سەرۆك بارزانی پێشوازی  لمحەمەد حەلبووسی، سەرۆكێ پارتا تەقەدووم و سەرۆكێ بەرێ یێ جڤاتا نوونەرێن ئیراقێ كر، د دیدارێ دا، باسێ رەوشا سیاسی ل ئیراقێ و دووماهی پێشهات و گوهۆڕینێن ئیراقێ و دەڤەرێ هاتە كرن. هەروەسا بیروڕا ل دۆر پەیوەندیێن د ناڤبەرا حوكمەتا هەرێما كوردستانێ و بەغدایێ هاتنە لێكگۆهارتن و دوپاتی ل سەر هەماهەنگی و پەیوەندیێن د ناڤبەرا ئالیێن سیاسی یێن ئیراقێ دا هاتە كرن، ژ بۆ دەربازبوونا ژ ئاستەنگان و چارەسەركرنا كێشەیان.

مەسرور بارزانی، سەرۆكێ حوكمەتا هەرێما كوردستانێ و جێگرێ سەرۆكێ پارتی دیموكراتی كوردستان، پێشوازی ل محەمەد حەلبووسی، سەرۆكێ پارتا تەقەدووم و شاندەكێ د گەلدا كر.
هەردو ئالییان دوپاتی ل سەر پێدڤییا پێشئێخستنا پەیوەندی و هاریكاری و هەماهەنگییا هێز و ئالیێن سیاسی یێن ئیراقێ كرن، ژ بۆ رووبڕووبوونا كێشە و ئاستەنگ و ئاریشەیێن جوراوجور.
هەردو ئالی هەڤڕا بوون ل سەر گرنگییا پاراستنا سیستەمێ دیموكراسی و فیدرالی یێ ئیراقێ و پشتەڤانیكرنا حوكمەتا فیدرالی د پێخەمەت پاراستنا مافێن دەستووری یێن هەموو پێكهاتەیان و خزمەتكرنا هەموو وەلاتیێن ئیراقێ ب شێوەیەكێ دادپەروەرانە و بێ جوداهی.

مەسرور بارزانی، سەرۆكێ حوكمەتا هەرێما كوردستانێ راگەهاند ل دووماهی كۆمبوونا خۆ جڤاتا وەزیران دوپاتی ل سەر مافێ دستووری یێ هەرێما كوردستانێ كر بۆ وەرگرتنا پشكا خۆ ژ وێ پەترۆلێ یا بۆ بكارئینانا ناڤخۆ ل سەر ئاستێ ئیراقێ هاتییە تەرخانكرن، ل گورەی هەژمارا ئاكنجییان.
سەرۆكێ حوكمەتا هەرێما كوردستانێ دیاركر، مە هەردوو وەزارەتێن دارایی و ئابۆری و پلاندانانێ راسپاردن ب هەماهەنگی ل گەل تەمامییا وەزارەت و دەزگەهان، بۆچوونا ئێكگرتی یا حوكمەتێ و خشتەیێ داخوازییێن هەرێما كوردستانێ بۆ بودجەیا فیدرال یا سالا 2027 بەرهەڤ بكەن.

فراكسیۆنا پارتی دیموكراتی كوردستان ل جڤاتا نوونەرێن عێراقێ، بەیاننامەیەك ب ناڤنویشانێ (ل سەر خوون و ئازارێ چیڕۆكا مانێ هاتە نڤێسین) بەلاڤكریە و تێدا هاتییە:
تاوانا جینۆسایدا بارزانییان، بەرپەرەكێ پڕ ژ ئازارە د دیرۆكا كوردستانێ دا، كو ریهوریشالێن وێ ل هاڤینا سالا 1983 دەستپێكر، دەمێ ل ساتەكێ دا، هەشت هزار بارزانییێن گەنج و پیر ل بیابانێن بێ رەحم یێن ئیراقێ بن ئاخكرین و نڤشەكێ تەمام یا بارزانییان د بێدەنگیەكا سامناك دا بێسەروشوێن كرن. ئەندازیارێ ڤی تاوانی پاشێ ب شانازی ڤە گۆت: «مە هنارتن بۆ جەهنەمێ»، لێ د هەلە بوو، چونكی ل گەل جینۆسایدكرنا هەشت هزار زەلامێن بارزانی، ژیان نەوەستیا، شۆرەش بەردەوام بوو و ئالایا كوردایەتیێ نەچەمییا.
هەروەسا د ڕاگەهاندنێ دا هاتیە: ئەو ژنێن قارەمان یێن بارزان كو هەڤژین و كور و بابێن وان ژێ هاتبوونە ستاندن، نەك تنێ كۆل نەدا، بەلكو بوونە قەڵغانەكا پولایین و چرایا مالێن خوە ب بڵێسە هێلا و نەوەیەكا نوو یا بارزانیا پێگەهاند، نەوەیەك كو هەلگرێ هەمان گیانێ بەرگریێ و خۆڕاگریا باب و باپیرێن خوە بوون.
د پشكەكا دی یا ڕاگەهاندنێ دا هاتیە: ل ڤێ بیرئینانا خەمگین دا، سەرێ ڕێز و نەوازشێ ل بەرامبەر گیانێ پاك یێ شەهیدێن بارزان دچەمینین و سلاڤێن وەفاداریێ بۆ دایك و ژنێن قارەمان یێن بارزان د هنێرین و بەلێنێ ددەین كو ل بەغدا و د ناڤا هەموو دامەزراوێن فیدرالی دا، هەموو هەول و شیانێن خوە یێن یاسایی و سیاسی ئێخینە د خزمەتا بنەمالێن سەربلند یێن جینۆسایدكری دا، ژ بۆ دابینكرنا مافێن وان یێن دستووری و قەرەبووكرنا وان یا ماددی و مەعنەوی.
بیرئینانا جینۆسایدا بارزانیا نیشانەكا زیندی یا ئیرادەیا گەلەكی یە كو د قووڵترین تاریاتیێن ژیانێ دا، چرایا ژیانێ و ئازادیێ هەر ب گەشاوەیی دهێلیت.

ب، سه‌رجان مەحمود:

ئاژانسەکا بریتانی دیار کریە جێگرێ سەرۆک کۆمارێ تورکیا بۆ بەرپرسێن ئیرانێ دیار کریە هەکە ئێرشێن وان ل سەر پارتێن رۆژهەلاتێ کوردستانێ بەردەوام بن ئەو یەک دێ بیتە ئەگەر ئەو هێزە خوە نێزیکی ئەمریکا و ئسرائیلێ بکەن.

ئاژانسا میدل ئێست ئای یا بریتانی د راپۆرتەکێ دا دیار کریە، جەودەت یلماز جێگرێ سەرۆک کۆمارێ تورکیا د سەرەدانا خوە یا مەها بۆری بۆ ئیرانێ دا ل گەل بەرپرسێن وی وەلاتی کۆمبوویە و بۆ وان دیار کریە، دڤێت هوون ئێرشێن خوە ل دژی پارتێن کوردی یێن رۆژهەلاتێ کوردستانێ ل هەرێما کوردستانێ بدەنە راگرتن، چونکی هەکە ئێرشێن ئیرانێ ل دژی وان هێزێن کوردی بەردەوام بن ئەو یەک دێ وەسا کەت کو پارتێن کوردی یێن ئیرانێ خوە نێزیکی ئەمریکا و ئسرائیلێ بکەن و ئەو یەک دێ ئەنجامێن خوە یێن گەلەک خراب بۆ ئیرانێ و دەڤەرێ هەبیت.
هەمان ئاژانسێ ئەو یەک ژی دیار کریە، جێگرێ سەرۆک کۆمارێ تورکیا بۆ بەرپرسێن ئیرانێ دیار کریە، بەردەوامیا ئێڕشێن ئیرانێ ل سەر بارەگایێن پارتێن کوردی چو مفایا خوە بۆ ئیرانێ نابیت و دێ وەسا کەت کوردێن ئیرانێ زێدەتر ژ دەستهەلاتا نها توورە بن و ئسرائیل و ئەمریکا ژی ژ دەلیڤەیەکا وەسا دگەرن دا کوردان ل دژی ئیرانێ بکار بینن، ژ بەر ڤێ یەکێ ژی دڤێت ئیران ئێرشێن خوە بدەنە راگرتن، چونکی نها رەوش گەلەک هەستیارە و ئێرشێن وەسا دێ رەوشێ گەلەک ئالۆز کەن.
ل گۆر هەمان ئاژانسێ هەمان بەرپرسێ تورکیا ئاماژە ب ڤێ یەکێ ژی کریە کو وەکو تورکیا وان ل گەل پەکەکێ دەست ب قووناغەکا نوو کرینە و تورکیا دڤێت ب رێکێن سیاسی بابەتێ پەکەکێ چارەسەر بکەت، لێ بەردەوامیا ئێرشێن ئیرانێ دشێت کاریگەریەکا خوە یا گەلەک خراب بۆ بابەتێ هلوەشاندنا پەکەکێ و راگرتنا شەڕێ چەکداری هەبیت و دڤێت ئیران رێ نەدەت تشتەک وەسا روو بدەت.
د پشکەکا دی یا راپۆرتێ دا ئاماژە ب ڤێ یەکێ ژی هاتیە کرن کو جێگرێ ئەردۆغانی د هەڤدیتنا ل گەل سەرۆکێ پەرلەمانێ ئیرانێ دا بۆ وی دیار کریە، ئەمریکا و ئسرائیلێ بزاڤا ڤێ یەکێ دکرن کو هێزێن کوردی ل دژی ئیرانێ بکار بینن، لێ تورکیا شیا ب رێیا پەیوەندیێن خوە یێن تایبەت ئاستەنگان دروست بکەت، چونکی هەکە تشتەک وەسا روو بدەت دێ رەوشا دەڤەرێ ب گشتی تێک چیت و هەروەسا دێ کاریگەریا خوە یا گەلەک خراب بۆ تورکیا ژی هەبیت، ژ بەر ڤێ یەکێ ژی دڤێت ئیران ئێرشێن خوە یێن ل دژی پارتێن کوردی بدەتە راگرتن و ب ئێرشێن خوە وەسا نەکەت کو کورد نەچار بن خوە نێزیکی ئەمریکا و ئسرائیلێ بکەن، هەکە تشتەک وەسا روو بدەت دێ بۆ ئیرانێ گەلەک یا خراب بیت.
د دووماهیا راپۆرتێ دا ئەو یەک ژی هاتیە دیار کرن، تورکیا گەلەک دترسیت کو شەڕ و ئالۆزیێن ل دەڤەرێ کاریگەریا خوە ل سەر قووناغا نها ل تورکیا بکەت، چونکی بەرپرسێن تورکیا وەسا دبینن هەکە ل ئیرانێ ئالۆزی دروست ببن و رژێما نها یا ئیرانێ ژناڤ بچیت دێ وەکو سووریێ دەلیڤەیەکا دی بۆ کوردان و ب تایبەت ژی بۆ پەکەکێ هێتە پێش و دبیت وی دەمی پەکەکە شەڕی نەدەتە راگرتن و ئەو یەک ژی دێ زیانا خوە یا گەلەک مەزن بۆ تورکیا هەبیت، ژ بەر ڤێ یەکێ ژی تورکیا ب هەموو رەنگەکێ کار دکەت ئەمریکا رێ نەدەت ئسرائیل کارتا هێزێن کوردی ل دژی ئیرانێ بکار بینیت و ژ بەر ڤێ یەکێ ژی تورکیا یا پێدڤی دکەت دا ئەمریکا بشێت ب رێیا دانوستاندنان ل گەل ئیرانێ بگەهیتە رێککەفتنەکا نوو و شەڕێ هەی ب دووماهی بهێت، لێ بابەت وەسا ب ساناهی نینە، چونکی ئسرائیلێ دڤێت دەستهەلاتا نها یا ئیرانێ نەمینیت و تورکیا ژی وەسا دبینیت هەر گوهۆڕینەک ل ئیرانێ روو بدەت دێ دەلیڤەیەکا دی بۆ کوردان هێتە پێش و پەکەکە ژی دشێت ژ ئالۆزیێن هەی مفایێ وەربگریت و ئەو یەک دێ زیانا خوە بۆ قووناغا نها ل تورکیا هەبیت.
ئەو یەک د دەمەکێ دایە کو بەری نها چەندین بەرپرسێن ئسرائیلێ و ئەمریکا دیار کربوون دەمێ ئەمریکا و ئسرائیلێ پێکڤە ئێرشی ئیرانێ کری وی دەمی پلان ئەو بوو هێزێن کوردی یێن رۆژهەلاتێ کوردستانێ ژی دەربازی ئیرانێ ببن و ل دژی ئیرانێ شەڕی بکەن، لێ تورکیا ب رێیا ترامپی بەحسێ مەترسیێن وێ پلانێ کر و د ئەنجام دا ترامپی ئەو یەک دا راگرتن و نها ژی تورکیا ب هەموو رەنگەکێ کار دکەت کو کورد د شەڕێ ئەمریکا و ئیرانێ دا پشکداریێ نەکەن، چونکی تشتەک وەسا دێ بیتە ئەگەرێ بهێزبوونا پێگەهێ کوردان و ئەو یەک ژی مەترسیەکا مەزنە بۆ تورکیا و دبیت وەسا بکەت بەرپرسێن پەکەکێ دەست ژ قووناغا نها یا تورکیا بێ تیرۆر بەردەن و راگرتنا شەڕی ژی ب دووماهی بهێت.

جڤاتا وەزیران رژدی ل سەر مافێ دەستووری یێ هەرێما کوردستانێ دکەت بۆ وەرگرتنا پشکا خۆ ژ پەترۆلا هاتییە تەرخانکرن بۆ بکارئینانا ناڤخۆ ل سەر ئاستێ ئیراقێ ل دووڤ هژمارا ئاکنجییان.
جڤاتا وەزیران، هەردو وەزارەتێن دارایی و ئابۆری و پلان دانانێ راسپاردن کو ب هەماهەنگی دگەل هەمی وەزارەت و دامەزراوەیان، دیتنا ئێکگرتی یا حکومەتێ و خشتەیێ داخوازیێن هەرێما کوردستانێ بۆ بودجەیێ فیدرال یێ سالا 2027ێ ئامادە بکەن.

ئەڤڕۆ چارشەمبی، 29ێ تیرمەها 2026ێ، ب سەرۆکاتییا مەسرور بارزانی سەرۆکێ جڤاتا وەزیران، جڤاتا وەزیرێن هەرێما کوردستانێ کۆمبوو.
د دەستپێکا کۆمبوونێ دا، جڤاتا وەزیران دلگرانییا خۆ یا کوور دیار کر بەرامبەر بەردەوامییا ئێرشێن تێرۆریستی بۆ سەر هەرێما کوردستانێ و ب توندترین رەنگ شەرمزار کر. جڤاتا وەزیران رژدی ل سەر وێ چەندێ کر کو ئەڤ ئێرشە گەفەکا دیارن بۆ سەر ئاسایش، سەقامگیری، ژیانا وەلاتییان و بەرژەوەندییێن هەرێما کوردستانێ و ئیراقێ.
جڤاتا وەزیران دوپات ژی دکەت کو هەرێما کوردستانێ چ جاران نەبوویە پشکەک ژ ئالۆزییێن دەڤەرێ، بەلکو هەر دەم پالپشتا ئاشتی، دیالۆگ و هەڤسۆزییا هەڤسۆیێن باش بوویە.

سەرۆكێ حوكمەتا هەرێما كوردستانێ پێشوازی ل وەزیرێ پەروەردەیێ سووریێ كر و د دیدارەكێ دا دوپاتی ل سەر پێشئێخستنا پەیوەندییان د بوارێ پەروەردە و خواندنێ دا هاتە كرن، هەروەسا وەزیرێ سووریێ سوپاسییا هەرێمێ كر بۆ حەواندنا ئاوارەیێن وەلاتێ خۆ.
ل رۆژا چارشەمبی، 29ێ تەممووزا 2026، نڤیسینگەها سەرۆكێ حوكمەتا هەرێمێ راگەهاند، مەسرور بارزانی، سەرۆكێ حوكمەتا هەرێما كوردستانێ، پێشوازی ل محەمەد عەبدولرەحمان توركۆ، وەزیرێ پەروەردە و خواندنا سووریێ كر.
د دیدارێ دا هەردو ئالییان دوپاتی ل سەر گرنگییا بهێزكرنا پەیوەندییێن د ناڤبەرا هەرێما كوردستانێ و سووریێ د بوارێن جۆراوجۆر دا ب تایبەتی د پەروەردە و خواندنێ دا كرن.
وەزیرێ پەروەردە و خواندنا سووریێ، سوپاسییا حوكمەتا هەرێما كوردستانێ كر بۆ مێهڤانداریكرنا سەدان هزار ئاوارەیێن سووری د سالێن بۆری دا و ئاماژە ب پێنگاڤێن حوكمەتا سووریێ ژی دا بۆ گرنگیدان ب خواندنێ ب زمانێ كوردی ل سووریێ.
سەرۆكێ حوكمەتا هەرێما كوردستانێ بەرهەڤییا حوكمەتا هەرێمێ بۆ هەر هەڤكاری و هەماهەنگییەكێ ل گەل حوكمەتا سووریێ و بهێزكرنا پەیوەندییێن دووقۆلی دیار كر.

وەزیرێ ناڤخۆ یێ حوكمەتا هەرێما كوردستانێ رادگەهینیت، هەرێما كوردستانێ د ئالۆزییێن دەڤەرێ دا بێلایەنە و رێ نەدایە ئاخا وێ بۆ مەرەما هێرشكرنێ سەر وەلاتێن جیران بهێتە بكارئینان، ئاماژێ ب وێ چەندێ ژی دكەت كو فەرەنسا هەڤكارەكێ گرنگ یێ هەرێمێ بوویە و چو دەمان هەلوەستێن وان ژ بیر ناكەن.
رێبەر ئەحمەد، وەزیرێ ناڤخۆ یێ حوكمەتا هەرێما كوردستانێ د كۆنگرەیەكێ رۆژنامەڤانی دا راگەهاند، فەرەنسا رۆلەكێ گرنگ و كارتێكەر هەیە، ب تایبەتی ل هەرێما كوردستانێ و د گەلەك روودانان دا هەڤكار و پشتەڤانا مە بوویە، ب تایبەت د شەڕێ دژ داعشێ و تا نۆكە ژی، سوپاسییا هەلوەستێن وان دكەین.
سەبارەت ب هێرشێن درۆنی یێن سەر هەرێما كوردستانێ، وەزیرێ ناڤخۆ گۆت «ل دەستپێكا ڤان ئالۆزییێن ل دەڤەرێ رووداین، مە دوپات كر كو هەرێما كوردستانێ بێلایەنە و مە رێ نەدایە ژ ئاخا مە ڤە ئاریشە بۆ چ وەلاتەكێ جیران دروست ببیت، لێ ب مخابنی ڤە ژ هەموو ئالییەكێ ڤە هێرش هاتییە كرن ل سەر هەرێمێ و هاتییە ئارمانجكرن، ب وێ سەدەمێ هەژمارەكا وەلاتی و پێشمەرگە و كارمەندێن دەزگەهێن ئەمنی شەهید بووینە و زیانێن ماددی یێن مەزن ژی ب مال و حالێن خەلكی كەفتینە».
رێبەر ئەحمەد ئاماژە ب وێ چەندێ ژی دا، كو هەلوەستێ حوكمەتا هەرێمێ یێ بنەجهە و نابیتە پشكەك ژ وان ئالۆزییان.
دەربارەی هەماهەنگییا ل گەل بەغدایێ، گۆت «ل گەل دەستبكاربوونا كابینەیا نوو یا حوكمەتا ئیراقێ، عەلی زەیدی، سەرۆك وەزیرێن ئیراقێ راگەهاندییە كو هەر هێرشەك ژ ناڤخۆیا ئیراقێ ڤە بهێتە كرن ل سەر هەرێمێ، ڤەكۆلینێ د وێ دا دكەن، پەیوەندییێن مە ل گەل سەرۆك وەزیرێن ئیراقێ و دەزگەهێن ئەمنی یێن ئێراقێ گەلەك د باشن، مە داخوازا هەڤكاریێ كرییە، لێ تا نۆكە پێرابوونەكا كریاری نەهاتییە وەرگرتن».
وەزیرێ ناڤخۆ هوشداری دا ژی د كریارێن گرۆپێن چەكدار و راگەهاند «ئەو كریارێن گرۆپێن ژ یاسایێ دەركەفتی دكەن، ئیحراجە بۆ هەموو ئیراقێ، هەتاكو بۆ ئابۆری و رێككەفتنێن سیاسی یێن وەلاتێ ژی، پێدڤییە چەك تنێ د دەستێ حوكمەتێ دا بیت و تەمامییا هێزان چەكێن خۆ رادەستی دەولەتێ بكەن».

هەولێر، قائید میرۆ

سەرۆكێ فراكسیۆنا پارتی ل جڤاتا پارێزگەها كەركووكێ ئاشكراكر، هەر دەستپێكا كو پارتی بایكۆتا كۆمبوونێن جڤاتا پارێزگەها كەركووكێ كری داخواز دهاتەكرن پشكداریێ بكەین و ڤەگەڕین، گۆت ژی پارتی بڕیاردایە ڤەگەڕیت بۆ جڤاتا پارێزگەهێ و شۆڕشەك قوربانی كەركووكێ كریە، لەوڕا ئارمانج ژ ڤەگەڕیانامە تنێ بۆ چارەسەركرنا ئاریشەیێن وەلاتییان و خزمەتكرنا خەلكێ كەركووكێ یە.
حەسەن مەجید، سەرۆكێ فراكسیۆنا پارتی ل جڤاتا پارێزگەها كەركووكێ بۆ رۆژنامەیا (ئەڤرۆ) گۆت «پشتی داخوازیێن زۆر ژ پارتی هاتینەكرن بۆ پشكدارییا مە وەك هەردوو ئەندامێن پارتی ل جڤاتا پارێزگەها كەركووكێ ل دووماهیێ پارتی بڕیاردا ژبۆ بەرژەوەندییا گشتی و خزمەتكرنا كەركووكێ ڤەگەڕین بۆ پشكداریكرنێ د كۆمبوونێن جڤاتا پارێزگەها كەركووكێ دا، چونكی هەر ژ دەستپێكا پێكئینانا جڤاتا پارێزگەهێ مە وەك پارتی بایكۆتا كۆمبوونێن جڤاتێ كربوو، لەوڕا ل سەر فەرمانا سەركردایەتییا خۆ ئەم ڤەگەڕیاینە بۆ كۆمبوونێن جڤاتێ، مە تێبینی ل سەر رێڤەبرنا كەركووكێ هەنە و چەندین ئاریشە هەنە ل كەركووكێ، هەتا گەندەلی ل كەركووكێ هەیە و ئەم پشتەڤانییا بزاڤێن عەلی زەیدی سەرۆك وەزیرێن ئیراقێ دكەین ژبۆ بەرهنگاربوونا گەندەلیی».
گۆت ژی» پارتی پێگەهەكێ بهێز ل كەركووكێ هەیە و پارتی شۆڕشەك كرییە قوربانی كەركووكێ، هەموو پێكهاتەیێن كەركووكێ ژی ئەڤێ راستیێ دزانن، ئانكو هەر ژ دامەزراندنا پارتی و هەتا نوكە كەركووكێ جهەكێ تایبەت د دیرۆكا و سیاسەتا پارتی دا هەبوویە و نوكەژی زێدەتر هەیە، ئەم دخوازین ل گەل ئالیێن دی هاریكاربین بۆ خزمەتكرنا كەركووكێ و خەلكێ كەركووكێ».
حەسەن مەجید ئاماژەكر «هەر ئالییەكێ سیاسی ل كەركووكێ نێزیك بیت ژ سیاسەتا پارتی دێ هاریكاربین دگەلدا، ئارمانجا پارتی ژی تنێ خزمەتكرنا خەلكییە، هەر ئالییەكێ سیاسی هەمان ئارمانج هەبیت دێ شێین پێكڤە ل جڤاتا پارێزگەها كەركووكێ كاركەین، هەموو پێكهاتەیێن ناڤا جڤاتا پارێزگەها كەركووكێ داخوازا ڤەگەڕاندنا پارتی بۆ كۆمبوونێن جڤاتێ كریە، لەوڕاژی هەموو ئالی وێ راستیێ دزانن پارتی هێزەكا گرنگ و كاریگەرە بۆ كەركووكێ، هیڤیدارین ئاریشەیێن هەلاویستی د ناڤبەرا هەرێمێ و بەغدایێ ژی بهێنە چارەسەركرن و ڤەگەڕیانامە بۆ جڤاتا پارێزگەهێ ببیتە دەستپێكەك بۆ باشتركرنا پەیوەندییان و چارەسەركرنا رەوشا نوكەیا كەركووكێ، هەر تشتەك د بەرژەوەندییا خەلكێ كەركووكێ دا بیت دێ پارتی كار ل سەر كەت و بەری نوكەژی پشتی پرۆسەیا ئازادییا ئیراقێ هەموو خەلكێ كەركووكێ دیدەڤانە پارتی چەند خزمەت كریە و هەلوەستێ پارتی و تایبەت یێ سەرۆك بارزانی ل دۆر رەوشا كەركووكێ هەموو دەمەكێ یێ زەلال بوویە».