فەرماندەیێ میحوەرێ شەشێ یێ هێزا پێشمەرگەی، ئاشكرا كر، كو نەبوونا سیستەمێ بەرگرییا ئەسمانی ئاستەنگەكا مەزنە ل بەرامبەر هەرێما كوردستانێ. هەڤدەم ڕەخنە ل نە وەكهەڤییا بەلاڤكرنا شایستەیێن دارایی گرت و ڕاگەهاند: مووچەیێ پێشمەرگەی ناگەهیتە نیڤا مووچەیێ هەڤكیڤێن وان ل لەشكەرێ ئیراقێ.
سیروان بارزانی، فەرماندەیێ میحوەرێ شەشێ یێ هێزا پێشمەرگەی، د داخۆیانییەكێ دا بۆ كەنالێ «حەدەس»، كۆمەكا دۆسییێن هەستیار یێن ئەمنی و كارگێڕی بەرچاڤكرن یێن كو گرێداینە ب پاراستنا ئاسایشا هەرێما كوردستانێ، گەفێن داعشێ و شایستەیێن دارایی یێن هێزا پێشمەرگەی.
فەرماندەیێ میحوەرێ شەش ل دەستپێكا ئاخڤتنێن خوە دا ئاماژە ب وێ چەندێ كر، ل دەمێ شەڕ و ئالۆزییێن ڤێ دووماهیێ ل دەڤەرێ، هەرێما كوردستانێ تووشی زێدەتر ژ هزار هێرشێن مووشەكی و درۆنی بوویە.
سیروان بارزانی ڕۆناهی ئێخستە سەر كێشەیا نەبوونا سیستەمێ بەرگرییا ئەسمانی و باس ل وێ چەندێ كر، ب ڕاستی نەبوونا وی سیستەمی ئاستەنگەكا ئێكجار مەزنە ل بەرامبەر هەرێما كوردستانێ.
هەڤدەم سەبارەت ب هێرشێن درۆنی و مووشەكی گۆت: ئەم هیڤیدارین سەرجەم ئەو بهانەیێن كو گرۆپێن چەكدار بۆ ئەنجامدانا هێرشێن خوە دژی هەرێما كوردستانێ دئیننەڤە، ب ئێكجاری بهێنە ڕاوەستاندن و دووماهیك پێ بهێت.
سەبارەت ب لڤینێن پاشماوەیێن تیرۆرستێن داعشێ ل دەڤەرێ، فەرماندەیێ پێشمەرگەی هۆشدارییەكا توند دا و ئاشكرا كر: هێرش و پەلامارا ڤێ دووماهیێ یا چەكدارێن داعشێ ل سنۆرێ پارێزگەها كەركووكێ ل پردێ، زەنگەكا مەترسیدارە.
ژ ئالییەكێ دی ڤە و ل دۆر جوداهییا شایستە و مافێن دارایی دناڤبەرا پێشمەرگەی و لەشكەرێ ئیراقێ دا، فەرماندەیێ میحوەرێ شەش دلتەنگییا خوە دەربڕی و گۆت: ئاستێ مووچەیێ هێزێن مە هەتاكو ژ نیڤا مووچەیێ هێزێن لەشكەرێ ئیراقێ دەرباز نابیت.
سیروان بارزانی دووپاتی ل ئەركێ مەیدانی یێ هێزان كرەڤە و ڕاگەهاند، كو پێشمەرگە ل ڤی سنۆری دا ئەركێ ڕاستەوخوە یێ پاراستنا تەمامییا هێلا سنۆری یا پارێزگەهێن كەركووكێ و نەینەوایێ ل ستۆ دگریت.
ل درێژاهییا ئاخڤتنێن خوە دا پشتڕاستی ژی دا، كو هێزا پێشمەرگەی ئۆپەراسیۆنێن هەڤپشك و بەردەوام ل گەل هێزێن ئەمنی یێن ئیراقێ ل سنۆرێ هەردوو پارێزگەهێن كەركووكێ و نەینەوایێ هەنە بۆ ژناڤبرنا مۆڵگەهێن تیرۆرستان.
فەرماندەیێ میحوەرێ شەش باس ل پێدڤیێن لۆجستی و سەربازی یێن پێشمەرگەی كر و گۆت: مە د ڤێ قووناغی دا هێزێن خوە ب ئامێر و كەرەستەیێن سەربازی یێن هەڤچەرخ ب هێزتر كرینە، بەلێ ئەڤ شیانێن ناڤخوەیی هێشتا ناگەهنە ئاست و شیانێن تەكنیكی و لۆجستی یێن هێزێن هەڤپەیمانییا نێڤدەولەتی، لەوما پێدڤییا هێزێن مە ب هەڤكاری و سیستەمێ پێشكەفتی بەردەوامە.

سەرۆكێ فەرمانگەها هەماهەنگی و دووڤچوونێ ڕاگەهاند، بەغدا هەردەم ڕێگری ل پڕچەككرنا پێشمەرگەی و دابینكرنا سیستەمێ بەرگریێ كریە و هەتا نوكە ژی ل قەناعەتپێكرنا گرۆپێن چەكدار بۆ دانانا چەكی سەركەفتی نەبوویە، ئاشكرا ژی كر كو كار بۆ وەكهەڤكرنا مووچەیێ پێشمەرگەی ل گەل لەشكەرێ ئیراقێ دهێتە كرن و بۆ مەها بهێت ژی هەموو پێشمەرگە د ڕێكا هەژمارا من دێ مووچەی وەردگرن.
عەبدولحەكیم خەسرەو، سەرۆكێ فەرمانگەها هەماهەنگی و دووڤچوونێ، دەربارەی ڤەكێشانا هێزێن هەڤپەیمانان گۆت: هەبوونا هێزێن هوڤپەیمانان بۆ ڕووبڕووبوونا مەترسییەكا وەكی داعشێ یا كو سنۆران دبڕیت كاریگەری ل سەر ئیراقێ، سووریێ و ڕۆژهەلاتا ناڤین هەیە، گەلەك گرنگ بوو، هەروەسا ل پاراستنا هەرێما كوردستانێ كاریگەرییەكا ئەرێنی هەبوو.
عەبدولحەكیم خەسرەوی ئاماژە ژی دا، ئەمریكا ل پاراستنا بنكێن خوە و هەڤپەیمان و بەرژەوەندییێن خوە ل ڕۆژهەلاتا ناڤین دێ بەردەوام بیت، بەلێ ب ستراتیژ و گۆڕانكارییەكا جودا.
گۆت ژی: نوكە هندەك ژ گرۆپێن چەكدار ڕەتكریە چەكێن خوە دانن و د بۆریدا چەندین جاران هێرش كریە سەر هەرێمێ و دەرڤەی ئیراقێ ژی، لەوما د پاشەرۆژێ دا ڕووبڕووی ئاستەنگەكا جدی دبیت، ب تایبەت كو مەترسییا داعشێ بەردەوامە، لەوما دڤێت هێزێن ئیراقێ هەماهەنگییێن خوە ل گەل پێشمەرگەی پێشڤەببەن، بۆ وێ چەندێ كو كاریگەرییێن وێ كێم بكەت.
سەرۆكێ فەرمانگەها هەماهەنگی و دووڤچوونێ دەربارەی وێ چەندێ بۆچی هێزا پێشمەرگەی خودانا سیستەمێ بەرگریێ نینە، باس ل وێ چەندێ كر، حوكمەتا ئیراقێ هەردەم ڕێگری ل پڕچەككرنا هێزێن پێشمەرگەی كریە د چارچۆڤەیێ سیستەمێ بەرگریێ دا، هەروەسا هەتا نوكە هەرێما كوردستانێ ژ وی واری ڤە نەهاتییە تەمویلكرن، بەلێ هەولێر و بەغدا ژ وی واری ڤە د دانوستاندنان دانە.
عەبدولحەكیم خەسرەوی هەر ژ وی واری ڤە گۆت: ب دیتنا من ئیراق بۆ خوەگونجاندنێ ل گەل سیستەمێ بەرگرییا پێشكەفتی و بۆ ڕووبڕووبوونا مەترسییان بەرهەڤ نینە.
دەربارەی وێ چەندێ ئەرێ گرۆپێن چەكدار مفای ژ ڤەكێشانا هێزێن هەڤپەیمانان دبینن؛ گۆت: هێزێن هەڤپەیمانان دەمێ لڤێرە ژی بوون كێمترین چالاكی ل دژی گرۆپێن چەكدار هەبوو، ئەو بۆ مەترسییا داعشێ و پاراستنا بەرژەوەندییێن خوە لڤێرە بوون، هەڤدەم هێزێن هەڤپەیمانان پرسا گرۆپێن چەكداران ب كێشەیەكا ناڤخوە دزانی.
هەروەسا باس ل وێ چەندێ كر، ل بەرامبەر دا هێزێن ئیراقی پرسا گرۆپێن چەكداران ب كێشەیەكا ناڤخوە دزانی و چەندین جاران دووپات كریە، كو نابیت ئیراق ببیتە مەترسی بۆ سەر وەلاتێن دەوروبەر، بەلێ هەتا نوكە ل قەناعەتپێكرنا گرۆپێن چەكداران بۆ دانانا چەكی سەركەفتی نەبوونە، گۆت ژی: وی ڕەوشا ئەمنی یا ل ڕۆژهەلاتا ناڤین و شەڕێ ئێرانێ كاریگەری ل سەر پرسا چەككرنا گرۆپان هەیە.
سەرۆكێ فەرمانگەها هەماهەنگی و دووڤچوونێ سەبارەت ب ئێكگرتنا هێزێن پێشمەرگەی، گۆت: ئێك ژ بەرنامەیێن كارێ كابینەیا نەهێ، ئێكگرتنا هێزێن پێشمەرگەی بوو، نوكە د چارچۆڤەیێ یاسایا چاكسازییا هێزان دا هاتینە ئێكگرتن، یا كو مەسرور بارزانی، سەرۆكێ حوكمەتا هەرێما كوردستانێ سەرۆكێ لژنەیا بلند یا بجهئینانا یاسایا چاكسازیێ بوو.
باس ل وێ چەندێ ژی كر، بۆچوونا سەرۆك بارزانی هەردەم ئەو بوو هێزەكا پێشمەرگەی یا ئێكگرتی هەبیت، هەڤدەم هەلوەست و ڕۆلێ هەموو ئالییان بۆ وی بابەتی ئەرێنی بوو و هەڤكار بوو.
سەرۆكێ فەرمانگەها هەماهەنگی و دووڤچوونێ ڕاگەهاند ژی، حوكمەتا هەرێما كوردستانێ كار بۆ وەكهەڤكرنا مووچەیێ پێشمەرگەی ل گەل لەشكەرێ ئیراقێ دكەت، هەڤدەم كار بۆ ب دەستڤەئینانا هەموو شایستە و مافێن پێشمەرگەی ل بودجەیا 2027 دكەین، بۆ وێ چەندێ ژی پێدڤییا مە ب نێزیكی 900 ملیار دیناران هەیە.
دەربارەی بڕینا هاریكارییێن ئەمریكایێ گۆت: مووچەیێ پێشمەرگەی بنەجهە هەڤدەم ژ بەر كو ڕێژەیا وی كێم بوو، كاریگەرییەكا وەسا نابیت، هەروەسا بۆ حوكمەتێ بەرنامە هەیە بۆ پركرنا وێ.
عەبدولحەكیم خەسرەوی باس ل وێ چەندێ ژی كر: 148 هزار میلاكێ پێشمەرگەیێ مە هەیە، ل مەها بۆری، نێزیكی 142 هزار پێشمەرگەی ب ڕێكا (هەژمارا من) مووچە وەرگرتییە، بۆ مەها بهێت هەموو ب ڕێكا (هەژمارا من) دێ مووچەی وەردگرن.
سەرۆكێ فەرمانگەها هەماهەنگی و دووڤچوونێ سەبارەت ب كۆمبوونا شاندێن هەرێمێ و ئیراقێ ئاماژە دا، وەزارەتا دارایییا ئیراقێ نەشییا خوە ل گەل سیستەمێ نوكە یێ وەلاتی بگونجینیت و هەتا نوكە ب شێوەیەكێ ناڤەندی كار دكەت.
سەبارەت ب پشكا بودجەیا هەرێمێ، گۆت: كار نەكرن ب ئەنجامێ سەرژمێریێ و دەستكاریكرنا وێ ژ ئالیێ ئیراقێ ڤە و دیاركرنا 12.7% ستەمە، هەروەسا سەرۆكێ حوكمەتا هەرێما كوردستانێ ب فەرمی حوكمەتا ئیراقێ ئاگەهدار كریە، كو ب دەستكاریكرنا ئەنجامێ سەرژمێریێ ڕازی نینە.
هەڤدەم ئاماژە دا، ئینفاقا فعلی ب بڕیارا دادگەها ناڤەندی بابەتەكێ نە یاسایی یە، لەوما ب نڤیسارا فەرمی مە داخواز ژ حوكمەتا ئیراقێ كریە، دانانا بودجەیێ د چارچۆڤەیێ یاسایێ دا بیت.
سەبارەت ب داخوازییا ئیراقێ بۆ هەرێمێ سەبارەت ب بەرهەمهێنانا بەرمیلێن نەفتێ د ڕۆژەكێ دا باس ل وێ چەندێ كر، هەولێر و بەغدا ژ وی واری ڤە د دانوستاندنێن بەردەوام دانە، هەڤدەم حوكمەتا هەرێمێ هەموو بڕگە و مادەیێن یاسایا نەفت و غازێ ئامادە كرینە و ڕادەستی حوكمەتا ئیراقێ كرینە.
دەربارەی بجهنەئینانا سیستەمێ ئاسیكۆدا، گۆت: ئیراق ب خوە بۆ بجهنەئینانا سیستەمێ ئاسیكۆدا ئەگەرە و بەرهەڤ نینە، بەرۆڤاژی حوكمەتا هەرێما كوردستانێ ب تەمامی بەرهەڤە و هەموو ئەركێن خوە بجه دئینیت.

سەرۆك بارزانی 30 ئیلۆنێ پەیامەك ل دۆر ڤەكێشانا هێزێن هەڤپەیمان ژ ئیراقێ بەلاڤكر و تێدا هاتییە: ل گۆرەی وێ ڕێككەفتنا د ناڤبەرا هێزێن هەڤپەیمان و حوكمەتا ئیراقێ دا هاتییە ئیمزاكرن، ئەڤڕۆ دووماهی ڕۆژا ئەركێ هێزێن هەڤپەیمان ل ئیراقێ و هەرێما كوردستانێ یە. هەڤپەیمانان د دەمێ بۆری دا پشتەڤانییەكا كارتێكەر ل هێزێن ئیراقێ و هێزێن پێشمەرگەی كرییە د شەڕێ دژی تیرۆرێ دا و بۆ بهێزكرنا ئارامیێ ل دەڤەرێ.
سەرۆك بارزانی د پەیاما خوە دا ئاماژە ب وێ ژی دا، هێزێن هەڤپەیمان د دەمێ مانا خوە دا هاریكارییا بەرچاڤ یا هێزێن ئەمنییێن ئیراقێ و پێشمەرگەی كرییە و د ڤی پێناڤی دا قوربانی داینە. نوكە و پشتی دووماهیهاتنا وی ئەركی، دەرگەه بۆ حوكمەتا ئیراقێ و هەرێما كوردستانێ ڤەكرییە داكو ل گۆرەی هەلومەرجان و ژ بۆ پاراستنا ئارامیێ، ڕێككەفتنێن دووقۆلی یێن نوو ل گەل وەلاتێن هەڤپەیمان ئیمزا بكەن.
گۆت ژی: ئەو ڕۆلێ هێزێن هەڤپەیمان د شكاندنا داعشێ و ڤەگەراندنا ئارامیێ دا گێڕایی، جهێ پێزانینێ یە. د هەمان دەم دا، سلاڤان بۆ گیانێ پاقژ یێ هەموو شەهیدێن پێشمەرگە و هێزێن ئیراقی و هێزێن هەڤپەیمان دهنێرین كو یادا وان هەردەم ب بلند دمینیت.
سەرۆك بارزانی ڕاگەهاند ژی، ل دۆر ڕەوشا هەرێما كوردستانێ، هندەك ئالی ب لێكدانێن نەدروست وێ ب ڕەنگەكی دبینن كو ب نەمانا هێزێن هەڤپەیمان، هەرێم دێ كەڤیتتە بن گەفێ. حوكمەتا هەرێما كوردستانێ خەلكی پشتڕاست دكەت كو هەماهەنگییەكا بهێز ل گەل حوكمەتا ئیراقێ هەیە ژ بۆ بەرسڤدانا هەر جورە گەف و مەترسییەكێ، چ ئەو گەفە بنەجهێ داعشێ بیت یان هەر ناڤەكێ دی.
ئاماژەكر ژی، پێدڤییە هەر كەس و ئالییەكێ خەیاللا وێ هەبیت ببیتە گەف ل سەر ئارامییا هەرێما كوردستانێ، بزانن ل كوردستانێ هەژمارەكا پێتڤی ژ پێشمەرگە و گیانفیدایێن وەلاتێ هەنە كو بەرگریێ ژ خەلك و ئاخا كوردستانێ دكەن و هەر دەستدرێژییەكێ بشكینن. هێزا پێشمەرگەی كوردستانێ كو ریهوڕیشالێن وێ د دیرۆكا خەباتا ڕزگاریخوازا كوردستانێ دا هەنە و بەرهەمێ خوونا شەهیدانە، دێ بەردەوام بیت.
د دووماهییا پەیاما خوە دا گۆت: هێزا پێشمەرگەیێ كوردستانێ ب هەماهەنگییا تەمام ل گەل هێزێن ئیراقێ، بەرهەڤییا تەمام هەیە ژ بۆ بەرگریێ، پاراستنا ئارامییا وەلاتی و نەهێلانا هەر جۆرە گەف و مەترسییەكێ.

سەرۆك بارزانی پێشوازی ل خەمیس خەنجەر و شاندێ دگەل دا كر و د كۆمبوونەكێ دا ڕەوشا گشتی و ئاستەنگێن ل بەرامبەر ئیراقێ ل قووناغا داهاتی و بزاڤێن بۆ جبنەجهكرنا ئارامیێ ل ئیراقێ هاتنە لێكگۆهارتن.
بارەگەهێ بارزانی بەلاڤ كر، ل پیرمام سەرۆك بارزانی پێشوازی ل خەمیس خەنجەر و شاندێ دگەل دا كر.
بارەگەهێ بارزانی ئاماژە ب وێ چەندێ ژی كر، د دیدارێ دا بیروڕا ل دۆر ڕەوشا گشتی و ئاستەنگێن ل بەرامبەر ئیراقێ ل قووناغا داهاتی و بزاڤێن بۆ بنەجهكرنا ئارامیێ ل ئیراقێ هاتنە لێكگۆهارتن.
هەر د دیدارێ دا باس ل قووناغا داهاتی یا ئیراقێ پشتی دووماهیهاتنا ئەركێ هێزێن هەڤپەیمانییا نێڤدەولەتی هاتە كرن زێدەباری پەیوەندی و هەماهەنگییا د ناڤبەرا هێز وئالییێن سیاسی یێن ئیراقێ دا.

سەرۆك مەسعود بارزانی پێشوازی ل لۆرد مایكل ئاشكرۆفت، كەسایەتییێ دیار یێ بەریتانی و سەرۆكێ فەخری یێ ئێكەتییا ناێڤدەولەتییا دیموكرات (IDU) كر.
لۆرد ئاشكرۆفتی خوەشحالییا خوە ب سەرەدانا هەرێما كوردستانێ دەربڕی و پێزانینێن هەبوون بۆ وان پێنگاڤێن ل ئاڕاستەیا، ئارامی و پێشكەفتنا هەرێما كوردستانێ هاتینە هاڤێتن، و دوپات كر، پێدڤییە دۆزا كوردی ل سەر ئاستێ جیهانی باشتر بهێتە نیاسین و قوربانیدانا هێزا پێشمەرگەیێ كوردستانێ د شەڕێ دژی تیرۆرستێن داعشێ دا بلند هەلسەنگاند.
سەرۆك بارزانی كورتییەك ل سەر دیرۆكا خەبات و قوربانیدانا گەلێ كوردستانێ د 100 سالێن بۆری دا بەرچاڤكر. هەروەسا ئاماژە ب فەرهەنگا دەولەمەند یا پێكڤەژیانا گەلێ كوردستانێ دا و دوپاتی ل پێدڤییا چارەسەركرنا دۆزا ڕەوا یا گەلێ كوردستانێ ب شێوازێن ئاشتیانە كر. هەروەسا سەرۆك بارزانی ڕۆناهی ئێخستە سەر ڕەوشا ئیراقێ و دوپاتی ل پاێگیریبوونا هەموو ئالییان ب دەستووری كر، د پێناڤێ ئارامیێ و چارەسەركرنا ئاریشەیان.

نێچیرڤان بارزانی، سەرۆكێ هەرێما كوردستانێ، ل بەغدایێ پشكداری د ڕێوڕەسمێن دووماهیهاتنا ئەركێ هەڤپەیمانییا نێڤدەولەتی ل ئیراقێ كر كو ب بەرهەڤبوونا عەلی فالح ئەلزەیدی، سەرۆكوەزیرێن ئیراقا فیدرال و هەژمارەكا بەرچاڤ ژ بەرپرسێن بلند و نوونەرێن نێڤدەولەتی بڕێڤەچوو.

د ڤی ڕێوڕەسمێ دا سەرۆكێ هەرێما كوردستانێ، پەیڤەك پێشكێش كر، ئەڤە دەقێ وێ یە:
خوەشحالم ئەڤرۆ ل ڤێ هەلكەفتا نیشتمانی ل بەغدایێ ل گەل هەوەمە، د دەمەكێ وەرچەرخان دا بۆ وەڵتێ مە كو هەڤدەمە ل گەل دووماهیهاتنا ئەركێ هەڤپەیمانییا نێڤدەولەتی ل ئیراقێ.
چەندین سالە، ئیراق ب قووناغێن گەلەك دژوار دا دەربازبوو. دەمێ تیرۆرستێن داعشێ هێرش ئیناینە سەر وەلاتێ مە، هەموو ئیراقی پێكڤە د ئێك سەنگەر دا ل دژی تیرۆرێ ڕاوەستییان.
لەشكەرێ ئیراقێ، پێشمەرگەی، حەشدا شەعبی ل گەل تەمامییا هێزێن چەكدار و ئەمنی، ب خوون و قوربانیدانا هەڤپشك بەرگری ژ ڤی نیشتمانی كر. لڤێرە ، ب بلندترین ڕێز ڤە ل قوربانیدانا هەموویان دنێڕین. سلاڤان بۆ گیانێ پاقژ یێ هەموو شەهیدان دهنێرین.
د وی قووناغا دژوار دا، ل سەر داخوازا حوكمەتا ئیراقێ، ئەمریكا ل گەل هەڤپەیمانییا نێڤدەولەتی و دۆستێن مە، ل پال مە ڕاوەستییان و هەڤكارییا مە كرن. مە، هەموو ئیراقێ ئەو ل بیرا مەیە و پێزانینا مە بۆ پشتەڤانییا وان هەیە.
ئەڤرۆ ژی كو ب گۆرەی ڕێككەفتنا وان ل گەل حوكمەتا فیدرال، ئاخا ئیراقێ جهـ د هێلن، ئەم چو جاران وێ هەڤكاریێ و پشتەڤانیێ ژ بیر ناكەین و بۆ هەردەم ب ڕێز ڤە لێ دنێڕین، بەلێ پێزانینا ڕاستەقینە دڤێت بەر ب هەلگرتنا بەرپرسیارەتبیا نیشتمانی ل ئیراقێ گەشە بكەت.
پێڤەرێ سەركەفتنا پشتەڤانییا نێڤدەولەتی ئەو نینە هەتا هەتایێ هێزا بیانی لڤێرە بمینیت، بەلكو ئەوە كو ئەم یێن ئیراقی، ئەڤرۆ ب تەمامی، مە شیان هەبن بەرپرسیارەتییا پاراستنا ئاسایش و ئارامییا وەلاتێ خوە ل ستۆ بگرین.
ب دووماهیهاتنا ئەركێ هەڤپەیمانییا نێڤدەولەتی ل ئیراقێ، ئەڤرۆ دچینە قووناغەكا نوو دا، قووناغا باوەڕی ب خوەبوون و پشتگرێدان ب شیانێن نیشتمانی یێن مە. چاڤێ مە ل وێ چەندێ یە پەیوەندییا مە ل گەل ئەمریكا و وەلاتێن هەڤپەیمان، ژ پێدڤییێن شەڕێ دژی تیرۆرێ ، بهێتە ڤەگوهاستن بۆ هەڤپشكییەكا درێژخایەن یا هەسەنگ ل بوارێن ئەمنی، ئابۆری، وەبەرهێنان، وزە، پەروەردە، تەكنەلۆژۆیا و دیپلۆماسیێ دا.
هەڤپشكییەك ل سەر بنەمایێ بەرژەوەندییا هەڤپشك و ڕێزگرتن ل سەروەرییا دەولەتێ، ب شێوەیەكێ كو د خزمەتا هەموو ئیراقێ و پێكهاتەیێن وێ و ئارامییا دەڤەرێ دا بیت.
بەرهەڤبوویێن بەرێز:
دەمێ ئەڤرۆ باس ل سەروەریێ دكەین، دڤێت ب ڕۆهنی پێناسەیا وێ بكەین: سەروەری، تەنی ڤەكێشانا هێزا سەربازییا بیانی نینە، بەلكو بەرپرسیارەتییەكا نیشتمانی یە. سەروەری ئانكو دەولەت خودانا بڕیارا دووماهیێ بیت. ئانكو دەستوور و فیدرالی بهێتە بجهـئینان و دەزگەهێن دەستووری مەرجەعێ هەموویان بن. ئانكو بڕیارا شەڕ و ئاشتیێ تەنی د دەستێ دەستهەلاتا شەرعی یا دەولەتێ دا بیت.
هێزا ئیراقێ د چەكێ دەرڤەی دەستهەلاتا دەولەتێ و د ئالۆزی و نەئارامیێ دا نینە. هێزا ئیراقێ د وێ چەندێ دایە ب دانوستاندن و تێكگەهشتنێ كێشەیان چارەسەر بكەت. د وێ چەندێ دایە كو لۆژیكا دەولەت و دەستووری زال بیت و هەڤسەنگی و مافێ هەموو پێكهاتەیان بپارێزیت.
لەوما ئێدی دەمێ وێ چەندێ هاتییە تەمامییا كێشەیێن هەلاویستی یێن ناڤمالا ئیراقی دا، ژ پەیوەندیێن هەولێرێ و بەغدایێ تا پرسا چەكی و مافێ سەرجەم پێكهاتەیان، ل سەر بنەمایێ دەستووری و ب ئیرادەیەكا نیشتمانی یا ئیراقییانە بهێنە چارەسەركرن، نەك ڕێ بدەین ببنە قەیرانەكا بەردەوام بۆ نڤشێن داهاتی.
ئەم خوازیارێن ئیراقەكا دەستووری یا فیدڕالی، ئارام و خودان سەروەرییا تەمام. وەلاتەك كو بێ جوداهی پارێزەرێ ژیان و ئاسایشا هەموو پێكهات و وەلاتییێن وی بیت. ل سەر بنەمایێ بەرژەوەندییا هەڤپشك، پەیوەندییەكا هەڤسەنگ د گەل جیران و دۆستێن خوە دا هەبیت و نەبیتە گۆڕەپانا ململانێ، بەلكو ببیتە چەقێ ئاشتی، دانسوتاندنێ وئارامیێ بۆ هەموو دەڤەرێ.
ئەو ئیراقە بەرپرسیارەتییا هەڤپشكا مە هەموویانە. ئەم ژی ل هەرێما كوردستانێ، وەكی بەردەوام دێ هەڤكار و پشتەڤان بین بۆ هەر پێنگاڤەكێ كو سەروەری، ئاسایش و ئارامییا ئیراقێ ب هێز بكەت. د گەل حكومەتا فیدڕالی و هەموو هێز و پێكهاتەیێن ئیراقێ دا، ب دیالۆگ و ل سەر بنەمایێ دەستووری كار دكەین، هەڤدەم دووپاتیێ ل سەر بهێزكرنا هەماهەنگیێ و هەڤكارییا د ناڤبەرا پێشمەرگەی، لەشكەر و هەموو هێزێن چەكدار و ئەمنی دا دكەین.
بلا ڤێ وەرچەرخانێ بكەینە دەستپێكا باوەرییەكا ب هێزتر د ناڤبەرا مە دا، دەستپێكا قووناغەكێ كو تێدا ئیراق ب ئێكڕێزی، سەروەرییا یاسا و هەڤپشكییا دەستووری یا هەموو پێكهاتەییێن وێ، بلند و پاراستی بیت.

نێچیرڤان بارزانی، سەرۆكێ هەرێما كوردستانێ، ب هەلكەفتا ب دووماهیهاتنا ئەركێ وی وەك قۆنسولێ گشتی یێ چینێ ل هەرێما كوردستانێ و ب مەرەما مالئاڤاهیێ، پێشوازی ل «لیو جۆن» كر.
د دیدارێ دا سەرۆكێ هەرێمێ «سوپاسییا بزاڤێن لیو جۆنی كر د پێناڤێ پێشڤەبرنا پەیوەندییێن چینێ ل گەل هەرێمێ د بوارێن جودا دا، هەروەسا هیڤییا سەركەفتنێ د ئەركێ وی یێ نوو دا بۆ خواست».
قۆنسلێ گشتی یێ چینێ «سوپاس و پێزانینێن خوە بۆ سەرۆكایەتیێ و ئالییێن پەیوەندیدارێن هەرێمێ دەربرین، بۆ وێ هەڤكاری و پشتەڤانییا د دەمێ كاركرنا خوە دا پێشكێشی وی كرین، هەروەسا دوپاتی ل سەر داخوازییا وەلاتێ خوە كر بۆ بەردەوامییا پێشڤەبرنا پەیوەندییێن دووقۆلی».
گەنگەشەكرنا دەرفەتێن بەرفرەهكرنا هاریكاریا هەڤپشك، تەوەرەكێ دی یێ دیدارێ بوو، تێدا سەرۆكێ هەرێمێ «سوپاسییا» چینێ كر بۆ ڤەكرنا پشكا كوردی ل زانكۆیا پەكین.

نێچیرڤان بارزانی، سەرۆكێ هەرێما كوردستانێ، پێشوازی ل لۆرد مایكل ئاشكرۆفت، سەرۆكێ فەخری یێ ئێكەتییا نێڤدەولەتییا دیموكرات (IDU) و سیاسەتمەدار و كەسایەتییێ دیار یێ بەریتانی كر.
سەرۆكایەتییا هەرێما كوردستانێ دبێژیت، د دیدارێ دا سەرۆكێ هەرێما كوردستانێ «خوەشحالییا خوە ب سەرەدانا وی بۆ هەرێما كوردستانێ دەربڕی و ڕۆل و پێگەهێ دیارێ لۆرد ئاشكرۆفتی د گۆڕەپانا سیاسی و ئابۆری و پشتەڤانیكرنا پرەنسیپێن دیموكراتیێ دا بلند هەلسەنگاند».
لۆرد ئاشكرۆفت خوەشحالییا خوە ب دیدارێ و سەرەدانا هەرێما كوردستانێ دەربڕی و ئاستێ ئارامیێ، ئاڤەدانی و گەشەسەندنا هەرێما كوردستانێ بلند هەلسەنگاند.

نێچیرڤان بارزانی، سەرۆكێ هەرێما كوردستانێ، ب هەلكەفتا دووماهیهاتنا ئەركێ وی، پێشوازی ل ماكسیم ڕووبین، قونسلێ گشتی یێ ڕووسیایێ ل هەرێما كوردستانێ كر و سوپاسییا بزاڤێن وی كر ل بەرەوپێشڤەبرنا پەیوەندییێن د ناڤبەرا هەردوو ئالییاندا.
قونسلێ گشتی یێ ڕووسیایێ سوپاس و پێزانینا خوە بۆ سەرۆكایەتی و دەزگەهێن هەرێما كوردستانێ دەربڕی و ڕاگەهاند»پێزانینا من هەیە بۆ وێ دۆستینی و هەڤكارییا بەردەوام یا ل دەمێ كاركرنا من دا ژ لایێ ئالییێن پەیوەندیدار یێن هەرێما كوردستانێ ڤە پێشكێشی من هاتییە كرن».
تەوەرەكێ دی یێ دیدارا د ناڤبەرا سەرۆكێ هەرێما كوردستانێ و قونسلێ گشتی یێ ڕووسیایێ، گەنگەشەكرن بوو بوو ل دۆر «دووماهیك پێشهاتێن ڕەوشا دەڤەرێ ب گشتی».

مەسرور بارزانی، سەرۆكێ حوكمەتا هەرێما كوردستانێ، بەرێ بنیاتێ ئێكەم كۆگەها هەڤچەرخا پارچەیێن یەدەگێن ترۆمبێلێن تۆیۆتایێ ب ناڤێ (هەولێر مۆتۆر سیتی) ل هەولێرێ دانا و د پەیڤەكێ دا ڕاگەهاند «دانان و دروستكرنا ڤان جۆرە پڕۆژەیان ل هەرێما كوردستانێ و ل هەولێرێ ب تایبەتی، دێ ڕێخوەشكەر بێت بۆ دروستكرنا دەلیڤەیێن كاری بۆ گەنجێن مە كۆ بێگومان وزەیەكا زۆرا گەنجان ل كوردستانێ هەیە كۆ بشێن كار بكەن».
دەقێ پەیڤا سەرۆكێ حوكمەتا هەرێما كوردستانێ:
گەلەك خوەشحالم كۆ ئەڤرۆ پێكڤە ل گەل هەوەینە بۆ دانانا بەرێ بنیاتێ هندەك پڕۆژێن گرنگێن كۆمپانییا تۆیۆتا ئیراق كۆ بێگومان كاریگەرییەكا زۆر ل سەر ڤەژاندنا ئابۆری ل دەڤەرێ دێ هەبێت.
سوپاسییا كاك سەردار بیبانی، سەرۆكێ كۆمپانییێن سەردار گرۆپ و تۆیۆتا ئیراق دكەم بۆ ئەوان كارێن جوانێن كو دكەت د بوارێ وەبەرهێنانێ، پیشەسازی، بازرگانی و نوكە گەشتوگوزارێ ژی. دانان و دروستكرنا ڤان جۆرە پڕۆژەیان ل هەرێما كوردستانێ و ل هەولێرێ ب تایبەتی، دێ ڕێخوەشكەر بێت بۆ دروستكرنا دەلیڤەیێن كاری بۆ گەنجێن مە كۆ بێگومان وزەیەكا زۆرا گەنجان ل كوردستانێ هەیە كو بشێن د كەرتێ تایبەت دا كار بكەن و شیانێن خوە پێشبێخن و بێگومان ب دروستكرنا ڤان جۆر پرۆژەیان، شارەزاییەكا نوو ژی دێ هێتە هەرێما كوردستانێ كۆ گەنجێن مە دێ شێن مفای ژێ وەرگرن.
هەروەسا سوپاسییا وەلاتێ ژاپۆنێ دكەم بۆ پشتەڤانی و پالپشتییا وان بۆ بجهئینانا ڤان جۆرە پڕۆژەیان كو بێگومان كاریگەرییەكا زۆر هەیە، شیانێن وان و زانینا وان شیا ببیتە ئەگەرا هندێ كو ئەم ژی مفای ژێ وەربگرین و ئەڤ جۆرە پڕۆژەیە ل هەرێما كوردستانێ بهێنە بجهئینان.
حوكمەتا هەرێما كوردستانێ بەرنامێ وێ ژ دەستپێكێ ئەو بوو كو دەلیڤەیێن كاری بۆ گەنجێن مە دروست بكەت و گرنگییەكا زێدەتر ب كەرتێ تایبەت بدەین كو كەرتێ تایبەت هاریكار بیت د ڤەژاندنا ئابۆری دا د هەموو سێكتەران دا ل كوردستانێ. بێگومان سەردار گرۆپ و تۆیۆتا ئیراق پشكەكا گرنگ و سەرەكینە د هاریكارییا پڕۆژەیێن حوكمەتێ دا بۆ سەرئێخستنا ئەڤێ ئەجێندایێ.
دیارە دروستكرنا (هەولێر مۆتۆر سیتی)، پشكەكە ژ ئەڤان پڕۆژەیان كو ژ ڕوویێ گەشتوگوزاری ڤە دێ شێت ب هزاران خەلكی ئینیتە هەرێما كوردستانێ، زێدەباری هندێ كو دێ ڕێخوەشكەر بیت بۆ گەنجێن مە و بۆ ئەوان خەلكێن كو حەزا لێخورینا ترۆمبێلان هەی و دڤێن ب شێوەیەكێ پرۆفێشنال ژی ئەڤی كاری بكەن، ئەڤ دەلیڤە دێ بۆ وان هێتە پەیداكرن. هیڤیدارم پاشتر ئەڤ بەرێزێن كو دهێن و لڤێرە مفای ژ ئەڤی بەشی وەردگرن، بابەتێ سەلامەتیێ ل بەرچاڤ وەرگرن و خوەپاراستنێ ژ ڕوودانێن نەخوازراو بكەن.
مە گەلەك بزاڤ كرینە ل گەل وەلاتێن دۆست كو هاریكارییا مە بكەن د ئینانا پشكەك ژ كارێن خوە دا ژ ڕوویێ پیشەسازی ڤە یان ژی هاندان و پشتەڤانیكرنا ئەجێندایا حوكمەتێ د پێشئێخستنا پیشەسازیێ دا ل هەرێما كوردستانێ، ب ئەڤێ چەندێ كو پشكەك ژ كۆمپانییێن خوە د بەستنا پارچەیان پێكڤە و بەشێن وان پێكڤە، یان ژی پێكڤەگرێدانا ترۆمبێلان و ڤان جۆرە كاران، لڤێرە هاریكارییا مە بكەن. پێشئێخستنا بەشێ پیشەسازیێ دێ كاریگەرییەكا زۆر هەبێت ل سەر دروستكرنا دەلیڤەیێن كاری بۆ گەلەك ژ ئەوان گەنجێن كو نوكە حەز دكەن د بوارێن جودا دا كار بكەن. ئەم سوپاسییا هەموو وان وەلاتان دكەین و دێ بەردەوام بین د هاندانا وان دا بۆ هاریكاریكرنا مە د سەرئێخستنا ڤێ هزرێ دا.
ژ ئالییەكێ دی ڤە كوردستان ژ ڕوویێ جیۆپۆلۆتیكی ڤە جهەكێ سەركەفتی یە دگرێدانا چەندین بازارێن مەزنێن ڕۆژهەلاتا ناڤین دا، ژ ئالییەكی توركیا و ژ ئالییەكی ئیران و ژ ئالییەكی ژی وەلاتێن دی یێن عەرەبی كو كوردستان كەفتییە ناڤەڕاستا ڤان ماركێتێن مەزن كو دێ شێت هاریكاریێ كەت د پێشئێخستن و پێكڤەگرێدانا ئابۆرێ ڤان وەلاتان دا و حەتا نێزێككرنا گەلێن دەڤەرێ پێكڤە، كوردستان دێ شێت ڤی ڕۆلێ گرنگ بینیت و هەتا نوكە ژی ئەڤ ڕۆلە دیتیە.
دەستخوەشیێ ل كۆمپانییا تۆیۆتا ئیراق دكەم بۆ ئەوی كارێ نایاب یێ كو دكەن و سوپاسییا هەوە ژی دكەم بۆ وەبەرهێنان و كارێن هەوە یێن ئێك ل دووڤ ئێك كو دكەن بۆ خزمەتا هەرێما كوردستانێ.
ب دەلیڤە دزانم ل سەر بابەتەكێ دی باخم، وەكو دزانن ئەڤرۆ دووماهی مۆهلەتا ئەركێ هێزێن هەڤپەیمانانە دژی داعشێ كو بۆ هاریكاریكرنا ئیراقێ هاتبوون، ئەڤرۆ ئەركێ ڤان هێزان ب دووماهی دهێت، لڤێرە دخوازم ب ناڤێ خەلكێ كوردستانێ سوپاسییا هەموو هەڤپەیمانان، ئەمریكا و هەموو وەلاتێن ئۆرۆپی كو هاریكارییا مە كری د ڕووب ڕووبوون و شكاندنا داعشێ دا، د هاریكاریكرنا باشتركرنا شیانێن هێزا پێشمەرگەی دا، پاراستنا هەرێما كوردستانێ و پاراستنا هەموو ئیراقێ، ئەركەكێ پیرۆز بوو كو ئەوان هاریكارییا مە كری و ئەم سوپاسییا وان دكەین و پێزانینێن مە هەنە بۆ هەموو قوربانییێن وان، بۆ هەموو زەحمەت و ماندیبوونا وان، بۆ هەموو ئەو پالپشتییا كو ل سالێن بۆری پێشكەشی مە كرین و بێگومان ئەو هاریكاری و پالپشتی و پشتەڤانی ژ بیرامە ناچێت. جارەكا دی ب ناڤێ هەوە هەموویان سوپاسییا هێزێن هەڤپەیمانان دكەم.
ب دووماهیئینانا ئەركێ هێزێن هەڤپەیمانان، ئانكو ب دووماهیئینانا پەیوەندییان نینە ل گەل وان دۆستێن مە، بەلكو شێوازێ پەیوەندییان دێ چێتە بوارەكێ دی و دێ ب جۆرەكێ بیت ، هەم ژ ڕوویێ ئابۆری ڤە، هەم ژ ڕوویێ كولتووری و سیاسی ڤە، هەم ژ ڕوویێ ئەمنی و سەربازی ژی ڤە، پەیوەندیۆێن ئیراقێ ل گەل ئەمریكایێ و وەلاتێن ئۆرۆپی و هێزێن هەڤپەیمانان، ب جۆرەكێ دی دێ بەردەوام بن كو هەرێمێ كوردستانێ ژی وەكو پشكەكا چالاك و كاریگەر د حوكمەتا ئیراقێ دا دێ شێت و دێ پشكدار بێت د پێشئێخستنا ڤان جۆرە پەیوەندییان دا.
دبیت گەلەك ژ دوژمن و نەحەزان بێژن كو ب دووماهیئینانا ئەركێ هەڤپەیمانان دێ مەترسییەكا زێدەتر ئێخیتە سەر هەرێما كوردستانێ كو بێگومان هێشتا مەترسییا تیرۆرێ مایە، نە ئەڤەیە بێژی مە هیچ مەترسییەك یان هیچ تەحەدییەكا ئەمنی نەما بیت، بەلێ پشتڕاست ژی دكەین كو هەم هێزێن ئیراقێ نوكە شیانێن وان ژ جاران باشترن، هەم هێزا پێشمەرگەی یا ب هێز و ئامادەیە بۆ بەرهنگاربوونا هەر جۆرە مەترسییەكێ كو تووشی هەرێما كوردستانێ ببیت. لەوڕا ئەز جارەكا دی ژی پشتڕاستیێ ددەم كو هێزێن مە بەرهەڤن بۆ ڕووب ڕووبوونا هەر هێرشەكێ یان هەر مەترسییەكێ كو خودێ نەكەت ڕوو ل هەرێما مە و ل ئیراقێ ژی بكەت.
زێدەباری بابەتێ ئەمنی و ئەوان تەحەدییێن كو ڕوو ب ڕووی مە بووین، چەندین تەحەدییێن دی ژی ل بەر سینگێ مە هەنە ئێك ژ وان تەحەدییا ئابۆری یە، ب تایبەتی پشتی وان شەڕ و پێكدادانێن كو د دەڤەرێ دا هەبوون، ب شێوەیەكێ نەرێنی كاریگەری ل سەر ئابۆرێ ئیراقێ كریە، لڤێرە پێدڤییە ب هەموو جۆران هاریكارییا هەڤدوو بكەین و هەموو بزاڤان ژی دكەین ل هەرێما كوردستانێ و ل گەل حوكمەتا فیدرالی ژی دێ هەموو شیانێن خۆ ئێخینە كاری بۆ وێ چەندێ بشێین ڕوو ب ڕووی ئەوان تەحەدییان ژی ببین و ئەوان قەیران و ڕەوشێن نەخوەشێن نوكە ئەم تێدا دەرباز دەبین. ل هەرێما كوردستانێ چ ژ دەستێن مە بهێت بۆ پشتەڤانیكرنا حوكمەتا فیدرالی، دێ بەردەوام بین و چاڤەڕێی ژی دكەین حوكمەتا فیدرالی ژی ب ئەركێ خوە ڕابێت د جهئینانا دەستووری دا و د بابەتێ دادیێ دا و د هاریكارییا هەموو دەڤەرێن ئیراقێ دا ب شێوەیەكێ وەكهەڤ.
ئەوا ل سەر مە ژی ل هەرێما كوردستانێ دێ بەردەوام بین ل گەل هێزێن سیاسی یێن دی یێن كوردستانی و داخوازێ ژ وان دكەین كو ئەو ژی ب ئەركێ خوە یێ نیشتمانی ڕابن و ئەو بەرپرسیارییا دكەڤیتە سەر ملێن وان بجهـبینن و زووتر پێنگاڤێن لەز ب هاڤێژن بۆ وێ چەندێ پەرلەمان بهێتە كاراكرن ، چونكە كاراكرنەڤەیا پەرلەمانی پێنگاڤا ئێكەمە بۆ پێكهێنانا حوكمەتێ كو گەلەك گەلەك پاشكەفتییە. خەلكێ كوردستانێ چاڤەڕێی وێ چەندێ یە حزبێن سیاسی زێدەتر بیر ژ بەرژەوەندییا نیشتمانی یا خەلكێ كوردستانێ بكەن، نە بەرژەوەندییا حزبی و كەسی. ئەم برەهەڤین و ژ ڕۆژا ئێكێ ژی ئەم بەرهەڤ بووینە، نوكە ژی داخوازێ دكەین كو هەموو هێزێن سیاسی، ب تایبەتی ئەوێن كو شیاین پشكەك ژ دەنگێن وەلاتییان ب دەستبینن و باوەرییا خەلكی پێ هاتیە دان، نوكە بەرامبەر وی خەلكی بەرپرس بین و د پەرلەمانی دا ئەركێ خوە ببینن و پەرلەمانی كارا بكەن. گەلەك ئەركێن دی یێن ماین كۆ پێدڤی ب هاریكاری و هەماهەنگییا حوكمەتێ و پەرلەمانی هەیە د دەركرنا یاسایان دا و ڕێخوەشكرنا كاران دا، هاریكارییا زێدەتر یا خەڵكی و باشتركرنا كارێن خزمەتگوزاری بۆ هەرێما كوردستانێ. جارەكا دی داخوازێ ژ وان دكەینەڤە كو لەزێ بكەن د پێكهێنانا حوكمەتێ دا و ئەم بەردەوام بەرهەڤین.