پشتی روودانا رێگریكرنا لەشكرێ ئیراقێ ل جۆتیارێن كورد ل كەركووكێ كو زەڤیێن خوە بكێلن و هێرش كریە سەر، كارڤەدانەكا ناڤخوەیی ل سەر پەیدابوو ول دۆر ڤێ چەندێ، محەمەد حاجی مەحمود، سكرتێرێ پارتا سۆسیال دیموكراتا كوردستانێ ب بەلاڤكرنا بەیاننامەیەكێ ب ناڤونیشانێن (شێرێ مال و رێڤیێ مەیدانێن شەڕی) هاتە دەنگ و راگەهاند» لەشكرێ ئیراقێ كو دیرۆكەكا پڕ ژ تاوانێ دژی كوردان یا هەی، ب ڤی هەلوەستی سەلماند درێژەپێدەرێ هەمان وی لەشكرییە، كو تاوانێن وێرانكرنا كوردستانێ و ئەنفال و كیمیاباران ئەنجامدایە و تاوانێن دژی كوردان یا بوۆ بوویە پیشە».
محەمەد حاجی مەحمود، گۆت ژی» مخابن هندەك سەربازێن لەشكرێ ئیراقێ، ب شێوەیەكێ درندانە و نە مرۆڤانە و نەبەرپرسانە و ب بێ رێزی، هێرشی جۆتیارێن كوردێن كەركووكێ ل سەر مولك و مال و گۆڕێن باب و باپیرێن وان كر، سەرەرای وێ چەندێ گەلەك ب توندی وی هەلوەستی شەرمزار دكەین، وەكو پارتییا سۆسیالیستا كوردستانێ بەرهەڤی هەموو ئەگەر و پشتەڤانییەكێ نە».

ئەبو عومەر ئیدلیبی فەرماندارێ لیوایێن باکور یێن سەر ب هێزێن سووریا دیموکرات راگەهاند کو پشتی کۆمبوونا وان یا بەری دو رۆژان ل گەل جڤاتا سووریا دیموکرات وان بریار داینە ببنە پشکەک ژ لەشکرێ نوو یێ سووریێ و دێ ل گەل لەشکرێ سووریێ ب هەماهەنگی کار کەن و ئارمانجا وان ژی پاراستنا دەڤەرێن ل ژێر کۆنترۆلا هێزێن وان دایە دا رێ نەدەن چو هێزێن توندرەو و تیرۆرست ئارامیا دەڤەرێ تێک بدەن.
هەمان فەرمانداری ئەو یەک ژی دیار کریە د کۆمبوونا وان یا ل گەل جڤاتا سووریا دیموکرات بەحسێ ڤێ یەکێ ژی هاتیە کرن کو گاڤ ب گاڤ و ب هەماهەنگی و رێککەفتن ل گەل شامێ دێ هەموو هێزێن وان سەر ب وەزارەتا بەرگریێ بن و دێ پێکڤە کار کەن، لێ ژ بۆ ئەو یەک ب تەمامی بهێتە بجهئینان ژی دڤێت ل گەل شامێ دانوستاندنێن زێدەتر بهێنە کرن.

سەرۆكێ هەرێما كوردستانێ ل دۆر پڕۆسەیا ئاشتیێ ل توركیا و باكوورێ كوردستانێ راگەهاند: مە هەردەم كاركریە بۆ وێ چەندێ پڕۆسەیا ئاشتیێ پەیدا ببیت و كێشە ب شێوەیەكێ ئاشتییانە بهێنە چارەسەركرن، چونكە ئەزموونان یا سەلماندی كو شەڕ وچەك هیچ كێشەیەكێ چارەسەر ناكەن.
دوهی دوشەمبی 17/2/2025، نێچیرڤان بارزانی، سەرۆكێ هەرێما كوردستانێ پێشوازی ل شاندێ ئیمرالی كر، كو بۆ لێكگۆهارتنا بۆچوونان و گەنگەشێ ل دۆر بزاڤێن پڕۆسەیا ئاشتیێ ل توركیا، ل هەرێما كوردستانێیە.
ب گۆڕەی بەیاننامەیەكا سەرۆكایەتییا هەرێما كوردستانێ، نێچیرڤان بارزانی گۆتییە شاندێ ئیمرالی» هیڤیدارین PKK ستراتیجیانە ب نێرنە پڕۆسەیێ و پێدڤییە ئەڤ دەلیڤەیە نەهێتە ژ دەستدان» .
د كۆمبوونێدا، نێچیرڤان بارزانی هەموو جۆرێن هاریكاریێ و پشتەڤانیێ بۆ سەركەفتنا پڕۆسەیا ئاشتیێ ل توركیا دوپاتكرن، و ل دووڤ بەیاننامەیا سەرۆكایەتییا هەرێما كوردستانێ» پڕۆسە ب دەلیڤەیەكا گرنگ و دیرۆكی هەژمارت، كو پێدڤییە هەموو كاری بۆ سەرئێخستنا پڕۆسەیێ و برایەتییا كورد و توركان بكەن، چونكە ئاشتی بۆ هەموویان ل توركیا و دەڤەرێ یا پێدڤییە».
ب گۆڕەی بەیاننامەیا سەرۆكایەتییا هەرێما كوردستانێ، شاندێ ئیمرالی سلاڤ و رێزێن تایبەت یێن عەبدوللا ئۆجەلانی گەهاندنە نێچیرڤان بارزانی و شاندێ ناڤبری رۆناهی ئێخستە سەر پێنگاڤێن پڕۆسەیا ئاشتیێ.
د بەیاننامەیێدا هاتیە ژی» شاندێ ئیمرالی پێزانین بۆ بزاڤێن نێچیرڤان بارزانی د پڕۆسەیا پێشتر و نوكە یا ئاشتیێدا دەڕبری، هەروەسا داخوازكر سەرۆكێ هەرێمێ ل سەر هاریكاری و پشتەڤانییا خوە بۆ سەرئێخستنا پڕۆسەیێ بەردەوام بیت».
شاندێ ئیمرالی پشتی كۆمبوونا دوهی ل گەل نێچیرڤان بارزانی، سەرۆكێ هەرێما كوردستانێ، راگەهاند كو پەیاما ئۆجەلانی گەهاندە سەرۆكێ هەرێما كوردستانێ و ب هەلوەستێ سەرۆكێ هەرێمێ ژی ل دۆر پڕۆسەیا چارەسەریێ و ئاشتیێ گەلەك د سوپاسدارن.
كەسكین بایندر، هەڤسەرۆكێ پارتییا هەرێمێن دیموكراتیك (دەبەپە) دوهی دوشەمبی 17/2/2025، د كۆنگرەیەكێ رۆژنامەڤانیدا پشتی كۆمبوونا شاندێ ئیمرالی ل گەل سەرۆكێ هەرێما كوردستانێ، ناڤەرۆكا كۆمبوونێ بۆ دەزگەهێن راگەهاندنێ بەرچاڤكر.
ئایندر ب ناڤێ شاندێ ئیمرالی ئاخڤت و گۆت» كۆمبوونا مە گەلەك ب دلخوەشی و برایانە بوو، مە سلاڤ و خوەشتڤییا ئۆجەلانی و پەیاما وی ل دۆر پڕۆسەیا ئاشتیێ و چارەسەریێ گەهاندنە سەرۆكێ هەرێما كوردستانێ».
شاندێ ئیمرالی پێكهاتبوو ژ پەروین بولدان، پەرلەمانتارا دەم پارتی ل وانێ، سری سورەیا ۆندەر، بریكارێ سەرۆكێ پەرلەمانێ توركیا، گولجان كاچماز ساییغت، پەرلەمانتارێ دەم پارتی ل وانێ، محەمەد كاماچ، پەرلەمانتارێ دەم پارتی ل ئامەدێ، بەردان ئۆزتورك، پەرلەمانتارێ دەم پارتی ل ئامەدێ، كەسكین بایندر، هەڤسەرۆكێ پارتییا هەرێمێن دیموكراتیك (دەبەپە) و شاندەك ژ پارێزەرێن ئۆجەلانی.
كەسكین بایندر دیاركر ژی» مە ژ نێزیك هەلوەستێ نێچیرڤان بارزانی ل دۆر پێشئێخستنا پڕۆسەیا چارەسەریێ و بۆ پێشكەفتنا پرسا كوردی دیت، ئەو خودانێ هەلوەستەكێ نەتەوەیی بوو و پشتەڤانییەكا مەزن ل پێشكەفتنا پڕۆسەیا چارەسەریێ و ئاشتیێ دكەت».
هەروەسا گۆت» ئیم دشێین وێ چەندێ بێژین، هەموو سەرۆك و خزبێن كوردی خودان هەلوەست و باوەرن بۆ وێ چەندێ ئەو پڕۆسەیا چارەسەریێ و ئاشتیێ پێشبكەڤیت. ئەم گەلەك سوپاسدارێن وێ پشتەڤانییا نێچیرڤان بارزانی نە و سوپاسییا وی دكەین، مە سلاڤ بۆ گەلێ خوە ل باشوورێ كوردستانێ یێن هەین».
پشتی گەهشتنا شاندێ ئیمرالی بۆ هەرێما كوردستانێ، ئێكەمین كۆمبوونا وی ل گەل سەرۆك مەسعود بارزانی بوو، دەم پارتی ل دۆر وێ كۆمبوونێ راگەهاندبوو» د كۆمبوونێدا شاندێ ئیمرالی سەبارەت دیدارێن خوە یێن پێشتر ل گەل عەبدوللا ئۆجەلانی، رێبەرێ زیندانكریێ PKK ، پێزانین دانە سەرۆك بارزانی».

سەرۆك مەسعود بارزانی ل گەل جێگرێ وەزیرێ دەرڤەیێ ئیرانێ كۆمبوو وهەردو ئالییان باس ل پەیوەندیێن د ناڤبەرا هەرێما كوردستانێ و كۆمارا ئیسلامییا ئیرانێ دا هاتە كرن .
دوهی دوشەمبی 17/2/3025 ل سەلاحەدین سەرۆك مەسعود بارزانی پێشوازی ل مەجید تەخت رەوانچی، جێگرێ وەزیرێ دەرڤەیێ ئیرانێ بۆ كاروبارێن سیاسی و شاندەكێ دگەلدا كر.
بارەگەهێ بارزانی راگەهاند» د وێ كۆمبوونێدا باس ل پەروەندیێن د ناڤبەرا هەرێما كوردستانێ و ئیرانێ هاتە كرن و دوپاتی ل پێشڤەبرن و بەردەوامییا وان پەیوەندییان هاتە كرن ل سەر بنەمایێ هەڤپشكیێ د هەموو واراندا».
رەوشا سیاسییا ئیراقێ و گوهۆڕین و ئاستەنگێن دەڤەرێ ب گشتی تەوەرەكێ دی یێ وێ دیدارێ بوون.

سەرۆكێ هەرێما كوردستانێ ل گەل جێگرێ وەزیرێ دەرڤەیێ ئیرانێ كۆمبوو و راگەهاند، پەیوەندیێن ب هێز و هەڤسەنگ د ناڤبەرا ئیراقێ و ئیرانێ بۆ سەقامگیرییا دەڤەرێ گەلەك د پێدڤی نە.
نێچیرڤان بارزانی، سەرۆكێ هەرێما كوردستانێ دوهی دوشەمبی 17/2/2025، ل گەل مەجید تەخت رەوانچی، جێگرێ وەزیرێ دەرڤەیێ كۆمارا ئیسلامییا ئیرانێ بۆ كاروبارێن سیاسی كۆمبوو و هەردو ئالییان باس ل چەند پرسان كر، پاشی كۆنگرەیەكێ رۆژنامەڤانی ئەنجامدا.
سەرۆكێ هەرێما كوردستانێ د كۆنگرەیێ رۆژنامەڤانیدا راگەهاند» دیتنا مە ل هەرێما كوردستانێ ئەوە، پەیوەندیێن ب هێز و هەڤسەنگ د ناڤبەرا ئیراقێ و ئیرانێ دا بۆ ب هێزكرنا سەقامگیرییا دەڤەرێ گەلەك د پێدڤی و گرنگن».
نێچیرڤان بارزانی دوپاتی ل سەر گرنگییا ب هێزكرنا هاریكارییا هەڤپشك یا ئیرانێ ل گەل ئیراقێ و هەرێما كوردستانێ كر، ئەوژی « ژ پێخەمەت ب دەستڤەئینانا ئاسایشێ و سەقامگیریێ و بەرفرەهكرنا هاریكارییا هەڤپشك د هەموو وارێن جودا جودا دا، د وارێ ئابووری، بازرگانی و فەرهەنگی و ئەمنیدا».
د پشكەكا دی یا ئاخڤتنێن خوە دا سەرۆكێ هەرێما كوردستانێ دوپاتكر، هەرێما كوردستانێ دێ فاكتەرێ ئارامیێ و سەقامگیریێ بیت ل دەڤەرێ و ب هیچ شێوەیەكی رێكێ نادەت ژێدەرێ گەفێ بیت بۆ سەر وەلاتێن دەوروبەر، ب تایبەتی ئیرانێ».

دوهی دوشەمبی 17/2/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل مەجید تەختڕەوانچی، جێگرێ وەزیرێ دەرڤەیێ كۆمارا ئیسلامییا ئیرانێ بۆ كاروبارێن سیاسی كر.
ب گۆڕەی بەیاننامەیەكا حوكمەتا هەرێما كوردستانێ، د دیدارەكێدا، دووماهی پێشهاتێن ئیراقێ و دەڤەرێ و پێشڤەبرنا پەیوەندیێن هەرێما كوردستانێ و كۆمارا ئیسلامییا ئیرانێ هاتنە گەنگەشەكرن.
ئاماژە ب وێ چەندێ ژی هاتە كرن، هەردو ئالییان دوپاتی ل پێشڤەبرنا پەیوەندیێن دۆ قۆلی، ب تایبەتی د وارێن ئابووری و لێكگۆهارتنا بازرگانی ل سەر بنەمایێ بەرژەوەندییا هەڤپشك كر.

بڕیارە ئەڤرۆ سێشەمبی 18/2/2025، لژنەیا داراییا جڤاتا نوونەرێن ئیراقێ و وەزارەتا داراییا ئیراقێ ل سەر مووچەیێ مەها 12 یێ فەرمانبەرێن هەرێما كوردستانێ كۆمببن.
ئیخلاس دلێمی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان و جێگرا سەرۆكێ لژنەیا دارایی ل جڤاتا ناڤبری د داخۆیانییەكا رۆژنامەڤانیدا راگەهاند» پێشتر وەزیرا داراییا ئیراقێ گۆتبوو كو 11 ترلیۆن و نیڤ بۆ مووچەیێ فەرمانبەرێن هەرێما كوردستانێ یێن هنارتین، بەلێ داتایێن بەنكا ناڤەندییا ئیراقی ئاماژێ ب هنارتنا 10 ترلیۆن و 26 ملیار دیناران دكەت، بۆ وێ چەندێ راتسییا ڤان داتایان ئاشكرا بیت، مە وەزارەتا دارایی داخوازكرییە بۆ ئەنجامدانا كۆمبوونێ كو ئەڤرۆ دێ هێتە ئەنجامدان» .
ئیخلاس دلێمی باس ل وێ چەندێ ژی كر» ئەم دزانین ل سالا بۆری تنێ 10 ترلیۆن و 26 ملیار دینار یێن هاتینە هنارتن، هەروەسا 710 ملیار دینارێن دی یێن ل دەف وەزارەتا داراییا ئیراقێ ماین و بۆ سندووقا خانەنشینیێ نەهنارتینە و بۆ گەنجینەیا دەولەتێ یێن زڤراندین».
وێ پەرلەمانتارا فراكسیۆنا پارتی دیموكراتی كوردستان رۆهنكر ژی» مافێ وەزارەتا دارایی یان حوكمەتێ یان هیچ ئالییەكی نینە كو وی پارەی ببڕیت، پێدڤییە ل سەر وان وی پارەی ب هنێرن».
هەروەسا ئاماژە ب وێ چەندێ ژی دا» حوكمەتا هەرێما كوردستانێ و حوكمەتا فیدرالی یێن رێككەفتین ل سەر مووچەیێ هەموو مەهێن ئەڤسالە، ئانكو مووچە یێ پاراستییە».
پتر گۆت» ئەم وەكو پەرلەمانتار و ئالیێ پەیوەندیدار ل سەر هێلین و دێ بەردەوام بین ل سەر هنارتنا مووچەی، هەروەسا ئەوێن خوەنیشادان ل هەرێما كوردستانێ كری، نوونەر یێن ل بەغدا هەین، دڤێت ب رێكا وان نوونەران داخوازا مووچەیێن خوە بكەن، چونكە ئەو پارەیێ هاتییە بڕین، یێ ل گەنجینەیا حوكمەتا فیدرال، نەكو حوكمەتا هەرێما كوردستانێ».
ل دووماهیێ گۆت» مەسرور بارزانی، سەرۆكێ حوكمەتا هەرێما كوردستانێ یێ رژدە ل سەر وێ چەندێ ئەو پارە بهێتە هنارتن، ب دیتنا من ژی محەمەد شیاع سۆدانی، سەرۆك وەزیرێن ئیراقێ یێ بەرهەڤە بۆ هنارتنا وی پارەی».

دیدار: دلۆڤان ئاكرەیی

سیاسەتمەدار و شیرەتكارێ مەكتەبا سیاسییا پارتی دیموكراتی كوردستان عارف روشدی ل دۆر رۆلێ سەرۆك بارزانی ل سەر ئاستێ ناڤخوەیی و دەرڤە بۆ رۆژنامەیا (ئەڤرۆ) دیاركر كو سەرۆك بارزانی رێبەرێ بزاڤا كوردایەتیێ یە ل تەڤ پارچەیێن كوردستانێ و هەموو ئالی و هەتا یێن هەڤڕك ژی دزانن كو سەرۆك بارزانی گوپیتكا دلسوزیێ یا هەی ودزانیتن ئێش و ژانێن مللەتێ وی دێ چاوا هێنە چارەسەركرن .
سەبارەت ب هاتنا شاندێ دەم پارتی بۆ دەف سەروك بارزانی، عارف روشدی گۆت» هاتنا شاندێ دەم پارتی بۆ دەف سەرۆك بارزانی پێنگاڤەكا دروست و د جهێ خوەدا بوو و ئەو یێن گەهشتینە وێ باوەریێ گوهۆڕینێن ل دەڤەرێ پەیدا بووین د نوكەدا ناراوەستن بەلكو دێ سەرانسەری رۆژهەلاتا ناڤین ڤەگرن و باكوورێ كوردستانێ و توركیا و رۆژئاڤایێ كوردستانێ و سووریێ دبن گوهۆڕینێن مەزن دانە لەوما رۆلێ سەرۆك بارزانی دێ پێدڤی بیتن و ئەو د وێ چەندێ تێگەهشتینە و دزانن هەموو رێ دچنە سەرێ بلند».
ل دور بۆچوون و نێرینا سەرۆك بارزانی بۆ چارەسەركرنا پرسا كوردان ل باكوورێ كۆردستانێ، گۆت» د راستیدا نێرینا سەرۆك بارزانی تنێ ئازادكرنا ئۆجەلانی یان چەكدانانا پارتییا كاركەرێن كوردستانێ (PKK) نینە بەلكو خەباتا وی بۆ چارەسەركرنا كێشەیا كوردانە ل باكوورێ كوردستانێ چونكە ب ئازادبوونا ئۆجەلانی و چەكدانانا (PKK) چێ كارتێكرن ل سەر چارەسەركرنا پرسا كوردان نابیتن و شاندێ دەم پارتی د پەیاما خوەدا پرسیار هەبوو و سەرۆك بارزانی ب ئاوایێ كوردایەتی بەرسڤدا».
ل دۆر رۆل و پێگەهێ سەرۆك بارزانی ل دەڤەرێ گۆت» د نوكە دا نە تنێ ل سەر دوزا كوردان بەلكو هەر شاندەكێ د هەر ئاستەكیدا بیت بهێتە دەڤەرێ ئێك ژ وێستگەهێن وی سەرەدانا سەرێ بلندە و ئەو سەرەدانا سەرۆك بارزانی دكەن كو مفای ژ نێرین و وبۆچوونێن وی وەرگرن و ئەڤ پێنگاڤێن سەروك بارزانی د هاڤێت پشتەڤانییەكا نێڤدەولەتییا بۆهەی كو ئەڤە ژی ئاماژەیە سەروكێ بارزانی ئێك ژ بریاردەرێن دەڤەرێیە».
سەبارەت پێشكێشكرنا دەستپێشخەرییێ بۆ باكوورێ كوردستانێ مینا رۆژئاڤایێ كوردستانێ ژئالیێ سەرۆك بارزانی ڤە گۆت» ب بۆچوونا من هەمان جورێ دەستپێشخەریێ بۆ باكوورێ كوردستانێ ژ ئالیێ سەرۆك بارزانی ڤە هاتیە كرن و ب چارەسەركرنا كێشەیێن هەردو پارچەیێن دی یێن كوردستانێ دێ كارتێكرن ل سەر هەرێمێ ژی هەبیتن چونكە د نوكە دا فشار ل سەر هەرێمێ یا هەی ژئالیێ ڤان ولاتێن كۆ ئەڤ پارچەیێن هەنێ دناڤدا هەنە لەوما سەرۆكێ كوردایەتییێ بۆ چارەسەركرنا ڤان پرسان رولەكێ مەركەزی دگێریت هەتا كۆ پرسا كوردان ل هەر چوار پارچەیان ل دووڤ ماف و حەزا كوردان چارەسەر ببیت و هەكە چارەسەریێ ب خوەڤە نەبینیت دەڤەر ژی ئارامییێ ب خوەڤە نابینیت».
ل دۆر رۆل و هەلوەستێ پارتێن سیاسی یێن كوردی دیاركر» گرنگە تەڤ ئالیێن سیاسی هزر دڤێ قوناغێدا بكەن و پشتەڤانییا سەرۆك بارزانی بكەن چونكە كار و بۆچوونێن بارزانی د دوورن ژ حزبایەتیێ و گرێدای ب مان و نەمانا گەلێ كورد ڤە یا هەی و هەكە ئەو ئالی گرێدای توندرەوێیا سیاسی و خوەپەرەستییا سیاسی نەبن دێ هێنە د مەیدانێدا و دێ پشتەڤانییا سەرۆك بارزانی كەن و هەتا نوكە ژی گەلەك ژ وان داخویانی داینە بەلێ گرنگە ب هێزتر بهێنە پێش دا زێدەتر كاریگەرییا ئەرێنی بۆ چارەسەركرنا دوزا كوردی پەیدا ببیت».

ئەندامەکێ بەرێ یێ پەرلەمانێ تورکیا راگەهاند، دڤێت پەکەکە دەست ژ چەکی بەردەت، ئەڤرۆکە هێزا کوردان ب رێیا دەنگدانێ و سیاسەتێ گەلەک ژ چەکی بهێزترە و هەلوەستێ سەرۆک بارزانی ل دۆر ئاشتیێ ل تورکیا گەلەک گرنگە و سوپاسیا سەرۆک بارزانی دکەین.

عەبدولرەحمان کوڕت ئەندامێ بەرێ یێ پەرلەمانێ تورکیا سەر ب ئاکپارتیێ د داخۆیانیەکێ دا دیار کر، ل تورکیا نها قۆناغەکا نوو دەستپێکریە و سەرەدانا شاندێ دەم پارتی بۆ هەرێما کوردستانێ ژی گەلەک گرنگە، چونکی رۆلێ هەرێما کوردستانێ ب تایبەتی ژی سەرۆک بارزانی بۆ ئاشتیێ ل تورکیا گەلەک گرنگە و گۆت: (سەرۆک بارزانی هەردەم کەسەک ئاشتیخوازە و هەلوەستێ وی بەری نها ژی گەلەک گرنگ و دیرۆکی بووینە و ئەم ژ بەر هەلوەستێ دیرۆکی یێ سەرۆک بارزانی سوپاسیا جەنابێ وی دکەین و هیڤیدارین هەموو هێز و ئالیێن سیاسی ل تورکیا و هەرێما کوردستانێ پشتەڤانیێ ل ئاشتیێ و چارەسەرکرنا پرسا کوردی بکەن).
ناڤهاتی ئەو یەک ژی دیار کر، ئەڤرۆکە کورد ل تورکیا بووینە هێزەکا گەلەک مەزن، ب ملیۆنان دەنگدەرێن کورد هەنە، ب سەدان سیاسەتمەدارێن کاریگەر یێن کورد هەنە، ژ بەر ڤێ یەکێ ژی ئێدی پێدڤیا کوردان ب چەکی نینە، هێزا دەنگدانێ و سیاسەتێ یا کوردان گەلەک ژ یا چەکی مەزنترە و دڤێت ئێدی چەک بهێنە بێدەنگ کرن، دەم یێ هاتی پەکەکە ژی دەست ژ چەکی بەردەت و گرنگیێ بدەتە کار و خەباتا سیاسی، ئێدی ب چەکی و توندوتیژیێ چو پرسەک ناهێتە چارەسەرکرن و گۆت: (ئەڤرۆکە کورد و تورک ل دژی شەڕی نە، پێدڤیا تورکیا ب ئاشتیێ و قۆناغەکا نوو هەیە، هەموو سیاسەتمەدارێن کورد و تورک ژی ڤێ راستیێ باش دزانن، گرنگە پەکەکە ژی ڤێ راستیێ باش بزانیت و دەست ژ چەکی بەردەت، هەکە پەکەکە دەست ژ چەکی بەردەت دێ دەولەتا تورکیا ژی دەست ب گوهۆڕینان کەت، وی دەمی دێ دەلیڤەکا دیرۆکی بۆ کوردان هێتە پێش و کورد دشێن ب رێیا سیاسەتێ بگەهنە گەلەک مافێن خوە).
هەمان پەرلەمانتاری کو ب ئەسلێ خوە کوردە د پشکەکا دی یا ئاخڤتنا خوە دا ئەو یەک ژی دیار کر، چەک بووینە ئاستەنگ، ژ بەر چەکان و توندوتیژیێ کورد نەشێن ب رێیا خەباتا سیاسی بگەهنە مافێن خوە، ژ بەر ڤێ یەکێ ژی دەم یێ هاتی ئێدی چەک نەمینن، کورد دشێن ب هەلبژارتنان و خەباتا سیاسی ل تورکیا بگەهنە هەموو مافێن خوە، پێدڤیا کوردان ب چەکی نینە، دڤێت بەرپرسێن پەکەکێ ژی ڤێ راستیێ ببینن و گۆت: (ئەم هیڤیدارین کو پشتی پەیاما ئۆجەلانی پەکەکە ژی بریارەکا دلخوەشکەر بدەت، چونکی دەمێ توندوتیژی نەمینیت وی دەمی زەمینە بۆ سیاسەتێ، بۆ خەباتا مەدەنی دێ خوەش بیت و ئەو یەک د بەرژەوەندیا گەلێ کورد دایە).

دوهی ئێكشەمبی 16/2/2025، شاندێ دەم پارتی بۆ ئیمرالی ب سەرۆكایەتییا پەروین بولدان و سری سورەییا، گەهشتە بارەگەهێ بارزانی و ل دۆر پڕۆسەیا نوو یا ئاشتیێ ل توركیا و باكوورێ كوردستانێ، ل گەل سەرۆك بارزانی كۆمبوو.
ب گۆڕەی بەیاننامەیەكا بارەگەهێ بارزانی» د دیدارەكێدا، شاندێ ئیمرالی بیر و بۆچوونێن خوە ل دۆر رەوشا سیاسی و پڕۆسەیا ئاشتیێ ل توركیا و ئەنجامێن دیدارێن خوە ل گەل عەبدوللا ئۆجەلانی بۆ سەرۆك بارزانی بەرچاڤكر».
د بەیاننامەیا بارەگەهێ بارزانی دا ئاماژە ب وێ چەندێ ژی هاتیە كرن» شاندێ ئیمرالی د وێ دیدارێدا ناڤەرۆكا پەیاما عەبدوللا ئۆجەلانی ژی گەهاندە سەرۆك بارزانی».
بارەگەهێ بارزانی ئەوژی بەرچاڤكر» هەر د وێ دیدارێدا، سەرۆك بارزانی سەرەرای ب خێرهاتنا شاندێ مێهڤان، دوپاتی ل گرنگییا پڕۆسەیا ئاشتیێ وەكو تاكە رێكا دروست بۆ گەهشتنێ ب چارەسەریێ كر و ب پێدڤی ژی زانی كو هەموو ئالی بزاڤێن خوە زێدەتر بكەن تاكو پڕۆسەیا ئاشتیێ بگەهیتە ئەنجام».
د بەیاننامەیا بارەگەهێ بارزانی هاتیە ژی» سەرۆك بارزانی بەرهەڤییا خوە یا تمام بۆ هاریكاری و پشتەڤانییا پڕۆسەیا ئاشتیێ ل توركیا راگەهاند».
ژ ئالییەكێ دیڤە دەم پارتی ل دۆر كۆمبوونا شاندێ خوە ل گەل سەرۆك بارزانی، د بەیاننامەیەكێدا بەلاڤكر» كۆمبوونا پیرمام، د چارچۆڤەیێ دیدارێن شاندێ دەم پارتی دا بوو ل گەل عەبدوللا ئۆجەلانێ، رێبەرێ زیندانكریێ پارتییا كاركەرێن كوردستانێ (PKK)».
دەم پارتی ئەوژی بەرچاڤكر» شاندێ دەم پارتی، سەرۆك مەسعود بارزانی ل دۆر پڕۆسەیا نوو یا ئاشتیێ ل توركیا و باكوورێ كوردستانێ ئاگەهداركر و مە بۆچوون و پێشنیازێن سەرۆك بارزانی ل دۆر پڕۆسەیێ ب گرنگ وەرگرتن» .
چاڤەڕێ دهێتە كرن پشتی زڤرینا وی بۆ باكوورێ كوردستانێ، شاندێ دەم پارتی كو دو جاران ل گەل عەبدوللا ئۆجەلان، رێبەرێ زێندانكریێ پارتییا كاركەرێن كوردستانێ (PKK) كۆمبوویە، بۆ جارا سیێ ژی ل دۆر پڕۆسەیا نوو یا ئاشتیێ ل توركیا و باكوورێ كوردستانێ، ل گەل ئۆجەلانی كۆمببیت.