مەسرور بارزانی، سەرۆكێ حوكمەتا هەرێما كوردستانێ پێشوازی ل ئیمزاكرنا رێككەفتنا ئەمریكا و ئیرانێ دكەت و دبێژیت: «هیڤیدارم ببیتە دەستپێكا قۆناغەكا نوو یا ئاشتی و ئارامیێ ل دەڤەرێ».
مەسرور بارزانی، سەرۆكێ حوكمەتا هەرێما كوردستانێ د پەیامەكێ دا ل تۆرا جڤاكی یا «ئێكس» دا پێشوازی ل ئیمزاكرنا رێككەفتنا د ناڤبەرا ویلایەتێن ئێكگرتی یێن ئەمریكا و ئیرانێ دا كر.
مەسرور بارزانی دبێژیت: «ئەز پێشوازیێ ل ئیمزاكرنا رێككەفتنا د ناڤبەرا ویلایەتێن ئێكگرتی یێن ئەمریكا و ئیرانێ دا دكەم. هیڤیدارم ببیتە دەستپێكا قۆناغەكا نوو یا ئاشتی و ئارامیێ ل دەڤەرێ».

بریكارێ وەزارەتا پێشمەرگەی راگەهاند، پرۆسێیا ئێكگرتنا هێزێن پێشمەرگەی قۆناغێن گەلەك ژێ بڕینە و پترییا كاران تەمام بووینە، ئاماژێ ب وێ چەندێ ژی دكەت كو میكانیزمەكا نوو بۆ پاراستنا زەڤیێن پەترۆلی دهێتە دانان.
عەبدولخالق بابیری، بریكارێ وەزارەتا پێشمەرگەی راگەهاند»بڕیارە ب هەماهەنگی د ناڤبەرا وەزارەتا پێشمەرگەی و وەزارەتێن ئەمنی یێن حوكمەتا فیدرال، میكانیزمەكا نوو بۆ پاراستنا ژێدەرێن وزێ و زەڤی و بیرێن پەترۆلێ ل هەرێما كوردستانێ بهێتە دانان».
بریكارێ وەزارەتا پێشمەرگەی گۆت ژی» ئێك ژ تەوەرێن سەرەكی یێن سەرەدانا شاندێ لەشكەری یێ حوكمەتا فیدرال بۆ هەرێما كوردستانێ، پاراستنا زەڤیێن پەترۆلێ بوو».
هەروەسا دوپات كر، د پێخەمەت پاراستنا زەڤیێن پەترۆلێ و گرنتیكرنا پرۆسەیا هنارتنا پەترۆلێ ب رێیا هەرێما كوردستانێ، هەردو حوكمەتێن هەرێمێ و فیدرال هەموو بەرهەڤی نیشا داینە.
ل دۆر رێكخستنا هێزان، عەبدولخالق بابیری دوپات كر، پرۆسەیا ئێكگرتنا هێزێن پێشمەرگەی قۆناغێن گەلەك ژێ بڕینە و ب ڤی رەنگ 90% یا وێ پرۆسەیێ تەمام دبیت.
ئاماژە ب وێ چەندێ ژی كر، ئەوا مای بتنێ هندەك ئاریشەیێن بچووك یێن تەشكیلاتێن سەربازی یە، لێ كاركرن ل سەر بەردەوامە و هەكە ب ڤێ لەزێ كار ل سەر وی بابەتی بهێتە كرن، د دەمەكێ نێزیك دا پرۆسە ب تەمامی دێ هێتە بجهئینان.

هاریكارێ سەرۆكێ حوكمەتا هەرێما كوردستانێ ئاشكرا دكەت، رێككەفتن هاتییە كرن و سۆز هاتییە دان كو هەر مەهەكێ ل گەل مووچویێ فەرمانبەرێن ئیراقێ، مووچەیێ فەرمانبەرێن هەرێما كوردستانێ ژی بهێتە هنارتن.
رێباز حەملان، هاریكارێ سەرۆكێ حوكمەتا هەرێما كوردستانێ ، د پرێس كۆنفرانسەكێ دا، راگەهاند «هەكە ئیراق ب خۆ كێشەیا ئابۆری و نەختینەیێ و پارەی نەبیت، بۆ مە ژی كێشە نابیت، چونكی رێككەفتن هاتییە كرن و سۆزا حوكمەتا نوكە یا عەلی ئەلزەیدی یە، كو هەر دەمێ مووچەیێ بەسرا هاتە دان، مووچەیێ پارێزگەهێن كوردستانێ ژی بهێتە دان».
ریباز حەملانی دوپاتی ل سەر وێ چەندێ كر «مە ل سەر وێ یەكێ ل گەل حوكمەتا فیدرال رێككەفتن كریە كو هەر دەمێ مووچەیێ پارێزگەهێن خۆ بەلاڤكر، مووچەیێ هەرێما كوردستانێ ژی بهێتە خەرجكرن».
رێباز حەملان ئەو ژی ئاشكرا كر: «ل سەر پرسا ئەسیكۆدا (سیستەمێ گومرگی) و پەترۆلی چو كێشە نەماینە و بتنێ پرسا داهاتێ ناڤخۆ مایە، و مە ب وان گۆتییە ب گۆرەی یاسایا كارگێڕییا دارایی، ژ داهاتێ هەرێما كوردستانێ پشكەك بهێتە دان ب ئیراقێ، لێ مە چو هەژمار دیار نەكرینە».

هشیار سیوەیلی، بەرپرسێ مەكتەبا پەیوەندیێن دەرڤە یا پارتی دیموكراتی كوردستان، ئاشكرا كر، كو كێشەیا سەرەكی یا د ناڤبەرا پارتی و ئێكەتیێ دا ل سەر بەلاڤكرنا پۆستانە، نە بەرنامەیێ بڕێڤەبرنێ.
سیوەیلی ئاماژە ب وێ چەندێ كر كو د كۆمبوونێن تۆم بەڕاكی ، هنارتیێ تایبەت یێ سەرۆكێ ئەمریكا، ل گەل سەركردایەتییا هەرێما كوردستانێ ، پرسا پێكئینانا حوكمەتێ و دەربازكرنا ئاستەنگا سیاسی وەك مژارەكا سەرەكی هاتییە گەنگەشەكرن.
سیوەیلی گۆت: «د ڤان 20 مەهێن بۆری دا، مە بەردەوام ئەڤ بابەتە ل گەل دۆستێن خۆ باس كرییە».
ناڤبری دیتنا خۆ دیار كر كو هەكە ئالیێن كوردستانێ بخۆ كێشەیێن خۆ چارەسەر نەكەن، چو وەلاتەكێ دی نەشێت بۆ وان چارەسەر بكەت. ئەمریكا وەكو دۆستەك، داخوازا رێككەفتنێ ژ هەموو ئالییان دكەت، چونكە بەردەوامبوونا ڤێ كێشەیێ كارتێكرنەكا نەرێنی ل سەر پێگەهێ هەرێمێ ل ئاستێ نێڤدەولەتی و پەیوەندیێن وێ ل گەل بەغدا دروست كرییە.
ل دۆر دانوستاندنێن ل گەل ئێكەتیێ، سیوەیلی ئاماژە ب وێ چەندێ دا كو دۆسێیا بەرنامەیێ بڕێڤەبرنا حوكمەتێ ب رێكا لژنەیێن هەڤپشك هاتبوو ئێكلاكرن و هەردو ئالییان ئیمزا ل سەر كربوو، لێ پرۆسێس ل سەر پۆستان تووشی كێشەیێ بوو.
سیوەیلی دوپات كر «تنێ رێیا چارەسەریێ، روونشتن و بەردەوامبوونا دیالۆگێ یە».
هەروەسا ئاماژە ب دەستپێشخەرییا سەرۆك بارزانی كر و گۆت: «پارتی ئەڤ دەستپێشخەرییە ب جدی وەرگرتییە و كۆمیتەیا ناڤین دوپاتی ل سەر چڕكرنا بزاڤان كرییە، ب تایبەت ل گەل ئێكەتیێ وەكو ئالییەكێ سەرەكی».
ل دۆر كاراكرنا پەرلەمانێ كوردستانێ، سیوەیلی دیار كر كو پێدڤییە ئالی پێشوەخت رێككەڤن، چونكە كاراكرنا پەرلەمانی پێنگاڤا ئێكێ یە بۆ راگەهاندنا كابینەیا نوو. بەرپرسێ مەكتەبا پەیوەندیێن دەرڤە یا پارتی دیموكراتی كوردستان ئاماژە ب وێ كر كو پارتی ل سەر ئاستێ بلند بەرهەڤی دیالۆگێ یە و گەشبینییا خۆ بۆ چارەسەركرنا كێشەیان دیار كر، چونكە هەموو ئالی تێگەهشتینە كو هەرێما كوردستانێ د رەوشەكا هەستیار دا دەرباز دبیت و پێدڤی ب دوماهیئینان ب ڤێ ئاستەنگا سیاسی هەیە.

فەلاح مستەفا، هاریكارێ سەرۆكێ هەرێما كوردستانێ بۆ كارێن دەرڤە، راگەهاند، سەرەدانا «تۆم بەڕاك» هنارتیێ تایبەتێ سەرۆكێ ئەمریكا بۆ ئیراقێ، ژ بۆ دوپاتكرنا پێگیربوونا واشنتۆنێ بوو ب پەیوەندییەكا درێژخایەن ل گەل ئیراقەكا دیموكرات و خودان سەروەری.
ب گۆتنا فەلاح مستەفای، ئەمریكا پشتەڤانیێ ل حوكمەتا نوو یا ئیراقێ دكەت و هیڤیدارە پەیوەندیێن هەولێرێ و بەغدایێ باش بن. ناڤبری ئاماژە ب وێ چەندێ كر كو ئالیێ ئابۆری و هاتنا كۆمپانیێن ئەمریكی بۆ هەرێمێ گرنگە.
ل دۆر پرسا چەكێ ل دەرڤەی دەستهەلاتا دەولەتێ، گۆت»ئەمریكا وەلاەتەكێ پراكتیكی یە و دڤێت چەك تنێ د دەستێ دەولەتێ دا بیت، د هەمان دەم دا دزانن ئەڤ پرۆسە ئالۆزە و دەم بۆ دڤێت».
ل دۆر وان دەنگۆیێن دبێژن بەڕاك كار بۆ لاوازكرنا هەرێمێ دكەت، فەلاح مستەفای ئەو خواندنە ب «نەواقعی» ناڤ كرن و گۆت: «بەرۆڤاژی، دیتنێن وی ل هەرێمێ جهێ خۆشحالیێ بوون، چنكو تێگەهشتنەكا واقعیانە بۆ رەوشێ هەبوو.» ناڤبری دوپات كر كو ئەمریكا هەرێما كوردستانێ وەك دۆست و هەڤپەیمان دبینیت.
سەبارەت ب كۆمبوونا سێقۆلی یا نێچیرڤان بارزانی، مەزلوم عەبدی و تۆم بەڕاكی، فەلاح مستەفای ئاشكرا كر كو باسێ رەوشا سووریێ و پرۆسێسا سیاسی ل رۆژئاڤایێ كوردستانێ هاتە كرن و بەڕاكی ئاستەنگێن ل بەر رێككەفتنێ تۆمار كرینە دا بكارن كاری ل سەر بكەن.
ل دووماهیێ، فەلاح مستەفای راگەهاند، تۆم بەڕاكی سلاڤێن «ترەمپی» گەهاندنە سەرۆكێ هەرێما كوردستانێ و خۆشحالییا وی نیشادا كو هەرێما كوردستانێ وەك دۆستێن خۆ دبینن.

هەرێما كوردستانێ د چارچۆڤێ بزاڤێن خۆ یێن بەردەوام دا بۆ بهێزكرنا پێگەهێ دیپلۆماسی و بهێزكرنا پەیوەندیێن خۆ ل گەل كومەلگەها نێڤدەولەتی، د نووترین پێشهات دا دیار بوویە كو چار دەولەتێن دی بەرهەڤییا خۆ دیار كریە بۆ ڤەكرنا نوونەرایەتییا فەرمی ل باژێڕێ هەولێرێ.
د. زیرەك زێباری، ئەندامێ لژنەیا پەیوەندیێن دەرڤە ل جڤاتا نوونەرێن ئیراقێ، د داخویانییەكێ دا بۆ میدیایان ئاشكەرا كر كو هەر ئێك ژ ئۆكرانیا، ئازەربایجان، بەحرێن و عومان ب مەرەمن نوونەرایەتیێن خۆ ل پایتەختێ هەرێما كوردستانێ ڤەبكەن. ل گۆرەی پێزانێن زێباری، ڤان وەلاتان پێشتر دەستپێشخەری كرییە و نیازا وان یا جدی هەیە بۆ ڤێ پێنگاڤێ، لێ هندەك ئەگەرێن دەرەكی بووینە ئاستەنگ ل هەمبەر بجهئینانا ب لەز یا ڤی بڕیاری.
دەربارەی ئەگەرێن پاشكەفتنا ڤەكرنا نوونەرایەتییان، د. زیرەك زێباری راگەهاند كو وەلاتێن ئۆكرانیا و ئازەربایجان ب ئەگەرێ كارتێكرنێن شەڕێ ئۆكرانیا و هندەك ڕێكارێن كارگێڕی كو دڤێت ژ بەغدایێ بهێنە ئەنجامدان، پرۆسەیا وان ب سستی برێڤە دچیت. ژ ئالییەكێ دی ڤە، وەلاتێن بەحرێن و عومان كو بەرهەڤییەكا تەمام نیشا دایە، ب ئەگەرێ رەوشا هەستیارا دەڤەرێ و گرژیێن د ناڤبەرا ئیسرائیلێ و ئیرانێ دا، بۆ دەمەكێ بەروەخت پلانێن ڤەكرنا نوونەرایەتیێن خۆ پاشئێخستینە.
د ڤی چارچۆڤەی دا، د. زیرەك زێباری دوپاتی ل سەر رۆلێ جڤاتا نوونەرێن ئیراقێ كر و راگەهاند كو لژنەیا پەیوەندیێن دەرڤە یا جڤاتا نوونەران ب جدی كار ل سەر ڤێ پرسێ دكەت.
ناڤبری ئاماژە ب وێ دا كو ئەركێ سەر ملێ وانە ل بەغدایێ گڤاشتنێ دروست بكەن و ئاستەنگێن رێكاری لابدەن، داكو ئەو وەلاتە بشێن ل نێزیكترین دەم نوونەرایەتیێن خۆ ل هەولێرێ ڤەبكەن.
ڤەكرنا ڤان نوونەرایەتیێن نوو، وەكو پێنگاڤەكا گرنگ دهێتە هەژمارتن بۆ پتر ڤەكرنا هەرێما كوردستانێ ل هەمبەر وەلاتێن عەرەبی و جیهانێ، ئەڤە ژی دێ كارتێكرنا ئەرێنی ل سەر بهێزكرنا پەیوەندیێن سیاسی، ئابۆری و كەلتووری د ناڤبەرا هەرێما كوردستانێ و وان دەولەتان دا هەبیت.

پەیڤدارێ ئەنجوومەنێ نشتیمانی یێ کوردی ل سووریێ دیار دکەت، پێدڤیە کورد د ئاڤاکرنا سووریا نوو دا پشکدار بن و هەرێما کوردستانێ رۆلەک سەرەکی بۆ پاراستنا رۆژئاڤایێ کوردستانێ دگێریت و کارێن باش بۆ ئێکەتیا کوردان ل سووریێ هاتیە کرن.

فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ دیار کر، سەرۆکێ هەرێما کوردستانێ بەرێز نێچیرڤان بارزانی رۆلەک گەلەک مەزن بۆ ئێکەتیا ناڤمالیا کوردی ل رۆژئاڤایێ کوردستانێ دگێریت و خەباتێن بۆ ئێکەتیا کوردان ل رۆژئاڤایێ کوردستانێ ب رەنگەکێ باش هەتا نها ژی بەردەوامن و گۆت: (بابەتێ سووریێ گەلەک جودایە، چونکی د ئاستێ نێڤدەولەتی و هەرێمی دا هەر وەلاتەک ل سووریێ کار بۆ بەرژەوەندیێن خوە دکەت و بێگومان وەکو کورد مە دڤێت ئەم د ئاڤاکرنا سووریا نوو دا پشکدار بین، ئانکو ببینە شریک د رێڤەبرنا سووریێ دا، وەلاتێ سووریێ تنێ یێ عەرەبان نینە).
ناڤهاتی ئەو یەک ژی دیار کر دڤێت کورد و هەموو پێکهاتیێن دی یێن ل سووریێ د رێڤەبرنا سووریێ دا پشکدار بن و ژ بەر ڤێ یەکێ ژی گرنگە سیستەمێ سووریێ ببیتە فیدرالی، چونکی ئێدی کەس نەشێت سووریێ وەکو بەری نها برێڤە ببەت و فیدرالی باشترین سیستەمە بۆ سووریێ و گۆت: (مە بەری نها ژی داخواز کریە کو دستوورەک نوو بۆ سووریێ بهێتە نڤیسین و دڤێت ناڤ ژی ببیتە کۆمارا سووریێ نە یا عەرەبی، چونکی سووریێ یا هەموو پێکهاتەیێن ل سووریێ یە و ژ بەر ڤێ یەکێ ژی پێدڤیا سووریێ ب دستوورەک نوو و دیموکراتی هەیە کو ببیتە ژێدەرێ چارەسەریا هەموو پرسێن نها یێن ل سووریێ).
پەیڤدارێ ئەنجوومەنێ نشتیمانی یێ کوردی ل سووریێ د بەردەوامیا ئاخڤتنا خوە دا سوپاسیا رۆلێ هەرێما کوردستانێ ژی کر کو د مەرجێن گەلەک زەحمەت دا خەلکێ هەرێما کوردستانێ ب هەموو شیانێن خوە هاریکاریا برایێن خوە ل رۆژئاڤایێ کوردستانێ کرن و ئەو ب تنێ نەهێلن و ئەو یەک ژی گەلەک یا گرنگە و گۆت: (ب تایبەتی ژی دەزگەهێ خێرخوازیێ بارزانی گەلەک هاریکاریا خەلکێ مە ل رۆژئاڤایێ کوردستانێ کر و هەتا نها ژی هاریکاریا خەلکێ مە دهێتە کرن).
ناڤهاتی د دووماهیا ئاخڤتنا خوە دا ئەو یەک ژی نەڤەشارت کو پێدڤیا سووریێ ب سیستەمەک نوو هەیە، پرسێن ل سووریێ هەتا نها ژی نەهاتینە چارەسەرکرن، دەستێوەردانێن دەرەکی ژی بووینە پشکەک ژ ئاستەنگان، لێ هەر چاوا بیت دڤێت دەستهەلاتا نها یا سووریێ هەست ب بەرپرسیاریا خوە بکەت و پرسێن هەی چارەسەر بکەت و گۆت: (سیستەمێ نها یێ سووریێ نەشێت ببیتە بەرسڤا پرسێن هەی، ژ بەر ڤێ یەکێ ژی مە دڤێت سیستەمێ سووریێ ببیتە فیدرالی و مافێ کوردانە کو دەڤەرێن خوە برێڤە ببەن و گرنگە د دستوورێ نوو یێ سووریێ دا ئاماژە ب ڤێ یەکێ ژی بهێتە کرن).

ب هەلكەفتا هاتنا سەرێ سالا نوو یا مشەختی (1448)، سەرۆك مەسعود بارزانی، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، د پەیامێن جودا دا گەرمترین پیرۆزباهی ئاراستەی تەڤایا خووشك و برایێن موسلمان ل كوردستانێ، ئیراقێ و جیهانێ كرن.
د وان پەیامان دا، سەرۆك بارزانی، سەرۆكێ هەرێمێ و سەرۆكێ حوكمەتا هەرێمێ هیڤی خواستن ئەڤ هەلكەفتا پیرۆز ببیتە رێخۆشكەر بۆ ئاشتی، تەبایی و ئارامییا بەردەوام بۆ دەڤەرێ و تەڤایا مرۆڤایەتیێ. هەروەسا ژ خودایێ مەزن و مێهرەبان نزاكار بوون كو سالا نوو یا مشەختی ببیتە سالا خێر و خۆشگوزەرانیێ بۆ هەموو ئالییان.

ل رۆژا سێشەمبی 16/6/2026، ل پیرمام، سەرۆك مەسعود بارزانی پێشوازی ل بالیۆز تۆم باراک، هنارتیێ تایبەتێ سەرۆكێ ئەمریكا بۆ كاروبارێن ئیراقێ و سووریێ كر.
بارەگەهێ بارزانی د بەیاننامەیەكێ دا بەلاڤكر» د دیدارێ دا، هنارتیێ تایبەتێ سەرۆكێ ئەمریكا، سەرەرای گەهاندنا سلاڤێن سەرۆك ترەمپی ب سەرۆك بارزانی، خۆشحالییا خۆ ب دیتنا سەرۆك بارزانی نیشادا و پێزانین بۆ رۆل و پێگەهێ سەرۆك بارزانی ل ئارامییا ئیراقێ و دەڤەرێ هەبوو. هەروەسا دوپاتی ل وێ چەندێ كر كو ئیراق و دەڤەر پێدڤی ب ئارامیێ نە و د ڤێ چەندێ دا، هەرێما كوردستانێ رۆلەكێ گرنگ و جهێ گرنگیێ ل نوكە و پاشەڕۆژێ دا هەیە. دیسان حێبەتییا خۆ ب گەشەكرن و پێشكەفتنا هەرێما كوردستانێ دەربڕی و ب نموونەیی هەژمارت.
بارەگەهێ بارزانی دیاركر ژی» سەرۆك بارزانی دوپاتكر كو هەرێما كوردستانێ هەردەم فاكتەرێ ئارامیێ بوویە و ل گەل دیالۆگ و چارەسەرییا دیپلۆماسی بوویە بۆ هەموو كێشەیێن ئیراقێ و دەڤەرێ. هەرێما كوردستانێ نەبوویە پشكەك ژ كێشەیان، بەلێ ب ناهەقی چریسكێن شەڕ و ناكۆكییێن دەڤەرێ بەركەفتییە. سەرۆك بارزانی ئەو ژی بەرچاڤكر كو پێدڤییە رۆژهەلاتا ناڤین ب رەوشەكا ئارام و خۆشگوزەران بۆ ئاكنجیێن خۆ بچیت».
د تەوەرەكێ دی یێ دیدارێ دا، باسێ گرنگییا پێكڤەكاركرنێ و هەماهەنگییا هەرێما كوردستانێ و حوكمەتا نوو یا ئیراقێ هاتە كرن. هنارتیێ تایبەتێ ئەمریكا باس ل پێدڤییا ئارامكرن و پاراستنا سیستەمێ سیاسی یێ ئیراقێ و پاراستنا رۆلێ دەولەتێ ل كۆنترۆلكرنا هێزێن چەكدارێن نەفەرمی كر و پشتەڤانییا خۆ بۆ سەرۆك وەزیرێن ئیراقێ دوپاتكر د پرۆسەیا دامالینا چەكی ژ دەستێ میلیشیایان و هاتنەڤە بۆ بن دەسەلاتا دەولەتا ئیراقێ.
سەبارەت ب حوكمەتا نوو یا ئیراقێ، سەرۆك بارزانی سەرەرای دوپاتكرنێ ل سەر پشتەڤانیكرنا عەلی ئەلزەیدی، دیاركر كو پێدڤییە هەموو ئالی پەندێ ژ شاشیێن بۆری وەرگرن و ل سەر بنەمایێ هەڤپشكییا راستەقینە، هەڤسەنگیێ و ل هەڤهاتنێ د چارچۆڤەیا دەستووری دا كار بكەن.
د پشكەكا دی یا دیدارێ دا، بیروڕا ل دۆر بارودۆخ و هەڤكێشەیێن دەڤەرێ هاتنە لێكگۆهارتن و هەردو ئالی ل سەر وێ چەندێ هەڤڕا بوون كو پێكڤە كاركرن ل سەر كۆمەكا ئەولەویەتێن هەڤپشك بكەن ژ بۆ ئارامییا ئیراق و هەرێما كوردستانێ و ئاڤاكرنا دۆستایەتییا ستراتیژییا درێژخایەن د بوارێن ئابۆری و وەبەرهێنانێ دا.

ل رۆژا سێشەمبی 16/6/ 2026، نێچیرڤان بارزانی، سەرۆكێ هەرێما كوردستانێ، كۆمبوونەكا هەڤپشك ل گەل تۆم باراک، هنارتیێ تایبەتێ دۆنالد ترەمپ، سەرۆكێ ئەمریكا بۆ كاروبارێن ئیراقێ و سووریێ، و مەزلووم عەبدی، فەرماندەیێ گشتی یێ هێزێن سووریای دیموكرات (هەسەدە) ئەنجام دا.
سەرۆكاتییا هەرێما كوردستانێ د بەیاننامەیەكێ دا بەلاڤكر» د كۆمبوونێ دا، دووماهی پێشهاتێن سیاسی و ئەمنی یێن دەڤەرێ و رەوشا سووریێ و هاریكارییا كوردان و دیمەشقێ هاتنە گەنگەشەكرن. هنارتیێ تایبەتێ سەرۆكێ ئەمریكا دوپاتی ل سەر بەردەوامییا پشتەڤانییا وەلاتێ خۆ كر بۆ پاراستنا ئارامیێ و دیتنا چارەسەریێن گونجای بۆ كێشەیێن سووریێ».
سەرۆكاتییا هەرێمێ د بەیاننامەیا خۆدا دیاركر « نێچیرڤان بارزانی، سەرۆكێ هەرێما كوردستانێ دوپات كر كو دانوستاندن و تێكگەهشتنا د ناڤبەرا ئالییان دا و پاراستنا مافێن كوردان و پێكهاتەیان ل سووریێ، رێكا چارەسەركرنا كێشەیانە. هەروەسا هاریكاری و پشتەڤانییا هەرێما كوردستانێ بۆ چارەسەركرنا كێشەیان و پاراستنا ئاسایش و ئارامیێ نیشا دا».
پێشڤەبرنا هاریكاری و هەماهەنگییا هەڤپشك ژ بۆ بەرهنگاربوونا مەترسیێن تیرۆرێ و پەیداكرنا ئاسایش و ئارامییەكا بنەجه ل دەڤەرێ، تەوەرەكێ دی یێ كۆمبوونێ بوو.