ئه‌ڤرۆ نیوز:
بلندترین رێژه‌یا توشبوویێن ڤایرۆسێ كورونایێ ل پارێزگه‌ها سه‌لاحه‌دین هاتیه تووماركرن، وه‌زاره‌تا ساخله‌میێ ژی بلندترین رێژه‌یا توشبوونێ دئێكه‌م رۆژا چه‌ژنێ دا هاتیه توماركرن.
لگۆری راپۆرتێن وه‌زاره‌تا ساخله‌میا عیراقێ د رۆژا ئێكێ یا چه‌ژنا قوربانێ دا زێده‌تری 3 هزار كه‌سان تووشی ڤایرۆسێ كورونایێ بوون.
فه‌رمانگه‌ها ساخله‌میا سه‌لاحه‌دین به‌لاڤكر، ئه‌ڤرۆ 99 حاله‌تێن توشبوونی ب ڤایرۆسی كورونایێ هاتینه توماركرن.
ئەڤرۆ نیوز:
مستەفا کازمی سەرۆک وەزیرێ عیراقێ، رۆژا شەشێ خزیرانا ٢٠٢١ وەکو دەمێ هەلبژارتنێن پێشوەخت ل عیراقێ دیار کر.
مستەفا کازمی سەرۆک وەزیرێ عێراقێ د گۆتارەکێ را راگەهاند، ل ٦ خزیرانا ٢٠٢١ دێ هەلبژارتنێن پێشوەخت ل عیراقێ برێڤەچن و ئارمانجا حوکمەتا وی هەلبژارتنەکا پاقژ و ئازادە، دیسان هەلمەتا کونترۆلکرنا دەرازینکێن سنۆری ب مەرەما ڤەگەراندنا هەیبەتا دەولەتا عیراقێ بوویە.
ئه‌ڤرۆ نیوز:
فرۆكه‌خانه‌یێن هه‌رێما كوردستانێ، ب ئه‌گه‌رێ سه‌رهلدانا ڤایرۆسێ كورونایێ هاتبوونه گرتن، ئه‌ڤرۆ هه‌مبه‌ر گه‌شتیاران دا هاتنه ڤه‌كرن.
ئه‌ڤرۆ 1/8/2020 گه‌شتێن ئاسمانی ل فرۆكه‌خانه‌یێن هه‌ولێر و سلێمانیێ، لگۆری رێنمایێن نوژداری و رێكارێن خوه‌پارێزیێ ده‌ست پێكرن.
لگۆری زانیاریان، پێدڤیه گه‌شتیارێ دهێت و دچیت، كه‌مام و ده‌ستگوركان بكار بینیت.
ئێك ژ مه‌رجێن دی یێن خوه پارێزیێ ئه‌نجامدانا پشكنینه‌كا تایبه‌ته ب ڤایرۆسێ كورونایێ و هه‌موو ئه‌و گه‌شتیارێن دڤێن سه‌ره‌دانا هه‌رێما كوردستانێ بكه‌ن، دڤێت به‌ری 48 ده‌مژمێران بگه‌هنه هه‌رێما كوردستانێ یان ده‌مێ دگه‌هنه هه‌رێمێ پشكنینێ بۆ بكه‌ن، مه‌زاختیێن ئه‌وێ پشكنینێ دكه‌ڤته سه‌رگه‌شیتاری.
ئەڤرۆ نیوز:
وەزارەتا ساخلەمیا ھەرێما کوردستانێ راگەھاند: ٣٦٨ حالەتێن نوو یێن کۆرۆنایێ و ٧٨ حالەتێن چێبوونێ، ١١ حالەتێن وەغەرکرنێ ھاتینە تۆمار کرن.
هەروەسا گۆتیە: د دەمێ ۲٤ دەمژمێرێن بوری دا ٣٦٨ حالەتێن نوویێن توشبوون ب کۆرۆنایێ ھاتینە تۆمار کرن، کو ٥٠ ژ وان ل سلێمانیێ، ٢٣٠ ل هەولێرێ، ٢٢ ل دەڤەرا گەرمیان، 17 ل هەلەبجە و ٤٨ ژی ل دهۆکێ.
هەروەسا دیار کریە: کو ٧٨ کەسێن دی ژ وێ نەخۆشیێ چێبووینە، کو ٥٧ ل هەولێرێ، ٦ ل گەرمیان، 14 ل هەلەبجە و پێنج ژی ل دهۆکێ.
ھەتا نوکە ١٣ ھزار و ٦١٤ حالەتێن توشبوون ب ڤایرۆسێ کۆرۆنایێ ل ھەرێمێ ھاتینە تۆمار کرن، ژ وێ هژمارێ ژی ٨ هزار و ٩٧٤ کەس چێبوونە و ٥٢٨ کەسان ژی وەغەر کریە.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ،
بۆ ئەڤرۆ نیوز دیار کر: د روودانەکا ترافیکێ دا دا کەس بریندار بوون.
ناڤهاتی زێدەتر ئاشکرا کر: ئەڤرۆ پێنجشەمبی 2020/7/30 ل دەمژمێر (1:00) نیڤرۆ ل سەر جادا خراب بابکێ و ل نێزیکی گوندێ مێرا ترۆمبێلەکا بارهەلگر تۆیۆتا پیک ئاب ل ژێر کونترۆلا شۆفێری دەرکەفتیە و خوە ل کەڤرەکێ دایە و د ئەنجامدا دو کەس بریندار بووینە و زیانێن مادی یێ مەزن ب وێ ترۆمبێلێ کەفتینە.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەکێ وەغەر کر و ئێک ژی بریندار بوو.
ناڤهاتی زێدەتر ئاشکرا کر: ئەڤرۆ پێنجشەمبێ30 / 2020/7 ل دەمژمێر (3:10) پشتی نیڤرۆ ل سەر جادا سەرەکی یا سێمێلێ _ دهۆک و ل نێزیک کارفور دو ترۆمبێلان لێکدا، کو ترۆمبێلەکا تۆیۆتا لاندگروز ل گەل ترۆمبێلەکا بارهەلگر مارسیدس بوویە و د ئەنجامدا کەسەکێ وەغەرکر و کەسەك ژی بریندار بوو، دیسان زیانێن مادی یێن مەزن ژی ب وان ب ترۆمبێلا کەفتن.
ئەڤرۆ نیوز:
دەستەیا دەروازێن سنوری یێن عیراقێ، پێشنیارەک دایە حوکمەتا هەرێمێ و گۆتیه، پێدڤیە دەروازێن سنوری یێن ژێر دەستهەلاتا حکومەتا هەرێمێ بکەڤنە ل ژێر دەستهەلاتا حوکمەتا بەغدا.
د هەمان دەمدا، ئاژانسا نووچەیێن فەرمی یا عیراقێ بەلاڤکریە، دەستەیا دەروازان، پێشنیارەک دایە هەولێرێ و دیار کریە، دڤێت دەروازێن سنوری یێن ل ژێر دەستهەلاتا حوکمەتا هەرێما کوردستانێ بکەڤنە ل ژێر دەستهەلاتا حوکمەتا بەغدا و ئاماژە ب وێ چەندێ دایە، ئەو پێشنیارە دێ بۆ مەرجێ رێککەفتنێ ل گەل هەرێمێ هێتە پێشکێشکرن.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب هەلکەفتنا جەژنا قوربانێ پەیامەک بەلاڤ و د پەیاما خوە دا دیار کر کو مخابن ئەڤسالە ئەم جەژنێ د رەوشەکا خراب یا ئابووری و ڤایرۆسێ کۆرۆنایێ دا دەرباز دکەین و ئەو رەوشا خراب ژی بێگومان ژ دەرڤەی ئیرادا حوکمەتا هەرێما کوردستانێ یە و گۆت: (هێڤیدارین کو پشتی جەژنێ ل گەل بەغدا بگەهینە رێککەفتنێ دا ئاریشێن دارایی و مووچێن فەرمانبەران بهێنە چارەسەر کرن).
سەرۆکێ حوکمەتێ هەروەسا دیار کر کو زێدەباری رەوشا ئالۆز یا ل هەرێما کوردستانێ حوکمەت بەردەوام بزاڤان دکەت دا مووچە و شایستێن دارایی یێن فەرمانبەران بهێنە دابین کرن.
ئه‌ڤرۆ نیوز، نه‌وزاد هلۆرى:
سوبه‌هى دێ 37 سال ل سه‌ر جینوسایدا بارزانیان ده‌رباز بن، هه‌ر سال لسه‌ر گورستانا جینوسایدا بارزانیان ئه‌ڤ رۆژه دهاته ساخكرن، به‌لێ ئه‌ڤ ساله ژ ئه‌گه‌رێ به‌لاڤبوونا ڤایرۆسا كۆرۆنایێ ناهێته ساخكرن.
رێبوار ره‌مه‌زان، رێڤه‌به‌رێ رێڤه‌به‌ریا كاروبارێن شه‌هید و ئه‌نفالكریێن بارزان بۆ ئه‌ڤرۆ نیوز گۆت: (هه‌ر سال وه‌كو نه‌ریته‌كێ سالانه ب ئاماده‌بوونا كه‌سایه‌تى و لایه‌نێن شوله‌ژێ ب ریورسیمه‌كێ فه‌رمى، سالیا جینوسایدا بارزانیان ل رێكه‌فتى 31/7 دهاته ساخكرن، به‌لێ ئه‌ڤ ساله ژ ئه‌گه‌رێ به‌لاڤبوونا ڤایرۆسا كۆرۆنایێ چوو رێورسمێن فه‌رمى ناهێنه ئه‌نجامدان).
زێده‌تر گۆت: (تنێ وه‌كو رێزگرتن بو قوربانیدانا جینوسایدكریان، ره‌نگه چه‌ند كه‌سه‌ك بچنه سه‌ر گورستانێ و چالاكیه‌كا ره‌مزى ئه‌نجام بده‌ین).
جینوسایدا بارزانیان ل رێكه‌فتى 31/7/1983 روودایه و تێدا هه‌شت هزار بارزانى ژلایێ رژێما به‌عس ب ساخى ل بیابانێن نوگره سه‌لمان هاتنه بن ئاخكرن.
نيشاندان