ئەڤرۆ نیوز:
پشتی نیڤرۆیا ئەڤرۆ شەمبیێ، تەرمێ گەنجەکێ ل ئێک ژ خانیێن گەشتیاریێن هاڤینگەها بێخال هاتیە دیتن، كو جهێ چەندین گولەیان ل سەر لەشێ وی هەبوون.
ژێدەرەکێ ل رێڤەبەریا پۆلیسێن سوران ئاشکرا کریە: کو ب ئەگەرێ كێشەکا جڤاکی گەنجەکێ ئاکنجیێ ناحیا خەلیفان، ل بێخال هاتیە كوشتن، دو زەلام و ژنەک ل سه‌ر وێ دوسیێ هاتینە گرتن، هەروەسا پەرێن ڤەکۆلینی بۆ وێ تاوانێ هاتینە ڤەکرن، د هەمان دەمدا تەرمێ وی کەسی بۆ نۆشداریا داد هاتیە رەوانەکرن.
ئەڤرۆ نیوز:
مایک پۆمپیۆ وەزیرێ دەرڤە یێ ئەمریکا راگەهاند کو ئەمریکا دێ فشارێن خوە ل سەر ئیرانێ زێدەتر لێ کەت و داخواز ژ وان وەلاتان ژی کر یێن کو هەست ب مەترسیا ئیرانێ ل سەر بەرژەوەندیێن خوە دکەن کو ل هەمبەر ئیرانێ هەلویستێ خوە دژوار بکەن.
وەزیرێ دەرڤە یێ ئەمریکا ئەو یەک ژی دیار کر کو ئیران بەردەوام کار بۆ ئالۆزیان ل رۆژهەلاتا ناڤین دکەت و پرانیا وەلاتێن رۆژهەلاتا ناڤین ژ هەلویستێ ئیرانێ دلگرانن و پشتەڤانیێ ل سیاسەتا ئەمریکا دکەن، ژ بەر هندێ ژی دێ ئیرانێ پتر تەنگاڤ کەن.
ئەڤرۆ نیوز:
راگەهاندنا رێڤەبەریا ساخلەمیا ئاکرێ د داخۆیانیەکێ دا دیار کریە کو خەلکێ خوە ل سنورێ ئاکرێ و دەوروبەران دکەین کو ل رۆژا ئێکشەمبیێ ۲۰۲۰/۷/۱۹ بەشێ ئافرەتان و ژدایکبوونێ دێ هێتە ڤەگوهاستن ژ نەخوشخانا هەوارهاتنێ بۆ نەخوشخانا گۆلان ب شێوێ کاتی، ژ بەر کو ل جهێ کەڤن دێ نویژەنکرن و بەرفرەهکرن تێدا هێتە ئەنجامدان، لەوا داخوازێ ژ هەوە دکەین ئەو نەخوشێن پێدڤی بەشێ ئافرەتان و زارۆکبوونێ سەرەدانا نەخۆوشخانا گۆلان بکەن، دێ ل وێرێ یا پێدڤی بۆ هێتە کرن.
ئەڤرۆ نیوز:
هێمن قادر جێگرێ پارێزگارێ هەولێرێ و پەیڤدارێ ژوورا ئۆپەراسیۆنان ل هەولێرێ راگەهاند کو ئەو دێ هندەک بریارێن نوو ل دۆر خوە پاراستنا ژ کۆرۆنایێ دەن و گۆت: (بێگومان قەدەغەیا هاتنوچوونێ ناهێتە راگەهاندن لێ پێدڤیە ئێدی وەلاتی خوە ب پارێزن).
ل دۆر قەدەغەیا هاتنوچوونێ د ناڤبەرا پارێزگەهێن هەرێما کوردستانێ دا ژی ناڤهاتی راگەهاند کو رەوشا کۆرۆنایێ ل کوردستانێ ب گشتی یا خرابە و ژ بەر هندێ ژی باشترە جارێ قەدەغەیا هاتنوچوونێ د ناڤبەرا پارێزگەهێن هەرێما کوردستانێ دا یا بەردەوام بیت.
ئه‌ڤرۆ نیوز:
د كۆنفرانسه‌كێ رۆژنامه‌ڤانی دا، ماریا ڤان كیرخوڤ بسپور له رێكخراوا ساخله‌میا جیهانی راگه‌هاند تا نوكه روون نینه ئه‌و كه‌سێن ژ ڤایرۆسێ كورونایێ ساخ بووینه ڤه جاره‌كا دی دێ توشی ڤایرۆسی بنه‌ڤه یان نه.
هه‌ر د ئه‌وی كۆنفرانسێ رۆژنامه‌ڤانی دا، د.تیدروس ئه‌دهانوم گیبریسون رێڤه‌به‌رێ گشتی یێ رێكخراوا ساخله‌میێ ژ ئه‌گه‌رێ ڤه‌رێژا كورونایێ هوشداری دا و رگه‌هاند دبیت ب ئه‌گه‌رێ هه‌ژاریێ و بێكاریێ زێده‌تری 9 ملیۆن زارۆك ده‌ستا ژ خواندنێ به‌رده‌ن.
مارك لوكوك هاریكارێ سكرتێرێ گشتی یێ نه‌ته‌وه‌یێن ئێكگرتی بۆ كارۆبارێن مرۆڤی و هه‌وارچوونێ راگه‌هاند بۆهه‌ڤكاریكرنا 10% یا هه‌ژار و كێم ده‌رامه‌تێن جیهانێ پێدڤی ب نێزیكی 90 ملیار دۆلاران هه‌نه.
ئه‌ڤرۆ نیوز:
به‌ری سه‌ره‌دانا چاڤه‌رێكری یا مسته‌فا كازمی بۆ سعودیێ، محه‌مه‌د جه‌واد زه‌ریفی وه‌زیرێ ده‌رڤه‌یێ ئیرانێ دێ گه‌هته به‌غدا.
بریاره سوبه‌هی رۆژا ئێك شه‌مبی، محه‌مه‌د جه‌واد زه‌ریفی وه‌زیرێ ده‌رڤه‌یێ ئیرانێ ب سه‌ره‌دانه‌كێ بگه‌هته به‌غدا و ل گه‌ل به‌رپرسێن بلندێن عیراقێ كۆم بیت.
هاتنا زه‌ریفی بۆ عیراقێ به‌ری سه‌ره‌دانا چاڤه‌رێكری یا مسته‌فا كازمی سه‌رۆك وه‌زیرێ عیراقێ كۆ بریاره بۆ سعودیێ ئه‌نجام بده‌ت.
ئه‌ڤرۆ نیوز:
فه‌ره‌نسا زێده‌تری 342 هزار دۆلاران هه‌ڤكاریا عیراقێ بۆ به‌رهنگاربوونا ڤایرۆسێ كوروناێ دكه‌ت.
هنارتیا نه‌ته‌وه‌یێن ئێكگرتی ل عیراقێ د به‌یاننامه‌یه‌كێ دا راگه‌هاند هه‌ڤكاریێن فه‌ره‌نسا بۆ عیراقێ ب هه‌ماهه‌نگی ل گه‌ل نه‌ته‌وه‌یێن ئیكگرتی بوو.
بونامی هه‌روه‌سا ئه‌و چه‌نده ژی راگه‌هاند فه‌ره‌نسا 300 هزار یوورو هه‌ڤكاریا ساخله‌میا عیراقێ دكه‌ت.
یونامیێ ئه‌و چه‌نده ژی دیاركر ئه‌و بریارا فه‌ره‌نسا بۆ كرینا ئامیرێن هه‌ناسه‌دانا ده‌ستكرد بۆ نه‌خوشخانه‌یێن به‌سره دمه‌زێخیت.
ئه‌ڤرۆ نیوز:
به‌نكا رافیده‌ین یا حكومی راگه‌هاند دێ ده‌ست ب مه‌زاختنا شایسته‌یێن دارایی یێن جۆتیاران ل ته‌ڤایا تایێن خوه كه‌ت
نڤیسینگه‌ها راگه‌هاندنا به‌نكا رافیده‌ین یا حوكمه‌تا عیراقێ د به‌یاننامه‌یه‌كێ دا راگه‌هاند فه‌رمان هاتیه دان بۆ هه‌می تایێن به‌نكێن رافیده‌ین كۆ ده‌ست ب مه‌زاختنا شایسته‌یێن دارایی یێن جۆتیاران بكه‌ن، پشتی هه‌موو رێ و ئاوایێن پێدڤی بۆ مه‌زاختنێ پاره‌یێ پێدڤی ژی هاتیه دانان.
د به‌یاننامه‌یا به‌نكا رافیده‌ین دا هاتیه كۆ به‌رده‌وامین ل بجهكرنا پێگیربوونێ هه‌مبه‌ر وه‌لاتیان و هه‌ر پرسه‌كا په‌یوه‌ندیدار ب مه‌زاختنا پاره‌ی و شایسته‌یێن دی، ل گه‌ل بكار ئینانا رێ و ئاوایێن خوه پاراستنێ ژ ڤایرۆسێ كورونایێ.
به‌نكا رافیده‌ین د ئه‌وێ به‌یاننامه‌یا راگه‌هاندی ل سه‌ر مه‌زاختنا شایسته‌یێن دارایی یێن جۆتیارێن هه‌رێما كوردستانێ چ نه دیاركریه، به‌لێ رۆژا دوشه‌مبا هه‌فتیا بوری وه‌زاره‌تا چاندنا عیراقێ راگه‌هاند بوو پاره‌یێ پێدڤی بۆ دانا شایسته‌یێن جیۆتیاران هاتیه ته‌رخانكرن هه‌ركه‌سه‌كی به‌رهه‌مێ خۆ دانابیته سایلویێن حكومی دی شایسته‌یێن دایاری یێن خوه وه‌رگریت.
نيشاندان