نێچیرڤان بارزانی، سەرۆكێ هەرێما كوردستانێ ب هەلكەفتا ڕۆژا جیهانییا ئافرەتان پەیامەك بەلاڤكر و تێدا هاتیە» ب هەلكەفتا هەشتێ ئادارێ، ڕۆژا جیهانییا ئافرەتان، ب گەرمێ پیرۆزباهیێ ل ئافرەتێن كوردستانێ، ئیراقێ و جیهانێ دكەم. هیڤییا سەركەفتنا بەردەوام و پێشەنگیێ بۆ دخوازم د كاروانێ وان یێ پڕ شازانیدا بۆ بدەستڤەئینانا دادپەروەیێ و وەكهەڤیێ».
نێچیرڤان بارزانی گوت ژی» ژن ل كوردستانێ ب درێژییا دیرۆكێ ڕۆلێ شۆڕشگیرێ و ئاستیخوازانە دیتییە و ئازایەتی و خۆڕاگرییا بێوێنە سەلماندیە. نوكە ژی كو هەرێما كوردستانێ د قووناغا ئاڤاكرن و ب هێزكرنا دەزگەهێن خوە دایە، بەرهەڤییا كارا یا ئافرەتان د هەموو بیاڤاندا سیاسەت، پێشمەرگایەتی، ئابۆری، بڕێڤەبرن و پەروەردەیێدا، جهێ شانازییا مە یا مەزنە».
سەرۆكێ هەرێما كوردستانێ د پەیاما خوە دا دیاركر ژی» ب ڤێ هەلكەفتێ، ئەم دوپاتیێ ل سەر وێ چەندێ دكەین كو بێی مسۆگەركرنا هەموو ماف و ئازادییێن ژنێ و ب هێزكرنا پێگەهێ وێ د هەموو بیاڤێن بڕیاردانێدا، جڤاكەكا ئارام و پێشكەفتێ دروست نابیت. وەك هەردەم پێگیری چەسپاندنا كەلتوورێ وەكهەڤی و دادوەری و بنبڕكرنا هەموو جۆرێن جوداكاریێ و توندوتیژییەكێ نە كو بەرامبەر ب ژنان دهێتە كرن، ئەڤجا چ ل ناڤ خێزانێ و چ ل جهێن گشتی بیت».
ڕۆهنكر ژی» پاراستنا مافێن ئافرەتێ بەرپرسیارەتییەكا هەڤپشك یا حوكمەتێ، خێزانێ، جڤاكا مەدەنی، ڕاگەهاند و هەموو دەزگەهێن جڤاكی، پەروەردەیی و ئایینی یە. كار و ستراتیژییەتەكا نوو پێدڤی نە بۆ وێ چەندێ دەلیڤەیێن وەكهەڤ بۆ ژنان پەیداكەین تاكو زێدەتر ڕۆلێ خوە یێ كارا د داڕێشتنا پاشەڕۆژل وەلاتیدا هەبیت. دڤێت كوردستانێ هەردەم نموونەیەكا دیار بیت د وارێ وەكهەڤیێ و ڕێزگرتنێ ل مافێن مرۆڤی و پاراستنا ئافرەتان ژ توندڕەویێ توندوتیژیێ».
سەرۆكێ هەرێمێ گوت ژی» ب ڤێ هەلكەفتێ، ب ڕێزڤە بیرئینانا هەموو وان ئافرەتێن خەباتكەر دكەین كو ژ پێخەمەت ئازادیێ و دادپەروەریێ و مافێن خوە یێن ڕەوا قوربانیێن مەزن داین. سلاڤ بۆ گیانێ پاقژێ وان هەموو خانمێن بووینە قوربانیێن توندوتیژیێ».

نێچیرڤان بارزانی، سەرۆكێ هەرێما كوردستانێ و رەجەب تەیب ئەردۆغان، سەرۆككۆمارێ توركیا پەیوەندییەكا تەلەفۆنی ئەنجامدا.
سەرۆكایەتییا هەرێما كوردستانێ ل دۆر ناڤەڕۆكا وێ پەیوەندییا تەلەفۆنی ڕاگەهاند» ب هووری باسێ ڕەوشا دەڤەرێ و ئەو ئاستەنگێن مەترسیدار ژ ئەنجامێ شەڕی پەیدا بووین کر. هەردو ئالی هەڤڕابوون كو زێدەبوونا ئالۆززیان گەفەك ڕاستەفینەیە ل سەر نوكە و پاشەڕۆژا ئارامیێ ل دەڤەرێ هەیە. لەوما دوپاتی ل پێدڤییا پەنابرنێ بۆ ڕێكەچارەیا سیاسی كر بۆ ڕێگریێ ل زێدەبوونا ململانێیان و پاراستنا گەلان ژ مالوێرانیێن شەڕی».
سەرۆكاتییا هەرێمێ دیاركر ژی» ژ ئالییەكێ دی ڤە سەرۆككۆمارێ توركیا ڕێز وسوپاسییا خوە یا تایبەت ئاراستەی سەرۆكێ هەرێما كوردستانێ كر بۆ ڕۆلێ وی یێ دیار و ئەرێنی د هاریكاری و پشتەڤانیكرنا ئاشتیێ ل توركیا. هەروەسا ئاماژە ب وێ چەندێ كر كو ئەڤ هەلوەستە فاكتەرێن بنەڕەتینە بۆ چەسپاندنا پێكڤەژیانا گەلان و كێمكرنا ئالۆزییان ل دەڤەرێ».
ژ ئالیێ خوەڤە سەرۆكێ هەرێما كوردستانێ دوپاتكر كو هەرێما كوردستانێ وەك هەردەم دێ كاری بۆ ئارامیێ ل دەڤەرێ كەت و پشتەڤانیێ ل هەر پێنگاڤەكا ئاشتیخوازانە و دیالۆگێ دكەت بۆ چارەسەركرنا كێشەیان، ب شێوەیەكی كو ئاسایش و بەرژەوەندییا گشتییا گەلێن دەڤەرێ بپارێزیت.

مەسرور بارزانی، سەرۆكێ حوكمەتا هەرێما كوردستانێ و شێخ ئەحمەد عەبدوللا ئەلسەباح، سەرۆك وەزیرێن كوێتێ د پەیوەندییەكا تەلەفۆنیدا، ڕەوشا دەڤەرێ گەنگەشەكر.
حوكمەتا هەرێما كوردستانێ د بەیاننامەیەكێدا بەلاڤكر» هەردو ئالییان دانوستاندن ل دۆر ڕەوشا گشتییا دەڤەرێ و ب تایبەت دەولەتا كوێتی و ئیراقێ و هەرێما كوردستانێ و دوماهی پێشهاتێن شەڕ و ئالۆزییان كر، هەڤدەم دلگرانییا خوە ژ زێدەبوونا هێرش و شەڕ و ئالۆزییان دیاركر».
دیاركر ژی» هەردو ئالییان دوپاتی ل پێدڤییا ب هێزكرنا هاریكاری و هەماهەنگییا دوقۆلی بۆ ئارامكرنا ڕەوشێ و پاراستنا ئاشتی و ئارامییا دەڤەرێ كر.

مەسرور بارزانی، سەرۆكێ حوكمەتا هەرێما كوردستانێ، ل ئەكاونتێ خوە ل تۆڕا جڤاكییا (ئێكس) ب هەلكەفتا ڕۆژا جیهانییا ئافرەتان، پەیامەك بەلاڤكر و ڕاگەهاند» ڕۆژل جیهانییا ئافرەتان، ل هەموو ئافرەتێن كوردستانێ و جیهانێ پیرۆز دكەم».
سەرۆكێ حوكمەتا هەرێما كوردستانێ ئەوژی بەرچاڤكر» من ڕێزەكا مەزن بۆ خەبات و ڕۆلێ دیار یێ ئافرەتێن كوردستانێ هەیە و پشتەڤانییا خوە بۆ داخوازی و مافێن وان یێن ڕەوا دوپات دكەم».

مەسرور بارزانی، سەرۆكێ حوكمەتا هەرێما كورستانێ پەیامەكا بەهیداریێ ئاراستەی بنەمالا (وەلات تاهر) كر، كو ل شەڤا ڕۆژا ئەینی ژ ئەنجامێ هێرشێن درۆنی ل سەر فڕۆكحانەیا نێڤدەولەتییا هەولێرێ شەهید بووی.
سەرۆكێ حوكمەتا هەرێما كوردستانێ د پەیاما خوە دا گوت» سەرەخوەشییا خوە ئاراستەی بنەمال و كەسوكار و هەڤال و هەڤكارێن شەهید وەلات تاهر كارمەندێ ئاسایشا فڕۆكخانەیا نێڤدەولەتییا هەولێرێ دكەم و هەڤپشكێ خەما وانم، كو مخابن، ژ ئەنجامێ هێرشێن نەڕەوا و ستەمكارانە و تیرۆرستیانەیێن سەر هەرێما كوردستانێ شەهید بووی، خودایێ مەزن گیانێ شەهید وەلاتی ب بەهەشتێ شاد بكەت و هەدار و ئارامیێ ژی ب مە هەموویان ببەخشیت. هیڤییا زوو چاكبوونێ ژی بۆ برینداران دخوازم».

سەرۆك بارزانی ب هەلكەفتا سالڤەگەرا 35 یا سەرهلدانا ئادارا 1991 پەیامەك بەلاڤكر و تێدا هاتیە» ب هەلكەفتا سالڤەگەرا 35 یا دەستپێكا سەرهلدانا گەلێ كوردستانێ پیرۆزباهیێ ل مالباتێن سەربلندێن شەهید وپێشمەرگەیێن قەهرەمان و خەلكێ خوەشتڤیێ كوردستانێ و هەموو وان نیشتمانپەروەر و خەباتكەر و ئازادیخوازان دكەم كو ڕۆل د بدەستڤەئینانا وی دەستكەفتێ بهادارێ گەلێ مەدا هەبوویە».
سەرۆك بارزانی گوت ژی» سەرهدان بەرهەم و درێژەپێدانا خەبات و قوربانیدانا دەهان سالان یا جەماوەر و هێزێن خەباتكەرێن كوردستانێ بوو. ئەو ڕووداوا پڕ ژ شانازیێ بۆ تاك تاكێ كوردستانی د نوكە و پاشەڕۆژێدا هەلگرا پەیاما خوەبدەستڤەنەدان و ئازادیخوازی و ئیرادەیا ژیانا سەربلندانەیە».
سەرۆك بارزانی د پەیاما خوە ڕۆهنكر ژی» نوكە دەڤەرا مە د ڕەوشەكا گەلەك ئالۆز و هەستیاردا دەرباز دبیت و هیڤیدارین كو هەر چ كێشە و ناكۆكیێن ل دەڤەرێ هەین ب ڕێكێن ئاشتییانە بگەهنە ئەنجام و چارەسەریێ. ئەم ژی ئەوا ژ دەستێ مە بهێت دێ كەین بۆ وێ چەندێ كوردستان ژ شەڕی و نەهامەتیێ و نەخوەشیێ دوور و پاراستی بیت».

نێچیرڤان بارزانی، سەرۆكێ هەرێما كوردستانێ ل سالڤەگەرا 35 یا سەرهلدانا 1991 پەیامەك بەلاڤكر و تێدا دبێژیت» پیرۆزباهییەكا گەرم ل مالباتێن سەربلندێن شەهیدان، پێشمەرگەیێن قەهرەمان و هەموو كوردستانییان ل ناڤخوە و دەرڤەی وەلاتی دكەم. سلاڤان بۆ گیانێ یاقژ یێ شەهیدێن سەرهلدانێ و هەموو شەهیدێن كوردستانێ دهنێرم».
سەرۆكێ هەرێما كوردستانێ گوت ژی» سەرهلدان وەرچەرخانەیەكا دیرۆكی و وبەرسڤا ئێكلاكەر یا گەلێ كوردستانێ بوو د ڕەتكرنا ستەم و زۆرداریێ و هاڤێتنا پێنگاڤان بوو بەر ب ئازادیێ و سەرفەرازیێ».
نێچیرڤان بارزانی سالڤەگەرا سەرهلدانێ ب ڕەوشا نوكە ڤە گرێدا و گوت» ئەڤ هەلكەفتا پیرۆز د وەختەكیدایە دەڤەر ب ڕەوشەكا ئالۆز و هەستیاردا دەرباز دبیت. زێدەبوونا ئالۆزییان و ململانێیان، بەرپرسیارەتییەكا مەزن دئێخنە سەر ملێن مە هەموویان بۆ پاراستنا ئارامییا هەرێما كوردستانێ».
سەرۆكێ هەرێما كوردستانێ دوپاتكر ژی» هەرێما كوردستانێ وەك هەردەم دێ فاكتەرەكێ سەرەكیێ ئارامیێ و ئاشتیێ بیت و نابیتە پشكەك ژ هیچ ململانێ و پێشهاتەكا سەربازی كو زیانێ ب ژیان و تەناهییا وەلاتیێن مە بگەهینیت».
نێچیرڤان بارزانی ئاماژە ب وێ چەندێ ژی دا» پاراستنا قەوارەیێ هەرێما كوردستانێ و دەستكەفتێن مە یێن دەستووری، تنێ دێ ب ئێكڕێزیێ، تەباییێ و بەرپرسیارەتییا نیشتمانییا هەڤپشك یا هەموو هێز و ئالیێن سیاسی و پێكهاتەیێن كوردستانێ بیت».

مەسرور بارزانی، سەرۆكێ حوكمەتا هەرێما كوردستانێ ب هەلكەفتا سالڤەگەرا 35 یا سەرهلدانا سالا 1991، پەیامەك بەلاڤكر و تێدا ڕاگەهاند» پیرۆزباهیێ ل هەموو كوردستانییان، ب تایبەتی پێشمەرگەیێن قەهرەمان و مالباتێن سەربلندێن شەهیدان دكەم».
گوت ژی» سەرهلدان ئێك ژ شكۆدارترین دەستكەفتێن گەلێ كوردستانێیە، كو بەرهەمێ ئێكگرتن و ئێكڕێزییا پێكهاتەیێن جۆراوجۆرێن كوردستانێ بوو. ل بن سیبەرا سەرهلدان و خەبات و قوربانیدانا خەلكێ كوردستانێ، ئەڤرۆ هەرێما كوردستانێ خودانا قەوارە و دەزگەهێن خوە یێن فەرمی و شەرعییە، كو پێدڤییە ب هەموو شێوەیەكی بپارێزین وزێدەتر پێشڤە ببەین».
سەرۆكێ حوكمەتا هەرێمێ دیاركر ژی» ب ڤێ هەلكەفتێ، دوپات دكەین كو ئێكگرتنا خەلكێ كوردستانێ، مەزنترین و ب هێزترین سەرمایا مەیە وەك چاوان ل بن سیبەرا ئێكگرتنا گەلێ كوردستانێ، سەرهلدانا ئادارا 1991 سەركەفت و گەهشتە ئەنجام و دەستكەفتێن ئەڤرۆ بەرهەمێن وێنە، د ڤی وەختیدا ژی، پێدڤییە خەلكێ كوردستانێ زێدەتر ژ هەر وەختەكی، داكۆكیێ ل دەستكەفتێن خوە یێن نیشتمانی و نەتەوەیی بكەت و بپارێزیت، ژ پێخەمەت پاشەڕۆژەكا باشتر و پێشكەفتیتر».

سەرۆكێ هەرێما كوردستانێ و وەزیرێ دەرڤەیێ فرەنسا پەیوەندییەكا تەلەفۆنی ئەنجامدا و تێدا وەزیرێ فرەنسی هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر.
سەرۆكایەتییا هەرێما كوردستانێ ڕاگەهاند، نێچیرڤان بارزانی، سەرۆكێ هەرێما كوردستانێ و ژۆن نوێل بارۆ، وەزیرێ دەرڤەیێ فرەنسا پەیوەندییەكا تەلەفۆنی ئەنجامدا.
د وێ پەیوەندییا تەلەفۆنیدا، وەكو د بەیاننامەیا سەرۆكایەتییا هەرێما كوردستانێ دا هاتی» وەزیرێ دەرڤەیێ فرەنسا هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر ل بەرانبەر وان هێرشێن ل سەر هەرێما كوردستانێ دهێنە كرن».
سەرۆكایەتییا هەرێمێ دیاركر ژی»هەردو ئالییان پێشهاتێن بەردەوام یێن دەڤەرێ و ئاسۆیێن چارەسەركرنا كێشەیان گەنگەشەكر و هەڤڕابوون ل سەر بەردەوامییا هەماهەنگییا نێزیك د ناڤبەرا واندا بۆ پاراستنا ئارامیێ».
ژ ئالیێ خوەڤە، نێچیرڤان بارزانی سوپاسییا پشتەڤانییا بەردەوام یا فرەنسا بۆ هەرێما كوردستانێ كر و دوپاتی ل گرنگییا ڕۆلێ فرەنسا و جڤاكا نێڤدەولەتی د كێمكرنا ئالۆزییان و دوورئێخستنا دەڤەرێ ژ مەترسیێن شەڕی كر.

د پەیوەندییەكا تەلەفۆنیدا د ناڤبەرا نێچیرڤان بارزانی، سەرۆكێ هەرێما كوردستانێ و محەمەد شیاع سوودانی، سەرۆك وەزیرێن ئیراقێ دوماهی پێشهاتێن دەڤەرێ و دەرئەنجامێن وێ هاتنە گەنگەشەكرن.
هەردو ئالییان ڕەتكرنا وان هێرشان دوپاتكر كو ل سەر باژێڕێن ئیراقێ و هەرێما كوردستانێ دهێنە كرن و دوپاتكر كو نابیت ئاخا ئیراقێ ببیتە ژێدەرێ گەفێ یان هێرشێ ل سەر وەلاتێن دەوروبەر. هەروەسا پشتەڤانییا خوە بۆ هەموو وان پێنگاڤان نیشاندا كو دبنە جهێ ب هێزكرنا ئاشتیێ و ئارامیێ ل دەڤەرێ.
هەردو ئالییان داكۆكی ل سەر پێدڤییا ڕوو ب ڕووبوونا ئالۆزییان ب ڕێكا ئێكگرتنا هەلوەست و گوتارێن هێزێن نیشتمانی كر ب شێوەیەكی كو سەروەرییا وەلاتی و ئاسایشا نیشتمانی بهێنە پاراستن.
ژ ئالیێ خوەڤە، نێچیرڤان بارزانی دوپاتكر كو هەرێما كوردستانێ وەك هەردەم دێ فاكتەرێ ئارامیێ بیت و پشتەڤانیێ ل هەموو بزاڤێن نیشتمانی دكەت بۆ دوورئێخستنا ئیراقێ ژ دەرئەنجامێن نەرێنی یێن ململانێ ل دەڤەرێ.