ب مەبەستا گەنگەشەكرنا دووماهی پێشهاتێن سیاسی، هێمن هەورامی، ئەندامێ مەكتەبا سیاسی یا پارتی دیموكراتی كوردستان، ل ویلایەتا ڤێرجینیا ئەمریكی ل گەل هەڤالێن لقێ 7 یێ پارتی و نوونەرێن رەڤەندا كوردستانێ كۆمبوو.
هێمن هەورامی د كۆمبوونەكێدا ب هووری رۆناهی ئێخستە سەر ستراتیژییەت و هەلوەستێن نیشتمانی یێن سەرۆك بارزانی و پارتی سەبارەت ب رەوشا سیاسییا هەرێما كوردستانێ، هۆكارێن بابەتی یێن پێكنەئینانا كابینەیا دەهێ یا حوكمەتا هەرێمێ و ئەو ئاستەنگێن روو ب روویێ قەوارەیێ هەرێما كوردستانێ بووین.
هەورامی ئاماژە ب سەركەفتنا مەزن یا پارتی دا د هەلبژارتنێن هەرێمێ و ئیراقێ، كو تێدا باوەرییا پتر ژ ملیۆنەك و 100 هزار دەنگدەران ب دەستڤەئینا، ئەڤە ژی وەك بەلگەیەك بۆ رەوایی و پێگەهێ ب هێز یێ جەماوەریێ پارتی هەژمارت.
د تەوەرەكێ دی یێ كۆمبوونێدا، شرۆڤەكرنەكا هەمەلایەنە بۆ هەڤكێشەیێن سیاسی یێن بەغدا و پێگەهێ هەرێما كوردستانێ د ناڤ گوهۆڕینێن دەڤەرێدا پێشكێشكر.
هەڤدەم دوپاتی ل هەلوەستێ نەگوهۆڕێ سەرۆك بارزانی كر د پشتەڤانیكرنا مللەتێ كورد ل رۆژئاڤایێ كوردستانێ، ل رێككەفتنێن هەولێر و هنارتنا پێشمەرگەی بۆ كۆبانی هەتا دگەهیتە بزاڤێن دیپلۆماسی یێن نوكە.
كۆمبوون ب دانوستاندنەكا ڤەكری و بەرسڤدانا سەرنج و پرسیارێن بەرهەڤبوویان سەبارەت ب پاشەڕۆژا پرۆسەیا سیاسی ب دووماهی هات.

سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: چەندین كۆمبوون بۆ ئێكلاكرنا هەردو پۆستێن سەرۆككۆمارێ ئیراقێ و سەرۆك وەزیرێن ئیراقێ دێ هێنە ئەنجامدان. دووپات كر ژی، بێی رێككەفتنا سیاسی، جڤاتا نوونەران ژی كۆم نابیت و دشیاندا نابیت سەرۆككۆمار بهێتە هەلبژارتن.
شاخەوان عەبدوللا، سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، د داخۆیانییەكا رۆژنامەڤانیدا د بەرسڤا پرسیارا (ئایا راستە ل رۆژا پێنجشەمبی 12/2/2026، جڤاتا نوونەرێن ئیراقێ بۆ هەلبژارتنا سەرۆككۆمارێ ئیراقێ دێ كۆمبیت؟) رۆهنكر
« ژ دەرڤەی جڤاتا نوونەران بڕیار ل سەر وەخت و شێوازێ روونشتنا جڤاتا نوونەران بۆ هەلبژارتنا سەرۆككۆماری و سەرۆك وەزیران دێ هێتە دان».
سەرۆكێ فراكسیۆنا پارتی رەتكر كێشەیا نوكە یا پرۆسەیا سیاسییا ئیراقێ، تنێ پۆستێ سەرۆككۆماری و ناكۆكیێن د ناڤبەرا پارتی دیموكراتی كوردستان و ئێكەتی نیشتمان كوردستان بیت و گوت» ئالیێن شیعی ژی ناكۆكی ل دۆر پۆستێ سەرۆك وەزیران هەنە».
شاخەوان عەبدوللای ئاماژی ب وێ چەندێ ژی كر» بۆ گەهشتن ب رێككەفتنێ ل سەر هەردو پۆستان، د وەختێ بۆریدا، كۆمبوونا هەڤپەیمانییا ئیدارەیا دەولەتێ هەبوو، كۆمبوونا پارتی دیموكراتی كوردستان و ئێكەتی نیشتمانی كوردستان هەبوو، كۆمبوونەكا دی ژی یا پارتی و ئێكەتیێ دێ هێتە ئەنجامدان، هەروەسا كۆمبوونا پارتی و ئێكەتیێ و ئالیێن ئیراقی ژی دێ هێتە كرن».
سەرۆكێ فراكسیۆنا پارتی ل جڤاتا نوونەرێن ئیراقێ دیاركر ژی» ئالیێن سیاسی دخوازن بەری بڕێڤەچوونا روونشتنا جڤاتا نوونەرێن ئیراقێ رێككەفتن ل سەر هەردو پۆستان بهێتە كرن، چونكە هەكە روونشتنا جڤاتا نوونەران ژی بڕێڤەچوو، بێی رێككەفتن د شیاندا نابیت سەرۆككۆمار بهێتە هەلبژارتن».
هەڤدەم شێروان دووبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند» هەیبەت حەلبووسی، سەرۆكێ جڤاتا نوونەرێن ئیراقێ زانییە ئەگەر هەیە هەتا رۆا چارشەمبی 11/2/2026، ئالیێن سیاسی ل سەر هەردو پۆستێن سەرۆككۆماری و سەرۆك وەزیران بگەهنە رێككەفتنێ، لەوما دبیت رۆژا پێنجشەمبی 12/2/2026 بۆ هەلبژارتنا سەرۆككۆماری بهێتە دیاركرن».
دووبەردانی دووپاتی ل وێ چەندێ كر» كێشە تنێ د ناڤمالا كوردیدا نینن، بەلكو د ناڤ چارچۆڤەیێ هەماهەنگیێ ئالیێن شیعی دا ژی كێشەیا جدی ل سەر بەربژاركرنا نووری مالكی بۆ پۆستێ سەرۆك وەزیران هەیە».
رۆهنكر ژی» ئەڤ ناكۆكیێن شیعەیان دێ كاریگەرییا راستەوخوە ل سەر پرۆسەیا هەلبژارتنا سەرۆككۆماری هەبیت، چونكە ب گۆرەی دەستووری، پشتی هەلبژارتنا سەرۆككۆماری، تنێ 15 رۆژ مۆلەت هەیە بۆ راسپاردنا مەزنترین فراكسیۆن بۆ پێكئینانا حوكمەتێ».

هەولێر، قائید میرۆ

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، هەژمارەكا چەكدارێن داعشێ بەری نوكە ل سووریێ هاتینە ڤەگوهاستن بۆ ئیراقێ و دبێژیت، ڤەگوهاستنا چەكدارێن داعشێ یێن د ناڤا زیندانێن سووریێ دا بۆ ئیراقێ دێ بارگرانییا ئەمنی ودارایی بۆ ئیراقێ پەیداكەت.
د. چیمەن بارزانی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ رۆژنامەیا (ئەڤرۆ) گوت» ئالۆزیێن سووریێ ترس بۆ ئیراقێ پەیداكریە و كاریگەری ل سەر ئیراقێ هەبوویە، لەوڕا هەر ژ دەستپێكا ئالۆزیێن سووریێ، ئیراقێ هێزەكا لەشكرییا مەزن ل سەر سنوورێ خوە ل گەل سووریێ جهگیركریە، چونكە بەربوونا ڤان تیرۆرستان مەترسیێن ئەمنی بۆ ئیراقێ و هەرێما كوردستانێ ژی پەیداكرینە».
د. چیمەن بارزانی گوت ژی» نێزیكی 26 زیندان ل بن كۆنتڕۆلا هێزێن سووریا دیموكرات (هەسەدە) بوون، نوكە ئەو زیندان كەفتینە بن دەستێ هێزێن سەر ب حوكمەتا سووریێ، نێزیكی 130 زیندانی شیاینە ب رەڤن و خوە رزگار بكەن و د وەختیدا شیان 80 ژوان كەسێن رەڤی دەستەسەر بكەن، بەلێ زیندانا مەزن ل باژێڕێ حەسەكەیە و نێزیكی پێنج هزار زیندانی تێدانە، پترییا وان ژی مەزنە سەركردەیێن گرۆپا تیرۆرستییا داعشێ نە، هەكە شەڕەك دەڤەرێ ڤەگریت دێ مەترسیێن مەزن پەیدابن، نوكە رێككەفتن هەیە د ناڤبەرا هەسەدە و حوكمەتا سووریێ، هەكە بهێت و ئەو سەركردەیێن داعشێ ب هەر ئەگەرەكێ هەبیت دەركەڤن، بێگومان دێ بنە مەترسی ل سەر سووریێ و ئیراقێ و دەڤەرێ ب گشتی، بهزاران ئیراقی د ناڤا زیندانێن سووریێ دا هەنە پترییا وان ژی تیرۆرستێن مەترسیدارن، هندەك ژوان سەركردەنە و هندەكێن دی چەكێ كیمیاوی و درۆنان بكار دئینن، ل تەنشت وان ئیراقیان زیندانێن دیژی هەنە كو تیرۆرستێن بیانی تێدا هەنە».
ل دۆر ڤەگوهاستنا زیندانیێن داعشێ بۆ ئیراقێ، د.چیمەن بارزانی گوت» بەری نوكە هەژمارەك ژوان زیندانییان كو 150 كەس بوون رادەستی هێزێن ئەمنی یێن ئیراقی هاتینە كرن، بەلێ هەكە نێزیكی هەشت هزار زیندانی بهێنە ڤەگوهاستن بۆ ئیراقێ دێ بیتە بارگرانی ل سەر چاوانییا ئینانا وان بۆ ناڤا ئیراقێ و بابەتێ رێكخستنا زیندانییان، ب تایبەتی ڤێ هەژمارا مەزن ودبیت هندەك ژوان بۆ وەختەكێ درێژ دناڤا زیندانان بمینن، پرسیار ئەوە ئایا دێ شێت ژئالیێ ئەمنی و دارایی ئەڤی بارێ گران ب ستویێ خوەڤە بگریت؟، سەبارەت داعشێن بیانی ژی پێدڤییە دگەل وان وەلاتان دانوستاندن بهێنەكرن ژبۆی چاوانییا رادەستكرنا داعشێن هەلگرێن ناسنامەیێن وان وەلاتان، بەلێ دیار نینە وەلاتێن دی د بەرهەڤن وەلاتیێن خوە یێن داعش وەربگرن یان نە».

سیاسەتمەدارەکێ ناڤدار یێ کورد دیار دکەت، رەوشا رۆژهەلاتا ناڤین گەلەک ئالۆزە و هەموو ئالی کار بۆ بهێزکرنا پێگەهێ خوە دکەن و د دەمەکێ وەسا دا دڤێت کورد ژی ئێدی بریارەکا دیرۆکی بکەن و نها باشترین دەمە کۆنگرێ نەتەوەیی بهێتە ساز کرن.

ئەحمەد تورک سیاسەتمەدارێ ناڤدار یێ کورد دیار کر، رۆژهەلاتا ناڤین د قووناغەکا گەلەک هەستیار دایە، روودانێن ل سووریێ دێ کاریگەریا خوە ل هەرێما کوردستانێ و پارچەیێن دی ژی کەن، پیلان ل دژی گەلێ کورد هەنە، مخابن د ئاستێ نێڤدەولەتی و هەرێمی دا دیسان گەلەک هێز ناخوازن کورد بگەهنە مافێن خوە و ژ بەر ڤێ یەکێ ژی گرنگە هەموو هێزێن کوردی هەست ب مەترسیێن هەی بکەن و پێکڤە کار بکەن و گۆت: (هەکە نها کۆنگرە ژی نەهێتە ساز کرن بلا کۆنفرانسەک بهێتە ساز کرن و ئامادەکاری بهێنە کرن، چونکی پێدڤیا کوردان ب کارەک وەسا هەیە، نها ئێکگرتنەکا باش د ناڤبەرا هەموو کوردان دا هەیە و ئەو یەک ژی دشێت ببیتە دەستپێکەکا نوو و گرنگ).
ناڤهاتی ئەو یەک ژی دیار کر، سیاسەتا تورکیا ل هەمبەر رۆژئاڤایێ کوردستانێ ب چو رەنگەکێ ناهێتە قەبوول کرن، تورکیا گرۆپێن تیرۆرستی و جیهادی ل دژی کوردان بکارئینا و مخابن گەلەک وەلاتیێن کورد ژی شەهید کەفتن و چارەنڤیسێ گەلەک کەسان هەتا نها ژی دیار نینە، دڤێت تورکیا دەست ژ سیاسەتا خوە یا دوژمناتیا ل هەمبەر کوردان بەردەت و گۆت: (سەبارەت ب قووناغا ئاشتیێ ژی هەتا نها ل تورکیا چو نەهاتیە کرن، هێشتا چو پێنگاڤ نەهاتینە ئاڤێتن، دڤێت دەستهەلاتا تورکیا نیەتا خوە ل هەمبەر کوردان ئاشکرا بکەت، تورکیا دخوازیت دەمی بۆ بەرژەوەندیا خوە بکار بینیت و چو نەکەت، کورد ژی ڤێ یەکێ قەبوول ناکەن، هەکە تورکیا ل سەر سیاسەتا خوە یا نها بەردەوام بیت دێ هێزێن کوردی و خەلکێ کورد ژی هەلوەستێ خوە هەبیت و سیاسەتا نها ب چو رەنگەکێ ناهێتە قەبوول کرن و دێ زیانێن خوە یێن مەزن ژی بۆ تورکیا هەبیت).
ئەحمەد تورک د پشکەکا دی یا ئاخڤتنا خوە دا ئاماژە ب ڤێ یەکێ ژی کر، کو روودانێن رۆژئاڤایێ کوردستانێ وەسا کر کورد ل هەموو جیهانێ دەست ب خوەنیشادانان بکەن و کورد نها پتر ژ هەر دەمەکێ هشیارن و کەس نەشێت وەکو سالێن بۆری سەرەدەریێ ل گەل کوردان بکەت، دڤێت رێککەفتنا ل رۆژئاڤایێ کوردستانێ ژی وەکو خوە بهێتە بجهئینان و گرنگە تورکیا چو ئاستەنگان دروست نەکەت، مخابن هەلوەستێ نها یێ تورکیا ژی ل دۆر وێ رێککەفتنێ جهێ گۆمانێ یە، چونکی تورکیا نەڤێت کورد ل سووریێ بگەهنە مافێن خوە و ئەو یەک ژی گەلەک مەترسیدارە.

د چارچۆڤەیێ گوهۆڕینێن ب لەز و ئالۆزیێن رەوشا رۆژهەلاتا ناڤین، مەسرور بارزانی، سەرۆكێ حوكمەتا هەرێما كوردستانێ، د چاڤپێكەفتنەكێدا ل گەل كەنالێ (سكای نیوز عربیە) باس ل نووترین پێشهاتێن سیاسی و ئەمنی، هەروەسا بۆچۆنا هەرێما كوردستانێ بۆ ئارامییا دەڤەرێ كر.
مەسرور بارزانی، سەرۆكێ حوكمەتا هەرێما كوردستانێ، د چارچۆڤەیێ دووڤچوونێ بۆ دووماهی پێشهات و خواندنا هەڤكێشەیێن ئالۆزێن دەڤەرێ، د چاڤپێكەفتنەكا تایبەتدا ل گەل كەنالێ( سكای نیوز عربیە)، ب هووری باس ل دۆسێیێن گەرم یێن رۆژهەلاتا ناڤین كر.
ئەڤ چاڤپێكەفتنە د وەختەكیدایە كو دەڤەر ب رەوشەكا پڕ ژ گوهۆڕینان دەرباز دبیت و بۆچۆن و هەلوەستێن مەسرور بارزانی، سەرۆكێ حوكمەتا هەرێما كوردستانێ، جهێ گرنگییا ناڤەندێن سیاسی و دیپلۆماسییە.
ل دەستپێكێ مەسرور بارزانی، سەرۆكێ حوكمەتا هەرێما كوردستانێ راگەهاند كو پێدڤییە سەرۆككۆمارێ داهاتیێ ئیراقێ ب گۆرەی نەریتێن دیموكراسی و ئەنجامێن هەلبژارتنان بهێتە بەربژاركرن، هەروەسا دووپاتكر ژی كو پارتی دیموكراتی كوردستان، وەك مەزنترین حزبا سیاسی یا كوردی و نیشتمانی، مافێ وێ یێ رەوایە بەربژارێ سەرۆكایەتییا كۆمارێ پێشكێش بكەت.
گوت ژی» پرۆسەیا پشتی هەلبژارتنێن ئیراقێ دڤێت رەنگڤەدانا ئیرادەیا دەنگدەران بیت، كو ل دیاركرنا سەرۆكایەتییا جڤاتا نوونەران دەست پێ دكەت و ب هەلبژارتنا سەرۆككۆماری و سەرۆك وەزیران ب دووماهی دهێت».
ئاماژە ب وێ چەندێ ژی كر» سەروەری و هەڤبەندیێن نێڤدەولەتی یێن هەڤسەنگ بۆ ئیراقێ گەلەك د گرنگن و پێدڤییە هەڤبەندی ل گەل ئەمریكا و جڤاكێ نێڤدەولەتی ب هووری و بەرپرسیارانە رەفتار ل گەل بهێتە كرن».
سەبارەت ب پێكئینانا حوكمەتێ، مەسرور بارزانی راگەهاند» بەربژاركرنا سەرۆك وەزیران، ل دووڤ نەریتێ سیاسی، د ستوویێ بۆكێ شیعی دایە، د وەختەكیدا پۆستێ سەرۆكێ جڤاتا نوونەران بۆ پێكهاتەیێ سوننەیە. ب هەمان شێوە، پۆستێ سەرۆككۆماری بەرپرسیارەتییەكا دەستوورییا هێزێن سیاسی یێن كوردییە، هەڤدەم ئەو كەسە نابیتە سەرۆكێ كوردان، بەلكو دێ بیتە سەرۆككۆمارەكێ كوردی بۆ ئیراقێ، هەروەك پارتی دیموكراتی كوردستان د دووماهی هەلبژارتناندا زێدەتر ژ ملیۆن دەنگ ب دەستڤەئیناینە، ب وێ چەندێ ژی مەزنترین حزبە ل ئیراقێ و نێزیكی نیڤا دەنگێن دەنگدەرێن كوردستانێ ب دەستڤەئیناینە».
رۆهنكر ژی» ب گۆرەی هەمان وێ لۆژیكا بۆ بەربژارێن شیعە و سوننە دهێتە بكارئینان، مافێ پارتییە سەرۆككۆماری دیار بكەت، بەلێ دەرگەهێ پارتی یێ ڤەكریە بۆ كۆدەنگیێ و ئێكڕێزییا ئالیێن كوردی ژ پێخەمەت بەرژەوەندییا مللەتێ كورد».
سەرۆكێ حوكمەتا هەرێما كوردستانێ باس ل وێ چەندێ ژی كر» هەكە كۆدەنگی دروست نەبیت، دڤێت پرۆسەیەكا داپەروەرانە و دیموكراسی بڕیارێ بدەت، كو دو میكانیزم هاتینە پێشنیازكرن، ئەوژی یان دەنگدان د ناڤ پەرلەمانێ كوردستانێ بۆ هەلبژارتنا بەربژارەكێ ئێكگرتیێ كورد، یان دەنگدان ژ ئالیێ ئەندامێن كورد ل جڤاتا نوونەرێن ئیراقێ و ئەو بەربژارێ پترییا دەنگێن پەرلەمانتارێن كورد ب دەستڤەبنییت ببیتە بەربژارێ كۆدەنگی ل سەر هەی».
مەسرور بارزانی پشتڕاستكر كو پارتی، فوئاد حسێن، وەزیرێ دەرڤەیێ ئیراقێ بەربژاركریە و ب كەسایەتییەكێ هەژی و ب ئەزموون هەژمارت كو دشێت وەك سەرۆككۆمار خزمەتا ئیراقێ بكەت. ئاماژە ب وێ چەندێ ژی كر هەرچەندە ئەركێن سەرۆكایەتییا كۆمارێ د جودانە ژ یێن وەزارەتا دەرڤە، بەلێ رۆلەكێ نیشتمانیێ گرنگە و هەر كەسەكێ پشتی وی پۆستێ وەزارەتا دەرڤە وەربگریت، دێ بەرپرسیارەتییا سیاسەتا دەرڤەیا ئیراقێ ب ستووڤە گریت.
ل دۆر مانا هێزێن ئەمریكا ل دەڤەرێ، مەسرور بارزانی، بەرگریێ ژ بەردەوامییا مانا هێزێن ئەمریكی و هەڤپەیمانان ل ئیراقێ كر و گوت» هاتنا وان داخوازییا هەموو ئیراقییان بوو نەك تنێ كوردان، بۆ شەڕێ دژی داعشێ، هەڤدەم سوپاسییا رۆلێ هەڤپەیمانییا نێڤدەولەتی ب سەرۆكایەتییا ئەمریكا دكەین، ب تایبەتی د پشتەڤانیكرنا هێزێن كوردی كو ل رێزێن بەراهییا شەڕێ وێ گرۆپا تیرۆرستیدا بوون».
مەسرور بارزانی، هۆشداری دا كو داعش ب تمامی نەهاتیە ژناڤبرن، سەرەرای ژ دەستدانا وێ بۆ ئاخێ، شانەیێن نڤستی، نەئارامییا سووریێ و ئازادكرنا چەكدارێن دەستەسەركریێن وێ بوویە ئەگەر كو مەترسی بەردەوام بیت و گوت» گەفا داعشێ گەلەك راستەقینەیە، گرۆپێن توندڕەو د سەقایەكێ پڕ ژ نەدادپەروەریێ، هەژاریێ، نەهەڤسەنگیێ و حوكمڕانییا لاواز دا گەشێ دكەن، كو ئەو رەوشە هەتا نوكە ژی ل هندەك دڤەران ماینە».
سەرەرای ئاماژەدان ب باشتربوونا شیانێن هێزێن ناڤخوەیی، سەرۆكێ حوكمەتا هەرێما كوردستانێ راگەهاند، پشتەڤانییا هەڤپەیمانان هێشتا پێدڤییە بۆ رێگریكرنێ ل دووبارە رێكخستنا داعشێ ب شێوازەكێ نوو، هەروەسا ئاماژە ب وێ چەندێ كر، وەختێ ڤەكێشنا هێزێن ئەمریكی ژ دەڤەرێ د ناڤبەرا واشنتۆنێ و بەغدایێ دا دانوستاندن ل سەر هاتیە كرن، بەلێ ب دیتنا هەرێما كوردستانێ بەردەوامییا هاریكارییان بۆ شكاندنا ئێكجارییا تیرۆرێ هێشتا پێدڤییە.
سەبارەت ب پرسا كوردی ل دەڤەرێ، گوت» كوردستان ب درێژییا دیرۆكی هاتیە پارچەكرن و دیرۆك یا دادپەروەر نەبوویە وەختێ باس ل پرسا كوردی دهێتە كرن، بەلێ واقعێ نوو هەیە. نوكە كوردستان هاتیە پارچەكرن ب سەر چار وەلاتێن سەرەكی: سووریێ، توركیا، ئیران و ئیراق. هەر پارچەیەك ژ ڤان وەلاتان تایبەتمەندییا خوە هەیە، كورد ل هەر جهەكی بن هەژی مافێن خوە یێن تمامە، پشتەڤانیێ ژی بۆ فیدرالیزمێ ل ئیراقێ دووپات دكەین، ب مەرجەكی ب تمامی بهێتە بجهئینان».
ئاماژە ژی دا، كوردان ژی وەك هەر نەتەوەیێن دی خەون هەیە و نابیت رێگری لێ بهێتە كرن د دەربڕینا هیڤیێن خوە دا و گوت ژی» خودای ئەز دایمە كورد و شانازیێ ب كوردبوونا خوە دكەم». هەروەسا فرەنەتەوەیی و رێزگرتن ل جوداهیێن وێ وەك بنەمایێ ئارامیێ ل دەڤەرێ هەژمارت.
مەسرور بارزانی رەخنە ل وێ چەندێ گرت كو بەغدا نەشیایە پێگیرییا خوە یا دەستووری بەرانبەر هەرێما كوردستانێ بجهبینیت، ب تایبەتی گیرۆبوونا هنارتنا شایستەیێن دارایی و مووچەی، باس ل وێ چەندێ ژی كر، ئەڤ كارە بنپێكرنا دەستوورێ ئیراقێ نە و د دادپەروەر نینن بەرانبەر وەلاتیێن كورد، سەرەرای پشتەڤانییا بەردەوام یا هەرێما كوردستانێ بۆ حوكمەتا فیدرالی یێن ئێك ل دووڤ ئێك، ژ وان ژی حوكمەتا محەمەد شیاع سوودانی.
ل دووماهییا ئاخڤتنێن خوە، مەسرور بارزانی دیاركر كورد دخوازن پشكەك بن ژ چارەسەریێ نەك كێشە، چ ل ناڤ ئیراقێ و چ ل دەڤەرێ. هەروەسا داخوازا ئارامكرنا رەوشێ و دانوستاندنێ و خوەپاراستنێ كر ل ئاستێ ئالۆزیێن دەڤەرێ و دووپاتكر كو پێدڤییە ئیراق بێلایەن بیت و تێكهەلی ململانێیێن دەرەكی نەبیت، ئاماژە ژی دا» مە ئارامی، رێزگرتنا دو ئالییانە و پێكڤەژیانا ئاشتییانە دڤێت، چونكە چارەسەریێن بەردەوام ب ڤی شێوەی دهێنە پەیداكرن».

دیدار/ دلۆڤان ئاكرەیی

ئەندامەكا كۆمیتەیا ناڤین یا پارتی دیموكراتی كوردستان دیاركر، وان پێشنیازەك دایە قوباد تالەبانی ئەوژی بەرامبەر پۆستێ سەرۆككۆماری، هەموو پۆستێن دی یێن كوردان ل بەغدا بدەنە ئێكەتیێ كو ئارمانجا پارتی ئەوە ڤەگەراندنا سەنگا كوردا ل بەغدایێ، ب هەمان شێوەیێ ل سەردەمێ رەحمەتی مام جەلالی.
د. ئەشواق جاف، ئەنداما كۆمیتەیا ناڤین یا پارتی دیموكراتی كوردستان بۆ رۆژنامەیا (ئەڤرۆ) گوت» پارتی بتنێ بۆ بدەستڤەئینانا پۆستی هەڤڕكیێ ناكەت، بەلكو دخوازیت پۆستێ سەرۆككۆماری ببیتە ناڤەندا بڕیارێ و هەماهەنگیێ د ناڤبەرا هەموو پێكهاتەیاندا».
د. ئەشواق جاف دیار كر ژی» مەبەستا سەرەدانا شاندێ چارچۆڤەیێ هەماهەنگیێ بۆ هەرێمێ و كۆمبوون ل گەل سەرۆك بارزانی و ئالیێن دی یێن سیاسی ل هەرێمێ، بۆ گەنگەشەكرنێ ل سەر سێ تەوەرێن سەرەكی كو پێكدهات ژێ پرسا هەلبژارتنا سەرۆككۆماری و بەربژارێ پۆستێ سەرۆك وەزیران و رەوشا هەستییار یا دەڤەر تێدا دەرباز دبیت، چونكو رەوشا دەڤەرێ یا جهگیر نینە و هەر بوویەر و پێشهاتەك ل ولەلاتێن جیران رووبدەت، دێ كارتێكرنا ئێكسەر ل سەر ئیراقێ و هەرێما كوردستانێ هەبیت، لەوما پارتی دووپاتی ل سەر وێ چەندێ كریە كو نابیت ئیراق ببیتە پشكەك ژ كێشەیان».
رۆهنكر ژی»پارتی پۆستێ سەرۆككۆماری وەك ئیستیحقاقەكێ دەستووری بۆ كاراكرنا رۆلێ كوردان ل بەغدا دبینیت و ئەم دخوازین پۆستێ سەرۆككۆماری وەك سەردەمێ رەحمەتی مام جەلالی لێ بهێت ل بەغدا، چونكو د وی سەردەمیدا هەماهەنگییەكا ب هێز د ناڤبەرا سەرۆك بارزانی و مام جەلالی دا هەبوو، ئەو چەند ژی بوو ئەگەر كو كوردان ل بەغدا سەنگەكا مەزن هەبیت و ئەم دخوازین د. فوئاد حوسێن وی رۆلی بگێڕیت، چونكە خودان ئەزموونەكا دیپلۆماسییا مەزنە و بۆ ڤێ مەبەستێ وەك بەربژارێ پارتی، پێشنیازەك دایە قوباد تالەبانی و گوتیە وی كو پێشنیاز ئەوە، پارتی هەموو پۆستێن خوە ل ئیراقێ بدەتە ئێكەتیێ بەرامبەر پۆستێ سەرۆككۆماری و پێشنیاز ژ ئالیێ قوباد تالەبانی ڤە گەهشتیە ئێكەتیێ، بەلێ هەتا نوكە ئێكەتیێ بەرسڤەكا فەرمی نەدایە».
ل دۆر پۆستێن هەرێما كوردستانێ ژی دیاركر» برایێن مە یێن هێژا ل ئێكەتیێ داخوازا 9 وەزارەتان كریە كو دوو ژ وان وەزارەتێن ئەمنی نە و پارتی كێشە ل سەر هەژمارا وەزارەتان نینە بەلكو كێشە ل سەر جۆرێ وەزارەتانە».
سەبارەت نەڕازیبوونێن ل سەر بەربژاركرنا نووری مالكی بۆ پۆستێ سەرۆك وەزیرێن ئیراقێ، ئەشواق جاف گوت» هێشتا یا رۆهن نینە كا نەڕازیبوونێن نێڤدەولەتی، ب تایبەت ئەمریكا، ل سەر مالكی نە یان ل سەر بەرنامەیێ وی یێ سیاسییە و ئەم وەك پارتی مە نەڤێت ببینە پشكەك ژ هەڤڕكییان، بەلكو مە دڤێت بزانین بەرنامەیێ حوكمەتا بهێت چییە بۆ چارەسەركرنا كێشەیێن د ناڤبەرا هەولێرێ و بەغدایێ دا و پارتی هەموو بزاڤان دكەت كورد ب ئێك بەربژار و ب ئێكدەنگ بچنە جڤاتا نوونەران، بەلێ دەستبەرداری مافێن دەستووری یێن گەلێ كوردستانێ نابیت بتنێ بۆ رازیكرنا ئالییەكی».

وەزیرێ ڤەگوهاستن و گەهاندنێ ل حوكمەتا هەرێما كوردستانێ و نوونەرێ كریستیانان د كابینەیا نەهێ یا حوكمەتا هەرێمێ دا ل واشنتۆنا پایتەختێ ئەمریكا زنجیرەیەكا كۆمبوونان ل گەل بەرپرسێن ئەمریكا ئەنجامدان و تێدا دووپاتی ل پاراستنا مافێن پێكهاتەیێن ئایینی و نەتەوەیی ل ئیراقێ و سووریێ كر، هەڤدەم بەرپرسێن ئەمریكا ڤەخواندن بۆ پشكداریكرنێ د رۆژا لاڤایا نیشتمانییا كوردستانی دا.
د چارچۆڤەیێ گۆپیتكا جیهانییا ئازادیێن ئایینیدا ل واشنتۆنێ، ئانۆ جەوهەر، وەزیرێ ڤەگوهاستن و گەهاندنێ ل حوكمەتا هەرێما كوردستانێ (وەك نوونەرێ پێكهاتەیێ كریستیان)، ل گەل بەرپرسێن وەزارەتا دەرڤە، كۆنگرێسی، ناڤەندێن بڕیاردانێ و كۆمسیۆنا ئەمریكا بۆ ئازادیێن ئایینێن نێڤدەولەتی (USCIRF) كۆمبوو.
ب گۆرەی بەیاننامەیەكا ئانۆ جەوهەری، د كۆمبووناندا رۆناهی هاتە ئێخستن ل سەر وان مەترسیێن ژ ئەگەرێ دەستێوەردانا گرۆپێن چەكدار و میلیشیان روو ب روویێ خەلكێ دەشتا نەینەوا دبن.
وەزیرێ ڤەگوهاستن و گەهاندنێ دووپاتكر كو دەركرنا گرۆپێن چەكدار ژ دەڤەرێن كریستیانان و ئێزدییان، مەرجەكێ بنەڕەتییە بۆ زڤڕینا ئارامیێ و پاراستنا دیرۆكا وان پێكهاتەیانە.
هەروەسا ئاماژە ب وان گڤاشتنان هاتە كرن كو ل سەر سەركردەیێن ئایینی دهێنە كرن، ب تایبەتی پاتریارك مار لویس ساكۆ، سەرۆكێ كەنیسەیا كلدانی ل ئیراقێ و جیهانێ.
تەوەرەكێ دی یێ دانوستاندنێن ئلنۆ جەوهەری ل واشنتۆنێ، تایبەت بوو ب قانوونا هەلبژارتنێن ئیراقێ و تێدا دووپاتكر كو دڤێت سیستەمێ كۆتا وەك گەرەنتییەكا دەستووری بهێتە پاراستن و دەنگدانا تایبەت ب كۆتایان تنێ بۆ پێكهاتەیان ب خوە بیت، نەك ئالیێن دی خواستا سیاسییا پێكهاتەیان بۆ خوە بكێشن.
د دیداراندا باس ل پێدڤییا بجهئینانا رێككەفتنا شنگالێ هاتە كرن بۆ ئاساییكرنا رەوشا دەڤەرێ و دوورئێخستنا چەكێ نەفەرمی. هەڤدەم، رەوشا پێكهاتەیێن ئایینی و نەتەوەیی ل رۆژئاڤایا كوردستانێ و باكوورێ سووریێ هاتە گەنگەشەكرن و داخواز هاتە كرن جڤاكێ نێڤدەولەتی زێدەتر گرنگیێ ب مافێن وان بدەت.
ئانۆ جەوهەر داخواز كر كریستیان و ئێزدی ل حوكمەتا داهاتییا ئیراقێدا هەڤپشكییەكا راستەقینە هەبیت. هەروەسا دۆسێیا ئێزدیێن رەڤاندی وەك ئەركەكێ ئەخلاقی و مرۆڤایەتی هەژمارت وداخوازا بەردەوامییا بزاڤێن ڤەدیتنا وان كر.
د دووماهییا دیداراندا ل گەل بەرپرسێن ئەمریكا، ئانۆ جەوهەر ڤەخواندنەكا فەرمی ئاراستەی وان كر بۆ پشكداریكرنێ د رۆژا لاڤایا نیشتمانییا كوردستانی كو بڕیارە ل نیسانا 2026 ب چاڤدێری و بەرهەڤبوونا سەرۆك مەسعود بارزانی بڕێڤەچیت.

بەرپرسەکا رێڤەبەریا خوەسەر یا رۆژئاڤایێ کوردستانێ دیار دکەت، نها هەبوونا گەلێ کورد ب فەرمی ل سووریێ هاتیە قەبوول کرن و کار بۆ ڤێ یەکێ ژی دهێتە کرن کو هەموو مافێن گەلێ کورد د دستوورێ سووریێ دا بهێنە گەرەنتیکرن.

ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ دیار کر، ژ ئەنجاما رێککەفتنا ڤێ دووماهیێ ئێدی نها هەبوونا کوردان ل سووریێ وەکو نەتەوەیەک جودا هاتیە قەبوول کرن، لێ ئەو یەک رامانا هندێ نادەت کو هەموو پرسێن هەی چارەسەر بووینە، بەلکو پیلان ل دژی گەلێ کورد هەنە، ل شامێ ب پشتەڤانیا هندەک وەلاتێن هەرێمی بزاڤ دهێنە کرن دا کورد نەگەهنە مافێن خوە، لێ هەموو هێزێن سیاسی یێن رۆژئاڤایێ کوردستانێ نها پێکڤە کار دکەن و گۆت: (ب خەباتا سیاسی یا کوردی ل سووریێ و ب پشتەڤانیا گەلێ کورد دێ پیلانێن ل دژی کوردان هێنە ژناڤبرن، نها پشتەڤانیەکا باش ژی ژ بۆ مافێن کوردان ل سووریێ هەیە و بێگومان وەکو کورد ئەم دێ کار کەین دا هەموو مافێن مە د دستوورێ نوو یێ سووریێ دا بهێنە گەرەنتیکرن، کەس نەشێت ئاستەنگان ل هەمبەر مافێن کوردان دروست بکەت).
ناڤهاتیێ ئەو یەک ژی دیار کر، راستە تشتێ مە وەکو کورد ل سووریێ دڤێت هێشتا مە بدەستڤە نەئیناینە، لێ ب رێیا خەباتا سیاسی دێ کورد گەهنە هەموو مافێن خوە، نها قووناغەکا نوو دەستپێکریە و گرنگە کورد هەموو پێکڤە کار بکەن دا بشێن شامێ نەچار بکەن هەموو مافێن کوردان د دستوورێ نوو یێ سووریێ دا گەرەنتی بکەت، چونکی دستوورێ نها گەلەک ئاریشەیێن خوە هەنە و هەر کەس ژی باش دزانیت کو پێدڤیا سووریێ ب دستوورەک نوو و دیموکراتی هەیە و گۆت: (نها ئیرادەیەکا بهێز یا کوردی ژ بۆ چارەسەریێ ل رۆژئاڤایێ کوردستانێ هەیە، کورد دشێن پێکڤە دەستکەفتیێن مەزنتر ژی بدەستڤە بینن، ئەم دێ د هەموو بیاڤان دا بۆ گەرەنتیکرنا مافێن گەلێ کورد کار کەین و بێگومان دەمێ ئەم پێکڤە کار بکەین دێ سەرکەفتی بین).
ئیلهام ئەحمەد د دووماهیا ئاخڤتنا خوە دا بەحسێ رەوشا عەفرینێ و سەرێ کانیێ ژی کر و دیار کر، نها کارەک مەزن بۆ ڤێ یەکێ دهێتە کرن دا ئاوارەیێن وان دەڤەران ڤەگەرنە ڤە جهێن خوە، بێگومان دڤێت شام ژی بەرپرسیاریا خوە ل هەمبەر وان دەڤەران بجه بینیت و هەر تشتێ کو مە بۆ حەسەکێ و جهێن دی دڤێت بێگومان مە هەمان تشت بۆ عەفرینێ، گرێ سپی و سەرێ کانیێ ژی دڤێت و گرنگە هەموو دەڤەرێن کوردی ل سووریێ چارەنڤیسێ وان ئێک بیت و رێ نادەین شام ئالۆزیان بۆ دەڤەرێن کورد دروست بکەت و دڤێت کورد وان دەڤەران برێڤە ببەن.

زێدەتر ژ سەد کەسێن رەوشەنبیر، ئەکادیمی، سیاسەتمەدار و پارێزەرێن کورد ل باکورێ کوردستانێ د داخویانیەکا نڤیسکی دا دیار کرن، نها رەوشەکا نوو ل رۆژهەلاتا ناڤین هاتیە پێش و د هەمان دەمی دا دوژمنێن گەلێ کوردستانێ ژی لاواز بووینە، پێدڤیە کورد ل سەر ئاستێ رۆژهەلاتا ناڤین پێکڤە کار بکەن دا بگەهنە مافێن خوە، ژ بەر ڤێ یەکێ ژی ئەو ب فەر دزانن نها پلاتفۆرما نەتەوەیی یا کورد دامەزرینن و دەست ب خەباتەکا مەزن ژی هاتیە کرن.
د داخویانیێ دا هاتیە دیار کرن کو پلاتفۆرما نەتەوەیی یا هەموو کوردانە و سەر ب چو پارت و هێزەکا سیاسی نینە، ئەو دێ بزاڤێ کەن کو ل رۆژێن ٢٨ و ٢٩ مەها ئادارێ یا ئەڤسالە ل باژێرێ ئامەدێ کۆنفرانسەکێ ساز بکەن و ئارمانجا خوە بۆ هەموو جیهانێ ئاشکرا بکەن، چونکی دڤێت کورد ل سەر ئاستێ رۆژهەلاتا ناڤین وەکو کیانەک جودا بگەهنە مافێن خوە و دەم هاتیە کورد بخوە بریارێ ل دۆر پاشەرۆژا خوە بدەن.

سەرۆك بارزانی و ژان نوێل بارۆ، وەزیرێ دەرڤەیێ فەرەنسا ل هەولێرێ كۆمبوون.
بارەگەهێ بارزانی بەلاڤكر» وەزیرێ دەرڤەیێ فەرەنسا سلاڤێن تایبەت یێن سەرۆك ماكرۆنی گەهاندنە سەرۆك بارزانی و دووپاتی ل هەڤبەندی و دۆستایەتییا دوقۆلی پشتەڤانیكرنا گەلێ كوردستانێ كر، هەروەسا ئاماژە ب بزاڤێن بەردەوام یێن سەرۆك ماكرۆنی و سەرۆك بارزانی كر ل هاندانا ئالییان بۆ گەهشتن ب رێككەفتنێ ل سووریێ و ئەو بزاڤە بلند هەلسەنگاندن. رێز ژی بۆ رۆل و پێگەهێ سەرۆك بارزانی هەبوو د چارەسەركرنا كێشەیان ل ئیراقێ و دەڤەرێ, هەروەسا رۆناهی ئێخستە سەر هەڤبەندیێن دیرۆكی یێن فەرەنسا و گەلێ كوردستانێ و نامەیەكا بارزانیێ نەمر ژی پێشكێشی سەرۆك بارزانی كر كو ل سالا 1968 ژ ئالیێ بارزانیێ نەمر ڤە بۆ جەنەڕال شارل دیگۆل سەرۆكێ فەرەنسا هاتبوو هنارتن و ل ئەرشیفێ وەزارەتا دەرڤەیا فەرەنسا هاتبوو پاراستن و سەرۆك بارزانی سوپاسییا وەزیرێ دەرڤەیێ فەرەنسا كر و ئەو نامەیە ب بەلگەیەكا پڕبها هەژمارت كو سەلمینەرا هەڤبەندی و دۆستایەتییا ژ مێژەیا گەلێ كوردستانێ و گەلێ فەرەنسایە».
بارەگەهێ بارزانی دیاركر ژی» هەر د وێ دیدارێدا بیر و بۆچۆن ل دۆر رەوشا سیاسییا دەڤەرێ و سووریێ و پرۆسەیا ئاشتیێ ل توركیا و پرۆسەیا سیاسییا ئیراقێ و هەرێما كوردستانێ هاتنە لێكگۆهارتن و سەرۆك بارزانی دووپاتی ل وێ چەندێ كر كو دخوازن هەموو كێشە و گرفتێن دەڤەرا رۆژهەلاتا ناڤین ب رێكێن ئاشتییانە بگەهنە چارەسەریێ و دەڤەر ئارامیێ ب خوەڤە ببینیت».
سەرۆك بارزانی ئاماژە ب پرۆسەیا ئاشتیێ ل توركیا دا و هیڤی خواست ب رێكا دیالۆگێ بگەهیتە ئەنجام و هەردەم پشتەڤانیێن وێ پرۆسەیێ بوون.
سەبارەت ب رۆژئاڤایێ كوردستانێ، سەرۆك بارزانی رۆهنكر كو هەموو بزاڤێن خوە بكارئینان بۆ وێ چەندێ رێگری بهێتە كرن كو ناكۆكیێن سیاسی ببنە شەڕێ نەتەوەیی د ناڤبەرا كورد و عەرەبادا هەروەسا رێگری ل وێ چەندێ بهێتە كرن كو ژناڤبرنا رەگەزی ل دژی گەلێ كورد ل سووریێ روو بدەت و سەرۆك بارزانی دیاركر»پشتەڤانیێ ل رێككەفتنا د ناڤبەرا حوكمەتا سووریێ و هەسەدە دكەین» و هیڤی خواست كو ئەو رێككەفتنە ببیتە بنەمایەك بۆ ئارامیێ و چارەسەرییا كێشەیان د ڤێ قووناغێدا.
سەبارەت مەترسییا پەیدابوونا تیرۆرێ، بارەگەهێ بارزانی راگەهاند» سەرۆك بارزانی ئەوچەندە بەرچاڤكر كو مەترسییا ب هێزبوونا داعشێ هەیە و پێدڤییە میكانیزمەكا گونجای و هەماهەنگی د ناڤبەرا ئالییاندا هەبیت بۆ روو ب رووبوونا گەفا تیرۆرێ و داعشێ».
د پشكەكا دی یا وێ دیدارێدا ب گۆرەی بارەگەهێ بارزانی» سەرۆك بارزانی سوپاسییا فەرەنسا كر كو هەردەم ل وەختێن دژواردا پشتەڤانا گەلێ كوردستانێ بوویە». وەزیرێ دەرڤەیێ فەرەنسا ژی دووپاتكر كو وەلاتێ وی هەردەم سۆزەكا تایبەت بۆ دۆزا گەلێ كوردستانێ ل رۆژهەلاتا ناڤین هەبوویە و پشتەڤانا وێ چەندێ یە گەلێ كوردستانێ ب رێكێن ئاشتییانە ب مافێن خوە شاد ببیت و هەروەسا وەلاتێ وی د گەل پاراستنا هەرێما كوردستانێ و بەردەوامییا هەرێما كوردستانەكا ب هێز دایە».
دەقێ نامەیا دیرۆكی یا مەلا مستەفا بارزانی بۆ شارل دیگۆل سەرۆكێ فەرەنسا
جەنەڕال..
دەلیڤەیێ بدە پیرە مێرەكێ وەكی من، دا كو ئەڤێ داخوازیا گرنگ بۆ هەوە بهنێریت، پیرە مێرەكی كو ژ دەستپێكا لاوینییا خۆ ڤە، بۆ ئازادی و پاراستنا كەرامەتا گەلێ خۆ خەباتێ دكەت.
هوین مەزنترین خەباتكەرێ سەرهەلدانێ نە ل ئەورۆپا، هوین ئەون یێن كو وەلاتێ خۆ بەرەڤ سەرفرازیێ بری، هوین نەشێن هەست ب ئێش و ئازارێن گەلێ كوردێ چیایی نەكەن، یێ كو دەمێ شەش سالێن ڕەبەقە ل باكورێ ئیراقی، د خەباتەكا بێ بێهنڤەدان دایە.
ژ وێ ژی پتر، هوین سەرۆكێ فەرەنسا نە، سەرۆكێ وێ نەتەوا بلند و پایەبەرزن كو پرەنسێپێن ئازادیێن سیاسی و مەبدەئێ مافێ چارەنڤیسێ گەلان پێشكێشی جیهانێ كری. ژ وێ ژی پتر، هوین (جەنەڕال دیگۆل) ڕزگاركەرێ هەمی وەلاتێن بیانی یێن فەرەنسی ئاخڤن، دژمنێ سەرسەختێ هەر ڕامانەكا چەوساندنێ نە و دۆستێ ڕاستەقینەیێ هەر مرۆڤەكێ ئازادیخوازن.
جەنەڕال.. هوین د ڕژد بوون ل سەر دەربڕینا نەرازیبوونێ ل هەمبەر شەڕێ (ڤێتنامێ)، ئەز یێ پشتراستم كو ل دەڤ هەوە دۆزا گەلێ كورد ژ یا ڤێتنامییا كێمتر نینە.
ئەم د ڤێ شەڕ و خەباتا پاراستنا نەتەوا خۆ دا، ب تەمامی یێ ب تنێ نە، ڕێكخراوا نەتەوەیێن ئێكگرتی ئەم یێ پشتگۆهـ هاڤێتین، هەروەسا چەندین زلهێز ژی د هاریكاریكرنا ئیراقی دا ب نووترین چەكێن وێرانكەر هەڤڕكیێ دكەن، لەورا دویماهیك لایەن مابیت كو ئەم چاڤەڕێی ئۆمێدێ لێ بكەین، ب تنێ (دیگۆل)ێ فەرەنسا یە.
ئەڤڕۆ، دەمێ ئیراقی داخوازا چەكی ژ فەرەنسا دكەن، ئەم وەسا دبینین كو بێی چارەسەركرنەكا مەبدەئی یا كێشا كورد، هەر هنارتنەكا چەكی بۆ ئیراقی ب تنێ دێ بیتە ئەگەرێ وێرانكرنا وەلاتێ مە و كوشتنا ب كۆم یا ژن و زارۆكێن مە.
قورئانا پیرۆز دبێژیت: (بۆ هەر مرۆڤەكی ل ئاسمانان بەهەشتەكا بچووك هەیە، كو ل دەمێ نڤێژێ دشێت بەرێ خۆ بدەتێ). هوین و فەرەنسا بەهەشتا ئاسمانی یا مە نە.

مستەفا بارزانی
ئیراق – كوردستان
8ی شوباتا 1968