریایێ، كو ئەم تێگەهشتینە پرسەكا ناڤخۆیی یا سووریایێ یە، لێ ئەڤ چەندە دەرئێخەرێ وێ راستیێ یە كو هەرێما كوردستانێ د پرسێن دەڤەرێ دا رۆلەكێ كاریگەر هەیە».
د دووماهیێ دا، پەیڤدارێ سەرۆكاتییا هەرێمێ ئاماژە ب وێ چەندێ كر كو سەرۆككۆمارێ سووریایێ سوپاسییا هەرێما كوردستانێ كریە ژ بەر وی رۆلێ ل روودانێن بۆری هەبووی، هەروەسا ئاماژە ب وێ دا كو سووریا د پێنگاڤان دایە بۆ ڤەكرنا قۆنسلخانەیەكێ ل هەولێرێ.