ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونێ ل پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا دو ترۆمبێلان لێکدا.
ناڤهاتی زێدەتر ئاشکرا کر: ئەڤرۆ ل سەر جادا گشتی یا سەرەکی یا دناڤبەرا سیارەتیکا بۆ سەرسنکێ، روودانەکا ژ جۆرێ لێکدان پەیدا بوویە دناڤبەرا دو ترۆمبێلێن تایبەت دا، کو د وێ روودانێ دا زیانێن گیانی و مادی هەبووینە، بریندار ژی هاتینە رەوانە کرن بۆ نەخۆشخانێ.
ئەڤرۆ نیوز:
وەزارەتا ساخلەمیا عیراقێ راگەهاند کو د ماوەیێ ٢٤ دەمژمێرێن بۆری دا دو هزار و ٤٣٧ کەس ل عیراقێ تووشی ڤایرۆسێ کۆرۆنایێ بووینە و هەروەسا ١٠٧ کەسان ژی جانێ خوە ژ دەست داینە.
ل گۆر وەزارەتا ساخلەمیێ یا عیراقێ ب گشتی هەتا نها ٣٩ هزار و ١٣٩ کەس ل عیراقێ تووشی ڤایرۆسێ کۆرۆنایێ بووینە و هەتا نها هزار و ٤٣٧ کەسان ژی ب کۆرۆنایێ جانێ خوە ژ دەست داینە.
ئەڤرۆ نیوز، زنار تۆڤی:
ئەڤرۆ بیڤەلەرزەکێ ل چەندین گوندێن پارێزگەها وانێ یا باکوورێ کوردستانێ دایە و زیانێن مادی گەهشتینە خەلکێ وان گوندان.
رۆژنامەڤان سدق گۆلەر ژ ناڤەندا باژێرێ وانێ بۆ ئەڤرۆ نیوز دیار کر: ئەڤرۆ ل دەمژمێر 1:30 پشتی نیڤرۆ پیڤەلەرزەکێ ب پلا 5,4 یا ریختەرێ ل چار گوندێن باژێرێ وانێ داینە، زیانەکا مەزن گەهاندیە خەلکێ وان گوندان و چەندین خانیێن وەلاتیان هەرفتینە و دیسان دیوارێن گەلەک مالان ژی دەرزێن مەزن کەفتینێ، لێ چ زیانێن گیانی نەبووینە.
ناڤهاتی گۆت ژی: وێ بیڤەلەرزێ ل سەنتەرێ باژێرێ وانێ نەدایە، هەر چەندە ترس لدەف خەلکێ پەیدابوو، بۆ دەمێ پتر ژ دەمژمێرەکێ خەلکێ ناڤا سەنتەرێ باژێرێ وانێ ژ مالێن خوە دەرکەفتن ژ ترسا بیڤەلەررێ، لێ پیڤەلەرزێ ل سەنتەرێ باژێری ب خوە نەدایە، هەروەسا پشتی بیڤەلەرزێ ل وان هەر چار گوندان دای، نوکە سازیێن دەولەتێ و خەلکێ وانێ ژی، هاریکاری بۆ خەلکێ وان گوندان برینە، دیسان خانیێن هندەکان خراب بووینە، لەوما دەولەتێ خیڤەت و پێدڤیێن دیتر بۆ وان برینە و نوکە خیڤەت بۆ وان مالان هاتینە ڤەدان.
ئەڤرۆ نیوز:
رۆژنامەڤانەکێ تورکیا دیار دکەت کو لەشکرێن تورکیا ب چەکێن گران خوە ل سەر سنورێ کۆبانێ بجه کرینە و ئەو یەک ژی نیشا ددەت کو تورکیا دڤێت هێرشی کۆبانێ بکەت.
ئێحسان کاچار رۆژنامەڤانێ تورکیا راگەهاند کو پشتی هێرشا ڤێ دووماهیێ یا تورکیا ل سەر کۆبانێ کو د ئەنجام دا سێ کەسان جانێ خوە ژ دەست دابوون نها تورکیا بەرهەڤیێن مەزن دکەت دا هێرشی کۆبانێ بکەت.
ئەو یەک د دەمەکێ دایە کو دوهی وەزیرێ دەرڤە یێ ئەمریکا مایک پۆمپیۆ راگەهاند کو هێرشا تورکیا ل سەر کۆبانێ هێرشەکا تیرۆرستیە و داخواز ژ تورکیا کر کو هێرشی دەڤەرێن سڤیل یێن رۆژئاڤایێ کوردستانێ نەکەت.
ئەڤرۆ نیوز:
هێرۆ ئیسماعیل پێشکێشکارا کەنالێ کوردستانێ تی ڤی راگەهاند کو ئەو ل گەل هەڤژین و هەر دو زارۆیێن خوە تووشی ڤایرۆسێ کۆرۆنایێ بووینە و نها ل مالێ خوە کەرەنتین کرینە.
ناڤهاتیێ راگەهاند کو پشتی چەندین پشکنین بۆ وان هاتیە کرن دیار بوویە کو تووشی ڤایرۆسێ کۆرۆنایێ بووینە و گۆت: (نها رەوشا ساخلەمیا وێ و زارۆیێن وێ و هەڤژینێ وێ ب گشتی باشە و چارەسەریا پێدڤی بۆ وان دهێتە کرن).
نيشاندان