ئەندامەكێ دەستەیا كارگێڕیا مەكتەبا سیاسیا پارتی دیموكراتی كوردستان، دووپات دكەت كو هەرێما كوردستانێ دێ هەر وەك پەناگەهەكا ئارام بۆ ئازادیخواز و ستەملێكریان مینیت، بەلێ رێكێ نادەن چ گەندەلكار و تاوانبارەك كوردستانێ وەك ڤەشارتگەهەكێ بكاربینیت.
هشیار زێباری، ئەندامێ دەستەیا كارگێڕیا مەكتەبا سیاسیا پارتی دیموكراتی كوردستان، د پەیامەكێ دا ل سەر هەژمارا خۆ یا فەرمی د تورا جڤاكیا (ئێكس) دا بەلاڤكریە و نڤیسیە: هەرێما كوردستانێ «كەلها ئازادی و دیموكراسیێ یە ل ئیراقێ».
هشیار زێباری ئاماژە ب وێ چەندێ ژی كر كو كوردستان هەردەم پەناگەهـ بوویە و دێ یا بەردەوام ژی بیت بۆ هەموو ئازادیخوازێن ئیراقێ، ستەملێكریان و ئەو كەسێن رووبڕوویێ بنپێكرنێن مافێن مرۆڤی و ئەشكەنجەدانێ بووین؛ هەمان دەم هۆشداری ژی دا و گۆت: «كوردستان چو جاران نابیتە پەناگەهەك بۆ تاوانباران، دزێن سامانی گشتی و گەندەلكاران».

هەولێر، قائید میرۆ

ئەندامەكێ بەرێ یێ پەرلەمانێ كوردستانێ راگەهاند، مەرەما بەیاننامەیا مەكتەبا سیاسی یا پارتی دیموكراتی كوردستان بۆ كاراكرنا پەرلەمانی یە و دبێژیت: «ئێكەتیێ پەرلەمانێ كوردستانێ وەك بارمتە ب كار ئینایە بۆ سەپاندنا مەرجێن خۆ. دەڤەر د چەندین كاودانێن مەزن دا دەرباز دبیت و پارتی دڤێت پەرلەمان رۆلێ خوە بگێڕیت».
د. رێبوار بابكەیی، ئەندامێ بەرێ یێ پەرلەمانێ كوردستانێ بۆ رۆژنامەیا «ئەڤرۆ» دیار كر «بەیاننامەیا مەكتەبا سیاسی یا پارتی ل دۆر كاراكرنا پەرلەمانێ كوردستانێ و پێكئینانا كابینەیا نوو یا حوكمەتێ، ژ پێخەمەت بەرپرسیارەتییا پارتی یە هەنبەری ڤێ رەوشا نوكە پرۆسەیا سیاسی ڤەگرتی. ژبەركو قەیرانا سیاسی گەهشتییە ئاستەكێ چو رێك نەماینە ژبلی رێكەفتن و كاراكرنا پەرلەمانی. پارتی دیموكراتی كوردستان بەردەوام هەست ب ڤێ بەرپرسیارییا نیشتیمانی یا مەزن و وان مەترسییان كریە كو نوكە هەنە، ژبەركو رەوش هاتیە گۆهۆڕین و دەڤەر د چەندین كاودانان دا دەرباز دبیت، لەورا پارتی د چارچۆڤەیا ڤێ بەرپرسیارەتییا پێكئینانا حوكمەتا نوو یا هەرێما كوردستانێ و كاراكرنا دەزگەهێن شەرعی دا دخوازیت رۆلێ خۆ بگێڕن».
د. رێبوار گۆت ژی: «بتایبەتی د قۆناغەكا وەك نوكە دا، پارتی ب فەر دزانیت پەرلەمان بهێتە كاراكرن. ب دیتنا من، كاراكرنا پەرلەمانی پێنگاڤا ئێكێ و دەستپێكێ یە و د دووڤدا پێنگاڤێن دی ژی هەنە. ل دەف پارتی، پەرلەمان دەزگەهەكێ مۆلكێ گشتی و خەلكێ كوردستانێ یە. خەلكی دەنگ دایە بۆ هەلبژارتنا پەرلەمانی و ئەو نوونەراتییا خەلكی دكەت. پێدڤی یە ئەڤ دەزگەهێ گرنگ و شەرعی بهێتە چالاككرن و دەستەیا سەرۆكایەتییا پەرلەمانی بهێتە هەلبژارتن، هەتا پەرلەمان بشێت رۆلێ خوە یێ قانوونی و چاڤدێریێ بگێڕیت، نەكو پەرلەمان ببیتە بارمتە د دەستێ هندەك هێزێن سیاسی دا كو بۆ مەرەمێن خۆ یێن حزبی ب كار بینن هەتا مەرجێن خوە بسەپینن».
ڤی پەرلەمانتارێ بەرێ یێ پارتی زێدەكر: «بەیاننامەیا مەكتەبا سیاسی یا پارتی خەمخۆری یە هەنبەری دیرۆكێ و كارەكێ ئەخلاقی یە ل سەر ملێن پارتی بۆ وێ چەندێ ئیدی پەرلەمان نەمینیت بێ چالاكی. پارتی یا كار دكەت دەزگەهێن هەرێما كوردستانێ ببنە دەزگەهێن نیشتیمانی، هەروەسا پارتی كار بۆ سەروەرییا قانوونێ دكەت. نوكە پارتی هەست ب وێ چەندێ كریە كو گۆهۆڕین و رەوشا نوكە دەڤەر تێدا یە ل سەر ئاستێ ئیراقێ و دەڤەرێ گەلەك یا مەزنە. بەریا بەیاننامەیا مەكتەبا سیاسی یا پارتی، پێشنیازا سەرۆك بارزانی ژی هەبوو ل دۆر كۆمبوونا ئالیێن سیاسی. هەموو ئەو بزاڤێن پارتی، هەر ژ پێشنیازا سەرۆك بارزانی و بەیاننامەیا مەكتەبا سیاسی، خۆشكرنا دەلیڤێ یە بۆ گەهشتن ب رێكەفتنێ و دوماهی ئینان ب ڤێ قەیرانا پرۆسەیا سیاسی یا هەرێما كوردستانێ ڤەگرتی.»
د. رێبوار بابكەیی ئاماژە كر: «زێدەتر ژ سالەكێ یە ئێكەتییا نیشتیمانی كوردستان، كاراكرنا پەرلەمانی وەك كارتەكا گڤاشتنێ ب كار ئینایە بۆ سەپاندنا مەرجێن خۆ. بەلێ هەكە ئێكەتی و ئەو ئالیێن پشتەڤانییا ئێكەتیێ دكەن باوەری ب پرەنسیپێن بنەڕەتی یێن دیموكراتیێ هەبیت، پێدڤی بوو د قۆناغا ئێكێ دا پەرلەمان بهێتە كاراكرن و دەست ب كارێن خۆ یێن قانوونی بكەت. پشتی كارابوونا پەرلەمانی، دەست ب دانوستاندنێن پێكئینانا كابینەیا حوكمەتێ بهێتە كرن. هەكە ئالیێن سەركەفتی د هەلبژارتنان دا نەگەهشتن ب رێكەفتنێ، ئەڤە ل هۆلا پەرلەمانی ئەو پرسە هاتبا ئێكلاكرن و پەرلەمانی بڕیار ل دۆر چارەنڤیسێ پێكئینانا حوكمەتێ دابا».

د پێنگاڤەكا وێرەك دا و وەك زەنگەكا ئاگەهداركرنێ بۆ پاراستنا مالێ گشتی، مەسعود حەیدەر، بریكارێ بەرێ یێ وەزارەتا دارایی یا ئیراقێ، پەردە ل سەر ئێك ژ مەزنترین گومانێن بەرزەبوونا سامانی نیشتمانی د دیرۆكا ئیراقێ دا لادا.
ئاشكراكرنێن مەسعود حەیدەری دەربارەی دیارنەمانا 140 ملیار دۆلاران، بوویە ئەگەرێ هەژاندنا ناڤەندێن چاڤدێری و یاسایی و لڤینا كەیسێ ژ جڤاتا نوونەران ڤە.
ب گورەی وان داخۆیانیێن كو نوكە بووینە بەلگەیێن سەرەكی د دەستێ پەرلەمانتاران دا، مەسعود حەیدەر ب راشكاوی راگەهاندیە كو كوژمێ زەبەلاح یێ 140 ملیار دۆلاران ژ داهاتێ سێ سالێن بۆرین یێن ئیراقێ بەرزە بوویە، بێی كو ررۆهن بیت ئەو پارە د چ دەرگەهـ دا و چاوان هاتیە مەزاختن.
ئەڤ هەلوەست و ئاشكراكرنا مەسعود حەیدری، وەكر كو پرسا ژ ناڤبرنا مالێ گشتی راستەوخۆ بچیتە قۆناغەكا توند یا ڤەكۆلینێ.
ل سەر بنەمایێ پێزانینێن مەسعود حەیدەری، د. محەمەد جاسم خەفاجی، ئەندامێ لیژنەیا یاسایی ل جڤاتا نوونەرێن، ل رێكەفتی 27/6/2026، ب فەرمی دۆسیە بریە پێشبەری سەرۆكێ دەستەیا داواكارێ گشتی.
د نڤیسارەكا فەرمی دا، داخۆیانیێن ڤیدیۆیی یێن مەسعود حەیدەری وەك بەلگەیەكا حاشاهەلنەگر و ل سەر سیدیەكێ (CD) پێشكێشی دەستەیا داواكارێ گشتی كرینە. پەرلەمانتاری ب پشتبەستن ب ئاخڤتنێن مەسعود حەیدەری، داخوازا دەستپێكرنا ڤەكۆلینەكا بلەز كریە دەربارەی وان گومانێن مەزن یێن هاتینە زمان.

ل باژێرێ وانێ یێ باکورێ کوردستانێ ب پشکداریا گەلەک پارتێن سیاسی کۆنفرانسێ نەتەوەیی هاتە ساز کرن و پارتێن سیاسی داخواز دکەن هەموو هێزێن سیاسی پێکڤە کار بۆ بدەستڤەئینانامافێن نەتەوەیی یێن گەلێ کورد ل تورکیا بکەن.

ل باژێرێ وانێ یێ باکورێ کوردستانێ ب پشکداریا گەلەک پارتێن سیاسی یێن کوردستانی کۆنفرانسێ نەتەوەیی هاتە ساز کرن، د کۆنفرانسێ دا گەلەک پارتێن سیاسی، کەسایەتیێن ناڤدار یێن کورد پشکدار بوون و داخواز ژ هەموو هێزێن سیاسی یێن کوردستانی ل باکورێ کوردستانێ هاتە کرن کو پێکڤە کار بکەن، چونکی هەکە هەموو هێزێن کوردستانی پێکڤە کار بکەن دێ کورد گەهنە مافێن خوە.
د کۆنفرانسێ دا مستەفا ئۆزچەلیک سەرۆکێ گشتی یێ پارتا وەلاتپارێزێن کوردستانێ ئاخڤی و دیار کر، نها باشترین دەمە هەموو هێز و ئالیێن سیاسی یێن کوردستانی ل باکورێ کوردستانێ و تورکیا پێکڤە کار بکەن، ژ بۆ بهێزبوونا پێگەهێ کوردان گرنگە ئێکەتیا نەتەوەیی بهێتە ساز کرن، راستە ناکۆکی د ناڤبەرا هێزێن سیاسی دا هەنە، لێ هەموو هێزێن سیاسی دشێن ژ بۆ بەرژەوەندیێن نەتەوەیی پێکڤە کار بکەن.
سەرۆکێ گشتی یێ پارتا وەلاتپارێزێن کوردستانێ ئەو یەک ژی دیار کر، سیاسەتا نها یا تورکیا ل هەمبەر کوردان ب چو رەنگەکێ ناهێتە قەبوول کرن، بەحسێ قووناغا ئاشتیێ دهێتە کرن، لێ بەحسێ مافێن کوردان ناهێتە کرن، ئەو یەک ژی بوویە جهێ دلگرانیا کوردان و گۆت: (سیاسەتا دەم پارتیێ ژی ناهێتە قەبوول کرن، چونکی پرسا کوردی ب رێیا ئینتیگراسیۆنێ و کۆمارا دیموکراتیک ناهێتە چارەسەرکرن، دڤێت ب رێیا دستوورەکێ نوو و دیموکراتی هەموو مافێن نەتەوەیی یێن گەلێ کوردستانێ بهێنە گەرەنتیکرن، مخابن د سیاسەتا ئۆجەلانی و دەم پارتیێ دا تشتەک وەسا نینە و ژ بەر ڤێ یەکێ ژی کورد قەبوول ناکەن تنێ بەحسێ هندەک تشتان بهێتە کرن و بەحسێ مافێن کوردان نەهێتە کرن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، مە دڤێت هەموو پارتێن سیاسی یێن کوردستانی ل تورکیا و باکورێ کوردستانێ پێکڤە کار بکەن دا ئەم بشێین پێکڤە دووماهیا ئەڤسالە کۆنفرانسەکا نەتەوەیی یا بەرفرەه ساز بکەین کو تێدا هەموو هێزێن سیاسی ژی پشکدار بن، رەوشا نها یا کوردستانێ و دەڤەرێ وەسا دڤێت کو ئەم وەکو هێزێن سیاسی دەست ب کارەکێ وەسا دیرۆکی بۆ بەرژەوەندیا گەلێ خوە بکەین.
د کۆنفرانسێ دا گەلەک سیاسەتمەدار، کەسایەتێن سیاسی، ئەکادیمی و نڤیسەر ژی پشکدار بوون و داخواز ژ هەموو هێز و ئالیێن سیاسی یێن کوردستانی کرن کو پێکڤە کار بکەن و ژ بۆ بەرژەوەندیێن نەتەوەیی ناکۆکیێن خوە بدەنە رەخەکێ، چونکی نها رۆژهەلاتا ناڤین بەر ب گوهۆڕینێن گەلەک مەزن ڤە دچیت و گرنگە هەموو هێزێن سیاسی ژی هەست ب بەرپرسیاریا خوە یا دیرۆکی ل هەمبەر گەلێ کوردستانێ بکەن.
سیاسەتمەدار و کەسایەتیێن پشکدار د کۆنفرانسێ دا داخواز ژ هەموو هێزێن سیاسی یێن نەتەوەیی ل باکورێ کوردستانێ ژی کرن کو، د زووترین دەم دا کۆنفرانسەکێ مەزن یێ نەتەوەیی دروست بکەن دا هندەک هێلێن گشتی یێن کارکرنا هەڤپشک بهێنە دیار کرن و هەکە ئەو یەک بهێتە کرن دێ کورد شێن د سیاسەتا تورکیا دا بنە خوەدان رۆل، چونکی نها تشتەک وەسا نینە و مخابن د ئاستێ دەستهەلاتێ و پارتێن دی یێن سیاسی دا کەس بەحسێ مافێن نەتەوەیی یێن گەلێ کورد ل تورکیا ناکەت و دڤێت پارتێن کوردستانی ئێکەتیا خوە ئاڤا بکەن و دەست ب قووناغەکا نوو یا کار و خەباتا نەتەوەیی بکەن.

سەرۆكێ هەرێما كوردستانێ پێشوازی ل شاندەكێ گرۆپێ دۆستایەتییا كەنەدی – كوردی ل پەرلەمانێ كەنەدا كر. شاندێ مێهڤان پشتەڤانییا كەنەدا بۆ گەلێ كوردستانێ دوپات كر.
نێچیرڤان بارزانی، سەرۆكێ هەرێما كوردستانێ پێشوازی ل شاندەكێ گرۆپێ دۆستایەتییا كەنەدی – كوردی ل پەرلەمانێ كەنەدا كر، كو ژ ئەحمەد حسێن، سەرۆكێ لژنەیا كاروبارێن دەرڤە یا پەرلەمانێ كەنەدا و زیاد ئەبولتەیف، ئەندامێ پەرلەمانی پێكدهات.
سەرۆكایەتییا هەرێما كوردستانێ دبێژیت، د دیدارەكێ دا كو هەژمارەكا ژ ئەندامێن كۆنفیدراسیۆنا رەڤەندا كوردستانی ل كەنەدا تێدا ئامادە بوون، پێشئێخستنا پەیوەندیێن هەرێما كوردستانێ و ئیراقێ ل گەل كەنەدا هاتنە گەنگەشەكرن و دوپاتی ل سەر رۆلێ گرنگێ رەڤەندا كوردستانی هاتە كرن بۆ بهێزكرنا پەیوەندیێن هەرێما كوردستانێ ل گەل كەنەدا.
ل گورەی بەیاننامەیا سەرۆكایەتییا هەرێمێ، شاندێ مێهڤان دەستخۆشی ل رەوشا پێكڤەژیانا ئاشتییانەیا پێكهاتەیان و گرنگییا پاراستنا ئارامییا وان ل هەرێما كوردستانێ كر، هەروەسا پشتەڤانییا كەنەدا بۆ گەلێ كوردستانێ دوپات كر.
دووماهی پێشهاتێن رەوشا سیاسی و ئەمنی یێن دەڤەرێ، تەوەرەكێ دی یێ وێ دیدارێ بوو.

ژێدەرەكێ بلند د حوكمەتا ئیراقێ دا راگەهاند، ژبەر تێكهەلییا وان د دۆسیێن گەندەلیێ دا، هەژمارەكا پەرلەمانتار و بەرپرسێن بلند ل بەغدایێ هاتینە دەستەسەركرن. دەستەسەركرنا وان كەسان ژی پشتی دانپێدانێن بریكارێ وەزارەتا پەترۆلێ دهێت. ژئالیێ خۆڤە ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت: چو پەرلەمانتار و بەرپرسێن كورد ل بەغدایێ د وێ هەوێ دا نەهاتینە دەستەسەركرن.
ژێدەرەكێ بلند بۆ ئاژانسا نووچەیێن ئیراقی (INA) راگەهاندیە، ل سەر بنگەهێ وان دانپێدانێن كو عەدنان جومەیلی، بریكارێ وەزارەتا پەترۆلا ئیراقێ د دەمێ ڤەكۆلینان دا دیاركرین پشتی دەستەسەركرنا وی، هێزێن ئەمنی دەست ب دەستەسەركرنا چەند تۆهمەتبارێن دی یێن دناڤ دۆسیێن گەندەلیێ دا كریە.
ب گۆتنا وی ژێدەری، پرۆسەیا دەستەسەركرنێ بتنێ بەرپرسێن حكومی نەگرتینە، بەلكو هەژمارەكا ئەندامێن جڤاتا نوونەرێن ئیراقێ ژی دناڤ دا نە، یێن كو بەری نوكە ژبەر هەبوونا گۆمان و تۆهمەتان ل سەر وان، پارێزبەندییا پەرلەمانی ژێ هاتیە وەرگرتن.
دەربارەی هەلوەستێ حوكمەتێ ل سەر ڤان دۆسێیان، ژێدەرێ بلند ئاماژە ب وێ چەندێ كر كو عەلی فالح ئەلزەیدی، سەرۆك وەزیرێن ئیراقێ، یێ رژدە ل سەر لێپرسینێ و راگەهاندیە: «سەرۆك وەزیران ژ دووڤچوونا گەندەكاران و وان كەسێن دەست بۆ سامانێ گشتی و پارێ دەولەتێ دبەن، خەمساریێ ناكەت و دێ یێ بەردەوام بیت.»
سپێدەهیا دوهی ئێكشەمبی، هێزەكا هەڤپشكا دژەتیرۆرێ، لەشكەرێ ئیراقێ و دەستەیا دەستپاكیێ و هێزێن دی یێن ئەمنی، ئۆپەراسیۆنەكا بەرفرەه دناڤ دەڤەرا كەسك، چەند دەڤەرێن بەغدا و پارێزگەهێن دی دا ئەنجام دا. ئۆپەراسیۆنێ پەیوەندی ب دۆسێیا «عەدنان جومەیلی» بریكارێ بەری نوكە یێ وەزارەتا پەترۆلا ئیراقێ هەبوو.
میدیایێن ئیراقێ ئاماژە ب وێ چەندێ كریە كو هەتا نوكە نێزیكی 20 بەرپرس هاتینە دەستەسەركرن، كو دناڤ وان دا پەرلەمانتار، وەزیرێن بەرێ، بەرپرسێن حكومی، شیرەتكار، بەرپرسێن ئەمنی و بازرگان هەنە.
ل دووڤ هندەك ژێدەرێن میدیایی ل بەغدایێ د وێ ئۆپەراسیۆنێ دا هەژمارەكا كەسایەتییان هاتینە دەستەسەركرن كو ب كێمێ حەفت پەرلەمانتار دناڤ دا نە.
ژ ئالییەكێ دی ڤە، د. زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، چو پەرلەمانتار و بەرپرسێن كورد ل بەغدایێ د ناڤ وێ لیستێ دا نینن یا ب تۆمەتا گەندەلیێ ژ ئالیێ هێزێن ئەمنی یێن ئیراقێ ڤە هاتیە دەستەسەركرن.
ب گۆتنا وی پەرلەمانتاری، هەموو ئەو بەرپرسێن هاتینە دەستەسەركرن، ل سەر بنەمایێ دانپێدانێن عەدنان جومەیلی، بریكارێ بەرێ یێ وەزارەتا پەترۆلا ئیراقێ بوون. هەروەسا فەرمانێن دەستەسەركرنێ بۆ دەهان كەسێن دی ژی دەركەفتینە و گەشتكرنا وان ژی هاتییە قەدەغەكرن.
وی پەرلەمانتاری باسێ وێ چەندێ ژی كر، ل گۆرەی پەیڕەوێ ناڤخۆ، سەرۆكێ جڤاتا نوونەران دەستهەلات هەیە د دەمێ بێهنڤەدانا یاسادانانێ دا پارێزبەندیێ ل سەر هەر پەرلەمانتارەكی لادەتا یێ تۆمەتا گەندەلیێ ل سەر هەبیت، لەورا ئەو پەرلەمانتارێن هاتینە دەستەسەركرن، بەری نوكە ب هەماهەنگی ل گەل جڤاتا بلند یا دادوەریێ، پارێزبەندییا وان هاتبوو هەلگرتن.
عەدنان جومەیلی، بریكارێ بەرێ یێ وەزارەتا پەترۆلا ئیراقێ بۆ كاروبارێن یێ ب «حیتێ پەترۆلێ» دهێتە نیاسین، ل دووماهییا مەها گولانا 2022ێ ب تۆمەتا گەندەلییەكا مەزن ژ ئالیێ هێزەكا تایبەت ڤە هاتبوو دەستەسەركرن. د ناڤا ڤەكۆلینان دا، هێزێن ئەمنی دەست ب سەر گۆژمەیەكێ مەزن یێ پارەی دا گرتبوو كو سەدان ملیار دینار و دەهان ملیۆن دۆلارێن نەختینە بوون و پشكەكا وان د بن ئەردی و د ناڤ باخچەیان دا هاتبوونە ڤەشارتن. ژ بلی وێ چەندێ، دەست ب سەر دەهان ڤێلا، ترۆمبێلێن گرانبها و رێژەیەكا مەزن یا زێری ژی دا هاتبوو داگرتن.
دەستەیا دەستپاكییا ئیراقێ د بەیاننامەیەكێ دا ل دۆر وێ ئۆپەراسیۆنێ راگەهاند، دەست ب رێكارێن توند كریە ل دۆر وان تۆمەتبارێن فەرمانا دەستەسەركرنێ بۆ دەركەفتی ب تۆمەتا تالانكرنا سامانێ گشتی.
دەستەیا ناڤبری دبێژیت: «رێكارێن مە ل گۆر یاسایێ نە و رایا گشتی دێ ل هەمی هووركارییان هێتە ئاگەهداركرن، ب رێكا هەماهەنگی و بزاڤێن هەڤپشك د ناڤبەرا هەرسێ دەستهەلاتێن دادوەری، بجهئینانێ و یاسادانانێ و بزاڤێن دەستەیا دەستپاكیێ، فەرمانێن دەستەسەركرنێ هاتینە بجهئینان».
ناڤێن دەستەسەركرییان:
موسەنا سامەرایی، سەرۆكێ هەڤپەیمانییا عەزم، پەرلەمانتار زیاد جەنابی ژ فراكسیۆنا هەڤپەیمانییا سەروەری ب سەرۆكاتییا سەرمەد خەمیس خەنجەر، پەرلەمانتار بەها نووری ژ فراكسیۆنا ئاڤەدانكرن و گەشەپێدانێ ب سەرۆكاتییا محەمەد شیاع سوودانی، پەرلەمانتار محەمەد كەربولی ژ فراكسیۆنا هەڤپەیمانییا عەزم یا سوننەیان ب سەرۆكاتییا موسەنا سامەرایی، پەرلەمانتار عالیە نوسەیف ژ فراكسیۆنا ئاڤەدانكرن و گەشەپێدانێ ب سەرۆكاتییا محەمەد شیاع سوودانی، پەرلەمانتار محەمەد جەمیل مەیاحی، سەرۆكێ فراكسیۆنا (واسیت) یا جڤاتا شیعەیان، پەرلەمانتار حەسەن خەفاجی ژ فراكسیۆنا ئاڤەدانكرن و گەشەپێدانێ ب سەرۆكاتییا محەمەد شیاع سوودانی، پەرلەمانتار عەبدولڕەحمان لوێزی ژ فراكسیۆنا ئاڤەدانكرن و گەشەپێدانێ ب سەرۆكاتییا محەمەد شیاع سوودانی، ئیبراهیم سومەیدەعی، شیرەتكارێ بەرێ یێ محەمەد شیاع سوودانی، عەلی مەعارج بەهادلی، بریكارێ وەزارەتا پەترۆلێ، پەرلەمانتار بوشرا قەیسی ژ فراكسیۆنا ئاڤەدانكرن و گەشەپێدانێ ب سەرۆكاتییا محەمەد شیاع سوودانی، محەمەد سەیهود، ئەندامێ بەری یێ جڤاتا نوونەران، پەرلەمانتار مزیەر كورەوی ژ فراكسیۆنا هەڤپەیمانییا سەروەری ب سەرۆكاتییا سەرمەد خەمیس خەنجەر، پەرلەمانتار هند عەباسی ژ فراكسیۆنا هەڤپەیمانییا عەزم یا سوننەیان ب سەرۆكاتییا موسەنا سامەرایی، پەرلەمانتار محەمەد فەرمان جبووری ژ فراكسیۆنا تەقەدوما سوننەیان ب سەرۆكاتییا محەمەد حەلبووسی.

بەرپرسێ لقێ نەهـ یێ پارتی دیموكراتی كوردستان دیاركر، قەوارەیێ هەرێما كوردستانێ یێ دەستووری یە و چارەنڤیسێ وی ب تنێ د دەستێ خەلك و دەنگدەرێن كوردستانێ دایە و ل دووف مادەیێن دەستوورێ ئیراقێ (126 و 142) چو راستڤەكرن و گوهۆڕین بێی رازیبوونا گەلێ كوردستانێ ناهێنە كرن و د هەلبژارتنان دا پارتی دیموكراتی كوردستان هێزا ئێكێ بوو و ب تنێ ل دەڤەرا بەهدینان هندی هێزا دووێ یا هەرێمێ دەنگ ب دەست ڤە ئیناینە، لەوما رێككەفتن و هەڤپەیمانیێن نە سروشتی یێن ل بن گڤاشتنا زیندانێ نەشێن هەڤسەنگییا هێزێ بگوهۆڕن.
مەردان خدر، بەرپرسێ لقێ نەهـ یێ پارتی دیموكراتی كوردستان بۆ رۆژنامەیا (ئەڤرۆ) گۆت: خەلكێ كوردستانێ بڕیاردایە د هەلبژارتنەكا پاقژ دا، و ل دۆڕیانەكا هەلبژارتنان دا كو ژ ئالیێ كۆمسیۆنا ئیراقێ سەرپەرشتی لێ هاتییە كرن، پارتی هێزا ئێكێ بوو و ژبەر وێ چەندێ ، ئەز دووپات دكەم كو گوهۆڕینا هێزێ و دەسهەلاتێ ب تنێ ب دەستێ خەلك و دەنگدەرێن هەرێما كوردستانێ دهێتە كرن و ئەو هەڤپەیمانییا هاتییە كرن ژی، هەڤپەیمانییەكا سروشتی نینە و ئەو پرۆپاگندێن بۆ دهێنە كرن كو ئەو خودانێن 39 كورسیێن پەرلەمانی نە، چو راستی بۆ نینن.
زێدەتر گۆت: ئەو ئاخفتنێن د كۆنگرەیێ رۆژنامەڤانی دا هاتینە كرن، دێ بۆ هەموویان هێنە هەلگرتن، هەر وەك چەوا گەلەك داخویانی و گۆتار ل دەمێ بانگەشەیا هەلبژارتنان مە بۆ هەلگرتن و ئەڤڕۆ راستییا وان بۆ خەلكێ كوردستانێ دیار بوو و دووپات دكەمە ڤە كو هەموو ئەو ئاخڤتن دێ د دەمەكێ نێزیك دا راستییا وان دیار بیت و ب مخابنی ڤە كو ب هندەك مروڤان دهێتە گوتن سەركردە، چونكو بازرگانەكێ فێلباز و سەختەچی چو جاران نابیتە سەركردەیێ مللەتەكی و ئەو ئاخڤتنێن ئەڤ جۆرە كەسە دكەن بۆ من تشتەكێ سەیر نینن، چونكو كەسەكێ چو كەد و وەستیان د رێكا مافێن ڤی مللەتی و دروستبوونا قەوارەیێ هەرێما كوردستانێ دا نەدیتبیت و ب شەڤ و رۆژەكێ ب رێكا فیل و سەختەكارییان ببیتە بازرگان، هەكە یێ ئازاد ژی بیت، ڤان جۆرە داخویانییان ب تەماما ئیرادەیا خۆ نادەت، بەلكو كۆنترۆلا وی د دەستێ كەسەكێ دی دایە.
مەردان خدر زێدەتر گۆت: دووپات دكەمە ڤە كو هەر هەڤپەیمانییەكا نە سروشتی نەشێت خزمەتا پرۆسەیا سیاسی یا ئەڤڕۆ یا هەرێما كوردستانێ بكەت و هەرێما كوردستانێ ئەڤڕۆ پێدڤی ب وێ چەندێ هەیە كو وەك پێنگاڤا ئێكێ، پەرلەمانێ كوردستانێ بهێتە كاراكردن و ب راستی ژی، ئەڤە بەرپرسیاریەتییەكا نەتەوەیی، نیشتمانی و ئەخلاقی یا هەموو هێزێن سیاسی یە بەرامبەر دەنگدەرێن خۆ، كو پەرلەمان ب ڤی رەنگی نەمینیت بەلكو بهێتە كاراكردن و پێدڤییە هەموو هێزێن سیاسی بكەڤنە د ناڤ دانوستاندنەكا رژد دا، دا كو كابینەیا نوو یا حوكمەتا هەرێما كوردستانێ بهێتە پێكئینان، و دیسان رێز ل مافێن هەلبژارتنان بهێتە گرتن و هەر ئێك ل دووف مافێ خۆ یێ هەلبژارتنان پشكداریێ د پەرلەمان و كابینەیا نوو یا حوكمەتا هەرێما كوردستانێ دا بكەت.
بەرپرسێ لقێ نەهـ یێ پارتی دیاركر: هەكە ژ ڕوویێ قانوونی ڤە بەرێ خۆ بدەینێ، ئەڤ كیانە، كیانەكێ دەستووری یە و دەستوورێ ئیراقا فیدڕال یێ سالا 2005ێ ژی د دوو ماددەیان دا (مادەیا 126 و مادەیا 142) دیار كرییە كا چەوا ئەڤ دەستوورە دهێتە راستڤەكرن و د هەر دوو ماددەیان دا، دیسان پێدڤی ب ڤەگەڕیانێ بۆ خەلكێ كوردستانێ هەیە كو ئەو بڕیارێ ل سەر چارەنڤیسێ قەوارەیێ هەرێما كوردستانێ بدەن.
ل دووماهییێ گۆت: ل دووف مادەیا 126ێ یێ دەستوورێ ئیراقێ، هەر راستڤەكرنەك دێ پێدڤی ب رازیبوونا پەرلەمانی و پترییا خەلكێ هەرێما كوردستانێ هەبیت و ل دووڤ مادەیا 142ێ ژی، هەكە سێ پارێزگەهـ وێ راستڤەكرنێ قەبول نەكەن، ئەو راستڤەكرن ناكەڤیتە د واری بجهئینانێ دا. ژبەر هندێ، چارەنڤیسێ قەوارەیێ هەرێما كوردستانێ ب تنێ د دەستێ خەلكێ هەرێما كوردستانێ دایە.

ئەندامەكێ جڤاتا نوونەرێن ئیراقێ هووركاریێن نوو ل دۆر هەوا دەستەسەركرنا گەندەلكاران ئاشكرا دكەت و راگەهاند، زێدەتری ئێك ملیار دۆلار ژ مالێن بەرپرسان دەست ب سەر دا هاتییە گرتن، د هەمان دەم دا فەرمانێن دەستەسەركرنێ بۆ دەهان سەركردە و پەرلەمانتاران ژی دەركەفتینە.ئەندامەكێ جڤاتا نوونەرێن ئیراقێ هووركاریێن نوو ل دۆر هەوا دەستەسەركرنا گەندەلكاران ئاشكرا دكەت و راگەهاند، زێدەتری ئێك ملیار دۆلار ژ مالێن بەرپرسان دەست ب سەر دا هاتییە گرتن، د هەمان دەم دا فەرمانێن دەستەسەركرنێ بۆ دەهان سەركردە و پەرلەمانتاران ژی دەركەفتینە.شێروان دووبەردانی، ئەندامێ جڤاتا نوونەرێن ئیراقێ ژ فراكسیۆنا پارتی  پێزانینێن نوو ل دۆر پرۆسەیا دەستەسەركرنا بەرپرسێن ئیراقێ ب تۆمەتا گەندەلیێ ئاشكرا كرن.شێروان دووبەردانی راگەهاند، ل سەر بنەمایێ دانپێدانێن  عەدنان جومەیلی، لیستەك هاتییە ئامادەكرن كو زێدەتری 120 كەسان بخۆ ڤەدگریت. د ناڤ لیستێ دا نێزیكی 12 ئەندامێن خولا نوكە و یا بۆری یێن جڤاتا نوونەرانە ل گەل هەژمارەكا سەركردە و بەرپرسێن پلەبلند.دیاركر ژی پرۆسەیا دەستەسەركرنێ چەند پارێزگەهەك ڤەگرتینە و هەتا نوكە زێدەتری 20 كەسان هاتینە دەستەسەركرن كو دو كەس ل هەولێرێ هاتینەدەستەسەركرن و زۆرترین رێژەیا دەستەسەركرنان ل ناڤچەیا كەسك ل بەغدا بوویە، لێ پشكەك ژ داخازكرییان ل مالێن خۆ نەبوون و رەڤینە.شێروان دووبەردانی هۆشداری دا ل دۆر سیاسیكرنا ڤێ دۆسیێ و گۆت، ترس هەیە ئەڤ بابەتە ببیتە پرسەكا سیاسی، لێ هەكە هەو بەردەوام بیت و نەهێتە سیاسیكرن، دێ گەلێ ئیراقێ دلخۆش كەت.هەروەسا رۆناهی ئێخستە سەر قەبارەیا گەندەلیان و ئاشكرا كر، بتنێ د رۆژەكێ دا زێدەتری ئێك ملیار دۆلار ل مالێن وان بەرپرس و سەركردەیان دەست ب سەر دا هاتییە گرتن.دووبەردانی دوپاتی ل وێ چەندێ كر، رەوشا كارگێری و دارایێ یا ئیراقێ گەلەك خرابە و ب ڤێ قەبارەیا مەزن یا گەندەلیێ، فرۆتنا پەترۆلێ و كاركرن چو مفایەكێ بۆ وەلات نابیت.

سەرۆك مەسعود بارزانی ل پیرمام پێشوازی ل ئیلبروس كوتراشیڤ، بالیۆزێ رووسیا ل ئیراقێ كر.
د وێ دیدارێ دا كو ماكسیم رۆبین، قونسلێ گشتیێ رووسیا ل هەولێرێ ژی بەرهەڤ بووی، بارودۆخێ سیاسی و دووماهی پێشهاتێن دەڤەرێ هاتنە باسكرن. بالیۆزێ رووسیا ل ئیراقێ هەلوەست و دان ب خۆداگرتنا سەركردایەتییا سیاسی یا هەرێما كوردستانێ بلند هەلسەنگاند بەرامبەر شەڕ و گرژیێن ڤێ دووماهیێ یێن دەڤەرێ.
هەر د وێ دیدارێ دا، رۆناهی هاتە ئێخستن ل سەر بارودۆخێ سووریێ، هەروەسا پەیوەندیێن د ناڤبەرا حوكمەتا هەرێمێ و حوكمەتا نوو یا ئیراقا فیدڕال و پرۆسەیا سیاسی یا هەرێما كوردستانێ، هەروەسا دوپاتی ل سەر پێشئێخستنا پەیوەندیێن د ناڤبەرا هەرێما كوردستانێ و رووسیا دا هاتە كرن.

سەرۆك مەسعود بارزانی ل پیرمام پێشوازی ل شاندەكێ گرۆپێ دۆستایەتییا كەنەدی و كوردی ل پەرلەمانێ كەنەدا كر، كو پێكهاتبوو ژ زیاد عەبدوللەتیف ئەندامێ پەرلەمانێ كەنەدا و ئەحمەد حسێن ئەندامێ پەرلەمانێ كەنەدا و وەزیرێ بەرێ یێ گەشەپێدانا نێڤدەولەتی یا حوكمەتا كەنەدا.
د دیدارێ دا، شاندێ مێهڤان، ژ بلی دەربڕینا خۆشحالیا خۆ بۆ دیدارێ ل گەل سەرۆك بارزانی، تەكز ل سەر رەوایەتییا دۆزا گەلێ كوردستانێ كرن و پێزانینێن خۆ بۆ خەبات و قوربانیدانا گەلێ كوردستانێ و قەهرەمانییا پێشمەرگەی د شەڕێ دژی تیرۆرستێن داعشێ دا هەبوون. هەروەسا كورتییەك ل دۆر كار و چالاكیێن گرۆپێ دۆستایەتییا كەنەدی و كوردی ل پەرلەمانێ كەنەدا و هەماهەنگییا وان ل گەل فیدراسیۆنا رەڤەندا كوردی و رۆلێ وێ فیدراسیۆنێ د پشتەڤانییا دۆزا گەلێ كوردستانێ دا بەرچاڤكر. هەروەسا داخوازییا وێ چەندێ كرن دۆستایەتی و پەیوەندیێن د ناڤبەرا هەرێما كوردستانێ و كەنەدایێ دا د بوارێ ئابۆری و تەكنەلۆژیێ دا بهێنە بەرفرەهكرن.
هەر د وێ دیدارێ دا، سەرۆك بارزانی سوپاسییا پشتەڤانی و هاریكاریێن گەل و حوكمەتا كەنەدا كرن كو د قۆناغێن جوداجودا دا و ب تایبەتی د شەڕێ دژی تیرۆرستێن داعشێ دا، پالدەرێ گەلێ كوردستانێ و پێشمەرگەی بووینە. سەرۆك بارزانی پشتەڤانییا خۆ بۆ بهێزكرنا دۆستایەتی و پەیوەندیێن د ناڤبەرا گەلێ كوردستانێ و گەلێ كەنەدایێ دا تەكز كر و د وێ بوارێ دا بەرچاڤرۆهنییا پێدڤی ئێخستە بەرچاڤ.