ئەڤرۆ نیوز:
وەزارەتا ساخلەمی و ژینگەها عیراقێ راگەهاند، د ٢٤ دەمژمێرێن بوری دا 17 حالەتێن نوویێن توشبوون ب کۆرۆنایێ هاتینە تۆمار کرن و ٢١ کەس ژێ چێبووینە.
ئەڤرۆ دوشەمبی وەزارەتا ساخلەمی و ژینگەها عیراقێ راگەهاند، ” د ٢٤ دەمژمێرێن بوری دا، ١٧ حالەتێن نوویێن توشبوون ب کۆرۆنا یێ هاتینە تۆمارکرن، کو هەشت ل بەغدا، حەفت ل موسەنا، ئێک ل بەسرە، ئێک ژی ل نەجەف”.
ئەو ژی هاتیە، 21 کەسێن دی ب تەمامی چێبووینە، کو هەشت ل بەسڕە، شەش ل زیقار، سێ ل بەغدا، دو ل واست، ئێک ل نەجەف و ئێک ل میسان.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، سێ کەسێن دی ل سلێمانیێ تووشی کۆرۆنا یێ بووینە، کو هەموو وان بەرکەفتیێن توشبوویێن بەرێ نە.
وەزارەتا ساخلەمیا هەرێمێ بەلاڤکریە ژی، د بەردەوامیا پشکنین و لێگەریانێ لدووڤ گومانلێکریان، سێ توشبوویێن دی یێن کۆرۆنا یێ ل پارێزگەها سلێمانیێ هاتنە دەست نیشانکرن.
دیار کر ژی، ژنەکا د ژیێ ٢٦ سالیێ و کچەکا د ژیێ ١٤ سالیێ و زارۆیەکێ د ژیێ ٨ سالیێ دا تووشی کۆرۆنا یێ بووینە، کو ئاکنجیێن شارباژێر بووینە ل سلێمانیێ و تێکەلی توشبوویێن بەرى نوکە بووینە.
ئەڤرۆ نیوز:
ئەڤرۆ 27.4.2020 ژوورا ئۆپەراسیۆنا ل پارێزگەها دهوکێ روونکرنەک بەلاڤکریە و تێدا هاتیە:
ژ بۆ پاراستنا ساخلەمیا خەلکێ پارێزگەها دهوکێ و ژ پێخەمەت جێبەجێکرنا بریارا قەدەغەكرنا هاتنوچوونێ دناڤبەرا پارێزگەهان و ب تايبەت پارێزگەها دهۆكێ و نەینەوا، هندەك وەلاتیێن خۆجهێن پارێزگەها دهوكێ ل زالگەها خەتارێ ماینە.
وەکو ئەرکەکێ نيشتيمانى و مرۆڤایەتی مە ب فەر دیت کو رێک بهێتە دان بۆ هاتنا وان بو پارێزگەها دهوکێ و لپەی پێرابوونێن ساخلەمیێ، ئاگەهداریا وان وەلاتیان دکەین یێن کو دڤێن بهێنە دناڤ پارێزگەها دهۆکێ ب رێیا زالگەها ئاماژەپێکری کو ئەڤ زالگەهە دێ هێتە گرتن بەرامبەر هاتنێ بو ناڤ پارێزگەهێ هەر ژ رێکەفتی 28-4-2020 هەتاکو 5-5-2020 و ب تنێ رێک دێ هێتە دان بۆ چوونێ بەرەف پاریزگەها نەینەوا بۆ کارێن بازرگانی و حالەتێن فەر یێن دەستووردایی ژ لایێ ژوورا ئوپەراسیونا ل پارێزگەها دهوکێ.
کارێ ئاماژە پێکری دێ هێتە ئەنجامدان لدووڤ داخوازیا رێڤەبەریا گشتی یا ساخلەمیا پارێزگەها دهۆکێ بۆ مەرەما زێدەتر لێگەریان و دووفچوون و کونترولکرنا تیمێن ساخلەمیێ پێخەمەت زانینا ژێدەرێن پەیدابوونا توشبوویێن نوو ب ڤایروسێ کۆرۆنا ل پارێزگەها دهوکێ.
گۆتیە ژی، سوپاس بۆ ئاسايشا دهۆكێ ب تايبه ت و تیمێن زالگەها خەتارێ بۆ ئەنجامدانا کارێ رۆژانە ب رەنگەکێ رێکوپێک بۆ خزمەتکرنا وەلاتیان.
ئەڤرۆ نیوز:
وەزارەتا ساخلەمیێ یا هەرێما کوردستانێ راگەهاند کو ٥ کەسێن دی ل باژێرێ هەولێرێ تووشی ڤایرۆسێ کۆرۆنایێ بووینە.
وەزارەتا ساخلەمیێ دیار دکەت کو ئافرەتەکا ٣٦ سالی ل گەل سێ زارۆیێن خوە یێن د ژیێ ١١،١٥ و ١٦ سالی ل گەل زەلامەکێ دی ئەو ژی د ژیێ ٣٣ سالیێ دایە، ل باژێرێ هەولێرێ تووشی ڤایرۆسێ کۆرۆنایێ بووینە.
ل گۆر وەزارەتا ساخلەمیێ هەر ٥ تووشبوویێن نوو هەموو ژی بەرکەفتیێن تووشبوویێن بەرێ نە.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ پێشوازی ل جینین پلاسخارت نوونەرا تایبەت یا سکرتێرێ گشتی یێ نەتەوێن ئێکگرتی ل عیراقێ کر.
د کۆمبوونێ دا سەرۆکێ حوکمەتا هەرێما کوردستانێ راگەهاند کو راگرتنا مووچێ فەرمانبەرێن هەرێما کوردستانێ ژ ئالیێ حوکمەتا عیراقێ بنپێکرنا دستووری یە و نابیت عیراق بابەتێ مووچێن فەرمانبەران وەکو کارتەکا فشارێ ل دژی هەرێما کوردستانێ بکار بینیت.
سەرۆکێ حوکمەتێ ئەو یەک ژی دیار کر کو دەمێ کابینا نەهێ یا حوکمەتێ دەست ب کارێ خوە کری وان سەرەدانا بەغدا کرینە و نیازپاکیا خوە بۆ چارەسەریا هەموو پرسێن د ناڤبەرا هەرێما کوردستانێ و بەغدا دا دیار کرینە.
مەسرور بارزانی ئەو یەک ژی دیار کر کو هەرێما کوردستانێ بەرهەڤە هەموو ئاریشێن هەی ل گۆر دستووری ل گەل بەغدا چارەسەر بکەت.
ئەڤرۆ نیوز:
پشتی کو حالەتەکێ ڤایرۆسێ کۆرۆنا ل ئێک ژ تاخێن باژێرێ نسێبینێ یێ باکورێ کوردستانێ هاتە تۆمار کرن، بریار هاتە دان کو سێ تاخێن وی باژێری بهێنە کەرەنتین کرن.
بەرپرسێن ساخلەمیێ دیار دکەن کو رەنگە وی کەسی تێکەلی ل گەل چەندین کەسان ل هەر سێ تاخێن باژێری هەبن و ژ بەر هندێ ژی بۆ پاراستنا باژێری ئەو نەچار ماینە هەر سێ تاخێن” گرمەلی، تەپەئوستو و دوروجا یێ باژێرێ نسێبینێ کەرەنتین بکەن.
ئەڤرۆ نیوز:
د. دلۆڤان محەمەد رێڤەبەرێ گشتی یێ ساخلەمیا هەولێرێ راگەهاند کو دو تووشبوویێن دی یێن کۆرۆنایێ ل هەولێرێ ب تەمامی باش بووینە و پشتی چەندین پشکنینێن نوو بۆ وان هاتیە کرن دیار بوویە کو ب تەمامی ژ کۆرۆنایێ باش بووینە.
رێڤەبەرێ گشتی یێ ساخلەمیا هەولێرێ دیار ژی دکەت کو ب گشتی هەتا نها ١٥٩ نەخوشێن کۆرۆنایێ ل هەولێرێ باش بووینە.
ئەڤرۆ نیوز:
د. جوتیار عادل پەیڤدارێ حوکمەتا هەرێما کوردستانێ راگەهاند کو تێگەهشتنەکا باش د ناڤبەرا حوکمەتا هەرێما کوردستانێ ل گەل فراکسیۆنێن کوردستانی ل پەرلەمانێ عیراقێ ل دۆر بابەتێ مووچەی و پرسێن دارایی هەیە و گۆت: (نابیت بابەتێ مووچەی وەکو کارتەکا فشارێ ل دژی خەلکێ کوردستانێ بهێتە بکارئینان، هەرێما کوردستانێ پایبەندە ب رێککەفتنا سالا ٢٠١٩ یا ل گەل بەغدا).
پەیڤدارێ حوکمەتا هەرێما کوردستانێ ئەو یەک ژی دیار کر کو بۆ چارەسەریەکا بنگەهین ل دۆر بابەتێ مووچەی و پرسێن دی یێن گرێدای نەفتێ هەرێما کوردستانێ دڤێت یاسایا سالا ٢٠٠٧ یا کو رەشنڤیسا وێ ژ ئالیێ هەرێما کوردستانێ و بەغدا هاتبوو نڤیسین بهێتە کاراکرن و کار پێ بهێتە کرن.
ئەڤرۆ نیۆز، قائید میرۆ:
باوەریدان ب کابینا نوو یا حوکمەتا عێراقێ نێزیک بوویە و شرۆڤەکارەکێ سیاسی ژی ئاشکراکر، راستە کورد پشتەڤانیا کازمی دکەن، بەلێ ب مەرجەکی مافێن ھەرێما کوردستانێ ل بەرچاف بن.
دیندار دۆسکی، شرۆڤەکارێ سیاسی بۆ ئەڤرۆ نیۆز دیارکر” راستە کورد و ھەرێما کوردستانێ پشتەڤانیا مستەفا کازمی بۆ پێک ئینانا حوکمەتا نوویا عێراقێ دکەن، بەلێ د ئەڤی چوارچوڤەیێ لێک تێگەھشتن و پشتەڤانیا ھێزێن سیاسیە یێن عێراقێ بۆ بەربژێرکرنا مستەفا کازمی، چونکە بەری کازمی بھێتە بەربژێرکرن بۆ وەرگرتنا پۆستێ سەرۆک وەزیرێن عێراقێ پرس ب کوردان و ھەموو لایەنێن سیاسی یێن مەزن ل عێراقێ ھاتیە کرن.
دیندار دۆسکی ئاماژەکر” ھەر لایەنەکێ سۆزا پشتەڤانیێ دیارکربیت بۆ مستەفا کازمی ئەڤە بێگومان ل ھەمبەری ڤێ چەندێ کازمی سۆزدایە بەرژەوەندی و مافێن ھەموو پێکھاتان بھێنە بەرچاف گرتن، واتە کورد پشتەڤانیا حوکمەتا نوو یا عێراقێ ناکەن ھەکە ئەو حوکمەت دژی کوردان بیت.
ئه‌ڤرۆ نیوز:
نوونه‌را تایبه‌تا سكرتێرێ گشتی یێ نه‌ته‌وه‌یێن ئێكگرتی ل عیراقێ، بزاڤێن حكومه‌تا هه‌رێمێ بۆ به‌رهنگاربوونا ڤایرۆسێ كورونایێ ب بلند نه‌رخاند و ته‌ئكید كر كارێن باش هاتینه‌كرن.
جینین هینیس پلاسخارت نوونه‌را تایبه‌تا سكرتێر گشتی نه‌ته‌وه‌یێن ئێكگرتی بۆ كارۆبارێن عیراقێ د پرێس كونفرانسه‌كی دا ل گه‌ل د.سامان به‌رزنجی وه‌زیرێ ساخله‌میا حكومه‌تا هه‌رێماكوردستانێ راگه‌هاند حكومه‌تا هه‌رێما كوردستانێ كارێن زۆر باش كرینه بۆ به‌رهنگاربوونا ڤایرۆسێ كورونایێ ئه‌ڤه زۆرا گرنگ بوو، عیراقێ و هه‌رێما كوردستانێ كارێن باش كرینه بۆ به‌رهنگاربوونا كورونایێ و دڤێت زۆر هشیار بن چونكو هێشتا ڤایرۆس ب دوماهی نه‌هاتیه جهێ مه‌ترسیێیه و چ حكومه‌ته‌ك بتنێ نه‌شێت سه‌ر بكه‌ڤیت ب سه‌ر كورنایێ دا، چونكو ئه‌ڤه كاری مه هه‌میانه و دڤێت پێكڤه به‌رهنگاریا ئه‌ڤی ڤایرۆسی بكه‌ین.
نوونه‌را تایبه‌تا سكرتێرێ گشتی نه‌ته‌وه‌یێن ئێكگرتی بۆ كارۆبارێن عیراقێ ئه‌و چه‌نده ژی راگه‌هاند: ئه‌ركێ هه‌ر تاكه‌كی یه ژ كه‌سێن دوروبه‌رێن خو دوور بكه‌ڤن، چونكو ئه‌ڤه باشترین رێكاره بۆ خۆ پاراستن و سوپاسیا هه‌ر لایه‌نه‌كی دكه‌ین كۆ به‌رهنگاریا ڤایرۆسێ كورونایێ كریه.
نيشاندان