سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: مە وەكو فراكسیۆنا پارتی دیموكراتی كوردستان ل جڤاتا نوونەرێن ئیراقێ داخواز ژ سەرۆكاتییا جڤاتا نوونەرێن ئیراقێ كریە، ل روونشتنا ئەڤرۆ رۆژا دوشەمبی 21/7/2025، پرسا هێرشێن درۆنی ل سەر زەڤیێن پەترۆلی یێن هەرێما كوردستانێ، گەنگەشە بكەت.
ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ د داخۆیانییەكا رۆژنامەڤانیدا گوت» ب دوپاتكرنا مە ل سەر ڤێ پرسێ، سەرۆكاتییا جڤاتا نوونەرێن ئیراقێ رازیبوون نیشادایە ئێك ژ وان دو تەوەرێن جڤاتا نوونەرێن ئیراقێ ل سەر كۆمببیت، پرسا هێرشێن درۆنی ل سەر زەڤیێن پەترۆلی یێن هەرێما كوردستانێ بیت».
ل رۆژا پێنجشەمبییا بۆری 17/7/2025، فراكسیۆنا پارتی دیموكراتی كوردستان ل جڤاتا نوونەرێن ئیراقێ بەیاننامەیەك ل دۆر هێرشێن درۆنی ل سەر زەڤیێن پەترۆلی و ژێرخانەیا ئابۆری ل هەرێما كوردستانێ، بەلاڤكربوو.
د بەیاننامەیا فراكسیۆنا پارتیدا هاتبوو» د چارچۆڤەیێ فشارێن ئابۆری یێن نەرەوا ل سەر هەرێما كوردستانێ، ل چەند رۆژێن بۆری، ب رێكا فرۆكەیێن بێ فرۆكەڤان ( درۆنێن مینڕێژكری)، هەژمارەكا هێرشێن تیرۆرستی ل سەر هەژمارەكا دەزگەهێن گرنگ ل هەرێما كوردستانێ هاتبوونە ئەنجامدان، ژ وان ژی ژێرخانەیا ئابۆری، پارزینگەهێن پەترۆلێ، ژێدەرێن وزەیێ».
فراكسیۆنا پارتی دیموكراتی كوردستان ل جڤاتا نوونەرێن ئیراقێ داخوازا بڕێڤەچوونا كۆمبوونەكا ب لەز یا جڤاتا نوونەرێن ئیراقێ» بۆ گەنگەشەكرنا ڤێ پێشهاتێن مەترسیدار و پێداچوونێ ب پێرابوونێن حوكمەتا ئیراقێ ل دۆر ڤێ چەندێ» ئەڤە ژی ب مەبەستا» ب هێزكرنا رۆلێ دەستهەلاتا قانووندانانێ د پاراستنا وەلاتی و هەڤوەلاتییاندا».
بڕیارە ئەڤرۆ دوشەمبی 21/7/2025، جڤاتا نوونەرێن ئیراقێ كۆمببیت و تێدا دو بابەت بهێنە گەنگەشەكرن، ئەوژی هێرشێن درۆنی ل سەر ژێرخانەیا ئابۆرییا هەرێما كوردستانێ و روودانا ئاگربەربوونا كوت.

هەولێر، قائید میرۆ

بەرپرسەكێ بەرێ یێ وەزارەتا كاروبارێن پێشمەرگەی ل حوكمەتا هەرێما كوردستانێ ئاشكراكر، ئەو درۆنێن ل چەند رۆژێن بۆری هێرش ل سەر هەرێما كوردستانێ دكر ژێدەرێ وان یێ دیاربوو ل دەڤەرێن بن دەستهەلاتا بەغدایێ بووینە و دبێژیت، مەرەم ژ هنارتنا درۆنان ئەوەبوو هەرێم ب مەرجین بەغدایێ رازیبیت بۆ رادەستكرنا پەترۆلێ.
فەریقێ ئێكێ (جەبار یاوەر)، ئەمیندارێ گشتیێ بەرێ یێ وەزارەتا كاروبارێن پێشمەرگەی بۆ رۆژنامەیا (ئەڤرۆ) گوت» د دەمی 15 رۆژاندا هەژمارەكا هێرشێن درۆنی ل سەر هەرێما كوردستانێ هاتنە ئەنجامدان هەر ژ زاخۆ هەتا هەولێرێ و سلێمانیێ ژی، ب دیتنا من هنارتنا درۆنان گڤاشتن بووینە ل سەر حوكمەتا هەرێما كوردستانێ هەتا ب مەرجێن بەغدایێ رازیبیت و رێككەفتن بهێتەكرن، چونكە ژوان خالێن هاتینە دیاركرن رادەستكرنا پەترۆلێ بوویە ب كۆمپانیا (سۆمۆ)، چونكە هەكە پشتی رێككەفتنا هەردو حوكمەتان هێرشێن درۆنی ل سەر زەڤیێن پەترۆلێ هاتنە راگرتن ئەڤە دیارە بۆچوونا من یا دروستە و مەرەم ژ هێرشێن درۆنی بۆ گڤاشتنان بوویە بۆ رادەستكرنا پەترۆلێ، بەرۆڤاژی پشتی ئەنجامدانا رێككەفتنێ هێرشێن درۆنی هاتنە راگرتن و هێزێن ئیراقی دەست ب ئەنجامدانا ئۆپەراسیۆنێ كر ژبۆ ڤەدیتنا جهێ درۆنان و ئەنجامدەرژی هاتینە دەستنیشانكرن و باسێ دەستەسەركرنا وان ژی دهێتەكرن، هەكە مەرەما وان گڤاشتن نەبن بۆچی بەری رێككەفتنێ ئۆپەراسیۆن نەدهاتە ئەنجامدان، هەر ژ رۆژا ئێكێ یا هێرشان من دیاركر درۆن ل دەڤەرێن بن كۆنتڕۆلا حوكمەتا ئیراقێ بۆ هەرێما كوردستانێ دهێتە ئاراستەكرن».
ل دۆر لڤینێن گرۆپا تیرۆرستییا داعشێ فەریقێ ئێكێ (جەبار یاوەر)ی گوت» داعش وەك گرۆپ هەر مایە و ئەم دبینین یا كریارێن تیرۆرستی ئەنجام ددەت، بەلێ ئەو قەبارەیێ بەرێ نەمایە، زێدەتر ژئالیێ راگەهاندنێ داعش یا چالاكە و بانگەشێ بۆ خوە دكەت، پێدڤییە هەموو جیهان پێكڤە كار بۆ نەهێلانا هزرا داعشێ بكەت، چونكە راستە ژئالیێ سەربازی ڤە گەلەك یا لاوازە، بەلێ هزرا داعشێ هەر یا مای، هەكە ئەم ئامارێن دەستپێكا هاتنا داعشێ هەتا نوكە لێكدەین ل دەڤەرێن كوردستانی، دێ بۆمە دیاربیت داعش گەلەك یا لاوازە، ب گۆڕەی ئامارێن بەردەست ل سالا بۆری 2024ێ ل سەرانسەری دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ تیرۆرستێن داعشێ تنێ 18 كریارێن تیرۆرستی ئەنجامداینە، بەرۆڤاژی سالێن بەرێ قەبارەیێ كریارێن وێ یێن تیرۆرستی گەلەك زێدەتربوو، نوكە هەكە كریارێن تیرۆرستی ژی ئەنجام بدەن گەلەك د لاوازن بۆ نموونە زێدەتر ژ سالەكێیە كەس نەهاتیە كوشتن و رەڤاندن ل دەڤەرێن كوردستانی د هەمبەردا چەكدارێن داعشێ هاتینە كوشتن».

ل سەلاحەدین سەرۆك مەسعود بارزانی پێشوازی ل ئانیل بۆرا ئینان، بالیۆزێ توركیا ل ئیراقێ و شاندێ د گەلدا كر.
بەیاننامەیەكا بارەگەهێ بارزانی، د دیدارەكێدا كو ئیرمان تۆپچۆ، قۆنسلێ گشتیێ توركیا ل هەولێرێ بەرهەڤ بوو، گەنگەشە ل دۆر پێشهات و رەوشا سیاسییا دەڤەرێ و هەڤبەندیێن د ناڤبەرا حوكمەتا هەرێمێ و حوكمەتا ئیراقا فیدرال هاتە كرن.
بارەگەهێ بارزانی ئاماژەكر ژی، هەر د وێ دیدارێدا باس ل پرۆسەیا چارەسەرییا ئاشتیێ ل توركیا هاتە كرن و بالیۆزێ توركیا سوپاسییا سەرۆك بارزانی كر كو ب درێژییا سالێن بۆری رۆلەكێ گرنگ هەبوو د پشتەڤانیكرنا پرۆسەیا چارەسەرییا ئاشتیێ ل توركیا.
هەڤبەندیێن هەردو ئالییان تەوەرێ دی یێ وێ دیدارێ بوو.

نێچیرڤان بارزانی، سەرۆكێ هەرێما كوردستانێ د پەیامەكا هەڤخەمیێدا ل گەل قوربانیێن روودانا ئاگربەربوونا مۆلەكا باژێرێ كوت ل باشوورێ ئیراقێ، كو د ئەنجامدا نێزیكی 80 كەسان گیانێ خوە ژدەستدای، گوت» ب خەمڤە مە چاڤدێرییا وێ كارەساتە ئازاربەخش كر كو ژ ئەگەرێ ئاگربەربوونێ ل سەنتەرەكێ بازرگانی ل باژێرێ كۆت روودای. كو بوویە ئەگەرێ گیان ژدەستدانا دەهان هەڤوەلاتییان و برینداربوونا هەژمارەكا دی».
گوت ژی» دلێ مە ل گەل مالباتێن قوربانییاندایە و هەڤپشكێن خەما وان یا مەزنین و لاڤایا ژخودایێ مەزن دكەین وەغەركرییان بێخیتە بەر مێهرەبانییا خوە و هەدارێ ب كەسوكارێن وان ببەخشیت، هیڤییا چاكبوونا ب لەز ژی بۆ برینداران دخوازین».

مەسرور بارزانی، سەرۆكێ حوكمەتا هەرێما كوردستانێ پەیامەك ل دۆر روودانا ئاگربەربوونا باژێرێ كۆت بەلاڤكر.
د پەیاما خوە دا سەرۆكێ حوكمەتا هەرێمێ گوت» گەلەك خەمباربووم ب گوهلێبوونا كارەساتا ئاگربەربوونێ ل باژێرێ كۆت. هەڤخەمییا خوە ئاراستەی بنەمال و كەسوكارێن قوربانییان دكەم و هیڤییا چاكبوونا ب لەز بۆ برینداران دخوازم».
مەسرور بارزانی گوت ژی» وەكو هەردەم دەرگەهێ هەرێما كوردستانێ بۆ هەموو لێقەومییان یێ ڤەكریە و وەزارەتا ساخلەمیێ ل هەرێمێ و هەموو دامودەزگەهێن مە د بەرهەڤن بۆ چارەسەرییا برینداران و پێشكێشكرنا هەر هاریكارییەكا پێدڤی».

مەسرور بارزانی، سەرۆكێ حوكمەتا هەرێما كوردستانێ، پەیامەك ل دۆر تێكگەهشتنا هەڤپشك د ناڤبەرا حوكمەتا هەرێما كوردستانێ و حوكمەتا ئیراقا فیدرالدا بەلاڤكر و راگەهاند: ژ پێخەمەت بەرژەوەندی و كێمكرنا فشاران ل سەر خەلكێ كوردستانێ، حوكمەتا هەرێما كوردستانێ هەموو جۆرێن نەرمی بەرچاڤكرن و پێگیریێن خوە ب تمامی بجهئینان، هەروەسا دیاركر: من رێزەكا مەزن بۆ حۆڕاگری و بێهنفرەهییا خەلكێ كوردستانێ هەیە.
مەسرور بارزانی، سەرۆكێ حوكمەتا هەرێما كوردستانێ د پەیاما خوە دا گوت» پشتی كو حوكمەتا هەرێما كوردستانێ، ژ پێخەمەت بەرژەوەندی و كێمكرنا فشارێ ل سەر خەلكێ كوردستانێ، هەموو جۆرێن نەرماتیێ بەرچاڤكرن و پێگیریێن خوە ب تمامی بجهئینان و پشتی چەندین بزاڤ و دانوستاندنان، جڤاتا وەزیرێن فیدرالی ژی رازیبوون ل سەر تێكگەهشتنا هەڤپشك كر د ناڤبەرا هەردو حوكمەتێن هەرێما كوردستانێ و فیدرالیدا، پێشوازیێ ل ڤێ پێنگاڤێ دكەین و چاڤەڕێنە حوكمەتا فیدرال، مووچە و شایستەیێن دارایی یێن هەرێما كوردستانێ ب هنێریت».
سەرۆكێ حوكمەتا هەرێما كوردستانێ د پەیاما خوە دا ئاماژەكر» من رێزەكا مەزن بۆ خۆڕاگری و بێهنفرەهییا خەلكێ كوردستانێ هەیە، هەروەسا سوپاسییا وەستییانا هەر كەس و ئالییەكی ژی دكەم كو بزاڤ بۆ چارەسەركرنا كێشەیا مووچەی كریە و بەردەوام هاریكار و پشتەڤانێن مە بوون».
مەسرور بارزانی راگەهاند ژی» هیڤیدارم مووچە و شایستەیێن دارایی، كو مافێ رەوایێ خەلكێ كوردستانێ نە، ئێدی تێكهەلی هیچ كێشە و ناكۆكییەكێ نەهێتە كرن و د چارچۆڤەیێ دەستووری و ب رێزگرتن ل رێككەفتنان، كێشەیێن خوە چارەسەر بكەین».
ل دووماهییا پەیاما سەرۆكێ حوكمەتا هەرێمێ هاتیە» دڤێت دووماهی ب وان هێرشان بهێت ئەوێن ل سەر هەرێما كوردستانێ دهێنە كرن و ب تایبەتی ژی زەڤیێن پەترۆلی. هیڤیدارین حوكمەتا فیدرال، هاریكار بیت د ڤەدیتنا وان تێكدەران و وەرگرتنا پێرابوونێن قانوونی دژی وان».
دهێتە زانین جڤاتا وەزیرێن ئیراقێ د كۆمبوونا پێنجشەمبییا بۆری 17/7/2025، تێكگەهشتنا د ناڤبەرا هەردو حوكمەتا هەرێما كوردستانێ و فیدرالیدا ل دۆر مووچەیێ فەرمانبەرێن هەرێما كوردستانێ پەسەند كربوو و بڕیارا مەزاختنا مووچەیێ مەها پێنج یێن فەرمانبەرێن هەرێمێ دەركر و چاڤەڕێ ژی دهێتە كرن، ئەڤرۆ ئێكشەمبی 20/7/2025، وەزارەتا داراییا ئیراقێ مووچەی بێخیتە سەر هەژمارا بەنكییا وەزارەتا داراییا حوكمەتا هەرێما كوردستانێ ل لقێ هەولێرێ یێ بەنكا ناڤەندییا ئیراقێ. چاڤەڕێ دهێتە كرن ژی هەر د دەمێ حەفتییا داهاتیدا وەزارەتا داراییا ئیراقێ مووچەیێ فەرمانبەرێن هەرێمێ یێ مەها خزیرانێ ژی ب مەزێخیت.

مەسرور بارزانی، سەرۆكێ حوكمەتا هەرێما كوردستانێ، پێشوازی ل نائل بۆرا ئینان، بالیۆزێ توركیا ل ئیراقێ كر.
د كۆمبوونەكێدا ب بەرهەڤبوونا ئەرمان تۆپچو، قونسلێ گشتیێ توركیا ل هەرێما كوردستانێ، سەرەرای گەنگەشەكرنێ ل دۆر پێشڤەبرنا هەڤبەندیێن دو ئالییانە، رەوشا گشتییا ئیراقێ و دەڤەرێ و پێدڤییا دەستپێكرنا هنارتنا پەترۆلا هەرێما كوردستانێ ب رێكا توركیا و چارەسەركرنا كێشەیێن هەرێما كوردستانێ و حوكمەتا فیدرال و رێزگرتن ل مافێن دەستووریێن هەرێما كوردستانێ و دابینكرنا شایستەیێن دارایی یێن خەلكێ كوردستانێ، هاتنە باسكرن.
هەروەسا دوپاتی ل پێدڤییی ب دوماهیئینانێ ب هێرشێن تیرۆرستی ل سەر ژێرخانەیا ئابۆری و وزەییا هەرێما كوردستانێ هاتە كرن.
سەرۆكێ حوكمەتا هەرێما كوردستانێ سوپاسییا ئاسانكاری و هاریكارییا توركیا بۆ هەڤوەلاتیێن هەرێمێ كر ل دەمێ شەڕ و ئالۆزیێن ڤێ دوماهیێ ل دەڤەرێ.
بالیۆزێ توركیا ل ئیراقێ چاكسازێن حوكمەتا هەرێما كوردستانێ د وارێ وزەیێ و دابینكرنا كارەبا 24 ساتی ب رێكا پڕۆژەیێ (رۆناهی) بلند هەلسەنگاند.
گرنگییا زێدەتركرنا بزاڤان بۆ سەرئێخستنا پرۆسەیا ئاشتیێ ل توركیا، پشكەكا دی یا دیدارێ بوو.

دوهی شەمبیێ 19/7/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل بالیۆز ستیڤن ڤەیگن، كاربرێكەرێ بالیۆزخانەیا ئەمریكا ل ئیراقێ كر.
حوكمەتا هەرێما كوردستانێ د بەیاننامەیەكێدا ئاماژە ب وێ چەندێ كر» د كۆمبوونەكێدا كو ستیڤ بیتنەر، قۆنسلێ گشتیێ ئەمریكا ل هەرێما كوردستانێ بەرهەڤبووی، رەوشا گشتییا ئیراقێ و دەڤەرێ و زێدەتر بهێزكرنا هەڤبەندیێن دو ئالییانە هاتە گەنگەشەكرن».
ئەوژی هاتە بەرچاڤكرن» بالیۆز ڤەیگن، پشتەڤانییا وەلاتێ خوە بۆ قەوارەیێ فیدرالی و هەرێما كوردستانەكا ب هێز دووپاتكر» .
ب گۆڕەی بەیاننامەیا حوكمەتا هەرێما كوردستانێ» مەسرور بارزانی، سەرۆكێ حوكمەتا هەرێما كوردستانێ سوپاسییا پشتەڤانییا بەردەوام یا ئەمریكا ل هەرێما كوردستانێ كر».
هەروەسا د بەیاننامەیێدا هاتیە» هەردو ئالی هەڤڕابوون ل سەر وێ چەندێ كو پێدڤییە حوكمەتا فیدرال د زووترین دەمدا مووچە و شایستەیێن دارایی یێن هەرێما كوردستانێ بهنێریت و د نێزیكترین دەمدا ژی، هنارتنا پەترۆلا هەرێما كوردستانێ ب رێكا بەندەرێ جەیهان یێ توركی دەست پێ بكەت. هەروەسا دڤێت هێرشێن تیرۆرستی و تێكدەرانە یێن درۆنان ل سەر زەڤیێن پەترۆلی و ژێرخانەیا وزەیا هەرێما كوردستانێ ب راوەستن».
بەیاننامەیا حوكمەتا هەرێمێ ئاماژە كر « د پشكەكا دی یا كۆمبوونێدا هەردو ئالی هەڤڕابوون ل سەر وێ چەندێ كو پێدڤییە كابینەیا نوو یا حوكمەتا هەرێما كوردستانێ بەری هەلبژارتنێن جڤاتا نوونەرێن ئیراقێ بهێتە پێكئینان».

فراكسیۆنا پارتی دیموكراتی كوردستان داخوازا بڕێڤەچوونا كۆمبوونەكا ب لەز یا جڤاتا نوونەرێن ئیراقێ ل دۆر هێرشێن درۆنی ل سەر هەرێما كوردستانێ كر و دووپاتكر ژی: ئەو هێرشە سەروەرییا ئیراقێ، ئاسایش و ئارامییا وێ تێك ددەن.
فراكسیۆنا پارتی دیموكراتی كوردستان ل جڤاتا نوونەرێن ئیراقێ بەیاننامەیەك ل دۆر هێرشێن درۆنی ل سەر زەڤیێن پەترۆلی و ژێرخانەیا ئابۆرییا هەرێما كوردستانێ، بەلاڤكر.
د بەیاننامەیا فراكسیۆنا پارتی دا هاتیە» د چارچۆڤەیێ فشارێن ئابۆری یێن نەرەوادا ل سەر هەرێما كوردستانێ، ل چەند رۆژێن بۆری، ب رێكا فرۆكەیێن بێ فرۆكەڤان (درۆن) یێن مینڕێژكری، چەندین هێرشێن تیرۆرستی ل سەر هەژمارەكا دەزگەهێن گرنگ ل هەرێما كوردستانێ هاتنە كرن، ژ وان ژی ژێرخانەیا ئابۆری، پارزینگەهێن پەترۆلێ، ژێدەرێن وزەیێ».
فراكسیۆنا پارتی داخوازا بڕێڤەژوونا كۆمبوونەكا ب لەز یا جڤاتا نوونەرێن ئیراقێ بۆ» گەنگەشەكرنا ڤان پێشهاتێن مەترسیدار و پێداچوونێ ب پێرابوونێن حوكمەت ل دۆر ڤێ چەندێ دكەت ئەڤە ژی ب مەبەستا ب هێزكرنا رۆلێ دەستهەلاتا قانووندانانێ د پاراستنا وەلاتی و هەڤوەلاتییاندا».
هەڤدەم فراكسیۆنا پارتی باس ل وێ چەندێ ژی كریە» ژ روانگەها بەرپرسیارییا مە یا نیشتمانی، داخوازێ ژ حوكمەتا فیدرالی دكەین بەرپرسیاتییا خوە یا دەستووری ژ پاراستنا ئاسایش و ئاراماییا وەلاتی هەلبگریت و پێنگاڤێن جدی بۆ راگرتنا هێرشان ب هاڤێژیت، هەڤدەم هێرشكاران ئاشكرا بكەت و روو ب روویێ قانوونێ بكەت»,
فراكسیۆنا پارتی هێرشێن درۆنی ل سەر هەرێما كوردستانێ ب « پێشهاتەكا مەترسیدار بۆ سەر سەروەرییا ئیراقێ و ئاسایش و ئارامییا وێ» هەژمارت و دوپاتكر كو « ئەو جۆرە هێرشە زیانەكا مەزن ب ئابۆرێ ئیراقێ دگەهینن» .
سوبارەت ئەوێن ل پشت وان هێرشان ژی نە، فراكسیۆنا پارتی باس ل وێ چەندێ كر» گەلەك ب رۆهنی یا دیارە، ئەو كەسێن ل پشت هێرشان، ب هیچ رەنگەكی نیشتیمانپەروەر نینن، بەلكو كاری بۆ بجهئینانا ئەجیندا دكەت كو خزمەتا بەرژەوەندیێن وان یێن بەرتەنگ دكەن ل سەر كیستێ گەلێ ئیراقێ و ئێكڕێزییا وی».

نوونەرەكێ كۆماریێن ئەمریكا گەف ل سوودانی كرن، هەكە هێرشێن خوە ل سەر زەڤیێن پەترۆلی ل هەرێما كوردستانێ، نەراوەستینن، دێ پارێن وان بلۆك كەن.
جۆ ویلسۆن داخوازكر، رێگری ل ئیراقێ بهێتە كرن د بكارئیانا پارەیێ پەترۆلی یێ دانای ژ یەدەكا فیدرالی، ئەڤە ژی د چارچۆڤەیێ فشارێن سەر محەمەد شیاع سوودانی، سەرۆك وەزیرێن ئیراقێ دهێتە بۆ رێگریكرنێ ل هێرشكرنێ ل سەر كۆمپانیێن پەترۆلی یێن بیانی كو ل هەرێما كوردستانێ كار دكەن.
ویلسۆنی د پۆستەكیدا ل تۆرا جڤاكییا ئێكس بەلاڤكر» هێرشێن میلیشییایێن ئیراقی ل سەر هێزێن ئەمریكی و كۆمپانیێن پەترۆلی یێن ئەمریكی ل هەرێما كوردستانێ، ناهێنە قەبوولكرن».
هەروەسا ئاماژە ب وێ چەندێ ژیكر» نابیت ئێدی پارەیێ پەترۆلا ئیراقێ ژ یەدەكێ فیدرالی بهێتە بكارئینان، هەروەسا دڤێت محەمەد شیاع سوودانی، سەرۆك وەزیرێن ئیراقێ پێرابوونێن ئێكلاكەر وەربگریت، ئەگەر نە ئەو ب خوە دێ روو ب روویێ ئەنجامێن ترسناك بیت».